-Kuvendi i Kosovës, kërkohet raportim për bisedimet Prishtinë-Beograd në Bruksel/
Nga Behlul Jashari/ PRISHTINË, 16 Korrik 2015 – Shqyrtimi i dytë i projektligjit për ndryshimin dhe plotësimin e Ligjit për Buxhetin e Republikës së Kosovës për vitin 2015, me procedurë të përshpejtuar, është një nga 10 pikat e axhendës së seancës së sotme plenare të Kuvendit kosovar. Ligji sapo u miratua me shumicë votash. “ Kanë votuar 63 deputetë pro, 4 kundër dhe 1 ka abstenuar. Kuvendi miratoi Ligjin për ndryshimin dhe plotësimin e Ligjit për Buxhetin e Republikës së Kosovës për vitin 2015”, konstatoi pak më parë kryesuesi i seancës, nënkryetari Sabri Hamiti.
Miratimi në parim u bë javën e kaluar, në 10 korrik, në vazhdimin e seancës plenare të Kuvendit të Kosovës pas debatit të një dite më parë, ndërkohë, si u theksua dje në mbledhjen e qeverisë, projektligji ka kaluar diskutimet në komisionet parlamentare me ndryshime të vogla.
Komisioni Parlamentar për Buxhet nuk ka propozuar amendamente që e ndryshojnë strukturën e Buxhetit dhe që do të rezultonin nevojën që të rikonsiderohet edhe njëherë.
Në prezantimin e projektligjit nga qeveria i është dhënë një rëndësi e veçantë marrëveshjes me FMN-në, ruajtjes së fondeve për investime dhe uljes së shpenzimeve në mallra dhe shërbime.
Në seancën plenare të shqyrtimit të parë, Komisioni Parlamentar për Buxhet u deklarua për shqyrtimin e dytë të projektligjit në 16 korrik pasi në 24 korrik Bordi i FMN-së në Uashington do të diskutojë marrëveshjen me Kosovën.
Miratimi sot në Kuvendin e Kosovës i Projektligjit për ndryshimin dhe plotësimin e Ligjit për Buxhetin do t’i hapë rrugë rishikimit të Buxhetit të Shtetit për këtë vit, ndërsa sipas paralajmërimeve të qeverisë shpenzimet e parashikuara do të jenë më të ulëta për 49 milionë euro. Rishikimi i Buxhetit është bërë në harmoni të plotë edhe me marrëveshjet e arritura me Fondin Monetar Ndërkombëtar, ka theksuar qeveria.
Buxheti i Kosovës 2015 me të hyra të planifikuara 1 miliard e 576 milionë euro, me një rritje prej rreth 8.1% krahasuar me vitin 2014, është miratuar në 29 dhjetor nga Kuvendi i zgjedhjeve të 8 qershorit, i konstituar pas gjashtë muajsh.
Seanca e sotme e Kuvendit ka në axhendë edhe kohën për deklarime jashtë rendit të ditës dhe për pyetje parlamentare, zgjedhjen e Auditorit të Përgjithshëm të Republikës së Kosovës, shqyrtimin e parë të Projektligjit për Sigurimet, shqyrtimin e dytë të Projektligjit për Tatimin mbi Vlerën e Shtuar, shqyrtimin e dytë të Projektligjit për Tatimin në të Ardhurat e Korporatave dhe shqyrtimin e dytë të Projektligjit për Tatimin në të Ardhurat Personale.
Pika e fundit e axhendës është kërkesa e deputetes Albulena Haxhiu (e Lëvizjes Vetëvendosje), e mbështetur nga 5 deputetë nënshkrues për debat parlamentar lidhur me veprimtarinë e misionit të BE-së në Republikën e Kosovës.
PYETJE NË SEANCËN E KUVENDIT: KUSH MUND TË NA GARANTOJË SE BRENDA KOSOVËS NUK DO TA KEMI NJË “REPUBLIKA SRPSKA”?
Në seancën plenare të Kuvendit të Kosovës, të nisur sot me deklarime jashtë rendit të ditës, u kërkua raportim për bisedimet Prishtinë-Beograd në Bruksel.
“Kërkojmë nga kryeministri dhe ekipi negociator që të jenë transparentë për të gjitha vendimet të cilat i marrin në këto bisedime”, tha deputetja Valdete Bajrami, nga grupi parlamentar i Nisma për Kosovën.
“Duhet të raportonit këtu në Kuvend se si shkuan këto bisedime dhe çfarë vendimesh keni marrë”, vijoi ajo duke kërkuar që “me asociacionin-bashkësinë e komunave serbe të mos lejohet krijimi i një minishteti brenda Kosovës në veri”.
“Kush nga ju mund të na garantojë se brenda Kosovës nuk do ta kemi një ‘Republika Srpska’?”, ishte pyetja e deputetes Bajrami.
Sipas saj, “krijimi i kësaj bashkësie do të jetë jashtë rendit kushtetues të Kosovës dhe pikërisht do të jetë Beogradi që do të vendosë për ato komuna”.
“Pra, ky asociacion neve nuk do në na mundësojë që të kemi qasje në atë pjesë të vendit, sepse rendi dhe ligji do të funksionojë nën kompetenca të Beogradit dhe llogaria do t’i jepet vetëm Beogradit”, ka shprehur opinionin e saj deputetja Bajrami.
Gjatë këtij deklarimi kryeministri i Kosovës, Isa Mustafa nuk ishte në seancë, ndërsa në 8 Korrik në mbledhjen e qeverisë ka thënë se në dialogun me Serbinë në Bruksel “temat të cilat tani i kemi në rend të ditës nuk janë shumë të lehta, janë tema që kërkojnë vëmendje të veçantë, sepse janë zgjidhje specifike të cilat ne nuk i kemi pasur deri më tani në Kosovë”.
“Në katër tema që i kemi tash në shqyrtim, mund të them se ne e kemi përfunduar praktikisht marrëveshjen për kodin telefonik. Marrëveshja është e gatshme, nuk është nënshkruar”, ka shtuar ai.
“Kemi përafruar qëndrimet sa i përket Asociacionit të Komunave, jo të Statutit, por vetëm të parimeve themelore, mirëpo kanë mbetur disa çështje të cilat duhet të diskutohen dhe të sqarohen edhe më tutje, në mënyrë që çdo gjë që merremi vesh atje të jetë e zbatueshme dhe të jetë e aplikueshme”, ka theksuar Mustafa.
“Janë diskutuar, por nuk janë përfunduar edhe çështjet e marrëveshjes për energjinë dhe lidhur me Urën mbi Ibër që kanë mbetur që të diskutohen në vijim”, ka vijuar ai.
“Ne kemi prezantuar qëndrimin tonë, që jemi për atë që të bëjmë përpjekje që këto katër marrëveshje t’i përfundojmë, dhe që si pako t’i realizojmë, natyrisht duke e nënshkruar secilën veç e veç, sepse e konsiderojmë që në to është punuar gjatë, në disa prej tyre mbi dy vite, si në marrëveshjen për kod telefonik dhe atë për energji dhe se mundemi që ato përnjëherë t’i pranojmë dhe t’i aprovojmë, natyrisht pas një dialogu i cili është përmbajtjesor dhe kemi një angazhim shumë të madh të ekipit tonë”, ka thënë kryeministri kosovar Mustafa në mbledhjen e qeverisë pas kthimit nga Brukseli.
Në 30 qershor njoftohej se, nuk është arritur asnjë marrëveshje finale në bisedimet Kosovë-Serbi në Bruksel të raundit të 27-të në nivel të lartë kryeministror, të nisura një ditë më parë në mëngjes, e të përfunduara pas mesnate.(Foto-Arkiv)