Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Lamtumirë Joy Watkins, Amerikane shpirt flori !

by

Nga Keze Kozeta Zylo/

Sot familja Watkins është në ditë zie për humbjen e nënës, bashkëshortes, gjyshes shembullore, Joy Watkins.  Po aq ditë të trishtë e ka dhe familja Zylo, vjehrra e vajzës së madhe Valbonës dhe krushka jonë.  Ajo vdiq në Gettysburg në Pennsylvania në moshën 73 vjeçare nga kthetrat e djallit Covd 19-të shpikur nga djajtë.  E pa sëmurur kurrë ra në koma një muaj në intubim në spital dhe nuk i mbijetoi dot edhe pse nen kujdesin intensiv mjekësor.  

Joy Watkins ishte një zonjë e urtë amerikane, që me edukatën e saj të lartë, dhe si një besimtare e devotshme diti të rrëmbejë zemrat tona shqiptare me respektin dhe dashurinë që tregonte në radhë të parë për vajzën tonë Valbonën, familjen dhe gjithë shoqërinë.  Ajo punoi gjithë jetën në qendër mjekësore derisa doli në pension e respektuar nga kolegët dhe miqësia e saj.  Në mirësinë e shpirtit, rregullin e organizimit të përsosur në çdo aspekt mësova shumë.  

Ajo çdo vit mblidhte 6 nipër dhe tri mbesat në shtëpi për 3 javë së bashku me bashkëshortin e saj të mrekullueshëm Ronaldin, për t’i bashkuar me njeri tjetrin si gjak dhe për të qenë tërë jetën të lidhur si Watkins.  Çfarë kujtimesh të paharruara kanë nipërit dhe mbesat për të!  Sa herë fillonin ditën e parë të shkollës nipërit dhe mbesat, ata vinin së bashku dhe i uronin për këtë ditë të shenjtë.  Me të drejtë bashkëshorti i saj Ronaldi na shkruajti, kur shkëmbenin mesazhe për të ditur rreth shëndetit të saj dhe ndërmjet tyre shkruante: “Kushdo që e ka takuar Joy-n ka qenë i bekuar”.  Dhe vërtetë ne e ndjejme në shpirt dhe zemër bekimin e saj.  

Kjo pandemi plagosi rëndë shumë familje në botë, për rrjedhojë dhe familje amerikane dhe shqipare si në rastin në fjalë.  Unë me Qemalin kemi kujtime të shkëlqyera me Joy-n, kujtimin e fundit e kishim në këtë shtator, kur ajo erdhi tek familja e djalit të saj Todd për të uruar fëmijët për shkollë dhe për t’u kujdesur për ditë me radhë për to.  Ne e ftuam në shtepinë tonë dhe darkuam së bashku si gjyshër me Dean dhe Emmën.  Ishin biseda shumë familjare dhe të ngrohta ashtu siç dinte t’i krijonte ajo.  Ditën tjetër po në shtator shkuam në New Jersey për të mbledhur mollë me dy mbesat.  Krishtlindjet e fundit vjet në dhjetor i festoi tek Klodiana dhe Kurt në Long Island, çfare lidhjesh të aferta që kishim!  

Familja e tyre fliste me admirim për Shqipërinë, pasi ata e vizituan për 10 ditë kur martuan djalin e tyre Todd-in me vajzën tonë Valbona.  Edhe pse janë shumë tradicional ata e pranuan me kënaqësi të vinin si familje dhe miqësia e tyre 15 veta të bënin dasmën në Tiranë, atje ku u lind dhe u rrit Valbona.  Ata në ditën e dasmës bënë foto dhe para Ministrise së Mbrojtjes dhe Unniversitetit, Korpësit qndror në Tirane si shenjë mirënjohjeje për Qemalin që kishte mbaruar aty inxhinierinë mekanike.  Të dy prindërit e Todd-it ishin shumë të lidhur me Valbonën, pasi e çmonin besnikërinë e saj, sidomos kur Valbona priti Todd-in për 7 vjet i cili ishte me shërbim në Gjermani dhe Irak.  Ata nuk ishin fejuar akoma.  Ata të dy u dashuruan në Universitet në Pennsylvania, por detyra e fushës së mjekësisë në ushtri e çoi me punë jashtë Amerikës.  Joy kishte ardhur dhe pranë Shkollës Shqipe “Alba Life” së bashku me djalin e saj Bryan, drejtor shkolle, Gettysburg për të parë mesimin nga afer shqip të mbesave të tyre për të cilat ndiheshin krenar që po mësonin gjuhën e nënës së tyre.   

Ata kishin marrë pjesë në disa aktivitete tonat familjare dhe shqiptare dhe për këtë ndiheshin krenar për lidhjet tona miqësore aq të afërta dhe të respektueshme.

Joy ashtu sic ka dhe emrin që përkthehet (gezim) i mblidhte së bashku tri familjet e fëmijëve në ditë festash dhe e fundit ishte ftesa dhe plani që kishte bërë për këtë vit në Ditën e Falënderimeve, por nuk mundi dot nga sëmundja makabre që e rrëmbeu.  

Ikja e saj na tronditi pamasë dhe la në pikëllim bashkëshortin e saj fisnik Ronald, tri djemtë e mrekullueshëm dhe 9 nipër e mbesa që i donte aq shumë

Paç paqe në Parajsë dhe Dritë të paste shpirti e ëmbla Joy!

Lamtumirë mikja jonë e shtrenjtë shpirt flori!

20 dhjetor, 2020

Staten Island, New York   

NE BOSTON NDERROI JETE SARE DOKO, DIELLI NGUSHELLON FAMILJEN

by

Gazeta Dielli ngushëllon bashkëpunëtoren e saj, përgjegjësen e Bibliotekës Fan S. Noli të Kishës së Shën Gjergjit në Boston,  zonjushën Neka Doko, për ikjen nga kjo jetë të nënës së saj të dashur Sare Doko.

Sare Doko ndërroi jetë me 17 dhjetor 2020, në ditën e lindjes së saj, në përvjetorin e 94. Ishte lindur me 17 Dhjetor 1926.

Gazeta DIELLI i përcjell ngushëllimet më të thella familjes dhe miqëve.

Pushoftë në paqe shpirti i saj!

***

Sare Doko – Shehu lindi në Berat mē 17 janar 1926. Ishte veterane e Luftës. Nga 1941 deri 1943 u përfshi në rezistencēn e vajzave të reja antifashiste në qytet, të drejtuar nga Margarita Tutulani. Pas çlirimit, e pa antarsuar në parti, drejtoi e vetme me sukses deri në mbylljen e tij për 11 vjet sistemin e triskëtimit në komitetin ekzekutiv të rrethit Berat. U vlerësua si vajza e komitetit, që me korrektësi, sensibilitet, shkathtësi e pērgjegjësi shpërndante dorazi triskat e ushqimit rradhëve të gjata të popullit. Ajo me dhimsuri shpesh do të ruante nga të sajat dhe të familjes për njërzit në nevojë pa prekur një cent nga sistemi, duke u kujtuar edhe sot, si “ Sara e triskave.” Më 1999 emigroi në Boston, ku jetoi me tre vajzat deri nē fund të jetës. Sare ishte e guximshme, e mënçur, praktike, efikase dhe largpamëse në vendimet e saj. Ajo ishte një forcë e ankoruar njësoj këtu për familjen dhe do të na mungojë pa masë. Do të prehet së shpejti e shoqēruar nga familja me një ceremoni private këtu në Boston më 22.12. 2020. La pas tre vajza, një mbesë dhe një nip që e deshën, u kujdesën dhe i qëndruan pranë deri nē fund të jetës. I përjetshëm qoftë kujtimi I saj! (Neka Doko)

***

Sare Doko (Shehu) was born in Berat on January 17, 1926. She was WWII veteran who fought against the fascist occupation from 1941 to 1943 alongside Margarita Tutulani. “After WWII brought food shortages, she singlehandedly organized and ran the rationing system for Berat and its surrounding districts. She served in this role for 11 years, often giving up her own rations to help families in need, and was fondly remembered as “Sara e triskave”. In 1999, she immigrated to Boston, where she lived with her three daughters until the end of her life. Sare was brave, wise, practical, efficient and forward-thinking. She was an anchoring force in her family and will be greatly missed. She was laid to rest in a private ceremony in Boston on December 22, 2020 and is survived by three daughters and two grandchildren. May her memory be eternal! South Boston, December 21, 2020 (Bora Plaku)

SHKOI”LUMI”…LAMTUMIRE KOLEG!

by

Lamtumirë Xhevdet Bacova themelues i TV “Arb” në Amerikë dhe Tirana Studio Production!

 Nga Keze Kozeta Zylo/*

Me 10 dhjetor u nda nga jeta Xhevdet Bacova në moshën 62 vjeçare, themelues dhe producent i TV “Arb” si dhe i “Tirana Studio Production”.

Njoftimin e ka dhënë i vëllai i tij Arian Bacova në llogarinë e tij në F/B.  

Mbasi e morëm Arianin për ngushëllim të dy me Qemalin ai na tha se vëllai i tij kishte vdekur me Covid për vetëm 4 ditë infektuar nga kjo epidemi botërore.  Kjo epidemi po bëhet shumë e frikshme dhe disa vende në Amerikë janë bëre si vrima të zeza duke gëlltitur jetë njerëzish…

Me shumë dhimbje dhe të shokuar e morëm këtë lajm të hidhur për kolegun tonë të respektuar dhe të njohur në Diasporë në Amerike.  

Xhevdeti ose siç njihej ndryshe “Lumi” në botën artistike ka dhënë një kontribut të vyer në Komunitetitn Shqiptaro-Amerikan.  Ai me kamerën në dorë ka shkuar dhe ka filmuar ku kanë qenë aktivitete të ndryshme si në festat e Flamurit, të mësuesit, në dasma dhe gëzime të ndryshme duke fiksuar me kamerën dhe aparatin në dorë momente të rëndësishme te kulturës shqiptare në Amerikë.  Ai ka bashkëpunuar ngushtë dhe me TV “Alba Life”.  Sa herë e kemi thirurr kur kemi organizuar aktivitete sidomos kur nuk kemi pasur mundësi t’i mbulonim vetë për Shkollen Shqipe, pasi jemi marrë me organizimin ka qenë i gatshëm të vijë me vëllain e tij, një sportist profesionist dhe i talentuar Arian Bacova si dhe me nipin e tij Bacova që e donte aq shumë.

Kolegët e tij, aktivistë të ndryshëm të organizatave shprehin ngushëllimet e tyre si dhe mirënjohjen e pakufishme që ka dhënë në media.

I ndjeri Xhevdet Bacova ka punuar pranë TVSh-së në Tiranë dhe prej andej ka sjellë përvojen e tij duke ushtruar këtë profesion në Amerikë pasi hapi Studion “Tirana” dhe TV “Arb”. 

Familja humbi njeriun e saj më të dashur, Diaspora Shqiptaro Amerikane humbi një anëtar të saj dhe bota e Medies një koleg të vyer.

Lamtumirë Xhevdet Bacova, kolegu ynë!

Ngushëllime bashkëshortes suaj, fëmijëve dhe gjithë familjes Bacova!

Dritë ju pastë shpirti në Parajsë!* me shume foto gjeni ne Facebook:Gazeta Dielli

NDËRROI JETË JASHAR GECAJ, VATRA NGUSHËLLON FAMILJEN

by

NEW YORK, JASHAR GECAJ NDËRROI JETË NGA SULMI KARDIAK, KRYETARI I VATRES NGUSHËLLON FAMILJEN GECAJ/

Zemra e Jashar Gecaj ndaloi përgjithmonë. Një shqiptar i veçantë, një mik i mirë, një shok besnik, një bashkëpunëtor i shkëlqyer, një patriot i devotshëm, një familjar korrekt u largua prej nesh.

 Kjo ikje e parakohshme na ka pikëlluar të gjithëve. Një sulm i pabëse kardiak, na mori në moshën 47 vjeçare në New York, Jashar Gecaj, të shtrenjtin e familjes, të dhembshurin tonë.

Federata Panshqiptare e Amerikës VATRA, të gjithë Vatranët dhe në veçanti kryetari Elmi Berisha i shprehin ngushëllimet më të sinqerta familjes Gecaj, miqve, të afërme dhe të njohurve të tyre. Në këto momente të vështira jemi pranë jush me lutjet tona, me përshpirtshmërinë tonë. Kryefamiljarit Rrustem Gecaj, vellezerve te ndjerit Ramush, Avdyl dhe Tahir Gecaj, djalit te axhes Xhafer Gecaj dhe terë familjes Gecaj në Amerikë dhe Kosovë u shprehim mbështetjen tonë dhe ndajmë dhimbjen e madhe me ju. Jasharin do ta kujtojmë përherë, të buzëqeshur e fisnik.

Zoti ju forcoftë. Shpirti i Jashar Gecaj pushoftë në paqen e amshuar. I ndrittë shpirti në përjetësi. I përjetshëm kujtimi dhe nderimi.

Me respekt Kryetari i VATRËS

Elmi BERISHA

( Gazeta Dielli)

NDËRROI JETË SAZAN NASUFI-DINE, DJALI I KRYEMINISTRIT FIQIRI DINE, VATRA NGUSHËLLON FAMILJEN

by

-Kryetari i vatres z. Elmi Berisha, i shoqeruar nga anetari i kryesise Anton Raja dhe anetari i Keshillit Lek Mirakaj, moren pjese ne varrim dhe ngushelluan Familjen Dine(Nasufi)/

Pas një sëmundje të gjatë për rreth 10 muaj, në orën 1 pasmesnate të datës 13 nëntor 2020, ka ndërruar jetë në spital(New Jersey) Sazan Fiqiri Dine, duke lënë në pikëllim të thellë familjen, miqtë, bashkëvuajtësit.Sazani u lind në vitin 1937 në Dibër. Jeta e tij, ashtu si e të gjithë familjes së madhe Dine të Dibrës, ishte një kalvar vuajtjesh nëpër burgje dhe kampet e internimit. Sazani i provoi të gjithë kampet e internimit që nga Berati, kampi i tmerrshëm në Turhan-Tepelënë, Portopalermo, Plug, Savër, duke përfunduar në Gjazë. Ishte një burrë me karakter që nuk u përul para vuajtjeve dhe provokimeve.Në vitet’90-91 Sazani emigroi në Greqi, për të arritë pas një viti në Shtetet e Bashkuara të Amerikës. Ai la pas bashkëshorten Veronika (E bija e Hasan Dostit) katër djem të martuar; Skënderin, Paridin, Olgerin dhe Ermanin(anëtar i Vatrës), gjithashtu la pas vëllain Tomorr, familjet e vëllezërve, kushëririn (djalin e xhaxhait) Dine Nasufi(Dine) dhe shumë kushërinjë e miq.Diten e Premte, 13 nëntor,nga ora 6 -8 PM, në Xhaminë shqiptare në Garfield, New Jersey, u përcolle ngushëllime familjarëve. Për shkak të Koronavirusit, njoftimet u janë përcjellë një numri të kufizuar miqësh. Po ashtu edhe te shtunen, me 14 nentor 2020, gjatë ceremonisë së varrimit , që nisi ne 10 e 30 të mëngjesit, po në Xhaminë e Garfieldit,ishin njoftuar nje numer i kufizuar i pjesmarrësve, por si ne homazhe ashtu dhe ne varrim numri i pjesmarersve ishte i madhe. Kryetari i Vatres z. Elmi Berisha, i shoqeruar nga anetari i kryesise Anton Raja dhe anetari i Keshillit Lek Mirakaj, moren pjese ne varrim dhe ngushelluan Familjen Dine (Nasufi).Federata Panshqiptare e Amerikës VATRA dhe Gazeta e saj Dielli i shprehin ngushëllimet më të thella familjes, Zonjës Veronika, vëllait Tomorr, djemëve dhe familjeve të tyre , kushëririt Dine Dine dhe nënkryetarit të Vatrës Ervin Dine.Pushoftë në Paqë shpirti i Sazan Dines!