Archives for January 2022

LIRIA NUK VJEN NGA RILINDJA E FERRIT, POR NGA LINDJA E DIELLIT

January 13, 2022 by s p

NGA ALFONS GRISHAJ/

Kombet e qytetëruara kanë sakrifikuar miliona martirë për liri. Sakrifica për liri ka koston e vet, sepse është vlera më e lartë për jetën dhe integritetin e njeriut. Liria është luftë, përpjekje dhe djersë, frymë dhe shpirt, lëvizje dhe jetë, rregull dhe disiplinë, platformë e hyut për qenësinë njerëzore. Herbert Hoover thotë “ Liria është një dritare e hapur ku hyn drita e diellit dhe shpirti e dinjiteti njerëzor”. Hoover nuk thotë se liria është sinonim i dritareve të mbyllura me dyer të blinduara!

Imazhet e fundit në Selinë e PD-së (Selia e lirisë ) kanë trishtuar botën shqiptare dhe ”civilizimin fondamental”. Tragji-komedi e hidhur që e bën ushtarin mbret dhe mbretin eremit. Kolazh depresiv të një lidershipi të dështuar.

Bunkerizimi i “ndërtesës së demokratëve” nuk quhet liri, dhe aq më pak dajaku mbi kurrizin e ndërtuesve dhe poseduesve të pronës së përbashkët. Lufta ndaj njëri-tjetrit (brenda llojit) tregon nivelin e karakterit më të ulët egocentrist.

Vënia dorë mbi shoqi-shojin (vellezër të një ideali) është dhe kulmi i marrëzisë. Tregues depresiv, paburrëri dhe zero logjikë! Tradicionalisht, shqiptari nuk mund të rrahet, se errësira e rinkarnimit hap sirtarin e çdo nënqenie, duke zgjuar një inat mesjetar deri në sakrifikim. Atëherë kujt i shërben krijimi i një armiqësie të stisur ? Këtu zë vend proverbi latin : “ Njeriu është ujk për njeriun .” = “Homo Homini lupus est”. Proverb që u përdor nga Plautus, dhe më vonë nga filozofi Tommas Hobes .

Kam shkrojtur dhe më parë: Lufta brenda llojit është simptomë e inteligjencës negative. Dhe kjo u vërtetua në “betejën” e PD-së kundër vetvetes , “betejë” që pati vetëm humbës !

Imagjinoni dy vëllezër që rrahen në dritën e diellit për hijet e tyre se cila zë më tepër hapësirë … dhe kur perëndon dielli… shohin se imazhet e rreme janë vanitas (bosh) dhe dashuria ndaj hijeve është vetëm ide fikse.

Ky është instikti egoist arkaik që prodhon gjithnjë nonsens dhe kthim prapa, ku habia shpërndahet si një vello mjegulle e dendur në mëngjezet e ftohta duke kufizuar hapësirat e shikimit. Prehë e kësaj mjegulle bëhet elektorati demokrat që sillet si çifuti në shkretëtirë.

Disa “analistë” thonë se nga ky nonsens ka fituar kreu i PS-së dhe PS… dhe fatkeqësisht, Rama e pohon këtë me “dhimbje”. Unë mendoj, askush nuk ka fituar! Të gjithë shqiptarët duhet të ndihen të turpëruar dhe të humbur … socialistë , republikanë, demokristianë etj…mbasi kjo nuk ka të bëjë vetëm me PD-në, por me të gjithë kulturën pseudodemokratike shqiptare që përçon imazhin vetvrasës në kancelaritë perëndimore.

Kjo ngjarje, pas të keqes ka dhe një të mirë se, do zgjojë Europën dhe Amerikën për të mbrojtur investimet e veta që kanë bërë në ngritjen e PD-së. Ata e kuptojnë mirë se pa një PD të fortë nuk do të ketë një demokraci të vërtetë dhe Shqipëri stabile. Një Shqipëri e destabilizuar mbetet një gozhdë në zemër të Europës dhe një bombë me sahat në portat e perëndimit.

Politikanët perëndimorë nuk janë leshko që të mos e kuptojnë se shkatërrimi i PD-së ka një prapavijë konspirative.

Herët a vonë, komplotuesve do u ngrihet buzëqeshja në buzë. Fillimi do të nisë me kreun e PS-së dhe klanit të vet…

Politikanët klasike dhe moderne perëndimore e dinë fort mirë se liria nuk vjen nga rilindja e ferrit, por nga lindja e diellit.

Imagjinoni për një çast çfarë do ndodhte me tokën sikur fuqia e Demiurgut t’a ndalonte rrotullimin e saj rreth diellit …dhe nëse , Giordano Bruno të ishte gjallë dhe të thoshte : “ Eppur si muove” !!

SHKAKU DHE PASOJA” NË KONTEKSTIN E BOTËKUPTIMIT SHQIPTAR

January 12, 2022 by s p

Filip Guraziu/

Tema e këtij shkrimi ndoshta mundet me qenë nji ndër ma të diskutuemet e filozofisë botnore që ende vazhdon të studjohet, por çka ka të veçantë ose të randësishme për shoqninë njerëzore ky çift emnash? Pranohet prej të tanëve, se sa ma shumë njohje në lidhje me këto dy koncepte dhe varësinë që egziston ndërmjet tyne, aq ma shumë problematika jetësore të sapiensit zgjidhen tue ndikue pozitivisht drejt përparimit. Vlera dhe randësia që ato marrin, në interpretimin e saktë të dukunive natyrore dhe ngjarjeve historike, konsiderohen primare për shoqninë njërëzore për ndërgjegjësimin dhe pozicionimit konstruktiv të sajë. Interpretimi i gabuem i dukunive dhe i ngjarjeve historike, pasojë e mos dijes ose e tranformimit të qëllimshëm të fakteve në shërbim të interesave klienteliste, formojnë pengesë për ecjen përpara të shoqnisë njërëzore.

Me përjashtim të kohëve të fundit, historia e njërëzimit dëshmon në drejtim vetem sisteme shoqnore monarkike dhe diktatoriale, ideologjia e të cilëve, për interesa të ngushta, transformonte qëllimisht të vertetën historike me pasojë ” mbjelljen” e nji morali destruktiv. Zhvillimet historike janë plot me shëmbuj të shëmtuet të ” bëmave” që shkaktuen popuj të ndryshëm, në kohë të ndryshme prej indoktrinimit moral negativ të ideologjive radikale fetare, diktatoriale, rraciste, kolonialiste, imperialiste. Si të gjithë popujt e ballkanit edhe shqiptarët “gjinden të mbarsun” me lloj, lloj mentalitetesh që pengojnë formimin kulturor bashkëkohor; psh. pranohen apriori, ” pa e lodhë fort mendjen” si të verteta absolute se ” vetem shqiptarët janë populli i viktimizuem në Europë”; se ” fajin për çka ka shkue e shkon keq në botën shqiptare e kanë gjithmonë të tjerët ; se shqiptarët nuk janë popull pushtues”; “se vetem shqiptarët kanë besë ” etj. Personalisht më intrigon psikologjia zotnuese te shqiptarët se ” fajin e kanë gjithmonë të tjerët”, që ma me shumë fjalë intrpretohet: se “shkakun” në lidhje me “pasojat” (situata jo të kënaqëshme që kanë përjetue ose që përjetojnë shqiptarët) nuk duhet t’i kërkojmë mbrenda vetes (shqiptarëve), por jashtë vetes, te të tjerët…!

Çdo aspekt i jetës së përditëshme na ballafaqon me interpretimin e drejtë ose të gabuem të konceptit të masipërm, p.sh., qytetarët ankohen për mos pastrimin e mirë të territorit prej Bashkisë, por në veprimtarinë e tyne , janë po ato që hedhin letra, cingare e mbeturina në vende që nuk lejohen, pra “shkaku” i mospastrimit të qytetit nuk asht vetem Bashkia, por janë edhe vetë qytetarët ( shkaku mbrenda nesh); qytetarët ankohen se qeveria nuk po merr masat e duhuna kundër Covidit, por në të njajten kohë askush nuk e ven masken aty ku asht urdhni me e vue, përsëri pra shkaku

i përhapjes së virusit nuk duhet ta kërkojmë vetem jashtë nesh ( te qeveria ), por edhe mbrenda nesh ( te vetëvetja) etj.

Shqiptarët kritikojnë kryeministrin e Prusisë, Bismarkun i cili gjatë diskutimeve për çështjen shqiptare paska pasë thanë se ” Shqipnia asht shprehje gjeografike “, por kurrë dhe askush prej historianëve nuk sqaroi se pikërisht në atë periudhë, kur Perandoria Turke ishte shpartallue në luftën kundër Rusisë ( 1877-1878) dhe në ballkan po skicoheshin territoret e shteteve të reja, me porosinë e autoriteteve turke shqiptarët organizuen Lidhjen e Prizrenit, vendimi fillesatar i së cilës ( sepse i dyti ndryshoi pozitivisht…) mbronte tokat islame dhe jo ato shqiptare….! Pra klasës drejtuese dhe sunduese të shqiptarëve ne vjetin 1878 nuk i binte fort ndërmend për Shqipninë ( me përjashtime të rralla si shëmbulli i heroit shkodran Hodo Sokolit ), por ishin gati të jepshin jetën për mbrojtjen e territoreve të perandorisë Turke.

Kur në Kongresin e Manastirit, 1908, dijetarë shqiptarë të bashkuem, si kurrë ndonji herë, zgjodhen alfabetin latin për shkrimin e gjuhës shqipe tue i deklarue mbarë botës përzgjedhjen e ardhmënisë europiane, në Shkodër ( në nji ndër qytetet shqiptare ma të zhvilluem e të njoftun ndërkombëtarisht) zanat kundërshtues të alfabetit latin iu drejtuen qiellit për mallkim në emën të Zotit kundër atyne që kishin ba “mkatin e madh”…, ate të braktisjes së alfabetit arab|

Në vjetin 1912 ishte shpallë pamvarësia e shtetit të ri Shqiptar ( me territore të cungueme), por situata praqitej problematike prej grykësisë territoriale ekspansioniste të shteteve kufitarë. Europa , në vazhdim të praktikës së suksesëshme të vendosjes së nji monarku në krye të shteteve të rij në Ballkani ( Greqi, Rumani dhe Bullgari), në vjetin 1914 vendosi në krye të shtetit të sapoformuem shqiptar, gjermanin Princ Vidi, por ç’ka ndodhi ? Dhuna e shqiptarëve “patriotë” me parullën ” Dum Baben” shkatërroi të ardhmen europiane…, pikërisht kët të ardhme për të cilën sot shqiptarët po “zhgarraviten” për me qenë pjesë e sajë

Konkluzioni ? Kur ti o shqiptar mohon vetëveten, kur ti o shqiptar harron vetëveten, si të shkon ndërmend se duhet me të nderue e me të kujtue te tjerët ? Ku duhet pra ta kërkojmë shkakun e të keqes që ndodhi me territoret e banueme historikisht prej shqiptarëve; mbrenda apo jashtë nesh? Ç’asht e verteta përcaktimi i ” shkakut” në kët rast nuk asht ” bardh e zi”, mbasi rol kryesor për sa ma sipër, kanë luejtë edhe interesat ekspansioniste të shtetve imperialiste, por megjithate…, sikur shqiptarët në atë moment historik do të ishin ma të ndërgjegjësuem e ma të bashkuem për krijimin e shtetit të tyne, harta e Shqipnisë me siguri do të ishte ndryshe…!

Megjithëse mbas 44 vjetëve dhunë të diktaturës enveriste populli shqiptar përjetoi situatën e nji vorfnie ekstreme, ( aq sa çuditi mbarë botën ; kujtoj braktisjen epokale

masive të vendit amë me anijet e stërmbushuna – ‘ albanian boat people’ prej “njëriut të ri socialist”) ende sot drejtuesit e politikës, shtetit dhe kulturës akademike shqiptare nuk demostrojnë në praktikë ndamjen përfundimtare prej asaj ideologjie përverse. Masivisht shqiptarët ankohen se B.E. nuk na përfillë e nuk po na pranon në gjiun e sajë, megjithëse ” neve i kem bërë detyrat “. Pra, mosanëtarësimi në B.E që në kët rast asht “pasoja”, rrjedhka prej ” shkakut” të mos funksionimit të mirë ose funksionimit burokratik të B.E….! Përsëri ” shkakun ” e kërkojmë jashtë nesh dhe harrojmë ose bajmë sikur harrojmë se në ç’far gjëndje e ka pozicionue vendin politika 30 vjeçare post diktatoriale. Jo në nji shkrim gazete, por nuk mjafton nji roman me shumë faqe për me rreshtue gjendjen skandaloze të administrimit të shtetit shqiptar…. Kush e ka pra fajin se jemi të refuzuem prej B.E.-së ? A e keni pyetë ndonjiherë vetëveten pse Montenegro që i filloi praktikat e pranimit në B.E. rreth 10 vjetë mbrapa Shqipnisë, sot asht ma afër pranimit në B.E se Shqipnia? Për këdo që ka sy me pa, veshë me ndigjue e tru me mendue, përfundimi asht i qartë: ” shkakun” që ende sot mbas 30 vjetëve diktaturë komuniste, Shqipnia nuk ban pjesë në B.E. duhet ta kërkojme te drejtuesit e pa aftë e me formim të mangët moral, kulturor e patriotik të politikës e të shtetit shqiptar, pa harrue popullin shqiptar që fatkeqësisht luen rolin e ” spektatorit” dhe jo të “aktorit” në dramën shqiptare që po përjetojmë…! Shëmbujt si ma sipër janë të shumtë në botëkuptimin e popullit shqiptar.

Përfundimi ? Përparimi imponon s’pari ndryshimin pozitiv mbrenda vetes tonë, mbrenda shqiptarëve!

“Shkaku dhe Pasoja” nuk duhen konsiderue ” lojna fjalësh për humor karnevalesh”…, por korelacion filozofik me të cilët ndërlidhet ngusht përparimi i qëndrueshëm i nji populli. Kuptimi i drejtë, pozicionimi optimal në raport me shkakun e nji dukunie materiale apo ideale, thërret, organizon, mobilizon fuqi të mbrendëshme pozitive kombëtare në funksiontë të projektimit të nji “pasoje” që sjell përparim për mbarë popullin. ” Kumonat” bijnë për të tanë, por kryesisht për eliten intelektuale dhe drejtuesit e politikës e të shtetit shqiptar ! Ndërgjegjësimi i drejtë dhe bashkëkohor i nji populli mundëson analizimin e saktë të “shkakut” në funksion të “pasojës”. Në kët kandvështrim del urgjente konsolidimi i nji strategjie edukuese konstruktive ( edhe ligjore) në funksion të ndërgjegjësimit me botëkuptim bashkëkohor europian të shqiptarëve; bashkimit shpirtnor të tyne, respektimit të dinjitetit e të simboleve të shqiptarizmit dhe konsolidimit të identitetit kombëtar.

Filip Guraziu

Presidenti Meta, vizitë dhe ligjëratë në ITShKSh të Shkupit

January 12, 2022 by s p

Shkup, 11.01.2022 – Sot Institutin e Trashëgimisë Shpirtërore e Kulturore të Shqiptarëve në Shkup, e vizitoi Presidenti i Republikës së Shqipërisë, z. Ilir Meta, i cili para studentëve të universiteteve shqiptare mbajti një ligjeratë me temën “Shqiptarët në mijëvjeçarin e ri – sfidat dhe perspektivat”.

Presdenti Meta në fjalën e tij veç tjerash tha se shqiptarët duhet gjetur të gjitha format dhe mundësitë për bashkëpunim të ndërsjellë në rajon, duke i këmbyer aseset kulurore, shkencore dhe ekonomike, për t’u bërë ballë sfidave që na presim në këtë mijëvjeçar të ri. Sipas tij, për të gjithë shqiptarët është shumë e rëndësishme që bashkërisht të punojnë që në këto hapësira të mbisundojë ligji, vlerat evropiane dhe euroatlantike, demokracia dhe bashkëjetesa me të gjitha komunitetet, për të pasur një prosperitet dhe stabilitet të garantuar.

Drejtori i Institutit, Skender Asani, tha se në këtë kohë kur regjistrohen trende shqetësuese të ikjes së të rinjve nga vendi, nga këto duam të përcjellim porosinë deri te politikbërësit që të kenë kujdes më të shtuar ndaj rinisë, e cila duhet të ngelet këtu për të vepruar për vendin tonë.

Paraprakisht, Presidenti Meta bashkë me delegacionin e Departamentit të Trashëgimisë së Gonxhe Bojaxhiut – Nënë Tereza pranë ITShKSh-së, vendosën lule pranë pllakës përkujtimore ku gjendej shtëpia e Gonxhe Bojaxhiut në sheshin e Shkupit.

BUJAR QAMILI PRITET SI AMBASADOR I KËNGËS SHKODRANE NË KOSOVË

January 12, 2022 by s p

Nga Ramazan Çeka

Qejfe, qejfe kjo dynja, qejf ma t’madh kaherë s’kam ba.

Ky titull kaq i gjetur, kaq gazmor e intrigues ishte edhe lajtmotivi i kësaj mbrëmjeje koncertale që Televizioni prestigjioz “TV 21” në Prishtinë do të sillte para publikut të madh në ekranin e vogël, me rastin e festave të fundvitit, Krishtlindjeve dhe Vitit të Ri 2022.

Në formatin e titulluar “Qejfe, qejfe kjo dynja”, që për nga organizimi ngjason shumë me një odë të gëzuar shqiptare, ku janë ulur miq të nderuar, ishte i ftuar këngëtari shkodran Bujar Qamili “Mjeshtër i Madh”, së bashku me këngëtarët; Mukades Çanga “Mjeshtre e Madhe”, Gëzim Salaj, Egzona Salaj, Edi Ermeni dhe Klinsman Llazani, duke plotësuar kështu në një farë mënyre formatin e një festivali, që do të pasqyronte muzikën popullore qytetare jo vetëm shkodrane, por mbarë kombëtare, pasi zërat e mrekullueshëm që do të performonin do të sillnin edhe këngë nga të gjitha trevat shqiptare.

Në sofrat shqiptare kënga, humori, gjallëria nuk mungojnë kurrë, pasi ato janë karakteristika vitale të shqiptarit, por si i thonë fjalës “qejfi bahet me shkodranë” dhe me të vërtetë gjallërinë e gazmendin kësaj nate shkodrane ia dha Bujari me zërin e tij të mrekullueshëm, duke performuar mes shumë duartrokitjesh disa këngë nga repertori më i bukur shkodran, i shoqëruar nga kolegët e tij këngëtarë, si dhe nga grupi orkestral mikpritës, i përbërë nga Artan Rexhepi në sint, Sead Muqa në klarinet, si dhe Filonid Nille Gjikolli tupana, i drejtuar nga maestro Gazmend Kraja, ku binte në sy dashamirësia e kolegëve të tij që ishin edhe spektatorët e vlerësuesit e kësaj nate.

Ky koncert me aromë shkodre, me përmasat e një spektakli të realizuar në perfeksion, organizuar me profesionalizëm nga moderatori dhe këngëtari i mirënjohur Visar Peja, plotësoi kështu më së miri repertorin mbarë kombëtar të këtij aktiviteti. Bujar Qamili ndër të tjera zhvilloi edhe një bisedë shumë miqësore për këngën shkodrane, për këngën popullore shqiptare, për traditrën e saj dhe për trashëgiminë tek brezat e ri.

U interesova për domethënien e emërtimit të “TV 21” dhe jo vetëm u befasova, por edhe u ndjeva shumë i kënaqur kur më shpjeguan se nr.21 përfaqësonte shekullin e ri. Në shekullin e ri ka hyrë gjithë njerëzimi, por për popullin e Kosovës ai është shekulli i Rilindjes, pasi deri në fund të vitit 1999 ata ishin të shtypur e gjakosur nga pushteti ushtarak nacionalist serb. Prandaj kjo Rilindje që filloi në vitin 2000, pra në shekullin e ri solli në jetë atë që vetë kosovarët e quajtën “NEWBORN” dhe që e përjetësuan në një monument memorial unikal në të gjithë botën.

Për herë të parë, përmes ekranit të këtij televizioni shpërtheu fjala e lirë dhe në panelet e tij u ngjit mendimi, muzika, opinioni dhe debati i pacensuruar shqiptar duke i treguar botës se Kosova rilindi në duart e Nënës Liri…

E kush më mirë se kënga shkodrane do t’i jepte jetë spektaklit “Qejfe, qejfe kjo dynja” duke e kthyer atë në një mbrëmje shkodrane me këngën e saj të bukur, e cila që nga lindja e saj ka qenë dhe është një ushqim shpirtëror, një frymëzim në jetën e përditshme, një krenari qytetare e pse jo një institucion artistik e kulturor i përbërë nga poetë, kompozitorë, instrumentistë e këngëtarë, të cilët jo vetëm arrijnë të ruajnë vlerat e kësaj pasurie që nga krijimi, por edhe t’i kultivojnë e trashëgojnë në breza.

Prandaj kënga popullore qytetare shkodrane është gjithmonë vitale dhe e kristaltë si një burim me ujë bjeshke që nuk shterron kurrë. Muzikantët dhe këngëtarët i ruajnë dhe interpretojnë motivet e vjetra të këngëve qytetare shkodrane, por njëkohësisht krijojnë edhe këngë të reja, brez pas brezi gjithnjë duke ruajtur karakteristikat që lejon ky institucion.

Programi më i ndjekur televiziv në TV-21 “Qejfe, qejfe kjo dynja” i qytetit të Prishtinës me stafin e tij organizatorët: Ideatore Xheraldina Vula, Producent Artistik Ben Apolloni, Producentë muzikorë Edona Gjonbalaj dhe Edita Rama, Peod Organizativ Milot Nuraj, Regjia Agron Vula dhe Astrit Idrizi, gjithnjë e më shumë po arrin të marrë vëmëndje dhe audiencë.

Atmosfera dhe panorama vizuale festive e skenike, natyrshëm po kthehet në një superspektakël televiziv, jo vetëm për teleshikuesit e Kosovës, por për të gjithë teleshikuesit shqiptarë anë e mbanë botës, në Shqipëri e më gjërë, pasi ky televizion zë vënd tek Mediat Kombëtare të Kosovës.

E gjithë merita e kësaj vëmëndje i atribuohet këngtarit të mirënjohur Visar Peja, moderator dhe menaxher i këtij programi, i cili me shumë kujdes dhe përkushtim ka mundur të kapë majat e pritshmërive për të plotësuar kërkesat e teleshikuesve, pavarsisht kostos apo rivalitetit që egziston me këtë gamë kanalesh televizive shqipfolëse.

Dhjetor 2021

Qeveria e Kosovës, shumë përkushtim modernizimit të Ushtrisë

January 12, 2022 by s p

-Kryeministri Kurti dhe ministri Mehaj vizituan Regjimentin e parë të Forcave Tokësore të FSK-së në Kazermën “NewBorn”/

PRISHTINË, 11 Janar 2022-Gazeta DIELLI nga korrespondenti në Kosovë Behlul Jashari/

Kryeministri i Republikës së Kosovës, Albin Kurti, i shoqëruar nga ministri i Mbrojtjes, Armend Mehaj, zëvendësministri Shemsi Syla dhe zëvendëskomandanti i FSK-së, gjeneral major Enver Cikaqi, në përvjetorin e 38-të të rënies së heronjve, Rexhep Mala dhe Nuhi Berisha, vizituan sot Regjimentin e parë të Forcave Tokësore të Forcës së Sigurisë së Kosovës, në Kazermën “NewBorn”, në Gjilan.
Në fjalimin para pjesëtarëve të Regjimentit, kryeministri Kurti u shpreh i nderuar dhe krenar për vizitën dhe shtoi se nuk ka mënyrë më të mirë për të filluar vitin e ri.
Kryeministri Kurti theksoi se ngritja e ushtrisë është detyrë e përbashkët dhe se Qeveria e Republikës së Kosovës e merr me shumë përkushtim modernizimin e ushtrisë si me pajisje dhe me armatim, ashtu edhe kushtet e shërbimit, si dhe me ofrimin e mundësive ku ushtarët mund t’i tregojnë shkathtësitë e tyre.
Më tej, ai tha se këmbësoria, si degë më e vjetër e ushtrisë, dëshmon që teknologjia dhe pajisjet ushtarake, sado të sofistikuara dhe precize, nuk mund ta zëvendësojnë vrullin dhe fuqinë e luftarakut të zot.
“Në vitin që lamë pas, FSK-ja tregoi profesionalizëm të lartë, përkushtim në shërbim të paqes e sigurisë, jo vetëm brenda kufijve të saj, por edhe jashtë, si dhe, jo vetëm për qytetarët e saj, por edhe të gjithë ata që kanë nevojë”, tha kryeministri Kurti.
Gjatë fjalimit të tij, ai theksoi si një ndër sukseset më të larta të vitit 2021, pjesëmarrjen në “Defender Europe ‘21”, ku u tregua gatishmëria, profesionalizmi dhe ndërveprimi me ushtarakët e NATO-s dhe Shteteve të Bashkuara të Amerikës.
“Pjesëmarrja në ushtrimin ndërkombëtar dhe validimi i suksesshëm i kompanisë tuaj, është testament i arritjeve, të cilët na bëni çdo ditë krenarë të gjithë neve”, tha kryeministri Kurti. Ai shprehu bindjen se sfida e radhës, “Defender Europe ‘23”, do t’i gjejë edhe më mirë, edhe më të përgatitur.
Në të njëjtën ditë, me rastin e 38 vjetorit të rënies së dëshmorëve Rexhep Mala dhe Nuhi Berisha, ministri Mehaj, në shoqërim të zëvendësministrit Syla dhe stafit të lartë të Ministrisë së Mbrojtjes, vizituan familjet e tyre në Gjilan.
Ata gjithashtu bënë homazhe në varrezat e dëshmorëve të komunës së Gjilanit.
FJALA E PLOTË E KRYEMINISTRIT ALBIN KURTI:
I nderuar ministër i Mbrojtjes, z.Armend Mehaj, I nderuar zëvendëskomandant i Forcës së Sigurisë së Kosovës, Gjeneral Major, Enver Cikaqi, I nderuar Komandant i Regjimentit të Parë të Komandës së Forcave Tokësore, Nënkolonel Albert Kuçi,
Është kënaqësi të jem këtu në kazermën tuaj, në mesin e juve ushtarakëve të përkushtuar për t’ju takuar dhe për të parë për së afërmi punën tuaj,
Ju, Ushtria e Kosovës jeni edhe ëndrra edhe amaneti i brezave ndër vite, që sakrifikuan të vlefshmen për të shtrenjtën, dhanë jetën për lirinë.
Ju, me shërbimin tuaj fisnik, përgatiteni çdo ditë ta mbroni atdheun. S’kam sesi mos të ndihem i nderuar dhe krenar dhe nuk ka mënyrë më të mirë për të filluar vitin e ri. Këmbësoria, si degë më e vjetër e ushtrisë, dëshmon që teknologjia dhe pajisjet ushtarake, sado të sofistikuara dhe precize, nuk mund ta zëvendësojnë vrullin dhe fuqinë e luftarakut të zot. Kjo e shton përgjegjësinë e udhëheqësve tuaj dhe secilit prej juve, që me moral të lartë dhe me përkushtim intensiv, si dhe me punë ekipore dhe stërvitje të rregullt, të veproni bashkë, shumë bashkë, aq bashkë, sa që sikur një. Forca e Sigurisë së Kosovës çdo ditë rritet me kapacitetet e saj, duke dëshmuar, që është gati për përgjegjësitë e reja dhe për detyra edhe më të mëdha. Në vitin që lamë pas, FSK-ja sërish ka treguar profesionalizëm të lartë, përkushtim në shërbim të paqes e sigurisë, jo vetëm brenda kufijve të saj, por edhe jashtë, si dhe, jo vetëm për qytetarët e saj, por edhe të gjithë ata që kanë nevojë. Një ndër sukseset më të larta të vitit 2021, është pjesëmarrja në “Defender Europe ‘21”, ku ju treguat gatishmërinë, profesionalizmin dhe ndërveprueshmërinë me ushtarakët e NATO-s dhe Shteteve të Bashkuara të Amerikës. Pjesëmarrja në ushtrimin ndërkombëtar dhe validimi i suksesshëm i kompanisë tuaj, është testament i arritjeve, të cilët na bëni çdo ditë krenarë të gjithë neve.
Sfida e radhës, “Defender Europe ‘23”, do t’ju gjejë edhe më mirë, edhe më të përgatitur.
Unë jam i sigurt në suksesin tuaj edhe në këtë ushtrim. Prapë do të tregoni që Ushtria e Kosovës, është ushtria e disiplinuar, e trajnuar mirë dhe ushtri e sukseseve.
Këtë do ta arrini me punë të përbashkët ekipore, duke mësuar nga njëri-tjetri dhe nga udhëheqësit tuaj ushtarakë.
Mbi të gjitha, këtë do ta arrini me zell dhe me motiv, për ta lartësuar vendin, shtetin dhe popullin tonë.
Ngritja e Ushtrisë është detyrë e jona e përbashkët. Qeveria e Republikës së Kosovës e merr me shumë përkushtim modernizimin e Ushtrisë, si në pajisje dhe armatim, ashtu dhe kushtet e shërbimit, si dhe në ofrimin e mundësive, ku ju mund të tregoni shkathtësitë e juaja ushtarake.
Arritja e qëllimeve tona shtetërore dhe kombëtare, kërkon shumë punë, disiplinë dhe bashkëveprim. Ushtria këtë e kultivon më së shumti. Ju këtë e tregoni më së miri.
Ju faleminderit dhe urime e gëzuar viti 2022!