Nishani vlerëson formacionin artistik për pasurimin e fondit të trashëgimisë kulturore /

Presidenti i Republikës, Bujar Nishani vlerësoi të martën me Titullin “Mjeshtër i Madh” Ansamblin Artistik “Mirdita”, me motivacionin ‘për ndihmesë të veçantë në ruajtjen, interpretimin dhe përcjelljen ndër breza të folklorit të Mirditës, duke pasuruar fondin e artë të trashëgimisë kulturore të popullit shqiptar’.
Në ceremoninë e organizuar me këtë rast në Presidencë, Kreu i Shtetit vlerësoi maksimalisht Ansamblin Artistik “Mirdita” si një ndër më emblematikët e trevave shqiptare.
“Ky Ansambël, që gjatë rrugës së tij gjysmëshekullore përfshiu mbi 600 krijues, këngëtarë dhe interpretues të zhanreve të ndryshme të këngës popullore, e ka zanafillën në vitet 60-të të shekullit të shkuar dhe mbetet nga më unikalët për sa i përket tipologjisë folklorike në tërë trevat shqiptare”, tha Presidenti në fjalën e tij.

Kreu i Shtetit theksoi se Mirdita është ndër zonat më kompakte të vendit sa i përket etnokulturës, folklorit, traditave shqiptare, madje edhe përgjatë kohës së pushtimit otoman, pasi ajo mundi t’i ruajë të gjitha këto tradita ku krijimtaria burimore e popullit veçanërisht u ruajt me stoicizëm.
“Në mbi 60 vite krijimtari, ky Ansambël ka dhënë kontribut të pamatë në folklorin shqiptar, festival pas festivali kombëtar e deri në përfaqësimet e vendit në skenat prestigjioze ndërkombëtare. Edhe pse brenda një ngushtësie ideologjike që vendi kaloi për dekada të tëra, krijuesit dhe interpretuesit e këtij Ansambli arritën të mblidhnin bulëzat më të mira të popullit ndër shekuj, për t’i rreshtuar aq bukur në gjerdanin e artë të kulturës burimore shqiptare”, vlerësoi Nishani.
Presidenti në fjalën e tij përmendi figura të njohura të artit, që kanë bashkëpunuar me ansamblin “Mirdita” si poeti  Gjokë Beci dhe muzikanti Dorian Nini.

Në përfundim Presidenti i Republikës inkurajoi Ansamblin “Mirdita” që të mos reshtë për asnjë moment në përpjekjet për të çuar më tej këtë traditë të shkëlqyer të krijuar tashmë dhe t’i shërbejë me devotshmëri nxitjes dhe promovimit të vlerave kulturore të zonës së Mirditës brenda dhe jashtë Shqipërisë.
Gjatë kësaj ceremonie u nderuan me Titullin “Naim Frashëri” dhe muzikanti Dorian Nini; prijësi i grupit të burrave të Mirditës, Fran Vorfi si dhe Kolë Picaku, i cili vazhdon në pension të punojë po me atë përkushtimin djaloshar me disa formacione orkestrale, veçanërisht me fëmijët e vegjël dhe  të rinjtë e talentuar.