UNESCO – Dielli

UNESCO, ja ku studjojnë shqiptarët

July 13, 2017 by dgreca

harta-ku-studiojne-shqiptaret-jashte Numri i studentëve shqiptarë që zgjedhin të studiojnë jashtë vendit, përllogaritet të jetë 24,372 studentë, sipas të dhënave të Institutit të Statistikave të UNESCO-s.Rreth 80% e tyre kanë zgjedhur të studiojnë në vendet fqinje, Itali dhe Greqi për vitin akademik 2016-2017, raporton Monitor.Shteti me numrin më të lartë të studentëve shqiptarë edhe për këtë vit mbetet Italia, me rreth 11,460 studentë, megjithëse ka shënuar një rënie me rreth 177 studentë krahasuar me një vit akademik më parë.Destinacioni i dytë me numrin më të lartë të studentëve shqiptarë është Greqia me 7,339 studentë. Edhe Greqia ka pësuar një rënie nga viti i kaluar në numrin e studentëve. Një vit më parë në universitetet greke studionin 8,209 studentë shqiptarë, rreth 870 më shumë se në vitin akademik 2016-2017.

Destinacionet që po njohin rritje

Numri i studentëve shqiptarë që shkojnë në Turqi për të studiuar thuajse është dyfishuar krahasuar me vitin akademik të mëparshëm. Nga 471 studentë që ndiqnin studimet në vitin akademik 2015-2016, numri i tyre ka arritur në 775.Europa Perëndimore është ndër rajonet më të preferuar të studentëve kudo në botë, por edhe i shqiptarëve.Vendet ku shqiptarët janë përqendruar më shumë në Perëndim janë: Gjermania me 559 studentë, Franca me 434 studentë, Austria me 285 studentë, Mbretëria e Bashkuar me 247 studentë, dhe Zvicra me 95 studentë.Rritje të numrit të studentëve shqiptarë kanë njohur dhe vendet e ulëta, si Holanda (110 studentë), Belgjika (60 studentë), Luksemburgu (studentë).Në vendet nordike, Finlandë, Norvegji dhe Suedi, studiojnë 106 studentë shqiptarë.

Vendet e rajonit preferohen më pak

Në rajonin e Ballkanit, shqiptarët kryesisht preferojnë që të studiojnë në Rumani dhe Bullgari, ku numërohen përkatësisht 272 dhe 224 studentë shqiptarë.Në Maqedoni, sipas të dhënave të Institutit të Statistikave të UNESCO-s, numri i shqiptarëve që studiojnë atje është 91, ndërsa në Serbi studiojnë 20 studentë nga Shqipëria, në Kroaci 6 studentë dhe në Bosnjë 4.

Jashtë kontinentit

Nuk janë të paktë edhe studentët që studimet e tyre kanë zgjedhur që t’i kryejnë jashtë kontinentit europian. Nga 24 mijë studentët që kanë zgjedhur të studiojnë jashtë, 682 prej tyre janë vendosur në Shtetet e Bashkuara të Amerikës, rreth 75 në Kanada, 31 në Australi, 10 në Brazil dhe vetëm 1 në Zelandën e Re.Ka dhe nga ata që kanë zgjedhur vendet e Magrebit për të studiuar. Nga të dhënat, 26 studentë kanë vendosur që të studiojnë në Egjipt, 8 studentë studiojnë në Jordani, 4 në Marok, 7 në Emiratet e Bashkuara Arabe, 1 në Katar dhe 208 studentë studiojnë në Arabinë Saudite. {përgatiti për “Dielli-n”, SH.K.}

AAK,Keqardhje për mospranimin e Kosovës në UNESCO-

November 9, 2015 by dgreca

AAK: E drejta ështe në anën e Kosovës/
PRISHTINË, 9 Nëntor 2015/ Aleanca për Ardhmërinë e Kosovës shpreh keqardhje për mospranimin e Kosovës në UNESCO.
“Kosova e ka merituar plotësisht që të jetë anëtare e kësaj organizate, por votimi i sotëm shpjegon se sa e komplikuar është rruga e Kosovës drejt anëtarësimit në këtë organizatë por edhe në vetë Kombet e Bashkuara”, deklaroi AAK.
“Për fatin e keq koncesionet qe i ka bërë Kosova në raport me vendet fqinje duke përfshirë këtu edhe dy marrëvedshjet e fundit me Serbine dhe Malin e Zi, nuk ishin të mjaftueshme që Serbia të mos e zhvillojë një fushatë të eger kundër anëtarësimit të Kosovës në UNESCO”, thekson partia e drejtuar nga Ramush Haradinaj.
“Sidoqoftë, kjo në asnje situatë nuk bën të na dekurajojë nga përkushtimi dhe vendosmëria jonë që anëtarsëimin në UNESCO, OKB dhe organizata të tjera, ta synojmë me çdo kusht.
E drejta ështe në anën e Kosovës!”, përfundohet në deklaratën e AAK./b.j/

Konferenca e Përgjithshme e UNESCO-s në Paris, Kosova, Të Hënën Votimi

November 7, 2015 by dgreca

*Kumbaro: Anëtarësimi i Kosovës në UNESCO, i merituar/
*Votimi për pranimin e Kosovës në UNESCO pritet të mbahet në seancën e 9 nëntorit/
TIRANË, 7 Nëntor/Ministrja e Kulturës, Mirela Kumbaro, theksoi sot në Konferencën e Përgjithshme të UNESCO-s në Paris, se anëtarësimi i Kosovës në UNESCO është jo vetëm i nevojshëm, por mëse i merituar.
Gjatë fjalës së saj ministrja Kumbaro tha se “përsa i përket qasjes së tyre ndaj trashëgimisë kulturore autoritetet kosovare dhe elita e kosovës kanë treguar përgjegjësi institucionale dhe kulturore. Ata kanë reaguar njëzëri kundër dëmeve të shkaktuara nga trazirat e marsit 2004 ndaj kishave e manastireve ortodokse”.
“Pjesa më e madhe e objekteve të dëmtuara nga trazirat e vitit 2004 janë restauruar dhe rindërtuar me financimet e qeverisë së Kosovës dhe të partnerëve ndërkombëtarë. Që prej fillesës së qytetërimit ballkanik trashëgimia kulturore në Kosovë ka qenë themeli i përbashkët i burrave e grave, të cilët kanë ndarë gjithçka, konfliktin dhe armiqësitë e një brezi madje edhe dy, e nuk mund të ndryshojnë çfarë përmban toka në thellësitë e saj kulturore dhe historike”, nënvizoi Kumbaro.
Kisha ortodokse serbe, vijoi ajo, njihet në Kosovë, identiteti I saj, dhe te drejtat e saj, mbrohen nga Kushtetuta dhe ligjet e tjera te vendit.
Ministrja Kumbaro theksoi se nuk është thjesht një çështje anëtarësimi në UNESCO, por është e gjithë çështja e emancipimit të shoqërisë dhe të gjithë shoqërive të mendjes së hapur.
“Kosova me historinë , popullin, monumentet dhe kulturën e saj ka ruajtur një pjesë të mozaikut kulturor të Ballkanit .Të gjitha shtetet e tjera të rajonit janë anëtarë të UNESCO dhe do të ishte absurde , madje edhe qesharake që një anëtar i familjes së Ballkanit të mos jetë formalisht brenda organizatës më të madhe në aspektin kulturës dhe arsimit”, u shpreh Kumbaro.
Kultura nuk njeh kufij administrativë, vijoi ajo, kultura nuk mbrohet duke përjashtuar tjetrin përkundrazi ajo pasurohet nga shkëmbimi dhe përfshirja. “Ky është thelbi i ekzistencës së UNESCO. Për anëtarësimin e Kosovës në UNESCO nuk është e interesuar vetëm Kosova , por edhe fqinjët e saj Serbia, Shqipëria Maqedonia, Mali i Zi të cilët përfitojnë po aq shumë”, tha Kumbaro.
“Nuk do të mund të mbrojmë dhe të promovojmë kulturën dhe trashëgiminë tonë kulturore pa mbrojtur atë të fqinjve. Për ne është shumë e rëndësishme që të kemi paqe e harmoni në Ballkan, do të ishte mirë që të bashkohemi të gjithë së bashku për të promovuar paqen kjo është në të mirë të të gjithëve”, u shpreh Kumbaro.
Ministrja Kumbaro deklaroi se “është koha që Ballkani, i cili prej shumë kohësh mban në supe klishenë si “fuçi baruti në Europë”, sot të kthehet në “ fuçinë e Kulturës” në Europë. Ftojmë Serbinë ta kapë këtë mundësi për të dëshmuar se ka një shpirt bashkëpunues dhe të drejtë në raport me angazhimet e marra, të shkëpusë lidhjet me një të shkuar të errët dhe të shohë drejt një të ardhme europiane tek e cila serbët dhe shqiptarët duhet të shkojnë sëbashku.
“Ky është thelbi i Historisë dhe kjo do të jetë, pa asnjë dyshim, dhe një nga fitoret e shumta dhe të matura të Kulturës”, vazhdoi Kumbaro.
Ministrja Kumbaro tha se vendi im, Shqipëria, krenar që është anëtar i familjes së UNESCO-s, ka dëshmuar se ka vullnet të hekurt për të respektuar dhe ndjekur objektivin tonë të përbashkët në mbrojtjen e kulturave dhe zhvillimin e edukimit. Gjej rastin të falenderoj përzemërsisht Komitetin e Trashëgimisë Botërore, jo vetëm se u qëndron në krah institucioneve tona gjatë përpjekjeve të tyre për mbrojtjen e trashëgimisë, por edhe për mirëpritjen e përpjekjeve të ndërmarra nga shteti shqiptar për t’iu përgjigjur rekomandimeve të Komitetit”.
Më 21 tetor, Bordi Ekzekutiv i UNESCO-s përkrahu kërkesën e Shqipërisë dhe i rekomandoi Konferencës së Përgjithshme futjen e çështjes së pranimit të Kosovës në këtë organizatë në axhendë.
Sesioni i 38-të i Konferencës së Përgjithshme të UNESCO-s nisi të martën, 3 nëntor 2015, në Paris dhe do të zgjasë dy javë. Në mesin e shumë çështjeve që do të konsiderohet është edhe rekomandimi i Bordit Ekzekutiv të UNESCO-s për pranimin e Kosovës në këtë organizatë. Konferenca e Përgjithshme ka 195 anëtarë, nga të cilët 111 e kanë njohur Kosovën, e 84 jo, dhe rekomandimit i duhen dy të tretat e votave për të kaluar.
Votimi për pranimin e Kosovës në UNESCO pritet të mbahet në seancën e 9 nëntorit. Në prag të votimit në Asamblenë e Përgjithshme të UNESCO-s për anëtarësimin e Kosovës në agjencinë e OKB-së, janë shtuar zërat në përkrahje të Kosovës, ndërsa Serbia në anën tjetër zhvillon një fushatë të gjerë diplomatike institucionale kundër synimeve të Kosovës për anëtarësim(Sipas ATSH-se)

Kosova: Vendimi i Bordit Ekzekutiv të UNESCO-s fuqizim i subjektivitetit ndërkombëtar

October 21, 2015 by dgreca

-Jahjaga: Lajm fantastik nga UNESCO. Mustafa: Kosova në UNESCO, do të përfitojnë të gjithë qytetarët. Veseli: Falënderoj në emër të Kuvendit të Republikës. Thaçi: Një hap shumë i madh përpara per Kosovën/
-Në ditët e ardhshme na presin lajme të mira nga Brukseli për shtetin e Kosovës dhe qytetarët e saj/
Nga Behlul Jashari/ PRISHTINË, 21 Tetor 2015/ Komiteti Ekzekutiv i UNESCO-s sapo aprovoi Rezolutën që rekomandon pranimin e Republikës së Kosovës në UNESCO, bën të ditur nga Parisi shefi i dipolomacisë kosovare, Hashim Thaçi. “Një hap shumë i madh përpara per Kosovën”, thekson ai.
“Lajm fantastik nga UNESCO”, shprehet Presidentja e Republikës së Kosovës, Atifete Jahjaga. “Bordi Ekzekutiv i UNESCO-s rekomandon kërkesën për anëtarësim të Republikës së Kosovës. Kërkesa tani i drejtohet Konferencës së Përgjithshme të UNESCO-s në nëntor për votën e anëtarësimit. Vazhdojmë tutje me përkushtim për të avancuar vlerat, harmoninë dhe progresin e vendit tonë”, thekson Presidentja e Kosovës.
Kryetari i Kuvendit të Kosovës, Kadri Veseli, shprehet: “Falënderoj në emër të Kuvendit të Republikës së Kosovës dhe emrin tim, Shtetet e Bashkuara të Amerikës, Britaninë e Madhe, Gjermaninë, Francën, Kroacinë dhe Shqipërinë, për angazhimin maksimal që vendi ynë të bëhet pjesë e UNESCO-s”.
Ndërsa, kryeministri i Kosovës, Isa Mustafa, sapo deklaron se, vendimi i Bordit Ekzekutiv të UNESCO-s është fuqizim i subjektivitetit ndërkombëtar.
Në deklaratën e dërguar nga qeveria e Kosovës thuhet se, Bordi Ekzekutiv i Organizatës së Kombeve të Bashkuara për Arsim, Shkencë dhe Kulturë (UNESCO) ka votuar me shumicë votash që të pranojë kërkesën e Republikës së Kosovës për t’u bërë anëtare e UNESCO-s, ndërsa shpresojmë që vendimi përfundimtar në favor të Kosovës do të merret nga Konferenca e Përgjithshme e kësaj organizate.
Përkrahja për shtetin e Kosovës nga Bordi Ekzekutiv i UNESCO-s, është dëshmi e fuqishme se axhenda Euro-Atlantike e Kosovës dhe anëtarësimi i saj në organizata të rëndësishme ndërkombëtare është një proces që po fuqizohet çdo ditë.
Parimet themeltare të UNESCO-s janë që të kontribuojë për paqen dhe sigurinë, duke promovuar bashkëpunimin ndërkombëtar përmes arsimit, shkencës dhe kulturës dhe për të çuar përpara respektimin universal për drejtësi, sundim të ligjit dhe të drejtat e njeriut, së bashku me liritë themelore të shpallura në Kartën e Kombeve të Bashkuara.
Këto parime janë fundamentale për një shoqëri demokratike, për të cilat është orientuar Kosova me një konsensus të plotë shoqëror dhe kulturor.
Procesi i anëtarësimit të Kosovës në UNESCO po bëhet me një punë të jashtëzakonshme të Ministrisë së Punëve të Jashtme dhe institucioneve tjera kompetente dhe nuk është e drejtuar ndaj asnjë shteti fqinj dhe as kundër ndonjë bashkësie etnike në Kosovë.
Nëpërmes anëtarësimit në UNESCO, do të përfitojnë të gjithë qytetarët e Kosovës, pa dallim etnie ose religjioni dhe do të avancohet edhe më tutje bashkëjetesa, si një traditë qe e kemi ruajtur dhe kultivuar ndër shekuj.
Vendimi i Bordit të UNESCO-s për pranim në këtë organizatë të rëndësishme ndërkombëtare, është edhe një vendosmëri e shtetit të Kosovës për të ndërtuar partneritet të fuqishëm me miqtë tanë ndërkombëtarë. Shteti i Kosovës dhe shoqëria në përgjithësi nuk do ta keqpërdor këtë përkrahje dhe besim, përkundrazi, do të jemi edhe më rigoroz në respektimin e të drejtave për arsim, shkencë dhe kulturë, të të gjithë qytetarëve, konform standardeve më të larta ndërkombëtare.
Në ditët e ardhshme na presin lajme të mira nga Brukseli për shtetin e Kosovës dhe qytetarët e saj, përfundon deklarata nënshkruar nga Isa Mustafa, kryeministër i Republikës së Kosovës.
Ministria kosovare e Kulturës, Rinisë dhe Sportit e vlerëson ditë të shënuar për Kosovën hapin e parë të Kosovës, të bërë sot, drejt anëtarësimit në UNESCO.
Në deklaratën e dërguar thekson se, votimi i sotshëm i Këshillit Ekzekutiv të UNESCO-s pro anëtarësimit të Kosovës në këtë organizëm të rëndësishëm të OKB-së, është vendim jashtëzakonisht i rëndësishëm dhe historik për Kosovën, për historinë dhe kulturën e saj, me të cilën po hapen rrugë të reja për anëtarësim në struktura relevante ndërkombëtare.
Anëtarësimi i Kosovës në UNESCO, i cili pritet të ndodhë gjatë punimeve të Asamblesë, muajin që vjen, është edhe një dëshmi e sukseseve të Kosovës, njohjes dhe pranimit të saj në arenën ndërkombëtare.
Kosova, me trashëgiminë e pasur kulturore, të evidencuar që nga Antikiteti i hershëm e gjer në historinë e re, ka çfarë t’i ofrojë botës, ndaj njohja e këtyre vlerave, shtron para nesh standarde ndërkombëtare, të cilat duhet t’i përqafojmë pa asnjë rezervë.
Ministria e Kulturës, Rinisë dhe Sportit është e përkushtuar që të punojë maksimalisht për ruajtjen, konservimin dhe promovimin e trashëgimisë kulturore, si dhe diversitetin kulturor, si vlera të përhershme të shoqërisë sonë, duke njohur dhe pranuar veçantitë e trashëgimisë, si dhe statusin kushtetues të saj.
Me anëtarësimin në UNESCO, Kosova do të rrisë standardet e ruajtjes dhe të garantimit të trashëgimisë kulturore, përshirë respektimin e statusit, të trashëgimisë dhe të pronës së Kishës Ortodokse Serbe.

Kosova pret të votohet rezoluta për pranimin në UNESCO

October 6, 2015 by dgreca

-Takim koordinues me shtetet e Kuintit për procesin e anëtarësimit të Kosovës në UNESCO dhe për proceset e tjera integruese/

Nga Behlul Jashari/ PRISHTINË, 6 Tetor 2015/ Kosova pret që Bordi Ekzekutiv i UNESCO-s të votojë gjatë këtij muaji rezolutën për pranimin në UNESCO. Kështu u tha sot në një takim koordinues me shtetet e Kuintit për procesin e anëtarësimit të Kosovës në UNESCO dhe për proceset e tjera integruese, bën të ditur MPJ kosovare.
Njoftimi i sapodërguar sonte thekson se, zëvendësministri i Punëve të Jashtme të Republikës së Kosovës, Petrit Selimi, ka pritur sot në takim pune ambasadorët dhe përfaqësuesit e shteteve të Kuintit në vazhdën e koordinimit të aktiviteteve në kuadër të procesit të anëtarësimit të Republikës së Kosovës në Organizatën e Kombeve të Bashkuara për Arsimin, Shkencën dhe Kulturën (UNESCO) dhe për proceset e tjera integruese.
Zëvendësministri Selimi falënderoi ambasadorët dhe përfaqësuesit e vendeve të Kuintit për mbështetjen e vazhdueshme dhënë Kosovës në procesin e anëtarësimit në UNESCO dhe në organizma të tjerë të rëndësishëm ndërkombëtarë dhe kërkoi vëmendje të shtuar ndaj gjuhës negative dhe pozicionit tejet negativ të Serbisë që rrezikon edhe vet procesin e normalizimit.

Selimi u zotua për vazhdimin e fushatës pozitive të Republikës së Kosovës, duke përfshirë angazhimin e të gjithë aktorëve relevantë në mesin e të cilëve edhe mediet, universitetet, institucionet shkencore e kulturore, shoqëria civile e kështu me radhë.

Në 28 shtator edhe Principata e Monakos nënshkroi si bashkësponsorizuese kërkesën e Kosovës për anëtarësim në UNESCO. “Tani janë bërë 47 shtete që janë rreshtuar përkrah Kosovës në kërkesën që çështja e anëtarësisë të shqyrtohet nga Bordi Ekzekutiv në tetor”, bënte të ditur zëvendëskryeministri e ministri i Jashtëm i Kosovës, Hashim Thaçi nga Nju Jorku. “Po ecim përpara hap pas hapi”, shprehej ai.

Ndërsa zëvendësministri i Jashtëm kosovar, Selimi në një konferencë të jashtëzakonshme shtypi në 12 shtator bënte të ditur se Kosova bëri hapin e parë drejt anëtarësimit në UNESCO. “Kërkesa për aplikim është dorëzuar nga Shqipëria dhe është nënshkruar nga 44 shtete anëtare të UNESCO-s, që përbën një numër rekord të bashkësponsorizuesve në historinë e re të UNESCO-s”, theksonte Selimi.