Kryeministri i Kosovës, Isa Mustafa, theksoi sot në mbledhjen e qeverisë se Trepça nuk mbrohet nga ata që e shkatërrojnë Prishtinën dhe kanë marrë mandatin për ta ndërtuar atë.
Duke shprehur keqardhjen për dhunën e djeshme të shkaktuar nga protestuesit, Mustafa tha se “qytetarët po keqpërdoren nga partitë politike për të ardhur në pushtet me forcë dhe për të shkaktuar trazira në Kosovë”, nënvizoi Mustafa.
“Trepça nuk mbrohet me dhunë ndaj policisë dhe shkatërrim të pasurisë shtetërore. Trepça tashmë është mbrojtur me Ligjin që pamundëson likuidimin e saj dhe do të mbrohet përfundimisht me Ligjin e veçantë, për të cilin kanë rënë dakord qeveria, minatorët dhe menaxhuesit e kompanisë”.
“Qeveria po ashtu kërkon nga të gjithë qytetarët që të mos bien pre e partive politike, të cilat prapa kërkesave të tyre, fshehin dëshirën për pushtet. Qeveria kërkon nga opozita që kërkesat e tyre t’i ushtrojnë dhe t’i zgjidhin në Kuvendin e Republikës së Kosovës, ku kanë hapësirën ligjore dhe kushtetuese”, nënvizoi Mustafa.
Kreu i qeverisë kosovare u shpreh se “qeveria zotohet se do të përkrahë të gjitha institucionet shtetërore, për të garantuar një jetë normale për të gjithë qytetarët dhe prioriteti i saj nuk është demagogjia politike, por prioritet është zhvillimi ekonomik, përmirësimi i mirëqenies së qytetarëve, sundimi i ligjit në gjithë territorin e vendit, zhvillimi i gjithëmbarshëm i vendit”.
Ai tha se qeveria shpreh keqardhje për të lënduarit dhe përkrah policinë në garantimin e pronës publike dhe pronës private, si dhe për të lënduarit nga radhët e policisë, ashtu edhe nga ana e protestuesve, në protestën e ditës së martë në Prishtinë, në kryeqytetin tonë, në protestën e organizuar e cila kishte qëllime kryekëput politike.
“Qeveria e Republikës së Kosovës respekton të drejtën e qytetarëve për të protestuar, por tendenca e përdorimit të protestave për të dëmtuar pronat publike dhe private, për të sulmuar Policinë dhe Shtetin, është e papranueshme në një shoqëri demokratike. Policia e Kosovës, si një institucion i pavarur kushtetues, e ka mbështetjen e plotë të Qeverisë, për të mbrojtur objektet shtetërore dhe pronat publike nga partitë politike, të cilat po keqpërdorin qytetarët për përfitime politike, me qëllim që të krijojnë trazira dhe të vijnë në pushtet me forcë”, nënvizoi Mustafa.
Kreu i qeverisë tha se “në një vend ku sundon ligji, ultimatumet ndaj institucioneve të pavarura janë të patolerueshme. Sulmi i opozitës ndaj Policisë së Kosovës, është sulm kundër shtetit të së drejtës, është sulm kundër vlerave më të larta të demokracisë dhe është sulm kundër institucioneve të pavarura”.
“Në protestën e të shtunës qytetarët ishin thirrur që të protestojnë për Trepçën dhe shkarkimin e një ministri për shkak të një deklarate të pamatur, për të cilën ka kërkuar falje dhe me të cilën ne nuk jemi pajtuar. Protesta e së shtunës ishte dëshmia e qartë se synimi i tyre ishte dhuna, ardhja në pushtet nëpërmes trazirave dhe kishte për qëllim provokimin e situatës. Prandaj në protestën e djeshme, opozitës nuk iu bashkuan nënat e të pagjeturve, veteranët e luftës, minatorët e Trepçës dhe asnjë organizatë civile, për shkak se ato nuk përfaqësonin interesin qytetar, por vetëm atë politik të subjekteve që e organizuan protestën”, tha Mustafa.
Mustafa theksoi se qeveria i garanton të gjithë qytetarët e Kosovës, se situata e sigurisë është nën kontroll të plotë, nga ana e institucioneve të pavarura dhe kushtetuese, dhe nuk do të tolerojnë anarkinë dhe destabilizimin, që ju shkon në interes minuesve të shtetit ligjor.
“Qeveria ka një partneritet të fuqishëm ndërkombëtar me aleatët tanë strategjikë, Shtetet e Bashkuara të Amerikës, vendet e Bashkimit Evropian dhe vendet tjera mike, për të forcuar sovranitetin tonë të brendshëm dhe për të prodhuar paqe në rajon dhe për të qenë pjesë e përpjekjeve ndërkombëtare për luftimin e kërcënimeve globale të sigurisë. Shteti ynë, Republika e Kosovës, dhe populli ynë i shumëvuajtur, ka nevojë për paqe, qetësi, dhe ka nevojë për zhvillim që ofron jetë më të mirë për të gjithë qytetarët e vendit”, përfundoi Mustafa.