Dhuna dhe bllokimi i punës së institucioneve nuk janë mjete për zgjidhjen e problemeve politike kanë deklaruar kryeministri i Kosovës Isa Mustafa dhe zëvendësi i parë i tij Hashim Thaçi, gjatë një bashkëbisedimi me përfaqësues të shoqërisë civile.
Dy krerët e Qeverisë së Kosovës dhe partive të koalicionit, Lidhjes Demokratike dhe Partisë Demokratike, thanë se opozita po e pamundëson komunikimin normal të Qeverisë me Kuvendin, sidomos kur është në pyetje komunikimi në lidhje me dialogun me Serbinë dhe marrëveshjet e arritura.
Kryeministri Isa Mustafa i ka cilësuar të pavenda deklarimet e liderëve opozitar për kthimin e Serbisë në Kosovë.
Ai ka thënë se me procesin e dialogut ndërmjet Kosovës dhe Serbisë që po udhëhiqet nga Bashkimi Evropian, Kosova i ka marrë përsipër disa obligime ndërkombëtare që ndërlidhen me normalizimin e marrëdhënieve ndërmjet dyja vendeve si dhe integrimin e komunitetit serb.
“Ne kemi marrë përsipër edhe obligime ndërkombëtare, sidomos për garantimin e të drejtave të popullatës joshumicë, përkatësisht të pakicave dhe që ato të bëhen pjesë e projektit tonë, pjesë e shtetit sovran dhe të pavarur të Kosovës”, ka deklaruar Mustafa.
Ndërkohë, zëvendëskryeministri , Hashim Thaçi ka thënë se çështja kryesore për të cilën flet opozita, siç është themelimi i Asociacionit të komunave me shumicë serbe, nuk e ka burimin vetëm tek dialogu me Serbinë, por edhe te marrëveshja e koordinuar me bashkësinë ndërkombëtare për shpalljen e pavarësisë së Kosovës, e njohur si Pakoja e Ahtisaarit.
“Asociacioni, fillimisht buron nga dokumenti i presidentit Ahtisaari. Mbi bazën e dokumentit të Ahtisaarit e kemi shpallur Kosovën e pavarur e sovrane. Pastaj ka vazhduar në procesin e negociatave në Bruksel për normalizimin e marrëdhënieve ndërmjet Kosovës dhe Serbisë, ato bisedime i kam udhëhequr unë në rrafshin politik. Ka qenë aty edhe përfaqësuesi i Aleancës për Ardhmërinë e Kosovës dhe ka luajtur një rol jashtëzakonisht pozitiv”, është shprehur Thaçi.
Ndërkaq sa i përket shënjimit të vijës kufitare me Malin e Zi, zëvendëskryeministri Thaçi ka potencuar se ajo nuk do të ratifikohet në Kuvend përderisa të mos sqarohen të gjitha dilemat dhe vërejtjet qoftë nga opozita apo shoqëria civile.
Më pas, në kuadër të debatit, njëri nga panelistët, Halil Matoshi analist politik, ka thënë se gjendja në Kosovë është mjaftë e rrezikshme, përderisa qeveria, sipas tij, nuk është duke e pyetur për asgjë opozitën.
Duke e cilësuar këtë si një lloj injorimi të gjendjes faktike, Matoshi ka thënë se gjetja e një konsensusi me opozitën është më se e domosdoshme, sado që sipas tij, opozita po mbështetet në dy kauza të paqëndrueshme dhe tejet nacionaliste.
Krejt këtë gjendje të krijuar, Matoshi e sheh si tendencë të disa individëve dhe një pjese të spektrit politik që të çojë vendin në kaos për të shpëtuar nga Gjykata Speciale për krime lufte.
“Vazhdimisht e kam parë dhe vazhdojë ta shoh një krye-kauzë e cila është Gjykata Speciale. Dikush po tenton që t’i shmanget kësaj Gjykate qoftë edhe duke e dërguar vendin buzë luftës civile për t’u imponuar nesër si fuqi që e kthen stabilitetin ne vend. Unë kështu e kam parë dhe e shoh këtë gjendje”, ka thënë Matoshi.
Përderisa pushteti po përgatitet që të zgjedh presidentin e ardhshëm të Kosovës, qoftë edhe në një seancë me gaz lotsjellës e polici në sallë të Kuvendit, kurse opozita po përgatitet për protesta në ditën e pavarësisë së Kosovës, Matoshi u ka bërë thirrje të dyja palëve që të ulen dhe të arrijnë marrëveshje.
Kjo marrëveshje, sipas tij, do të përmbante në vete reforma në gjithë sistemin në mënyrë që vendi të mos futet më në kriza të ngjashme.
Paraprakisht, ai u ka kërkuar drejtuesve të qeverisë që të mos thirren më në legjitimitetin e fituar, por të reflektojnë në bazë të gjendjes krijuar dhe të japin dorëheqje, në mënyrë që t’i hapet rruga formimit të një qeverie gjithëpërfshirëse, kalimtare deri në zgjedhjet e ardhshme.(Kortezi:Zijadin Gashi)
Mustafa e Thaçi ftojnë liderët e opozitës të jenë bashkë te Jahjaga
-Qeveria e Kosovës e përkushtuar për zgjidhjen e problemeve të luftëtarëve të UÇK-së/
Nga Behlul Jashari/ PRISHTINË, 6 Shkurt 2016/ Liderët e dy partive më të mëdha të maxhorancës së koalicionit qeverisës, i LDK – kryeministri Isa Mustafa dhe i PDK – zëvendëskryeministri Hashim Thaçi, gjatë një konference për shtyp pas takimeve me përfaqësuesit e veteranëve të UÇK-së kanë shprehur gatishmërinë për të marrë pjesë dhe për të biseduar për tejkalimin e situatës në takimin e përbashkët me opizitën të ftuar për të hënën nga Presidentja e Republikës, Atifete Jahjaga.
“Natyrisht se unë si kryeministër iu kam bërë ftesë edhe vetë që të takohemi. Edhe unë, po ashtu, edhe zëvendëskryeministri dhe kryetari i Partisë Demokratike të Kosovës kemi treguar interesin dhe gatishmërinë që të marrim pjesë që të dytë. Por, ne, njëherësh i bëjmë ftesë edhe liderëve të opozitës që ata të jenë aty, sepse ne jemi që të gjitha çështjet t’i zgjidhim me dialog, me bisedë, në bazë të argumenteve dhe assesi që zgjidhjet të bëhen përmes dhunës”, tha kryeministri Mustafa.
Zëvendëskryeministri i parë, Hashim Thaçi, tha se dy kryetarët e partive më të mëdha në Kosovë do t’i përgjigjen ftesës së presidentes Jahjaga për takim të hënën në ora 9:00 në Presidencë.
“Besoj që është hap i drejtë dhe një proces i konsultave të brendshme institucionale, se dialogu është procesi i vetëm përmes të cilit mund të arrihen objektivat e përbashkëta të interesit shtetëror mes pozitës dhe liderëve opozitarë dhe jo format dhe metodat tjera që nuk përkojnë me traditën e qytetarëve të Kosovës dhe filozofinë politike kosovare në këto 25 vitet e fundit”, u shpreh ai.
Prandaj, vijoi Thaçi, duke konfirmuar përgjigjen pozitive, në të njëjtën kohë ftojmë edhe liderët opozitarë që t’i përgjigjen ftesës pozitivisht, t’i bashkëngjiten dialogut. “Është zgjidhja e vetme dhe mundësia më e mirë dhe ky është edhe vullneti i qytetarëve të Kosovës, në të njëjtën kohë është edhe këshilla e bashkësisë ndërkombëtare. Ne, në çdo rrethanë duhet të ulemi, duhet të bisedojmë. E kemi axhendën e qartë të interesave të shtetit të Kosovës dhe mendoj që ky dialog tejkalon çdo interes partiak, prandaj besoj që sot do të kemi edhe përgjigje pozitive të opozitës sepse është edhe në interesin e tyre”, tha zëvendëskryeministri Thaçi.
Në 4 dhjetor 2015, kryeministri i Republikës së Kosovës, Isa Mustafa, në një konferencë shtypi ka njoftuar se një ftesë zyrtare për takim atë ditë u kishte dërguar të drejtuesit e tre partive opozitare në Kuvendin e Kosovës, Visar Ymeri nga Lëvizja Vetëvendosje, Ramush Haradinaj nga AAK-ja dhe Fatmir Limaj nga Nisma për Kosovën, si dhe zëvendëskryeministrit të parë, njëherësh kryetar i PDK-së, Hashim Thaçi.
Por, ai takim i përbashkët nuk ka ndodhur.
Kryeministri i Republikës së Kosovës, Isa Mustafa, ka zhvilluar sot takime me përfaqësuesit e veteranëve të luftës së Ushtrisë Çlirimtare të Kosovës (UÇK), përkatësisht me një delegacion të Këshillit për Mbrojtjen e të Drejtave të Luftëtarëve të UÇK-së, të kryesuar nga Xhevdet Qeriqi, si dhe një delegacion të Organizatës së Veteranëve të Luftës së UÇK-së, të kryesuar nga Smajl Elezaj.
Në takime ishin të pranishëm edhe zëvendëskryeministri i parë, njëherësh ministër i Punëve të Jashtme, Hashim Thaçi dhe ministri i Punës dhe Mirëqenies Sociale, Arban Abrashi.
Në një konferencë të mbajtur pas dy takimeve, kryeministri Isa Mustafa ka shprehur përkrahjen e mëtejshme të Qeverisë së Kosovës për veteranët e luftës së UÇK-së.
Kryeministri Mustafa tha se është biseduar për preokupimet, hallet, kërkesat dhe nevojat e veteranëve të luftës së UÇK-së.
“Treguam përkushtimin e Qeverisë së Republikës së Kosovës që bashkërisht t’i zgjidhim të gjitha problemet e mundshme të cilat mund t’i zgjidhim në kohë të caktuar dhe në periudha të caktuara kohore. Ne si Qeveri kemi bërë përpjekje që të sigurojmë fondet për të përballuar pensionet për veteranët. Natyrisht se numri i veteranëve është i tillë që ne duhet të mundohemi që të plotësojmë të gjitha kërkesat e tyre sipas vendimeve të cilat janë marrë, t’i plotësojmë edhe në pikëpamje kohore, të kujdesemi edhe për invalidët e luftës të UÇK-së”, tha kryeministri.
Kryeministri Mustafa, po ashtu, falënderoi veteranët për bashkëpunimin, mirëkuptimin dhe për angazhimin e tyre që të gjitha problemet të zgjidhen përmes bisedave, përmes argumenteve dhe përmes mënyrave të bashkëpunimit.
Smajl Elezaj nga Organizata e Veteranëve të Luftës së UÇK-së, e ka vlerësuar shumë konstruktiv takimin dhe mirëkuptimin e hasur nga kryeministri, zëvendëskryeministri i parë dhe ministri i Punës dhe Mirëqenies Sociale për gjetjen e rrugëve për tejkalimin e vështirësive që kanë veteranët pretendentë për invalid të luftës.
“Biseduam për verifikimin e veteranëve, për zgjatjen e verifikimit që ka zgjatë shumë, ta përfundojmë atë kapitull dhe hallet e tjera të veteranëve. Çështja e pagesës së veteranëve, që ka ankesa nga terreni dhe veteranët e luftës, dhe jemi dakorduar që prej kohës kur kanë aplikuar veteranët e luftës Qeveria e Kosovës obligohet që t’i bëjnë pagesat për veteranët e luftës”, tha Elezaj, duke shprehur besimin se ky takim do të jetë frytdhënës.
Lidhur me zhvillimet e fundit në Kosovë, në raportet e pozitës dhe opozitës, Elezaj ka shprehur dëshirën e luftëtarëve të UÇK-së që më të mos shihen skena si ato që janë parë lidhur me dy temat aktuale, të ngritura tash e pesë muaj në Parlamentin e Kosovës, ku është përdorur në një formë gazi lotsjellës dhe dhuna edhe në rrugët e Kosovës.
“Mendoj se duhet të mendojmë shumë më shumë për ndërtimin e Kosovës, për forcimin e institucioneve të Kosovës dhe jemi që pozita dhe opozita çdo çështje të ngritur, jo vetëm këto të dyja, të ekziston transparenca, bashkëpunimi dhe të merren vesh me dialog dhe assesi në rrugë të tjera”, tha Elezaj.