Archives for September 2019

VATRA, HOMAZHE PRANË ARKIVOLIT TË KRYEPESHKOPIT NIKON

September 5, 2019 by dgreca

VATRA, HOMAZHE PRANË ARKIVOLIT TË KRYEPESHKOPIT NIKON/

Gjatë ditës së djeshme, e Mërkurë 4 Shtator, një përfaqësi e Vatrës me Kryetarin Dritan Mishto, udhëtoi nga Nju Jorku në Boston për t’i shprehur ngushëllimet Familjes Liolin dhe besimtarëve Orthodoksë për kalimin në amshim të Kryepeshkopit NIKON.

Përfaqësuesit e Vatrës bënë homazhe në Katedralen e Shën Gjergjit, ku ishte vendosur arkivoli me trupin e pajetë të Kryepeshkopit.

Në emër të Vatrës Kryetari Mishtoi i shprehu ngushëllimet më të thella Kancelarit të Katedrales së Shën Gjergjit Imzot Arthur Liolin , vëllait Jim Liolin dhe të gjithë familjes së madhe Lolin. Kryetari Mishto tha se ikja e Kryepeshkop Nikon është një humbje e ndjeshme për besimtarët Orthodoksë por edhe për të gjithë komunitetin shqiptar.

Atë Arthur Liolin shprehu konsideratën për udhëtimin e Vatranëve nga Nju Jorku në Boston për t’u bërë pjesë e homazheve të Kryepeshkopit Nikon.

Pasi këtij informacioni me fotografi Dielli do të përcjellë korrespeondenca dhe Kroniak të zgjeruara rreth homazheve, meshes dhe ceremonise mortore. Redaktorja e sec. Anglisht të Diellit, Rafaela Prifti është duke e ndjekur ceremoninë nga mbremja e djeshme dhe gjatë ditës së sotme. Po ashtu korrespondenti ynë Fuat Memelli është duke përkatitur kronikën.

I pushoftë shpirti në Paqë Kryepeshkopit Nikon!

Per me shume foto shihni ne Facebook

Basha: Rrëzohet Farsa e 30 Qershorit

September 5, 2019 by dgreca

Basha: Raporti i OSBE/ODIHR rrëzoi farsën e 30 qershorit në çdo aspekt! Edhe i vetëm pa asnjë garë, Edi Rama zgjodhi krimin/

Kreu i opozitës, Lulzim Basha në një dalje për mediat deklaroi se, raporti i OSBE/ODIHR rrëzoi farsën e Edi Ramës për 30 qershorin.Basha theksoi se raporti tregoi se me Edi Ramën dhe këtë KQZ nuk mund të realizohen zgjedhje të lira dhe të ndershme. Ndër të tjera, Basha tha se, OSBE/ODIHR tregoi se 30 qershori ishte një process anti-ligjor dhe anti-kushtetues.

Deklarata e kryetarit Basha

Raporti tregon se 30 qershori ishte procesi më problematik dhe më i pandershëm i dy dekadave të fundit. Për herë të parë në historinë e pluralizmit politik, kemi një raport i cili nuk flet thjesht për parregullsi teknike, apo shkelje, por për krime të mirëfillta dhe veprime të qëllimshme antiligjore të të gjithë stukturës elektorale në vend, dhe për një shkatërrim të qëllimshëm të të drejtës së popullit për të zgjedhur.Praktikisht ky është një dokument, i cili më shumë se raport zgjedhor ngjan me një raport për një ngjarje kriminale. Ky është raport që realisht përmban prova dhe fakte për të filluar hetime kriminale ndaj një sërë personash dhe institucionesh.

Raporti i OSBE/ODIHR e ka rrëzuar farsën e 30 qershorit në çdo aspekt. Raporti tregon se 30 qershori ishte procesi më problematik dhe më i pandershëm i dy dekadave të fundit.Për herë të parë në historinë e pluralizmit politik, kemi një raport i cili nuk flet thjesht për parregullsi teknike, apo shkelje, por për krime të mirëfillta dhe veprime të qëllimshme antiligjore të të gjithë stukturës elektorale në vend, dhe për një shkatërrim të qëllimshëm të të drejtës së popullit për të zgjedhur.

Praktikisht ky është një dokument, i cili më shumë se raport zgjedhor ngjan me një raport për një ngjarje kriminale. Ky është raport që realisht përmban prova dhe fakte për të filluar hetime kriminale ndaj një sërë personash dhe institucionesh.Siç konfirmon raporti, nuk ka ligj, nga Kushtetuta deri tek vetë rregulloret e KQZ-së që të ketë mbetur pa u shkelur.

Nuk ka institucion zgjedhor që nga KQZ tek numëruesit dhe vëzhguesit që nuk ka shkelur ligjin.

Së pari, raporti konfirmon se votimet e 30 qershorit ishin antikushtetuese dhe u mbajtën në shkelje të dekreteve të Presidentit.

Së dyti raporti konfirmon se votimet e 30 qershorit nuk ishin zgjedhje dhe nuk patën asnjë lidhje me të drejtën e popullit për të zgjedhur përfaqësuesit dhe drejtuesit e pushtetit vendor. Ato ishin një farsë zgjedhore dhe tallje demonstrative me pluralizmin politik dhe dhe demokracinë përfaqësuese.

Basha: Së treti, për të realizuar këtë farsë antikushtetuese dhe një partiake u shkelën ligjet dhe standardet zgjedhore. Në mënyrë të veçantë nga KQZ i cili portretizohet më shumë si organ partiak se sa si institucion i pavarur dhe i paanshëm kushtetues.

I vetmi aspekt normal që ka gjetur raporti është që socialistët nuk janë rrahur me njëri-tjetrin në qendrat e votimit bosh.

Pa hyrë në detaje dhe konstatime të qarta, dua të theksoj dy përfundimet kryesore të raportit:

1. Votimet e 30 qershorit ishin antikushtetuese, të paligjshme dhe të pandershme.

2. Votimet e 30 qershorit ishin një farsë moniste dhe e përfaqësimit politik dhe shkatërrim i demokracisë.

Së treti, për të realizuar këtë farsë antikushtetuese dhe një partiake u shkelën ligjet dhe standardet zgjedhore. Në mënyrë të veçantë nga KQZ i cili portretizohet më shumë si organ partiak se sa si institucion i pavarur dhe i paanshëm kushtetues.

I vetmi aspekt normal që ka gjetur raporti është që socialistët nuk janë rrahur me njëri-tjetrin në qendrat e votimit bosh.

Pa hyrë në detaje dhe konstatime të qarta, dua të theksoj dy përfundimet kryesore të raportit:

1. Votimet e 30 qershorit ishin antikushtetuese, të paligjshme dhe të pandershme
2. Votimet e 30 qershorit ishin një farsë moniste dhe e përfaqësimit politik dhe shkatërrim i demokracisë

Basha: Edhe kur ishte i vetëm pa asnjë garë, Edi Rama zgjodhi krimin

Edhe kur ishte i vetëm pa asnjë konkurent, edhe kur vetë i kandidoi, vetë votoi, vetë numëroi dhe vetë certifikoi, ai vodhi, manipuloi dhe shkeli çdo standart.

Prandaj, 30 qershori vërtetoi edhe një herë atë që Partia Demorkatike ka thënë fuqishëm:

Me Edi Ramën nuk mund të ketë zgjedhje të lira dhe të ndershme. Edi Rama është armik i zgjedhjeve, i pluralizmit dhe demokracisë.

Por 30 qershori tregoi edhe një të vërtetë tjetër: As me këtë KQZ nuk mund të ketë zgjedhje të ndershme dhe të lira.

E thashë në fillim dhe po e them prapë:

Raporti i ODIHR është më shumë se raport zgjedhor. Ai nuk rrëzon vetëm votimet e 30 qershorit.

Raporti ka rrëzuar të gjithë shtetin e Edi Ramës.

Raporti nuk është vetëm autopsia e zgjedhjeve të vdekura të 30 qershorit

Raporti është autopsia e kufomës së shtetit të së drejtës, e qeverisë së popullit dhe drejtësisë, të cilat janë vrarë nga Edi Rama për t’i zëvendësuar ato me një shtet privat, autokratik, kriminal dhe personal.

Për këto arsye, 30 qershori ishte një grusht institucional për kapjen e pushtetit vendor nga Edi Rama. Ky grusht institucional u realizua sërish në bashkëpunim e krimin.

Ndonëse jo objekt i vlerësimit të Raportit, tashmë është një e vërtetë e njohur botërisht është se: Në mënyrë të qëllimshme, kapjen e pushtetit vendor Edi Rama e ka bërë në bashkëpunim me kriminelë.

Janë deri tani dy kandidatë për kryebashkiakë të vertetuar me të shkuar kriminale dhe priten të tjerë.

Për të kuptuar rëndësinë e këtij fakti duhet të kemi parasysh diçka: më 30 qershor nuk kishte asnjë konkurencë, nuk kishte asnjë garë. Edi Rama mund të emëronte këdo që dëshironte pa u shqetësuar se sa vota do të merrte. Por edhe në këto kushte zgjedhja e tij e natyrshme ishte krimi, ishin personat me rekorde kriminale.

Zgjedhjet e 30 Qershorit- Në një klimë ngërçi dhe polarizimi politik

September 5, 2019 by dgreca

OSBE/ODIHR nxjerr raportin përfundimtar të vëzhgimit mbi zgjedhjet e 30 qershorit në Shqipëri /*

OSBE/ODIHR deklaroi në raportin përfundimtar se zgjedhjet vendore të 30 qershorit në Shqipëri u mbajtën pa marrë shumë në konsideratë interesin e elektoratit.

Opozita vendosi të mos marrë pjesë, kurse qeveria u tregua e vendosur për t’i mbajtur zgjedhjet pa opozitën, thekson raporti.

“Në një klimë ngërçi dhe polarizimi politik, votuesit nuk e patën mundësinë të zgjidhnin mes disa opsioneve politike” – thuhet në raport.

Misioni i ODIHR-it për Vëzhgimit të Zgjedhjeve vlerësoi me këtë raport përfundimtar përputhjen e zgjedhjeve shqiptare me angazhimet e OSBE-së, detyrime dhe standarde të tjera ndërkombëtare për zgjedhje demokratike dhe me legjislacionin kombëtar.

Në gjysmat e bashkive kandidatët garuan pa kundërshtarë, ndërsa vëzhguesit morën pretendime të besueshme nga qytetarët për presione nga të dyja palët.

“Përplasjet politike çuan në pasiguri juridike dhe shumë vendime të administratës zgjedhore u morën duke pasur si objektiv mbajtjen e zgjedhjeve” – thuhet në raportin e ODIHR-it.

Vëzhguesit thanë se shumë rekomandime të mëparshme të ODIHR-it mbeten të paadresuara, duke përfshirë edhe depolitizimin e komisioneve zgjedhore, transparencën e financimit të fushatës dhe efiçencën e zgjidhjes së mosmarrëveshjeve zgjedhore.

“Ekuilibri politik i parashikuar me ligj brenda administratës zgjedhore nuk u arrit për shkak të refuzimit të partive kryesore opozitare për të emëruar komisionerët e tyre dhe interpretimit më pas të KQZ-së se vetëm ato parti që marrin pjesë në zgjedhje mund të përfaqësohen në administratën zgjedhore. Përbërja e paekuilibruar politikisht e administratës zgjedhore, thirrjet e partive opozitare ndaj zgjedhësve për të bojkotuar zgjedhjet dhe interpretimet kontradiktore të vlefshmërisë së dekreteve të Presidentit që anulonte zgjedhjet e 30 qershorit cenuan besimin e publikut te procesi” – theksoi raporti i ODIHR-it.

Vëzhguesit pohuan se gjuha e përdorur nga kundërshtarët politikë në tubime dhe në media ishte shpesh e ndezur dhe e mbushur me akuza dhe kundërakuza.

“Qytetarët, sidomos ata që punonin për administratën publike, u përballën me presione direkte dhe indirekte për të shfaqur preferencat e tyre politike” – theksoi raporti.

Vëzhguesit pohuan se fushata zgjedhore ishte e padukshme; përveç afishimeve për edukimin e zgjedhësve, ODIHR-it vuri re një numër të vogël posterash dhe shenjash të tjera që tregonin për zgjedhje të afërta.

“Shumë kandidatë i shprehën Misionit Vëzhgues të Zgjedhjeve së ODIHR-it vështirësinë për motivimin e zgjedhësve për të marrë pjesë në votim. Aktivitetet e kufizuara të fushatës mbetën në hije për shkak të zhvillimeve në shkallë vendi që i thelluan edhe më tej ndarjet e hershme politike. Debatet mbi një numër të madh temash politike u dominuan nga çështja e mospjesëmarrjes në zgjedhje të partive kryesore opozitare dhe nga diskutimet rreth datës së zgjedhjeve” – raporton ODIHR.

Raporti thotë se votimi më 30 qershor u krye pas një sërë njoftimesh nga shumica e bashkive të drejtuara nga opozita se zgjedhjet nuk do të zhvilloheshin.

“Disa kryetarë bashkish u përpoqën të përdorin kompetencat e tyre për të mos lejuar përdorimin e ndërtesave publike si qendra votimi. Në një numër të vogël qendrash votimi pati dëmtime nga zjarrvënia para ditës së zgjedhjeve” – theksoi ODIHR-i.

Sipas vëzhguesve ndërkombëtarë, dita e zgjedhjeve qe përgjithësisht paqësore, megjithë disa raste të izoluara tensionesh dhe përplasjesh në një numër të vogël komunitetesh.

“Pjesëmarrja në votim varionte nga një bashki në tjetrën, ndërkohë që në shkallë vendi, KQZ-ja deklaroi se ajo arriti 21.6 përqind” – thotë raporti.

OSBE/ODIHR pati rreth 250 vëzhgues në zgjedhjet vendore të 30 qershorit në Shqipëri, dhe raporti pritej me shumë interes nga publiku dhe partitë politike.

Kortezi-Zeri i Amerikes

A ishin të ligjshme zgjedhjet e 30 Qershorit?

September 5, 2019 by dgreca

DEBAT NË DISTANCË ME ZOTIN MATTHEWS PALMER/

Opinion nga Asllan Bushati/

I nderuar Zoti Palmer. Unë shtetasi amerikan (por edhe shqiptar Asllan Bushati), kam publikuar më 30 qershor të këtij viti, në faqen time ne fb dhe në disa organe te shtypit te shkruar shqiptar shkrimin me titull:”Shkëlqesisë (më mirë lartmadhërisë) së tij Metthews Palmer”. Shpresoj se do ta keni parë, por edhe në se jo, (me qenëse tashmë jeni emruar si përfaqësues special i DASH-së për Ballkanin perendimor), si vazhdim i shkrimit dëshiroj të debatoj me Ju publikisht për disa problem.

Tashmë që u bë publik raporti zyrtar i OSBE-ODIHR-it për zgjedhjet e 30 qershorit në Shqipëri, dëshiroj tju bëj disa pyetje?

Zhillimin e zgjedhjeve vendore të 30 qershorit në Shqipëri, pa opozitën a vazhdoni ti konsideroni akoma si një gjë normale apo jonormale?

Mos publikimin e Dekretit të Presidentit të Shqipërisë për zgjedhjet lokale në faqen zyrtare a vazhdoni ta konsideroni normale dhe të ligjëshme apo të pa ligjëshëm?

Gjykimin e Dekreteve të Presidentit nga KQZ-ja dhe Kolegji Zgjedhor (kur me Kushtetutë e ka vetëm Gjykata Kushtetuese), a mendoni se ishte e ligjëshme dhe e pranueshme për një shtet ligjor që aspiron ti bashkangjitet BE-së?

Mos respektimi i parimeve themelore demokratike, dhunimi i institucioneve, friksimi i administratës, rikëthimi në sistemin një partiak nga Qeveria e Edi Ramës: a kanë qenë e janë shqetësuese për Ju apo vazhdoni të mendoni se stabiliteti falls që teatron qeveria është më i rëndësishëm se demokracia funksionale që synon opozita ne Shqiperi?

SHBA-ja në radhë të parë, por edhe BE-ja, kanë investuar shumë mjete monetare dhe mundim për bërjen funksionale të reformës në drejtësi në Shqipëri .( Madje dukshëm ka patur synim për ta bërë atë shembull edhe për disa vende të ngjashme me të). Por tani që atje Gjykata Kushtetuese , Gjykata e Lartë, organet e drejtësisë dhe të prokurorisë mungojnë e nuk funksionojnë për një kohë të gjatë duke shkaktuar një kaos të vërtetë ligjor e institucional, e konsideroni normale apo anormale dhe Ju e vartësit tuaj në Ambasadën Amerikane në Tiranë dhe a ndjeni ndopak përgjegjesi për këtë?

Raporti OSBE-ODIHR-it hodhi dyshime të rënda mbi vetingun që është elementi më thelbsor i reformës në drejtësi, duke aluduar se gjyqtarët e prokurorët vepruan nën tutelën e vetingut e trysninë e Qeverisë Rama. Madje disa shkojnë edhe më larg duke e kunsideruar reformën ne drejtësi si “pushtimi Rama i drejtësisë”. Ju pajtoheni apo e kundërshtoni këtë qëndrim të OSBE-së?

Kryeministri i Shqipërise Edi Rama pas publikimit të raportit të OSBS-së deklaroi se “përpjekja për të ngritur një furtunë në gotë mbi Raportin e OSBE/ODHIR-it është e kotë, e gabuar dhe e dëmshme për vendin,e në radhë të parë për opozitën joparlamentare! Raporti ka çertifikuar zgjedhjet si krejt legjitime e ka dhënë rekomandime në shërbim të reformës që na duhet!”. Ju Zoti Palmer e konsideroni se është normale dhe e qënësishme kjo deklaratë?

Ne gjykimin tim, OSBE-ODIHR, i rrëzoi zgjedhjet e 30 qershorit në Shqipëri,( në një kohë që Ju kishit deklaruar se do ti njihni ato edhe pa pjesmarrjen e opozitës). Në këtë situatë të re pas zgjedhore Ju do të vazhdoni ti njihni ato, apo jeni në një linjë me OSBE-në?

Në se pajtoheni me OSBE-në a do të keni kurajon ti ftoni shqiptarët të dalin në zgjedhjet vendore më 13 tetor sic është paraparë në Dekretin e Presidentit?. Kaq pyetje kisha?

Shqiptarët, kanë qenë, janë e do të jenë më dashamirët e amerikanëve në botë , sepse kanë arsye thelbësore e të qënësishme për një gjë të tillë.Individë të ndryshëm (në të dy vendet ) mund të lozin ndonjë rol në lartësimin apo ngadalësimin e mardhënieve, por ai është i përkohshëm. Miqësia midis popullit amerikan e shqiptar është e përjetëshme. Ajo nuk lidhet me gjëra të vogla si për shembull ku jetoj unë dhe ku jetoni ju, apo nëse unë jam dhëndër në Korcë e ju në Beograd.

PEDAGOGU, VEPRIMTARI DHE ATDHETARI I DEVOTSHËM QË MBETET I PËRJETËSUAR

September 5, 2019 by dgreca

NË VEND TË HOMAZHIT PËR VETERANIN E ARSIMI SHQIP, VEPRIMTARIN MIKEL VESELI (1940-2019) /

Shkruan: Mikel GOJANI /

Këtë fillimshtator, në Ceneriket të SHBA-ve, u shua nga jeta, pedagogu shumëvjeçar, veprimtari dhe atdhetari , Mikel Veseli, duke lënë një zbrazëtirë të pakompensueshme për familjen e tij, për të afërmit, miqtë, komunitetin e diasporës shqiptare në Amerikë etj.

“Kur vdes mësuesi, shkollën e kaplon heshtja”, shprehet një rilindës yni. Mësuesit janë gjithmonë si yjet, ata ndriçojnë atëherë kur është më se e nevojshme. Të tillë ishin mësuesit shqiptarë, të cilët me misionin e tyre prej iluministësh ndriçuan në ato periudha dhe rrethana, kur pushtuesit synonin që t’i pllakosnin rrezet e dritës, ndërsa përmes arsimit mësuesit përpiqeshin që ta davarisnin errësirën dhe të ndritnin mendjen e popullit tonë. I tillë ishte edhe mësuesi Mikel Veseli, i cili me punën e tij të gjatë në arsim, për dekada me radhë edukoi breza të tërë shkollaresh, si në shkollën e vendlindjes në Budisalc, po ashtu edhe në shkollën e Zllakuqanit.

Mikel Veseli u lind në vitin 1940 në Budisalc nga babai Gjoni dhe nëna Marqe. Rrjedh nga një familje tradicionale, bujare, përparimtare dhe atdhetare. Rrethanat e kohës familjes se tij i sollën vështirësi për jetës, por asnjëherë nuk u gjunjëzuan dhe as nuk u nënshtruan. U lind e kohën kur prindërit e tij me skamje, por me vullnet të fortë e me punë krahu mbanin familjen. Tani familja drejtoi shikimin kah ardhmëria babai dhe dy vëllezërit e mëdhenj, Lleshi dhe Zefi, punonin për të mbajtur familjen duke shkolluar dy vëllezërit e tyre Mikelin dhe Miroshin.

Mikeli Veseli, shkollën fillore e kreu në vendlindje, në fshatin Budisalc, të komunës së Klinës, më pastaj ka kryer shkollën normale. Pas kryerjes së normales, në vitin 1962 filloi punën si mësues në shkollën fillore ish – “Boro Millatoviq”, tash “Atë Shtjefën Gjeçovi” në Zllakuqan të Klinës, ku për një kohë punët dhe detyrat e punës të zëvendësdrejtorit të kësaj shkolle. Në këtë shkollë punoi deri në vitin 1982, duke vazhduar punën e mësuesisë në shkollën fillore “Liria” të vendlindjes, pra në Budisalc, ku punoi deri në vitin 1988. Në këtë vit migroi në Amerikë, përkatësisht në Cenericet, ku jetoi deri në fundin e jetës së tij.

Gjatë këtyre viteve të jetës së tij në Amerikë, përpos mbajtjes së familjes, ishte i orientuar për të kontribuar edhe në angazhimet që zhvillonte komuniteti i diasporës shqiptare në Amerikë për të ndihmuar në çlirimin e Kosovës dhe të popullit të saj nga okupatori. Angazhimin e tij kryesisht e zhvilloi në kuadër të LDK-së, por edhe në kuadër të institucioneve dhe asociacioneve tjera që kanë vepruar dhe veprojnë ë në Amerikë.

E digjte malli për vendlindjen dhe atdheun e tij. Edhe pse jetonte në këtë vend të largët të Amerikës, shpirtin gjithherë e dërgonte atje, në vendlindje, në atdheun e tij, të cilin aq shumë e deshi deri në frymën e fundit të jetës, duke punuar dhe angazhuar pa kursyer asgjë nga vetja.

Pra, mësuesi dhe veprimtari, Mikel Veseli, kishte atribute të larta të një njeriu, sepse rridhte prej një familje me tradita fisnike. Këto atribute ai i sublimoi edhe në orientimin e tij pedagogjik, në punën me nxënës mbëltoi dituri dhe virtyte, duke i dhënë kuptimin e mirëfilltë një profesioni fisnik siç është natyra e arsimit. Gjatë punës në arsim, rezultohet se mësuesi Mikel Veseli rrezatonte vlera njerëzore, profesionale, pedagogjike dhe kombëtare. Këtë e dëshmojnë, të gjithë ata nxënës që patën rastin dhe nderin që të kenë për mësues një korife të arsimit siç ishte Mikel Veseli.

Për nga dukja dhe tiparet e tij krijohej përshtypja sikur mësuesi Mikel kishte ardhur në këtë botë me të gjitha komponentët që e shquajnë figurën e një mësuesi. Pamja e tij të nxiste kureshtjen që ta vështrojë dhe jo vetëm ta vështrojë, por të mbërthente në mendime prej të cilave vështirë që mund të largoheshe pa e dhënë një përkufizim për figurën e tij. Si i ri, isha kureshtar të ndalesha te figura e tij, të fiziku i përmasave mesatare të këtij personaliteti të veçantë.

Në fillimvitet e ’80 (80-82), pata fatin që ta kem koleg në shkollën fillore të Zllakuqanit. Në këtë shkollë ai kishte punuar qysh në fundvitet e 60 dhe ishte formësuar si një pedagog që shquhej dhe dallohej me metodën e tij tepër të veçantë prej një edukatori. Kishte një takt tepër të veçantë me nxënësit. Ishte i afërt dhe shumë komunikativ edhe me kolegët dhe prindërit. Për karakterin dhe angazhimin e tij prej një pedagogu të vyer, pata mësuar edhe nga ish-kolegët e tij, të cilët kishin punuar edhe më herët më mësuesin Mikel. Ata flisnin me admirimin më të madh dhe shprehnin respektin më të thellë. Nxori gjenerata të tëra brezash shkollarësh, që më vonë u bën shumë të zotë në profesione të ndryshme, doktorë, juristë, ekonomistë, inxhinierë etj. Edhe sot pas kaq shumë vitesh ata i janë mirënjohës për kontributin dhe gjithçka çfarë ky pedagog kishte dhënë për t’u ndihmuar në rrugën e jetës. Për ish-nxënësit e tij, mësuesi Mikel ishte shndërruar shembull frymëzuesi dhe udhërrëfyes për ngarendje në rrugën e dijes dhe të diturisë. Nga ndejat e shumta me të, në biseda e gjata që kishim dhe me punën dhe angazhimin e tij tepër të zellshëm në misionin që i kishte përcaktuar vetes, kisha fituar bindjen pozitive rreth personalitetit të këtij njeriu dhe mësuesi të dalluar.

Mësues Mikel ishte një burrë që karakterizohej me një qëndrim serioz . Nuk ishte i rastësishëm serioziteti i tij, jo një seriozitet prej autokrati, por prej një njeriu që vendosmëria i shkonte edhe në harmoni me profesionin që ushtronte. Ishte tepër njerëzor dhe të krijonte relacione afrie, sa që në mënyrë të pahetueshme njeriu krijonte raporte miqësore me të.

Mësuesi Mikel, ishte i gatshëm që të gjejë gjuhën e afër të komunikimit si me gjeneratat e vjetra, po ashtu edhe me brezin e ri.

Më kujtohen raste të ndryshme në ndeja dhe kuvende ku fjala e mësuesit Mikel peshohej me respekt nga të pranishmit. Për shëmbëlltyrën dhe rolin e mësuesit ka mendime të shumta. Figura e mësuesit gjatë historisë se njerëzimit është çmuar që nga njerëzit e thjeshtë e deri të perandorët.

Kështu që, Mikel Veseli, me punën e tij në arsim, gjatë gjithë jetës, ndikoi që shume gjenerata të lartësohen ne nivelin më të lartë të dijes dhe të jenë në shërbim të popullit dhe të vendit të tyre.

Për një kohë u përball me sëmundjen që e kaploi, por kurrë nuk u ligështua, kurrë nuk u dorëzua, kurrë nuk lëshove asnjë psherëtimë. Prandaj të gjithë të dashurit e tij u mësuan me besimin dhe durimin e tij. Mësuesi Mikel ishte një pishtar i jetës e jo i vdekjes. Pranë tij ishte vetëm dashuria për jetën e Njeriun, dashuria e pakufi për familjen, arsimin, atdheun dhe kombin.
Shuarja e tij fizike erdhi pas disa momenteve të rënda që i përjetoi në familje, pra pas humbjes së vajzës, Besa, vëllezërve Lleshit dhe Zefit, vdekje këto që i shkaktuan dhimbje të mëdha dhe tepër tronditës. Askush nuk do të mund të besonte në vdekjen në moshë fare të re të vajzës së tij, apo në vdekjen e dy vëllezërve që i mori gjatë këtij viti. Ishin këto vdekje shumë të përafërta të vajzës dhe vëllezërve, që vdekja e pamëshirshme i mori, duke lënë dhimbjet për ta, por edhe kujtimet të pashlyeshme për brezat e familjes.

Pra, në këtë fillimshtator, kur edhe gjethet e pemëve kanë filluar të veniten, bashkë me to u shua, fizikisht, por jo edhe shpirtërisht, miku ynë, pedagogu dhe veprimtari, Mikel Veseli, i cili iku në botën e amshuar, duke i lënë të pavdekshme kujtimet dhe veprat e tij të shumta dhe të rëndësishme, të cilat do të jenë të përjetësuara.

Mikel Veseli, ky mësues, veprimtar dhe atdhetar i shquar, për të gjallë të tij vetes i siguroi pavdekësinë.

Shpirti i tij që rrezatonte dritë u mishëroftë në qenien tonë.

U prehtë i qetë në botën e amshuar!

Klinë (Kosovë), 5 shtator 2019