ne Prizren – Dielli

Nata Amerikane në DokuFest në Prizren

August 8, 2017 by dgreca

-5 vjetori i Natës Amerikane në DokuFest/

1 Prizren-Dokufest 3Nata-Amerikane-DokuFest-Delawie-2 2Nata-Amerikane-DokuFest-Delawie-1 1ok nata amerikane

-Ambasadori amerikan në Kosovë, Greg Delawie në DokuFest – Festivalin Ndërkombëtar të Filmit të Shkurtër dhe Dokumentar theksoi: Festojmë suksesin e ekipit të DokuFestit dhe suksesin e Kosovës në krijimin dhe mbajtjen e një festivali filmik të klasës botërore. Sapo e dëgjova një ekspert duke e krahasuar DokuFestin për të mirë me Berlinalen – kjo është e mrekullueshme!/

-Pikërisht si në Shtetet e Bashkuara të Amerikës, gjithë ajo punë e rëndësishme nuk do të kryhej pa ndihmën e vullnetarëve/

PRIZREN, 7 Gusht 2017- Gazeta DIELLI-Behlul Jashari/ Gjatë vizitës në Prizren për të qenë pjesë e Mbrëmjes Amerikane në DokuFest – Festivalin Ndërkombëtar të Filmit të Shkurtër dhe Dokumentar, ambasadori amerikan në Kosovë, Greg Delawie ka marrë pjesë në një sërë aktivitetesh.“Më vjen shumë mirë që ju shoh të gjithë juve sonte këtu me rastin e 5-vjetorit të Natës Amerikane në DokuFest. Kam kënaqësinë e vërtetë ta vazhdoj traditën e shkëmbimit të traditave kulturore midis dy vendeve tona, e këtë vit, vizionet tona për të ardhmen, përmes filmit”, ka theksua ai.Ambasadori i SHBA ka falënderuar tërë ekipin e DokuFestit për gjithë punën e zellshme për ta bërë këtë festival storie suksesi për Prizrenin dhe për Kosovën.

“Është edhe një grup që dua ta falënderoj. Pikërisht si në Shtetet e Bashkuara të Amerikës, gjithë ajo punë e rëndësishme nuk do të kryhej pa ndihmën e vullnetarëve”, u shpreh ambasadori amerikan në Kosovë, Delawie.

Në qytetin e Prizrenit, më të madhin në jug të Kosovës, afër kufirit me Shqipërinë, u hap në mbrëmjen e 4 gusht 2017 për të vijuar deri në 12 gusht Festivali Ndërkombëtar i Filmit të Shkurtër dhe Dokumentar DokuFest në edicionin e 16-të, me temën “E ardhmja”, ku përfaqësohen 50 shtete e do shfaqen 102 filma në gjashtë kategoritë garuese e edhe më shumë të tjerë.

DokuFest e nisi udhën e tij në vitin 2002, me shfaqjen e një numri të madh filmash dhe me pjesëmarrjen e një publiku të gjerë, artistësh nga rajoni dhe bota, duke e shndërruar qytetin historik të Prizrenit edhe në një kryeqytet filmi çdo verë.

Fjala e ambasadorit të SHBA në Kosovë, Greg Delawie gjatë pritjes me rastin e Natës Amerikane në DokuFest – Prizren, 7 gusht 2017:

Mirëmbrëma të gjithëve. Si po kaloni? Çfarë nate e bukur në Prizren! Fuqia e Shteteve të Bashkuara për të pasur mot të mirë!

Më vjen shumë mirë që ju shoh të gjithë juve sonte këtu me rastin e 5-vjetorit të Natës Amerikane në DokuFest. Kam kënaqësinë e vërtetë ta vazhdoj traditën e shkëmbimit të traditave kulturore midis dy vendeve tona, e këtë vit, vizionet tona për të ardhmen, përmes filmit.

Jemi këtu për të festuar me kineastët, regjisorët, producentët dhe edukatorët amerikanë që marrin pjesë në festivalin e këtij viti. Gjithashtu po e festojmë suksesin e ekipit të DokuFestit dhe suksesin e Kosovës në krijimin dhe mbajtjen e një festivali filmik të klasës botërore. Sapo e dëgjova një ekspert duke e krahasuar DokuFestin për të mirë me Berlinalen – kjo është e mrekullueshme!

Prizreni, siç e dini të gjithë, është thesar kulturor i Kosovës. Kjo është vizita ime e dytë në këtë qytet të bukur brenda këtyre dy javëve. Bukuria e Prizrenit, vendet e trashëgimisë fetare e kulturore dhe festivalet verore joshin njerëz nga e mbarë bota.

Orëve të fundit jam takuar me kineastë të rinj, një biznes në lulëzim e sipër dhe me sipërmarrës të turizmit që punojnë për t’i lidhur njerëzit me vendet e shumta të bukura të Kosovës.

Në ambasadë krenohemi që e mbështesim DokuFestin dhe projekte të tjera në Prizren që kanë ndihmuar në tërheqjen e vëmendjes ndërkombëtare dhe në shndërrimin e qytetit në pikë krenarie dhe destinacionin kulturor që është sot.

Së voni, e kam vizituar Kalanë e Prizrenit dhe kam parë punën e mrekullueshme të restaurimit. Jam i lumtur të shoh që kalaja po përdoret përsëri për festivalin e këtij viti. Ky ishte një nga qëllimet tona kur e financuam restaurimin: ta shohim kalanë të hapur për përdorim publik dhe duke u përdorur vazhdimisht në mënyrë aktive nga publiku. Nëse ende nuk jeni ngjitur deri atje, ju nxis të gjeni kohë për t’i eksploruar ndryshimet e fundit. Edhe pse ndoshta, është mirë ta pritni ditën kur nuk është 40 gradë. Por, ju lutem, shkoni së shpejti sepse është e jashtëzakonshme.

Kur flasim për restaurimin historik apo edhe për filmin dokumentar, shpesh e lidhim atë me të kaluarën. Por, të kuptuarit e historisë sonë është thelbësor për krijimin e një të ardhmeje më të mirë. Prandaj isha shumë i ngazëllyer të dëgjoja që tema e DokuFestit të këtij viti është “E ardhmja”.

Jemi më se të lumtur që sonte i kemi këtu disa kineastë dhe kuratorë amerikanë. Gjatë gjithë festivalit ata do t’i shkëmbejnë idetë e tyre se si të përdoret filmi për t’i nxjerrë në pah çështjet sociale dhe për të kapur tregime të patreguara që do të ndihmojnë në formësimin e të ardhmes sonë, të tërë të ardhmes sonë. Faleminderit, amerikanë, që erdhët në Kosovë dhe në Prizren. Shpresoj të kënaqeni në festival dhe shpresoj që lidhjet që i krijoni me kineastët e tjerë të talentuar dhe përfaqësues të industrisë do të zgjasin edhe në të ardhmen. Shpresoj që kur të ktheheni në Shtetet e Bashkuara të Amerikës, t’ju tregoni të gjithëve çfarë vendi i mrekullueshëm është Kosova dhe çfarë festivali i mrekullueshëm është DokuFesti.

Dua t’i falënderoj Nitën, Vetonin, Erollin dhe tërë ekipin e DokuFestit për gjithë punën tuaj të zellshme për ta bërë këtë festival storie suksesi për Prizrenin dhe për Kosovën. A dëshiron ndokush nga ju të thotë disa fjalë?

Është edhe një grup që dua ta falënderoj. Pikërisht si në Shtetet e Bashkuara të Amerikës, gjithë ajo punë e rëndësishme nuk do të kryhej pa ndihmën e vullnetarëve. Ata që janë këtu, p.sh. që kanë të veshur bluzat me mbishkrimin “I am so future”. Nuk jam shumë i sigurtë çka do të thotë kjo, se i takoj gjeneratës së gabuar, por janë gjithë ata njerëz nëpër qytet me bluzat “I am so future”. Ata po bëjnë punë vullnetare, po ndihmojnë, po e bëjnë Prizrenin vend më të bukur, po e bëjnë Kosovën vend më të bukur. Ju lus edhe juve të tjerët të angazhoheni në punë vullnetare në çkado që bëni.

Faleminderit shumë që keni ardhur sonte; faleminderit DokuFest. Ishte kënaqësi që pata mundësinë për t’ju pritur të gjithëve këtë mbrëmjve. Kalofshi sa më mirë sonte!

Dita e Verës, Festë në Prizren si në Elbasan

March 14, 2017 by dgreca

-Si Dita e Verës në Shqipëri, Dita e Verëzes në Kosovë. Nga ky vit festë zyrtare në Prizren, ka vendosur Kuvendi i Kumunës. Ide ime e kaherëshme e raportimeve nga Kosova/

-Faik Konica më 1911: Ç’është Dita e Verës?/

-Para 21 viteve, në reportazhin me titull “Muri ndërshqiptar si ‘fundi i botës’”, botuar në Prishtinë e Tiranë shkruaja se administrata e instaluar policore serbe i kishte ndaluar një grup të rinjësh dhe të rejash nga rrethi i Prizrenit të shkojnë në Shqipëri, të marrin pjesë në festën e njohur të qytetit të Elbasanit-të Ditës së Verës, Ditës së Luleve, të 14 marsit/SPECIALE- Gazeta DIELLI nga korrespondenti në Kosovë Behlul JASHARI/

PRISHTINË, 14 Mars 2017/ Si Dita e Verës në Elbasan, në Shqipëri, në 14 mars, është edhe në Kosovë Dita e Verëzes, në të njëjtën kohë e me rite dhe emërtim ngjashëm, në rajonin e Prizrenit, përfshirë krahinën e Opojës në malet e Sharrit në lartësi mbidetare mëse 1.000 metra, në komunën e Dragashit, më jugoren në shtetin e ri të dytë të shqiptarëve.

Edhe pse ka ide, në Kosovë ende nuk ka organizime institucionale, për festimin e Ditës së Verës, por ritet e festës të lashtë pagane iliro-shqiptare tradicionalisht janë ruajtur brez pas brezi nga populli. Ndërkohë, Dita e Verëzës – Dita e Vërës nga ky vit është festë zyrtare në Prizren, sipas vendimit ditë më parë të Kuvendit të Kumunës.

“Si festë tradicionale është e theksuar në fshatrat e Vërrinit, Lumës dhe të Opojës. Ne 14 mars, fillon ripërtëritja e natyrës dhe si festë do ia shtonte atraktivitetin Prizrenit si qytet turistik”, u theksua me atë rast.

Në mbledhjen e Kuvendi Komunal të Prizrenit në 23 shkurt 2017, kur u mor vendimi, u lexua shkrimi i vitit 1911 i personalitetit të madh të kombit shqiptar, FAIK KONICA:

Ç’ËSHTË DITA E VERËS?

Botuar më 1911

Miqve, shokëve të Lidhjes Shqipëtare “Verore”, u dërgoj kujtime miqësie, urime të zemrës, për Ditën e Verës që na afrohet. S’e festuam dot sivjet këtë ditë të bukur: po në mos e festuam me trup, do ta festojmë me zemër.

Ç’është Dita e Verës? Është dita në të cilën shtërgjyshërit t’anë, kur s’kish lindur edhe krishtërimi, kremtojin bashkë me Romanët dhe me Grekët e Vjetër, perëndit’ e luleve, të shelgjeve, të krojeve. Kur çkrin dimëri, kur qaset Vera buzëqeshur e hollë dhe e gjatë si në piktyrë të Botticelli, zemra e njeriut çgarkohet nga një barë, shijon një qetësi, një lumtësi t’ëmblë. Në këtë gëzim, stërgjyshërit t’anë ndiejin një detyrë t’u falen perëndive që sillnin këto mirësira. Dhe ashtu leu festa hiroshe që quajmë Dit’ e Verës.

Në Agjencinë shtetërore-zyrtare të lajmeve të Shqipërisë, në një raportim nga Kosova në 14 mars 2012, para 5 viteve, shkruaja për idenë se, Elbasani mund të jetë shembull edhe për Prizrenin, për organizime edhe institucionale në festimet e Ditës së Verëzes.
“Kjo pyetje juaj është një ide e mirë për të ardhmen”, tha atëherë Urim Ukimeri, koordinator për kulturën në Komunën e Prizrenit, duke u përgjigjur në pyetjen time nëse ka ide a iniciativa që në qytetin më të madh jugor të Kosovës Dita e Verëzes të shënohet edhe me ndonjë organizim institucional, si në Elbasan.

Në foto arkivi të vitit 2010 shihet një fëmi në Opojë, ku në Ditën e Verëzes në borë me vezë të ngjyera është shkruar shkurtesa me shkronja të para të emrit në anglisht të Agjencisë kombetare-zyrtare të lajmeve të Shqipërisë – Albanian Telegraphic Agency – ATA, për të cilën prej çerek shekulli raportoj nga Kosova edhe për festimet e Ditës së Verëzes.

Ndërsa, para 21 viteve, në 18 mars 1996, në gazetën e përditshme “Bujku”, të vetmes atëherë në Kosovë, themelues-kryeredaktor i parë i së cilës isha, në reportazhin nga kufiri Kosovë-Shqipëri me titull “Muri ndërshqiptar si ‘fundi i botës’”, që në “Paraqitje e shkurtër e regjistrimeve të gjetur” të Bibliotekës Kombëtare të Shqipërisë e gjejë se është botuar edhe në gazetën Rilindja në Tiranë, në 19 mars 1996, mes tjerash, kam shkruar:

“Një grup i të rinjëve dhe të rejave nga rrethi i Prizrenit, ditë më parë ishin penguar të shkojnë në Shqipëri, meqë nuk iu ishin dhënë vizat dalëse nga administrata e instaluar policore serbe në Prizren.

Qëllimi i udhëtimit të tyre në Shqipëri ishte të marrin pjesë në festën e njohur të qytetit të Elbasanit-të Ditës së Verës, Ditës së Luleve, të 14 marsit.

Donon të shihnin se si kremtohet në Elbasan e njëjta festë që është edhe në Prizren e rrehinë”.

Në Opojën e njohur për dimrat me shumë dëborë e pranvera ca “të vonuara”, në prag të Ditës së Verëzes, pasdite dhe në mbrëmje të rinjë, po edhe fëmijë, ngjiten bjeshëve, te krojet që nuk shterojnë kurrë, mbledhin bimë a lule, drunj e shkurra dëllinje, dhe ndezin zjarre.

Vezët e ziera e të ngjyera, cakërrohen me njëra-tjetrën në garën cila është më e forta, ndërsa të spërkatura me ujin e krojeve hahen në bjeshkë dhe në shtëpi për shëndet e jetëgjatësi.

Në Ditën e Verëzes zgjimi është i hershëm dhe vazhdojnë ritet e festës, pjesë e së cilës janë edhe këngët e vallet, edhe gatimet e traditës me miell misri apo gruri, por që nuk janë ballokume Elbasani, edhe pse të ngjashme janë.

Në drekën e Ditës së Verëzes në tryeza-sofra shtrohet edhe mishi i qengjit, sipas traditës së këtyre anëve me blegëtori të zhvilluar.

Dita e Verëzes festohet nëpër familje, së bashku, si dhe me vizita te fqinjët e farefisi, me besimin se sjell fat, shëndet, mbarësi, përtëritje e dashuri njerëzore. Ritet, përfshirë edhe lulet e bimët që vendosen mbi portat e shtëpive, ndërlidhen edhe me zgjimin e bimësisë, gjallimin, kalimin nga dimri në pranverë. Dhe, është ditë e fillit të verës së re.

Afër Prizrenit dhe në kufi me Shqipërinë, në rajonin e Vërrinit, në festime në fshatin Zhur, më të madhin në Kosovë vezët e ziera herët i ngjyrosin fëmijët dhe bashkë me të rinjët dalin në zonat malore të afërta, ku mbledhin lulen e parë që lulëzon në pranverën e herëshme, luleborën.

Nënat zhurjane bëjnë gatimin tradicional, flinë, si dhe shumë gatime të tjera të veçanta për Ditën e Verëzës, që ështe edhe dita e vizitave të shumëta mes të të afërmëve dhe dhe familjarëve.

SPECIALE PER DIELLIN: Prizren-DokuFest përmbyllet me ceremoni e çmime

August 14, 2016 by dgreca

– Në gjashtë kategori, në garë ishin gjithsej 107 filma. Çmim filmit të regjisorit serb Ognjen Glavonić “Thellësia dy” –“Depth two” (“Dubina dva” në serbisht), i cili ballafaqon Serbinё me krimet e kryera gjatё luftёs nё Kosovё në fundshekullin e kaluar/

-Derisa ka vijuar DokuFest, nga Kalaja e Prizrenit është shikuar perëndimi i diellit nën tingujt e iso-polifonisë shqiptare, nga Grupi Jonianët/

PRIZREN, 14 Gusht 2016-Gazeta DIELLI-Behlul Jashari/ Në qytetin e Prizrenit natën e kaluar është përmbyllë Festivali Ndërkombëtar i Filmit të Shkurtër dhe Dokumentar, DokuFest, edicioni i 15-të jubilar, me ceremoninë e ndarjes së çmimeve në Kinemanë Lumëbardhi, pas vendimeve të jurive.

Në gjashtë kategori, në garë ishin gjithsej 107 filma, ndërsa në garën për filmin më të mirë të Ballkanit fituesi është filmi i regjisorit serb Ognjen Glavonić “Thellësia dy” –“Depth two” (“Dubina dva” në serbisht), i cili ballafaqon Serbinё me krimet e kryera gjatё luftёs nё Kosovё në fundshekullin e kaluar.

Tregimi i filmit, sipas prezantimit të DokuFest, është ky: “1999: Derisa NATO po bombardonte Jugosllavinë, një kamion me 53 trupa të vdekur zhytet në Danub pranë kufirit me Rumaninë. Asnjë hetim nuk ndërmerret. Më parë, në Suharekë, Kosovë: policia serbe tubon fshatarët. Një grua përjeton gjëra të tmerrshme, trupat zhduken në varret masive të largëta. Për njerëzit thjeshtë pothuajse nuk ka konsideratë. Ngjarje monstruoze, çdo dhe secila hollësi të organizuara në bazë të një logjistike të dhunës nga një shtet që zbaton një plan sekret vdekjeprurës kundër popullsisë së vet. ‘Dubina dva’ me sukses mat të vërtetën. Njerëzit mund t’i vrasin njerëzit, por jo edhe kujtimet”.

Deklarata e jurisë në përbërje Eric Hynes, Marek Septimus, Maria Bonsanti ishte kjo: “Për filmin të cilin të gjithë e konsideruam të përmbushur në aspektin kinematografik aq sa është shkatërrues moralisht, duke e përdorur një gjuhë për t’ia përshtatur temës së tij që e kombinon dëshminë në audio me pamje nga peizazhe të braktisura tragjikisht, duke e vënë shikuesin në pozitën edhe të reflektimit historik edhe të nëpërkëmbjes aktuale, dhe duke ofruar një betejë të shtresuar, emocionale dhe intelektuale të cilën nuk do ta harrojmë shpejtë, me admirim të thellë, mirënjohje dhe entuziazëm e shpërblejmë filmin ‘Depth two’ nga Ognjen Glavonic me çmimin Best Balkan Documentary”.

Organizatorët janë shprehur shumë të kënaqur me ecurinë e festivalit dhe falenderimet ishin edhe për iso-polifoninë për ngrohtësinë që solli me muzikën shqiptare nga jugu. Derisa ka vijuar DokuFest, nga Kalaja e Prizrenit është shikuar perëndimi i diellit nën tingujt e iso-polifonisë shqiptare, nga Grupi Jonianët.

Në DokuFest 2016, festivalin e hapur në 5 gusht me ceremoninë e zhvilluar në kinemanë mbi lumin Lumëbardh, sipas orgnizatorëve, u shfaqen 238 filma nga 57 shtete të botës, mes tyre Shqipëria e Kosova, që janë përzgjedhur nga një numër rekord – mbi 5 mijë aplikime.

Korrupsioni ishte tema qendrore e DokuFest 2016, ndërsa janë mbajtur punëtori, panele, debate, master klasa, ekspozita dhe një seri e organizimeve në kuadër të DokuNights, që kanë përfshirë edhe yjet botërorë si Omar Souleyman dhe Yasmine Hamdan.

Njoftimi i plotë dërguar nga Festivali: DOKUFEST XV SHPALL FITUESIT!

Në ceremoninë e ndarjes së çmimeve, që u mbajt sot në Kinemanë Lumbardhi në Prizren, pas vendimit të jurisë, u shpallën fituesit e edicionit të 15 të Dokufest-it. Nga gjashtë kategori, në garë ishin gjithsej 107 filma. Në fund do të jepet edhe çmimi i publikut.

Duke arritur që për nëntë ditë të organizojë aktivitete nga më të ndryshmet, gjatë festivalit janë shfaqur 238 filma nga 57 shtete, janë mbajtur punëtori, panele, debate, master klasa, ekspozita dhe një seri e organizimeve në kuadër të DokuNights, që kanë përfshirë edhe yjet botërore si Omar Souleyman dhe Yasmine Hamdan, Prizreni edhe njëherë u kthye në qytetin ku gërshetohet kinemaja dhe kultura.

Ju lutem gjeni listën e fituesve më poshtë:

GARA PËR FILMIN MË TË MIRË TË BALLKANIT – FITUESI: THELLËSIA DY nga Ognjen Glavonić

Juria: Eric Hynes, Marek Septimus, Maria Bonsanti

Deklarata: Për filmin të cilin të gjithë e konsideruam të përmbushur në aspektin kinematografik aq sa është shkatërrues moralisht, duke e përdorur një gjuhë për t’ia përshtatur temës së tij që e kombinon dëshminë në audio me pamje nga peizazhe të braktisura tragjikisht, duke e vënë shikuesin në pozitën edhe të reflektimit historik edhe të nëpërkëmbjes aktuale, dhe duke ofruar një betejë të shtresuar, emocionale dhe intelektuale të cilën nuk do ta harrojmë shpejtë, me admirim të thellë, mirënjohje dhe entuziazëm e shpërblejmë filmin DEPTH TWO nga Ognjen Glavonic me çmimin Best Balkan Documentary.

Juria e njejtë zgjodhi për “Çmim Special” në kategorinë për FILMIN MË TË MIRË TË BALLKANIT filmin SOMETHING ABOUT LIFE nga Nebojsa Slijepcevic.

Deklarata: Juria deshi të falënderojë grupin e filmave të shkurtër tepër të fuqishëm që ishin në garë, si Postcards from Manila, A Short Family Film, dhe It Could Be a Film. Por filmi i cili qëndroi me ne gjatë gjithë javës është një film i vëzhgimit me respekt dhe kureshtje të madhe, një portret i vogël megjithatë i thellë i një vajze të re që ka një familjaritet të lindur me bashkëpunimin. Juria i jep mirënjohje të veçantë filmit SOMETHING ABOUT LIFE nga Nebojsa Slijepcevic.

Juria e njejtë zgjodhi FILMIN MË TË MIRË NGA REGJISORI BALLKANIK NË ARDHJE: TOURISM (TURIZMI) nga Tonci Gacina.

Deklarata: Për filmin i cili i qaset me ndjeshmëri të madhe, humor dhe humanitet një subjekti të cilit një tjetër regjisor thjesht mund ta përqeshte, një film që zë të gjithë ekosistemin, nga punëtorët deri te pushuesit, nga uji në ajër, me një kamerë të kujdesshme, të qetë dhe të gjithëpranishme. Ky është regjisori të cilin jemi shumë të emocionuar ta përcjellim në të ardhmen. Çmimi Best Balkan Newcomer i shkon filmit TOURISM nga Tonci Gucina.

Juria e njejtë zgjodhi për “Çmim Special” në kategorinë për FILMIN MË TË MIRË NGA REGJISORI BALLKANIK NË ARDHJE filmin DRUMS OF RESISTANCE nga Mathieu Jouffre.

Deklarata: Për filmin i cili merr formën e bashkëbisedimeve, një shkëmbim i hapur i kujtimeve personale, që e lejon të shkuarën të dalë në të tashmen si diçka relevante derisa gjithashtu e përdor dialogun dhe përcjelljen e përvojës si mjet rezistence; Juria i jep një mirënjohje të veçantë filmit DRUMS OF RESISTANCE nga Matthieu Jouffre.

FILMI MË I MIRË DOKUMENTAR NDËRKOMBËTAR I METRAZHIT TË GJATË – FITUESI: OLEG AND HIS RARE ARTS nga Andrés Duque

Juria: Carlos Ramos, Jetmir Idrizi, Luke Moody, Nick Pinkerton, Rachael Rakes

Deklarata: Oleg and His Rare Arts është një dokumentar i pazakontë muzikorë që lejon personazhin ta udhëheq filmin, një personazh i paimitueshëm të cilit i jepet hapësira dhe koha në të cilën mund ta shpalosë veten në kohën e tij të mirë. Montimi është i çuditshëm dhe i shkathtë, duke i zgjedhur momentet e buta, të shkëlqyera, rrëfyese në kohë të përsosur, duke ndryshuar në vazhdimësi në mes të interpretimeve të gjata dhe të shkurtra.

Juria e njejtë zgjodhi për “Çmim Special” në kategorinë për FILMIN MË TË MIRË DOKUMENTAR NDËRKOMBËTAR TË METRAZHIT TË GJATË filmin ON FOOTBALL nga Sergio Oksman.

Deklarata: Filmi shumë tërheqës i Sergo Oksman e sajon strategjinë e tij – një sekuencë e xhirimeve me kamerë kryesisht të rregulluar, duke dokumentuar bashkimin e regjisorit me babanë e tij të larguar gjatë periudhës së Kupës Botërore në Brazil – dhe nuk e braktis orientimin e tij edhe përballë tragjedisë: Tragjedisë së një adhuruesi, dhe tragjedinë e të birit. Ashpërsia e qasjes së Oksmanit e zmadhon më shumë se sa e qetëson ndikimin emocional të imazheve, në një film i cili në mënyrë elokuente, thjesht e shpreh shkallën në të cilën sporti mund të luaj rolin e një kanali komunikimi në mes të burrave të heshtur e të tërhequr.

FILMI MË I MIRË DOKUMENTAR NDËRKOMBËTAR I METRAZHIT TË SHKURTËR – FITUESI: IMPRESSIONS OF A WAR nga Camilo Restrepo

Juria: Carlos Ramos, Jetmir Idrizi, Luke Moody, Nick Pinkerton, Rachael Rakes

Deklarata: Impressions of a War pikturon një fotografi të fuqishme dhe të thellë të konfliktit të brendshëm të 70 viteve të fundit në Kolumbi. Duke u larguar nga papërsosuria e gazetave vendore, Camilo Restrepo krijon një univers të shkëlqyer ku këto të meta janë të pranishme në strukturën e filmit, duke theksuar një kombinim të pasur dhe kuptimplotë të shtresave që i drejtohen aspekteve historike, politike dhe njerëzore të rajonit.

Juria e njejtë zgjodhi për “Çmim Special” në kategorinë për FILMIN MË TË MIRË DOKUMENTAR NDËRKOMBËTAR TË METRAZHIT TË SHKURTËR filmin THE PARK nga Randa Maroufi.

Deklarata: The Park ofron një vizion të guximshëm koreografik të rinisë marokene. Dekonstruktimi i regjisorit të fenomenit ‘selfie’ na jep një vetëdije më të lartë për politikën dhe kompozimet artificiale të këtyre imazheve. Secila kornizë është e mbushur pamje të brishta të testosteroneve si friza antike gati për tu shkatërruar.

FILMI MË I MIRË PËR TË DREJTAT E NJERIUT – FITUESI: HOMELAND (IRAQ YEAR ZERO) nga Abbas Fahdel

Juria: James Longely, Mustafa Kerem Yuksel, Tue Sten Muller

Deklarata: Një dokumentar monumental dhe i papërkulur që me qetësi shpalos rutinën ditore të një familje irakiane që vërtitet buzë një tragjedie, Homeland e personalizon çmimin e vërtetë të luftës përmes vështrimit plot respekt të regjisorit.

Juria e njejtë zgjodhi për “Çmim Special” në kategorinë për FILMIN MË TË MIRË PËR TË DREJTAT E NJERIUT filmin STARLESS DREAMS nga Mehrdad Oskouei.

Deklarata: Një film dokumentar i një hijeshie të rrallë, Starless Dreams eksploron botën e brendshme të grave të burgosura në Iran me një saktësi emocionale të pashlyeshme dhe ndjeshmëri ndaj subjektit të tij.

FILMI MË I MIRË PËR AMBIENTIN – FITUESI: WHEN TWO WORLDS COLLIDE nga Heidi Brandenburg dhe Mathew Orzel

Juria: Defne Koryurek, Diego Mas Trelles, Martin Horyna

Deklarata: Patëm një ndjenjë shumë të fuqishme për sinqeritetin e punës, përkushtimin e përzemërt dhe respektin për personazhet dhe njerëzit e përfshirë. Prandaj, do të donim t’i falënderonim regjisorët dhe ekipin për sjelljen e një barbarizmi aq të madh që mori jetët dhe rrezikoi jetesën e shumë të tjerëve. Do të donim t’ia jepnin çmimin filmit When Two Worlds Collide.

Juria e njejtë zgjodhi për “Çmim Special” në kategorinë për FILMIN MË TË MIRË PËR AMBIENTIN filmin THE WOODS DREAMS ARE MADE OF nga Claire Simon

Deklarata: Do të donim t’i jepnim një mirënjohje të veçantë punës e cila paraqiti një sfidë aq të madhe për ne. Ne e falënderojmë regjisoren dhe ekipin e saj që na dha rastin ta shohim ekologjinë nga një këndvështrim tërësisht ndryshe. E falënderojmë për sfidën filmin The Woods Dreams Are Made Of.

FILMI MË I MIRË I SHKURTËR – FITUESI: IMPORT nga Ena Sendjevic

Juria: Anri Sala, Barbara Orlicz – Szczyputa, Christopher Tidman

Deklarata: Juria e shpërblen me çmimin e parë një vështrim intim në natyrën absurde të fillimeve të reja. Përmes përdorimit të teknikave vizuale unike për kohën e tyre, ai eksploron një temë që është edhe sot relevante. Një vështrim i çuditshëm në Migrimin, Ndarjen, Integrimin, Pranimin dhe Familjen në kërkim të një normaliteti të ri.

Juria e njejtë zgjodhi për “Çmim Special” në kategorinë për FILMIN MË TË MIRË TË SHKURTËR filmin FRANKFURTER STR. 99A nga Evgenia Gostrer

Deklarata: Një fotografi e çastit e një jete të rëndomtë të pak ditëve më parë e treguar në mënyrë unike përmes stilit të veçantë të animuar. Një përzierje e animacionit me dokumentar, që nuk kombinohet shpesh në rrëfim, formohen bashkë në mënyrë të përkryer për të eksploruar këtë marrëdhënie.

GARA KOMBËTARE – FITUESI: PERFORMANCË nga Dritëro Mehmetaj

Juria: Blerta Basholli, Christoffer Olofsson, Eriola Pira

Deklarata: Për mjeshtrinë në formën e filmit të shkurtër artistik në një histori të plotë dhe imponuese të dy studentëve dhe negociatave të tyre të përditshme në skenë dhe jashtë saj. Performanca autentike, skenari i zgjuar dhe regjia bindëse ia del të shpalos ëndrrat dhe luftërat e personazheve me një kujdes dhe integritet që refuzon përfundimet e lehta në lidhje me profesionin e tyre të zgjedhur apo vetë-vlerësimin.

Juria e njejtë zgjodhi për “Çmim Special” në kategorinë për GARËN KOMBËTARE filmin I KISSED YOU KISS ON YOUR GIRLFRIEND’S CHEEK, IT WAS STILL WET nga Samuel Weniger, Dardan Zhegrova

Deklarata: Për bastisjen e tij ambicioze në një drejtim të ri, me pamje joshëse në aspektin vizual, poetik dhe zanor, që kombinohen për të krijuar një film të shquar.

ÇMIMI I AUDIENCËS

“Batusha’s House” Tino Glimmann dhe Jan Gollob

ÇMIMI I BANKËS PROCREDIT PËR EKOVIDEO-N MË TË MIRË

Fituesit e garës EkoVideo jane:

Besnik Boletini
Indrit Loshi
Agon Veselaj

Në Prizren vihet gurthemeli i shtatores së Ukshin Hotit

June 17, 2016 by dgreca

Kosovë-Ukshin Hoti, filozofi i çështjes sonë kombëtare/

– Kryetari i Kuvendit të Kosovës, Kadri Veseli: Ukshin Hoti ishte ideologu që frymëzonte lëvizjen kombëtare me guximin e tij politik dhe mendimin e thellë intelektual. Ai ishte në kuptimin e plotë të fjalës, filozofi i çështjes sonë kombëtare/

PRISHTINË, 17 Qershor /Gazeta DIELLI-B.Jashari/ Kryetari i Kuvendit të Republikës së Kosovës, Kadri Veseli, sot, mori pjesë në ceremoninë e vënies së gurthemelit të shtatores së prof. dr. Ukshin Hotit, në oborrin e Universitetit “Ukshin Hoti”, në Prizren.

Në fjalën e tij para të pranishmëve, kryetari Veseli e konsideroi Ukshin Hotin njërin prej personaliteteve më të shquara të luftës sonë për liri dhe pavarësi, i cili mbeti deri në fund veprimtar i pakompromis i lëvizjes kombëtare.

“Ukshin Hoti ishte ideologu që frymëzonte këtë lëvizje me guximin e tij politik dhe mendimin e thellë intelektual. Ai ishte në kuptimin e plotë të fjalës filozofi i çështjes sonë kombëtare”, theksoi kryeparlamentari Veseli.

Duke bërë një elaborim të aktivitetit politik atdhetar të Ukshin Hotit dhe të qëndresës së tij intelektuale e kombëtare, kryetari i Kuvendit tha se në fillim të viteve ’80-ta, kur terrori i regjimit jugosllav po përgjakte rininë e Kosovës, ai kishte ngritur zërin e protestës e të kundërshtimit dhe nuk ishte joshur nga postet.

Kryeparlamentari Veseli shtoi se burgosja e Ukshin Hotit nga regjimi jugosllav dhe shpallja e tij ‘i burgosur i ndërgjegjes’ nga Amnesty International, më 1983, bënë që zëri i Kosovës së shtypur të dëgjohej në qendrat vendimmarrëse të botës.

“Ukshin Hoti nuk hoqi dorë kurrë nga parimet e tij, sepse gjithë jetën kishte vetëm një interes: interesin kombëtar, lirinë e popullit të tij. Në vitet ’90-ta, regjimi përsëri e burgosi Ukshin Hotin, sepse e dinte shumë mirë se filozofi i çështjes shqiptare do të bëhej filozofi i Ushtrisë Çlirimtare të Kosovës. Por përsëri dështuan, sepse tanimë Ukshin Hoti ishte kthyer në ikonë të lëvizjes sonë kombëtare”, tha në vazhdim kryetari Veseli.

Thënia e tij legjendare se ‘për atdheun mund të luftohet vetëm në emër të njerëzores dhe kurrsesi ndryshe’, shtoi kryetari Veseli, qëndron në themele të vetë platformës së UÇK-së, parim ky i cili bëri botën demokratike të mbështeste kauzën për çlirim në vitin 1999.

Kryetari Veseli e quajti cinizëm faktin se Serbia sot pretendon të bëhet pjesë e BE-së, ndërsa ende nuk jep përgjigje për fatin e mijëra qytetarëve të pagjetur Kosovës, në mesin e të cilëve edhe të profesor Ukshin Hotit, dhe mban në territorin e saj varreza sekrete të viktimave të pafajshme.

“Si mund të jetë pjesë e Evropës dikush që mban sekret fatin e intelektualëve të kalibrit evropian, sikurse është Ukshin Hoti? Është koha t’i jepet fund këtij cinizmi. Kosova ka të drejtë të dijë për fatin e qytetarëve të saj, ta ketë drejtësinë për ta, sepse vetëm drejtësia shëron plagët e së shkuarës, mundëson paqen dhe të ardhmen”, theksoi kryetari Veseli.

Ai shtoi se Prizreni duhet të jetë krenar që ka fatin të ketë i pari në gjirin e vet shtatoren e këtij ideologu dhe intelektuali të madh, ndërsa paralajmëroi se së shpejti një shtatore e përmasave edhe më të mëdha, do të ngrihet në mes të Fakultetit Filozofik të Universitetit të Prishtinës dhe Bibliotekës Kombëtare, afër vendit ku Ukshin Hoti derdhi djersën dhe shkriu mundin e tij atdhetar, intelektual e shkencor.

Hapet Konsullata turke në Prizren

April 23, 2016 by dgreca

Prizren, 23 prill 2016-B.Jashari/Në qytetin e Prizrenit në Kosovë është hapur sot Konsullata e Turqisë. Të pranishëm në këtë ngjarje ishin kryeministri i Republikës së Kosovës, Isa Mustafa dhe ministra të qeverisë kosovare, zëvendëskryeministri turk Numan Kurtulmus, përfaqësues diplomatikë dhe personalitete nga Prizreni. Gjatë ceremonisë u vlerësuan marrëdhëniet shumë të mira ndërmjet dy shteteve dhe u shpreh përkushtimi i dy anshëm për bashkëpunim të mëtejshëm. Ndërkohë, në Kosovë është festuar Dita e Turqve -23 Prilli, e cila është e përcaktuar si një nga “ditët memoriale” me Ligjin për festat zyrtare, të miratuar pas shpalljes së pavarësisë para 8 viteve.Sipas regjistrimit të popullsisë të pranverës 2011, në Kosovë 1.08 % e banorëve janë të komunitetit turk. Mamusha, në rajonin e Prizrenit, është e vetmja nga gjithësej 38 komunat kosovare e banuar me shumicë nga pakica turke.