Archives for November 2022

VATRA BASHKOI SHQIPTARËT NË 110 VJETORIN E PAVARSISË DHE FESTËS SË FLAMURIT KOMBËTAR

November 30, 2022 by s p

Nga Ramazan Çeka

Për flamurin kuq e zi,

Për të shtrenjten Pavarsi,

Kudo ka shqiptar në botë,

Bashkë do bëhen sot e mot.

Në këto ditë të shënuara të Jubileut të 110-të të Pavarsisë së Shqipërisë dhe Festës së Famurit të Kombit Shqiptar, pata privilegjin të isha pjesë e delegatëve të degës së Vatrës në Michigan me të cilët udhëtuam së bashku për në New York, ku me 27 Nëntor, në Selinë e Vatrës në Southern Blvd The Bronx, do të zhvillohej simpoziumi shkencor kushtuar këtij jubileu, si dhe darka solemne e cila do kulmonte me një mbrëmje madhështore në të cilën merrnin pjesë me qindra patriot shqiptarë.

Në delegatët e Degës së Michiganit kryesonin Nën Kryetari i Vatrës z. Alfons Grishaj, z. Mondi Rakaj Drejtor dhe Kordinator i Vatrës, z. Kolec Ndoja Kryetar i Këshillit të Vatrës, z. Rafael Floqi gazetar i ALBTVUSA dhe unë që isha i ftuar nga miku im i çmuar Mondi Rakaj, drejtor për Degët e Vatrës në Amerikë e Kanada dhe përgjegjës për kordinimin, zgjerimin dhe lobimin e saj.

Pasi lamë takimin në orën 3 të mëngjesit me këtë grup personalitetesh të shquar të Vatrës u nisëm nga Michigani për New York. Një udhëtim i gjatë por i paharruar për të gjithë ne, ku veç rëndësisë së detyrës dhe emocioneve të festës, gjatë gjithë udhëtimit u diskutua mbi gjëndjen aktuale në Shqipëri dhe sidomos në Shkodër e Malësi, pasi shumica nga ne vinim nga ato vënde, e meraku i tyre për vëndlindjen është kurdoherë i pranishëm.

U diskutua shumë edhe për sfidat dhe sukseset aktuale të kësaj dege të “Perandorisë së Shqiptarëve të Amerikës” – Federatës Pan Shqiptare “Vatra”. Një diskutim me të vërtetë mbreslënës për nga serioziteti, oratoria, siguria, mençuria dhe vlerat e përgjegjsisë institucionale, që këta personalitete mbartnin në formimin e tyre intelektual. Ndër ta dy shkodranë të spikatur për nga vlerat dhe qytetarë të rafinuar për nga kultura dhe integriteti i tyre bashkëkohor.

Sapo kemi mbërritur në New York, vetë Kryetari i “Vatrës” z. Elmi Berisha dhe Besim Malota, me një respekt dhe konsideratë të veçantë kishin rezervuar një darkë mikpritëse tepër bujare tek Restorant “Çakorri”, ku ndër të pranishmit ishte edhe z.Irfan Hysenbelliu, biznesmen i fuqishëm dhe drejtor i News 24, me të cilin pata nderin të shkëmbeja biseda dhe informacione nga bota e medias.

Bujaria mikpritëse e ktheu këtë sofër në një natë feste tejet të gëzueshme, ku atmosfera dukej se kish bashkuar zemrat e shumë patriotëve shqiptar.

Të nesërmen u mbajt konferenca shkencore me pjesëmarjen e dhjetra akademikëve dhe studiuesëve të shquar të Vatrës e jo vetëm, të cilët sipas programit, njëri pas tjetrit, u ngjitën në foltore për të mbajtur ligjëraten e tyre shkencore të përgatitur enkas për këtë jubile.

Ndër ta Kryetari i Vatrës z.Elmi Berisha, Nën Kryetari i Vatrës z.Alfons Grishaj, z. Beqir Meta, z. Bernard Zotaj, z. Muharrem Dezhgiu, z. Fran Shkreli, z. Paulin Marku, znj. Marjana Bulku, z. Rafael Floqi, z.Sokol Paja, Kryeditor i gazetës “Dielli”, i cili drejtoi me shumë përkushtim konferencën, etj.

Kumtesat e tyre bënë që ky simpozium të bashkojë akademik shqiptarë në qëndrime e në mendime që lidhen me këtë festë përkujtimore kaq sublime.

Pas përfundimit me shumë sukses të kësaj konference, organizatorët shtruan edhe darkën solemne me pjesmarrje mbarë shqiptare, për nder të Flamurit tonë Kombëtar dhe Pavarsisë së Shqipërisë.

Me të mbërritur në destinacion, jemi ndeshur me një pritje vllazërore, të cilën vetëm ndër shqiptarë e ndeshim. Një organizim i jashtëzakonshëm ku të ftuar nderi ishin përsonalite të larta si: Ambasadori Frank Wisner, Konsulli i Nderit i Republikës së Shqipërisë në Michigan, z.Ekrem Bardha, Jim Xhema, Ish Kryeministri i Kosovës z.Avdulla Hoti, Deputeti i Parlamentit të Kosovës Driton Selmanaj, Harry Bajraktari, Bruno Selimaj, Elio Shametaj, Senatorja e New Yorkut Nathalia Fernandez, z.Mark Gjonaj, përfaqësues të Bashkisë së New Yorkut e shumë personalitete të shquara të politikës, të diplomacisë, të shkencës dhe botës së biznesit. Darkën e moderoi Dr. Pashko Camaj. Kontribut të madh në jetën kulturore, mediatiake e komunitare kanë gazetarët Adem Belliu Drejtor i Tv Albanian Culture, Beqir Sina dhe Dritan Haxhia.

“Vatra” u akordoi shumë figurave të shquara të patriotëve shqiptar mirënjohje e tituj nderi, me motivacione të pesonalizuara në kontribute të çmuara për çështjen e Atdheut dhe të Kombit.

Në këtë atmosferë festive të veshur kuq e zi, menjëherë pas ekzekutimit të Himnit Kombëtar në skenë u ngjitën zërat më të njohur në komunitetin shqiptaro-amerikan, këngëtarët, Alberije Hadergjonaj, Gëzim Nika “Mjeshtër i Madh”, Barbana Dini, instrumentistët Argjend Lloga dhe Ndue Nika, të cilët me performancat e tyre plot frymë kombëtare, ndezën zemrat e të gjithë shqiptarëve.

Nata zgjati deri në orët e vona duke përmbushur me objektivitet qëllimin e këtij organizimi, ti bashkojë shqiptarët Jug e Veri, të gjithë bashkë për Shqipëri, pranë strehës së Vatrës, sot e në përjetësi.

Ramazan Çeka

New York, Nëntor 2022

FALENDERIM DHE MIRËNJOHJE NGA VATRA

November 29, 2022 by s p

Të dashur vatranët e mi të shtrenjtë

Të nderuar patriotë shqiptarë të Amerikës, Kanadasë, Europës e Trojeve Etnike

Të respektuar Autoritete Shtetërore, Autoritete Diplomatike, Klerikë, Shoqata, Organizata e Klube Patriotike në mërgatën e Amerikës

Në emrin tim personal, të bashkëpunëtorëve më të ngushtë, të çdo vatrani ju falënderoj përzemërsisht për pjesëmarrjen tuaj në festimet për 110 vjetorin e Pavarësisë së Shqipërisë dhe festën e Flamurit Kombëtar.
Vatra u priu festimeve madhështore, me aktivitete patriotike e shkencore si kurrë më parë. Pjesëmarrja juaj i dha festës sonë një kuptim dhe dimension më të fuqishëm dhe arsye për të çuar përpara këtë traditë e sukses si detyrë patriotike ndaj atdheut, kombit e njëri-tjetrit.
Të dashur miq e bashkëpunëtorë të ngushtë pa punën intensive, angazhimin profesional, seriozitetin maksimal, energjitë e pa shtershme tuajat, kjo festë kombëtare nuk do kishte kaq hijeshi e madhështi.
Ju shpreh mirënjohje dhe përulem përpara punës suaj të ndershme dhe devotshmërisë suaj.
Të gjithëve emër për emër dua të ndaj me ju përshpirtshmërinë, respektin e vlerësimin maksimal për punën e mrekullueshme: Gëzim Nikën si kryetar të organizimit të Darkës Gala dhe stafit të tij, emër për emër.
Mirënjohje për Angjelina Nika dhe grupin e saj Rozafati për performancën e shkëlqyer, kontributin ndër vite dhe gatishmërinë për të ndihmuar Vatrën e komunitetin shqiptar në Amerikë.
Dr. Paulin Markun dhe ekipin e tij të Simpoziumit Shkencor, Anton Rajën, Ylli Doskun, Ilir Cubin e çdo vatran që kontribuoi.
Mirënjohje për miqtë e veçantë që ishin aktivë, kontribuan fuqishëm në organizim e bënë rrugë të gjatë për të festuar me ne: Alfons Grishaj, Mondi Rakaj, Kolec Ndoja e çdo shqiptar që festoi me ne, gëzoi me ne në festën e Flamurit tonë Kombëtar.

Falenderim të përzemërt për Ravesa Bajo që ndihmoi në organizimin e ceremonisë së ngritjes së Flamurit në New York.
Mirënjohje dhe për gazetën Dielli, Kryeditorin Sokol Paja, Editoren e gjuhës angleze Rafaela Prifti për profesionalizmin dhe përkushtimin në ndjekjen dhe pasqyrimin e shkëlqyer të aktiviteteve.

Me gëzim e mirënjohje

Kryetari i Vatrës

Elmi BERISHA

VATRA DHE SHQIPTARËT E AMERIKËS NGRITËN FLAMURIN SHQIPTAR NË NEW YORK

November 29, 2022 by s p

Sokol Paja/

New York, 28 Nëntor 2022- Federata Pan-Shqiptare e Amerikës VATRA në bashkëpunim me Bashkinë e New York, Zyra e Emigrantëve dhe mbështetjen e shqiptarëve të Amerikës ngritën solemnisht me nderim e madhështi Flamurin Kombëtar në New York. Kjo ceremoni u bë e mundur nga Ravesa Bajo e cila kishte filluar diskutimet me Kyrebashkinë e New Yorkut për një ceremoni të tillë muaj më parë kur ajo ishte emëruar nga Kryebashkiaku Adams si Drejtoreshë Exekutive e Iniciativave Politike dhe Projekteve Speciale për Zyrën e Kryetarit të Bashkisë për Cështjen e Imigranteve. Nën organizimin dhe prezantimin brilant të patriotes çame Ravesa Bajo, tingujve të magjishëm të muzikës tradicionale shqiptare dhe valleve të grupit artistik Rozafati udhëhequr nga koreografia Angjelina Nika (Mjeshtër i Madh), festa kuq e zi pushtoi New York-un. Ravesa Bajo në fjalën e saj ndër të tjera tha: “Me ngritjen e flamurit shqiptar në Kryebashkinë e New Yorkut, ne nuk festojmë vetëm sa shumë përparim kemi bërë si një popull dhe komunitet që mbijetuan sfida të shumta dhe regjimin komunist, por edhe festojmë dëshirën tonë të përhershme që të vazhdojmë të ndërtojmë të ardhmen e ëndrrave tona”. Kryetari i Vatrës z.Elmi Berisha në fjalën e tij u ndal te rëndësia historike e 28 Nëntorit dhe kontributi i Federatës Vatra në historinë e lavdishme të shtetit shqiptar. Ambasadore Floreta Luli Faber në fjalën përshëndetëse u shpreh se “Nju York është shtëpi për qindra mijëra shqiptarë, dhe ngritja e flamurit në Manhattan tregon miqësinë speciale midis Shqipërisë dhe Shteteve të Bashkuara të Amerikës”. Edhe gazetari Beqir Sina para të pranishmëve foli rreth rëndësisë së Pavarësisë së Shqipërisë dhe falënderoi një sërë veprimtarësh e patriotësh si Rake Ruci për flamurin shqiptar gjigant që u valvit në qiejt e New Yorkut.

Komisioneri Manuel Castro deklaroi për të pranishmit se “Qyteti Nju Yorkut feston me komunitetin shqiptar sot dhe gjithmonë. Ne jemi krenar që jemi shtëpia e dytë e një komuniteti kaq të fortë dhe kaq të madh. Gezuar pavarësinë, Shqipëri”- uroi z.Castro. Komisioneri Edward Mermelstein tha se “qyteti New Yorkut me nder feston për Shqipërinë dhe komunitetin shqiptar në Amerikë në ditën e Pavarsisë – rroft Shqipëria”. Komisioneri Edward Mermelstein, Zyra e Marrëdhënieve Ndërkombëtare të Bashkisë vlerësoi bashkëpunimin me trupin diplomatik shqiptar dhe përfaqësuesitë e ambasadave në New Jork.

Arthur Piccolo drejtori i shoqërisë Bowling Green deklaroi se: “Shoqëria e Bowling Green është e lumtur që merr pjesë në ngritjen e flamurit kuq e zi”. Komisioner Piccolo, shprehu mirënjohjen për punëtorët shqiptarë, emrat e te cilëve nuk i kishte shënuar dhe tani të pensionuar, që morën nismën për ngritjen e flamurit. Z. Piccolo veçoi Kryebashkiakn Adams si të parin që merr pjesë në ceremoni të tilla për çdo komunitet që jeton në New Jork. Organizuese e Njësive lokale administrative pranë zyrës së Komisionerit të Çështjeve për Emigrantët Lidia Dobi prezantoi Komisionerin Manuel Castro.

Komisioneri Castro tha se mëson çdo ditë e më shumë për komunitetet e New Jorkut dhe për atë shqiptar. Prezantoi Kryebashkiakun Eric Adams. Z. Adams, djali i të cilit është në Shqipëri me rastin e festimeve të pavarësisë, e quajti Nju Jorkun “kryeqytetin e shqiptarëve në Amerikë” me rreth 100,000 banorë shqiptarë, që mishërojnë moton e tij për të arritur rezultate në të gjithë sektorët e jetës këtu” citoi ndër të tjera z.Adams. Kryebashkiaku i cilësoi shqiptarët si një popull shumë punëtorë, sipërmarrës të suksesshëm, qytetarë të angazhuar dhe njerëz që gëzojnë respekt falë punës së tyre. Kryebashkiaku Eric Adams i dhuroi Federatës Pan-Shqiptare të Amerikës VATRA një Proklamatë nderimi me rastin e 110 vjetorit të themelimit të Vatrës e 110 vjetorit të Pavarësisë së Shqipërisë. Kryetari i Vatrës z.Elmi Berisha i dhuroi kryebashkiakut Adams një portret të heroit kombëtar të shqiptarëve Gjergj Kastriotit dhe një portret të gdhendur më gurë dekorativ të shenjtores shqiptare Nënë Tereza. Më pas nën tingujt e hymneve kombëtare u zhvillua ngritja e flamurit kombëtar të Shteteve të Bashkuara të Amerikës dhe Republikës së Shqipërisë. Kjo ditë ishte një festë shumë e rëndësishme jo vetëm për kombin tonë por mbi të gjitha një traditë që ruhet, një mision që vazhdon dhe një miqësi e shenjtë me Shtetet e Bashkuara të Amerikës, aleatin më të madh e më të rëndësishëm të kombit shqiptar.

SHQIPTARËT NË BOSTON FESTUAN DITËN E FLAMURIT

November 29, 2022 by s p

KRAHË TË NJË SHQIPONJE – Patriotët nga Shqipëria e Kosova festuan së bashku 110 vjetorin e Pavarësisë – Boston.

Nga Fuat Memelli

Dita e shënuar e Pavarësisë mblodhi shqiptarët e Bostonit, ardhur nga Shqipëria e Kosova për të përkujtuar ngjarjen e shënuar. Nuk mund të ndodhte ndryshe. Bostoni, qendra e patriotëve të shquar shqiptarë Fan Noli, Faik Konica e plot të tjerë, ku ka patur qendrën e saj “Vatra”, vazhdon të mbajë ndezur prushin e shqiptarizmës. Meritë të veçantë ka Shoqata “ Mass.Besa”, e cila organizoi edhe këtë vit veprimtari përkujtimore gjatë dy ditëve rrjesht.

DITA E PARË…

U përkujtua në restorantin “Alba” të shqiptarit të njohur, Leonard Keka. Restoranti i tij prej vitesh është bërë vatër e veprimtarive të shqiptarëve të Bostonit. Rreth 250 vetë ishin të pranishëm ditën e dielë në këtë veprimtari kushtuar 110 vjetorit të Pavarësisë. Pas fjalë së mirseardhjes të veprimtares Arbëresha Beqiri me origjinë nga Ferizaj i Kosovës, në sallë jehuan tingujt e himnit amerikan dhe atij shqiptar. Tingujt na emocionojnë, pasi janë të vendit ku jetojmë dhe atij nga vimë. Kanë një shprehje të bukur amerikanët:

” Po të mos e dish nga vjen, nuk e di ku shkon.”

Më pas përshëndeti të pranishmit kryetari i Shoqatës “Mass.Besa” Sokol Lushllari. Ndër të tjera ai theksoi se qysh prej 120 vjetësh kur kanë ardhur këtu shqiptarët e parë e deri sot, ata vazhdojnë të mbajnë ruajnë gjuhën, traditat e kulturën shqiptare. Një punë e veçantë për mbajtjen gjallë të gjuhës sonë, luajnë dy shkollat shqipe, njëra në Quincy dhe tjetra në Pepody, ku vazhdojnë shkollën mbi 60 fëmijë. Ai falenderoi mësueset dhe veprimtaret e kësaj shkolle, Blerina Omari, Arbëresha Beqiri, Riva Milloshi dhe Vjollca Avrami. Sokoli falenderoi edhe veprimtare të tjera të “Mass. Besës” që punojnë me përkushtim, si Jorida Qirollari, etj.

Atmosferë emocionuese krijoi në sallë poezia e Nolit për Himnin e Flamurit, të cilën e recitoi plot pasion kryetari i Shoqatës “Besa Besë”, Petrit Alibej.

”O flamur gjak, o flamur shkabë

O vend e vatër, o nënë e babë,

Lagur me lot, djegur me flakë,

Flamur i kuq, flamur i zi…”

Programi vazhdoi me përshëndetjen e ish kryetarit të Shoqatës “Kosova” Hafiz Kabashi, i kudondodhur në çdo veprimtari të shqiptarëve të Bostonit. Stoli e bukur e kësaj veprimtarie ishte programi i fëmijëve të shkollës shqipe me recitime dhe këngë për Shqipërinë, Skënderbeun, Ismail Qemalin, etj. Më pas nën tingujt e muzikës, u ndez atmosfera me këngë e valle nga Shqipëria e Kosova, dy krahët e shqiponjës arbërore.

DITA E DYTË

Data 28 Nëntor, dita e shpalljes së Pavarësisë mblodhi shqiptarët te sheshi i bashkisë së Bostonit për ceremoninë e ngritjes së flamurit. Prej vitesh shqiptarët mblidhen te ky shesh për ngjarjen e shënuar. Edhe këtu pati përshëndetje nga kryetarët e shoqatave “Mass. Besa” e “Besa Besë”, përfaqësuesi i asaj të Kosovës, nga ish kryeministri i Kosovës Avdullah Hoti, nga At Theofan Koja që shërben në kishën e Shën Gjergjit, etj. Ashtu si vite të tjera, edhe sivjet kishte dërguar përshëndetje kryetarja e bashkisë së Bostonit, zonja Michelle Wu, të cilën e lexoi James Regionald Coliman, përfaqësues i bashkisë për mardhëniet ndërkombëtare. Në përshëndetje ndër të tjera thuhej:… “ Komuniteti shqiptaro-amerikan në Boston kontribuon shumë për të pasuruar historinë, kulturën dhe shumëllojshmërinë në qytetin e Bostonit. Ky komunitet është i ndërtuar dhe veçohet nëpërmjet shumë organizimeve të komunitetit, bizneseve duke mos harruar historinë dhe prejardhjen e vet.”

Nën tingujt e himnit tonë, u bë ngritja e flamurit shqiptar, i cili u valvit në krah të flamurit amerikan. Flamuri ynë do qëndrojë aty për dy javë rresht.

Kështu përfundoi edhe dita e dytë e veprimtarive të shqiptarëve të Bostonit për 110 vjetorin e shpalljes së Pavarësisë.

Në Mushtisht të Therandës zbulohen shtatoret e Hasan Prishtinës e Adem Jasharit

November 29, 2022 by s p

Me një organizim me bashkëfinancim të komunës së Suharekës dhe Ministrisë së Infrastrukturës, të hënën, u përuruan shtatoret e dy heronjëve të kombit tonë, Hasan Prishtina dhe Adem Jashari. Të pranishëm ishin përfaqësues të familjes Jashari dhe familjes të Hasan Prishtinës, dhe institucionve të Republikës së Kosovës.

Zbulimi i shtatorëve është bërë për nder të shënimit të ditëlindjes së heroit legjendar, Adem Jashari dhe 110-vjetorit të Pavarësisë së Shqipërisë.
Në përurimin e shtatorëve kanë marrur pjesë ministri i Mbrojtjes, Armend Mehaj, kryetari i AAK-së, Ramush Haradinaj, ushtruesi i detyrës së kryetarit të OVL-së së UÇK-së, Faton Klinaku, kryetari i Komunës së Suharekës, Bali Muharremaj dhe familjet Jashari dhe Prishtina.
Para të pranishmëve, kryetari i Suharekës, Bali Muharremaj theksoi se 28 nentori në këtë shesh, është i veçantë ngase po vendosën shtatoret e dy figurave kombëtare.

“Adem Jasharin padyshim e ka frymëzuar vepra patriotike e Hasan Prishtinës, por edhe Hasan Prishtina do mburrej me Adem Jasharin”, tha ai.

Ndërsa Zëvëndësministri Hysen Durmishi tha se “Hasan Prishtina dhe Adem Jashari janë shembulli dhe motivi për secilin, teksa u shpreh se kjo festë është më ezbehtë për shkak të gjykimeve politike nga gjykata që po bëhen padrejtsinë”.

Figurat e dy heronjëve u vlersuan lartë edhe nga ish Presidenti i Shqipërisë Alfred Moisiu dhe të pranishmit e tjerë.

Ndërkaq pjesëtari i familjes Hasan Pristina dhe themeluesi i Fondacionit me të njejtin emër, Mehmet Prishtina, duke iu drejtuar të pranishmëve, ndër të tjera u shpreh se “detyrim i yni moral e patriotik është që të nderojmë kujtimin për heronjtë dhe ideologët tanë, pa të cilët nuk do ta kishim edhe lirinë që kemi sot.
Pra, imagjinojeni për një moment sikur në shiritin e kohës të mungojnë dy figura markante të kombit tonë – Hasan Prishtina dhe Adem Jashari.

Shtatoret e Hasan Prishtinës e Adem Jasharit në Mushtisht, shembull se edhe në katundet tona të kemi figura të mëdha - Prointegra

A thua vallë si do të dukej ajo kohë e cila nuk do të kishte këta dy kolosë të mendimit e të pushkës? Si do ta interpretonim ne sot historinë dhe çfarë të ardhme do të kishte kombi ynë nëse do të mungonte fuqia e ndikimit politik të Hasan Prihtinës në lëvizjen tonë kombëtare dhe nëse do të mungonte rezistenca e Adem Jasharit, e cila u shndërrua në kushtrim lirie për qindar e mijëra djem e vajza të rreshtuar në UÇKnë tonë legjendare?
Por, fatbardhësisht, ata i kishim në momentin dhe vendin e duhur, atëherë kur për fatin e kombit tonë duhej të vendosnim ne, por ata i kemi edhe sot këtu në mesin tonë….

Ideologu i Pavarësisë dhe i përpjekjeve tona shtetndërtuese – Hasan Prishtina sot ndodhet krah për krah me Komandantin legjendar Adem Jashari këtu në fshatin Mushtisht, dhe ky është një nder modest që ne si gjeneratë, por edhe si familje po ua bëjmë këtyre dy vigajve të kombit tonë. Me këtë Kosovës po i kthehen vlerat e saj edhe jasht qendrave, sepse këto vlera ndodhen të shpërndara si thërmija të çmueshme dhe ato tash vijnë natyrshëm dhe marrin formën e këtyre dy figurave në bronz që percjellin historinë njëshekullore te luftes për liri e dinjitet kombëtar, duke filluar nga Hasan Prishtina 1908-12 -1933 dhe Adem Jashari 19888-1998.
Hasan Prishtina dhe Adem Jashari, edhe pse vepruan në kohë e kontekste të ndryshme politike e kombëtare, ata megjithatë përfaqësojnë hallkat më të rëndësishme të përpjekjeve tona për liri e pavarësi . Këto dy figura markante do të donte t’i kishte çdo komb i përparuar i botës, dhe për rrjedhojë një komb që në gjiun e vet ka arritur të kultivojë figura të tilla, ai komb jo vetëm që e meriton larine, por duhet të merret edhe si model për kombet tjera, siç po merret model në shumë doktrina ushtarake të botës rezistenca titanike e Familjes Jashari e cila me aktin e vetflijimit dëshmoi se nuk ka fuqi në botë që mund ta shuaj dëshirën dhe vullnetin e një populli për liri dhe pavarësi.

Prandaj jo edhe rastësisht sot në Mushtisht, krah për krah me Hasan Prishtinën, po e vendosim edhe busin e komandantit legjendar Adem Jashari, pikërisht ot kur ditëlindja e tij sot përkon me Ditën e henjtë të Flamurit tone kombëtar.
Urime ditëlindjen komandant dhe kujtimi për ty dhe familjen tënde qoftë i përjetshëm.

Duke qenë krah për krah njëri tjetrit, Hasan Prishtina e Adem Jashari, tash e tutje do të jenë edhe një arsye më shumë që nga lulet e bukura të Sharrit të ndërtojmë kurorën e lavdisë dhe respektit për gjithë kontributin madhor që ata kanë dhënë për kombin. Heronjtë vetëm fizikisht shkojnë nga kjo botë. Ata vazhdojnë të jenë me ne, edhe atëherë kur menaxhimi i proceseve ka nevojë për një vëzhgim të heshtur të heronjve tanë. Jemi me fat që rrugëtimi ynë si komb u trasua falë angazhimit dhe sakrificë sublime të Hasan Prishtinës dhe Adem Jasharit, nën vëzhgimin e të cilëve do të jenë edhe proceset në vijim, nënvizoi Mehmet PRISHTINA.