Archives for January 2017

Kosova 2017-Njihet stazhi i punës i viteve të ‘90-ta

January 3, 2017 by dgreca

-“Bujku”, gazeta e rezistencës së atyre viteve dhe e bashkëpunimeve të para të medias Kosovë-Shqipëri. “Këtu dhjetë vite ka mbajur të gjallë informimin e brendshëm në Kosovë”, vlerësonte Presidenti historik i Kosovës, Dr. Ibrahim Rugova/

unnamed unnamed-3 unnamed-2 unnamed-1

-“Në njohjen e përvojës së punës të viteve të ’90-ta do të përfshihen realisht të gjithë ata sektorë të cilët kanë punuar në kuadër të institucioneve të Republikës së Kosovës gjatë asaj kohe”, tha ministri i Punës dhe Mirëqenies Sociale, Arban Abrashi, i pyetur nga korrespondenti i Gazetës Dielli/

SPECIALE-Gazeta DIELLI nga korrespondenti në Kosovë Behlul JASHARI/

PRISHTINË, 3 Janar 2017/ Njohja e stazhit të punës për të gjithë që punuan në institucionet e Republikës së Kosovës në vitet e ’90-ta të shekullit të kaluar do jetë një nga angazhimet e Ministrisë së Punës dhe Mirëqenies Sociale në vitin 2017, deklaroi ministri Arban Abrashi.

“Në njohjen e përvojës së punës të viteve të ’90-ta do të përfshihen realisht të gjithë ata sektorë të cilët kanë punuar në kuadër të institucioneve të Republikës së Kosovës gjatë asaj kohe”, tha ministri Abrashi, i pyetur nga korrespondenti i Gazetës DIELLI, duke bërë të ditur se është filluar me arsimin e vazhdohet me shëndetësinë e sektorët e tjerë, përfshirë informimin.

Ministri Abrashi në konferencën e fundvitit për shtyp ka prezantuar të arriturat e Ministrisë së Punës dhe Mirëqenies Sociale të Qeverisë së Kosovës në vitin 2016.

“Janë identifikuar mbi 14 mijë vende të lira pune. Ka ndodhur kategorizimi i mbi 41 mijë shfrytëzuesve të pensionit kontributpagues që tani variojnë mes 158 euro minimale dhe 230 euro maksimale. Janë përkrahur mbi 26 mijë familje me ndihmë sociale, më gjithsej 107 mijë anëtarë. Kanë kaluar 4 ligje, përfshirë ligjin për veteranët”, ka theksuar, mes tjerash, ministri i Punës dhe Mirëqenies Sociale, Arban Abrashi.

Në vitet e 90-ta ishte një kohë e rëndë e okupimit serb, kur shqiptarët u dëbuan dhunshëm nga puna, shkollat, universiteti, nga të gjitha institucionet që kishte Kosova, por në organizimet e lëvizjes e luftës për liri, pavarësi e demokraci mbajtën edhe zgjedhje, zgjodhën edhe President, Kuvend e qeveri të Republikës, në shtëpitë e tyre i bënë institucionet e arsimit, shëndetësisë, kulturës e të tjera, mes të cilave ishte edhe gazeta e rezistencës “Bujku”, që sfidonte ndalimin e mbylljen e dhunëshme të gazetës tradicionale e të vetme të përditshme shqiptare në Kosovë, Rilindja.

Gazeta që e nxirrnin gazetarët e punëtorët e tjerë të Rilindjes, “me emrin ‘Bujku’, këtu dhjetë vite ka mbajur të gjallë informimin e brendshëm në Kosovë”, vlerësonte Presidenti historik i Kosovës, Dr. Ibrahim Rugova, median pjesë e institucioneve të Republikës. Presidenti Rugova në funddhjetorin 2002, në Rezidencën Presidenciale në Prishtinë në pritjen që më bëri si kryeredaktor i gazetës Rilindja, me ç’rast më dha edhe një nga intervistat ekskluzive, nga e cila e citova, shprehte edhe mbështetjen e fuqishme institucionale për gazetën simbol i traditës së informimit në Kosovë dhe të drejtën e punonjësve të saj.Për njohja e stazhit të viteve ’90 për punëtorët e gazetës “Bujku” – Rilindja, Ministrisë së Punës dhe Mirëqenies Sociale tashmë që në vitin e kaluar, në 20 tetor 2016, i janë dërguar listat e punëtorëve, ku janë të nënshkruar për rrogat që kanë marrë, ndërsa dëshmi janë edhe gazetat në arkiva dhe biblioteka.

“Derisa në Kosovë nxirrnim gazetën me emrin ‘Bujku’ në Perëndim -Zvicër dhe në Tiranë nxirrnim gazetën Rilindja, me ndihmë materiale fillestare nga qeveria e Kosovës në ekzil dhe gjatë gjithë kohës kemi paguar kontributet për Republikën e Kosovës – Fondin e 3 përqindëshit”, theksohet në aplikimin për njohjen e stazhit, që kam bërë si kryeredaktori i parë-themeluesi i gazetës së përditshme “Bujku”. Nga selia e kësaj gazete që nisi të dalë nga 18 janari 1991 e me të cilën u themeluan edhe bashkëpunimet e para të medias Kosovë-Shqipëri nisa raportimet edhe si korrespondent i Agjencisë shtetërore-zyrtare të lajmeve të Shqipërisë-ATSH, nga Prishtina, që para çerek shekulli-nga 24 maji 1992 i zgjedhjeve të para pluraliste kosovare, të zgjedhjes së Presidentit dhe Parlamentit të Republikës, e cila atëherë nuk u njoh ndërkombëtarisht, megjithatë ishte dhe njihej si deklarim i fuqishëm i vullnetit kombëtar, politik e demokratik.

KOMUNITET- NJOFTIM PER TË PAME,8 JANAR 2017

January 3, 2017 by dgreca

1-islam-mushkolaj Familja Mushkolaj në Nju Jork njofton Komunitetin shqiptar në SHBA, miqtë, shokët ,e dashamirët se ditën e Dielë me 8 Janar 2017, nga ora 10 AM deri në 4 PM në Royal Regency Hotel, në adresën 165 Tuckahoe Road, Yonkers, NY 10710, hapë të Pame, për burra dhe gra, për të dashurin e tyre , Islam Mushkolaj, i cili u nda nga jeta në Nju Jork me 10 dhjetor 2016 dhe u varros në vendlindje. I ndjeri pat lindë me 18 Mars 1950.

Të pikëlluar përjetë e krenarë që e patën: Bashkëshortja Hasimja, djemtë:Mentori, Frashëri,, Ibra, Vehbiu, Nuhiu me familje e kushërinj, nipat Gecaj e Krasniqi si dhe mbarë Familja Mushkolaj dhe farefisi në SHBA e Kosovë.

Telefoni i familjes Mushkolaj 1-914-522-2897

NATA E VITIT TE RI ME TRUPAT AMERIKANE NE VERI

January 2, 2017 by dgreca

NATA E VITIT TE RI ME TRUPAT AMERIKANE TË KFOR-IT NE KAMPIN NOTHING HILL NË VERI TË KOSOVËS/

PRISHTINE, 31 dhjetor 2016-Gazeta DIELLI/ Zëvendës komandanti i KFOR-it, gjeneral brigade Christian RIENER, kaloi natën e Vitit të Ri me trupat amerikane në Kampin Nothing Hill, në veri të Kosovës, në komunën e Leposaviqit.

Gjatë vizitës, zëvendës komandanti vizitoi kampin, u informua mbi aktivitetet aktuale dhe shprehu vlerësimin për nivelin e lartë të efikasitetit dhe angazhimit të ushtarëve të dislokuar në këtë bazë. Zëvendës komandanti pati mundësinë të flasë individualisht me trupat dhe të kuptojë perceptimet të tyre në prag të këtij Viti të Ri.

Njoftimi i derguar thekson se, shumë nga ushtarët amerikanë në Nothing Hill, të cilët shërbejnë në turin e parë të detyrës jashtë vendit, kanë arritur në nëntorin e kaluar dhe janë shumë të motivuar për të mbështetur popullatën lokale me punën e tyre të përditshme.

KFOR-i, me personelin e vet që shërben në këtë bazë operative e në baza rotacioni, ofron sigurinë në rajon.

Këto trupa të KFOR-it, duke përmbushur misionin e tyre çdo ditë të vitit, tregojnë përkushtimin e plotë edhe gjatë periudhave të festave, kur ata ndodhen larg nga vendet dhe familjet e tyre. Prania e tyre këtu është kontribut i vlefshëm të cilin KFOR-i e ofron për normalizimin e kushteve të jetesës në rajonin e Kosovës dhe për mirëqenien e të gjithë popullit të Kosovës./b.j/

NEW YEARS EVE WITH KFOR TROOPS IN CAMP NOTHING HILL

PRISTINA, 31^ST December 2016. DCOMKFOR, Brigadier General Christian RIENER, spent New Year’s Eve with the US troops in Camp Nothing Hill, North of Kosovo, in Leposavic Municipality.

During the visit, DCOMKFOR visited the camp, was updated on the current activities and expressed appreciation for the high level of efficiency and commitment of the soldiers currently deployed in this base. DCOMKFOR had the opportunity to speak to the troops individually and feel the pulse of their perceptions in this New Year ’s Eve.

Many of the US soldiers in Nothing Hill, paying the first tour of duty abroad, arrived last November and are highly motivated to support, with their daily work, the local population.

KFOR, with its personnel serving in this forward operating base on a rotational basis, ensures safety and security in the region.

These KFOR troops, fulfilling their mission every single day of the year, show full commitment even during holiday’s periods, when they are away from their Countries and families. Their presence here is the valuable contribution that KFOR gives to the normalisation of life conditions in the Kosovo region and for the well-being of all peoples of Kosovo.

Drejt përfundimit të privatizimit dhe likuidimit të ndërmarrjeve shoqërore

January 2, 2017 by dgreca

-Foto Gazeta DIELLI-Behlul Jashari: Bordi i Drejtorëve kryesuar nga Petrit Gashi dhe Menaxhmenti i drejtuar nga Ekrem Hajdari prezantojnë punën e rezultatet, planet dhe sfidat e Agjencisë Kosovare të Privatizimit/

-Në foto: Ministri i Financave në Qeverinë e Kosovës, Avdullah Hoti/

-Foto Gazeta DIELLI-Behlul Jashari: Ballina e numrit të fundit të gazetës tradicionale të Kosovës Rilindja – 30 dhjetor 2008Foto Gazeta DIELLI-Behlul Jashari: Pallati Rilindja në kryeqytetin e Kosovës, Prishtinë

—Kosova 2017-AKP me 14 objektiva kryesore…Rilindja pret zgjidhjen/

-Drejt përfundimit të privatizimit dhe likuidimit të ndërmarrjeve shoqërore/

-Bordi i Drejtorëve kryesuar nga Petrit Gashi dhe Menaxhmenti i drejtuar nga Ekrem Hajdari bënë prezantimin e punës dhe aktiviteteve të Agjencisë Kosovare të Privatizimit gjatë vitit 2016, ku theksuan edhe se çështjet e ngritura në objektivat e vitit 2017 janë përcaktuar që të jenë në përputhje me interesin e përgjithshëm të Kosovës për të përfunduar procesin e privatizimit dhe likuidimit të ndërmarrjeve shoqërore pa vonesa të mëtejme/

– Pritet zgjidhja edhe për gazetën tradicionale e historike të Kosovës Rilindja, e cila ka filluar të dalë në frymën e Konferencës së Bujanit, të mbajtur pikërisht para 73 vitesh, nga 31 dhjetor 1943 deri në 2 janar 1944, e me angazhimin e intelektualëve më të shquar të asaj kohe, me shkronja plumbi që u sollën me arka nga Tirana, është mbyllur detyrimisht para 15 vitesh me dëbim të kundërligjshëm e të padrejtë nga Pallati i saj në Prishtinë nga administrata e UNMIK-ut në 21 shkurt 2002/

-Në arsyetimin e kërkesës për privatizim që ka bërë kryeredaktori deri në numrin e fundit (tash edhe korrespondent në Kosovë i Gazetës Dielli në SHBA, organ i Federatës Mbarëshqiptare të Amerikës Vatra, e cila në 15 shkurt 2017 feston 108 vjetorin, më të herëshmes shqiptare në gjithë botën – përkrahëse e ridaljes së Rilindjes – gazetës së parë të përditëshme shqiptare në Kosovë), theksohet edhe se emri dhe tradita e gazetës Rilindja është një vlerë shumë e madhe, e krijuar gjatë mëse 70 viteve, është pasuri me vlerë më të madhe se e çdo pallati, dhe kjo duhet të vlerësohet edhe në procesin e privatizimit/

-I pyetur nga Gazeta DIELLI, Ministri i Financave të Kosovës, Avdullah Hoti: Me rastin e shpronësimit të aseteve të Agjencisë Kosovare të Privatizimit, Qeveria do kryejë të gjitha obligimet ndaj punëtorëve e kreditorëve/

SPECIALE – Gazeta DIELLI nga korrespondenti në Kosovë Behlul JASHARI

PRISHTINË, 2 Janar 2017/ Agjencia Kosovare e Privatizimit për vitin 2017 ka përcaktuar 14 objektiva kryesore, ndërkohë që ende nuk i ka shitur 1.764 asete të ndërmarrjeve shoqërore, ndërsa që nga qershori 2002 kur është themeluar, atëherë si Agjenci Kosovare e Mirëbesimit, ka nënshkruar 1.286 kontrata të shitjes së ndërmarrjeve të reja dhe të aseteve të ndërmarrjeve shoqërore në likuidim.

Ndër objektivat kryesore janë: Realizimi i gjithsej 12 valëve të shitjeve të aseteve përmes likuidimit; Identifikimi i aseteve të mbetura dhe përcaktimi se me çfarë metode mund të bëhet tjetërsimi i tyre; Vendosja e të gjitha ndërmarrjeve shoqërore në likuidim; Pagesat për kreditorët e ndërmarrjeve shoqërore në likuidim; Trajtimi i aseteve jashtë Kosovës.

Kjo u bë e ditur në një konferencë shtypi dhe pritje të fundvitit, ku Bordi i Drejtorëve kryesuar nga Petrit Gashi dhe Menaxhmenti i drejtuar nga Ekrem Hajdari bënë prezantimin e punës dhe aktiviteteve përmbledhëse të Agjencisë Kosovare të Privatizimit gjatë vitit 2016, ndërsa u theksua se çështjet e ngritura në objektivat e vitit 2017 janë përcaktuar që të jenë në përputhje me interesin e përgjithshëm të Kosovës për të përfunduar procesin e privatizimit dhe likuidimit të ndërmarrjeve shoqërore pa vonesa të mëtejme.

“Qeveria e Republikës së Kosovës e ka përfshirë edhe Agjencinë Kosovare të Privatizimit në Planin e veprimeve 2015-2018 për zbatimin e programit qeverisës. Qeveria ka paraparë dy masa kryesore lidhur me Agjencinë Kosovare të Privatizimit: Përmbylljen e procesit të privatizimit dhe likuidimit të ndërmarrjeve shoqërore dhe rishikimin e legjislacionit që rregullon funksionimin e Agjencisë për të siguruar llogaridhënie të rregullt dhe efikase”, u bë e ditur në konferencë.

Në përshpejtimin e procesit të privatizimit dhe likuidimit në periudhën e ardhëshme, Agjencia Kosovare e Privatizimit thekson se mbetet e zotuar në synimet e saj për të përmbushur mandatin ligjor për të shmangur pengesat dhe për të kontribuar në rritjen e ekonomisë së Kosovës, ndërsa

Ndër sfidat kryesore të periudhës së ardhëshme theksohen përfundimi i studimit të fizibilitetit për Trepçën, mungesa e bashkëpunimit me disa komuna në pjesën veriore të Kosovës,si dhe vonesat në trajtimin e lëndëve nga Dhoma e Posaçme e Gjykatës Supreme të Republikës së Kosovës dhe në gjykatat themelore.

Edhe pagesa e mjeteve nga qeveria e Kosovës për shpronësimet e vendosura në pronat shoqërore është ndër sfidat dhe angazhimet e ardhëshme, përfshirë vitin 2017.

“Që nga viti 2008, qeveria ende nuk ka paguar asnjë shpronësim për pronat shoqërore. Deri në 31 maj 2016 gjithësej janë marrë 699 vendime për shpronësime të pronave shoqërore. Në maj 2016 Agjencia Kosovare e Privatizimit i ka dërguar letër Ministrisë së Ambientit dhe Planifikimit Hapësinor me kërkesë per pagesë të këtyre shpronësimeve”, bën të ditur raporti i prezantuar.

Drejtuesit e Agjencisë Kosovare të Privatizimit theksuan se për asnjë ndërmarrje shoqërore nuk mund të mbyllet procesi i likuidimit pa i paguar fondet e shpronësimit, prej të cilave poashtu pritet të paguhet 20%-i për punëtorët e ndërmarrjeve shoqërore.

Në 23 majin e vitit 2014, pjesë e vendimeve të qeverisë së Kosovës ishte edhe vendimi përfundimtar i shpronësimit për interes publik të ngastrave kadastrale në të cilën ndodhen objektet e Ndërmarrjes Shoqërore Rilindja, e në këtë kuadër Pallati tash ndërtesë qeveritare, ku ishin ambientet e punës të gazetës tradicionale të Kosovës Rilindja. Zgjidhja edhe për këtë gazetë – Ndërmarrjen Shoqërore Gazetare Rilindja dhe të drejtat e punëtorve të saj do pasojë pagesën nga qeveria për shpronësimin dhe në angazhimet e Agjencisë Kosovare të Privatizimit kjo pritet në vitin 2017.

Gazeta e përditëshme tradicionale e Kosovës Rilindja ka nisë të dalë në Prizren para 72 vitesh, në 12 shkurt 1945. Gazeta historike e Kosovës Rilindja, e cila ka filluar të dalë në frymën e Konferencës së Bujanit, të mbajtur pikërisht para 73 vitesh, nga 31 dhjetor 1943 deri në 2 janar 1944, e me angazhimin e intelektualëve më të shquar të asaj kohe, me shkronja plumbi që u sollën me arka nga Tirana, është mbyllur detyrimisht para 15 vitesh me dëbim të kundërligjshëm e të padrejtë nga Pallati i saj në Prishtinë nga administrata e UNMIK-ut në 21 shkurt 2002. Pas kësaj date gazeta Rilindja ka dalë me numra protestues të jashtëzakonshëm, të kohëpaskohshëm.

Gazeta Rilindja, kronikë e zhvillimeve historike të Kosovës, pasi doli me botime speciale edhe për ngjarjen historike të shpalljes së pavarësisë në 17 shkurt 2008 dhe për njohjet ndërkombëtare që pasuan, ka përmbyllë daljet e mëse 40 numrave protestues para mëse 8 viteve, në 30 dhjetor 2008, me numrin e festës së Vitit të Ri 2009, me paralajmërimin në ballinë: “Duke besuar në sundimin e ligjit në shtetin e Kosovës presim që nga numri i ardhshëm Rilindja të dalë përditë”.

Për privatizimin e gazetës tradicionale të Kosovës, pa u ndërlidhur me objektin e saj të shpronësuar, është edhe shembulli i gazetave në rajon dhe në botë, që kishin statusin si të Rilindjes, e që janë privatizuar dhe kanë vazhduar të dalin, madje pa asnjë ndërprerje dhe në objektet ku kanë qenë.

Në arsyetimin e kërkesës për privatizim që ka bërë kryeredaktori deri në numrin e fundit (tash edhe korrespondent në Kosovë i Gazetës Dielli në SHBA, organ i Federatës Mbarëshqiptare të Amerikës Vatra, e cila në 15 shkurt 2017 feston 108 vjetorin, më të herëshmes shqiptare në gjithë botën – përkrahëse e ridaljes së Rilindjes – gazetës së parë të përditëshme shqiptare në Kosovë), theksohet edhe se emri dhe tradita e gazetës Rilindja është një vlerë shumë e madhe, e krijuar gjatë mëse 70 viteve, është pasuri me vlerë më të madhe se e çdo pallati, dhe kjo duhet të vlerësohet edhe në procesin e privatizimit.

“Dhe, ai që do ta blejë gazetën Rilindja dhe natyrisht do e nxjerrë këtë të përditshme historike dhe tradicionale të Kosovës do jetë pronar i një pasurie të madhe mediale kombëtare, do të jetë trashëgimtar i ligjshëm i firmës-emrit, traditës. Rilindja ishte, është dhe mbetet edhe si një shenjë identiteti”, theksohet në kërkesën drejtuar Agjencisë Kosovare të Privatizimit në 12 shkurt 2014.

Agjencia Kosovare e Privatizimit (AKP) vitin e kaluar 2016 e ka nisur me Bordin e Drejtorëve, të ri, të munguar në 2015-ën. Bordi i Drejtorëve të Agjencisë Kosovare të Privatizimit, në 31 dhjetor, pak orë para ardhjes së Vitit të Ri 2016, ka mbajtur mbledhjen e parë, konstituive, të udhëhequr nga Petrit Gashi, kryesues i Bordit. Për Agjencinë Kosovare të Privatizimit emërimi i Bordit të Drejtorëve të saj në fundin e seancës përmbyllëse të sesionit vjeshtor të Kuvendit të Kosovës dhe konstituimi i këtij Bordi në ditën e fundit të vitit 2015 ishte një ngjarje e rëndësishme dhe e pritur gjatë.

Në 19 maj 2016, Bordi i Drejtorëve i Agjencisë Kosovare të Privatizimit në mbledhjen e 75-të, me konsensus të plotë, emëroi Ekrem Hajdarin në pozitën e Drejtorit Menaxhues të AKP-së. Avni Jashari u emërua në pozitën e Zv/Drejtorit Menaxhues për Likuidim dhe Vabona Dibra Zv/Drejtoreshë për Shitje.

MINISTRI I FINANCAVE NË QEVERINË E KOSOVËS, AVDULLAH HOTI: NE DO KRYEJMË TË GJITHA OBLIGIMET NDAJ PUNËTORËVE E KREDITORËVE

Në një pyetje të korrespondentit në Prishtinë të Gazetës Dielli, ndërlidhur edhe me të ardhëmen e gazetës tradicionale të Kosovës Rilindja në procesin e privatizimit, ministri i Financave në Qeverinë e Kosovës, Avdullah Hoti tha se buxheti për shpronësime që ka bërë Qeveria për vitin 2017 është rritur për 5 milionë euro, nga 25 në 30 milonë dhe pagesa për shpronësimet varet nga prioritetet.

“Me rastin e shpronësimit të aseteve të Agjencisë Kosovare të Privatizimit ne paguajmë 20 përqindëshin për punëtorët dhe pjesa tjetër mbetet derisa të kryhen të gjitha kërkesat e kreditorëve të ndryshëm potencialë. Në momentin që kryhen ne si Qeveri kemi obligim të paguajmë diferencën. Por, mos të harrojmë që pronare e Agjencisë Kosovare të Privatizimit është qeveria e Kosovës. Ne kryejmë të gjitha obligimet ndaj punëtorëve, ndaj kreditorëve potencialë dhe mandaj diferenca vjen në buxhetin e Kosovës”, theksoi ministri i Financave, Avdullah Hoti.

Nishani: 2017, viti kur reforma duhet të fillojë të flasë

January 1, 2017 by dgreca

Mesazhi i urimit të Presidentit të Republikës SH.T.Z. Bujar Nishani me rastin e Vitit të Ri 2017/

1-presidenti-nishani-urimi-vitit-te-ri

Të dashur bashkëqytetarë,/

Të dashur bashkëkombas kudo ndodheni,/

Motra dhe vëllezër,/

Mirëmbrëma të gjithëve!/Erdhëm në fundin e një viti tjetër, që na mbledh me njëri-tjetrin në vatrat familjare, siç është traditë tashmë, në një mbrëmje të veçantë reflektimi, gëzimi, ëndërrimi për nesër.Kjo është festa e përbotshme e ndërrimit të viteve, e kapërcimit nga një fund në një fillim, e nisjes së re të gjithsecilit në rrugën e mrekullueshme të jetës, pavarësisht pengesave dhe vështirësive.Në këtë festë të madhe, në këtë botë të madhe, ne jemi Shqipëria, ne jemi shqiptarët, një popull jo shumë i madh në numër, por nga më të vjetrit, që ka lindur dhe dëshiron të jetë përgjithmonë pjesë e familjes euro-atlantike.Sonte është nata e miliona urimeve për një vit më të mirë, më të mbarë, më të begatë, për të gjithë shqiptarët në të katër anët e globit.

Motra dhe vëllezër,

Ndihem vërtet shumë i nderuar dhe i emocionuar pa dyshim dhe do të doja t’ju uroja një për një, në cilësinë e Presidentit të Republikës, në emër të shtetit shqiptar!

Në pamundësi, me lejoni të veçoj, apo më saktë, t’ju ftoj të bashkojmë urimin tonë të përbashkët, nga thellësia e shpirtit, për disa grupe apo individë që na ftojnë për kujdesje dhe solidaritet më shumë se të tjerët.Urimin e parë e kam për fëmijët, bukuria e shtëpive tona, shpresa e së ardhmes sonë: Gëzuar të gjithë fëmijëve të Shqipërisë, t’i kemi me jetë, të bukur, të shëndetshëm, të qeshur, të lumtur, plot dritë si e ardhmja që ëndërrojmë të ndërtojmë!Urimi ynë për një vit më të mirë dhe më të gëzueshëm shkon për ato familje që sot u mungojnë të afërmit e tyre, për jetimët, për fëmijët dhe familjet e të gjithë të rënëve në krye të detyrës.

Një urim të veçantë për të gjithë ata bashkatdhetarë, të cilët, për një arsye apo një tjetër, nuk janë pranë familjeve të tyre sonte, nuk festojnë në vatrat e ngrohta familjare. Kam parasysh të sëmurët në spitale. Kam parasysh të gjithë ata që kjo natë i gjen në krye të detyrës – mjekët, infermierët, forcat e rendit, punonjës të sektorëve të tjerë – duke qenë se vendi ka nevojë çdo çast për rend dhe shërbime.

Si gjithnjë le t’i japim rrugë urimit të veçantë, në emër të mbarë shqiptarëve, për forcat tona ushtarake në Afganistan dhe kudo tjetër ata shërbejnë e që mbajnë lart flamurin tonë kombëtar kuq e zi në përpjekjen e madhe botërore për paqe, rend, siguri e përparim.

Të gjithëve dua t’u them: të afërmit tuaj janë me ju sonte! Shqipëria është me ju, unë jam me ju. Gëzuar!

Motra dhe vëllezër,

Viti 2016 që po lëmë pas, veç vështirësive, ka shënuar edhe disa ngjarje historike për Shqipërinë dhe shqiptarët, që sonte i kujtojmë.

Dua ta filloj me një nga ngjarjet më gjithëpërfshirëse, siç ishte pjesëmarrja për herë të parë e ekipit tonë kombëtar të futbollit në Kampionatin Evropian, që u zhvillua në Francë. Ishte vërtet mbresëlënëse ajo që pamë në fushën e lojës dhe jashtë saj. Lojtarët e kombëtares dhe tifozeria jonë e jashtëzakonshme e transformuan muajin qershor në një muaj feste për të gjithë kombin duke i transmetuar mbarë globit fytyrën tonë të vërtetë, bukurinë e popullit shqiptar.

Më 22 korrik, Parlamenti i Republikës së Shqipërisë, miratoi konsensualisht Reformën Kushtetuese në Drejtësi, duke i hapur rrugë një ndryshimi thelbësor në sistemin tonë të drejtësisë, por dhe në tërësi marrëdhënieve mes tre pushteteve, atij Legjislativ, Ekzekutiv dhe Gjyqësor.

Viti 2017 duhet të jetë viti që kjo reformë të fillojë të flasë me vepra.

Më 4 shtator, u zhvillua në Vatikan ceremonia e Shenjtërimit të Nënë Terezës, kësaj gruaje të rrallë të njerëzimit, e cila i përkiste Shqipërisë nga gjaku dhe origjina.

Dy muaj më pas, më 5 nëntor, po në Vatikan, Papa Françesku, me urtësinë dhe lartësinë e misionit të tij të shenjtë, lumturoi 38 martirët e ekzekutuar gjatë regjimit komunist.

Këto janë ngjarje të mëdha për memorien tonë kolektive. Midis këtyre ngjarjeve kulmore ka plot ngjarje të tjera kuptimplotë që kanë shënuar vitin që po lëmë pas.

Të dashur bashkëqytetarë,

Hapja e Negociatave për anëtarësim do kish qenë një moment kulmor gëzimi në epilogun e këtij viti, e megjithatë ky vendim i Këshillit Evropian na ndërgjegjëson edhe më shumë se kemi ende shumë punë për të bërë dhe shumë sfida për t’u përballur.

Rezultatet konkrete me Reformën në Sistemin e Drejtësisë, në luftën ndaj krimit të organizuar dhe korrupsionit, në përmirësimin dhe qëndrueshmërinë e administratës shtetërore, në respektimin e të drejtave të njeriut, por mbi të gjitha, në garantimin e zgjedhjeve të lira dhe të ndershme përbëjnë sprovën tonë të madhe.

Zgjedhjet e 18 qershorit të ardhshëm përbëjnë një moment vendimtar për demokracinë tonë. Standardi i këtyre zgjedhjeve është kriteri kryesor për një mundësi që të shkojmë më përpara në përmirësimin e jetës sonë të përditshme. Shqiptarët meritojnë dhe presin t’u garantohen zgjedhje të lira dhe të ndershme, ndaj kam dhe një apel të sinqertë, mbi të gjitha për liderët politikë.

Është koha për një marrëveshje politike për zgjedhje të lira dhe të ndershme, është koha ta mbyllim një herë e përgjithmonë kapitullin e shitblerjes së votës, e kërcënimit të votuesit me bukën e përditshme;

Është koha të garojnë alternativat politike-ekonomike për t’i sigururar vendit një qeverisje më të mirë, për të rikthyer besimin tek politika, për të rikthyer shpresën tek qytetarët që vazhdojnë të largohen në masë.

Dua gjithashtu t’u përcjell një apel në cilësinë e Presidentit të Republikës të gjithë drejtuesve dhe përfaqësuesve të agjensive ligjzbatuese, Policisë së Shtetit, Prokurorisë, Shërbimeve Inteligjente, partnerëve tanë ndërkombëtarë, shoqërisë civile, për monitorimin e territorit të Republikës së Shqipërisë.

Viti 2016 është një njollë e zezë për sa i përket kultivimit dhe trafikimit të kanabisit në Shqipëri. Ky fenomen dhe mosluftimi i tij përbëjnë kërcënimin më të madh për të ardhmen e shoqërisë sonë.

Ndaj, si qytetar shqiptar, si prind, që dua ta shoh, sikurse të gjithë ju, të ardhmen e fëmijëve të mi në këtë vend, gjej rastin t’i jap sërish zë këtij shqetësimi dhe të sensibilizoj opinionin publik mbi kërcënimin real të këtij fenomeni, aq më tepër në këtë vit zgjedhor.

Vështirësitë ekonomike, problemet dhe dramat e qytetarëve le të jenë një apel i ri për vendimarrësit, për drejtuesit e institucioneve dhe për politikanët në veçanti për të bërë atë që presin shqiptarët prej tyre.

Urimi im është që Viti 2017 të shënojë një kthesë të fortë e pozitive në gjithë politikëbërjen në vend për të kapur kohën e humbur, për integrimin e vendit në Bashkimin Evropian, për mirëqenien, dinjitetin dhe sigurinë e gjithë qytetarëve.

Të dashur bashkëqytetarë,

Tani numërimi mbrapsht i minutave ka filluar. Të gjithë ju po bëheni gati të takoni gotat dhe të shkëmbeni përqafimet e momentit të ndërrimit të viteve.

Më lejoni t’ju uroj nga zemra të gjithëve: Gëzuar Vitin e Ri 2017!

Qoftë një vit i mbarë e i begatë për ju, familjen tuaj, të afërmit e miqtë tuaj, një vit i mbushur me më shumë dashuri, përkushtim dhe solidaritet në familjet tona, në shoqërinë tonë, në Shqipërinë tonë!

Zoti e bekoftë Shqipërinë dhe shqiptarët!

Gëzuar!