-Klaus Schlie, kryetar i Kuvendit të shtetit federal Schleswig-Holstein të Gjermanisë: Kosova i takon Evropës dhe Bashkimi Evropian duhet ta mbajë më afër Kosovën/

 PRISHTINË 21 Mars 2016/ Kryetari Kuvendit të Republikës së Kosovës, Kadri Veseli ka takuar sot Klaus Schlie, kryetar i Kuvendit të shtetit federal Schleswig-Holstein të Gjermanisë dhe me këtë rast u shtrua çështja e thellimit të bashkëpunimit në mes të Kuvendit të Republikës së Kosovës dhe Kuvendit të këtij shteti të Gjermanisë Federale.

Veseli në takim theksoi se bashkëpunimi i deritashëm me Gjermaninë ishte tejet i rëndësishëm për Kosovën, duke potencuar rëndësinë e përkrahjes së Gjermanisë, jo vetëm me rastin rindërtimit të vendit, por edhe shtetndërtimit, mbështetjen e institucioneve, por edhe përkrahjen pa rezervë për Kosovën në skenën ndërkombëtare. “Gjermania është mostër e zhvillimit ekonomik për neve si vend në tranzicion”, theksoi ai. 

Klaus Schlie theksoi se është shumë i inkurajuar me punën që është bërë në Kosovë, jo vetëm në lëmin e sigurisë, por edhe në ngritjen e institucioneve demokratike, duke vënë në dukje domosdonë e zgjidhjes së çështjeve kontestuese me fqinjët nëpërmjet dialogut. Ai me këtë rast deklaroi se pos bashkëpunimit në rrafshin politik në mes të dyja vendeve, duke e vlerësuar si të shkëlqyer, tashmë duhet të zërë vend të rëndësishëm bashkëpunimi ekonomik. “Kosova i takon Evropës dhe Bashkimi Evropian duhet ta mbajë më afër Kosovën”, theksoi Klaus Schlie. 

Kryetari Veseli vuri në pah se Kuvendi i Kosovës është i interesuar për bashkëpunim ndërparlamentar me parlamentin e kësaj njësie federale të Gjermanisë, për investime në fushën e energjisë së ripërtëritshme si dhe në fushat tjera me interes të përbashkët, Kosovë-Schleswig-Holstein. 

“Kosova është vend me potenciale të mëdha në prodhimin e energjisë së ripërtërishme dhe përvoja nga ky shtet verior i Gjermanisë është shumë e mirëseardhur”, theksoi kryetari i Kuvendit, Veseli./b.j/