Search Results for: Children of the eagle

Nga Drita Gjongecaj

NY, 27 shtator, 2025/

Një ditë e veçantë dhe plot emocion u shënua në historinë e komunitetit shqiptar në Bronx, sot kur Presidenti i Republikës së Shqipërisë, SH. T. Z. Bajram Begaj zhvilloi një vizitë zyrtare në Shkollën Shqipe “Children of the Eagle” në Neë York. Kjo vizitë solli momente të paharruara dhe krenari e emocion për nxënësit, prindërit dhe mësuesit.

Presidenti shoqërohej nga Zonja e Parë, Armanda Begaj, nga Ambasadorja e Shqipërisë në OKB, Suela Janina dhe Ambasadori i Shqipërisë në SHBA, Ervin Bushati. Në këtë veprimtari mori pjesë edhe drejtoresha e shkollës publike PS 108, znj. Stefania Cedrola Mustafa, e cila vlerësoi punën e veçantë të shkollës shqipe dhe inkurajoi nxënësit që të vazhdojnë të ndjekin programin si një rrugë për ruajtjen e identitetit dhe trashëgimisë së tyre kulturore.

Aktiviteti nisi me këndimin e Himnit Kombëtar, duke i dhënë veprimtarisë solemnitetin që meritonte.

Presidenti përshëndeti pjesëmarrësit, duke vlerësuar punën e palodhur të shkollës dhe rëndësinë që ka të mësuarit e gjuhës shqipe dhe ruajtja e kulturës kombëtare. Ai falenderoi mësuesit, familjarët, vetë nxënësit, si dhe drejtuesen e shkollës.

“Dua me këtë rast të falenderoj në mënyrë të vecantë zonjën Drita Gjongecaj për përkushtimin e palodhur, vizionin dhe lidershipin e saj. Falë saj dhe punës së kolegëve, por kuptohet edhe ju si familjarë, kjo shkollë është një shembull dhe një tempull i identitetit shqiptar këtu në zemër të Nju Jorkut.”

Më tej, Presidenti vazhdoi:

“Kur fëmijët tanë flasin shqip, ata nuk mësojnë vetëm gjuhën po mësojnë një pjesë të një populli që ka mbijetuar falë dashurisë ndaj atdheut, falë kulturës së tyre.

Të dashur fëmijë, ju jeni fëmijët e shqiponjës. Kudo që jeta do t’u cojë, mos harroni se shqiponjat fluturojnë shumë, shumë lart por shqiponja kurrë nuk e harron ku e ka folenë. Dhe ju sot jeni ata të cilët do të keni dy kultura, dy gjuhë dhe dy atdhe, Shqipërinë dhe Amerikën. Kjo është forca juaj për të ardhmen, kjo është pasuria juaj më e madhe dhe do t’u hapë dyert kudo në jetë.

Ju falenderoj shumë nga zemra që mbani gjallë gjuhën, traditat dhe vlerat tona. Uroj që kjo shkollë me dashurinë e përkushtimin e këtyre mësuesve, me dashurinë dhe përkushtimin tuaj si prindër do të vazhdojë të rritet, të frymëzojë dhe të udhëheqë jo vetëm këtë brez kaq të mirë që mëson por shumë e shumë breza të tjerë të cilët do të jetojnë në NY e më gjerë.”

Fjalën e Tij, Presidenti e mbylli duke vecuar me entuziazëm moton e Shkollës së Trashëgimisë Shqipe “Children of the Eagle”, moto të cilën kjo shkollë e mban si një mesazh të fuqishëm për gjeneratat e reja:

Shqip do flas e shqip do shkruaj,

Edhe pse jam ne dhe të huaj,

Gjuhë të nënës shqipen e kam,

Jam krenar që shqiptar jam!

Me interes e dashamirësi u prit edhe fjala e drejtoreshës së shkollës publike, Stefania Mustafa. Ndër të tjera, ajo tha: “Ky program është më shumë sesa mësimet që zhvillohen në fundjavë. Ky është një urë midis brezave, festim i trashëgimisë dhe një mundësi për nxënësit tanë që të përqafojnë gjuhën, traditën dhe vlerat e Shqipërisë ndërsa rriten këtu në qytetin e Nju Jorkut. Duke mësuar këngë, valle, histori dhe letërsi, fëmijët tanë jo vetëm që forcojnë kulturën e tyre shqipe, por edhe pasurojnë strukturën e larmishme të të gjithë komunitetit tonë shkollor.”

Ndërkohë, znj. Drita Gjongecaj, themeluese dhe drejtore e Shkollës “Children of the Eagle”, njëkohësisht zv/drejtore në një nga shkollat publike amerikane në NY, shprehu vlerësimin për vizitën e Presidentit dhe risolli në vemendjen e të pranishmve dy arritjet historike të muajve të fundit:

“Do të doja të rikujtoja vetëm dy arritje historike të komunitetit shqiptar në lidhje me gjuhën shqipe këtë vit. Kjo jo vetëm si iniciatore dhe hartusese e propozimit për programin dygjuhësor (Dual Language) por edhe për faktin se të dy këto arritje shënuan institucionalizimin e shqipes në metropolin e madh, duke i dhënë asaj vendin e respektuar në një sistem prej rreth 1 milion studentësh të arsimit parauniversitar.

Njëra arritje është hapja e klasës dygjuhësore shqip-anglisht për herë të parë jo vetëm në NY por edhe në botën mbarë në modelin e dyanshëm të mësimit të gjuhës. Natyrisht qëllimi dhe puna do të përqëndrohen në shtrirjen e programit në shkolla dhe lagje (boroughs) të tjera në Qytetin gjigand të Nju Jorkut.

Arritja e dytë, në rrang më të gjerë se sa programet shkollore, është ajo që gjuha shqipe është miratuar si gjuhë zyrtare e komunikimeve të Bordit Arsimor të Shkollave Publike në NY.”

Znj. Gjongecaj e mbylli fjalën e saj me premtimin se puna e pandërprerë dhe e përkushtuar e mësuesve të Shkollës së Trashëgimisë Shqipe “Children of the Eagle” do bëjë të mundur që këta nxënës të jenë ambasadorë të vendit tonë kudo që shkelin. Për më tepër, me zotërimin e dy gjuhëve dhe formimin si qytetarë globalë, ata do mund të përfaqësojnë vendin e prejardhjes edhe jashtë Amerikës dhe pse jo, në rolin e mirëfilltë të Ambasadorit në Amerikë, Evropë apo diku tjetër.”

Një grup nxënësish përshëndetën dhe falënderuan Presidentin për vizitën dhe librat e dhuruar, duke treguar me fjalë të thjeshta pse ata duan të mësojnë shqip. Programi u pasurua me recitime nga nxënësit Niko, Fatjon dhe Joana ndërsa fëmijët valëvitnin flamujt e vegjël kuqezi.

Me një gjest simbolik, Presidentit iu dhurua bluza e shkollës me emrat e të gjithë nxënësve. Në një atmosferë të ngrohtë e të afërt, Ai u ul mes fëmijëve, bëri fotografi me ta dhe i përgëzoi për dëshirën dhe përpjekjet që tregojnë në mësimin e gjuhës së prejardhjes. Rradhët e gjata të prindërve dhe fëmijëve për të fiksuar një kujtim pranë Presidentit treguan emocionin dhe rëndësinë e këtij takimi të ngrohtë.

Kjo vizitë do të mbetet gjatë në kujtesën e komunitetit shqiptar në Bronx, si një dëshmi e lidhjes së fortë mes Shqipërisë dhe bijve të saj në mërgatë, por edhe si një shtysë e re për fëmijët që të rriten krenarë për origjinën e tyre dhe të formohen si qytetarë globalë, të gatshëm të kontribuojnë si në vendin ku jetojnë, ashtu edhe në atdheun e tyre.

Drita Gjongecaj/

Më 8 qershor Shkolla Shqipe “Children of the Eagle” festoi përfundimin e vitit shkollor me një piknik të mrekullueshëm në natyrë! Nën qiellin e kthjellët të Parkut Ridge Road të Westchester County, me muzikë shqiptare, valle, lojëra krijuese, sporte, ushqime tradicionale dhe buzëqeshje të pafundme, stafi i kësaj shkolle tregoi edhe një herë sa bukur është të ruash identitetin duke bashkëjetuar me kulturat e tjera në një qytet shumëngjyrësh si Nju Jorku.

Nxënës dhe prindër, miq dhe kolegë nga Shoqata dhe Shkolla Shqipe “Skenderbej” i dhanë një ngjyrë të vecantë aktivitetit tashmë tradicional të cdo fundviti shkollor nën drejtimin e Organizatës Dy-Gjuhësore AADLC. Një ditë e mbushur me kuptim, ku pjesëmarrësit e kthyen parkun në një skenë të gjallë të kulturës shqiptare dhe bashkëjetesës në metropolin shumëkulturor, Nju Jork.

Gjatë gjithë ditës u zhvilluan aktivitete që i afruan pjesëmarrësit me njëri-tjetrin: lojëra krijuese dhe sportive për fëmijët, ndeshje emocionuese nxënës – mësues në vollejboll, vizatime të figurave të preferuara në fytyrat e ëmbla të fëmijëve (face painting), muzikë e valle tradicionale shqiptare, si dhe një tryezë plot me ushqime tradicionale të përgatitura me dashuri.

Pikniku nuk ishte vetëm një festë përmbyllëse, por një dëshmi e fuqishme e asaj që na bashkon si komunitet në kontinentin e largët: dëshira për të ruajtur identitetin tonë kulturor, për të ndërtuar ura mirëkuptimi mes brezash, dhe për të kontribuar në një shoqëri të hapur, të larmishme e të bashkuar.

Një falënderim nga zemra për të gjithë pjesëmarrësit, për komunitetin që na mbështet dhe sidomos për mësuesit tanë vullnetarë, që me pasion e përkushtim i japin jetë misionit tonë.

Një falenderim i veçantë edhe për miqtë dhe kolegët nga Shoqata partnere Skenderbej që e bënë edhe më domethënës këtë aktivitet.

Mezi presim të mblidhemi sërish me akoma më shumë nxënës në shtator për të mbajtur gjallë gjuhën dhe kulturën tonë në diasporë. Sfida dhe projekte të reja na presin

Nga Arjeta Ferlushkaj Kotrri/

Me 2 mars, 2024, në orën 6:30, në “Royal Regency” në Yonkers, NY, u mbajt nje mbrëmje Gala me rastin e 10-vjetorit të organizatës “Albanian-American Dual Language and Culture” (AADLC) si dhe shkollës shqipe “Children of The Eagle”. Organizatorë të kësaj ngjarjeje kulturore ishin vetë organizata AADLC dhe shkolla “Children of The Eagle”, me në krye themeluesen dhe drejtuesen e saj, znj. Drita Gjongecaj. Ky aktivitet është menduar të bëhet edhe në kuadër të Ditës Ndërkombëtare të Gjuhëm Amtare, e cila tradicionalisht është festuar çdo vit nga AADLC-ja dhe shkolla “Children of The Eagle”.

E ftuar nderi në këtë mbrëmjë festive ishte znj. Emina Çunmulaj Nazarian, ish-modele me famë botërore, filantropiste dhe Konsulle Nderi e Republikës së Shqipërisë në Florida. Nderuan me pjesëmarrjen e tyre figura shumë të njohura e të suksesshme nga komuniteti shqiptar në SHBA, si: z. Mark Gjonaj, kryetar i Këshillit Koordinues të Diasporës dhe ish-këshilltar i Bashkisë së NY; znj. Emiljana Ulaj, e zgjedhur në vitin 2023 ligjvënëse në Westchester County; znj. Violeta Berisha, kryetare e Bashkisë në Fairview, NJ si dhe fotografi i mirënjohur z. Fadil Berisha. Gjithashtu, nderuan me pjesëmarrjen e tyre edhe ish-presidentja e Kosovës znj. Ahtifete Jahjaga dhe znj. Remzije Istrefi-Peci, gjyqtare në Gjykatën Kushtetuese.

Mbrëmjen e hapi moderatorja e aktivitetit znjsh.Kristinë Saliasi, ish-mësuese e shkollës “Children of The Eagle”, e cila përshendeti të pranishmit dhe në mënyrë të veçantë të ftuarit e nderit. Znjsh. Saliasi i falenderoi të pranishmit për pjesëmarrjen, të gjithë mësuesit dhe fëmijët që kanë punuar për këtë event dhe ftoi të gjithë të pranishmit të ngriheshin në këmbë në nderim të dy himneve: amerikan dhe shqiptar, ku himni shqiptar u performua nga këngëtarët Dionis Delia dhe Argjend Lloga.

Më pas, fjala iu dha znj. Drita Gjongecaj, themeluese dhe drejtuese e AADLC-së dhe e shkollës “Children of The Eagle”. Znj. Gjongecaj falendëroi të pranishmit që zgjodhën të kalonin këtë natë festive së bashku, duke qenë se muaji shkurt dhe mars janë muaj të ngarkuar në komunitetin shqiptar në SHBA. Ndër të tjera, zonja Gjongecaj tha: “Kur e filluam këtë rrugëtim, nuk e menduam se do të vinim deri këtu, me këto rezultate që na bëjnë krenarë. Ne kemi mësues që janë të licensuar në shkollat publike të New York-ut dhe ky grup mësuesish, me pasionin dhe përkushtimin e tyre, iu vunë punës që të trashëgojnë tek brezat e rinj gjuhën dhe kulturën shqiptare në shërbim të ruajtjes së identitetit tonë”. Znj. Gjongecaj i falenderoi prindërit e nxënësve, pa ndihmën e të cilëve nuk do të bëheshin shumë hapa para. Ajo përmendi edhe rëndësinë që ka mësimi i gjuhës shqipe për fëmijët shqiptaro-amerikanë, jo vetëm në aspektin personal por edhe profesional, duke i parë ata si kandidatë të kualifikuar për ambasadorë të SHBA-ve në Shqipëri, etj. Zonja Gjongecaj tha se përveç punës me fëmijët, shkolla dhe organizata që ajo drejton i ka kushtuar dhe i kushton vëmendje edhe kualifikimit të mësuesve, në mënyrë që mësimi të zhvillohet me metoda bashkëkohore dhe me standarde të larta.

Më pas, znj. Gjondrecaj e ftoi zonjën Emina Çunmulaj Nazarian për fjalën e saj të rastit. E ftuara e nderit, znj. Çunmulaj falenderoi znj. Gjongecaj për ftesën dhe më pas përshëndeti të ftuarit, duke iu drejtuar me fjalë zemre: “Ju ndoshta mund të dini për karrierën time në fushën e modës por sot mund të më ndiqni në rrjete sociale edhe për angazhimet e mia në komunitet po ashtu edhe si nënë e tre fëmijëve, të cilët të tre flasin gjuhës e nënës, gjuhën shqipe”. Znj. Emina la porosinë që të mos harrojmë se çfarë duhet të lëmë tek fëmijët tonë mbrapa, sepse “ajo kulturë që ne e përcjellim tek fëmijët tanë, shpresojmë që edhe ata pastaj ta transmetojnë tek fëmijët e tyre. Zonja Çunmulaj shprehu falendërimet për znj. Ahtifete Jahjaga, ish-presidente e Kosovës, për punën e palodhur ndaj komunitetit shqiptar dhe për praninë e saj në këtë event. Ajo gjithashtu nuk kishte si të mos falenderonte edhe mikun e saj të vjetër, fotografin e mirëjohur z. Fadil Berisha. Pjesë e falenderimeve të saj ishin edhe z. Mark Gjonaj, znj. Violeta Berisha, znj. Remzie Istrefi, etj.

Më pas fjala iu dha z. Mark Gjonaj, kryetar i Këshillit Koordinativ të Diasporës, i cili pasi përshëndeti të pranishmit, falenderoi znj. Gjongecaj për punën që bën në mbajtjen gjallë të gjuhës dhe kulturës shqiptare dhe për edukimin e fëmijëvë tanë. Z. Gjonaj përshëndeti dhe kërkoi nderim për të gjitha gratë që kanë role të rëndësishme në shërbim të komunitetit si dhe të gjithë mësuesit. Ai gjithashtu falëndëroi edhe prindërit që iu mundësojnë fëmijëve të ndjekin mësimet në gjuhën shqipe.

Mbas përshëndetjeve të rastit, të pranishmit patën mundësinë të ndjekin një koreografi të ideuar nga vetë stafi organizativ dhe performuar nga nxënësit e shkollës “Children of The Eagle” nën tingujt e këngës “Thrret Prizreni mori Shkodër”, kënduar nga Barbana Dini.

Një tjetër moment i këtij aktiviteti ishte edhe vlerësimi dhe mirënjohja për mbështetësit e vazhdueshëm të AADLC-së dhe shkollës “Children of The Eagle” në këtë rrugëtim 10-vjeçar, vlerësim që kishte si motivacion: “Për kontributin dhe lidershipin e AADLC në shërbim të ruajtjes së gjuhës e kulturës amtare”.

U vlerësuan me këtë mirënjohje individë dhe organizata: “Albanian American Women’s Organization Motrat Qiriazi” (AAWOMQ), çmim i cili u terhoq nga znj. Beti Beno, kryetare e shoqatës, e cila u shpreh: “Në emrin tim dhe të bordit drejtues të organizatës, ju shpreh mirënjohjen dhe falenderimin për AADLC-në dhe shkollën “Children of The Eagle” për të gjithë punën e bërë në misionin fisnik të mësimit të gjuhës shqipe dhe ruajtjen e identitetit kombëtar shqiptar në diasporë. Edhe pse mijëra kilometra larg mëmëdheut, vogëlushët shqiptarë mësojnë falë jush gjuhën e bukur shqipe, historinë e lashtë të popullit shqiptar si dhe kulturën dhe traditat tona të mrekullueshme”. Z. Pashko Camaj tërhoqi vlerësimin në emër të Federatës “Vatra” dhe u shpreh: “I nderuari, nderon, kështu që faleminderit znj. Drita për mirënjohjen. Puna që bëni ju është pikërisht ajo që ka si mision edhe “Vatra”, pra ruajtja e vlerave tona kombëtare dhe traditat tona që mos t’i lëmë te jenë vetëm një relike”. Z. Adem Belliu, i cili tërhoqi vlerësimin për “Albanian Culture TV”, u shpreh: “Ju përgëzoj për këtë organizim profesional dhe faleminderit për vlerësimin. Ne si TV do të jemi gjithnjë afër jush”. Z. Tony Musaj tërhoqi vlerësimin për organizatën “Open Hand Association”. Dy vlerësimet e fundit ishin për anëtaret e Bordit Drejtues të AADLC-së: znj. Marjana Bulku Zeneli dhe znj. Arjeta Ferlushkaj Kotrri. Zonja Bulku, u shpreh: “Ndjehem e lumtur që “Children of The Eagle”, nga një projekt i shumë viteve më parë, sot është një realitet që ka sjellë shumë vlera në komunitetin shqiptaro-amerikan dhe e ka rritur intelektualizmin patriotik në diasporë; e dyta, ndihem e nderuar që Drita, mikja ime e pazëvëndësueshme, më vlerëson, vlerësim që në fakt është i të gjithëve ju”. Znj. Arjeta Ferlushkaj Kotrri u shpreh shkurtimisht: “Shpresojmë që me punën tonë, kemi ditur dhe do të dijmë që të vijme tek zemrat e juaja, për të gjithë ju”.

Një segment tjetër interesant ishte edhe momenti kur nxënësit e shkollës “Children of The Eagle” recituan poezi për gjuhën shqipe, gjë që elektrizoi atmosferën në sallë.

Pjesë e këtij eventi ishte edhe vlerësimi i mësuesve të shkollës “Children of The Eagle”, përgjatë këtyre 10 viteve, me motivacionin: “Për kontributin në ruajtjen e kulturës dhe gjuhës shqipe te fëmijët e diasporës”. Vjosa Nikci, një nga mësueset e para të kësaj shkolle si dhe Cindy Sylaj, koordinatorja e parë e shkollës, përshëndetën të pranishmit dhe shprehën emocionet dhe mirënjohjen e tyre për vlerësimin e bërë. Mësuesit që morën çmimet e mirënjohjes ishin: Mirjana Lukic, Vjosa Mujaj Nikci, Cindy Sylaj, Hegland Doci, Saimira Bebja Ballabani, Blerim Gjocaj, Life Buzhiqi, Yllka Gashi, Merita Gosturani, Zetë Gjonbalaj, Shqipe Shabaj, Ornela Hasandocaj, Kristine Saliasi. Majlinda Tafaj dhe Ferzileta Gjika.

Gjithashtu, të gjithë anëtarët e Bordit Drejtues të AADLC-së dhe shkollës “Children of The Eagle” u vlerësuan me Proklamatë Nderuese nga Bordi i Legjislatorëve të Westchester County: Mirjana Lukic, dr. Azeta Kola, Marjana Bulku, Arjeta Ferlushkaj Kotrri dhe Hegland Doci.

Organizuesit kishin menduar edhe hedhjen e shortit (Raffle), nga ku u mbështet prej bizneseve shqiptare si: Brucaj Eyewear, Shoppingforluxury, Art by Eralda, Posh Beauty Boutique, Aurora Beauty Salon, Alba CPA Associates, Ana’s Bakery, prindërit e nxënëses Eva Byberi, etj. Në këtë short u dhurua edhe libri “The Old Bridge” nga autorja Arjeta Ferlushkaj si dhe tri vende për të ndjekur në verën e 2024 programin BALI (në Hunter College).

***

Organizata “Albanian American Dual Language and Culture” dhe shkolla shqipe “Children of The Eagle” me në krye znj. Drita Gjongecaj, ka si mision formimin e programeve gjithëpërfshirëse dy-gjuhësore për fëmijët me origjinë shqiptare në SHBA, me synimin që të sigurojë arritje të larta akademike edhe në shqip, edhe në anglisht. Bordi drejtues i saj përbëhet nga përfaqësues të kualifikuar në fushë të arsimit, letërsisë, kulturës, etj. Shkolla shqipe “Children of The Eagle”, fillimisht e ka ushtruar aktivitetin e saj vetëm në Bronz ndërsa tani është e shtrirë edhe në zonën e Westchester County, Eastchester dhe New Rochelle. Nxënësit e kësaj shkolle janë nga mosha 4 e deri 15 vjeç. Kjo organizatë, bashkë më shkollën e saj organizojnë dhe janë pjesë e aktiviteteve të ndryshme në komunitetin shqiptar në SHBA. Është bërë tashmë thuajse i përvitshëm edhe mbajtja e seminarit shkencor me temë: “Arritje dhe perspektiva të mësimit të gjuhës amtare në shkollat shqipe në diasporë”, tema e te cilit shërbeu si titull i librit të botuar nga kjo organizatë në shtator të vitit 2021 në New York.

AADLC dhe shkolla “Children of The Eagle” është vlerësuar me çmime nga Këshilli Bashkiak i NY City dhe Këshilltar, z. Mark Gjonaj, AAWO “Motrat Qiriazi”, nga Konsullata e Përgjithshme e Republikës së Kosovës në New York, nga Bordi i Ligjvënësve në Westchester County si dhe nga Festivali i Shkollave Shqipe në zonën e tri-shtetëshit New York-New Jersey-Connecticut.