Archives for January 2017

Haradinaj: Urime Presidentit të ri të SHBA-së, Donald Trump

January 20, 2017 by dgreca

Kryetari i AAK-së, Ramush Haradinaj, ka uruar presidentin amerikan Donald Trump permes ‘facebook’:-ut:Urime Presidentit të ri të SHBA-së, Donald Trump, urime Popullit Amerikan!
Falënderime për Presidentin e deritashëm Obama dhe Administratën e tij, për gjithë mbështetjen për Kosovën dhe popullin e saj për këto tetë vjet!
Jam i bindur se SHBA do të jenë partner strategjik i Kosovës edhe nën udhëheqjen e Presidentit Trump!

Unë me zemer sot isha në Washington, ani se me trup në Francë e në pritje të lirisë që nuk tjetërsohet.
Urime Amerikë!

Hoxhaj takon homologun në Paris: Franca partnere e Kosovës

January 20, 2017 by dgreca

-Është diskutuar edhe për rastin e ish Kryeministrit të Kosovës, Ramush Haradinaj/
PRISHTINË, 20 Janar 2017-Gazeta DIELLI-B.Jashari/ Ministri i Punëve të Jashtme të Kosovës, Enver Hoxhaj ka qëndruar sot në Paris ku është takuar me homologun e tij francez, Jean-Marc Ayrault, me të cilin kanë diskutuar për nevojën e thellimit të raporteve bilaterale sidomos në planin ekonomik.

Njoftimi i dërguar sonte nga Parisi i MPJ kosovare thekson se, në takimin mes dy ministrave është diskutuar edhe për rastin e ish Kryeministrit të Kosovës, Ramush Haradinaj dhe mbështetjen e Francës për lobim për njohje dhe anëtarësim në organizata ndërkombëtare. Hoxhaj ka thënë se së shpejti do të organizohet një forum i përbashkët ekonomik mes dy vendeve, ndërsa është shprehur optimist për lirimin e shpejtë të Haradinajt.

“Pata një takim shumë të mirë me ministrin e Jashtëm të Francës, Jean-Marc Ayrault, me të cilin biseduam si të lëvizim prej një bashkëpunimi të shkëlqyer politik në atë ekonomik. U pajtuam për një forum ekonomik të përbashkët që do të mbahet së shpejti. Franca do ta mbështesë Kosovën në shumë fusha, e veçmas në procesin e liberalizimit të vizave. Natyrisht që biseduam edhe për rastin e ndalimit të ish Kryeministrit Haradinaj. Jam optimist se ai do të lirohet së shpejti”, ka thënë Hoxhaj pas takimit.Kjo është vizita e parë zyrtare e Ministrit të Jashtëm të Kosovës për vitin 2017, ndërsa në ditët e ardhshme ai do të qëndrojë për një turne në Azi ku do të vizitojë disa disa shtete.

Serbia, faktor rrezikues i paqes në Ballkan

January 20, 2017 by dgreca

Në UBT, të premten u mbajt konferenca më titull “Paqendërtimi në Kosovë- Transformimi i kushteve të konfliktit për paqe të qëndrueshme”, në kuadër të secilës u promovua edhe libri i titulluar “Ndërtimi liberal i paqes”, i autorit Ramadan Ilazi.Në konferencë u trajtuan faktorët destabilizues dhe cenuesit kryesorë të procesit të paqendërtimit në Kosovë dhe më gjerë, me ç’rast panelistët u pajtuan se shteti i Serbisë është njëri ndër rrezikuesit e përhershëm të paqes në Ballkan.

Rektori i UBT-së, prof. dr Edmond Hajrizi tha se situata aktuale e krijuar në Kosovë e ka krijuar një pasiguri të madhe brenda instancave më të larta shtetërore, por edhe në popull.“Gjendja e krijuar e ka luhatur sigurinë e përgjithshme dhe ka shkundur rrënjët e paqes së brishtë në vendin tonë, të ndërtuar ndër vite”, tha Hajrizi.Duke folur për angazhimin e UBT-së në këtë fushë, ai theksoi se institucioni të cilin ai e drejton, po mundohet që përmes debateve dhe publikimeve të ndryshme, të ndikojë në vetëdijesimin dhe ndërgjegjësimin e gjeneratave të reja për zhvillimet aktuale.

“Organizimi i kësaj konference dhe promovimi i këtij libri, është rezultat i dëshirës për të gjeneruar dije dhe për të kontribuuar në ngritjen e vetëdijes së studentëve tanë për proceset e rëndësishme nëpër të cilat po kalon vendi ynë”.

Politologu, njëherësh edhe ligjërues në UBT, prof. dr Behlul Beqaj, duke numëruar faktorët potencial të rrezikimit të paqes, vlerësoi se Ballkani përbën një rrezik të përhershëm për shpërthimin e konflikteve të mundshme.

“Provokimet e Serbisë, BE-ja me standardet e saj të dyfishta, stigmatizimi i Kosovës si vend prodhues i radikalizmit islamik, dështimi i dialogut dhe niveli aktual i korrupsionit në vend, janë disa nga faktorët që kanë ndikuar në përkeqësimin e gjendjes”, vlerësoi Beqaj, për të shtuar se “institucionet duhet të insistojnë në zbatimin e plotë e marrëveshjeve të arritura në Bruksel, si dhe të diskutohen faktorët e paqes”.

Analistja dhe aktivistja e shoqërisë civile, Besa Luzha tha se mungesa e komunikimit dhe pamundësia e një jete të përbashkët mes kosovarëve dhe serbëve të Kosovës, si dhe mungesa e informacioneve për gjenezën e konfliktit ka bërë që sipas saj, secila palë të krijojë të vërteten e vet mbi bazat e diskursit të tyre nacionalist.

“Institucionet dhe qytetarët duhet të kenë njoftim të thuktë dhe objektiv mbi arsyet e konflikteve sepse vetëm atëherë krijohet mendimi kritik dhe e drejta objektive për të gjitha palët e përfshira në konflikt, e kjo mundësohet përmes procesit të njohjes dhe të pranimit”, potencoi Luzha.

Njohësi i fushës së paqendërtimit, njëherësh edhe autor i librit të botuar, Ramadan Ilazi vlerësoi se mungesa e procesit të ballafaqimit të mirëfilltë me të kaluarën do të jetë rrezikues i vazhdueshëm i procesit të vendosjes së paqes mes Kosovës dhe Serbisë.

“Qytetarët e Kosovës janë të ndrydhur mes kërkesës për drejtësi dhe nevojës për paqe, ndërkaq Serbia nuk është e gatshme për ballafaqim me të kaluarën e vet”, tha Ilazi, për të vijuar se “zgjidhja është tek realizimi i një konsensusi politik, por edhe popullor”

Duke folur për nevojën e botimit të një libri të tillë, i cili është i pari i këtij lloji në gjuhën shqipe, autori tha se libri “Ndërtimi liberal i paqes” është përmbledhje pedagogjike e debateve akademike dhe e literaturës mbi procesin e paqendërtimit.

“Ky libër është i dominuar nga doktrina liberale dhe duhet të shërbejë si udhërrëfyes i shumë debateve të studiuesve brenda vendit, pasi që aleanca liberale e garanton sigurinë e Kosovës”.

Përfaqësuesja e Qendrës Kosovare për Studime të Sigurisë (QKSS), Donika Emini theksoi se brenda instancave shtetërore mungon koordinimi mes institucioneve kyçe për ruajtjen dhe ndërtimin e paqes në vend.

“Mungesa e koordinimit mes Ministrisë së Punëve të Brendshme, FSK-së dhe Ministrisë së Punëve të Jashtme reflekton në mungesën e strategjisë dhe bashkërendimit të veprimeve mes tyre”, tha Emini, për të shtuar se zgjidhjen e sheh tek “koordinimi i brendshëm dhe hartimi i një udhërrëfyesi, sepse pa këto, Kosova nuk do ta ketë mundësi të ndërtojë paqe dhe as të anëtarësohet në BE”.Konferenca i mbylli punimet me një debat, i cili u orientua në gjetjen e mënyrave për shtrirjen e pushtetit në tërë vendin, në rreziqet e mundshme të një konflikti të armatosur mes Kosovës dhe Serbisë, në ndryshimin e politikës së jashtme të SHBA-së karshi Kosovës pas zgjedhjes së Trump-it për president, në shtrirjen e aktivitetit rus në Ballkan, në gjendjen e shqiptarëve nëpër shtetet e tjera etj.

Ambasada e SHBA-shqiptarëve: Mos harxhoni para e kohë për vizë turistike

January 20, 2017 by dgreca

Ambasada Amerikane u kërkon shtetasve shqiptarë përmes një postimi, të shpërndarë në rrjetet sociale dhe jo pa humor, që të mos harxhojnë para dhe energji të kota për një vizë turistike në SHBA. Ambasada thotë se, gjithçka që u duhet për të aplikuar për një vizë të tillë, është pasaporta juaj dhe fleta e konfirmimit e njohur si DS-160.
“Kam një këshillë me vlerë për ju këtë javë, siç do ta shikoni tek tregimi i mëposhtëm: unë nuk kam nevojë të shikoj dokumentet tuaja në intervistën për vizë turistike! Gjithçka më duhet nga ju është pasaporta juaj dhe fleta e konfirmimit të DS-160. . . dhe kaq!”, thuhet në postimin e Ambasadës. “Mos harxhoni kohë dhe para për të grumbulluar dokumente të cilat nuk do t’jua kërkoj. Përkundrazi, përdoreni atë kohë dhe paratë për të qerasur veten tuaj me një makiato dhe picë! :)”, mbyllet këshilla e Ambasadës Amerikane në Tiranë.

Raporti me të vërtetën raporti me rrugën e duhur

January 20, 2017 by dgreca

Nga Ilir Levonja/Tek ne ka filluar një debat i madh mbi votimin elektronik. Në gazeta. Në studio. Dhe si për shumë probleme të tjera. Ne vdesim të përmendim si pjesë të dijes. Si njohuri dhe sukses, vende të ndryshme nga bota. Amerika është parësorja. Modeli. E ku di unë se çfarë. Veç për një gjë shoh siguri ama… Kur thonë se, kur isha në vitin kaq apo aq. Në shtetet e bashkura. Aty votohej kështu e ashtu. Pse të mos e bëjmë edhe ne. Ja kështu voton Amerika etj. Pse të mos e bëjmë edhe ne ë?. Dhe bërtasin! Aq sa pas pak, ambjenti i debatit kthehet në një kuvli grerëzash. Dhe njerëzish që janë gati ta hanë njëri-tjetrin. Aq sa ato fjalët e atij prefekti të nderuar nga Tirana. Me të cilin ne kemi gjithë jetën që qeshim. Kur thotë se, kur zdryp katunaria m’qytet, atdheu osht’ m’rrezik. Mirëpo ky rreziku është bërë rutinë tashmë për ne. Një nromalitet. Madje një modë efikase për tu quajtur lojtar i fortë i politikës shqiptare.

Edhe pse është një theqafje me ndërgjegje të plotë. Prapë ne e bëjmë.
Pse të mos e bëjmë edhe ne, ë? Ja kështu voton Amerika!
Amerika modeli krahasues i politikës sonë.
Mirëpo shumë e shumë gjëra jo që nuk janë aspak ashtu. Dhe nga ana tjetër. Janë krejtësisht të pamundura për tu konceptuar, e jo më për tu pranuar në politikëbërjen tonë.
Dhe çfarë më habit me shumicë. Eshtë mundësia e refuzuar. Më saktë e injoruar qëllimisht. Hashiqare kur thotë njerëzia. E një bashkëpunimi institucional mes komunitetit shqiptar dhe shtetit të tyre. Tërësisë së institucioneve, me ata që jetojnë jashtë vendit.
Thjesht për të dëshmuar. Qoftë edhe në një studio televizive se votohet përshembull në Alaska të shteteve të bashkuara. Lërini ata t’ua tregojnë. Dhe jemi me fat që kemi shqiptarë nga të katër qoshet e kontinentit të madh. Lerini ata nga Texasi përshembull të të tregojnë se si votohet dhe proçedohet aty.
Shqiptarët e Amerikës, kudo që janë. Janë mirë informuar. Organizuar. Me shtyp e shoqata.Janë pjesëmarrës aktivë dhe votues. Si shtetas amerikan. Me të drejta të plota. Janë qytetarë të botës së madhe. Prisheni këtë kulturën se si bëhet atje, sesi veprohet. Pasi ne gjithçka mund të kemi, veç vullnetit të mirë për të bashkëpunuar me njëri-tjetrin. Nuk janë ligjet ato që bëjnë shtetet dhe njerëzit. Por anasjelltas…, janë njerëzit dhe vullneti i mirë i besimit reciprok në një garë që duhet respektuar.
Unë nuk e di se si votohet në New York. Edhe pse jetojë në Amerikë. Mund ta njoh si proçedurë thjesht për informacion. Por di me siguri se si votohet në shtetin e Floridës. Ku edhe jetojë e votojë prej vitesh. Po e përmend këtë pasi dëgjova e lexova në shtypin shqiptar. Mbi votimin elektronik këtu. Se si na vendosin përpara ca makinerive ku na del surrati, të dhënat gjenalogjike pasi vendosim gjishtin tek ekrani etj. E çfarë nuk dëgjova, e lexova. Dhe në fund, ajo gangrena shqiptare. Hë, pse nuk e bëjmë kështu, ë…? Ja kështu bëhet në Amerikë.
Po përmend votimin e fundit atë të nëntorit të vitit të kaluar, 2016. Zgjedhjet presidenciale. Këto që i fitoi Trump. Dhe që inagurohen sonte me paradën tradicionale në Washington DC.
Karta e rregjistruesit më vjen në shtëpi prej gati një muaj përpara. Një kartë e vogël që më tregon se jam qytetar zgjedhës. Dhe se dy javë përpara datës së caktuar. Kam mundësi të shkojë kur të dëshirojë të votojë. Madje mund ta bëj edhe nga shtëpia, online. Qëndrat e votimit janë hapur. Kjo për tu ofruar qytetarëve mundësinë, pasi pjesa dërrmuese e shtetasave bëjnë disa punë. Dhe shkuarja për të votuar, edhe detyrim moral, nuk është shkak për të pasur ditë pushimi. Ditë propogande që të votosh këtë apo për atë. Jo, jo, aspak. Thjesht, u paraqita para një komisioni, që veç të tjerave…, veç mirëseardhjen dhe qeshjen kishte në fytyrë. Paraqes patentën. Ndërkohë zotërinjtë më gjejnë emrin dhe shënojnë një kryq përbri. Më japin fletën e votimit. Shkoj tek dhoma që quhet privatllëk. Jo e fshehtë. Aty në fletë pas kandidatëve (dhe partive përkatëse) për president të vendit, janë një sërë emrash deri tek gjykatësit suprem. Ti zgjedh duke çekur në krye të emrit të kandidatëve. Ke kohën tënde. Pasi mbaron shkon tek kutia e votimit. E cila nuk është nga ato që hapet, apo nuk hapet. Por thjesht një skanues. Një makineri sa një fotokopje, ku ti vendos fletën përmbys. Pa e palosur. Ajo (makineria) e tërheq dhe në çast të thotë që vota jote u numërua dhe depozitua. Kaq… Kur del në derë, të ngjisin një rrethorkë në gjoks. Ku thuhet se unë votova.
Pra kështu votova. Kështu kam votuar prej vitesh. Nuk më kanë vendosur ndonjë makineri përpara. Dhe nuk kam shtypur gishtin.
Për të nxjerrë gjenalitet. Kaq.
Dhe rezultati ka dalë kur unë kam shkuar në shtëpi.
Jo si tek ne… ku komisione partiakësh e militantësh të helmosur, mbyllen me ditë të tëra… me javë të tëra për të nxjerr të vetmin trangull nga thesi me domate.
Mirëpo në Shqipërinë e ndryshimeve drastike. Që edhe as të kopjojë nuk di. Janë problem madhor makineritë. Sistemet mazhoritare a proporcionale. Ku 136 parti janë si metastaza për 3 milonë njerëz.
Ndërkohë në Amerikën ”model” të tyre. Janë vetëm dy edhe pse ata janë mbi 350 milionë banorë. Janë të gjitha problem. Dhe duan kohën e vet. Edhe pse kemi bërë ndryshime kampion kushtetute. Kemi bërë punë vullnetare me shumicë. Kemi tharë fusha pambarim kënetore në pak muaj. Prapë kur vjen puna tek vota, votimi apo sistemi i votimi, mënyra etj. Duhen vite, kohë e para.
Ndërkohë në Amerikën model, siç do ta shikoni edhe sonte. Në tavolinën kryesore të fituesit, është edhe konkurenti humbës. Pra Hilari Klinton. Gjë që në kulturën e demokracisë shqiptare është herezi. Një lloj barbarie midis hienave për një kockë pushtet.
Po nuk ke se çfarë i bën. Ne tashmë u mësuam. Ajo zhurma e grerëzave të sjell në pushtet. Të bën të fortë. Madje sa më shumë politikë të denonocimit karshi njëri-tjetrit. Prada, për pradën. Versaçi për versaçin. Rrezatim. Mirëpo në Amerikë, politikani i thotë popullit që, hiqe nga mendja se jemi ne ata që zgjidhim problemet tuaja. Përkundrazi, ne ua shtojmë ato. Janë fjalë kongresmeni. I tha Ben Garson. Një republikan me taban që humbi brenda drejtësisë së votës së shtetarëve në garën e zgjedhjeve të fundit. A i thotë njëri në politikën tonë? Asesi… Por ama tek ne vdesin për të bërë foto me ata. Si këto që mbeti duke postuar Meta dhe Hashim Thaçi. Apo si ky rasti i fundit fare. I Lulëzim Bashën me Ted Cruzin, senatorin e Teksasit. Me që ra fjala, Luli. Se e shoh edhe na statutin tënd. Ted Cruz nuk ka lindur në Teksas dhe rritur në Kanada. Por e kundërta. Ka lindur në Kanada dhe rritur në Teksas. Një detaj të cilin e shfrytëzoi edhe Trump duke i kujtuar kushtetutën. Se kush e ka të drejtën të zgjidhet president në Amerikë etj. Mirëpo kur bën politikë denononcuese me humbëse si Grida, edhe pse e markës Prada. Më vjen keq të them. Por shoh një PD që është më e dobët në opozitë se sa në qeverisje. Megjithëse kjo është një gangrenë e asaj mendësie, kulture apo standarte të demokracisë sonë. Në përgjithësi. Megjithatë, sonte shqiptarët duhen ta shohin inagurimin e presidentit të Amerikës. Ndofta më në fund do bëjnë vet dallimin se çfarë do të thotë ndërrim pushtetesh. Çfarë do të thotë burra shteti. Dhe çfarë qytetarë votues. Të cilët me të drejtë ndihen krenarë për zgjedhjet që bëjnë. Për vet fatin e tyre.

20 janar 2017