-Gjatë katër ditëve të festivalit, nga  14 deri 17 shtator në fshatin  Kukaj të Prishtinës, edhe 4 prezantime nga Shqipëria/

PRISHTINË, 12 Shtator 2016-B.Jashari/ Festivali i arteve dhe kulturës tradicionale, Etno Fest, edicioni i gjashtë, do të mbahet këtë javë, nga  14 deri 17  shtator, në Etnokompleksin e fshatit  Kukaj të komunës së Prishtinës. Gjatë katër ditëve të festivalit në fshatin 27 kilometra nga kryeqyteti i Kosovës pjesë e programit do jenë edhe katër prezantime nga Shqipëria: Tre  etnoansambleve – Vau i Dejes  nga Shkodëra, “Visaret e Krrabës” nga Tirana dhe “Vaçe Zela” nga Lushnja, ndërsa nga Teatri Kombëtar i Tiranës do jetë shfaqja “Marr guximin”, monodramë me Mehdi Malkajn.

Ndër prezantimet nga Kosova do jetë promovimi i 15  vëllimeve të  Eposit  të Kreshnikëve nga Zymer Neziri, ndërsa nga hapësirat tjera shqiptare pjesë e programit është edhe etnogrupi “Shpëtimi” nga Medvegja-Lugina e Preshevës.

Etnokompleksi ku zhvillohet Etno Fest disponon me 5 skena të hapura (skena e madhe, amfiteatri, skena te bunari, skena te oxhaqet dhe amfiteatri te shtëpia e vjeter); 3 skena të mbyllura (etno teatri, oda e shtëpisë së vjetër dhe shtëpiza te terrasa). Disponon gjithashtu edhe me një etno bar, etno restorant dhe një terrasë të madhe me lozha ekskluzive dhe hapësira të bukura ndeje dhe relaksi.
Poashtu, disponon me shumë hapësira ekspozuese, të hapura dhe të mbyllura, staza të bukura shetitje dhe kënde të vogëla relaksimi, meditimi dhe krijimi.

Organizatorët në ftesën e dërguar theksojnë se, për 5 vjet me radhë  Etno Fest ka promovuar vlera të mirëfillta të arteve dhe dhe kultures tradicionale të të gjitha trevave shqipatre  dhe pretetndon të bëhet në të ardhmen ngjarje  rajonale dhe ndërkombëtare.