Qëllohet me armë ndaj policisë. Dy pjestarë të tjerë të forcave speciale mbetën të plagosur dhe u transportuan në Tiranë. Reagon politika/
Një pjesëtar i Forcave Speciale të RENEA-s humbi jetën sot gjatë një përpjekje të armatosur në Fshatin Lazarat të Gjirokastrës , ndërkohë që dy pjesëtarë të tjerë të kësaj force policore morën plagë me armë zjarri pa rrezik për jetën.Të plagosurit janë transportuar në mesditë me helikopterë drejt Tiranës. Drejtori i këtij spitali njoftoi se pas ekzaminimeve të para, ata gjenden në parametra normal shëndetësor. Policia e Gjirokastrës duke dhënë detajet mbi ngjarjen, shpjegoi se prej mesnatës shërbimet policore në disa pika në rrethinat e këtij fshati kishin njoftuar se ishin qëlluar me armë zjarri nga persona të paidentifikuar. Gjatë paradites në ndihmë të këtyre forcave kanë mbërritur edhe efektivat e forcës elitë të policisë shqiptare RENEA. Sipas policisë së Gjirokastrës në afërsi të vendit të quajtur “Pularia”, në pjesën e poshtme të Lazaratit, mjeti Vokswagen, ku udhëtonin efektivët e policisë, është qëlluar me breshëri armësh. Sipas burimeve zyrtare, punonjësi i policisë Ibrahim Basha, ka humbur jetën si pasojë e plagëve të marra.
Policia tha se ka arrestuar një shtetas në Lazarat në automjetin e të cilit janë gjetur disa armë dhe municione ndërkohë që ka shoqëruar edhe shtatë persona. Njësi të tjera policore dhe të trupave speciale nga qytetet e tjera janë dërguar në Lazarat në mbështetje të një operacioni në shkallë të gjerë të ndërmarrë në zonë për kapjen e personave që qëlluan mbi policinë. Drejtori i Përgjithshëm i policisë Haki Cako mbërriti në mesditë në Gjirokastër ndërkohë që Prokuroria e Krimeve të Rënda ka nisur hetimet.
Incidenti i sotëm me humbjen e jetës së efektivit policor të forcave elitë të policisë RENEA është më i rëndi në fshatin Lazarat , i njohur për kultivimin masiv të marijuanës gjatë viteve të shkuara.
Në qershor të vitit të shkuar pas një përpjekje të armatosur disa ditore policia mori kontrollin në këtë fshat. Disa dhjetra persona u arrestuan dhe ndaj tyre kanë nisur tanimë proceset gjyqësore. Ndërkohë që gjatë kësaj periudhe nuk kanë munguar incidentet e veçuara .
Kryeministri Edi Rama vizitoi dy efektivët e plagosur në spitalin ushtarak. Ai tha se sot është “ditë zie për gjithë policinë e shtetit, për të gjithë punonjësit familjen e policisë por besoj që cdo shqiptar cdo familje shqiptare që vlerëson ndershmërinë, kurajon, shërbimin e policisë së shtetit sot ka zi”.
Zoti Rama reagoi edhe ndaj qëndrimit të partisë demokratike. Forca kryesore e opozitës kërkoi “nga Policia të zbardhë menjëherë ngjarjen, të ofrojë transparencë maksimale për çfarë po ndodh, të marrë të gjitha masat për mbrojtjen e jetës dhe sigurisë të banorëve dhe punonjësve të policisë si dhe të marrë të gjitha masat për ndalimin e autorëve të kësaj ngjarje të rëndë kriminale, duke shmangur çdo pasojë mbi popullatën civile. Partia Demokratike u bën thirrje banoreve të Lazaratit të ruajnë gjakftohtësinë dhe të mos bien pre e provokimeve të grupeve kriminale”, përfundon deklarata e PD-së.
Ndaj këtyre qëndrimeve të opozitës kryeministri Rama tha se ndihej “vërtetë keq ata që për faqen e tyre të zezë edhe në këtë moment që policia është në fushën e betejës me një grup vrasësish flasin me dy kuptime dhe i këkojnë llogari policisë madje dhe duke e fajësuar në mënyrë jo aq direkte”.
Për situatën ka reaguar edhe presidenti Bujar Nishani i cili në një deklaratë “dënon aktin kriminal dhe u kërkon autoriteteve ligjzbatuese që në mënyrë profesionale të bëjnë zbulimin e menjëhershëm të këtij krimi dhe vënien përpara drejtësisë të autorëve, duke u bërë njëkohësisht thirrje për qetësi qytetarëve të Lazaratit në këto momente të vështira”.