reagime – Dielli

Bomba te shtëpia e drejtorit të RTK, AKT KRIMINAL

August 29, 2016 by dgreca

-AAK: SULMI NDAJ SHTËPISË DHE PRONËS SË DREJTORIT TË RTK-SË, AKT KRIMINAL/

-BASHKIMI EVROPIAN, THIRRJE PËR SHUARJEN E TENSIONEVE/

-Reagojnë institucionet, partitë politike…Asociacioni i Gazetarëve të Kosovës: Ky sulm është një veprim kriminal për të cilin autorët duhet t’i nënshtrohen përgjegjësisë penale. AGK kërkon nga institucionet, përkatësisht Policia e Kosovës dhe Prokuroria që të hetojnë këtë rast i cili është vazhdimësi e sulmeve ndaj gazetarëve dhe mediave/

PRISHTINË, 29 Gusht 2016-Gazeta DIELLI/ Bombë mbrëmë edhe në oborrin e shtëpisë së drejtorit të përgjithshëm të Radio Televizionit të Kosovës, pak ditë pas bombës në oborrin e këtij transmetuesi publik në mbrëmjen e 22 gushtit.

Kohëve të fundit, më parë, me mjet shpërthyes zolë është sulmuar natën e 4 gushtit objekti i Kuvendit të Kosovës dhe është raprotuar për vendosje bombe gjatë ditës së 9 gushtit në shtëpinë e kryetarit të Komisionit Shtetëror të Kosovës për shënjimin e kufirit me Malin e Zi, Murat Mehës.

PRESIDENTI THAÇI DËNON ASHPËR SULMIN E MBRËMSHËM NDAJ FAMILJES SHALA

Presidenca kosovare njofton se, presidenti i Republikës së Kosovës, Hashim Thaçi, dënon ashpër sulmin e mbrëmshëm në shtëpinë e familjes së Drejtorit të Përgjithshëm të Radiotelevizionit të Kosovës, Mentor Shala.

“Sulmi me bombë në shtëpinë e familjes së Drejtorit të Përgjithshëm të Radiotelevizionit të Kosovës, Mentor Shala, është një akt i shëmtuar dhe i papranueshëm kriminal. Sulmet kriminale ndaj drejtuesve të medieve dhe familjeve të tyre kërcënojnë drejtpërdrejt privatësinë, mendimin dhe fjalën e lirë, njëherësh duke dëmtuar seriozisht imazhin e Kosovës”, ka thënë presidenti Thaçi.

I pari i vendit ka ftuar të organet e rendit dhe të drejtësisë që sa më parë të ndriçojnë këtë rast si dhe të gjitha sulmet e tjera kriminale javëve të fundit, në mënyrë që sa më parë autorët e këtyre sulmeve të dalin para drejtësisë.

QEVERIA KOSOVËS FTON ORGANET KOMPETENTE QË TË NDRIÇOJNË KËTË RAST

Qeveria e Republikës së Kosovës deklaroi sot se dënon ashpër sulmin me mjet shpërthyes në oborrin e shtëpisë ku ndodhej familja e drejtorit të Radio Televizionit të Kosovës (RTK), Mentor Shala.

“Ky akt kriminal, është një sulm i drejtpërdrejtë ndaj lirisë së mediave në Kosovë dhe përpjekje për pengimin e fjalës së lirë, si një prej vlerave më të rëndësishme në shoqërinë kosovare”, thuhet në deklaratën e dërguar.

Qeveria e Kosovës fton organet kompetente që të ndriçojnë këtë rast dhe që kryesit e nxitësit e tij të përballen me forcën e ligjit, dhe po ashtu që të merren të gjitha masat për parandalimin e sulmeve të tilla në të ardhmen.

“Qeveria e Kosovës, po ashtu, shpreh përkrahje të plotë për përfaqësuesit e mediave në misionin e tyre fisnik për informimin e shoqërisë dhe për konsolidimin e fjalës së lirë”, vijon deklarata.

Qeveria e Kosovës, me këtë rast, i bën thirrje përfaqësuesve të partive politike “që të heqin dorë nga gjuha e dhunës, ultimatumet, kërcënimet dhe shantazhet që së fundi i kanë adresuar ndaj RTK-së dhe disa mediave tjera private, të cilat janë pasuar me sulme të tilla”.

KUVENDI I KOSOVËS DËNON SULMIN NË OBORRIN E SHTËPISË SË DREJTORIT TË RTK-së

Kuvendi i Republikës së Kosovës, ka dënuar sot ashpër sulmin e mbrëmshëm në oborrin e shtëpisë së drejtorit të Radiotelevizionit të Kosovës, Mentor Shala.

Në komunikatën e Kuvendit për këtë rast thuhet:“Kuvendi i Republikës së Kosovës dënon ashpër sulmin me mjet shpërthyese në oborrin e shtëpisë së drejtorit të Radio Televizionit të Kosovës, Mentor Shala.Kuvendi fton organet e drejtësisë që përgjegjësit e këtij sulmi të sillen para organeve të drejtësisë dhe të marrin dënimin e merituar.

Hedhja e mjetit shpërthyes në oborrin e shtëpisë së drejtorit të RTK-së, përbën një veprim kriminal që në vazhdën e veprimeve të ngjashme të kohëve të fundit, synon të cenojë rendin publik, sigurinë e qytetarëve dhe zyrtarëve të institucioneve publike.

Republika e Kosovës nuk do të lejojë asnjëherë që dhuna dhe metodat e frikësimit të ndikojnë në axhendën shtetërore, lirinë e mediave dhe debatin politik”.

AAK: SULMI NDAJ SHTËPISË DHE PRONËS SË DREJTORIT TË RTK-SË, AKT KRIMINAL

Aleanca për Ardhmërinë e Kosovës ka dërguar këtë deklaratë:

Sulmi në shtëpinë dhe pronën familjare të Drejtorit të Përgjithshëm të RTK-së, Mentor Shala, është një akt i pashëmbullt i dhunës në rritje në Kosovë. Njëkohësisht është goditje ndaj medias dhe lirisë së saj, dhe për më tepër sulm ndaj integritetit familjar të zotit Shala.

Aleanca për Ardhëmrinë e Kosovës, e donon fuqishëm këtë akt kriminal, dhe kërkon nga organet e rendit dhe të ligjit, që sa më parë ta zbardhin aktin. Në të kundërtën të japin dorëheqje të gjithë ata, që nuk janë në gjendje të japin asnjë sqarim për një sër sulmesh e shpërthimesh të ngjashme, , që kanë ndodhur gjatë javëve të fundit në Kosovë, e aq më pak të kapin autorët e tyre.

Kosova nuk mund të jetë vend i krimit e i terrorit dhe AAK inkurajon të gjithë ata që mund të ofrojnë informacione, për autorët e vërtetë të këtyre akteve kriminale.

REAGIM I RTK-së

Menaxhmenti i Radiotelevizionit të Kosovës sulmin me bombë në shtëpinë e drejtorit të përgjithshëm, Mentor Shala, pas sulmit në ndërtesën e Televizionit, e vlerëson si përshkallëzim të dhunës, kërcënimit dhe aplikimit të metodave terroriste në qasjen ndaj transmetuesit publik.

Ne vazhdojmë të besojmë se gjuha e urrejtjes, e përdorur nga forca të ndryshme politike, sidomos nga Lëvizja Vetëvendosje, paraqet rrezik real dhe kërcënim serioz për funksionimin normal të transmetuesit publik.

Vazhdimi i përdorimit të asaj gjuhe nuk mund të kuptohet ndryshe, pos si një përpjekje që të legjitimohen dhuna, aktet kriminale dhe terroriste kundër një mediumi.

Menaxhmenti i RTK-së mbështet plotësisht drejtorin e përgjithshëm, z. Mentor Shala, në përpjekjet e përbashkëta për funksionimin sa më normal të transmetuesit publik, në kohën kur, përveç sfidave të rrezikshme të sigurisë, po ballafaqohemi edhe me problemet serioze të financimit dhe të pronës.

Po ashtu menaxhmenti edhe një herë siguron audiencën se RTK, duke mbetur brenda misionit të vet ligjor, do të gjejë fuqi dhe guxim që, në vendimmarrjen e vet menaxheriale dhe editoriale, të mos i nënshtrohet presioneve dhe kërcënimeve, duke mbetur në shërbim të publikut.

Ndërkohë, menaxhmenti i RTK-së kërkon nga institucionet e shtetit që të ndërmarrë të gjitha masat e nevojshme për sigurinë e funksionimit të RTK-së dhe sigurinë e stafit të tij.

ASOCIACIONI I GAZETARËVE TË KOSOVËS DHE ORGANIZATAT SINDIKALE TË RTK E DËNOJN SULMIN

Asociacioni i Gazetarëve të Kosovës dhe organizatat sindikale të RTK e dënojn sulmin e ndodhur mbrëmë. “Ky sulm është një veprim kriminal për të cilin autorët duhet t’i nënshtrohen përgjegjësisë penale. AGK kërkon nga institucionet, përkatësisht Policia e Kosovës dhe Prokuroria që të hetojnë këtë rast i cili është vazhdimësi e sulmeve ndaj gazetarëve dhe mediave. Sulmet kanë për qëllim frikësimin e gazetarëve në Kosovë, posaqerisht atyre që punojnë në televizionin publik”, thuhet në reagimin e Asociacionit të Gazetarëve të Kosovës .

“Për organet e drejtësisë, jo vetëm këtë rast por edhe rasti i hedhjes së granatës së dorës në RTK, duhet të hetohen me prioritet. Gazetarët janë të dëshpëruar me qasjen e institucioneve në hetimin e rasteve që për objekt trajtimi kanë gazetarët”, thekson AGK./b.j/

KOSOVË- BASHKIMI EVROPIAN, THIRRJE PËR T’I KONTRIBUAR SHUARJES SË TENSIONEVE

BE-ja në Kosovë deklaroi sot se “është mjaft e shqetësuar me hedhjen e granatës natën e kaluar në shtëpinë e Drejtorit të Përgjithshëm të RTK-së, ku ai jeton me fëmijët e vegjël dhe e dënon atë plotësisht”.

“Jemi të brengosur për ciklin e dhunës në Kosovë që po bëhet çdo ditë e më serioz. Asnjë mosmarrëveshje për ndonjë çështje nuk mund ta justifikojë përdorimin e armëve vdekjeprurëse kundër dikujt, e aq më pak kundër fëmijëve”, thekson deklarata e dërguar nga Zyra e Bashkimit Evropian në Kosovë.

“Ne thërrasim institucionet dhe politikanët e të gjitha partive që ta investojnë çdo përpjekje për të kontribuar në shuarjen e tensioneve”, përfundon deklarata.

***

The EU in Kosovo is very concerned by last night’s throwing of a bomb on the house of the RTK Director General, where he lives with his young children, and fully condemns it.

We are worried about the cycle of violence in Kosovo becoming more and more serious. No disagreement over any issue can justify the use of a deadly weapon against anyone, much less children.

We call on the institutions and politicians from all parties to invest every effort to contribute to diffusing tensions.

Reagime për dhunën ndaj fëmijëve

June 22, 2016 by dgreca

Në Tiranë opinioni publik u trondit nga një akt tjetër dhune ndaj fëmijëve brenda një kopshti të paliçensuar. Ministria e Arsimit dënoi ngjarjen dhe po i shton kontrollet. Veprimtarët e shoqërisë civile kërkojnë forcimin e masave parandaluese, duke kontrolluar ekipet e mësuesve në këto institucione. Dhunimi i një fëmije trevjecar në një kopsht privat nga administraorja e tij ka tronditur opinionin qytetare dhe mediat vendase, të cilat po kërkojnë më shumë masa mbrojtëse në institucionet parashkollore. Tv Klan dhe programi i tij Stop transmetuan pamjet e një kamere të fshehtë se si administratorja e kopshtit Anjeza Shahini dhunonte një fëmijë vetëm 3 vjeç në mes të grupit me fëmijë dhe mësuese të tjera. Veprimtarët e shoqërisë civile pohojnë se pamjet e transmetuara nga media janë të papranueshme dhe se duhen shtuar masat parandaluese. Skandali i dhunës ndaj këtij vogëlushi shtohet më tej edhe nga fakti që kopshti privat në Sauk, një fshat në periferi të Tiranës është i palicensuar për të ushtruar këtë veprimtari. Administratorja ushtroi dhunë ndaj fëmijës, duke shkaktuar pasoja të dëmshme fizike dhe psikologjike në shëndetin e fëmijëve. Ministria e Arsimit dhe Sportit deklaroi se e dënonte ashpër dhunën e ushtruar ndaj një fëmije të pambrojtur. Ky rast i paprecedent dhe i urryer duhet të trajtohet me seriozitet maksmial nga të gjitha autoritetet shtetërore, nga shoqëria shqiptare, thuhet në deklaratë. Nga inspektimi rezultoi se “Kopshti Diren” nuk ishte licencuar nga MAS-i dhe vepron në kushtet e informalitetit dhe krimit ekonomik. Nga inspektimet e fundit të Inspektoratit Shtetëror të Arsimit janë gjobitur dhe mbyllur 20 kopshte private. Ministria e Arsimit dhe Sportit tha se do të rinisë një inspektim kombëtar të të gjitha kopshteve private. Altin Hazizaj drejton qendrën për mbrojtjen e të drejtave të fëmijëve dhe Linjën Allo 116, ku mblidhen cdo ditë dhjetëra denoncime dhune nga vetë fëmijët. Ai është i shqetësuar se edhe pas denoncimeve të dhunës administrata shtetërore nuk ka institucione të mirëfillta për parandalimin e dhunës dhe eleminimin e pasojave të saj. Komiteti Shqiptar i Helsinki deklaroi po ashtu se kjo gjendje shqetësuese dhe e përsëritur nuk mund të tolerohet dhe se duhen zbatuar ligjet bashkëkohore në fuqi në fuqi. KSHH vlerëson se nuk është bërë sa duhet në drejtim të parandalimit të këtyre rasteve. MAS nga ana e saj kërkoi më shumë bashkëpunim mes qytetarëve, medias dhe institucioneve shtetërore në një aleancë për luftë pa kompromis ndaj informalitetit dhe mbrojtjes së të drejtave të fëmijëve shqiptarë. Ajo ftoi qytetarët të verifikojnë statusin e kopshteve, ku çojnë fëmijët dhe të denoncojnë çdo rast dhune fizike apo verbale në institucione publike, private apo jashtë tyre.

Reagime të kujdesshme ndaj fjalimit të Obamës për Sirinë

September 1, 2013 by dgreca

Pas deklaratës së presidentit amerikan, Barack Obama, se do të kërkojë miratim nga Kongresi i Shteteve të Bashkuara për sulme ushtarake kundër regjimit të presidentit të Sirisë, Bashar al-Assad, nuk ka pasur shumë reagime zyrtare ndërkombëtare.
Kryeministri i Sirisë, Wael al-Halqi, tha se ushtria e Sirisë është “plotësisht e përgatitur” për përgjigje ndaj çfarëdo aksioni të Shteteve të Bashkuara.
Një gazetë siriane e udhëhequr nga shteti, të dielën në editorialin e saj ka shkruar se vendimi i Obamës shënon “fillimin e një tërheqjeje historike amerikane”.
Shefi i Gardës Revolucionare të Iranit, Mohammad Ali Jafari, tha se është “iluzion” të mendohet se “intervenimi ushtarak do të jetë i kufizuar” vetëm brenda Sirisë.
Zëvendëskomandanti i Komandës së Përbashkët Lindore të Ushtrisë së Lirë të Sirisë në opozitë, Muhammad Aboud, e ka mirëpritur mbështetjen e presidentit Obama për intervenim ushtarak.
“Ne kemi pritur për këtë vendim për një kohë shumë të gjatë. Megjithëqë është dashur kohë, Shtetet e Bashkuara përfundimisht e morën vendimin. Populli i Sirisë dhe luftëtarët e lirisë janë shumë të lumtur të dëgjojnë se presidenti Obama ka ndërmarrë një vendim të tillë. Megjithatë, ne kuptuam se për këtë çështje do të debatohet në Kongres”, tha Aboud.
Kryeministri i Japonisë, Shinzo Abe, tha se qeveria e tij do ta ndjekë debatin në Kongres për së afërmi.
“Besoj se shpallja e presidentit Obama është shprehje e gatishmërisë së tij të fuqishme për këtë çështje. Ne do ta monitorojmë me kujdes atë që ndodh në Kongresin amerikan dhe do të koordinohemi me komunitetin ndërkombëtar për të tubuar dhe analizuar informacionet në dispozicion, me shpresë se situata do të përmirësohet deri diku”, theksoi kryeministri Abe.
Në Moskë, kryesuesi i Komitetit për marrëdhënie ndërkombëtare i Dumës ruse, Aleksei Pushkov, shkroi në Twitter se Obama po i kthehet Kongresit për “t’i dhënë
luftës së paku njëfarë legjitimiteti”.
Në fjalimin e tij në Shtëpinë e Bardhë në Uashington, presidenti Barack Obama, e ka akuzuar qeverinë e Bashar al-Asssadit në Siri se ka përdorur armatim kimik, më 21 gusht, me ç’rast janë vrarë më se 1400 civilë.
“Të mos gabohemi. Kjo ka implikime përtej luftës kimike. Nëse ne nuk e zbatojmë përgjegjësinë për këtë akt të neveritshëm, çka do të thuhet për vendosmërinë tonë që t’u dalim para atyre që nuk i përfillin rregullat fundamentale ndërkombëtare: qeveritë që do të vendosin të prodhojnë armatim atomik, terroristët që do t’i përhapin armatimet biologjike, ushtritë do të kryejnë gjenocid. Ne nuk mund t’i rrisim fëmijët tanë në botën ku ne nuk i mbajmë gjërat që i themi, marrëveshjet që i nënshkruajmë, vlerat që na definojnë ne”, deklaroi presidenti Barack Obama.
Shtëpia e Bardhë tashmë e ka dërguar propozimin e masave në Kongres, nga i cili kërkohet autorizimi formal për presidentin Obama për përdorim të forcës ushtarake për “frenimin, shkatërrimin, parandalimin dhe degradimin” e potencialit për sulme të mëtejshme me armatim kimik.
Një delegacion parlamentar i Iranit ka arritur në Siri dhe e ka vizituar spitalin me viktimat e sulmit të dyshuar kimik, për të cilin qeveria e Sirisë i fajëson forcat kryengritëse.
Kryeministri britanik, David Cameron, dhe presidenti francez, Francois Hollande, e kanë mirëpritur vendimin e presidentit Obama, për të kërkuar miratim nga Kongresi.
Kryeministri Cameron, javën e kaluar, nuk e mori miratimin për intervenim ushtarak në Parlamentin e Britanisë.
Nga ana tjetër, Franca ishte njëri nga mbështetësit më të mëdhenj të intervenimit dhe ka sugjeruar se mund t’i bashkohet çfarëdo operacioni ushtarak.
Por, Rusia dhe Kina e kanë kundërshtuar intervenimin ushtarak në Siri. Presidenti i Rusisë, Vlladimir Putin, ka thënë se Obama nuk ka dhënë prova se regjimi i Sirisë ka përdorur armatim kimik.(f.bujupi)