Skenar të tërheqjes zvarrë të njerëzve mund të shihen vetëm në shtetin e ashtuquajtur islamik dhe këto veprime kanë mundur të ndodhin edhe në kohën e inkuizicionit/
Shkruan: XHAVIT ÇITAKU/
Nuk po mund të besoj. Po me dukët një ëndërr e keqe. Apo po shtirem se është një ëndërr që nuk do të dëshiroja ta shoh. Mirëpo, fatkeqësisht është një realitet i tmerrshëm që lexova në portale shqiptare: Daut Haradinaj paralajmëron anëtarët e Komisionit për veteranët e UÇK-së se do të tërhiqen zvarrë nëpër shesh. Është ky një paralajmërim shokues, tmerrues e shqetësues. Është një veprim çnjerëzor që kohëve të fundit mund të shihen duke u kryer vetëm në shtetin e ashtuquajtur islamik nga xhihadist e terrorist dhe në kohën e inkuizicionit. Është kjo një deklaratë jashtëzakonisht e pamatur por edhe naive e thënë në kohën kur e tërë bota është duke e dënuar me forcë gjithë atë tmerr që është duke ndodhur në hapësirën e shtetit islamik ku po kryhen masakra nga më të vrazhdat që i njeh njerëzimi. Dhe tash sipas Daut Haradinajt e njëjta gjë do të mund të ndodh edhe në Kosovë të cilën gjë do të mund ta bëjnë ish-ushtarët e UÇK-së, të cilët ideal patën çlirimin e vendit dhe gëzimin e të drejtave të shqiptarëve që ishin nëpërkëmbur nga okupatori fashist serb. Këtë sigurisht se nuk do ta lejojnë të ndodh kurrën e kurrës këta heronjë të ditëve tona, mirëpo kjo vetëm se po hedh në sipërfaqe dhe po argumenton se ka të tillë që mendojnë se do të duhej të ndërmerren edhe këso masa makabre që tek qytetarët e kosovës janë të papranueshme dhe të dënueshme.
Të mbretëroj toleranca dhe mirëkuptimi
Është më së e domosdoshme që procesi i verifikimit të veteranëve të UÇK-së të jetë real dhe në lista të futën vërtetë ata që e meritojnë, ata që me pushkë në dorë luftuan për çlirimin e atdheut. Pa dyshim se këtu rol të madh luajnë edhe komandantët e niveleve të ndryshme të cilët më për së afërmi i njohin luftëtarët që ishin nën udhëheqjen e tyre. Nuk duhet në asnjë mënyrë që në ato lista të gjenden të tillë që kanë lidhje farefisnore apo të tjerë që vetëm kanë parë “ ëndërr” se kanë qenë ushtarë të UÇK-së. Pavarësisht se ku gjenden pengesat, gabimet apo lëshimet e mundshme është më së e domosdoshme që të mbretëroj toleranca e mirëkuptimi në mënyrë që ky proces të përfundoj siç është më së miri. Për këtë ka mundësi reale që të ndodh kështu vetëm nëse kërkohet vullnet e dëshirë nga të gjithë. Së këndejmi as nuk është koha e aq më pak nevoja që të ndërmerren masa drastike ndaj askujt edhe nëse ka gabuar apo që eventualisht ka bërë ndonjë lëshim që lehtë mund të përmirësohet.
Ai që ka bagazh atdhetar duhet të jetë shumë i matur
Daut Haradinajt duhet t’ia përkujtojmë se nisur nga ai bagazh i madh atdhetar që ka familja e tij ka paralajmërim është i ngutshëm dhe shqetësues. Është shqetësues sepse nxit, cyt e “ josh” njerëzit e pandërgjegjshëm që të ndërmarrin hapa radikal që do të shpijnë në rrezikimin e prishjes se situatës në Kosovë, e cila edhe ashtu është mjaft e brishtë. Dhe duhet ta dijë Daut Haradinaj se po të ndodh një gjë e keqe nga ky paralajmërim famkeq edhe ai do të këtë një përgjegjësi nëse jo penale sigurisht se morale po se po. Për një komandant të nivelit të Daut Haradinajt do të duhet të mbretëroj durimi e maturia si dhe mesazhi për veprime që shpijnë në zgjidhje të problemeve me mirëkuptim dhe tolerancë e jo që të paralajmërohet një veprim që nuk duhet të zë vend në Kosovë. Janë vetëm gjykatat ato që i dënojnë njerëzit dhe askush tjetër.