Presidenti amerikan Barack Obama uroi sot presidentin shqiptar Bujar Nishani me rastin e 28 Nëntorit, ditës së Pavarësisë. Ju shpreh urimet më të mira për ju dhe popullin shqiptar, fillon mesazhi. “Ky shënon edhe një rast për të reflektuar mbi partneritetin e fortë dhe të qëndrueshëm që gëzojnë Shtetet e Bashkuara të Amerikës dhe Shqipëria, ashtu siç u nënvizua edhe nga nënshkrimi në prill i Partneritetit Strategjik ShBA-Shqipëri. Shtetet e Bashkuara të Amerikës mbeten të përkushtuara për të ndihmuar Shqipërinë që të përparojë në rrugëtimin e saj drejt integrimin të plotë Euro-Atlantik”, lexohet më tej në urimin e Obamës. Presidenti amerikan shtoi se i është “mirënjohës kontributeve të Shqipërisë në drejtim të rritjes së paqes dhe qëndrueshmërisë në Ballkan si dhe anembanë botës”. “Ato përfshijnë edhe ndihmesën e vlefshme të Shqipërisë si pjesëtare e Koalicionit Ndërkombëtar që lufton ISIS-in dhe kundër ekstremizmit të dhunshëm në rajonin e Ballkanit. Unë pres që në këtë drejtim dhe në shumë fusha të tjera të rëndësishme, ta thellojmë bashkëpunimin tonë gjatë viteve në vazhdim”, thuhet në mesazhin e Obamës.
Presidenti Obama uron Presidentin Nishani me rastin e Festës së Pavarësisë
Mesazhi i urimit i Presidentit Amerikan Barack Obama drejtuar Presidentit të Republikës, Bujar Nishani me rastin e 101-vjetorit të Pavarësisë./
“I dashur zoti President,/
Si partner krenar dhe mik, Shtetet e Bashkuara iu bashkohen Ju dhe popullit shqiptar në festimin e Ditës së Pavarësisë në 28 nëntor. SHBA dhe Shqipëria gëzojnë një partneritet të fortë e të veçantë të bazuar në interesa të përbashkëta. Unë e vlerësoj përkushtimin e Shqipërisë ndaj paqes dhe sigurisë globale përfshirë edhe përpjekjet tona të vazhdueshme e të përbashkëta në Afganistan, si edhe rolin e Shqipërisë në ruajtjen e qëndrueshmërisë në Ballkan. Pres që të vazhdojmë dhe ta fuqizojmë marrëdhënien tonë në të ardhmen dhe ne zotohemi për mbështetjen tonë të plotë teksa vendi juaj përparon në rrugëtimin drejt integrimit të plotë në bashkësinë euroatlantike.
Pranoni, ju lutem, urimet më të mira të popullit amerikan në përvjetorin e Pavarësisë së vendit tuaj.
Sinqerisht,
Barack Obama”.
Washington, 27 Nentor 2013
PRESIDENTI OBAMA,URIM PER 100 VJETORIN E PAVARESISE SE SHQIPERISE
Presidenti i SHBA-së, Barack Obama uron shqiptarët për 100-vjetorin e pavarësisë. Kreu i Shtëpisë së Bardhë i ka dërguar një mesazh urimi kreut të shtetit shqiptar, Bujar Nishani duke rikonfirmuar në këtë ngjarje të rëndësishme përkushtimin për të thelluar edhe më tej marrëdhëniet mes dy vendeve në vitet e ardhshme.
Në mesazh, Presidenti Obama shprehet se Shtetet e Bashkuara të Amerikës mbeten të përkushtuara për të ndihmuar Shqipërinë në konsolidimin e institucioneve demokratike dhe në ndërmarrjen e reformave të nevojshme për të arritur integrimin e saj të plotë në bashkësinë euro-atlantike.
SHBA-të, vlerësojnë mbështetjen e vazhdueshme të Shqipërisë ndaj misionit të NATO-s në Afganistan ku ushtarakët shqiptarë shërbejnë me trimëri krah për krah me aleatët dhe partnerët e ISAF-it.
Dy vendet tona, shkruan presidenti ndajnë një lidhje të ngushtë që nisi me mbërritjen e emigrantëve të parë shqiptarë në Shtetet e Bashkuara dhe ka vazhduar të lulëzojë përgjatë dy dekadave të fundit pas vendosjes së demokracisë në Republikën e Shqipërisë.
“Fjalimi historik i Sekretares së Shtetit Klinton në Parlamentin shqiptar shënoi një tjetër gur të rëndësishëm kilometrik në marrëdhënien tonë. Në këtë ditë festimi, populli amerikan bashkohet me ju, duke ju uruar më të mirën në përpjekjet tuaj të ardhshme për ndërtimin e një Shqipërie demokratike dhe të begatë!”, përfundon mesazhin e urimit kreu i Shtëpisë së Bardhë.