Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Kosova 2017 zgjedhje lokale. Edhe parlamentare?

by

-Sipas afatit kushtetues, zjedhjet e ardhshme parlamentare në Kosovë do duhej të mbaheshin në verën e vitit 2018/1 Koha-Sondazhe dhe reagime. Kosova këtë vit edhe zgjedhje parlamentare? Shtypi i Prishtinës: Përgatitje intensive për zgjedhje të parakohshme/1 shtatorja Rugova

 PRISHTINË, 25 Prill 2017-Gazeta DIELLI-Behlul Jashari/ Zjedhjet e ardhshme parlamentare në Kosovë, sipas afatit kushtetues, do duhej të mbaheshin në verën e vitit 2018,  katër vite pas atyre të parakohëshme të 8 qershorit 2014, e që ishin të pestat në liri nga qershori 1999 dhe të  dytat nga shpallja e pavarësisë në 17 shkurtin historik 2008.
E nëse zgjedhjet e ardhshme parlamentare, sipas disa paralajmërimeve, do jenë poashtu të parakohëshme, e do mbaheshin në 2017-ën, nëse shpallen së shpejti do mbaheshin në verë, por ka mundësi të mbahen edhe në vjeshtë, në të njejtën ditë me lokalet, që mos të ketë dy organizime zgjedhjesh brenda një viti e edhe të kursehet buxheti nga shpenzimet e dyfishta.
Tashmë në Kosovë, në deklarimet e aktivitetet e partive e lidërëve të tyre, vie “erë” fushatash elektorale e zgjedhjesh, ndërsa përmenden edhe emra kandidatësh të mundshëm për kryetarë komunash. Madje, ka sondazhe se çfarë do jetë renditja e partive në zgjedhjet parlamentare, kush fitues e kush humbës, si dhe reagime lidhur me këto sondazhe.
Në Kosovë, zgjedhjet parlamentare dhe lokale përnjëherë kanë ndodhur edhe më parë, në 17 nëntor 2007, dhe ato sollën legjislaturën e tretë, e cila ka hyrë në histori me shpalljen e Pavarësisë. Në Kosovën e lirë  të parat zgjedhje parlamentare u mbajtën në 17 nëntor 2001.
 
Kosova ka pasur zgjedhjet e saj të pavarura edhe para se të bëhet e lirë dhe e pavarur, të parat ishin parlamentare e presidenciale në 24 maj 1992, që u mbajtën në rrethana të rënda okupimi nga regjimi i dhunës serbe e ishin pjesë e lëvizjes e luftës për liri, pavarësi e demokraci.
Sipas shtypit të sotëm në Kosovë, institucionet u kanë dhënë intensitet veprimeve e konsultave në funksion të përgatitjeve për zgjedhjet e parakohshme parlamentare.Madje, janë bërë edhe plane operative, shkruan sot Koha Ditore.
Burime të gazetës kanë thënë se presidenti Hashim Thaçi e ka ftuar të hënën në takim kryetaren e Komisionit Qendror të Zgjedhjeve (KQZ), Valdete Daka, nga e cila ka kërkuar që një vendim i mundshëm për shpërndarjen e Kuvendit të mos e gjejë në befasi institucionin përgjegjës për organizimin e zgjedhjeve.
Ftesa i ka mbërritur Dakës javën e shkuar, kohë kjo kur KQZ-ja ka ndërmarrë disa veprime, përfundon citimi i gazetës.

Mesila Doda dhe Albana Vokshi, në Forumin Global të Grave Parlamentare

by

Deputetet Mesila Doda, kryetare e Aleancës së Grave Deputete të Kuvendit të Shqipërisë dhe Kryetare e grupit të miqësisë Shqipëri-Islandë dhe Albana Vokshi kryetare e Komisionit të Ccështjeve Sociale, morën pjesë në konferencën botërore me temën “Prania e gruas në politikë, kusht përparimi për shoqërinë”, ku merrnin pjesë deputete dhe senatore nga të gjitha kontinentet.

Në konferencë, Deputetet parashtruan qëndrimet e tyre lidhur me rolin e gruas në shoqërinë e sotme dhe sfidat e saj në shoqërinë shqiptare. Ato nënvizuan nevojën për një prani më të shtuar të grave në politikë, duke promovuar modelin e Islandës, i cili është listuar në 5 vitet e fundit si vendi i parë në botë për diferencën midis burrave dhe grave si dhe është vendi me praninë më dominonte të grave në politikë. Deputetet theksuan gjithashtu nevojat e mëdha të gruas shqiptare që përfshijnë problematika të rënda njerëzore, siç është fenomeni i dhunës në familje, i cili ende nuk po përballet në mënyrë serioze nga shteti dhe shoqëria, ashtu dhe ato të kushteve të pasigurisë ekonomike.

Gruaja shqiptare ka nevoje për ndihmë në rritjen e pjesëmarrjes në politikë, në forcimin ekonomik dhe në përmirësimin e rolit të saj në strukturën shoqërore. Sot janë mijëra gra, nëna e kryefamiljare që po pushohen çdo ditë nga administrate, duke keqkuptuar ndërrimin e pushteteve si hakmarrje mbi punonjësit e veçanërisht gratë dhe vajzat.

Gjatë kësaj vizite, deputetet patën takime pune me Ministrin e Jashtëm Islandez Gunar Sveinsson, ministren e Çështjeve Sociale Iglo Harbrdottir, kryetaren e komisionit të çështjeve sociale Singridur Ingradottir. Deputetet shqiptare morën pjesë në takime me presidentin e Islandës Olafur Ragnar Grimsson dhe kryeministrin e Islandës Sigmundur Gumnlaugsson.

Gjatë këtyre takimeve deputetet Doda dhe Vokshi, kërkuan rritjen dhe intensifikimin e marrëdhënieve midis dy vendeve, veçanërisht ato të marrëdhënieve parlamentare. Islanda është vend lider në energjinë e rinovueshme, peshkim, turizëm dhe çështjet sociale dhe ndarja e përvojave të tilla do nxiste një bashkëpunim të frytshëm dhe interes reciprok mes dy vendeve.