Vogëlushët këngëtarë, gurë të çmuar në kurorën e “Diamond Fest”.

Nga Ramazan Çeka

Festivali i Fëmijëve “Diamond Fest” në Ferizaj, finalizoi me sukses edicionin e 10-të, ku kënga bashkoi fëmijët pjesëmarrës nga Kosova, Maqedonia e Veriut dhe Shqipëria.
Në prani të një pjesëmarrjeje të jashtëzakonshme spektatorësh, në Pallatin e Sportit “Bill Clinton”, të pranishmit përjetuan me emocion aromen e luleve të pranverës, që ku festival sjellë në çdo edicion.
Gazmorë, të hareshëm e sportivë, fëmijët pjesëmarrës në këtë festival, vërshuan në tapetin e Pallatit të Sportit, jo si sportistë, por si artistë që njësoj sjellin emocione në shkallët e këtij auditori, që i priti me duartrokitje e ovacione, që nga fillimi e deri në fund të spektaklit.
Skena, ashtu si për çdo vit, edhe në këtë Jubile të 10-të, ishte një bahçe e mbushur me lule shumëngjyrëshe dhe zogj këngëtarë.
Ata hynë duke vrapuar në dy anët e skenës së improvizuar mbi parketin e pallatit, duke krijuar pamjen e një kurore lulesh me shumë ngjyra, ashtu si vetë ata ishin veshur.
Kjo ishte atmosfera që elektrizoi gjithë sallën, që në hapjen e festivalit dhe që e shoqëroi atë deri në fund. Të tillë janë fëmijët, e veçanërisht ata, që pa hezitim mund t’i quajmë artistë të vegjël. Ata për çdo vit vijnë nga të gjitha trevat shqiptare, duke treguar kështu se pikërisht kjo moshë është e ardhmja e trashëgimit të vlerave tona kombëtare, jo vetëm në skenë, por edhe në fusha të tjera.
Ideatorët e këtyre aktiviteteve duhen vlerësuar për nisma dhe realizime të tilla. Në këtë kontekst ky festival sa vjen e bëhet edhe më madhështor, duke prekur majat e suksesit, falë vëmëndjes së pareshtur dhe pëkrahjes së Komunës Ferizaj, me mbështetjen e Drejtorisë së Kulturës, Rinisë dhe Sporteve, por edhe kujdesit të jashtëzakonshëm të ideatores dhe themelueses së këtij Festivali Znj. Njomza Mezini.
Për 10 vite me radhë ky festival, tashmë tradicional, e ka kthyer qytetin Ferizaj në një amfiteatër kulturor kombëtar, duke bërë që performancat dhe vlerat kulturore të jehojnë fuqishëm jo vetëm në Kosovë, por në mbarë trevat shqiptare nga vijnë fëmijët pjesëmarrës, për t’u përngjarë yjeve në hapësirën e qiellit dhe pranverës me “Diamantët” e Festivalit, gjë që e bën këtë qytet mjaft të njohur e të vizituar edhe falë jehonës së këtij aktiviteti, por dhe me potencial të jashtëzakonshëm kulturor, të cilin shumë kush do ta ëndërronte ta shihte nga afër.
Ky historik i këtij 10-vjeçari u pasqyrua në një insert në ekranin e madh të vendosur në Pallatin e Sportit, që si një dokumentar artistik riktheu tek spektatorët emocionet e përjetuara në vite, që nga festivali i parë që daton në pranverën e vitit 2013.
Skena e festivalit është njëra anë, sepse aty performojnë artistët e vegjël, por e veçanta është se në ditën e shfaqjes, në Ferizaj “skenë” shndërrohet gjithçka; edhe sheshet, edhe trotuaret, edhe mjediset e bukura që ka ky qytet, të cilët e përjetojnë pa dallim moshe. Të gjithë gëzojnë, fëmijët së bashku, fëmijët dhe prindërit e tyre e veçanërisht gjyshërit që për disa çaste gëzojnë si fëmijët. Janë emocione të papërsëritshme, të cilat i përjetova edhe unë.
Pranvera në këtë qytet, siç është bërë traditë këtu e 10 vjet më parë, nuk shqetësohet për motin, sepse edhe në qoftë se mund të ketë riga shiu, janë fëmijët si lule pranvere, si flutura dhe si bilbila që e gjallërojnë qytetin e tyre.
Ferizaj në ditën e festivalit ndjehet shumë krenar, sepse pranverën e kishin zbukuruar edhe 28 lule, edhe 28 bilbila, që qytetit i kishin dhënë një gjallëri të jashtëzakonshme.
Në këtë festival u interpretuan 28 këngë nga shumë fëmijë të talentuar, me krijimtari të autorëve të njohur, por edhe të ri.
Çdo gjë në këtë festival ishte perfekt si vetë diamanti. “Diamont Fest” është një festival, ku secili prej fëmijëve është një diamant që shkëlqen me talentin e tij.
Për realizimin e këtij aktiviteti janë angazhuar të gjithë dashamirësit e këngës për fëmijë, muzikantë, poetë, orkestrues dhe prindër, të cilët mendoj se ia kanë arritur qëllimit.
Po i shkruaj këto radhë shumë i emocionuar, sepse informacioni për Ju të nderuar lexues, kalon në plan të dytë. Emocionet janë ato që dua t’ju përcjell, sepse të gjithë do t’i dëshironit t’i përjetoni.
Këtë e tregoi më së miri pjesëmarrja dhe performimi brilant i këtyre diamantëve të çmuar. U kënduan 28 këngë të reja nga këngëtarë gati moshatarë me këtë festival, me këngë të kompozuara dhe orkestruara edhe nga mësuesit e tyre, por dhe me një kontribut të autorëve letrarë të qytetit Ferizaj, por edhe më gjërë.
Festivali “Diamond Fest” i organizuar që 10 vjet më parë, pikërisht në pranverë, ka një grup të përkushtuar organizatorësh, me një drejtoreshë edhe më të përkushtuar, me një emër domethënës, Njomza, e cila rrjedh nga një familje me tradita në art e kulturë dhe që ka dhënë një kontribut të çmuar në këtë qytet dhe në mbarë Kosovën, veçanërisht për fëmijët.
Në këtë edicion jubilar, Qendra e Artit dhe Kulturës Shqiptare, me drejtor të përgjithshëm Dr.Minella Kureta “Mjeshtër i Madh”, nderoi Festivalin “Diamond Fest”, me çmimin “Krenaria e Artit dhe Kulturës Shqiptare”.
Një kënaqësi e veçantë për mua ishte pjesëmarrja ime në këtë festival si autor, pasi jë ndër këngët që u interpretua nga vogëlushja shkodrane Rozana Velaj, me titull: “Lulzon skena me fëmi”, kompozuar dhe orkestruar nga Elvin Unaza, ka tekstin tim. Interpretimi i saj në skenë, natyrisht që m’i shtoj emocionet, pasi ajo u vlerësua me çmimin e dytë të festivalit.
Por këto emocione u bënë më të veçanta për mua, pasi organizatorët më kishin bërë një nder akoma më të madh në këtë natë të magjishme, unë e gjeta veten anëtar të një Jurije prstigjioze, ku kryetar ishte kompozitori i mirënjohur Ilir Latifi dhe anëtare Znj. Fitore Osmani, profesoreshë e muzikës në Gjilan. Ky ishte një vlerësim, por edhe një përgjegjësi për mua.
Ky festival që u mbyll me aromën e zërave fëminorë, jam i sigurtë që për shumë kohë do të lërë mbresa të pashlyeshme, jo vetëm në qytetin e Ferizajt, por në mbarë Kosovën e më gjërë, pasi edhe për këtë janë kujdesur kamerat e Radio Televizionit të Kosovës.
Fituese e këtij edicioni u shpall Erblina Haliti, me këngën “Një valixhe me kujtime” me tekst të Njomza Mezinit, muzika & orkestrimi: Arti Rec.

Maj 2023

Nga Ramazan Çeka/

Ndjesia që të mbërthen kur dëgjon këngën e bukur popullore me emocionet e tingullit dhe fjalës, melodisë e ritmit, të interpretuar me aq pathos nga këngëtarët, të drithëron dhe ndjehesh krenar që kemi një pasuri të tillë shpirtërore, e cila, ashtu si nga të gjithë këngëtarët, bëhet emocionuese edhe nga Gentjana Tafili, kjo këngëtare e mrekullueshme shkodrane që lindi dhe u rrit me këngë në këtë bahçe të bukur, të cilës nuk i kanë munguar kurrë bilbilat e kanarinat.

   “Ty me t’dasht” është një ndër këngët më të reja të këngëtares shkodrane Gentjana Tafili, por dhe lajtmotivi i muzës së saj, e cila këtë “dashni” e ka jo vetëm për qytetin e lindjes, por edhe kënga popullore shkodrane, me të cilën ajo “s’din me u ngi”.

   T’janë idhnue bilbilat e kanarinat këngëtare të bahçes shkodrane, se zërin ua more, t’janë idhnue Liqeni, Buna e Drini, se ua more bukurinë dhe ia bëre këngë, t’është idhnue pranvera, se ti ja more freskinë e më shumë janë idhnue lulet, sepse ti ua more aromen.

   Ta dish mirë se ka ardhë vjeshta që të pret ty që ta hijeshosh se ti po u mungon tash sa vjet. Zogjtë këngëtarë kanë heshtur, sepse të presin ty Gentjanë të vish si një dallëndyshe tek qyteti që të dha krenarinë dhe frymëzimin që kur të dëgjojnë këngën tënde, zogjtë do të pajtohen me ty.

   Do të pajtohen lulevilet, lulebora, maragjyli e karafili, drandofilja e shumë lule të tjera, të cilat do të pushojnë në kaçurrelat e tu.

   Zemra jote edhe atje në Zvicër, larg Atdheut dhe qytetit tënd, nuk ka pushuar asnjëhërë së rrahuri dhe kjo është pasqyruar më së miri në albumin tënd të ri me gjashtë këngë të reja që lidhen me Shkodrën tënde të dashur: “Shkodrës”, “Ty me t’dasht”, “Liqeni andrrimtar”, “Kam harru”, “Nanë e dashtun” dhe “Më thuj kur do vish”, si dhe këngë të tjera të repertorit tënd.   

   Eja pra dhe këndoi këta këngë mes motrave dhe vëllezërve shkodran që të presin si dikur, e mos i lër të pushojnë në disqe e YouTube. 

   Eja me zërin tënd të bukur, me buzëqeshjen tënde si bijë e Shkodër Loces, sepse gjithmonë me zërin tënd, me këngët e dashurinë tënde edhe kur je me kolegë në skenë e në ambiente të ndryshme, qënia jote i përjeton me mall e dashuri.

   Kanë shumë mall që të takojnë të gjithë. Aq shumë të adhurojnë, të flasin, e përshëndesin.

   Dy fjalë për këngëtaren shkodrane Gentjana Tafili: Gentjana ka lindur në Shkodër dhe që në moshë të vogël është dalluar për zërin e saj melodioz dhe plot dritë. Ajo që herët u zbulua nga mësuesi i saj i muzikës, i ndjeri Enrik Çefa, si një nga solistet kryesore në shkollën “Xheladin Fishta” Shkodër.

   Veç festivaleve lokale për fëmijë, ku ajo merr pjesë si soliste, për vite me radhë bëhet pjesë edhe në Festivalet Kombëtare për Fëmijë në Shkodër, ku si dirigjent do të ishte i ndjeri Kujtim Alija “Mjeshtër i Madh”. 

   Këtu në një farë mënyre merr rrugë edhe ëndrra e saj për t’u bërë një ditë këngëtare e afirmuar.

   Pasioni për këngën do të ishte pjesë e pandarë e jetës së saj. Ky pasion, siç shprehet ajo, do ta shoqëronte në të gjitha aspektet e jetës, duke ia zbukuruar atë, veçanërisht sot që jeton e punon në emigrim.

   Më vonë biografia e saj artistike pasurohet me aktivitete që tashmë hyjnë në rrugën profesioniste. Ajo bëhet pjesë e grupit “Rozafa” me artistë shkodranë si: Nimet Salabegu “Mjeshtër i Madh”, muzikanti i njohur Ilir Zoga dhe këngëtarja Orjeta Kelaj, ku Gentjana prezantohet si soliste për të performuar kështu në Diasporë, kryesisht në Zvicër, në koncerte dhe mbrëmje të ndryshme. 

   Ajo së bashku me këtë grup do kishte mjaft sukses. Jeta e mëvonshme e saj, si të thuash, u lidh me Zvicrën, pasi ajo atje kreu shkollimet përkatëse, duke u bërë kështu pjesë përbërëse e sistemit shkollor në Zvicër, ku punon si përkthyese për fëmijët dhe prindërit shqiptarë. 

   Gentjana edhe pse larg nuk e ndali asnjëherë pasionin për këngën, sidomos për këngën qytetare shkodrane. Megjithë largësinë, dashnija për Shkodren dhe këngën qytetare shkodrane e kanë shoqëruar atë vazhdimisht. 

   Unë, thotë Gentjana, e kam gjetur lumturinë dhe gëzimin që kam ëndërruar. Që në moshë të re kisha dy ëndrra: Të bëhësha këngëtare dhe të krjoja një familje dhe këto dy ëndrra më janë bërë realitet.

   Diaspora, falë zërit të saj të bukur, i dëgjon me aq kënaqësi këngët qytetare shkodrane, sepse Gentjana është një bijë Shkodre që përcjell në Diasporë vlerat më të mira të kulturës dhe qytetarisë shkodrane, si shumë artistë të mrekullueshëm që me admirim i quajmë ambasadorë të kulturës shqiptare. 

   Ajo gjatë karrjerës së saj do ftohet në Shkodër dhe Diasporë në aktivitete të ndryshme të rëndësishme, duke u dalluar qartë si një nga interpretueset më të mira të këngës qytetare shkodrane, me zërin melodioz, me dritë dhe me një timber të veçantë. 

   Ftesat për performancen e saj nuk mungojnë as nga autoritet zviceriane që e ftojnë në disa aktivitete ndërkulturore me pjesëmarrës zvicerianë dhe kombësi tjera të ndryshme. 

   Së fundmi ajo ishte e ftuar edhe në 50-vjetorin e Themelimit të “Caritasit Aargau” në Zvicër dhe si çdo herë ajo përcjellë këngët dhe meloditë shqiptare.

   Gentjana Tafili këto ditë realzoi një album të titulluar “Ty me t’dasht” në CD si një buqetë këngësh të njohura shkodrane dhe këngë të reja. Një bashkëpunim i frytshëm me orkestrues Ilir Zoga, Shpëtim Saraçi, Enis Mullaj. Kompozitorë prof. Zef Çoba “Mjeshtër i Madh”, Eriona Rushiti Pedagoge, Rafael Lishi, muzikant, poetët Agim Doçi “Mjeshtër i Madh”, Ramazan Çeka “Mjeshtër i Madh” dhe Nesti Gjoni.

   Këngët e repertorit të saj në këtë album, përveç krijimtarive të reja që i përmendëm më sipër, janë: “Margjelo”, “Pranvera filloi me ardhë”, “S’ka ma t’bukur se pranvera”, “Luleborë”, “Tash sa ditë e mot”, “Sot ka çilun o prenvera”.

   Interpretimi dhe realizimi e këngëve të këtij albumi sjellin aromen e artit të mirëfilltë shkodran, ku spikat dueti “Ty me t’dasht” me këngëtarin e mrekullueshëm Leonard Guga që në këtë album është kurora më e bukur, duke u kthyer në një perlë të këngës bashkëkohore shkodrane.

   Për ta pasuruar figurën e kësaj këngëtareje unë mora disa opinione nga personalitete të shquar të muzikës dhe poezisë së këngës.

   Fillimisht iu drejtova kompozitorit të madh prof. Zef Çoba “Mjeshtër i Madh” që Gentjanen e ka pasur nxënëse që në moshë të re. Dhe ai bëri këtë vlerësim për të:

   “Këngëtarja Gentjana Tafili e ka filluar rrugen e artit që në moshë të njomë, duke marrë pjesë në Festivalet Lokale e Kombëtare të Këngës për Fëmijë. Megjithëse jeton prej vitesh jashtë vëndlindjes, nuk është shkëputuar nga pasioni për muzikën dhe artin e interpretimit të këngës, kryesisht asaj shqiptare. Ajo po e pasuron vazhdimisht repertorin, në të cilin bien në sy veçanarisht këngët e zgjedhura e të bukura shkodrane, të qytetit të saj të lindjes.           

   Në larminë e madhe të intrepretëve, ajo vjen me zërin dhe timbrin e saj origjinal dhe interpretimin e sinqertë. Një tjetër dukuri që bie në sy në punën e saj artistike, është ambicja dhe këmbëngulja për ta zgjëruar repertorin e saj me krijime të reja, duke dhënë kështu nje kontribut për nxitjen e mendimit krijues. Për këtë ajo bashkëpunon në mënyrë sistematike me krijues poetë, kompozitorë e producentë të njohur”. 

   Më pas një opinion dha edhe poeti i shquar Agim Doçi “Mjeshtër i Madh”, i cili me shumë simpati tha:

   “Gentianën e njoha në Zvicër. Tepër e përgatitun dhe me vesh absolut. Ishte “Perla” me Grupin muzikor të Mjeshtrit Polivalent Nimet Salobegut, tejet simpatike dhe interpretuese elegante. Zotëronte të gjithë kolazhet muzikore popullore tradicionale dhe për vlerat moderne shkodrane të traditës e ato qytetare të muzikës së lehtë SHQIPETARE. Genta ka timbër tejet të ngrohtë madje shum të ambël. Genta ka cilësi të veçanta interpretative. Suksesi asht i sigurt në Genten artiste e simpatike”.

   Nuk mund të kuptohen dhe të kenë shkëlqim, emocion e bukuri, aktivitetet artistike që zhvillohen ne Zvicër në raste të ndryshme në festa, apo gëzime, pa prezencen e Gentjana Tafilit.

   Gentjana me finesën dhe elegancën që i transmeton artistikisht tek këngët e saj, është gjithnjë e dashur dhe e pëlqyer nga artëdashësit dhe admiruesit e saj të shumtë”. 

   Mjafton të them vetëm një fjalë: Është kaq e dashur me publikun, sa rrallë ndonjë këngëtare tjetër. Ajo ka krijuar dashamirësinë dhe këtë e ka bërë me këngën e saj, me performancen e saj. Gentjana po bëhët ngadalë një yll në gjerdanin e këngës popullore qytetare shkodrane.

   Mosha ka ecur e zëri në këto vite sa është zbukuruar e bërë më i dashur e më melodioz për dëgjuesit. 

Një zë brilant femror, që ka karakteristikat e saj të vokalit, ka dritën që shkëlqen sikur bjen dielli mbi majën e Rozafës, pra që nga kënga e traditës e deri tek këngët e reja.

   Ajo gjithmonë i ka kënduar bukurisë, fisnikrisë, dashurisë, Shkodrës dhe nuk ka lëvizur nga profili i saj artistik, të cilin e ka krijuar me punë, pasion e përkushtim. 

   Ajo nuk ka devijuar nga kënga popullore qytetare shkodrane, nga kënga e popullore shqiptare, sepse Genta i jep një emocion të veçantë këngës dhe kjo është ajo që e bën publikun për vete.

   Publiku shkodran Genten e ka pranuar me dashuri nga që i ka kënduar bukur këngët shkodrane dhe publiku është vlerësimi më i mirë.

   Është pikërisht publiku i mrekullueshëm shkodran që e ka mirëpritur në “Sofren Shkodrane”, në aktivitetet që ka organizuar Agjensia e spektakleve “Buna1”, Ulqini, Kraja etj.

   Genta është si një krua që nuk shterron kurr, por vetëm gurgullon këngë, mirësi e dashuri. Ajo ka dalë në skenë aq thjeshtë e veshur me një freski vajzërie shkodrane, por është përcjell si një mbretëreshë. 

   Ka shumë shokë e shoqe, kolegë të rinj e të vjetër në moshë. Të gjithë e duan, kanë dëshirë të qëndrojnë e bisedojnë, është fjalë ëmbël, e respektueshme, shpesh hërë edhe me humor të hollë shkodran.

   Për interpretim me mjeshtri të lartë të këngës popullore shkodrane brenda dhe jashtë vendit, për pjesëmarrje në koncerte humanitare në Kosovë e gjithë Evropën, si dhe për kontributin e saj në krijimtarinë muzikore, duke e kthyer këngën në simbol të identitetit tonë kombëtar, i është akorduar çmimi i nderit “Mirënjohja nga LAPSH” (Lidhja e Arsimtarëve dhe Prindërve Shqiptarë në Zvicër) në 30-vjetorin e saj të themelimit, ku Gentjana vlerësohet për kontributin e saj artistik në mbështetje të shkollës shqipe. 

   Edhe në librin që u botua për këtë ngjarje, “30 Vjet Shkollë Shqipe”, ajo është pjesë e personaliteteve si artiste shkodrane dhe si veprimtare në kuadër të shkollës, fjalës shqipe dhe identitetit tonë kombëtarë.

   Së fundmi ishte e ftuar edhe në Panairin e dytë të Librit – Diaspora 2022.

   Në dhjetra koncerte brenda dhe jashtë Shqipërisë, Kosovë, Maqedoni, Mal të Zi, në skena, sheshe, studio televizive, në festivale lokale e kombëtare, në koncerte e manifestime të mëdha për përvjetorë e data të shënuara të historisë, Genta është pjesëmarrëse aktive,

   Kur dëgjojnë këngët e saj, timbrin e zërit të saj, mërgimtarët shuajnë mallin për Atdheun, për tokën ku lindën, për njerëzit që i duan, por dhe ne krenohemi për artistët e mrekullueshëm që na dhurojnë gëzim e që na motivojnë kudo që jetojmë dhe punojmë. 

   Tetor 2022