Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Shembja e “Prestige” sulm ndaj lirisë së medias, sipërmarrjes, lirive e të drejtave themelore të njeriut

by

Sokol Paja/

Shembja e “Prestige Resort” nga qeveria e Shqipërisë është një sulm i pastër ndaj lirisë së medias, sipërmarrjes së lirë private dhe lirive e të drejtave themelore të njeriut. Një akt stalinist i neveritshëm. Një akt barbar i pa mëshirshëm ndaj medias më të fuqishme në Shqipëri kritike e vazhdueshme ndaj qeverisë. Një sulm i paprecedentë në historinë e shtetit të së drejtës ku dhe pse çështja është në gjykatë, prapë se prapë qeveria nuk pyet për ligjet e shtetit por përdor tritolin si të vetmin mjet taleban të realizimit të qëllimeve për të përhapur terror, panik, nënshtrim dhe frikë te kundërshtarët. Ashtu si etërit e tij historik e biologjik, kryeministri Rama që ditën kur erdhi në pushtet ka sulmuar në vazhdimësi pronën private, mediat, liritë e qytetarëve dhe çdo zë kritik ndaj regjimit të tij. Ekspozimi i krimit, korrupsionit e shkeljeve qeveritare prej medias së Hysenbelliut, shkaktuan një tërbim qeveritar, mesazh ky edhe ndaj mediave të tjera. Faturën e kësaj barbarie qeveritare do ta paguajnë qytetarët shqiptarë në Arbitrazh. Rama përfaqëson qeverinë më të korruptuar dhe më antishqiptare në historinë moderne të shtetit shqiptar. Qeveria është kthyer në rrezik për shtetin, për qytetarët dhe kombin. Qeveria e Ramës ka dëbuar 800 mijë shqiptarë nga Shqipëria dhe kushdo kundërshton sulmohet primitivisht prej banditëve shtetërorë. Shqiptarët në rrezik, Shqipëria në rrënim prej qeverisë së keqe. Shqipëria në diktaturë. Shqipëria nën sundimin e një diktatori të vetëm. Të thuash të vërtetën në Shqipëri kushton shumë…

VATRA DHE SHQIPTARËT E AMERIKËS NGRITËN FLAMURIN SHQIPTAR NË NEW YORK

by

Sokol Paja/

New York, 28 Nëntor 2022- Federata Pan-Shqiptare e Amerikës VATRA në bashkëpunim me Bashkinë e New York, Zyra e Emigrantëve dhe mbështetjen e shqiptarëve të Amerikës ngritën solemnisht me nderim e madhështi Flamurin Kombëtar në New York. Kjo ceremoni u bë e mundur nga Ravesa Bajo e cila kishte filluar diskutimet me Kyrebashkinë e New Yorkut për një ceremoni të tillë muaj më parë kur ajo ishte emëruar nga Kryebashkiaku Adams si Drejtoreshë Exekutive e Iniciativave Politike dhe Projekteve Speciale për Zyrën e Kryetarit të Bashkisë për Cështjen e Imigranteve. Nën organizimin dhe prezantimin brilant të patriotes çame Ravesa Bajo, tingujve të magjishëm të muzikës tradicionale shqiptare dhe valleve të grupit artistik Rozafati udhëhequr nga koreografia Angjelina Nika (Mjeshtër i Madh), festa kuq e zi pushtoi New York-un. Ravesa Bajo në fjalën e saj ndër të tjera tha: “Me ngritjen e flamurit shqiptar në Kryebashkinë e New Yorkut, ne nuk festojmë vetëm sa shumë përparim kemi bërë si një popull dhe komunitet që mbijetuan sfida të shumta dhe regjimin komunist, por edhe festojmë dëshirën tonë të përhershme që të vazhdojmë të ndërtojmë të ardhmen e ëndrrave tona”. Kryetari i Vatrës z.Elmi Berisha në fjalën e tij u ndal te rëndësia historike e 28 Nëntorit dhe kontributi i Federatës Vatra në historinë e lavdishme të shtetit shqiptar. Ambasadore Floreta Luli Faber në fjalën përshëndetëse u shpreh se “Nju York është shtëpi për qindra mijëra shqiptarë, dhe ngritja e flamurit në Manhattan tregon miqësinë speciale midis Shqipërisë dhe Shteteve të Bashkuara të Amerikës”. Edhe gazetari Beqir Sina para të pranishmëve foli rreth rëndësisë së Pavarësisë së Shqipërisë dhe falënderoi një sërë veprimtarësh e patriotësh si Rake Ruci për flamurin shqiptar gjigant që u valvit në qiejt e New Yorkut.

Komisioneri Manuel Castro deklaroi për të pranishmit se “Qyteti Nju Yorkut feston me komunitetin shqiptar sot dhe gjithmonë. Ne jemi krenar që jemi shtëpia e dytë e një komuniteti kaq të fortë dhe kaq të madh. Gezuar pavarësinë, Shqipëri”- uroi z.Castro. Komisioneri Edward Mermelstein tha se “qyteti New Yorkut me nder feston për Shqipërinë dhe komunitetin shqiptar në Amerikë në ditën e Pavarsisë – rroft Shqipëria”. Komisioneri Edward Mermelstein, Zyra e Marrëdhënieve Ndërkombëtare të Bashkisë vlerësoi bashkëpunimin me trupin diplomatik shqiptar dhe përfaqësuesitë e ambasadave në New Jork.

Arthur Piccolo drejtori i shoqërisë Bowling Green deklaroi se: “Shoqëria e Bowling Green është e lumtur që merr pjesë në ngritjen e flamurit kuq e zi”. Komisioner Piccolo, shprehu mirënjohjen për punëtorët shqiptarë, emrat e te cilëve nuk i kishte shënuar dhe tani të pensionuar, që morën nismën për ngritjen e flamurit. Z. Piccolo veçoi Kryebashkiakn Adams si të parin që merr pjesë në ceremoni të tilla për çdo komunitet që jeton në New Jork. Organizuese e Njësive lokale administrative pranë zyrës së Komisionerit të Çështjeve për Emigrantët Lidia Dobi prezantoi Komisionerin Manuel Castro.

Komisioneri Castro tha se mëson çdo ditë e më shumë për komunitetet e New Jorkut dhe për atë shqiptar. Prezantoi Kryebashkiakun Eric Adams. Z. Adams, djali i të cilit është në Shqipëri me rastin e festimeve të pavarësisë, e quajti Nju Jorkun “kryeqytetin e shqiptarëve në Amerikë” me rreth 100,000 banorë shqiptarë, që mishërojnë moton e tij për të arritur rezultate në të gjithë sektorët e jetës këtu” citoi ndër të tjera z.Adams. Kryebashkiaku i cilësoi shqiptarët si një popull shumë punëtorë, sipërmarrës të suksesshëm, qytetarë të angazhuar dhe njerëz që gëzojnë respekt falë punës së tyre. Kryebashkiaku Eric Adams i dhuroi Federatës Pan-Shqiptare të Amerikës VATRA një Proklamatë nderimi me rastin e 110 vjetorit të themelimit të Vatrës e 110 vjetorit të Pavarësisë së Shqipërisë. Kryetari i Vatrës z.Elmi Berisha i dhuroi kryebashkiakut Adams një portret të heroit kombëtar të shqiptarëve Gjergj Kastriotit dhe një portret të gdhendur më gurë dekorativ të shenjtores shqiptare Nënë Tereza. Më pas nën tingujt e hymneve kombëtare u zhvillua ngritja e flamurit kombëtar të Shteteve të Bashkuara të Amerikës dhe Republikës së Shqipërisë. Kjo ditë ishte një festë shumë e rëndësishme jo vetëm për kombin tonë por mbi të gjitha një traditë që ruhet, një mision që vazhdon dhe një miqësi e shenjtë me Shtetet e Bashkuara të Amerikës, aleatin më të madh e më të rëndësishëm të kombit shqiptar.

VATRA DHE SHQIPTARËT E AMERIKËS FESTUAN 110 VJETORIN E PAVARËSISË SË SHQIPËRISË DHE FESTËN E FLAMURIT KOMBËTAR

by

Sokol Paja/

Federata Panshqiptare e Amerikës Vatra bashkoi patriotët shqiptarë nga të gjitha shtetet e Amerikës, Kanadasë e Europës në New York dhe festuan me gëzim e madhështi 110 vjetorin e Pavarësisë së Shqipërisë dhe Festën e Flamurit Kombëtar. Me pjesëmarrjen ekskluzive të Ambasador Frenk Wisner, Konsullit të Nderit të Shqipërisë Ekrem Bardha, patriotit të madh Jim Xhema, ish-Kryeministrit të Kosovës Avdullah Hoti, Mark Gjonaj, Irfan Hysenbelliu, Harry Bajraktari e shumë personalitete të shquara të kombit tonë e bënë mbrëmjen patriotike të paharrueshme. Në një ceremoni mbresëlënëse patriotike: patriotë shqiptarë, autoritete fetare, veprimtarë, kontribues të çështjes kombëtare, përfaqësues të të gjitha shoqatave shqiptare, vatranë, media, familje patriotike shqiptare në diasporën e Amerikës, përfaqësues zyrtar shtetëror nga Prishtina e Tirana, deputetë, ish-kryeministra, ish-ambasadorë, profesorë, miq e të ftuar, festuan për orë të tëra nën tingujt e muzikës së mrekullueshme shqiptare me gëzim, krenari e vëllazëri. 28 Nëntori, festa e Flamurit Kombëtar si themeli dhe identiteti ynë kombëtar shqiptar bashkoi si kurrë më parë shqiptarët nën një flamur për të festuar dhe uruar njëri-tjetrin në ditën e lirisë së shtetit e kombit shqiptar. Pavarësia si datë e veçantë në kalendarin e shtetit dhe të kombit shqiptar ku Vatra ka meritë historike në të gjitha fazat historike ku ka kaluar shteti e kombi ynë. Nën drejtimin brilant të dr.Pashko Camaj, mbrëmja patriotike filloi me këndimin e dy himneve kombëtare të Shteteve të Bashkuara të Amerikës nga Mikela Nonaj dhe himinin kombëtar të Shqipërisë nga Gëzim Nika (Mjeshtër i Madh). Më pas fjalën e mori kryetari i Vatrës i cili u uroi mirëseardhjen të ftuarve dhe renditi në mënyrë kronolgjike rëndësinë e datës historike të 28 Nëntorit dhe kontributin e jashtëzakonshëm të Vatrës në dobi të shtetit e kombit shqiptar. Imam Edin Gjoni bekoi darkën e Pavarësisë dhe u ndal ndër të tjera te kontributi i burrave të shquar të kombit në pavarësinë e Shqipërisë dhe ndihmën e Shteteve të Bashkuara të Amerikës për çështjen kombëtare. Konsulli i Nderit z.Ekrem Bardha, Ambasador Frenk Wisner dhe Jim Xhema në fjalimet e tyre përshëndetëse për të pranishmit kaluan në retrospektive festimet e Pavarësisë së Shqipërisë, ndihmën që Shtetet e Bashkuara të Amerikës i kanë dhënë Kombit shqiptar sidomos në Pavarësinë e Kosovës dhe në mbështetjen e vazhdueshme të çështjes shqiptare në institucionet amerikane. Ata u ndalen dhe në kontributin dhe rolin e Vatrës si një instutucion i fortë atdhedashurie në mërgatën shqiptare të Amerikës, si një bashkësi patriotike historike në përpjekjen për shqiptarinë, historinë kombëtare të Shqipërisë dhe të Shteteve të Bashkuara të Amerikës. Këngëtarët Gëzim Nika (Mjeshtër i Madh), si drejtues artistik dhe kryetar i Darkës Gala organizoi dhe performoi në mënyrë të shkëlqyer bashkë me Grupin Rozafati të drejtuar nga koreografe Angjelina Nika (Mjeshtër i Madh), këngëtaret e mirënjohur Alberie Hadergjonaj, Barbana Dini, Argjend Lloga, duke e shëndërruar këtë festë patriotike në një natë magjike me  mbresa të jashtëzakonshme te të gjithë pjesëmarrësit. Si kurrë më parë, Federata Panshqiptare e Amerikës Vatra udhëhoqi festimet dhe organizimet solemne të festimit të 110 vjetorit të Pavarësisë së Shqipërisë ku Vatra ka pjesën e saj të jashtëzakonshme në historinë e shtetit shqiptar, tregoi edhe këtë herë forcën, seriozitetin, shpirtin e saj patriotik në organizimet kombëtare në nder të flamurit e historisë sonë kombëtare. Federata Panshqiptare e Amerikës Vatra me rastin e Festës së Flamurit Kombëtar dhe të 110 vjetorit të Pavarësisë së Shqipërisë nderoi me: “Mirënjohje” miq të kombit tonë, personalitete të shquara të diasporës shqiptare në Amerikë e më gjërë për kontributin e tyre të jashtëzakonshëm në dobi të çështjes kombëtare dhe fushave të spikatura me dobi dhe interes publik kombëtar. Drejtuesit më të lartë të Vatrës kryetari Elmi Berisha, nëkryetari Alfons Grishaj, Presidenti i Nderit Agim Rexhaj, Kryetari i Këshillit të Vatrës Kolec Ndoja, përgjegjësi për degët, lobimin, zgjerimin dhe bashkëpunimin Mondi Rakaj nderuan me Mirënjohje: Ambasador Frenk Wisner, Ekrem Bardha, Avdullah Hoti, Irfan Hysenbelliu, Adem Belliu, Beqir Sina, Dritan Haxhia, Agim Aliçkaj, Bajram Hajdarmetaj, Sandra Bojaj (Tv Boin), Lulash Palushaj, Anton Raja, Halil Mula, Ruzhdija Axhoviq. Gëzuar Pavarësinë dhe Festën e Flamurit Kombëtar. Zoti e bekoftë Shqipërinë, Zoti i bekoftë Shqiptarët, Zoti i bekoftë miqtë dhe aleatët e përjetshëm të popullit, shtetit e Kombit Shqiptar.

VATRA ORGANIZOI SIMPOZIUMIN SHKENCOR: “110 VJETORI I PAVARËSISË SË SHQIPËRISË DHE PROCESI I NDËRTIMIT TË SHTETIT KOMBËTAR”

by

Sokol Paja/

New York, 27 Nëntor 2022- Federata Pan-Shqiptare e Amerikës “Vatra” me rastin e 110-vjetorit të Pavarësisë së Shqipërisë organizoi SIMPOZIUM SHKENCOR me temë: “110 VJETORI I PAVARËSISË SË SHQIPËRISË DHE PROCESI I NDËRTIMIT TË SHTETIT KOMBËTAR”. Me pjesëmarrjen e autoriteteve më të larta drejtuese të Federatës Vatra, mediave shqiptare në Shtetet e Bashkuara të Amerikës, specialistëve të fushës së historisë e shkencave albanologjike, vatranëve e veprimtarëve në komunitetin shqiptar të Amerikës, përkujtuan me nderim, respekt e lavdi, kontributin e burrave të nderuar të kombit shqiptar në Pavarësinë e Shqipërisë dhe përpjekjet e patriotëve shqiptarë për shtetin, popullin dhe kombin shqiptar. Federata Vatra edhe këtë herë tregoi seriozitet dhe lidership të padiskutueshëm në organizimin e veprimtarive patriotike në mërgatën shqiptare të Amerikës. Në fjalën e tij kryetari i Federatës Pan-Shqiptare të Amerikës VATRA z.Elmi Berisha foli rreth rolit të Vatrës në historinë e lavdishme të shtetit e kombit shqiptar dhe ndihmën konkrete shumëdimensionale të Federatës Vatra në momentet kyçe ku vatranët dhe shqiptarët e Amerikës ndihmuan shtetin e kombin tonë. Nënkryetari i Vatrës z.Alfons Grishaj në fjalët e tij për të pranishmit falenderoi autoritetet e Vatrës z.Berisha, z.Rexhaj, Dr.Marku, Dr.Demiraj, z. Mujaj, z. Rakaj dhe editorin e Diellit për punën e shkëlqyer dhe akademike në rritjen e nivelit të Diellit. Vatra do punojë për bashkimin Kombëtar dhe zhvillimin e shtetit e kombit tonë, tha ndër të tjera z.Grishaj. Sekretarja e Vatrës znj.Nazo Veliu në fjalën e saj para të pranishmëve falenderoi Shtetet e Bashkuara të Amerikës për ndihmën që i kanë dhënë Shqipërinë që nga Presidenti Willson e deri në ditët e sotme. Pas pjesës ceremoniale dhe fjalëve përshëndetëse, drejtuesi i Simpoziumit Shkencor dr. Paulin Marku në fjalën e tij diskutoi rreth rëndësisë së Simpoziumit, rolin dhe meritat e kumtuesve dhe kontribuesve shkencor në Simpoziumin kushtuar 110 Vjetorit të Pavarësisë së Shqipërisë. Ky aktivitet shkencor i shkëlqyer bashkoi në Vatër studiues, profesorë, gazetarë, mësues, profesionistë të fushës, ekspertë të periudhës së Pavarësisë të cilët me kontributet e tyre shkencore falë kërkimeve në dokumente (vendase dhe të huaja), monografi, artikuj shkencorë dhe nëpërmjet hulumtimeve në shtypin periodik të kohës, (shqiptar dhe të huaj) paraqitën fakte e risi shkencore për tu lavdëruar. Kumtesat dhe programi i Simpoziumit Shkencor:

• Beqir Meta, Pavarësia e Shqipërisë dhe hapat e parë të qenësishëm drejt konsolidimit të saj dhe shtetit shqiptar.

• Bernard Zotaj, Parësia dhe Ismail Qemali.

• Muharrem Dezhgiu, Roli i bektashinjve në sendërtimin e Shtetit Kombëtar (vitet 20-të, Shek. XX).

• Idriz Lamaj, Pavarësia e Shqipërisë në këndvështrimin historiografik të Rexhep Krasniqit.

• Fran Shkreli, Kreshniku kombëtar Ded Gjo’ Luli “Malësori që mujti”.

• Paulin Marku, Qëndrimi i deputetëve shqiptar në parlamentin e Stambollit për çështjen shqiptare dhe sfidat për Pavarësinë e Shqipërisë.

• Marjana Bulku, Rilindja Kombëtare dhe Kongresi i Manastirit, roli dhe kontributi historiko-kulturor në ruajtjen dhe konsolidimin e unitetit dhe identitetit kombëtar.

• Rafael Floqi, 1913 – Farsa e “Trashëgimtarëve” të fronit të Shqipërisë.

• Besim Muhadri & Bedri Muhadri, Roli dhe kontributi i Kristo Floqit në Pavarësinë e Shqipërisë dhe në ndërtimin e institucioneve të Shtetit Shqiptar.

• Majlinda Lacaj, Rilindësit kombëtar shqiptar, roli dhe kontributi i tyre historik dhe kulturor në funksion të unitetit dhe mbijetesës së kombit shqiptar.

• Zef Ujkaj, Planet e aleatëve ballkanik dhe ideja e Pavarësisë së Shqipërisë.

• Sokol Paja, 20-vjetori i Pavarësisë së Shqipërisë, pasqyrim në gazetën “Dielli”.

Bordi organizativ i Simpoziumit Shkencor:

• Paulin Marku (kryetar)

• Idriz Lamaj. (anëtar)

• Fran Shkreli (anëtar)

• Marjana Zeneli Bulku (anëtare)

• Pashko Camaj (anëtar)

• Sokol Paja (anëtar).

Zoti e bekoftë Shqipërinë, Kosovën, shqiptarët në trojet etnike, shqiptarët në çdo shtet të botës, Shtetet e Bashkuara të Amerikës, miqtë dhe aleatët e kombit shqiptar. Rroftë përjetë e mot, në shekuj të shekujve flamuri i kombit tonë, historia jonë e lavdishme, rraca jonë e bukur shqiptare, progresi e perspektiva e shenjtë kombëtare.

Jo vetëm një vizitë e shenjtë në Vatikan…

by

Sokol Paja/

Selia e Shenjtë, selia shpirtërore e katolikëve të të gjithë botës, gjithmonë përbën ngjarje të jashtëzakonshme për vizitat e besimtarëve, udhëheqësve fetare, politikanëve, botës së shkencës, dijes e biznesit. Shqiptarët në Vatikan, janë ndjerë gjithmonë si në shtëpinë e tyre. Vizitorët shqiptarë, besimtarë të të gjitha feve, në çdo kohë e kanë parë Vatikanit jo vetëm si një vend të shenjtë, por mbi të gjitha si një simbol të orientimit perëndimor të shqiptarëve, si një pikë graviteti, qendër referencë të kulturës e aspiratave europiane të popullit e kombit shqiptar. Kleriku i Teqes Bektashiane Shqiptare në Michigan Eliton Baba Pashaj i shoqëruar nga kryetari i Këshillit të Teqes z.Mynyr Nazifi, z.Agim Lumani anëtar nderi i Këshillit Drejtues, dhe anëtarë të Teqesë takuan më 26 Tetor në një vizitë historike Atin e Shenjtë Papa Françeskun. Një vizitë që tregon jashtë mase shumë, një vizitë që frymëzon, që orienton, që dëshmon një trashëgimi dhe vazhdimësi historike fisnike të veçantë shqiptare. Një vëllazëri fetare që trashëgohet ndër shekuj, një harmoni fetare që merret shembull dhe në popujt e tjerë, një bashkëpunim ndërfetar shqiptar që na bën krenar në përpjekjet kombëtare për shqiptarinë. Kleri Fetar në Shqipëri është nderi i kombit tonë. Roli i udhëheqësve fetare në trojet tona etnike ka përcaktuar historinë kulturore dhe kulturën historike të popullit shqiptar.

Udhëheqësit Bektashinj shqiptarë gjithmonë kanë spikatur në edukimin e formësimin e ndjenjave patriotike të besimtarëve. Kombi dhe feja ka qenë devizë e pa ndarë e veprimtarisë klerikale të klerikëve Bektashinj. Shqipëria mburret me trashëgiminë e shkëlqyer fetare, patriotike e letrare të krijuesve bektashi. Kleriku i Teqes Bektashiane Shqiptare në Michigan Eliton Baba Pashaj është një shembull i gjallë i vazhdimësinë dhe historisë së lavdishme të Bektashizmit në Shqipëri e në mërgatën shqiptare të Amerikës. Përveç se një lider fetar i përkushtuar ndaj besimit, besimtarëve e veprimtarive klerikale, Eliton Baba Pashaj është një veprimtar i jashtëzakonshëm në komunitetin shqiptar të Michiganit, njeri i kulturës, letrave, botimeve e përkthimeve.

Një patriot i angazhuar në komunitet, një shërbestar i devotshëm i Perëndisë së tejetlartë që mban gjallë frymën e vërtetë të Bektashizmës që themeluesi i Komunitetit Bektashian Shqiptar në Amerikë Hirësia e tij Baba Rexheb përcolli për mbarë mërgatën Shqiptaro-Amerikane.Gjithmonë kombi ynë është krenuar me udhëheqësit fetarë dhe Eliton Baba Pashaj po tregon me punën e tij se pa dyshim është njëri prej tyre.