Krerët më të lartë të shtetit kanë zhvilluar homazhet në varrezat e dëshmorëve me rastin e 70 vjetorit të Çlirimit të vendit. Kreu i shtetit, Bujar Nishani, kreu i kuvendit, Ilir Meta dhe kreu i qeverisë, Edi Rama nderuan sot dëshmorët e atdheut që dhanë jetën në luftën ndaj pushtuesit fashist.
Në homazhet, ku merrnin pjesë edhe anëtarë të tjerë të kabinetit qeveritar e të afërm të dëshmorëve, ishte i pranishëm edhe ambasadori amerikan në vendin tonë Alexandër Arvizu.
Ndërkohë , opozita ashtu siç bën tashmë prej shumë vitesh festoi dje, më 28 Nëntor, ditën e pavarësisë dhe Çlirimit në të njëjtën ditë.
Me rastin e 29 Nëntorit, ditës së Çlirimit të vendit janë parashikuar një sërë aktivitetesh, nga qeveria dhe bashkia e Tiranës, aktivitete që do kulmojnë me koncertin e madh festiv në sheshin “Nënë Tereza” që do të hapë “Natën e Bardhë”. . Vetë kryeministri Edi Rama e nisi ditën me një urim në Twitter për të gjithë shqiptarët.
“Gezuar te gjitheve 29 nentorin ne kete 70 vjetor te çlirimit te Shqiperise!”, ka shkruar Rama.
Nënkryetarja e bashkisë së Tiranës, homazhe më 28 dhe 29 Nëntor për Çlirimin
Në homazhet e zhvilluara paraditen sotme në Varrezat e Dëshmorëve ka rënë në sy pjesëmarrja e nënkryetares së bashkisë së Tiranës, Nevila Xhindi.
Xhindi mori pjese në homazhet e zhvilluara nga opozita dhe kreu i saj, Lulzim Basha, dje më 28 nëntor për festën e pavarësisë dhe Çlirimit në varrezat e dëshmorëve, ndërsa sot i është bashkuar homazheve të zhvilluara nga qeveria për këtë ditë të shënuar për vendin.