-Na duhet të mbesim lojalë ndaj orientimit tonë properëndimor – anëtarësimit në Bashkimin Evropian dhe në NATO – në frymë dhe në vepër, theksoi Presidentja e Kosovës, Atifete Jahjaga në Stantërg të Mitrovicës/

 Nga Behlul Jashari/ MITROVICË-STANTËRG, 20 Shkurt 2016/ Na duhet një platformë e re se si duhet të ecim përpara, tha sot Presidentja e Kosovës, Atifete Jahjaga në shënimin e 27 vjetorit të grevës së minatorëve të Trepçës, në Stantërg të Mitrovicës.

 “Sot gjendemi para një sfide tjetër – atë të forcimit të shtetësisë tonë dhe subjektivitetit të Republikës së Kosovës. Tani na duhet mobilizim po aq i qëndrueshëm dhe insistues që demokracinë tonë të brishtë dhe institucionet tona që duhet ta mbrojnë dhe avancojnë këtë demokraci t’i forcojmë çdo ditë”, u shpreh ajo.

Kjo, vijoi Jahjaga, është beteja jonë e radhës, beteja e së ardhmes, që varet nga ne dhe të cilën patjetër duhet ta fitojmë.
“Ne na duhet një platformë e re se si duhet të ecim përpara, një dialog i brendshëm për të ardhmen e Kosovën dhe drejtimin që do ta marrim si shtet dhe shoqëri. Na duhet të mbesim lojalë ndaj orientimit tonë properëndimor – anëtarësimit në Bashkimin Evropian dhe në NATO – në frymë dhe në vepër”, theksoi Presidentja kosovare.
Ajo drejtoi mesazhin se, na duhet t’i ripërtërijmë vazhdimisht vlerat që i vumë në themele të shtetësisë tonë.“Me ngulm dhe guxim duhet ta bëjmë reformën e ekonomisë tonë për të garantuar që vendeve si Stantërgu dhe banorëve të përkushtuar të tij t’i kthehet shkëlqimi dhe krenaria që e gëzonin dikur. Nuk kemi alternativë pos të ndërtojmë shtet ligjor. Besoj thellë se këto qëllime nuk janë të paarritshme, por duhet të jemi të vetëdijshëm që ato kërkojnë më shumë angazhim e punë”, u shpreh Jahjaga.
Presidentja e Kosovës përkujtoi se, thellë në nëntokën e Stantërgut, duke u hedhur në grevën më të gjatë që kishte njohur historia e asaj kohe minatorët e Trepçës ngritën fuqishëm zërin ndaj nacionalizmit që kanoste të zhbënte atë pak liri që Kosova gëzonte, kundër ndryshimeve kushtetuese të asaj kohe që dhunshëm po revokonin autonominë e Kosovës, që paralajmëronin ditë të zeza për shqiptarët e Kosovës e popujt e ish Jugosllavisë.“Para 27 vjetësh ju kontribuat në vetëdijesimin qytetar e ndërgjegjësimin ndërkombëtar për shtypjen që kishte marrë hov në Kosovë”, tha Presidentja Jahjaga duke iu drejtuar minatorëve të Trepçës.Në Stantërg të Mitrovicës u mbajt sot manifestimi qëndror i Javës së Minatorëve në 27 vjetorin e grevës së madhe të 1.300  minatorëve të Trepçës, nga 20 deri 28  shkurt 1989, në mbrojtje të Kosovës.