Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Kosovë-Mbrëmje homazh për viktimat në Nice, Francë

by

-Kryeministri i Republikës së Kosovës, Isa Mustafa nënshkruhet në librin e zisë për nder të viktimave në Nice/

PRISHTINË, 18 Korrik 2016/ Kryeministri i Republikës së Kosovës, Isa Mustafa, u nënshkrua sot në librin e zisë të hapur në Ambasadën Franceze në Prishtinë, për nder të viktimave të sulmit terrorist në Nice.Me këtë rast, kryeministri Mustafa ka shprehur ngushëllimet më të sinqerta për popullin dhe qeverinë e Francës në emër të qytetarëve dhe të qeverisë së Kosovës.

“Me dhimbje të thellë kemi marrë lajmin për aktin terrorist në qytetin e Nicës, ku mbetën të vrarë dhjetëra qytetarë të pafajshëm. Solidarizohemi me popullin francez dhe familjet e viktimave të terrorit. Jemi së bashku në luftën kundër të keqes, për paqe dhe mirëqenie të qytetarëve tanë”, ka shkruar kryeministri Mustafa, në librin e zisë.

Sonte, nën kujdesin e ministrit Enver Hoxhaj, Ministria të Punëve të Jashtme të Kosovës në shenjë përkrahje dhe solidarizimi me shtetin francez do të organizoj një mbrëmje homazh për  viktimat e sulmit në Nice, Francë.Në këtë mbrëmje do të marrin pjesë përfaqësues të institucioneve të Kosovës, të korit diplomatik të akredituar në Kosovë dhe përfaqësues nga jeta publike./b.j/

 

Mediat franceze: Një çift shqiptar i ndaluar për sulmin në Nicë

by

Mediat franceze kanë raportuar së fundmi se autoritetet vendase kanë vënë në pranga një burrë dhe një grua me prejardhje shqiptare të cilët dyshohet se kanë lidhje me agresorin që sulmoi në Nice.

Gjithmonë sipas burimeve jo-zyrtare, raportohet se çifti i ka shitur armë 31-vjeçarit të identifikuar si Mohamed Lahouajej Bouhlel. Në kamionin që u mori jetën më shumë se 80 personave u gjetën armë automatike, dy kallashnikovë si dhe granata dore. Megjithatë, lajmi nuk është konfirmuar ende nga autoritetet.

Hetuesit lajmëruan për dy të arrestuar, një burrë dhë një grua, por nuk dhanë detaje për të respektuar investigimin. Për të mësuar më shumë rreth vërtetësisë së këtij lajmi do të duhet të pritet për një tjetër komunikatë zyrtare.

Numri total i të arrestuarve ka arritur në 6 pasi ish-bashkëshortja e agresorit Mohamed Lahouajej Bouhlel, e cila u mor në pyetje për më shumë të dhëna rreth tij është liruar së fundmi. Ekspertët po shqyrtojnë mundësinë e përfshirjes së 31-vjeçarit në ndonjë organizatë terroriste ndonëse deri më tani nuk janë gjetur prova të drejtpërdrejta që ta provojnë diçka të tillë. Bouhlel ishte shtetas francez me origjinë tuniziane. Ai nuk ka qënë i panjohur për policinë, pasi është arrestuar edhe më herët për krime të ndryshme si vjedhja, ushtrimi i dhunës, përdorimi i lëndëve narkotike, etj.

Shteti Islamik ka komunikuar se Bouhlel i është përgjigjur thirrjeve të tyre për të sulmuar në vende që janë pjesë e koalicionit ndërkombëtar anti-ISIS që udhëhiqet nga Shtetet e Bashkuara.

Ndërkohë, për shkak të plagëve të marra gjatë sulmit, 85 persona janë ende duke u trajtuar në spitalin e Nices, ku 18 prej tyre vijojnë të mbeten në rrezik për jetën./Kortezi: Xhoi MalësiaOranews.tv/

Masakra Francës/ 84 të vdekur dhe 50 në gjendje kritike në Nice

by

*Dëshmia e vajzës shqiptare që u gjend në vendin e atentatit në Nicë/

Një kamion i përmasave të mëdha me ngjyrë të bardhë ka hyrë më shpejtësi në mes të një turmë të madhe njerëzish të mbledhur në qendër të Nice për të parë fishekzjarrët e hedhur me rastin e Festës Kombëtare të Francës. Prokuroria franceze sipas të dhënave më të fundit ka raportuar mbi 84 të vdekur dhe për mbi 50 të plagosur ne gjendje kritike.

Një zëdhënës i policisë franceze tha se njeriu që ishte në drejtim të kamionit është neutralizuar nga policia. U fol se ai kishte marrë edhe pengje me vete, por kjo nuk është konfirmuar. Disa dëshmitarë në vendin e ngjarjes thanë se dëgjuan të shtëna mitralozi nga kamioni përpara se ai të përplasej me turmën.

Ngjarja pasoi nga momente të tëra paniku ku turma vërshoi nëpër rrugë dhe nuk ndalej. Njerëz të terrorizuar kanë marrë telefonat për të raportuar se një tjetër “akt terrorist” po ndodhte. Megjithatë policia nuk e ka konsideruar ende rastin si një “akt terrorist”, por mbetet “një sulm i organizuar”.

Ajo që mediat e huaja po raportojnë nga vendi i ngjarjes janë trupa njerëzish që ende ndodhen të shtrirë në rrugët e qytetit.

Presidenti François Hollande, ka lënë Avignone, rezidencën e tij për të shkuar me urgjencë në Paris pas lajmeve të Nicës. Ai ka mbledhur menjëherë qendrën e krizave në ministrinë e brendshme. ai ka thirrur edhe kryeministrin Valls dhe ministrin e brendshëm Cazeneuve.

 Dëshmia e vajzës shqiptare që u gjend në vendin e atentatit në Nicë

 Një vajzë shqiptare së bashku me familjen e saj ka qenë në shëtitoren e Promenad des Anglais në Nicë për të shijuar koncertet dhe spektaklin e fishekzjarreve që ishin organizuar pikërisht me rastin e ditës së 14 korrikut, Festa Kombëtare e Francës:“Po shikonim spektaklin e fishekzjarreve ndërsa po zhvilloheshin dy koncerte live. Në një moment kamioni hyri në mes të turmës dhe po shtypte njerëzit.

Në atë moment filluan të qëllonin mbi njerëzit me kallashnikov. Ne vrapuam sa mundëm dhe hymë në një hotel aty të mbroheshim. Kur dola jashtë dëgjova prapë të shtëna. Di vetem që vrapuam dhe të gjithë njerëzit ulërinin. Ishte një tmerr që nuk do ta harroj kurrë”

Fatmirësisht ajo dhe familja e saj janë mirë përvec traumës dhe frikës që kanë përjetuar në ato moment tmerri