-U.d. Presidentja Osmani me përfaqësues të QUINT-it dhe BE-së, diskutoi për vëzhgimin e zgjedhjeve të parakohshme parlamentare më Kosovë të 14 Shkurtit 2021. Mbështetje për institucionet e Kosovës për të siguruar zgjedhje të lira, të drejta e paqësore/

PRISHTINË, 8 Janar 2021-Gazeta DIELLI/ U.d. Presidentja e Republikës së Kosovës, Vjosa Osmani, ka pritur sot në takim përfaqësuesit e shteteve të Quint-it dhe të BE-së.

Në këtë takim, u.d. Presidentja Osmani theksoi se mbrojtja e integritetit dhe besueshmërisë së procesit zgjedhor është qëllimi kryesor i institucioneve të vendit, duke garantuar kështu jetësimin e vullnetit qytetar të shprehur përmes votës së lirë. 

Osmani potencoi rëndësinë e përfshirjes së vëzhguesve ndërkombëtar në monitorimin e procesit zgjedhor, ndaj në këtë kontekst kërkoi mbështetjen e QUINT-it dhe të BE-së.

Nga ana tjetër, përfaqësuesit e Quint-it dhe të zyrës së BE-së shprehën mbështetjen e tyre për institucionet e Kosovës për të siguruar zgjedhje të lira, të drejta e paqësore, thekson njoftimi dërguar sot nga Presidenca e Kosovës.

Kosova mban zgjedhje parlamentare të jashtëzakonshme në 14 Shkurt 2021, shpërndahet Kuvendi, ka njoftuar Presidenca e Kosovës në mbrëmjën e 6 Janart 2021.

Sipas Komisionit Qendror të Zgjedhjeve në Kosovë, afati i aplikimit të subjekteve politike dhe kandidatëve nis në 8 Janar dhe përfundon në 16 Janar 2021. Edhe çertifikimi i partive politike nis në 8 Janar, ndërsa zgjatë deri në 21 Janar. Tërheqja e shortit për renditjen e subjekteve politike dhe kandidatëve në fletëvotim do të bëhet në 1 Shkurt 2021. Fushata Zgjedhore për subjektet politike dhe kandidatët nis në 3 Shkurt dhe përmbyllet në 12 Shkurt 2021. Periudha e votimit me postë fillon në 2 Shkurt dhe përfundon 24 orë para zgjedhjeve. 

Kosova në Vitin e Ri 2021 shkon në zgjedhje parlamentare  të jashtëzakonshme pas rënes së dy qeverive në vitin 2020 të pas zgjedhjeve të parakohshme të 6 Tetorit 2019.

Në 2020-tën qëveria me kryeministër Albin Kurtin e Lëvizjes Vetëvendosje e zgjedhur në 3  Shkurt  u rrëzua me mocion mosbesimi të inicuar nga partneri i koalicionit qeverisës – Lidhja Demokratike e Kosovës, e cila mori drejtimin e qeverisë me kryeministër Avdullah Hotin të zgjedhur në  3 Qershor, por në dhjetor Gjykata Kushtetuese shpalli të pavlefshme votën e një deputeti të minoriteteve, Etem Arifi, pasi kishte të humbur mandatin për shkak të një dënimi të formës së prerë nga gjykata, i cili tashmë ndodhet në burg. Vota e tij ishte vendimtare për zgjedhjen e qeverisë pasi mundësoi arritjen e minimumit të nevoshem  prej 61 votave të parlamentit 120 anëtarësh.