Archives for February 2015

Pasojat e përmbytjes në Shqipëri

February 3, 2015 by dgreca

…Pasojat e përmbytjes janë edhe këto bagëti të ngordhura/
Përmbytjet e fundit në disa qarqe të vendit janë me pasoja të rënda në ekonomitë e vogla të fermerëve. Shumë bagëti nuk kanë mundur të shpëtohen as nga vetë banorët e as nga grupet e shpëtimit. Fotografia që shihni është marrë nga një fshat i Fierit…., ku dalja nga shtrati e Vjosës shkaktoi një përmbytje që siç thonë banorët kanë vite pa e parë. Ministria e Bujqësisë dhe kryeministri Rama kanë premtuar dëmshpërblim të të gjithë banorëve të prekur nga kjo katastrofë natyrore. Pritet që nesër të vijë një tjetër valë reshjesh të dendura, cka do ta përkeqësonte edhe më shumë situatën.

Komisioni Qendror i Zgjedhjeve”Shpërblen” Partitë Politike

February 3, 2015 by dgreca

Komisioni Qendror i Zgjedhjeve ka miratuar gjatë ditës së sotme fondet vjetore që do të marrin partitë politike për vitin 2015.
12 parti do të përfitojnë ndihmë financiare për këtë vit dhe është PS ajo që do të marrë shumën më të madhe plotë 73.676.617 lekë.
Partia Demokratike, si partia e dytë më e madhe në vend dhe më e madhja në opozitë do të përfitojë 57.179.867, ndërsa shuma më e vogël është për Aleancën Kuq e Zi me 3.166.667 lekë.
Vendimi i marrë sot nga KQZ është miratuar me shtatë vota pro.
Lista e partive politike të cilat përfitojnë nga shpërndarja e fondeve:
1- Partia Socialiste e Shqipërisë – 73.676.617 lekë
2- Partia Demokratike – 57.179.867
3- Lëvizja Socialiste për Integrim – 20.575.897 lekë
4- Partia Drejtësi, Integrim dhe Unitet – 7.518.047 lekë
5- Partia Republikane Shqiptare – 6.632.077 lekë
6- Partia Bashkimi për të Drejtat e Njeriut – 4.130.537 lekë
7- Partia Kristian Demokrate e Shqipërisë – 4.130.537 lekë
8- Fryma e Re Demokratike – 3.489.667 lekë
9- Partia Demokracia Sociale – 3.166.667 lekë
10- Partia Socialdemokrate – 3.166.667 lekë
11- Partia Demokristiane e Shqipërisë – 3.166.667 lekë
12- Aleanca Kuq e Zi – 3.166.667 lekë

“Në zemër të botës”, një libër për Nënë Terezën

February 3, 2015 by dgreca

Botohen shkrimet e nobelistes shqiptare, Nënë Tereza‏/
TIRANE,3 Shkurt/- “Në zemër të botës” është një portret i fuqishëm i njërës prej femrave më të dashura të të gjitha kohëve, i rrëfyer me fjalët e saj nëpërmjet një përzierjeje magjepsëse të përvojave ditore të jetës, lutjeve dhe mençurisë shpirtërore.
Para pak ditësh, doli nga shtypi libri “Në zemër të botës” , me autore Nënë Terezën.
Libri është i përbërë me shkrime të nobelistes shqiptare, të cilat janë shkruar dhe botuar nëpër gazeta dhe revista të ndryshme, ndërsa pas vdekjes së saj, këto shkrime janë mbledhur dhe janë botuar në libra të ndryshëm, njëri prej të cilëve është ky që sapo është botuar edhe në gjuhën shqipe.
“Në zemër të botës” është një portret i fuqishëm i njërës prej femrave më të dashura të të gjitha kohëve, i rrëfyer me fjalët e saj nëpërmjet një përzierjeje magjepsëse të përvojave ditore të jetës, lutjeve dhe mençurisë shpirtërore. Ndiqeni Nënë Terezën nëpër rrugët e Kalkutës, Romës dhe Nju Jorkut dhe dëgjojeni atë duke ofruar margaritarë të së vërtetës shpirtërore, aq të përshtatshme sot po aq sa në ditët kur filloi punën e saj para shtatëdhjetë vjetësh.
Me humor, dhembshuri dhe qartësi lirike, Nënë Tereza ndriçon të shenjtën në punët e brendshme të përditshme të jetës. “Në zemër të botës” bart dëshmi të padiskutueshme ndaj influencës së një shpirti tërësisht të përkushtuar – me një zemër të dashurisë – ndaj një jete të të shërbyerit.
Nëpërmjet këtij libri, Nënë Tereza do të ju frymëzojë t’i pushtoni të tjerët me dashuri dhe dhembshuri dhe të punoni së bashku për paqen botërore.
Botimi i librit është mbështetur financiarisht nga Drejtoria për Kulturë e Komunës së Prishtinës. Librin e botoi “Deon-AB”, kurse është përkthyer prej anglishtes nga Alfred Beka.
Nënë Tereza u bë e njohur në botë për punën e saj vetëmohuese me “më të varfrit e të varfërve” në Kalkutë të Indisë. E lindur në vitin 1910 në Shkup, tani kryeqytet i Maqedonisë, Nënë Tereza e filloi periudhën e rishtares në Indi në vitin 1928. Që nga krijimi në vitin 1950, urdhri i saj, Misionaret e Bamirësisë, ka hapur më shumë se 500 qendra nëpër botë për t’iu ndihmuar atyre që janë duke vdekur dhe varfanjakëve. Nënë Tereza ka qenë pranuese e shumë shpërblimeve humanitare më prestigjioze në botë, përfshirë Medaljen e Lirisë të Shteteve të Bashkuara, çmimin Albert Schweitzer të Kombeve të Bashkuara dhe çmimin Nobel për Paqe. Ajo vdiq në vitin 1997.(Kortezi a.gegvataj

EMRI I KRYEPESHKOPIT JANULLATOS, KANDIDAT PER PRESIDENT I GREQISE?!

February 3, 2015 by dgreca

Janullatos: Kam detyrë kishtare, nuk mund të marr poste politike
TIRANË, 3 Shkurt/-Kryepeshkopi i Kishës Ortodokse Autoqefale të Shqipërisë, Anastas Janullatos, ka deklaruar të martën se nuk do të pranojë propozimin për marrjen e një detyre politike, duke theksuar se ai e ka një detyrë kishtare.
Në një deklaratë për mediat, zëdhënësi i Kishës Ortodokse Autoqefale të Shqipërisë Thoma Dhima thekson: “Kryepiskopi i Tiranës, Durrësit dhe i gjithë Shqipërisë, Prof. Dr. Anastasi, i pyetur nga gazetarë të ndryshëm, si në Greqi ashtu edhe brenda vendit, lidhur me lajmet e përhapura gjerësisht mbi propozimin e tij për president të Greqisë, u përgjigj në mënyrë lakonike: “Hierarku orthodhoks ka një detyrë të caktuar kishtare. Ai nuk mund të marrë poste politike.”
Mediat shqiptare kanë bërë të ditur se Kryeministri i grek, Aleksis Cipras ka propozuar emrin e zotit Janullatos si President ri i Greqisë.

Qeveria e Kosovës shkarkon ministrin serb Jabllanovic

February 3, 2015 by dgreca

Jabllanoviq nuk e ka pranuar vendimin për shkarkimin e tij/
Qeveria e Kosovës ka shkarkuar nga detyra ministrin serbe Aleksandër Jabllanovic. Kjo është bërë e ditur në një konferencë për media nga Kryeministri Isa Mustafa. Mustafa ka thënë se Ministri për Kthim dhe Komunitete në qeverinë e Kosovës Jabllanovic nuk është më pjesë e kabinetit qeveritar, por nuk ka bërë me dije nëse e ka shkarkuar atë apo ka dhënë dorëheqje.
Ministri që përfaqëson komunitetin serb në Kosovë, u vu në qendër të tubimeve popullore në Kosovë pas fyerjeve që bëri në adresë të grave kosovare që protestuan disa javë më parë gjatë vizitës së kryeminsitrit serb në Kosovë, Aleksandar Vuçiç, duke i quajtur ato “egërsira”.
“Nga sot, ministri Jabllanoviç nuk bën më pjesë në kabinetin qeveritar”, ka deklaruar Mustafa.
Duke iu përgjigjur interesit të mediave, shefi i qeverisë ka prekur edhe çështjen tjetër të nxehtë, atë të ndërmarrjes së Trepçës. “Për pasurinë tonë nuk debatojmë me të tjerë”, ka thënë ai. Duke kaluar në problematika të tjera, për të cilat në javët e fundit ka pasur edhe protesta, Mustafa ka thënë se janë probleme të trashëguara të cilat kërkojnë kohë të zgjidhen.
“Ditët e fundit jemi ballafaquar me greva dhe protesta të ndryshme. Më duhet të them se nuk jemi në gjendje të përballojmë rritjen e pagave, duhen edhe 130 milionë euro në buxhet, të cilat nuk i kemi”, ka thënë Mustafa.
Ai ka shtuar se pagat në Kosovë nuk janë të ulëta krahasuar me vendet e tjera të rajonit, duke vënë në dukje se ato janë mbi mesataren e pagave në Ballkan, përkatësisht në sektorët e arsimit dhe shëndetësisë.
Jabllanoviq nuk e pranon vendimin për shkarkimin e tij
Prishtinë, 3 shkurt 2015 – Aleksandar Jabllanoviqi ka thënë se nuk e pranon vendimin e kryeministrit Isa Mustafa për shkarkimin e tij nga posti i ministrit dhe se gjatë ditëve në vijim do të shohin se si do të veprojë Lista Srpska.
Ai ka thënë se do të vazhdojë takimet me kryeministrin Isa Mustafa, duke thënë se shpreson se nesër nuk do të ketë protestë në Prishtinë.
“Gjatë ditëve në vijim do të shohim se si do të funksionojë koalicioni qeverisës i Listës Srpska me PDK-në dhe LDK-në”, tha ai për Klan Kosova.