dgreca – Page 805 – Dielli

HOMAZH PËR KRITIKUN DHE STUDIUESIN SHQIPTAR, LUSH PALOKAJ

December 8, 2019 by dgreca

Shkruan: Lekë Mrijaj /

Në orët e paraditës te 5 dhjetorit 2019 nga New Yorku, përmes mediave elektronike të shkruara, morëm lajmin e idhët për kalimin në amshim të mikut, kolegut e studiuesit të mirënjohur shqiptar, tashmë të amshuarin, Lush Palokaj, i cili është edhe një nder pinjollët me radhë të kullës së Pren Palokës, apo siq njihët edhe konkret babai i hit reperit të botës shqiptare, UNIKATILIT… Gurakoci dhe Republika e Kosovës e njihnin shumë mirë këtë intelektual, personalitet të shquar dhe të mprehtë i cili veç tjerash ishte edhe një studiues i mirënjohur me vlera multidimensionale, kombëtare, kulturore e njerëzore si dhe një nder profesorët e parë të gjuhës angleze në Klinë…. Gjatë karierës e jetës së tij, përmes mediave të shkruara elektronike ditore ka hulumtuar, shkruar, trajtuar shumë tema të ngjeshura të natyrave të ndryshme shkencore kombëtare, historike e letrare gjë qe shumë kumtesa të tilla që i kishte në dorëshkrim, mbetën akoma të pazbuluara e të pabotuara… Ai, përmes opinioneve të tij faktike, dinte t’i afronte atdhetarët, kolegët si dhe njerëzit e kulturës dhe të artit shqiptar në përgjithësi. Palokaj, ishte edhe një kritik dhe analist i thuktë, i cili kohë pas kohe ka shkruar dhe është prezantuar me opinione të tija të ndryshme të rrafshit politik e gjithëperfshirës… Me këtë homazh kujtimi shfrytëzoj rastin ti ngushëlloj të gjithë familjën e ngushtë dhe të gjërë Palokaj, farefisin si dhe mbarë të dashurit e tij. I ndjeri Lushi e gëzoftë jetën e LUME dhe pushoftë në paqe!

Ra ky tërmet si kismet për Edi Ramën

December 8, 2019 by dgreca

Nga Ilir Levonja/

Me mbylljen e firmave piramidale dimrin e viteve 1997-’98, njeriu më i njohur i kaosit social u bë Farudin Arapi. Mund të ndaloje kë të doje në rrugë dhe ta pyesje se a njeh këtë person, menjëherë do të pohonte se po, është kumbara i lekëve. Atë kohë qeveria e Fatos Nanos ngriti një grup pune për menaxhimin e fondeve të bllokuara dhe e caktoi zotërinë në fjalë si mbikëqyrës të këtyre parave. Afërmendsh një veprim i drejtë pasi kryeministri duhet të lirohet dhe të ndjekë axhendën e shtetit me një performancë 100%. Njeriu më i publikuar në televizion, thuajse në të gjitha lajmet, ishte pikërisht Farudini. Gjithkund tema e lekëve, kaosi i ditës. Kaos është edhe sot, por nuk njeh ndokush ndonjë Farudin të emergjencave civile. E kam fjalën që dil dhe ndalo dikë në rrugë dhe ta pyesësh se kush është mbikëqyrësi i tërmetit, i emergjencave civile etj. A njihni ndonjë si ai Farudini i lekëve dikur etj? Me siguri që do të thonë Edi Rama ose Erion Veliaj, por asesi emrin e zotërisë që mbulon këtë post. Kjo jo për faj të tij pra personit përgjegjës për emergjencat civile, por për shkakun e qëllimshëm, uzurpimim e gjithçkaje nga kryeministri i vendit. Ai që të çan sytë kudo në televizione është Farudin Rama, një masiv që di gjithçka, që bën gjithçka, gjithkënd, mbikëqyrësin, sizmologun, inxhinjerin, psikologun etj. Do mendoni se po lavdëroj Fatos Nanon…, jo vetëm ai, por të gjitha qeveritë e deritanishme, sado firove të korrupsionit, kishin pak sharm demokracie sidomos në ndarjen e sundimit a balancimin e pushteteve. Në fund të fundit edhe partitë vendosnin forumet, vendimet në një masë të konsiderueshme ishin kolegjiale, jo vula me forcë të njëshave. Në mos gaboj një ditë para tërmetit, në shpalosjen e ligjit për KÇK në versionin one man show, Edi Rama u tha anëtarëve të partisë në sy të shqiptarëve se kush nuk e voton këtë ligj është i përjashtuar nga partia. Ky është rasti më flagrant që shqiptarët e kalojnë në heshtje, po ashtu edhe milituesit brenda një force etj., por definitivisht ka përcaktuar publikisht lindjen e liderit one man rule, një person vendos dhe vulos për gjithçka dhe jo forumet. Dhe tërmeti, kthejeni si të doni, me gjithë dhimbjen e rasteve si familjet e shuara, ku plot humbën shtëpinë a gjakun e djemve në kurbet, e ku plot të tjerë humbën jetën pasi të dalësh nga shtëpia është njësoj sikur ke humbur jetën…, kthejeni nga të doni Edi Ramës i erdhi si kismet nga qielli. Gjithçka e ka kthyer në një fushatë përkujdesje elektorale duke na parashtruar po publikisht sikur të jemi të gjithë anëtarë të rilindjes, atë që nëse nuk bëjmë e pranojmë atë që thotë ai jemi të përjashtuar nga Shqipëria. Shkurt vendi im sot ka një model të përkryer të Hosni Mubarakut, Sadam Huseinit, Gedafit, Bashar al Asadi, Llukashenkos, Rexhep Taip Erdoganit etj. Të gjithë modele liderësh të lindjes, nga fushat e rërës dhe opiumit, jo andej nga militon shoqëria shqiptare, perëndimi. Sot webet Edi Ramës po çahen me lajme nga Stambolli, dy siamezët u takuan. Turqia, më falni jo Turqia se Turqia është tjetër gjë, por Erdogani dhe binjaku i tij masivi Edi, do ndërtojnë disa lagje me nga 500 shtëpi, por afërmendsh edhe nga një xhami midis. Ta gëzoni ndihmën me pykë se xhamitë na duhen, jo shkollat.

Përtej diellit të qelqët apo mallit për fisnikërinë

December 8, 2019 by dgreca

Nga Nue Oroshi /Malli i fisnikërisë përballë jetëngjitjes në timonin e besnikërisë që drejtohët prej mallëngjimit për ecjakët e drejtpeshimit të trupit i cili dirigjohet nga mendja e lëvizjeve përtej diellit të qelqet,sillet në valvitjen e valëve të jetës.

Në kohën e peshëngritjeve pranë trullosjes së mendjës sillen vërdallë fushnaltat me një vijë gjarpërore që ndan fushat nga detrat me një pjellshmëri gjigante dhe ujit të njelmët i cili shëron plagët shpuese. Rreth diellit dhe qiellit sillen me fletezat e këputura në mes kohëzgjatjet e panteonit magjik i cili në përballjen në mes të diellit dhe hënës arriti t´iu marr rrokaqiejeve dritën e syrit para se të vërbohet bota me djallëzinë dhe babëzinë.

Në kohën e mjegullnajave politike kam mallë për fisnikërinë dhe besnikërinë.Dy tipare shqiptare që janë harruar dhe janë zëvëndesuar me rrahagjoksin dhe thyerjen e fjalës së thënë.Përtej diellit të qelqët apo mallit për fisnikërinë sillen dhe pështillën edhe hutia për të pabërat apo mbajtja në thellësinë e shpirtit për të pathënat. Ndikimet dhe qoroditjet që ndodhin në kohën qe po e jetojmë ju ngjajnë dëshmive satanike për ta mbuluar rrethrrotullimet e vijave të përhmta që më shumë i kushtojnë kujdes satanikës dhe djallëzores se sa njerëzorës dhe fisnikërisë.

Muzat kanë heshtur për faktin e përzierjes së temperaturave që sillen rreth mendjes ku mendja bëhet herë-herë akull e ftoftë e herë herë merr një zjarmi përvëluse.E në mes të zjarmisë përvëluese dhe akullit të fortë të mendjës muzat kanë mbetur pezull dhe nuk bëjnë asnjë lëvizje qoftë edhe ato lëvizje të thjeshta që janë të brumosura në mes të diellit të qelqët dhe zërit të fisnikërisë dhe besueshmërisë. E derisa muzat e kanë ndalur shikimin në skenë dalin portretët që rendisinë fjalët dhe shkarravinat që janë të rënditura sikurse janë humbur në errësirën e mendjës pa dëgjuar deshirën e ecjakjeve përpara.

Edhe pse dielli në këtë kohë dimri shkëlqen shumë rrallë ai sikur na bën me dije se shkëlqimi i tij do të mbetët gjithmonë i freskët kurse rrezët e tij edhe pse nuk janë përvluese na paralajmërojnë se toka pa diell është e shkretë ashtu siç është e shkretë edhe jeta pa fisnikëri e besueshmëri.Parimet e njerzisë duhet ti kthehën shqiptarisë sepse ato janë të nevojshme sikur buka, uji, ajri, qielli e dielli.

UNIONI I GAZETARËVE SHQIPTARË NDAU ÇMIMET E VITIT 2019

December 7, 2019 by dgreca

-Çmimi Karriera gazetares Laura Konda, e cila mëse dy dekada ishte në Radion Zëri i Amerikës, dhe Adelheid Feilce, redaktore shumëvjeçare e drejtoreshë në Radion gjermane Deutsche Welle/

-Për raportimin më të mirë të vitit 2019 në lëmin e ekonomisë është nderuar gazetari Vali Qyrfyçi, ndërsa çmimi Gazetari i Vitit iu nda gazetarit Tauland Koplikaj. Çmimi “Vangjush Gambeta” për gazetarinë audio vizuele në Shqipëri iu nda Donald Jorgoni, ndërsa për mediat e shkruara në Kosovë, gazetares së Koha Ditore, Saranda Ramaj, për Shqipëri Ledina Loga dhe për Maqedoninë e Veriut, Vedat Memedaliu/

Gazeta DIELLI nga korrespondenti në Kosovë Behlul Jashari

PRISHTINË-GJAKOVË, 7 Dhjetor 2019/ Gazetarja Laura Konda, e cila mëse dy dekada ishte në Radion Zëri i Amerikës,

është laureate e Çmimit Karriera të Unionit të Gazetarëve Shqiptarë.

Në Cerifikatë theksohet se, “Çmimi “Karrira” i jepet gazetares Laura Konda gazetare me reputacion dhe ndikim në audiencën shqipfolëse. Përvoja e gjatë si redaktore, moderatore dhe reportere e veçon këtë profesioniste si përfaqësuesen e një shkolle të rferencave morale në gazetari.

Në zhanrin e intervistës me personalitete kombëtare dhe ndërkombëtare, kjo gazetare jep shembullin e cilësishëm të gazetarisë aktive, asnjanëse dhe besnike e interest publik.

Puna prej dy dekadash në radion “Zëri i Amerikës” përbën përvojën e saj më të suksesshme dhe marrëdhënien më të shkëlqyer të gazetares në shërbim të audienës së pamatë.”

Gazetarja Laura Konda është shprehur se është e nderuar dhe se këtë çmim e lidhë me punën e saj mbi 20 vjeçare në Zërin e Amerikës.

“Në një periudhë shumë kritike për kombin shqiptar siç ishte lufta në Kosovë, në atë kohë Radio Zëri i Amerikës luajti një rol të madh fillimisht për lidhjen e familjeve refugjate të cilët kishin humbur kontaktet me të dashurit e tyre dhe për mua kjo ishte një pjesë shumë e rëndësishme e karrierës sime si gazetare”, theksoi ajo.

Laureate e Çmimit “Karriera” të Unionit të Gazetarëve Shqiptarë është edhe Adelheid Feilce, redaktoren shumëvjeçare dhe drejtoreshë e programeve për Evropë në radion gjermane Deutsche Welle.

Ajo u shpreh se është shumë e nderuar sepse është një çmim që vjen nga mesi i kolegëve gazetarë profesionistë shqiptarë dhe shqipfolës.

“Unë jam e huaj, nuk e kam gjuhën e nënës gjuhën shqipe prandaj jam posaçërisht e nderuar për këtë çmim nga bota me të cilën po merrem prej shumë dekadash. Unë këtë e marr edhe si stimulim për të vazhduar informimin sa më korrekt dhe transparent të vendeve të Ballkanit Perëndimor”, tha Adelheid Feilce.

Në veprimtarinë në Prishtinë, nga mesdita e të premtes së 6 Dhjetorit 2019, Unioni i Gazetarëve Shqiptarë, me mbështetje të JTI, ka ndarë edhe çmimet “Vangjush Gambeta 2019”, për raportimin më të mirë ekonomik të publikuar gjatë këtij viti, nga gazetarë ekonomikë nga Shqipëria, Kosova dhe Maqedonia Veriore.

Kryetari i Unionit të Gazetarëve Shqiptarë, Aleksander Çipa tha se ky është edicioni i 11-të i ndarjes së çmimeve “Vangjush Gambeta” dhe duke i falënderuar JTI kemi arritur që të organizojmë një garë të vërtetë të krijimtarisë gazetareske në lëmine e ekonomisë.

“Çmimet ndahen për shkrimet më të mirë ekonomik të botuar në shtypin e shkruar në Shqipëri, Kosovë dhe Maqedonia e Veriut si dhe një çmim për raportimin më të mirë ekonomik të realizuar në median televizive të Shqipërisë”, tha Aleksander Çipa.

Për raportimin më të mirë të vitit 2019 në lëmin e ekonomisë është nderuar gazetari Vali Qyrfyçi, ndërsa çmimi “Gazetari i Vitit” iu nda gazetarit Tauland Koplikaj.

Çmimi “ Vangjush Gambeta” për gazetarinë audio vizuele në Shqipëri iu nda Donald Jorgoni, ndërsa për mediat e shkruara në Kosovë, gazetares së Koha Ditore, Saranda Ramaj, për Shqipëri Ledina Loga dhe për Maqedoninë e Veriut, Vedat Memedaliu.

Ndarjes së çmimeve i ka parapri konferenca tematike “Ilegaliteti dhe legaliteti” ku pjesëmarrësit, mes të cilëve kryetari i Odës Ekonomike të Kosovës, Berat Rukiqi, kanë theksuar se ekonomia gri është armiku kryesor i zhvillimit ekonomik dhe kanë nënvizuar nevojën e realizimit të ligjeve dhe strategjive qeveritare në luftim të ekonomisë ilegale.

Gazetarët nga Shqipëria, Kosova, Maqedonia e Veriut dhe Lugina e Preshevës, mes të cilëve ishte edhe korrespondenti në Kosovë i Gazetës DIELLI – fitues i Çmimit Karriera të Unionit të Gazetarëve Shqiptarë në vitin 2015, nga Prishtina kanë shkuar në Gjakovë dhe me këngët e Shkëlzen Jetishit – Xenit dhe orkestrës së tij ishin së bashku deri në mbrëmje.

ARKIV –GAZETA DIELLI, 13 NËNTOR 2015: Gazetarit Behlul Jashari Çmimi Karriera

-Unioni i Gazetarëve Shqiptarë i ndan Çmimet në një veprimtari në Prizren/
PRIZREN, 13 Nëntor 2015/-Korrespondenti në Kosovë aktualisht i Gazetës Dielli – korrespondenti i ATSH nga Kosova e themelues i bashkëpunimeve të para të medias Kosovë-Shqipëri prej gati çerek shekulli, Behlul Jashari, gazetar shumëvjeçar, redaktor e kryeredaktor i gazetës tradicionale kosovare Rilindja, është fitues i Çmimit Karriera të Unionit të Gazetarëve Shqiptarë. Kryetari i Unionit, Aleksandër Çipa, duke prezantuar motivacionin për çmimin tha se, “Behlul Jashari është dëshmia e gjallë e qëndresës së gazetarit përballë shtypjes dhe terrorit okupues. Jo vetëm shembull i gazetarit korrekt në një kohë kur sundonte censura e shumëfishtë dhe sidomos ajo shtetërore.
Behlul Jashari është emri i gazetarit jetëgjatë në profesion që përjetoi e përballoi sakrifica të mëdha. Ai si rrallë kush mori në dorë gazetën ‘Bujku” kur pushteti serb mbylli të vetmin titull të përditshëm “Rilindjen”.
Behlul Jashari ishte kryeredaktor i parë-themelues i gazetës së përditshme të rezistencës e pjesë e lëvizjes për liri e pavarësi “Bujku” që nisi të dalë nga 18 janari 1991 dhe si korrespondent i parë nga Kosova i një mediumi të Shqipërisë nga 24 maji 1992.
Raportimet e tij janë pjesë e rëndësishme e historisë së raportimit gazetaresk për krejt hapësirën shqiptare”.
Gazetari Behlul Jashari, duke pranuar çmimin u shpreh se ndihet shumë i nderuar që merr çmimin më të lartë të gazetarisë shqiptare, duke theksuar se para një çerek shekulli nisi raportimet për median në Shqipëri nga Kosova në rrethana të jashtëzakonshme dhe pjesë e atyre raportimeve ishte edhe reportazhi për “kufirin ndërshqiptar si mur, si fundi i botës”.
“‘Udhëtimi për në Prizren’, ishte reportazhi që kam shkruar në fundvitin 1996, në kohën e viteve të rënda të okupimit, kur me shkrimet futuristike e shihja dhe e përshkruaja Kosovën e së ardhmes, të lirë, shtet, të ëndërrave. Personazhi, e nisura nga Arta, jugu i trojeve ku flitet shqip, në kërkimet e saj drejt ‘Mollës së Kuqe’, ku tregohet se dikur ishte kufiri verior, erdhi edhe në Prizren, qytetin e Lidhjes Shqiptare, ku ndodhte diç e ngjashme si sot”, vijoi ai në ceremoninë e ndarjes së çmimeve të gazetarëve nga të gjitha trojet shqiptare.
Ai reportazh është botuar edhe në Kosovë, edhe në Shqipëri, në 31 dhjetor 1996, duke thyer kufirin e hekurt me shkrimet shqip.
“‘Udhëtimi për në Prizren…’ ishte përsëri titulli i shkrimit që bëra për ATSH para takimit të parë historik të qeverive të Shqipërisë e Kosovës mbajtur në 11 janar 2014 pikërisht këtu në Prizren”, vijoi Jashari.
“Edhe sot të gjithë së bashku jemi në udhëtim për në Prizren, dhe do jemi”, theksoi Behlul Jashi dhe duke e përmbyllur fjalën u shpreh: “Ishte një rrugë shumë e gjatë. Edhe shumë e vështirë, sa njëra këpucë më ra sot në Prizren”.
Fitues të Çmimit Karriera janë edhe gazetarët e njohur prej dekadash Zenun Çelaj nga Kosova dhe Besnik Dizdari nga Shqipëria.
Unioni i Gazetarëve Shqiptarë organizoi sot në Prizren veprimtari në kuadër të 10 vjetorit të tij, ku në një ceremoni ku ishin ish presidentët Alfred Moisiu e Fatmir Sejdiu, si dhe ministri i Financavi i Kosovës, Avdullah Hoti, u ndanë çmimet vjetore
Karriera, Gazetari i Vitit, Çmimi Special. U bë edhe ndarja e çmimeve vjetore ”Vangjush Gambeta” për gazetarinë ekonomike. Në kuadër të veprimtarisë, u bë edhe nenshkrim i memorandumit të bashkepunimit të Unionit të Gazetarëve Shqiptarë me Unionin e Gazetarëve të Preshevës.

MES DHIMBJES DHE FESTËS NË JACKSONVILLE

December 7, 2019 by dgreca

Mes dhimbjeve shpirtërore shqiptaret në Jacksonville Florida përkujtojnë diten e Flamurit , 107-të vjetorin e Pavarsisë dhe 7 vjetorin e themelimit të degës së Federatës Pan Shqiptare të Amerikës VATRA –

Nga Lek Gjoka/

Kombi shqiptar është teper i tronditur nga termeti katastrofik i 26 nëntorit në Shqipëri dukë shkaktuar dhjetëra viktima e qindra të plagosur e mijëra të pa strehë . Sigurisht edhe ne shqiptarët e Diasporës së Amerikës jemi tejet të trishtuar prej kësaj tragjedia që i ndodhi kombit tonë.

Kjo fatkeqësi natyrore ndodhi vetem dy ditë para ditës së flamurit dhe ditëlindjes së Pavarsisë. Ishte teper emocionuese kur shihje forcat e armatosura dhe policinë ditën e 28 Nëntorit në krye të detyrës dukë kërkuar të mbijetuar në germadhat e pallateve megjithë dhimbjen e madhe nuk harruar të përkujtojnë simbolikisht ditën e flamurit dukë valëvitur flamurin kuq e zi. Ashtu edhe dega e Shoqatës Pan Shqiptare të Amerikës Vatra në Jacksonville Florida përkutoi mes dhimbjeve në “Marocu Shine” Ditën e Flamurit dhe 107 Vjetorin e Pavarsisë të shtetit shqiptar nga perandoria Osmane.

Kryetari i degës së Shoqatës Pan Shqiptare Vatra në Jacksonville si dhe nënkryetar i Federatës VATRA, z. Adriatik Spahiu dukë i falenderuar pjesmarrësit e shumtë që kishin ardhur edhe nga Orlando dhe Nju Jorku për të marrë pjese në ditën flamurit, të 107 vjetorit të Pavarësisë së Shqipërisë dhe të 7 vjetorit të themelimit të degës së Shoqatës Pan Shqiptare Vatra në Jacksonville i ftoi të gjithë të pranishmit të ngriheshin në këmbë dhe të mbanin një minutë heshtje për viktimat e tërmetit.

Zoti Adriatik Spahiu falenderoi të gjithë vatranët që kanë dhanë dhe po vazhdojnë të japin një kontribut të çmuar në bashkimin e Diasporës Shqiptare të Jacksonvilles e në menyrë të veçantë vatranët Mersin Puci, Natasha Govani , Hasan Hakrama te cilëve edhe ju dha nga një çertifikatë mirënjohje .

Gjithashtu ai falenderoi nismen e disa shqiptarëve në Jacksonville Florida ku sebashku me degen e Federatës Pan Shqiptare Vatra të Jacksonvilles po punojnë për grumbullimin e ndihma financiare sipas mundësive që kanë për bashkatdhetarët tanë që kanë mbetur pa strehë dhe të stresuar nga pasojat e termetit të fundit në Shqipëri që shkaktoi 51 të vdekur dhe qindra të plagosur dhe mijëra të pa strehë . Pastaj ftoi këngëtaren e talentuar Armanda Akarxhiu që të ekzekutojë himnin kombëtar shqiptar dhe atë të Amerikan, e cila me një talent të rrallë i këndoi plot mjeshtëri dukë sjell mjaft emocione shpirtërore mes të pranishme. Me pas ajo foli plot dhimbje për tragjedinë e kombit shqiptar dhe së është e nderuar të japë edhe ajo kontributin e saj. Pas kësaj këngëtareje rradha i erdhi edhe këngëtarës së talentuar, mjeshtres të interpretimit të serenatave korçare Eli Fara. Ajo u bëri thirrje dhe mbeshteti të gjithë të pranishmit në ndihmen financiare që duhet t’i japim sot shqiptarëve në Shqipëri. Megjithëse ishte dita e flamurit përkujtimi i ketij viti është një nder perkutimet e rralla që kurrë mos na ardhtë në derë me tragjedi të tilla,me humbje jete, me lot, dhimbje dhe trishtim por që gjithsesi perkujtimit i 107 vjetorit të Pavarsisë dhe 7 vjetorit të themelimit të degës së Shoqatës Pan Shqiptare Vatra nga shqiptarët në Jacksonville shërbeu si urë bashkimi, ku megjithëse ne shqiptaret kaluam një tragjedi natyrore plot dhimbje por nuk u gjunjëzuam e si gjithmonë u ngritëm në këmbë edhe me të fortë, edhe me të bashkuar si bijte e heroit kombëtar Gjergj Kastrioti Skënderbeu, si nipat e mbesat e shenjtorës Nënë Terezës.

Jacksonville Florida Dhjetor 2019