Archives for March 2018

Kukësi burra, Rama …ra

March 31, 2018 by dgreca

Nga Arben VATA/

Kuksianët rikthejnë me forcë lidhjen natyrale Kosovë – Shqipëri/

Ngjarje të tilla si ajo e Kukësit sot, normalisht që ngjallin emocione dhe debate të forta, kundërshtuese me njëra tjetrën. E para është dhuna. E vërteta është se dhuna nuk është mjeti normal për të zgjidhë problemet, por çfarë e zgjidh problemin me një qeveri të pa përgjegjshme, një qeveri anti kombëtare apo një diktaturë? Nëse nisemi me këtë logjikë, duhet të themi se protestat e dhjetorit 1990 në Shqipëri dhe ato të pranverës 1981, korrikut 1990 dhe kundërshtimi me armë kundër regjimit serb në Kosovë, ishin të dënueshme. Nëse kjo është logjika që funksionon për dikë, ta mbajë për vete. Kur thika shkon në palcë, nuk ka më vend për bisedime. Aq më tepër me një qeveri që nuk u konsultua aspak me qytetarët për këtë taksë të rëndë.

Së dyti, (dhe kësaj po i bie shumë shkurt), taksë për rrugën mund të kishte por kjo duhet të jetë e shumta 1 euro ndërsa më përpara kësaj duhet të jetë rregulluar sipas standardeve rruga e vjetër. Këto çështje janë sqaruar shumë këto ditë dhe nuk ka nevojë për mendimin tim krejt modest nga aspekti teknik dhe ekonomik i rrugës.

Se treti, protesta ishte e drejtë sepse synoi veç të tjerash të ndante Kosovën me Shqipërinë me një kufi ekonomik jo më në Morinë të Kukësit, por në Thirrë të Mirditës. Super-taksa është një barrë edhe për shqiptarët e Kosovës, të cilët për arsye ekonomike kryesisht vijnë dhe frekuentojnë plazhet e Shqipërisë.

Rama që bën demagogji me Presidentin e përbashkët dhe me teatër në zyrat e Vucic, nuk mund ti bëjë shërbim më të mirë serbëve sesa të kufizojë lëvizjen e shqiptarëve të Kosovës në drejtim të Shqipërisë. Në këto kushte, ata do të detyrohen që tregtinë dhe çdo shkëmbim tjetër ta zhvendosin gjithnjë e më shumë drejt Serbisë. Kjo është arsyeja që shumë nga protestuesit ishin edhe nga Kosova (por edhe nga Hasi dhe Tropoja).

Së katërti, kjo është një protestë personalisht kundër Rames, i cili vetëm pak ditë më parë ofendoi publikisht gjithë shqiptarët, në një fjalim konteksti i të cilit vinte në dyshim burrërinë e tyre. Gabimi i Rames është që e bëri këtë ofendim pikërisht në kohën kur Kukësi kishte paralajmëruar protesta kundër taksës së ndarjes së kombit.

Kukësi (dhe jo vetëm) ka burra o zotëri dhe këtë e ka treguar ndaj çdo padrejtësie që i është bërë në demokraci. Për ata që u kujtohet po sjell në vëmendje vitin 1993 kur banorët e kësaj zone hodhën në liqen forcat speciale nga Tirana. Luma ka hedhur në lumë 12 mijë serb, por Rama nuk e njeh mirë historinë.

Aty ku ka dhimbje, ka protestë, ka burra,kudo në Shqipëri. Aty ku ka dhimbje e thika nuk mban më, burrat ngrihen dhe diktatorët bien.

Merre seriozisht sinjalin e burrave të Kukësit, Tropojës dhe Kosovës. Nuk është protesta e një partie, por e një populli të cilit nuk mund ti hipësh më mbi kurriz.(FB)

***

Pronincim i Ministrit te Brendshem Xhafaj: Precedent jashtëzakonisht i rrezikshëm dhe antikushtetues

Ministri i Brendshëm Fatmir Xhafaj në një deklaratë për median e quan protestën e sotme në Rrugën e Kombit: “Një precedent jashtëzakonisht i rrezikshëm dhe antikushtetues.”

Xhafaj tha se policia shmangu realizimin e skenarëve më të rëndë kriminalë, për të cilën ishin të interesuar provokatorë të caktuar.Dhe nënvizon: Kush nxit dhunën e anarashinë do të marrë përgjigjen e merituar ligjore askush nuk mund të jetë mbi ligjin.Xhafaj tha se janë 12 efektivë të FNSh që janë lënduar lehtë ndërsa një efektiv është plagosur më rëndë dhe ndodhet nën kujdesin e mjekëve.

Ne përleshje individe me të shkuar kriminale

Ministri Xhafaj shtoi se mes protestuesve ka pasur dhe individe me të shkuar kriminale

Xhafaj: Manifestimi i presupozuar paqësor u kthye menjëherë në një sulm barbar kundër punonjësve të policisë së shtetit dhe kundër pasurisë publike e sasja private. Grupe individësh të papërgjegjshëm në përbërje të të cilëve në numër jo të vogël gjendeshin elementë me të shkuar të rëndë kriminale dhe persona të tjerë me rrezikshmëri të lartë shoqërore shfrytëzuan pabesisht të drejtën legjitime dhe paqësore të tubimit.

Shpreh gjithë mbështetjen dhe respektin për të gjithë ata qytetarë të një zone të dalluar për ndershëmëri, krenari e fisnikëri sikurse është zona e Kukësit të cilët u distancuan nga këta individë të papërgjegjshëm si edhe ndaj atyre që nxisin veç zjarrin dhe dhunën për interesa politike e nuk u bënë pjesë e atyre që pa asnjë shkak sulmuan egërsisht punonjësit e policisë së Shtetit dhe shkatërruan pasurinë publike e private.

12 efektive te lenduar, 1 rende

Xhafaj: Asnjë e drejtë e pretenduar nuk mundet të justifikojë, në asnjë kohë dhe në asnjë rrethanë, sulmin kundër punonjësve të Policisë së Shtetit dhe shkatërrimin e pronës. Janë lënduar 12 punonjës të FNSH-së nga gurët dhe sendet e forta të hedhura nga këta individë, ndërsa një punonjës policie është plagosur më rëndë dhe po merr ndihmën e nevojshme mjekësore në spital.

U shmangen skenare te renda kriminale
Fatmir Xhafaj: Vlerësoj gjakftohtësinë dhe profesionalizmin e treguar nga punonjësit e Policisë së Shtetit në situatën e ndodhur pak orë më parë, duke shmangur kështu realizimin e skenarëve më të rëndë kriminalë, për të cilën ishin të interesuar provokatorë të caktuar.

Thirrja per distancim

Xhafaj: Publikisht jap mbështetjen e policisë së shtetit për çafrë ajo bën për të mbrojtur jetën dhe pronën e kujtdo. Jam i keqardhur dhe ju kërkoj qytetarëve, partive politike, medias dhe komunitetit të biznesit të distancohen ndaj të gjithë atyre përfaqësuesve të partive politike që i kanë inkurajuar me nëj gjuhë nxitëse protestuesit për ushtrim dhune ndaj policisë dhe shkatërrim të pronës duke sjellë në vëmendje që ky është një precendent jashtëzakonisht i rrezikshëm dhe antikushtetues.
Ju bëj apel autoriteteve të qeverisjes vendore në Kukës të distancohen nga këto akte të dhunshme dhe të ushtrojnë ndikimin e tyre duke qenë bashkëpunues e në ndihmë të policisë së shtetit për të mundësuar normalitetin për levizjen e lirë të qindra qytetarëve dhe transportin e mallrave sot dhe në ditët në vijim . Në cilësinë e Ministrit të Brendshëm deklaroj se policia e shtetit në zbatim të ligjit do të ketë një përgjigje të ashpër.

Emri Dardan

March 31, 2018 by dgreca

Nga Astrit Lulushi/

Në Librin e Zanafillës thuhet se Dodanimi ishte bir i Javanit (një stërnip i Noas). Dodanimi është lidhur zakonisht me prejardhjen e njerëzve të ishullit të Rodosit. Dorëshkrimet hebraike japin shpjegime të ndryshme të shqiptimit Dodanimi, dhe thone se është ndoshta gabim i kopjuesit, pasi shkronjat hebraike R dhe D janë mjaft të ngjashme grafikisht. Në Kronikat 1: 7, ky emër shkruhet Dodanimi, ndërsa ne Septuagint(Të Shtatëdhjetët), Dodanimët konsiderohen të afërt me Helenët.
Në Targum Pseudo-Jonathan (një kapitull i Toras hebraike) përmendet vendi Dordania, dhe studiuesit sugjerojnë se ka lidhje me Dodonën në Epir dhe Dardaninë në Iliri.
Francezi Samuel Bochart, studiues me ndikim i shekullit 17, e lidh formën Dodanimi me emrin e lumit Rhones Rhodanus, që buron ne Alpet zvicerane dhe derdhet në Mesdhe; dy shekuj më vonë, teologu gjerman Franz Delitzsche e identifikoi figurën e Dodanimit me Dardanus të mitologjisë greke; ndërsa studiuesi britanik Joseph Mede, nga mesi i viteve 1600, e thoshte se Dodanim është i njëjtë me Dodonaeus, i cili e kishte vendin e shenjtë në Dodonë.
Egjiptologu britanik Kenneth Kitchen, më 1930, paraqiti dy etymologji të tjera të mundshme; se Dodanim rrjedh nga Dordanim, duke humbur shkronjën ‘r’. Dardanai ndodhet në një listë të emrave Hititë që luftuan kundër Ramesit II të Egjiptit në betejën e Kadeshit më 1275 pes, madje disa i lidhin ata me Dardanët e luftës së Trojës. Kitchen gjithashtu sugjeron se emri Dodanium mund të jetë një formë e ndryshuar e Danunim, një popull i lashtë i Lindjes së Afërme, përmendur në mbishkrimin Amarna, por origjina dhe identiteti e këtij emri, si, ku, dhe nga kush u zbulua mbetet për t’u vërtetuar, dhe deri atëhere shkencëtarët do të vazhdojnë ta shohin me dyshim.

Në një fjalor biblik të antikitetit nga një autor anonim në vitet 70 pes, thuhet se bijtë e Dodanimit janë Itheb, Beath dhe Fenek; ky i fundit udhëhoqi Jafetët në kohën e Kullës së Babelit.

Kosovë-Kuvendi miraton Ligj të rëndësishëm

March 31, 2018 by dgreca

-Ligji për ndryshimin dhe plotësimin e Ligjit për Agjencinë Kosovare të Privatizimit kaloi sot pas shqyrtimit të dytë në Kuvendin e Kosovës, pas miratimit në parim në 26 janar 2018. I rëndësishëm edhe për gazetën tradicionale të Kosovës Rilindja dhe punëtorët e saj, si dhe të shumë ndërmarrjeve tjera shoqërore/

-Në Kuvendin e Kosovës sot një zhvillim tjetër që u pa është kalimi i grupit parlamentar me 10 deputetë të Listës Serbe në opozitë. Në mbledhjen e djeshme të qeverisë së Kosovës, u pa largimi nga ajo i Listës Serbe me tre ministra, një prej të cilëve edhe zëvendëskryeministër/

1 Kuvend

Gazeta DIELLI nga korrespondenti në Kosovë Behlul Jashari/

PRISHTINË, 30 Mars 2018/ Një Ligj i rëndësishëm – për ndryshimin dhe plotësimin e Ligjit për Agjencinë Kosovare të Privatizimit kaloi sot pas shqyrtimit të dytë në Kuvendin e Kosovës, pas miratimit në parim në 26 janar 2018.

Ky projektligj, për shqyrtim të dytë, është futur në axhendë në 23 mars, me shumicë votash të Kuvendit, me propozim nga Komisioni parlamentar për Buxhet dhe Financa, në kooredinim paraprak me kryeparlamentarin e ministrin e Financave.

“Projektligji me ndryshimet e ofruara ka për qëllim lejimin e investimeve të mjeteve të fondit të privatizimit në letrat me vlerë të emetuara nga qeveria e Republikës së Kosovës”, ka theksuar qeveria në ditën e miratimit në 10 nëntor 2017 dhe procedimit në Kuvend.

Këtë e ka ritheksuar ministri i Financave, Bedri Hamza, edhe në seancën plenare të Kuvendit, duke prezantuar në shqyrtimin e parë Projektligjin për ndryshimin dhe plotësimin e Ligjit për Agjencinë Kosovare të Privatizimit.

“Mundësohet edhe transferimi i një pjese të mjeteve të privatizimit nga Agjencia Kosovare e Privatizimti për Fondin e Konsoliduar të Republikës së Kosovës. Këto mjete do të shfrytëzohen për zhvillimin ekonomik të Kosovës si dhe në projektet madhore me inters për qytetarët e vendit”, shtoi ai.

Përmes këtij Projektligji, ka vijuar ministri i Financave, synohet të krijohet edhe një mekanizëm për shpronësimin e pronave të ndërmarrjeve shoqërore që janë të nevojshme për sektorin publik.

“Nëpërmjet këtij mekanizmi qeveria e Kosovës si autoritet shpronësues do të paguajë vetëm 20 përqind të mjeteve financiare dedikuar për punëtorët përfitues të ndërmarrjeve shoqërore dhe tarifën administrative për Agjencinë Kosovare të Privatizimit, me kusht që mos të ketë konteste tjera”, theksoi ministri Hamza.

Në një konferencë shtypi të fundvitit, Agjencia Kosovare e Privatizimit 2017-tën e punës së saj e ka vlerësuar shumë të sukseshme dhe ka theksuar pritjet që të vazhdojë dinamikën e rritur edhe në vitin 2018.

Drejtori menaxhues i Agjencisë Kosovare të Privatizimit, Ekrem Hajdari dhe zëvendësdrejtori Menaxhues për Likuidim, Avni Jashari, janë shprehur se presin edhe më shumë mundësi për punë e rezultate me miratimin Kuvend të Projektligjit për ndryshimin dhe plotësimin e Ligjit për Agjencinë Kosovare të Privatizimit.

Edhe në Agjencisë Kosovare të Privatizimit kanë theksuar se Ligji i ndryshuar e plotësuar është i rëndësishëm edhe për pagesën e 20 përqindëshit për ish-punëtorët e ndërmarrjeve shoqërore, asetet e të cilave janë shpronësuar nga qeveria.

Që nga viti 2008, qeveria e Kosovës ende nuk ka paguar asnjë shpronësim për pronat shoqërore, ndërsa ka marrë më shumë se 700 vendime për shpronësime, mes të cilave të Pallatit 18 katësh në Prishtinë ku ishte gazeta tradicionale e Kosovës Rilindja, i cili është shëndrruar në objekt qeveritar, ndërsa 20 përqindëshi i vlerës duhet t’u shpërndahet punëtorëve të ndërmarrjeve që ishin në atë ndërtesë.

Një e drejtë tjëtër e ligjëshme është privatizimii i gazetës tradicionale të Kosovës dhe për këtë është edhe shembulli i gazetave në rajon dhe në botë, që kishin statusin si të Rilindjes, e që janë privatizuar dhe kanë vazhduar të dalin, madje pa asnjë ndërprerje dhe në objektet ku kanë qenë.

Gazeta e përditëshme tradicionale e Kosovës Rilindja ka nisë të dalë në Prizren para 73 vitesh, në 12 shkurt 1945. Gazeta historike e Kosovës Rilindja, e cila ka filluar të dalë në frymën e Konferencës së Bujanit e me anagzhimin e intelektualëve më të shquar të asaj kohe, me shkronja plumbi që u sollën me arka nga Tirana, është mbyllur detyrimisht para 16 vitesh me dëbim të kundërligjshëm e të padrejtë nga Pallati i saj nga administrata e UNMIK në 21 shkurt 2002. Pas kësaj date gazeta Rilindja ka dalë me numra protestues e specialë të jashtëzakonshëm, të kohëpaskohshëm.

Gazeta Rilindja, kronikë e zhvillimeve të Kosovës, pasi doli me botime speciale edhe për ngjarjen historike të shpalljes së pavarësisë në 17 Shkurt 2008 dhe për njohjet ndërkombëtare që pasuan, ka përmbyllë daljet e mëse 40 numrave protestues para gati 10 viteve, në 30 dhjetor 2008, me numrin e festës së Vitit të Ri 2009, me paralajmërimin në ballinë: “Duke besuar në sundimin e ligjit në shtetin e Kosovës presim që nga numri i ardhshëm Rilindja të dalë përditë”.

Kërkesa për privatizim-ridalje të gazetës tradicionale të Kosovës Rilindja i është bërë në vazhdimësi edhe Agjencisë Kosovare të Privatizimit, e cila është autoritet mbi ndërmarrjet shoqërore dhe është themeluar si një organ i pavarur publik, në bazë Ligjit të miratuar nga Kuvendi i Republikës së Kosovës, si pasardhëse e Agjencisë Kosovare të Mirëbesimit e themeluar nga Misioni i OKB i pas luftës në Kosovë, të përfunduar në qershorin e vitit 1999.

LISTA SERBE E LARGUAR NGA QEVERIA, OPOZITË NË KUVENDIN E KOSOVËS

Kuvendi i Kosovës me 13 pika në axhendë zhvilloi sot paradite punime të seancës plenare të nisur në 16 mars, e të vijuar në 23 mars, ndërsa pasdite nisi një seancë të re me 11 pika.Në Kuvendin e Kosovës një zhvillim tjetër që u pa është kalimi i grupit parlamentar me 10 deputetë të Listës Serbe në opozitë. Në mbledhjen e djeshme të qeverisë së Kosovës, që mori vendime për të 19 pikat e axhendës, u pa largimi nga ajo i Listës Serbe me tre ministra, një prej të cilëve edhe zëvendëskryeministër, i deklaruar pas arrestimit të hënën në veri të Mitrovicës të zyrtarit të qeverisë së Sebisë, Marko Gjuriç, që kishte kaluar kufirin jashtëligjshëm dhe pa respektuar marrëveshjet e dialogut Prishtinë-Beograd në Bruksel. Në mbledhjet e qeverisë së Kosovës kur mungojnë ministrat marrin pjesë zëvendësministrat.

Një nga 10 deputetët në grupin parlamentar të Listës Serbe është goran, i cili javën e kaluar, në 21 mars, në momentin e fundit shkoi në seancën e jashtëzakonshme të Kuvendit të Kosovës dhe votoi pro ratifikimit të marrëveshjes së demarkacionit me Malin e Zi duke siguruar edhe votën e 80 të duhur për ta kaluar me dy të tretat e parlamentit 120 anëtarësh, derisa 9 deputetët serbë të Listës nuk morën pjesë fare në seancë. Pro votoi edhe një nga 10 deputetët serbë, që është i Patisë Liberale Serbe, pa grup parlamentar.

Ky është një shembull se në demokraci, në Kosovë, edhe vendime të mëdha mund të merren edhe pa votat e deputetëve serbë të Listës Serbe.

Pro ratifikimit të marrëveshjes së demarkacionit votuan edhe të gjithë – të 27 deputetët e Lidhjes Demokratike të Kosovës – parti në opozitë.

Në 27 mars Lidhja Demokratike e Kosovës deklaroi se, “në asnjë rast nuk do të lejojë që deputetët e Listës Serbe ta përcaktojnë fatin politik të Kosovës”.

Deklarata u bë pas paralajmërimeve të Listës Serbe për dalje nga koalicioni qeverisës.

“Në këtë gjendje të re të krijuar, LDK-ja garanton qytetarët se veprimet e saj do të jenë të matura dhe, si gjithmonë, në përputhje me interesin nacional të Kosovës”, siguronte deklarata.

Përfundohej se, qëndrimet e lidershipit të LDK-së, edhe në ditët në vijim, do të jenë në dobi të përmirësimit të situatës dhe të kthimit të saj në favor të Kosovës.

Kalendar-Shkurt ’91- Rebelimi i Shkollës së Bashkuar të Oficerëve

March 31, 2018 by dgreca

Nga Kastriot Dervishi/

Kur ushtria del nga binarët e merret me punët e politikës, ky veprim quhet grusht shteti. Edhe në të shkollën që përgatiste oficerë, në shkurtin e vitit 1991 u demonstrua një veprim i afërt me grushtin e shtetit, por që nga presioni i qytetarëve të Tiranës nuk e kapërceu dot murin e rrethimit të kësaj shkolle. Kryeqyteti në atë kohë ishte në shumicë antikomunist.
Pas rrëzimit të shtatores së diktatorit, shkolla kaloi në gatishmëri nr.1. Të nesërmen, shefi i Shtabit të Ushtrisë i kërkoi mendim trupës pedagogjike dhe komanduese nëse ishin për mbrojtjen e shtatores së shkollës që mendohej të vendosej në sheshin e kryeqytetit.
Ngjarjet në këtë shkollë, si kërcënim ndaj demokracisë së re u zhvilluan më 21-23 shkurt 1991. Këto ngjarje hapën ciklin e shpërthimit enverist të fundit të shkurtit të zhvilluar në disa provinca të vendit. Kishte mbi 1 muaj që Ministria e Mbrojtjes, aparati ushtarak i Komitetit Qendror dhe krejt Dega e Sigurimit të Ushtrisë e Drejtorisë së Parë të Sigurimit të Shtetit ishin vendosur në shkollë.
Në mëngjes të datës 22 shkurt krijohet në Akademinë e Shtabit të Përgjithshëm komisioni për vendosjen e shtatores në qendër me ultimatume drejtuar forcave politike qeverise etj. Në orën 15.30 të kësaj dite nëpërmjet një mitingu të madh, nën vringëllimën e armëve e thirrjet “Shqipëri-Enver, jemi gati kurdoherë” e duke kënduar këngën “Enver Hoxha tungjatjeta”, u kërcënua në mbrojtje të emrit të diktatorit. Të gjithë folësit kërkuan rivendosjen e shtatores së diktatorit në shesh. Pas mitingut grupi u shtua edhe me ushtarakë nga shkollat e tjera ushtarake. Komisioni enverist kërkoi nëpërmjet një peticioni që “figura e Enver Hoxhës të vendoset menjëherë me anën e një referendumi mbarëpopullor dhe ajo të vlerësohet ashtu siç e do populli”.
Kundra grupit enverist kanë qenë pedagogët e shkollës që vlejnë të përmenden: Bujar Nishani, Hysen Arapi, Andrea Çupa, Bajram Hysa, Teuta Bubsi, Halil Hyseni dhe disa studentë, një grup i specifikuar si kundërshtarë edhe nga vetë autoritetet e Ministrisë së Mbrojtjes në atë kohë.
Në përfundim të këtyre ngjarjeve, u vranë një polic ushtar dhe 2 persona jashtë rrethimit të shkollës. U plagosën me armë zjarri 15 persona, një polic shërbimi në krye të detyrës, 10 persona jashtë rrethimit, 3 persona në banesat e tyre e 1 kalimtar. Të plagosur rëndë ishin 4 veta. Organet e punëve të brendshme ndaluan e kallëzuan në hetuesi 92 persona

Në foto mitingu i datës 22 shkurt 1991 në mbrojtje të figurës së diktatorit

Për pasqyrimin te “Dielli” i festimit të 73-vjetorit të shkollës “Skënderbej”

March 31, 2018 by dgreca

Thanas-Gjika Në gazetën “Dielli” online të datës 28-29 mars u botua shkrimi i zonjës Kozeta Zylo ku paqyrohej aktiviteti i shoqërisë së ushtarakëve shqiptaro-amerikanë që kanë mbaruar Shkollën e Mesme “Skënderbej”. Pati reagime nga z. Beqir Sina dhe disa kolegë, si dhe prej meje. Z. Dalip botoi në gazetë përgjigjen e tij, por jo dhe shkrimin tim, prandaj po kërkoj që të botohet edhe shkrimi im kritik ndaj këtij problemi.

* * *

Të gjithë e dijmë se “Shkolla e Mesme Skënderbej” bashkë me shkollat e tjera ushtarake si “Shkolla e Bashkuar Enver Hoxha”, “Shkolla e Lartë e Policisë dhe e Sigurimit”, kanë qenë inkubatorë ku rriteshin kuadrot e shtetit diktatorial. Gati të gjithë ata që mbaronin shkollën “Skënderbej” vijonin më tej studimet në “Shkollën e Bashkuar Enver Hoxha” dhe shumë prej tyre kryenin dhe “Shkollën e Partisë, ose “Shkollën e Sigurimit”. Pra është e qartë se ata shqiptaro-amerikanë që u mblodhën për të festuar 73-vjetorin e shkollës Skënderbej, nuk kishin qenë thjesht skënderbegas, por kuodro të lartë të Partisë shtet, që i shërbyen shtetit diktatorial për t’ia zgjatur jetën dhe nuk i shërbyen popullit për t’ia mbrojtur lirinë e vërtetë që i ishte shkelur.

Armiqtë i sajonte vetë Enver Hoxha për të na mbajtur nën terror e frikë. Dhe kur ai shpalli armiq e tradhëtarë dhe kuadro të lartë të ushtrisë si Ministrin e Mbrojtjes. Zv.Ministrat e tij dhe Shefin e Shtabit, të gjithë këta zotërinjtë që u mblodhën në festë, nuk dolën të mbronin kolegët e tyre, por si servilë të diktatorit i dënuan shokët e tyre “tradhëtarë”.

Të krijosh shoqëri dhe të festosh me mburrje për kohën e shërbimit nën diktaturë pa shprehur asnjë kritikë ndaj shërbimit servil nën diktaturë, do të thotë se nuk ke kuptuar se sistemi i diktaturës se proletariatit dështoi me turp, do të thotë të punosh për të ngjallur nostalgji për kohën e diktaturës, pra të ngjallësh nostalgji e respekt edhe për vetë diktatorin.

Krijimi i të tilla shoqërive bëhet në Shqipëri ku sundon Partia Socialiste, bija e Partisë së Punës, por këtu në SHBA kjo nismë më duket shumë e gabuar. Edhe më i gabuar është fakti që gazeta e shoqërisë “Vatra”, gazeta “Dielli”, t’i pasqyrojë e t’i përgëzojë të tilla ngjarje.

Z. Beqir Sina ka të drejtë që ngre zërin me alarm.

Ju z. Dalip më shkruani në e-mail dhe në gazetë se nuk u bë krim me botimin online të atij shkrimi, dhe se duhet të kemi parasysh se dhe z. Bujar Nishani ish Presidenti i R. SH, që ka dekoruar shoqërinë “Vatra” ka qenë skënderbegas, dhe se edhe z. Asllan Bushati ish nënkryetar i “Vatrës” ka dalë nga ajo shkollë. Por ju nuk duhet të harroni se këta ish skënderbegas kanë evoluar dhe e kanë kritikuar diktaturën dhe të kaluarën e tyre si kuadro të ushtrisë së shtetit diktatorial.

Unë në pvrgjigjen time me e-mail uk thashë se gazeta “Dielli” bëri krim që botoi online kronikën për festën që u organizua në komunitetin shqiptar këtu në SHBA. Unë thashë se botimi i atij shkrimi ishte një gabim që shpie drejt mbrojtjes dhe justifikimit të diktaturës komuniste. Të tilla ceremoni nuk janë gjë tjetër veçse veprime që ndihmojnë për mbajtjen gjallë të nostalgjisë ndaj diktaturës komuniste. Dhe tani, po them se të tilla veprime janë krime. Koha jonë kërkon të mbajmë qëndrim kritik ndaj jetës sonë nën diktaturë.

Nuk mund të mohoj faktin se midis këtyre festuesve, ashtu si dhe midis armatës së komunistëve dhe të ushtarakëve ka pasur njerëz të ndershëm, që u binte bretku duke punuar, por në tërësi Partia Komuniste, Ushtria Popullore dhe Sigurimi i Shtetit ishin armatat që i shërbenin sistemit diktatorial dhe diktatorit dhe jo lirisë dhe të mirës së Shqipërisë.

Vatra deri sot ka qene nje shoqeri atdhetare kulturore me synime te djathta politike dhe e tillë duhet të mbetet.

Asgjë nuk mund t’i justifikojë bashkëpunëtorët e sistemit shtypës diktatorial komunist.

Që të ecim përpara drejt Europës së Bashkuar duhet të mësojmë nga gjermanët: ta dënojmë krimin dhe ish shërbëtorët e regjimit komunist të ulin kokën e të punojnë pa pretenduar se punuan me nder për të mirën e atdheut. Ata punuan për të mirën e diktatorit, për t’ia zgjatur sundimin atij në dëm të popullit.

Kur të tillë njerëz nuk e kuptojnë gabimin dhe krimin që kanë bërë, ne duhet t’u tregojmë se janë në rrugë të gabuar dhe t’i ndihmojmë që të tërhiqen nga krijimi i të tilla organizatave dhe festimi i të tillë përvjetorëve që nuk ndihmojnë zhvillimin e demokracisë, por vetëm kthim koke me nostalgji nga e kaluara diktatoriale antidemokratike.