Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Komisioni, i gatshëm të nisë punën për matjen e territorit

by

Komisioni i ekspertëve për matjen e territorit të Republikës së Kosovës ka mbledhur dokumentet e nevojshme për të filluar punën në terren.Anëtari i grupit të ekspertëve dhe zëdhënësi i komisionit, Tomor Çela tha për Radion Evropa e Lirë se komisioni ka pranuar dokumentet e nevojshme dhe brenda javës do të prezantohen nga institucionet përkatëse për shqyrtim dhe diskutim.“Ne jemi në fazën e rishikimit të dokumentacionit komplet. Me datën 10 do ta kemi një takim të përbashkët ku secili institucion do të prezantojë të gjeturat e veta rreth sipërfaqeve dhe projekteve që i kanë realizuar në territorin e Kosovës”, tha Çela. Gazmend Muhaxheri, kryetar i Komunës së Pejës nga radhët e Lidhjes Demokratike të Kosovës, njëherësh anëtari i komisionit, tha po ashtu se përfaqësuesit e komunave nga të cilat është kërkuar dokumentacioni për territor, i kanë dorëzuar në komision.“Ne si komuna kemi dorëzuar dokumentacionin e kërkuar. Atë çka posedon Komuna e Pejës, (është dorëzuar dokumentacion) 602 kilometra katrorë e 58 hektarë është sipërfaqja totale e komunës së Pejës. Në bazë të llogarisë së matjeve që do të bëhet më tutje, do të konstatohet a ka humbje të territorit …a mungojnë ato 83 kilometra që po i propagandon opozita dhe disa deputet të pozitës”, tha Muhaxheri për Radio Evropa e Lirë.Komisioni përbëhet nga ekspertë, të cilët janë deleguar nga institucionet dhe subjektet e ndryshme vendore. Në këtë komision gjatë punës pritet të ketë edhe ekspertë në cilësinë e vëzhguesve nga institucionet dhe përfaqësitë ndërkombëtare në Kosovë.Formimin dhe punën e këtij komisioni e kanë kundërshtuar partitë politike opozitare dhe nuk kanë dashur që të marrin pjesë në ketë komision duke thënë se “nuk dëshirojnë të legjitimojmë veprime dhe marrëveshje tejet të dëmshme për të ardhmen e Kosovës, siç është edhe Komisioni për matjen e territorit”.Në Komisionin e ekspertëve për matjen e territorit të Republikës së Kosovës nuk po marrin pjesë as përfaqësuesit e banorëve të brezit kufitar mes Kosovë dhe Malit të Zi.

Ali Lajçi, ishte caktuar nga komisioni si përfaqësues i banorëve, por ai nuk ka marrë pjesë dhe konfirmon se nuk do të përcjellë punimet e komisionit.“Nuk kam shkuar ngase e konsiderojmë si farsë. Është humbur legjitimiteti, kurse tash po bëhen prova për të dërguar edhe një herë (në Kuvend) për ta bërë një kamuflim. Ne nuk jemi të interesuar ta legjitimojmë atë lloj projekti tashmë të dështuar”, tha Lajçi.Partitë politike opozitare në vitin e kaluar patën bllokuar disa herë seancat plenare, duke përdorur dhe gazin lotsjellës dhe fishkëllima në sallën e Kuvendit, kur është tentuar të trajtohet çështje e Demarkacionit të kufirit me Malin e Zi apo çështje tjera që nuk janë mbështetur nga tabori opozitar.Komisioni për matjen e territorit të Republikës së Kosovës me anë të një komunikate për media ka deklaruar se është duke punuar intensivisht në kuadër të ndarjes së punës.“Në punën e Komisionit mungojnë vetëm ata që nga fillimi nuk iu kanë përgjigjur ftesës së Qeverisë dhe të Kryeministrit (partitë opozitare dhe dy kryetarë të komunave). Komisioni i fton edhe ato subjekte që përmes përfaqësuesve të tyre t’i bashkohen diskutimit konstruktiv për të dhënë kontributin e tyre në të mirë të vërtetës dhe të Kosovës”, thuhet në komunikatën e Qeverisë, duke thënë se në komision “nuk ka asnjë përçarje”.Matja e territorit është iniciuar si kërkesë nga ana e kryeministrit të Kosovës, Isa Mustafa, pas akuzave të opozitës por edhe disa deputetëve në pushtet, se me Marrëveshjen për shënjimin e vijës kufitare me Malin e Zi, Kosova ka humbur mbi 8 mijë hektarë territor.Përfaqësuesit e Qeverisë së Kosovës, kanë deklaruar se kjo matje nuk do të marrë shumë kohë dhe se me anë të këtij procesi do t’i jepet një përgjigje profesionale dhe shkencore pyetjes se a ka humbur apo jo territor shteti i Kosovës me marrëveshjen për demarkacionin e kufirit me Malin e Zi.(Kortezi: Arton Konushevci-RFL)

Konstituohet Komisioni i ekspertëve për matjen e territorit të Republikës së Kosovës

by

 

1 kom kufijeve

Prishtinë, 24 janar 2017/Kryeministri i Republikës së Kosovës, Isa Mustafa, mori pjesë në takimin konstituues të Komisionit të ekspertëve për matjen e territorit të Republikës së Kosovës.Në takim ishin të pranishëm edhe zëvendëskryeministrat Hajredin Kuçi e Ramiz Kelmendi, ministri i Punëve të Brendshme, Skënder Hyseni, vëzhguesit ndërkombëtarë nga Ambasada e Shteteve të Bashkuara të Amerikës dhe KFOR-i, kryetari i Komunës së Pejës, Gazmend Muhaxheri dhe ai i Komunës së Istogut, Haki Rugova, përfaqësues të institucioneve tjera kompetente që do të jenë në cilësinë e anëtarëve të Komisionit për matjen e territorit të Republikës së Kosovës.Kryeministri Mustafa, me këtë rast theksoi se Qeveria nuk do të jap udhëzime se si të punojë Komisioni duke qenë se ai është profesional dhe do ta ketë plotësisht në kompetencë dhe përgjegjësi të tij që të përcaktojë kriteret, metodologjinë dhe teknikat e matjes së territorit të Republikës së Kosovës.“Raporti, të cilin ju do ta bëni përfundimisht, do ta aprovojë Qeveria e Republikës së Kosovës dhe me këtë raport pastaj do ta njoftojmë Kuvendin e Republikës së Kosovës dhe qytetarët e saj lidhur me territorin që e kemi tani dhe territorin që e kemi pasur para datës 25 gusht të vitit 2015”, tha kryeministri Mustafa.

 

2 tavKryetari i Akademisë së Shkencave dhe Arteve të Kosovës, Akademik Hivzi Islami u zotua në punë të paanshme dhe profesionale të Komisionit.

“Ky Komision nuk do të merret me shkaqet dhe efektet politike të kufijve, me markim ose demarkim të tyre, as me aspekte tjera. Komisioni ka për detyrë vetëm të bëjë matjen e territorit të Republikës së Kosovës, përkatësisht të secilës zonë kadastrale dhe komunë administrative.Komisioni do të qëndroj larg ndikimeve dhe animeve politike, partiake, të grupeve të interesit, sikurse që do të lë anash emocionet, patetizmin, folklorin, irracionalitetin. Neve na duhet këtu, në këtë moment, vetëm profesionalizmi. Në këtë çështje, si edhe në shumë çështje tjera me rëndësi kombëtare dhe shtetërore, është shumë i nevojshëm, më se i nevojshëm konsensusi i plotë i të gjitha forcave politike dhe institucioneve profesionale, shkencore dhe shoqërore të Kosovës”, tha Akademik Islami.Komisioni i ekspertëve për matjen e territorit të Republikës së Kosovës, gjatë takimit ka vendosur që të funksionoj në dy grupe punuese, organizativ dhe profesional.Grupi organizativ do të merret me krijimin e kushteve teknike të punës, në bashkëpunim me Sekretariatin Koordinues të Qeverisë në Zyrën e Kryeministrit, pastaj me mbledhjen dhe sistemimin e materialit që do ta sjellin përfaqësuesit organizatave dhe agjencive, do të organizojë ballafaqimin e ekspertëve nga institucionet e ndryshme pas punës së profesionistëve të tyre, si dhe me çështje tjera organizativo-administrative deri te hartimi i Raportit final.Grupi Profesional ka për qëllim mbledhjen e të dhënave dhe gjithë dokumentacionin zyrtar vetëm nga institucionet përkatëse, ku përfshihen të gjitha llojet e të dhënave dhe fakteve: kadastrale, hartografike, statistikore, shkencore dhe menaxheriale të institucioneve të KSAK (deri në vitin 1988) dhe të Republikës së Kosovës (pas vitit 2008).

Takimi i radhës është vendosur të mbahet më 1 shkurt.

Fjala e plotë e kryeministrit në takimin konstituues të Komisionit të ekspertëve për matjen e territorit të Republikës së Kosovës.

Ne në mbledhjen e Qeverisë së Republikës së Kosovës, më 23 dhjetor të vitit të kaluar, kemi marr vendimin për themelimin e Komisionit të ekspertëve për matjen e territorit të Republikës së Kosovës.Sipas këtij vendimi, detyrë e komisionit është që të bëjë matjen e territorit para datës 25 gusht, do të thotë para nënshkrimit të marrëveshjes për demarkacionin me Malin e Zi dhe pas nënshkrimit të kësaj marrëveshje për të përcaktuar saktësinë e territorit të Republikës së Kosovës.Në komision janë përfshirë përfaqësues të organizatave shkencore, profesionale, të institucioneve të shtetit që merren me këtë fushë, pastaj kryetarët e katër komunave që kufizohen me Malin e Zi, të Komunës së Pejës, Istogut, Deçanit dhe Junikut, përfaqësues të shoqërisë civile si ekspertë dhe dy përfaqësues nga rajoni i Rugovës, që përcaktohen nga Komuna e Pejës.Po ashtu kemi lutur përfaqësuesit ndërkombëtarë që të kemi edhe vëzhgues ndërkombëtarë që do ta vëzhgojnë punën e komisionit dhe kemi marrë propozimet prej tyre për një vëzhgues nga Ambasada e Shteteve të Bashkuara të Amerikës, një nga Bashkimi Evropian dhe një nga KFOR-i.Qeveria nuk e ka marrë përsipër që vet të caktojë anëtarët e komisionit, por ne kemi përcaktuar vetëm organizatat, përkatësisht organet, nga të cilat kemi kërkuar që ata të delegojnë anëtarët e komisionit, përkatësisht ekspertë në  komision.

  •  Nga Akademia e Shkencave dhe Arteve të Kosovës, është Kryetari i Akademisë, akademik Hivzi Islami;
  •  Nga Fakulteti i Shkencave Matematikore Natyrore është caktuar, Dr.Fitim Humolli;
  •  Nga Grupi për Hulumtimin e Politikave të Ballkanit, është caktuar zëvendësdrejtori i këtij grupi, Jeton Rexha, që i përket shoqërisë civile. Kanë propozuar që me të,  të jenë edhe dy ekspertë që do ta mbështesin. Një ekspert do të jetë po ashtu edhe me Kryetarin e Akademisë të fushave profesionale;
  •   Nga Agjencia Kadastrale e Kosovës, Avni Ahmeti;
  • Nga Agjencia e Ujërave,  Fidan Bilalli;
  •   Nga Agjencia e Pyjeve, Faruk Bojaxhi;
  •   Nga KOSTT-i, Besim Gërxhaliu;
  •   Nga Agjencia Kosovare e Privatizimit, Agron Luta;
  • Nga Policia e Kosovës, Nënkolonel Kamer Jonuzaj, Departamenti i Kufirit;
  • Nga Agjencia e Statistikave të Kosovës, Idriz Shala;
  • Kryetari i Komunës së Pejës, z.Muhaxheri;
  • Kryetari i Komunës së Deçanit, z.Selmanaj;
  • Kryetari i Komunës së Istogut, z.Rugova;
  •   Kryetari i Komunës së Junikut, z.Kuçi; dhe
  •   Dy përfaqësues janë caktuar nga Peja, Ali Lajçi dhe Rrustem Selimaj.

 

Unë vetëm dëshiroj të them se ne si Qeveri nuk do të japim udhëzime se si të punojë Komisioni, sepse konsiderojmë se Komisioni është profesional dhe ne do ta lëmë plotësisht në kompetencë dhe përgjegjësi të Komisionit, që të përcaktojë kriteret, metodologjinë dhe teknikat e matjes së territorit të Republikës së Kosovës.Dëshiroj të them se ne do të mbështesim plotësisht, në mënyrë logjistike punën e Komisionit. Kemi Sekretarin e Qeverisë që është këtu së bashku me ne dhe ekipin e Sekretariatit, që do të mbështesë edhe në procesverbale edhe në transkripte dhe në përkthime, si dhe të gjitha materialet që ju nevojiten, dhe ato t’ju sigurohen me kohë.Raporti, të cilin ju do ta bëni përfundimisht, do ta aprovojë Qeveria e Republikës së Kosovës dhe me këtë raport pastaj do ta njoftojmë Kuvendin e Republikës së Kosovës dhe qytetarët e saj lidhur me territorin që e kemi tani dhe territorin që e kemi pasur para datës 25 gusht të vitit 2015.Unë konsideroj se është një ndërmarrje shumë e rëndësishme për ne, sepse edhe qytetarët e Republikës së Kosovës janë të interesuar që të dinë saktësisht se sa është territori i Republikës së Kosovës për arsye të shumë diskutimeve dhe kontesteve që janë zhvilluar në këtë aspekt, por edhe bashkësia ndërkombëtare duhet ta dijë se cili është territori i Republikës së Kosovës, i asaj Republike, atij shteti që ata e kanë njohur ndërkombëtarisht, sepse neve na kanë njohur 113 shtete, na kanë njohur në territorin në të cilin ne e kemi shpall Pavarësinë e shtetit.Prandaj, është mirë që mos të krijohet ndonjë konfuzion dhe të sqarojmë gjërat, është mirë edhe për ata që kanë pasur mendime të ndryshme, edhe për të gjithë qytetarët që të sqarohen.Fjala është vetëm për një nevojë që ne ta kemi një përgjigje të saktë dhe kjo përgjigje e saktë mendoj që është e dobishme për të gjithë, është e dobishme për Kuvendin e Republikës së Kosovës, pa i ndarë pozitë-opozitë, është e nevojshme për Qeverinë e Republikës së Kosovës, është e nevojshme për institucionet e vendit dhe është e nevojshme për komunikimet tona që i kemi me faktorin ndërkombëtarë.Unë i falënderoj të gjithë ata që do të punojnë, edhe institucionet për propozimet të cilat i kanë dhënë, dhe uroj që kjo punë të kryhet me agjendën të cilën ju e caktoni.Unë kisha propozuar që në emër të Qeverisë, meqenëse këtu kemi edhe kryetarin e Akademisë së Shkencave dhe Arteve të Kosovës, që ai të drejtoj punën e këtij Komisioni, ndërkaq ne kemi ardhur sot që të marrim pjesë në konstituimin e Komisionit dhe prej këtij momenti, ne këtë çështje e lëmë në kompetencë dhe fushëveprimin tuaj, që të uleni dhe të përcaktoni mënyrën se si do të punoni më tutje në këtë Komision dhe të përcaktoni kohën. Ndërkaq ajo që ne e marrim obligim si Qeveri është që të gjitha adresimet që ju i bëni lidhur me materialet, dokumentacionin, edhe çështjet tjera që ju nevojiten, ato do t’ju sigurojmë.Unë ju uroj sukses në punë, e falënderoj edhe zëvendëskryeministrin Kuçi dhe Kelmendi, ministrin Hyseni dhe të gjithë tjerët, edhe Sekretarin e Qeverisë dhe Sekretariatin që janë këtu, ndërkaq do ta keni mbështetjen e plotë.Ne e vlerësojmë shumë këtë përkushtim dhe punën tuaj, dhe presim që atë punë ta bëni në mënyrë të pandikuar, krejtësisht në mënyrë të pavarur, me përgjegjësi profesionale dhe me etikë profesionale.

Faleminderit.

Fjala e kryetarit të Akademisë së Shkencave dhe Arteve të Kosovës, Akademik Hivzi Islami.

Të nderuar përfaqësues të organizatave, të agjencive profesionale dhe të instancave shkencore,

Të nderuar miq, përfaqësues të institucioneve ndërkombëtare, të Ambasadës së Shteteve të Bashkuara të Amerikës, të BE-së dhe të KFOR-it.

Pa SHBA-të nuk do të kishte ardhur as çlirimi, as pavarësia e Kosovës, madje as që do të kishim pasur mundësi të bisedonim me fqinjët për këtë çështje kaq të rëndësishme dhe të ndjeshme, çfarë janë problemi i kufijve ndërshtetëror, dje me Maqedoninë, sot jemi në proces me Malin e Zi, nesër do të jemi në proces me Serbinë.Ambasadori i SHBA-ve, z. Delawie dhe Departamenti i Shtetit Amerikan, kanë pasur një angazhim të veçantë në çështjen e demarkacionit Kosovë-Mali i Zi, tash një vit e gjysmë.

Të nderuara media,

Detyra që na është ngarkuar nga Qeveria e Republikës dhe kryeministri i saj, nuk është e lehtë, as e pëlqyeshme, as popullarizuese, ngase materia është e ndjeshme dhe komplekse dhe se debati tash e një vit e gjysmë është zhvilluar me tensione shumë të larta deri në skajshmëri.Komisioni do të bëjë krejt çka është e mundur që ta kryej këtë detyrë me përgjegjësi të lartë profesionale, do të punoj në favor vetëm të një komponenti: të së vërtetës, dhe me këtë, të heqjes së dilemave rreth madhësisë territoriale të Kosovës para 25 gushtit 2015, dhe pas nënshkrimit të Marrëveshjes për Shënimin e Vijës Kufitare midis Kosovës dhe Malit të Zi.Përveç Qeverisë, këtë e kërkojnë, besoj, çdo njeri racional, opinioni i gjerë dhe bashkësia ndërkombëtare. Është e vërtetë se historia për shqiptarët e Ballkanit është treguar e padrejtë, veçanërisht sa i përket kufijve. Por mjerisht historinë dhe padrejtësitë historike nuk mund t’i korrigjojmë, sepse kohët kanë ndryshuar dhe në terrenin e marrëdhënieve ndërkombëtare ka një situatë krejtësisht tjetër. Këto padrejtësi i mbesin shkencës së historisë për t’i studiuar.Ky Komision nuk do të merret me shkaqet dhe efektet politike të kufijve, me markim ose demarkim të tyre, as me aspekte tjera. Komisioni ka për detyrë vetëm të bëjë matjen e territorit të Republikës së Kosovës, përkatësisht të secilës zonë kadastrale dhe komunë administrative.Komisioni do të qëndroj larg ndikimeve dhe animeve politike, partiake, të grupeve të interesit, sikurse që do të lë anash emocionet, patetizmin, folklorin, irracionalitetin. Neve na duhet këtu, në këtë moment, vetëm profesionalizmi. Në këtë çështje, si edhe në shumë çështje tjera me rëndësi kombëtare dhe shtetërore, është shumë i nevojshëm, më se i nevojshëm, konsensusi i plotë i të gjitha forcave politike dhe institucioneve profesionale, shkencore dhe shoqërore të Kosovës.Mjerisht sot vërehet një boshllëk, se si duket ftesës së kryeministrit nuk u janë përgjigjur pozitivisht disa subjekte, pikërisht ato subjekte dhe ata individë të cilët kanë ngreh dyshime se Kosova po humb territor.Këtu është rasti që të debatohet dhe të ballafaqohen të dhëna dhe argumente “pro” apo “contra”, midis profesionistëve pa i dhuruar askujt asnjë centimetër territor.Puna jonë do të jetë e natyrës pragmatike institucionale dhe neve dhe gjithë Kosovës i duhet rezultati, çfarëdo që të del ai, në mënyrë që të qetësohen shpirtrat dhe ndërgjegjja dhe vendi të ec përpara drejt një progresi ekonomik dhe shoqëror, dhe të krijohet një stabilitet i brendshëm brenda kornizave demokratike, por edhe një raport i mirë me fqinjët dhe me miqtë tanë ndërkombëtarë.Në qoftë se jemi popull i madh pro euroamerikan, dhe jemi, atëherë duhet të bashkëpunojmë sinqerisht edhe me këta miq, ata janë pjesë e sigurisë sonë dhe e zhvillimit tonë tash e 17 vjet.