Archives for December 2021

Donacioni më i madh në Vater nga bamirësi Jim Xhema

December 29, 2021 by s p

Një donacion prej 30,000 dollarësh i është dhënë Vatrës nga bamirësi dhe biznesmeni shqiptar Jim Xhema. Donacioni i kushtohet një prej projekteve më të mëdha të Vatrës lidhur me dokumentimin e historikut të Vatrës.
”FEDERATA PANSHQIPTARE E AMERIKËS VATRA NË DOKUMENTE HISTORIKE” përmbledh dokumentacion arkivor brenda dhe jashtë Shqipërisë, raporte origjinale dhe artikuj të qëmtuar nga grupi i punës nën drejtimin e akademikut Profesorit Beqir Meta. Historia 110 vjeçare e kësaj organizate patriotike të emigracionit shqiptar në Amerikë e Kanada dëshmon kontributin e saj madhor duke filluar nga Lëvizja Kombëtare Shqiptare, në periudhën e Pavarësisë, në mbështetjen efektive të shtetit shqiptar, veçanërisht në periudhën e Luftës së Parë Botërore kur shteti shqiptar praktikisht ishte i pajetë, dhe pastaj me ndihmesën per ngritjen e institucioneve të këtij shteti pas viteve 1920, me qëndrimin e saj antikomunist dhe sakrificat e persekutimi i shumë Vatranëve nga regjimi komunist i Tiranës.
E konceptuar në pesë vellime, kjo vepër është panorama më e plotë e rolit të Vatrës në të gjitha sferat e jetës shqiptare, në politikë, në fushën e mbrojtjes, në arsim, letërsi, kulturë, etj. Mbi të gjitha Vatra është përpjekur të mbrojë dhe përfaqësojë interesat mbarëkombëtare të shqiptarëve duke qenë një model i angazhimit qytetar dhe civil në Amerikë.
Ky projekt ka qenë ëndërr e dëshirë e disa brezave të Vatranëve, prandaj realizimi i tij i mundësuar nga donacioni i një miku të Vatrës si Jim Xhema është veçanërisht i vlerësuar nga drejtuesit e organizates, nga komuniteti vatran e diaspora.

“DIELLI” I VATRËS, DRITË DHE DIELL PËR VITIN E RI NË VATRAT SHQIPTARE

December 29, 2021 by s p

Nga Sokol Paja/

Gazeta “Dielli” si Organi Zyrtar i Federatës Pan-Shqiptare të Amerikës VATRA uron të gjithë shqiptarët GËZUAR VITIN E RI 2022. Shëndet, sukses, dashuri, mirëkuptim, progres dhe mirësi në familjet e çdo shqiptari anembanë globit. Gazeta “Dielli” mori rrugën për në çdo cep e në çdo skaj të mërgatës shqiptare që jeton e vepron në Amerikë dhe Kanada. Përmbyllëm një vit të suksesshëm me shumë sfida. Vatra e Dielli me veprimtarinë e tyre aktive ishin pranë shqiptarëve kudo ku ata jetojnë e punojnë. Vatra dhe Dielli gjeneruan atdhetarizëm, patriotizëm, energji pozitive dhe investuan çdo burim për çështjen kombëtare, për gjuhën shqipe dhe identitetit tonë kombëtar. U shpreh vlerësim të posaçëm, falenderim të përzëmërt dhe mirënjohje të veçantë të gjithë bashkëpunëtorëve të këtij viti të begatë. Gazeta u rrit nga muaji në muaj e dita në ditë falë mbështetjes e vëmëndjes suaj. Jam i privilegjuar në përfundim të këtij viti kalendarik që bashkëpunuan me “Diellin” mendjet më të mprehta, penat më të shkëlqyera dhe më të arrira të botës shqiptare që nga “Zëri i Amerikës”, mediat potente në Tiranë e Prishtinë, Akademikë, kërkues shkencorë në Fakultete dhe Njësi Kërkimi, analistë e kritikë letrarë, përkthyes, poetë, historianë, diplomatë, personalitete absolute të shkencës, ekspertë të ekonomisë, turizmit, arkivistikës, dhe kibernetikës, veprimtarë, humanistë e patriotë që na mbushin zemrën me gëzim e shpirtin me hare prej sukseseve e veprave të mira. Sukseset dhe arritjet e bijëve e bijave tona në mergatë u pasqyruan imtësisht në këtë vit dhe do vazhdojmë sat ë kemi jetë. Shqiptarët në mergatën e Amerikës dhe Kanadasë e jo vetëm përbëjnë një krenari kombëtare. Gazeta “Dielli” kishte gjatë viti në fokus të saj komunitetin shqiptar në Amerikë, Kanada e kudo ku jetojnë e punojnë shqiptarë që me suksesin e tyre lartësojnë e krenojnë kombin tonë. Gazeta “Dielli” përgjatë këtij viti që po lëmë pas lëvroi historinë, kulturën, gjuhësinë, albanologjinë, arkeologjinë, median, shkencat politike, marrëdhëniet ndërkombëtare, data, ngjarje dhe figura të shquara të kombit shqiptar. Qëllimi i gazetës ishte në çdo moment informimi i saktë, promovimi i talenteve dhe personaliteteve të botës shqiptare në mërgatë, promovimi i suksesit dhe thithja e mendimit intelektual në gazetën Dielli, ruajtja e gjuhës, kulturës, traditës dhe identitetit kombëtar shqiptar në mërgatën e Amerikës dhe Kanadasë, gjithashtu të jetë si një urë lidhëse mes shqiptarëve të mërguar dhe Atdheut mëmë Shqipërisë, Kosovës dhe viseve shqipfolëse. Mirënjohje e posaçme shkon për z.Dalip Greca për punën e jashtëzakonshme si editor i Diellit në 12 vitet e fundit. Faleminderit dhe mirënjohje për të gjithë ju që mbështesni gazetën më të vjetër të botës shqiptare, gazetën “Dielli” që nga 15 Shkurti i vitit 1909. Faleminderit që na besoni. Faleminderit që na mbështesni. GËZUAR VITIN E RI 2022

Krishtlindjet ne kampin e internimit Saver

December 29, 2021 by s p

Simon Mirakaj/

Po afroheshin Krishtlindjet. Nuk kishin kaluar shume vite qe kishim ardhe nga kampi famkeq i Tepelenes. Gjendja jone kishte filluar te permiresohej, njerezit kishin filluar te punonin (sigurisht pune te rande si hapje kanalesh etj) e shperbleheshin sipas punes. Po afroheshin Krishtlindjet, ishin kurjoz te rriturit pyesnin njeri -tjetrin a do te cohet meshe valle? Ne mbremjen e atij Dhjetori bjen dera, hyn ne dhome pader Marjan Prela. Mbas atyre pytjeve te zakonshme pader Marjani i drejtohet nanes e i thote: “Kam marre leje ne degen e puneve te brendeshme me cue meshe te menca e puntorve”, nanes e motres i shkelqeu ftyra prej gezimit. Kam ardhe me ju kerku dy djemt Sokolin e Simonin me me ndihmue, une do vi cdo nate me i pregatit, pa tjeter i thote nana, une vuna buzen ne gaz prej gezimit. Pader Marjani ndejti pak e na tha naten e mire.

Do vij neser mrama qe te rrefeheni. Nana na u drejtua: Bini me fjet, bani kryq e thoni urate. Nana na kishte mesue nje urate per Krishtlindje: “Mrame ne mes nate na ka le nje femij i kuq e i bardhe per bukuri, nana vet e shkreta s’ka djep me e lidh po rrin gjithe naten tuj u dridhe, Amen ashtu kjofte. Duke thane uraten na zuni gjumi. Ne diten e Krishtlindjes nana na tha : “Shikoni poshte jastekut se Krishti ju ka prue nga nje dhurate si femij te mire. Ngritem jastekun e shohim se Krishti na kishte sjelle nga nje piper, nje hallve, nje sheqerke ne forme gjeli po keshtu edhe Sokolit. Mbasi falenderuam Krishtin per dhuratat morem nga nje te puthur prej nanes e motres pastaj u drejtuem per te menca ku do mbahej mesha. Deri kur u prishen kishat ne Saver kan cue meshe Pader Marjani, Dom.Nikoll Mazreku, Dom.Mikel Koliqi, Dom Lazer Hubani, Dom Noc Sahatcia. Savra ne nje kohe mbeti pa prift per me cue mesh si per Krishtlindje a per Pashk. Priftat vinin prej Gradishti a Plugu.

Menca ishte ba gadi. U krijua korri prej motrave Kristina e Celestina Markagjoni dhe hallat e tyne Marta e Bardhe Markagjoni Motrat Klore, Katrina, Lajde Mirakaj, Motrat Lul e Sose Sokoli. Motrat Gita e Albina Shllaku, Xhina Mirakaj, Elena Merlika, Flora Pali, Suzana Topalli, Pina Luka, Prenda Previzi, Zheta Destanishta Bardhe Melyshi, Karlet Luka, Rrok Simoni. Menca ishte mbushur plot. Pader Marjani filloi meshen i ndihmuar prej meje e Sokolit. Mbas Meshe duke uruar njeri -tjetrin per Krishtlindjen u nisem drejt shtepive per dreken e Krishtlindjeve. Sofra u shtrua me nje pjate gjelle me mish derri (mishi i derrit ishte ma i liri nje kg.80 lek) e nje embelsire (Tespixhe). Nga ora tre fillonin vizitat qe mbaronin naten vone. Njerezve u nxirrnim karamele e nje got liker.

Urimet ishin te zakonshme :”Mot ma mire”. E nen za thonim: ZOTI e kjo dit e shejt na shpetofte prej kesaj te keqe qe na ka zane. I fundit qe ka cue meshe ne Saver ka qene Dom.Lazer Jubani. Mbas meshe shkoi per dreke te Markagjont (i thirrun prej tyne). Tavolinen e kishte ba gadi nane Mrika nje zonje madheshtore e shume fisnike qe te impononte respekt, fillun me mbush pjatat me makarona. Dom Lazri ju drejtua: “Te lutem jo shume”. Pjata e dom Lazrit u mbush si per mikun e vecante.Dom Lazri ishte mbulue ne djerse duke hanger, nane Mrika i thote: “Dom Lazer leni mos i ha me zor”. Dom Lazri ju pergjigj: Une do ti ha se me i lane une nuk i han kush ma e ato shkojne dam”.P.S. I shkrujta keto pak rreshta me kujtu me respekt e mall ato qe nuk jetojne, me kujtu keta klerik qe vuajten neper burgje e u ekzekutuan, ne menyre te vecante me kujtu herojt e kishes katolike.

NGRITJA E PERANDORIVE TË REJA

December 29, 2021 by s p

Nga ANGELO PANEBIANCO – “Corriere della Sera”, 15 dhjetor 2021 – Përktheu: Eugjen Merlika

Nëse ndërlikimet e asaj që mund të ndodhë të mos ishin shumë serioze, do të duhej të buzëqeshnim duke kujtuar një fjali të njohur: “po arrin revolucioni dhe nuk kam asgjë për të vënë”. Në janarin e vitit t’ardhshëm, ose mbas pak javësh, do të jemi mjaft këtu n’Evropë duke pritur pa frymë ngjarjet. Rusia, që ka grumbulluar një sasi të madhe trupash në kufi me Ukrainën mund të vendosë t’a mvatojë me qëllim të pushtojë Kievin. Biden-i, NATO-ja, madje edhe Bashkimi evropian po tregojnë fytyrën e tyre të ashpër e, edhe se përjashtojnë përdorimin e forcës, kërcënojnë Putinin me sanksione tejet të rënda. A do të mjaftojë? Ndërkaq presidenti rus nxjerr në fushë të gjitha mjetet që ka, armët por edhe kërcënimin energjitik kundrejt një Evrope që nuk ka menduar të pakësojë vartësinë e saj nga gazi rus në vite në të cilët kishte mundësi. Me që ra fjala, mund të vërehet se edhe nga kjo pikpamje, jo të gjithë n’Evropë jemi vlerësues entuziastë të Anxhela Merkelit e të trashëgimisë së saj politike. Ndoshta kriza ukrainase mund të kalohet (përkohësisht), duke gjëndur një marrëveshje mes Rusisë dhe perëndimorëve që të bëjë të mos humbin faqen asnjëri. Mbetet fakti që, n’atë krizë edhe ne evropianët e Bashkimit jemi të përzjerë. Pikërisht ne që deri pak kohë më parë, zbaviteshim me formula të tipit ”Evropa e qytetëruar”, duke përfytyruar se nuk do t’arrinim kurrë më të bënim llogaritë me rregullat e ashpra të politikës së forcës.

Nga çështja ukrainase mund të nxirren që tani mësime të ndyshme. I pari është që bëhet fjalë për një pasojë të rënies (relative) të fuqisë amerikane, pa të cilën vështirësisht Putini do t’ishte zotuar në një të tillë belegu me perëndimorët. Edhe ai pothuajse dështim i “takimit të demokracive”, aq të dëshirur nga Biden-i, është një shenjë e humbjes së autoritetit, pra të fuqisë së Shteteve të Bashkuara. Një mësim i dytë ka të bëjë me ndërvartësinë e ngushtë, në një botë tashmë shumëkahëshe, ndërmjet zonave të ndryshme të krizave që pështjellojnë interesat jetike të fuqive të mëdha. Sigurisht kinezët nga kriza ukrainase mund të nxjerrin tregues për të kuptuar se çfarë do të bënin amerikanët nëse e kur Kina të vendoste të mësynte Taivanin. Një tjetër mësim ka të bëjë me qëndrimin e perandorive të rilindura (Kina) ose që synojnë të rimëkëmben (Rusia). Nga kjo pikpamje ka një ngjajshmëri të dukëshme ndërmjet dëshirës ruse për të rimarrë Ukrainën dhe asaj kineze për të pushtuar Taivanin. Njimendësia perandorake, përfytyresa që perandoria ka për vetëveten, është e dëmtuar nëse ajo nuk merr kontrollin e plotë të territoreve të zotëruar prej saj në shekujt e shkuar (aq më shumë nëse, si në rastin e Kievit, kanë për perandorinë një vlerë të madhe simbolike), n’atë kohë t’artë në të cilën ajo gëzonte rëndësinë e shkëlqimin më të madh. Përballë kësaj kërkese asnjë argument që mund t’i kundërvihet e që ka për bazë parimet e pavarësisë e të sovranitetit kombëtar (të Ukrainës e të Taivanit) ose çështja e të drejtave njerëzore (të ukrainasve, të taivanasve apo të kujtdo) nuk ka asnjë vlerë. Siç është parë së fundi në Hong Kong.

Ka së fundi dhe një mësim që lidhet me ne evropianët që pikërisht tani nuk kanë asgjë për të vënë. Mbas tërheqjes rrënuese amerikane nga Kabuli edhe më hutaqët kanë kuptuar se për Evropën mbaslufta e gjatë (mbaslufta e Dytë botërore) është me të vërtetë e mbaruar, që mbrojtja amerikane nuk është më një fakt i sigurtë, që ka një problem jetik të sigurisë evropiane. Por çfarë duhet të bëhet e si do të bëhet? Për shëmbull, jemi nën kërcënimin energjitik të Rusisë. Mbas jo shumë kohe, kur gazsjellësi North Stream 2 do të hyjë në veprim (ndalesa e tanishme vështirësisht do të bëhet e përherëshme) aftësia e ndikimit rus mbi evropianët do të shtohet më shumë. Brukseli papritmas u zgjua dhe propozon masa për të pakësuar vartësinë energjitike nga Rusia brënda 2030. E ndërkaq? Cilido qoftë përfundimi i krizës ukrainase, është e sigurtë që trysnia e Rusisë mbi Evropën, përpjekja për të kushtëzuar vendimet, do të rritet në vitet e ardhëshme, në lidhje të drejtpërdrejtë me dobësimin e Shteteve të Bashkuara.

Është e dukëshme papregatitja evropiane për të bërë llogaritë me revanshizmat e sotme perandorake (jo vetëm të fuqive të mëdha). Për të marrë një shëmbull nga shtëpia e jonë e që ka të bëjë me interesat tona jetike, i kemi lejuar otomanëve (Turqia) të rimerrnin Tripolitaninë një shekull më mbrapa mbasi pikërisht Italia u a kishte hequr nga duart e tyre (më 1912), pa patur Vëndi vetëdijen e plotë t’asaj që ka ndodhur. Shumë bujare nga ana e jonë. Mesdheu po bëhet një det i zotëruar nga rusët e turqit, por problemi nuk e shqetëson aspak opinionin tonë publik apo atë të Vëndeve të tjera evropiane. Thuhet: Evropa duhet të ketë sa më shpejt mbrojtjen e përbashkët. E përsosur. Por a jemi të sigurtë se Evropa e ka kuptuar me të vërtetë? Presidenti francez flet. Por në sfond është gjithmonë kujtimi i Madhështisë franceze. Me të vërtetë, n’emër të mbrojtjes së përbashkët, Franca do t’i lejonte kontrollin mbi armët bërthamore një organizmi të përbashkët evropian? Të kujtojmë se Makroni me gjasë do të matet në votimet e ardhëshme presidenciale, me një kandidate goliste. Përjashtohet që në kohë të shkurtëra të mund të kryejë veprime kaqë bujare. Për arsye të ndryshme, as evropianët e tjerë nuk duken të përgatitur psikologjikisht e moralisht, të ndryshojnë zakonet e vjetra (të formuara në një botë që nuk është më). Hamendësohen, edhe në temën e mbrojtjes, bashkëpunime të përforcuara, madje të drejtuara nga një pakt ndërmjet Francës, Gjermanisë dhe Italisë. Por nuk është aspak e sigurtë që palloi, Franca me mbeturinat e saj të Madhështisë), lopa e butë dhe e shëndoshë (Gjermania) dhe kameleoni (Italia) mund të jenë në gjëndje të zotohen me të vërtetë në një sipërmarrje të tillë.

Ndërkaq, kërcënojnë krizat e rrezikëshme, si ajo ukrainase, që do të mundnin nga një ditë në tjetrën të ndryshonin pritmëritë e Evropës. Kur nuk ka çadra mund vetëm të shpresohet të mos bjerë shi. Së paku jo së shpejti.

“Corriere della Sera”, 15 dhjetor 2021 Përktheu Eugjen Merlika

Veprimtaria e Shoqatës së Shkrimtarëve Shqiptaro-Amerikanë gjatë vitit 2021

December 29, 2021 by s p

Adnan Mehmeti

Presidenti i Shoqatës

Viti jubliar i 20-vjetorit të Shoqatës së Shkrimtarëve Shqiptaro-Amerikanë u kurorëzua gjatë gjithë vitit me aktivitete të shumta letrare, me anëtarë të rinj dhe me botime të reja.

Shoqata e Shkrimtarëve Shqiptaro-Amerikanë kremtoi 20 vjetorin e themelimit

Në një ngjarje kulturore e artistike, Shoqata e Shkrimtarëve Shqiptaro-Amerikanë në praninë e qindra dashamirëve të artit të të shkruarit ka kremtuar 20-vjetorin e themelimit të saj pikërisht në qendrën kulturore shqiptare “Illyria” në Nju Jork. Në këtë përvjetor si asnjëherë më parë kishte pjesëmarrje edhe nga shtete të ndryshme të SHBA, si dhe shkrimtarë nga Kanadaja e Meksika.

Hapet ekspozita e librit “20 vite krijimtari letrare në SHBA

Shoqata e Shkrimtarëve Shqiptaro-Amerikanë hapi ekspozitën e librit “20 vite krijimtari letrare në SHBA” duke ekspozuar botimet që lidhen me 20-vjetorin e historisë së saj si dhe anëtarëve të shumtë anembanë Amerikës.

Në këtë zyrë të përkohshme, në qytetin e Stamfordit, u promovua monografia voluminoze në dy vëllime “Shoqata e Shkrimtarëve Shqiptaro-Amerikanë (2001-2011)” dhe “Shoqata e Shkrimtarëve Shqiptaro-Amerikanë (2012-2021)”, si dhe “Shoqata e Shkrimtarëve Shqiptaro-Amerikanë (Autorë dhe vepra)”.

Gjithashtu u prezantua revista “PENA” me të gjitha numrat e saj, botimet nga Shtëpia Botuese “Adriatic Press” si dhe botimet që lidhen me Shoqatën dhe anëtarët e saj. Ekpozita ishte e hapur nga 25 shtator deri më 10 tetor 2021.

Çmimet letrare

Poeti, shkrimtari dhe kritiku letrar amerikan Gjekë Marinaj u emërua fitues i një prej çmimeve letraro-kulturore më prestigjioze të Koresë së Jugut, Çmimin Letrar Ndërkombëtar “Changwon KC”

Ai banon në zonën e Dallasit. Dr. Marinaj është profesor në Kolegjin Richland si dhe drejtor i Mundus Artium Press.

I organizuar nga qyteti Changwon i Koresë së Jugut, vlerëson Dr. Marinaj me Çmimin Letrar Ndërkombëtar “Changwon KC” për kontributin jetësor dhe etikën kulturore në letërsi. Në përzgjedhjen e Marinajt për këtë nderim, komiteti i çmimit vuri në dukje se ai gjithmonë “i vendos njerëzit në qendër të punës së tij, inspiron paqen përmes poezisë dhe këndon për përmirësimin dhe sjelljen e shpresës në botë”.

Kemi kënaqësi të lexojmë për një tjetër çmim të fituar nga një autore shqiptare në SHBA. Bëhet fjalë për shkrimtaren Ani Gjika, e cila është vlerësuar me çmimin “New Immigrant Writing” nga Restless Book, Boston.

Në 20 vjetorin e saj Shoqata e Shkrimtarve Shqiptaro Amerikanë ndau edhe çmime letrare:

Çmimi “Faik Konica”- Sevdai Kastrati

Çmimi “Fan Noli”- Julia Gjika

Çmimi “Peter Prifti”- Shaqir Salihu

Çmimi “Isuf Luzaj”- Kozeta Zylo

Çmimi “Arshi Pipa”- Arjeta Ferlushkaj

Çmimi “Rozi Theohari”- Ermira Mitre

Çmimi “Agron Fico”- Bexhet Asani

Çmimi “Bilal Xhaferri”- Namik Selmani

Çmimi “Sami Repishti”- Luz Thaçi

Çmimi “Prenk Gruda”- Sabije Veseli

Çmimi “Luigj Çekaj”- Bora Balaj

Çmimi “Sotir Andoni”- Petraq Risto

Çmimi “Seladin Velaj”- Gjeto Turmalaj

Çmimi “Valter Lazeri”- Eleonora Gjoka

Anëtarët e rinj

Në këtë vit jubilar, Shoqata e Shkrimtarëve Shqiptaro- Amerikanë prezentoi para publikut edhe anëtarët e rinj të saj: Elida Rusta, Arjana Fetahu-Gaba, Ibadete Humolli-Tetaj, Monda Hamitaj, Prend Ndoja, Engjell Zerdelia, Hamide Shabani, Fjorela Forde, Merita Prenga, Hamid Alaj dhe Astrit Lulushi.

Zgjedhjet e reja

Anëtarët e Shoqatës së Shkrimtarëve Shqiptaro-Amerikanë votuan për zgjedhjet e reja 2021. Në mesin e krijuesve, kolegëve dhe anëtarëve të Shoqatës u propozuan disa kandidatë. Mes tyre Mëhill Velaj u rizgjodh kryetar, dr. Yllka Filipi nënkryetare dhe Veneta Çallpani sekretare e Shoqatës.

Revista letrare “Pena” në numrin e saj të 9-të

Organi letrar i Shoqatës së Shkrimtarëve Shqiptaro-Amerikanë, revista “Pena” vjen para lexuesit të saj në numrin e nëntë për vitin 2021. Në të lexuesi do të komunikojë me 24 autorë: Agim Xh. Dishnica, Naum Prifti, Mëhill Velaj, Yllka Filipi, Istref Haxhillari, Dalan Luzaj, Julia Gjika, Xhevdet Bajraj, Faruk Myrtaj, Vaid Hyzoti, Ramiz Gjini, Kostaq Duka, Përparim Kapllani, Visar Zhiti, Raimonda Moisiu, Namik Selmani, Iliriana Sulkuqi, Astrit Lulushi, Gjekë Marinaj, Kozeta Zylo, Adnan Mehmeti, Sokol Paja, Arjeta Ferlushkaj dhe Shani Pnishi.

Promovimet e librave gjatë vitit 2021

Gjatë këtij viti janë organizuar promovime të librave të anëtarëve të Shoqatës që janë bërë në atdhe ku përmendim librin e studiuesit Thanas L. Gjika “Ecja drejt së dhjathtës-dëshmi morale dhe mencurie”; promovimi i librit të shkrimtares Iliriana Sulkuqi “Qyteti im”; botimi në anglisht i romanit “Një grua midis dy burrash”: “A Woman Between Two Man” me autore shkrimtaren amerikane Carrie Hooper; promovimi në Bilisht i librit “Ujëvarat e mallit” me autor Fuat Memelli; promovimi në Gjirokastër i librit “Triumf” i shkrimtarit Xhevat Limani. Shkrimtari Visar Zhiti ka promovuar në disa qytete në Shqipëri botimet më të fundit, si: “Kartela të realizmit të dënuar” dhe “Dorëshkrime të fshehta të burgut”.

Shoqata ka organizuar promovime edhe në SHBA, nga ku përmendim promovimin e librit “The Old Bridge-Ura e vjetër” në Nju Jork, me autore Arjeta Ferlushkaj.

Lamtumirë poeti i Shoqatës së Shkrimtarëve Shqiptaro-Amerikanë!

Me 5 janar në Nju Jork u nda nga jeta anëtari i Shoqatës së Shkrimtarëve-Shqiptaro-Amerikanë, poeti i njohur Luigj Çekaj. Është një humbje e madhe për Shoqatën tonë, për Shqipërinë dhe për të gjithë lexuesit e tij të shumtë.

Luigj Çekaj ishte anëtar i devotshëm i Shoqatës së Shkrimtarëve që nga themelimi, dhe njëherit sekretari i Shoqatës 2001-2003.

Botimet e anëtarëve të Shoqatës së Shkrimtarëve Shqiptaro-Amerikanë gjatë vitit 2021

Pena, nr.9: Revisitë letrare e Shoqatës së Shkrimtarëve Shqiptaro-Amerikanë, Adriatic Press, New York, 2021.

Adnan Mehmeti: “Shoqata e Shkrimtarëve Shqiptaro-Amerikanë (2001-2011)”

“Shoqata e Shkrimtarëve Shqiptaro-Amerikanë (2012-2021)”, publicistikë, Adriatic Press, New York, 2021.

Adnan Mehmeti: “Simfonia e udhëtimeve”, udhëpërshkrime, UET Press, Tiranë, 2021.

Besa Rexhepi: “Vaji i nënës”, poezi, Intergraf, Ferizaj, 2021.

Bexhet Asani: Zjarri arbëror i pashuar” (Profile, studime, skica letrare).

“Il fuoco arberesh inestinguibile” (Profili, studi, cchizzi letterari), Botimet Barleti, Tiranë, 2021.

Bora Balaj: “Twenty years silence”, novel, “Bogdani”, Prishtinë, 2021.

Carrie Hooper&Skifter Këlliçi: “A women Between Two Men”, Novel, Lulu, 2021.

Fuat Memelli: “Ujëvarat e mallit”, poezi, Korçë, 2021.

Hys Hasa:” Gjurmë vlerash kuksiane”, vëllimi i 2-të, “Eneas”, Tiranë, 2021.

Hys Hasa:” Gjurmë vlerash jetësore në Vilë”,1-2, monografi, Botimet Eneas, Tiranë, 2021.

Hys Hasa:” Vlera intelektuale kuksiane “vëllimi i 4-rt, Eneas, Tiranë, 2021.

Hys Hasa:” Gjurmë vlerashë kuksiane”,vëllimi i 2-të, Eneas, Tiranë, 2021.

Iliriana Sulkuqi: “Gjithnjë zë i vendit tim…”,poezi shqip-anglisht, Botimet M&B, Tiranë, 2021.

Iliriana Sulkuqi: “Qyteti im”, antologji poetike-grafike, Tiranë, 2021.

Istref Haxhillari: “Mërmërima e kroit të moçëm”, rrëfim i ilustruar, Albas, Tiranë, 2021.
Istref Haxhillari: Hije në mur, tregime të zgjedhura, “Emal”, Tiranë, 2021.

Julia Gjika: “Poezi dhe prozë e zgjedhur”, Amanda Edit Verlag, Bukuresht, 2021.

Kostaq Duka: “Horoskopi i qytetit”, Tregime, Lulu, 2021.

Luigj Çekaj: “Një shkrelas në Manhattan”, vargje humori, “Jozef”, Durrës, 2021.

Mëhill Velaj:” Errësirë e shekullit të qytetëruar (Covid-19)”, poezi, Lena, Prishtinë, 2021.

Mëhill Velaj: “Rilindje në kujtesë”, tregime, Jakup Ceraja, Prishtinë, 2021

Namik Selmani:” Jehona e urtësisë dibrane”, antologji, Shtëpia Botuese MB, Tiranë, 2021.

Namik Selmani: “Kosova, bajrak i fjalës”, poezi, Shtëpia Botuese ENJA,Tiranë, 2021.

Sami Milloshi: “Ora e murit”, tregime, UETPress, Tiranë, 2021

Sami Repishtit: “IN THE SHADOW OF ROZAFA CASTLE” (A Lived Narrative), “Adriatic Press”, New York, 2021.

Skifter Këlliçi: “C35 US” rënë në tokën shqiptare”, roman, “Toena”, Tiranë, 2021.

Skifter Këlliçi: “14 veç dhëndërr në Nju Jork”, roman humoristik, “Jolanda”, Tiranë, 2021.

Skifter Këlliçi: “Katër dhe një qenush pas gjurmëve”, roman për fëmijë, “Jonalda”, Tiranë, 2021.

Thanas Gjika: “Ecja drejt së djathtës–dëshmi morale dhe mençurie”, publicistikë, JOZEF, Durrës, 2021.

Visar Zhiti: “Dorëshkrimet e fshehta të burgut”, Onufri, Tiranë, 2021.

Xhevat Limani: “Triumf”, “roman” jetësor, “Triumph”, life “novel”, Botimet Barleti, Tiranë, 2021.