Të Premten me 2 Mars 2018, këngëtari i njohur Ylli Baka, ishte mysafir në Vatër. Ai shoqërohej nga menaxheri i përgjithshëm i aktiviteteve artistike në Vatër, Mjeshtri i Madh, artisti Frederik Ndoci dhe koordinatori për mediat në Vatër Dritan Haxhia.

Në takim ishte i pranishëm edhe anëtari i kryesisë së Vatrës, biznesmeni Zef Balaj.

Editori i Diellit i uroi mirëseardhjen artistit të shquar dhe e ka njohur atë me historikun e Vatrës dhe rrugëtimin e saj 106 vjecar.

Editori u ndal gjatë në traditën e vatranëve në fushën e kulturës, dhe përshkroi historinë e Bandës muzikore VATRA, e cila e pat zanfillën me 17 dhjetor 1916 në Uster dhe pati si arkitekt profesorn, muzikologun e shquar, profesorin e konservatorit te Bostonit, Thoma  Natsi, i cili atë kohë udhëhiqte edhe shoqërinë muzikore”Dodona”. Banda e Vatrës që mbante emrin”Mbretëresha Sofia” në nderim të mbretëreshës, gruas së Princ Vidit,  nuk ishte thjesht një bandë muzikore që përballonte veprimtaritë kulturore dhe historike, por edhe një Trupë artistike, e cila vuri në skenë edhe pjesë teatrore e drama. E tillë ishte psh venia në skenë e dramës”Vdekja e Pirros”. Banda muzikore kishte në radhët e saj 30 djem që luanin në instrumente. Kryetar i Bandës së Vatrës ishte patrioti Kosta Pando, ndërsa dirigjenti ishte i famshmi Thoma Natsi.

Banda e Vatrës së bashku me Trupat Vullnetare të Vatrës, e cila thirrej Garda Civile, në Shkurt 1920 morën urdhërin nga Qeveria shqiptare e kryesuar nga Sulejman Delvina, që Garda Civile dhe Banda Vatra, të nisej drejt Shqipërisë. Banda arriti në Shqipëri me 3 prill pas një kalvari të vështirë udhëtimi me vaporin”Canda” deri në Itali dhe me skafin “Baron Bruch” deri në Durrës.

Më pas editori u ndal në rrugëtimin e Bandës Muzikore nëpër Shqipëri dhe kontributin e  saj në Shqipëri. Koncertin e parë  Banda e dha me 4 prill në Sheshin e Lirisë në Durrës para autoriteteve të Bashkisë. Në koncert ka marrë pjesë dhe vetë z. Sulejman Delvina, që ka mbajtë fjalimin e mirëseradhjes.

Banda e Vatrës dhe Trupat Vullnetare marshuan në këmbë nga Tirana në Elbasan, ku arritën me 11 prill. Editori përshkoi rrugëtiminderi në Vlorë, ku Banda e Vatrës luajti Hymnin e Luftës së Vlorës me tekst të Ali Asllanit dhe muzikë të dirigjentit të saj Thoma Natsi. Banda e Vatrës përshkoi gati pjesën më të madhe të territorit shqiptar dhe ngriti moralin e popullit dhe zgjoi shpirtin patriotik. Ajo u bë themeli i Bandës së shtetit shqiptar.

Këngëtari i njohur Ylli Baka, tha se ndjehej i gëzuar që vizitonte Vatrën dhe prekte historinë e shquar të shqiptarëve të Amerikës, veçanerisht të Vatrës Shqiptare të Amerikvs, që luajti rolin e shtetit të munguar shqiptar.

***

 RRUGËTIMI ARTISTIK I KËNGËTARIT YLLI BAKA/

-Këngëtari i shquar, që ka provuar jetën e vështirë të emigrantit, e ka nisë karrierën me Albumi i pare “Fllad Jugu”.

-Në vitin 2004 këngëtari ka nxjerrë në treg albumin me titullin “Kenget e vendit tim” me te cilin dhe ai fillon te njihet.

-Në Prill 2013, Baka merr pjesë në Netët E Klipit Shqiptar 12 me këngën “Rruget e Fatit”, ku shkëlqen.

– Në Nëntor 2013, ai merr pjesë në Musical-Fest 2013 me këngën “Hapma Deren”.

-Në vitin 2012, Baka publikon albumin “Rruget E Fatit”.

-Në vitin 2013, Ylli Baka publikon albumin “Live”.

-Më datë 10 Qershor 2014, Ylli Baka publikon videoklipin “Magji E Dashurise”. Me këtë këngë, Ylli Baka merr pjesë në Top Fest 11 në vitin 2014.

-Më datë 23 Mars 2016, Ylli Baka publikon videoklipin “Kur Kaloj Nga Korça”.

-Më datë 15 Shtator 2016, Ylli Baka publikon videoklipin “Ne Koke Te Beqareve”.

-Më datë 15 Nëntor 2016, Ylli Baka & Ilir Suku (Likja) publikojnë videoklipin “Vera E Bekuar”.

-Më datë 29 Janar 2017, Bes Kallaku & Ylli Baka publikojnë videoklipin “Gezuar Baftjar”. Muzika e këngës u punua nga Irkenc Hyka, teksti u shkrua nga Bes Kallaku.

-Më datë 13 Prill 2017, Ylli Baka publikon videoklipin “Shendeti Eshte I Pari”.

-Më datë 8 Korrik 2017, Ylli Baka publikon videoklipin “Baba Haxhiu”.

-Më datë 31 Korrik 2017, Ylli Baka publikon videoklipin “Po Kendon Bilbili”.

-Më datë 22 Dhjetor 2017, Ylli Baka publikon videoklipin “Per Shum Vjet Gezuar”, në bashkëpunim me Gent Hazizi. Muzika e këngës u punua nga Klodian Qafoku, teksti u shkrua nga Arben Duka, ndërsa për orkestrimin u kujdes Klodian Qafoku.

-Më datë 25 Janar 2018, Ylli Baka publikon videoklipin “Xhan Ali”.

-Më datë 13 Shkurt 2018, Bes Kallaku & Yll Baka publikojnë videoklipin “Cohu Kerceni”.

* Këngëtari ka qenë disa herë i ftuar nga degët e Vatrës në Florida, në Tampa dhe Jacksonville.