Manjola Barçi-Kozi/Dielli New York /

Rastet e Covid-19 vazhdojnë të rriten në botë ashtu siç po ndodh edhe ne Shtetet e Bashkuara të Amerikes, edhe pse shumë njerëz ende vazhdojnë to respektojnë ligjin e karantinës dhe distancimit shoqëror. Ditët e fundit, numri i rasteve të reja ditore të koronavirusit në Sh.B.A ka kaluar mbi 50,000 në ditë, për herë të parë që nga pëhapja e sëmundjes.
“Mendoj se është tepër e qartë që nuk po shkojmë në drejtimin e duhur” deklaroi Anthony S. Fauci, eksperti numër një i vendit për sëmundjet infektive, gjatë një transmetimi të drejtpërdrejtë në YouTube.
Fauci fajësoi—të paktën pjesërisht, faktin se masat e karantinës në Sh.B.A ishin më të buta se sa ato në disa vende evropiane që nga kanë arritur pak a shumë të ngadalësojnë valën e virusit.
Shumë nga ne megjithatë kanë qënë dhe vazhdojnë të jenë shumë korrekt në zbatimin e rregullave të karantinës dhe të distancimit social, por kjo padyshim ka ardhur edhe me shumë pasoja, një nga të cilat është “Ethet e Kabinës”.
“Ethet e Kabinës” është një term popullor për një reagim relativisht të zakonshëm që vjen nga izolimi ose mbyllja brenda në shtëpi për një periudhë të zgjatur kohe. Ethet e Kabinës nuk janë një diagnozë specifike, por një shumë simptomash që mund të ndodhin në këto rrethana.
Nëse jeni duke përjetuar Ethet e Kabinës si rezultat i distancës sociale ose vetë-karantinës gjatë kohës së pandemisë së koronavirusit (COVID-19), mund të ndjeheni tepër të stresuar—përtej asaj që vjen nga thjesht izolimi. Por, ka disa mënyra megjitate, për të luftuar ankthin dhe stresin që mund të ndjeni.
Edhe pse jo të gjithë që vuajnë nga Ethet e Kabinës do të kenë saktësisht të njëjtat simptoma, shumë njerëz raportojnë se ndjehen tepër të irrituar ose të shqetësuar. Sipas healthline.com simptoma të tjera me të zakonshme gjithashtu janë:
Letargjija
Trishtimi i tepërt apo depresioni
Vështirësi në përqëndrim
Mungesa e durimit
Lakmia ndaj ushqimit
Motivimi i dobët
Vështirësi e zgjimit nga gjumi
Gjumë i shpeshtë
Humbje shprese
Duhet të stresohet fakti që këto simptoma mund të jenë tregues të një game të çrregullimeve të tjera përveç Etheve të Kabinës. Megjithatë nëse vini re se këto simptoma janë paraqitur që kur keni filluar të vet izoloheni, atëherë ka të ngjarë që të jenë simptoma të Etheve të Kabinës. Nëse këto simptoma janë shqetësuese ose ndikojnë në funksionimin tuaj normal, një profesionist i trajnuar i shëndetit mendor si një psikolog ose një psikiatër, mund t’ju ndihmojë të përcaktoni nëse keni një çrregullim që ka nevojë për trajtim.
Sidoqoftë, nëse simptomat janë relativisht të buta, marrja e disa hapave aktive për të balancuar ndjenjat tuaja mund të jenë të mjaftueshme për t’ju ndihmuar të ndiheni më mirë.

Hapi #1: Dil nga Shtëpia
Nëse jeni të mbyllyr në shtëpi, kjo nuk mund të jetë gjithmonë e mundur. Gjithsesi, nëse jeni në gjendje të dilni jashtë, edhe për një kohë të shkurtër, shfrytëzojeni mundësinë. Ekspozimi ndaj dritës ditore mund të ndihmojë në rregullimin e cikleve natyrore të trupit, dhe lëvizja, qoftë edhe një shëtitje e shkurtër, ndihmon lëshimin e endorfinës, duke ju ndihmuar të ndiheni më mirë. Nëse nuk jeni në gjendje të dilni fare nga shtëpia, afrohuni afër dritares, merrni pak ajër të pastër, dhe filloni të ecni lart e poshtë. Gjithashtu mund të provoni të vendosni një ushqyes zogjsh në parvazin e dritares, ose të bleni lule të freskëta dhe i vendosni në një vend të dukshëm ku mund t’i shihni dhe ti nuhasni ato gjatë gjithë ditës.

Hapi#2: Ruajtja e Rutinës Normale e Ngrënies

Për shumë prej nesh, një ditë e mbyllyr në shtëpi është një justifikim për të tepruar në ushqim— të shëndetshëm apo jo. Shumë të tjerë mund të “harrojnë” të ushqehen fare. Sidoqoftë duhet bërë e ditur se, të hash në mënyrë të duhur mund të rrisë nivelet e energjisë dhe motivimit. Ndoshta disa mund të ndjehen më pak të uritur sepse të ndenjurit brenda do të thotë më pak aktivitet, por është e rëndësishme të monitoroni zakonet e ngrënies për tu siguruar që të ruani ekuilibrin e duhur të të ushqyerit. Gjithashtu, kufizoni ushqimet me sheqer të lartë, me yndyrë të lartë dhe pini shumë ujë.

Hapi#3 Vendosni Objektiva

Kur jeni të mbyllyr në shtëpi, ka shumë të ngjarë që gjatë kësaj kohë të mos bëni asgjë me rëndësi. Eshtë e rëndesishme që kur nuk keni gjë me rëndësi për të bërë të vendosni qëllime ditore dhe javore dhe ndiqni përparimin tuaj drejt përfundimit. Sigurohuni që qëllimet tuaja duhet të jenë të arsyeshme, dhe shpërblejeni veten për përmbushjen e çdo objektivi.
Ndërprerja e rutinës ditore gjatë izolimit mund të shkaktojë ndërprerje në ngrënie, gjumë dhe aktivitet. Për të krijuar një sens të vazhdimësisë së strukturës ditore, përpiquni të krijoni një rutinë të përditshme, e cila përbëhet nga projekte pune ose shtëpiake, planifikoni kohë për stërvitjes dhe madje edhe kohë joproduktive ku vetëm të meditoni dhe qetësoheni.

Hapi#4: Perdorni trurin dhe Shprehni Anën Tuaj Krijuese

A keni luajtuar ndonjë instrument apo gjithmonë keni dashur ta bëni? A keni qënë të dhënë mbas vizatimit apo pikturës? Apo keni një tufë fotografish nga pushimet e mëparshme që I kishit premtuar dikur vetvetes që do të vendosnit në një album? A keni ndonjë recetë gatimi që gjithmonë keni dashur ta provoni, por asnjëherë nuk keni pasur kohë?
Përdorni këtë kohë për t’u rilidhur me aktivitetet krijuese që I kishit vënë në pritje, sepse jeta ishte shumë e ngarkuar. Kalimi i kohës me aktivitete krijuese e mban trurin në punë dhe si rezultat gjithmonë të freskët dhe aspak të lodhur.
Gjithashtu, plotësoni fjalëkryqe, lexoni libra ose luani lojëra që sfidojnë trurin, si për shëmbull loja Shah. Stimulimi i trurit mund t’ju ndihmojë të ecni përpara dhe të pakësoni ndjenjat e izolimit dhe të pafuqisë.

Hapi#5: Shpenzoni Kohë me Njerezit Tuaj të Dashur por edhe Kushtoini pak kohë Vetes

Gjatë kohës së izolimit është e rëndësishme që të shpenzoni kohë me të dashur, familjarë, miq apo kolegë. Nëse nuk mund ti takoni personalisht mund ti “takoni” me FaceTime, Zoom ose Whats App. Ky veprim padyshim që mund t’ju mbajë në kontakt me botën e jashtme, dhe mund të bëjë që një hapësirë e vogël dhe e mbyllyr të ndihet shumë më e madhe.
Komunikimi me të tjerët që janë në një situatë të ngjashme mund të ndihmojë gjithashtu të ndiheni se nuk jeni vetëm. Shprehja e mendimeve, emocioneve dhe sfidave me të tjerët mund t’ju ndihmojë të kuptoni se ajo që ndjeni është normale.
Duke e mbajtur mëndjen në aktivitet të vazhdueshëm mund të ndihmojë në largimin e ndjenjave të mërzitjes ose shqetësimit dhe të bëjë që koha të kalojë më shpejt.
Megjithate, nëse jetoni me të tjerë, ndjenjat e Etheve të Kabinës mund të intensifikohen nga afërsia e individëve të tjerë.
Prindërit kanë përgjegjësi ndaj fëmijëve; partnerët kanë përgjegjësi ndaj njëri-tjetrit: Por kjo nuk do të thotë që nuk duhet të gjeni kohë për vetën.
Jepini vetes kohë «larg» nga të tjerët për t’u çlodhur. Gjeni një vend të qetë për të lexuar një libër, meditoni ose dëgjoni pak muzikë qetësuese.
Nëse ndiheni të stresuar, madje mund të dëshironi të dëgjoni ose lexoni diçka që ka të bëjë me shëndetin mendor ose ankthin.
Gjithashtu, mos harroni të lini pak kohë për të bërë pak stërvitje. Njerëzit që nuk stërviten janë më të prirur ndaj ankthit dhe depresionit sesa ata që stërviten rregullisht. Kjo për shkak se aktiviteti fizik ul hormonet e stresit të trupit, siç është kortizoli.
Në të njëjtën kohë, ushtrimi bën që truri të lëshojë endorfinë. Këto neurokimike mund të rritin gjendjen shpirtërore dhe ndjenjën e përgjithshme të mirëqenies.
Nëse nuk mund të dilni jashtë, mund të bëni një stërvitje të forcës në shtëpi duke përdorur vetëm peshën e trupit tuaj ose pajisje, dhe ushtrime të thjeshta.
Më në fund mos harroni të qetësoheni. Jo çdo minutë e çdo ditë që kaloni në shtëpi duhet të planifikohet. Jepini vetes ca kohë për të pushuar. Meditimi, frymëmarrja e thellë dhe ushtrimet qetësuese mund t’ju ndihmojnë të mirëmbani shëndetin tuaj emocional dhe të balanconi ndjenjat e izolimit ose zhgënjimit, që shoqërohen me simptomat e “Etheve te Kabines”.