Një krim makabër tronditi qytetin e Korçës pasi një 41-vjeçar mbyti dy fëmijët e tij të mitur dhe më pas vari veten. Ngjarja e rëndë ndodhi mëngjesin e djeshëm në lagjen numër 4 të qytetit të Korçës kur, Naum Toshi mbyti me një tel fëmijët e tij të moshës 7 dhe 4 vjeç dhe më pas i dha fund jetës duke u vetëvarur në katin e dytë të banesës ku ai jetonte. Burime zyrtare policore konfirmojnë se 41-vjeçari jetonte prej pak kohësh i vetëm pasi bashkëshortja e tij 24-vjeçarja Marsela Toshi ishte larguar nga banesa, pas konflikteve të shpeshta në çift. Mësohet se 24-vjeçarja punonte në një lokal nate në qytetin e Korçës dhe pikërisht ky ishte edhe shkaku i konflikteve mes tyre. Sipas të njëjtave burime, e reja mëngjesin kur ndodhi tragjedia kishte shkuar në banesën ku qëndronte Toshi dhe dy fëmijët ku kishte kërkuar që ti merrte këta të fundit me vete dhe të nisej drejt Greqisë aty ku jetonte prej pak kohësh. Një fakt të tillë nuk e ka pranuar 41-vjeçari Toshi dhe për këtë është hakmarrë ndaj bashkëshortes duke sjellë edhe tragjedinë.

Të afërmit e 41-vjeçarit bëjnë me dije se, gruaja ishte larguar nga shtëpia në mes të muajit nëntor, drejt Greqisë, duke e braktisur të shoqin dhe dy djemtë e mitur. Toshi ishte prind i fëmijës 4-vjeçar ndërsa 7-vjeçari ishte fëmijë i një lidhjeje martesore të mëparshme të gruas së tij. Marsela Toshi punonte si kameriere në një klub nate në Korçë, që dyshohet të ketë qene dhe shkaku i konflikteve të shumta mes çiftit, ndërsa prej pak kohësh ajo jetonte në shtetin fqinj. Burime nga policia pohuan se bashkëshortja e Toshit ka hyrë në Shqipëri në orën 02:00 të natës, e më pas është larguar serish drejt shtetit grek në orën 05:00. Dyshohet se babai i dy fëmijëve ka ndërmarre krimin makabër pak momente pasi e shoqja ka dalë nga banesa si shenjë hakmarrje ndaj saj.

Letra

Policia e Korçës njoftoi ditën e djeshme se, 41-vjeçari Toshi para se të kryente vrasjet e dy fëmijëve, ka lënë një letër tek dera e shtëpisë private ku ai jetonte duke sqaruar edhe motivin e krimit të trefishtë. Ka qenë babai 41-vjeçarit, i cili kishte shkuar pranë banesës ndërsa në derën e jashtme të saj ka gjetur një letër ku autori i shkruante babait të tij, se gjithçka e kishte kryer pasi bashkëshortja i kishte marrë rrugë të keqe. “Ngjitu lart dhe shiko! Babi unë s’të pyeta kur e mora gruan dhe s’po të pyes as tani pse po iki! Po i jap fund jetës dhe fëmijët po i marr me vete! Ajo mori rrugë tjetër! S’më dëgjoi që të kthehej pranë familjes dhe të hiqte dorë nga jeta e rrugës! S’u kujdes asnjëherë për fëmijët! Asnjëherë s’pyeti nëse ushqeheshin apo jo! Ajo shkatërroi çdo gjë! Dhe unë ndaj po iki bashkë me fëmijët e mi!”, kishte shkruar në letër 41-vjeçari. Më pas, babai i të ndjerit ka parë të gjithë skenën dhe menjëherë ka njoftuar policinë për ngjarjen. Nga ana tjetër, policia njoftoi zyrtarisht se ditën e djeshme në lagjen nr 4,të qytetit të Korçës, në rrugën “Koli Tupa” në banesë janë gjetur të pajetë nga familjarët e tyre, trupat e shtetasve Naum Toshi, 41 vjeç, V. T., 4 vjeç djali i tij, si edhe J. T.,7 vjeç, fëmijë i ardhur nga martesa e parë, e bashkëshortes së 41-vjeçarit. Nga veprime hetimore në vendngjarje, rezulton se shtetasi Naum Toshi, gjatë natës, pasi ka mbytur e më pas ka varur dy djemtë e tij të mitur, është vetëvarur edhe vetë në ambientet e dhomës së tij. Në vendin e ngjarjes janë konstatuar edhe disa shënime, të cilat viktima ia kishte lënë babait të tij, ku e sqaronte atë për aktin që do të kryente.

Kortezi: Ermal Vija