PËR MAQEDONINË – Dielli

Qëndrimi i Uashingtonit është i qartë: Qytetarët i kanë zgjedhur përfaqësuesit e parlamentit në dhjetor, po ashtu ka një shumicë të qartë në Parlament e cila pret që të formojë qeverinë, prandaj ajo duhet të krijohet./

Mazedonien Gespräche Johannes Hahn mit Zoran Zaev (picture-alliance/AP Photo/B. Grdanoski)

Uashingtoni fton autoritetet e Maqedonisë të formojnë pa vonesë qeverinë e re. Politikanët në Maqedoni të cilët përpiqen që të bllokojnë formimin e Qeverisë, dëmtojnë stabilitetin e vendit dhe rajonit, prandaj këtyre politikanëve, mund të kërkohet të mbajnë përgjegjësi. Qytetarët i kanë zgjedhur përfaqësuesit parlamentar në dhjetor dhe ka një shumicë të qartë në Parlament e cila pret që të formojë Qeveri, ka thënë zëdhënësi i Departamentit Amerikan të Shtetit. “Shtetet e Bashkuara inkurajojnë liderët maqedonas që të bëjnë gjithçka që munden që të formuar një Qeveri pa vonesa të mëtejshme në mënyrë që vendi të mund të vazhdojë me reformat e nevojshme për t’u bërë anëtare e plotë e familjes euro-atlantike.

Politikanët të cilët përpiqen që të bllokojnë formimin e qeverisë, e zhvlerësojnë sundimin e ligjit, proceset demokratike dhe stabilitetin në Maqedoni dhe në rajon”, vlerëson Departamenti i Shtetit. DASH do të punojë me partnerët evropianë për të inkurajuar këta politikanë që të ndalin opstrukcionet e tyre, duke përfshirë edhe mundësinë që të njëjtit të japin përgjegjësi për veprimet e tyre.

Protesta e VMRO-DPMNE

Ruzhin: Maqedonia mund të përballet me sanksione

Reagimi i DASH mbi krizën politike në Maqedoni, si edhe kërkesa për formimin pa vonesë të qeverisë së re vlerësohet nga analistët politik në vend si një shpresë për zhbllokimin e ngërçit politik duke patur parasysh pozicionet e partive politike që janë aq të betonuara, sa që vështirë mund të ketë lëvizje nga vijat e tyre të kuqe pa një ndërhyrje të fuqishme nga SHBA-të dhe Bashkimi Evropian. Ish-ambasadori në NATO, Nano Ruzhin thekson se porosia e DASH-it në thelb përmban sanksione individuale ndaj aktorëve politik në Maqedoni, të cilat sipas tij do t’i mbështesin edhe shtete tjera të BE-së.

“Departamenti Amerikan i Shtetit shpreh qartë qëndrimin se politikanët të cilët bllokojnë formimin e Qeverisë së re dhe zgjedhjen e kryetarit të Parlamentit mund të ndëshkohen me sanksione individuale. Është ky apel që duhet t’i vërë në lëvizje politikanët vendorë”, vlerëson Nano Ruzhin.

Klasa politike duhet t’u qaset me kujdes thirrjeve të Uashingtonit në të kundërtën vendi mund të përballet me sanksione është i mendimit edhe profesori universitar Bashkim Selmani. “Udhëzimet nga faktori ndërkombëtar e diplomatik deri tani fatkeqsisht tek udhëheqësit e vendit kanë hasur në vesh të shurdhër. Tani mesazhet janë më konkretë, më decide, në rast se nuk përfillen këto mesazhe atëherë politikëbërja vendase mund të përballet me sanksione”, thotë profesor Selmani.

Shumica parlamentare duhet të jetë më aktive

Federica Mogherini me presidentin, Ivanov

Për profesorin e të drejtës ndërkombëtare, Denko Malevski qëndrimi i DASH për krizën politike në Maqedoni mund të ndikojë në lëvizjen e krizës nga pika zero. “Besoj se të gjitha këto reagime apo presione, pavarësisht se si interpretohen, në fund do të rezultojnë me sukses. Duke parë zhvillimet në katër muajt e fundit, që nga përfundimi i zgjedhjeve, apo edhe të viteve të fundit, nga politikanët tanë gjithçka mund të pritet”, thotë Maleski.

Për profesorin universitar Bekim Kadriu porositë që vijnë nga jashtë janë parapërgatitje për formimin e qeverisë nga shumica e re, e cila do të njihet nga faktori ndërkombëtar. “Vlerësoj se ata përgatisin terrenin, që nesër të mundet që një Qeveri e tillë e zgjedhur të ketë njohje edhe nga shtetet e BE-së dhe SHBA-ve, pra thjesht të ketë legjitimitet dhe mbështetje të plotë. Për shkak se zgjedhja e Qeverisë pa dhënien e mandatit do të jetë një masë e jashtëzakonshme si rezultat i shkeljes së Kushtetutës nga vetë Presidenti Ivanov”, shprehet profesor Kadriu.

Analisti politik Nikolla Dujoski është i mendimit se partitë e koalicionit të ri parlamentar duhet të shpërfillin VMRO-në e Nikolla Gruevskit dhe vetë të votojnë institucionet e reja, pasi në të kundërtën, rrezikojnë të humbin mbështetjen tek elektorati. “Kemi një shumicë parlamentare, ata duhet ta kryejnë punën e tyre. Çdo ditë e humbur është humbje për Maqedoninë. Deri në formimin e Qeverisë kjo mbështetje për ta mundet të mbetet, por nëse ngërçi nuk zgjidhet qytetarët do të kërkojnë zgjedhje tjera”, thotë Dujovski. Presidenti Gjorgji Ivanov dhe kryetari i VMRO-DPMNE-së Nikolla Gruevski përmes deputetëve të partisë së tij kanë bllokuar zgjedhjen e kryetarit të Parlamentit, duke vlerësuar se platforma e shumicës parlamentare rrënon themelet e shtetit unitar maqedonas, pasi me të i hapet rruga ndryshimit të Kushtetutës dhe federalizimit të vendit.(Fatos Musliu)

OPINION NGA ELIDA BUÇPAPAJ/
Në ditën e protestës të opozitës në Maqedoni, Ermira Mehmeti , deputetje e BDI-së, e partisë të Ali Ahmetit në koalicion me Gruevskin, do të shkruante në Facebook se „qeveria e Gruevskit e izoloi vendin nga partnerët nderkombëtare; se e rrënoi imazhin pozitiv të vendit; se nuk tregoi asnjë respekt për parimet e bashkëqeverisjes etnike; se pa ndalur e luftoi realizimin e Marrëveshjes së Ohrit; se vendosi autoritarizmin në vend te demokracise; se refuzoi dialogun; se rrënoi bashkjetesën, se prishi kohezionon e brendshëm. Mjaft më, thotë në fund Deputetja Mehmeti. Është koha për dorëheqje!“
Duhej të thoshte qeveria Gruesvki-Ahmeti, sepse Gruevskin e ka mbajtur gjithmonë në këmbë Ali Ahmeti, duke shkelur të drejtat legjitime të shqiptarëve. Por megjithatë zëra si i Ermira Mehmetit duhen. Vetëm duhet të mos e lënë kohën të rrjedhë shterpshëm dhe dëmshëm.
Kjo është Maqedonia sot, që me pak fjalë, që e përshkruan vetë deputetje e Ali Ahmetit. Përfshi këtu krimin në Lagjen e Trimave në Kumanovë. Maqedonia sot është e rrezikshme për qytetarët e saj, e rrezikshme për fqijnët e saj, e rrezikshme për vetë Maqedoninë.
Dhe Maqedoninë e ka bërë të rrezikshme dhe e kanë vënë në rrezik për të ekzistuar Ali Ahmeti, Gruevski dhe kasta e vjetër.
Në titull e kam vendosur përpara emrin e Ali Ahmetit e pastaj të Gruevskit. Sepse pa Ahmetin, Gruevski do të ishte i paralizuar. Dhe tragjedia e Kumanovës nuk do të ndodhte nëse Ali Ahmeti nuk do të ishte qe djathtë i Gruevskit. Gjoja në mbrojtje të Maqedonisë!
Ali Ahmeti ka kohë që luan me kartën e ndarjes të Maqedonisë. Ose më mirë të themi po e kërcënon BE, NATO-n dhe SHBA me këtë kartë! Duke u shtirur si personi që siguron e garanton mosndarjen e Maqedonisë. Në fakt është një diktator i përfshirë në të gjitha krimet shtetërore që qeveria e Maqedonisë ka ekzekutuar kundër shqiptarëve, të cilët i ka vrarë me pretekstin se ata kanë vënë në rrezik integritetin territorial dhe shtetëror të Maqedonisë.
Edhe në 2001, edhe tani më 2015 qenësia e shtetit të Maqedonisë është duke në diskutim e rrezikuar nga VMRO-DPMNE bashkë me aleatin shqiptar.
Ali Ahmeti bën sikur harron se shkak për konfliktin e 2001 ishte diskriminimi etnik i shqiptarëve nga shteti sllavo-maqedon. Tani është Ali Ahmeti bashkë me Gruevskin që përsërisin historinë.
Sepse nëse konflikti i 2001 solli në skenën politike Marrëveshjen e Ohrit, Ali Ahmeti do të duhej të ishte garant i kësaj Marrëveshje, që kjo të implementohej gërmë për gërmë. Vetëm kështu do të bëhej garant i bashkëkzistencës etnike të shtetit multietnik.
Por në vend që të ishte garant i Marrëveshjes të Ohrit, Ali Ahmeti u bë garantues për mosimplementimin e Marrëveshjes së Ohrit, çka e ka kthyer Maqedonia e vitit 2015 në atë të pragshpërthimit të konfliktit të 2001.
Sot Ali Ahmeti është personi që në daljet e pakta publike po justifikon terrorin shtetëror të Gruevskit dhe vrasjen e dhjetë Komandantëve të UÇK-së në Lagjen e Trimave me të cilët ai luftoi në konfliktin e 2001, me pretekstin se i ashtuquajturi „grupi i armatosur“ kishte synim ndarjen e Maqedonisë, ndërsa masakra shtetërore u krye për të siguruar mos ndarjen e Maqedonisë.
Në fakt, Maksakra e Kumanovës, është një krim monstruoz i tipit stalinisto-sovjetik, që e ka vënë në rrezik të plotë ekzistencën e Maqedonisë. Dhe Maqedonia shpëton, nëse nga skena e saj politike largohen njerëz të tillë të papërgjegjshëm që shtetin e kthejnë në një makineri kriminale vrastare. Përgjëgjësit e krimit duhet të dalin sa më shpejt përpara drejtësisë, sepse vetëm kështu funksionon një shtet ligjor e demokratik.
Maqedonia shpëton, kur të largohen nga skena politike Gruevski me Ali Ahmetin, të cilët duhet të mbajnë përgjegjësi të plotë për krimet e kryera në Maqedoni. Maqedonia nuk është e Gruevskit as e Ali Ahmetit, por e shtetasve të saj. Maqedonia është territor i Europës dhe integritetin e Europës e mbron NATO.
Nëse Ali Ahmeti sot pretendon se këtë krim do ta zbardhin personat e arrestuar, ky pretendim i tij është përpjekja e fundit e Ali Ahmetit për ta fshehur të vërtetën nga njerëz, të cilët Ali Ahmeti duhet t’i ketë infiltruar në të ashtuquajturin « grupin e armatosur », pikërisht ata, të cilëve Ali Ahmeti u shpëtoi jetën, ndërsa nga ana tjetër i la të vriteshin dhjetë djem trima, ish-Komandantë të UÇK-së dhe shtetes të Kosovës, që Maqedonia e Gruevskit dhe Ali Ahmetit u kishte përgatitur një kurth për t’i vrarë.
Vrasja e dhjetë ish-Komandantëve të UÇK-së dhe djegia e shtëpive të civilëve në Lagjen e Trimave në Kumanovë është preludi i djegjes të Maqedonisë dhe Maqedonia shpëton vetëm nëse, pa u vonuar më, Komuniteti Ndërkombëtar ndërhyn menjëherë duke larguar nga skena politike e Maqedonisë, shkaktarët dhe autorët e të vërtetë që e rrezikojnë integritetin territorial të Maqedonisë.

Apelet e Uashingtonit për Maqedoninë

RREZIK PËR MAQEDONINË JANË ALI AHMETI DHE GRUEVSKI!