-Bashkimi Evropian: Ura e Mitrovicës do të bëhet simbol i normalizimit të marrëdhënieve ndërmjet komuniteteve në Kosovë/

-Ministrja Edita Tahiri: Sot kanë filluar punimet për heqjen e barrikadës dhe revitalizimin e urës mbi lumin Ibër, kjo është një datë e rëndësishme historike për shtetin e Kosovës/

-Çka raportoja në gushtin 1999, para 17 viteve, nga  Mitrovica për përplasjet mes shqiptarëve e serbëve te ura e Ibrit…

Gazeta DIELLI nga korrespondenti në Kosovë Behlul JASHARI

MITROVICË, 14 Gusht 2016/ Në Mitrovicë, pas marrëveshjes në dialogun e Brukselit Prishtinë-Beograd, nisën sot punët ndërtimore në urën kryesore të lumit Ibër, e cila do lidhë dy komunat, jugoren me shumicë shqiptare e verioren me shumicë serbe, të qytetit më të madh verior të Kosovës.

“Pas marrëveshjes së kohëve të fundit ndërmjet ministres  (kosovare) për Dialog, Edita Tahiri dhe kryenegociatorit (serb), Marko Djuriç, zbatimi i marrëveshjes nga Dialogu Beograd-Prishtinë lidhur me urën në Mitrovicë do të filloj sot, e diel, 14 gusht 2016.

Puna ndërtimore në urë do të fillojë sot në mëngjes në orën 10:00 duke iu qasur vendpunimit përmes rrugës në pjesën jugore”, bën të ditur njoftimi i dërguar nga Zyra e Bashkimit Evropian në Kosovë.

Rivitalizimi i urës, investim ky në vlerë mbi 1.2 milionë euro dhe i financuar nga Bashkimi Evropian, do të kontribuojë në mënyrë të konsiderueshme në lehtësimin e kontakteve ndërmjet njerëzve nga Mitrovica e Veriut, Mitrovica e Jugut dhe më tej.

“Me fillimin e zbatimit të kësaj marrëveshjeje, Ura e Mitrovicës do të bëhet simbol i normalizimit të marrëdhënieve ndërmjet komuniteteve në Kosovë”, thekson njoftimi.

Ura e Mitrovicës pritet të hapet për këmbësorë dhe për automjete në të dyja drejtimet sipas rekomandimeve nga vlerësimi teknik dhe dizajni arkitekturor, për të cilin janë dakorduar të dyja palët në qershor 2015.

“Bashkë me të dy kryetarët e komunave (të jugut e veriut të Mitrovicës), një grup punues do të monitorojë dhe shqyrtojë rregullisht kushtet mbizotëruese politike dhe të sigurisë në ato komuna gjatë dhe pas procesit të rivitalizimit”, bën të ditur BE. Policia e Kosovës, EULEX-i dhe KFOR-i, në pajtueshmëri me mandatet e tyre përkatëse, do të sigurojnë mjedis të qetë dhe të sigurt, përfundon njoftimi i Zyrës së Bashkimit Evropian në Kosovë.

Ministrja për Dialog në qeverinë e Kosovës, Edita Tahiri, dje në një deklaratë paralajmëronte për sot se “fillojnë punimet për heqjen e barrikadës dhe revitalizimin e urës mbi lumin Ibër në Mitrovicë” dhe se “punimet për këtë qëllim do të realizohen nga një kompani e kontraktuar nga ana Bashkimit Evropian”.

Për detajet e fillimit të punimeve në urën kryesore mbi lumin Ibër në Mitrovicë, ministrja kosovare tha se mediat duhet t’i drejtohen Zyrës së BE-së në Kosovë e cila është e autorizuar për zbatimin e kësaj Marrëveshjeje.

Pas luftës në Kosovë të përfunduar në qershor 1999, për shumë vite mbi urën kryesore të qytetit të ndarë të Mitrovicës serbët nga veriu ngritën barrikada. Rreth urës ka pasur edhe përplasje mes grupeve të serbëve dhe shqiptarëve.

Që para 17 viteve, në gushtin 1999, raportoja nga vendngjarja për përplasje mes shqiptarëve e serbëve jug-veri te ura e limit Ibër në Mitrovicë dhe se forcat paqeruajtëse të NATO-s ndërhynë dhe hynë në mes… Si dhe a kishte përfunduar lufta në qytetin më të madh verior të Kosovës?