Nga Ilirian AGOLLI-Zeri i Amerikes/

Në Shqipëri, Partia Demokratike njoftoi sot edhe zyrtarisht rizgjedhjen për herë të tretë të zotit Lulzim Basha në detyrën e kryetarit të partisë më të madhe opozitare.

Ai fitoi me një diferencë të thellë përballë 3 konkurrentëve të tjerë, të cilët e akuzuan për garë të pabarabartë në parti dhe për humbjen e zgjedhjeve parlamentare më 25 prill.

Lulzim Basha u rizgjodh sot zyrtarisht kryetar për herë të tretë i Partisë Demokratike, 7 javë pas zgjedhjeve parlamentare të 25 prillit. 

Sipas të dhënave nga komisioni zgjedhor i partisë, zoti Basha mori nga anëtarët e partisë 5 herë më shumë se sa konkurrenti tjetër Agron Shehaj, 33 herë më shumë se konkurrentja Harxhi, dhe 42 herë më shumë se konkurrenti Kadilli. 

Zoti Basha mori afro 33 mijë vota, ndërsa zoti Kadilli mori afro 800 vota, megjithatë, ky i fundit shprehu shqetësim për garë të pandershme, shpesh e ngjashme me shkeljet që PD tha se i bënë socialistët më 25 prill.

Zoti Kadilli tha se “pjesë e manovrave të pabarazisë ishte edhe shkurtimi i listës së anëtarëve nga 100 mijë vetë në 70 mijë vet, madje shumë figura të njohura të opozitës nuk gjenin emrat në lista për të votuar”, po ashtu edhe shkelje të tjera, që dëmtuan besueshmërinë e votimeve.

Edhe kandidatët e tjerë renditën dje disa shkelje si koha e shkurtër e garës, listat e pasakta të votuesve, mungesa e vëzhguesve, votimi familjar, fotografimi i votës, dhe shfrytëzimi nga zoti Basha i burimeve të partisë për të zhvilluar garën. 

Lulzim Basha, u rikonfirmua me mbi 80 për qind të votave për një mandat të tretë në drejtimin e Partisë Demokratike, pas votimit të zhvilluar të dielën në 76 qendra votimi në të gjithë degët e kësaj force politike. 

Zoti Basha tha sot pas zyrtarizimit të fitores, se votat shprehën mbështetjen e jashtëzakonshme nga anëtarët. “Ajo është një shprehje e qartë e besimit në rrugën tonë drejt ndryshimit. Sëbashku do tëbëjmë gjithçka që Shqipëria të fitojë” – tha ai pasite në një mesazh përmes rrjeteve sociale.

Ndërsa dje tha se kjo ishte garë e vlerave të demokratëve. “Këto janë vlerat tona, janë vlerat e demokracisë, e shprehjes së lirë dhe vlerat e debatit. Me këto vlera e kemi nisur betejën për ndryshimin, për Shqipërinë dhe për shqiptarët. Me këto vlera do ta çojmë deri në fund, deri në përmbysjen e regjimit Rama-Doshi” – tha zoti Basha.

Disa zëra kritikë në PD, si zoti Kadilli etj. kërkuan dorëheqjen e zotit Basha nga drejtimi i Partisë për shkak të humbjes së zgjedhjeve parlamentare më 25 prill, kur socialistët morën një mandat të tretë qeverisës, ndërsa demokratët edhe një tjetër 4-vjecar në opozitë. 

Mirëpo kjo përkoi me afatin e zgjedhjeve të rregullta për kryetar në parti dhe këto zgjedhje partiake u zhvilluan brenda më pak se një muaji.

PD ka deklaruar se zgjedhjet e 25 prillit ishin një masakër elektorale dhe zoti Basha ka folur për një vazhdim të betejës, sipas tij, ndaj regjimit të kryeministrit Rama, që po kontrollon me forcë gjithë pushtetet në bashkëpunim me botën e krimit të organizuar. 

Pasi janë rrëzuar gjithë pretendimet e saj për manipulime të zgjedhjeve më 25 prill,hapi tjetër i opozitës mbetet të shihet në shtator me qëndrimin e saj ndaj parlamentit të ri të mbizotëruar nga socialistët.