Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

FERRI I RAMËS DHE FERRI I DANTES

by

           Thonë se pas ardhjes nga Gjermania kryeministrit tonë të ndritur i ka shkrepur të bëjë një shfaqje gala, nga ato që ai i ka shumë qef, në qëndër të Tiranës. Kjo i është bërë kaq fiksim, sa që ka urdhëruar ministren e kulturës dhe drejtoreshën e “Operas” të venë në një skenë masive “Ferrin e Dantes”. Shfaqja kërkohet urgjentisht t’i paraqitet popullit të vet më datë 18 tetor. Të gjithë po vrasin mëndjen dhe Tirana zien nga thashemnaja, pse ky fiksim i kryeministrit me Ferrin. Disa duan të thonë që kjo lidhet me fundin e qeverisjes së tij. Disa të tjerë, për një “Rilindje” të re të qeverisjes së tij pas ardhjes nga Gjermania, por kjo është një Rilindje ndryshe, Rilindje që del nga Ferri. Disa dashamirës të tij shprehin keqardhjen dhe thonë: Po pse xhanëm zgjodhi Ferrin dhe nuk zgjodhi parajsën?!!! Çfarë dreqin do me Ferrin? Jo për për gjë, por na ndjell ters dhe na fut drithmat. Ka të tjerë, që si më të mençëm që janë, thonë se ky, zdapi i gjatë, ka pasur një ëndërr apo një makth të fshehtë që nuk ja ka treguar njeriu, as bashkëpunëtorëve të tij më të afërt. Kush është ajo do të bëheni kureshtar ju. Po jua themi, se tani ka dalë edhe sekreti. Ky ka menduar dhe dëshëruar në mënyrë të ethshme, ku shpesh nuk e zinte gjumi as natën, deri në realizimin e saj të çmendur: O e çoj këtë vend dhe këtë popull në Ferr, o s’gjej derman.

        Zotat kur e kanë marrë vesh këtë çmenduri janë zëmëruar dhe kanë thënë: kush është ky që do të marrë atributet tona? Hajt se ja ndreqin ne ‘samarin’. Po e çojmë këtë të parin të shohë Ferrin, para se se ky të çojë popullin e tij. Thirrën Danten nga Parajsa, atje ku i prehet shpirti i ndritur, dhe meqënëse ai është ekspert i fushës për Ferrin, i kërkuan, që mundësisht, t’u tregonte se në cilët Rrathë të Ferrit ta çonin këtë  “me krisje n’kok” të shqiptarëve. Dantja, pasi pyeti gjërë e gjatë për këtë dhe qeverisjen e tij, bëri një relacion të hollësishëm, të cilin ua paraqiti zotave. Fatmirësisht, nga burimet tona, që rrjedhin pas burimeve të nja dy TV kombëtarë, na ra në dorë edhe ne një kopje  e këtij relacioni “Top Sekret”. Po ua tregojmë.

                                                                               “Top sekret”

                                        R E L A C I ON

        Pas një verifikimi të kujdesshëm dhe të hollësishëm konstatova me keqardhje se ky robzoti, alias kryeministër i shqiptarëve, ka aq shumë gjynahe dhe mëkate sa që asnjë nga rrathët e Ferrit nuk do ta pranonte dot i vetëm. Për këtë nevojitet një bashkëpunim dhe koordinim i të Nëntë Rrathëve të Ferrit, që çuditërisht përputhet me nëntë kushtet që ka vënë Gjermania për të, ku ky robzoti duhet t’i kalojë me rradhë ato duke përfunduar tek i nënti, tek i cili do të qëndrojë përfundimisht dhe do të gjejë rehat, kur Ju, Zotat, do t’i bëni të mundur kalimin në botën tjetër. Edhe Karonti, taksixhiu i Ferrit, është mjaft i kënaqur, pasi kur ta kalojë me barkë për në Ferr, ky do ta paguajë mirë, pasi zotëron miliona Euro nga PPP dhe konçesionet. Tani, sipas bëmave të tij, po i parashtroj me rradhë vendqëndrimet dhe vendkalimet e mundshme të tij në honet e Ferrit.

        Meqënëse i lartëpërmenduni, zotnia e tij ka dashtë që të bëhet mbret dhe të ketë haremin e tij, si strehë të parë i caktoj Rrethin e Dytë të Ferrit, ku si gjykatës do të ketë jo ata që kalojnë vettingun në tokë, por vetë Minosin, Kryetarin e Gjykatës së Lartë të  Ferrit.

        “ Atje Minosi i zi hungron, tërbohet, te praku shqyrton fajet nji nga nji, gjykon, dënon sa herë me bisht qarkohet. Kur ndonjë shpirt i keq i del karshi, vetiu ai çka në zemër nis me nxjerrë; edhe gjykatësi, që mkatet di, peshon ku duhet flakë ai shpirt i bjerrë; bishtin per trup ia lidh aq herë, sa t’ketë ndërmend me e zbritë te rrathët poshtë në Ferr…”[1]

        Meqënëse nga investigimet e bamuna m’del se i lartëpermenduni ka pasur një babëzi të madhe për pasuri e katandi, si strehë të dytë i caktoj Rrethin e Katërt të Ferrit.

        “ Sa tallje e shkurtë janë t’mirat toksore, që Fati ka në dorë, po e sheh bir vetë; për to perleshet skota njerzore. Se i gjithë ari , që ish o mund të jetë nën diell e hanë, për shpirtnat e dërmuem nuk vlen një ças me i ba të qetë…”[2]

         Meqënëse nga investigimet e bamuna m’del se i lartëpërmenduni në momente krize pushteti dhe mendore ka shfaq shenja të kjarta tiranie, si strehë të  tretë i caktoj Brezin e Parë të Rrethit të Shtatë të Ferrit.

        “…ku n’gjak të ndytë tue u zi vikatshin shpirtnat e dënuem. Pashë aty njerëz der n’vetlla zhytë; Kentauri (Kironi) tha: “Tiranë këtu ke plot, që tue plaçkitë çuen jetën e tue mbytë; çdo dhunë barbare laknë këtu me lot” …”[3]

        Meqënëse nga investigimet e bamuna m’del se i lartëpërmenduni, pa pyet njeri dhe në kokshkrepje të vet, me fodullëk dhe pordhacllëk, ka kryer veprime të vetëdijshme kundër natyrës: Ka betonizuar Tiranën dhe gjithë Shqipërinë; ka dhënë koncesione, ose nuk i ka ndalur ato të dhëna nga paraardhësi, për HEC-e në vendqëndrimet tuaja të dashtun zota, si në Alpet dhe malcina në veri dhe jug  të Shqypnisë, tuj shkatërru ato që keni ndërtu ju me aq mund; duke mbyll burimet e zanave dhe shtojzovalleve nëpër tuba të fshehtë, gjë për të cilën ka marr mësime nga djalli; me vullnet të lirë vendosa që ky robzoti e ka hak të zbresë edhe një brez ma poshtë në honet e Ferrit, pra në Brezin e Tretë të Rrethit të Shtatë.

        “Ja bisha me të mprehtin bisht të gjatë që malet çan, rrxon ledhe t’armatueme, ajo që përlyn botën me lëngatë!” Shëmbllesa e turpshme e njimtisë arriti, me kokë e trup përmbi shkambij tue u rrasë…Me njeri t’drejtë ftyra i kishte gjasë e mirsi të prunjtë nxirrte në pah, gjithë pjesa tjetër-gjarpën i pamasë;…”[4]

        Kemi mbrrit në Rrethin e Tetë të Ferrit ku në dhjetë Lugje janë mbshtjell të gjithë ata që mishërojnë gjthë veset e skotës njerzore, ku edhe ky, i paudhi që na asht dhanë n’kqyrje, asht shok i tyne si: Mashtruesit dhe rrufjanët, simoniakët, batakçinjtë, hipokritët, hajdutët, mbjellsit e dasive, fallsifikuesit e fjalëve (demagogët) dhe gënjeshtarët.

        “Simon o magjistar, ndjeksa qyqarë, gjanat e Perëndisë ju nuk i keni për hir dhe mirësi, por grabitqarë për ar e për argjend po na i shkërdheni…kshtu ftyra u kishte dalë në shpinë; tue ecë sëprapthi rruga duhej ba,-para me kqyrë ua kishin heq mundsinë…pa qa si të qëndroja nga shëmtija që pamja njerzore kish pësue, ku papushim rrëkajë u rridhnin lotë për lugtë shpinës n’vithe tue kullue…kshtu, jo me zjarrm,-me forcë të Perëndisë,-e trashë vishtullore n’pellg valonte nga njani bregte tjetri e zeza pisë (zifti,katrani)…N’daç me shpëtue nga çapojtë tanë e kryet mos qit mbi pisë (zift i valuem) as sot as mot. Ia ngjitën me ’j qind krraba e në atë rrëmujë i thane: “tash vallzo ti zhyt e mbyt; fshehtas ashtu, n’mujsh me ia hjedhë kuj.”…e ai byth’n e vet e kishte ba buri…Pashë dy, që u ngritën ndejë tue u mbështet si dy tava mbi zjarr vendosun ngjit, n’dregza t’neveritshme trupin krejt…si i pashë të dy tue u krue me t’madh tërbim, kah mishi u hante n’mënyr barbare, në u dhashtë veçse lënurja lehtësim! Lëkurën e zgjebosun shkulnin fare, si t’qërosh me thik ndo’jher të ngjan krap o peshk tjetër me ma t’forta pare (luspa)…”[5]

        Në përfundim, nga investigimet e bamuna m’del se i lartëpërmenduni, pasi të futet thellë e ma thellë në tetë honet e Ferrit duhet të ndalet në fund të këtij pusi të zi, në Rrethin e Nandë të Ferrit. Po për këtë, për të arritë fundin, duhet të ndalet në disa breza:

  • Mashtruesit e atyne që të besojnë (Populli dhe votuesit).
  • Tradhëtarët e miqve dhe të bamirësve.
  • Tradhëtarët e pushtetit hyjnor dhe atij toksor.
  • Tradhëtarët e Atdheut

        “…kur thellsia e mendimit puqet me forcë brutale e ligësi, asnjë shpëtim s’i mbet njerëzimit…Oh, sa u trondita thellë, kur pashë me sy se tri ftyra n’atë kokë ishin rradhitë! (Luçiferri, Satanai me tri kokë, Cerberi ) Ngrica Koçitin mbarë e akullote, gjashtë sytë (Juda Iskarioti, Bruti dhe Kasi) e mdhej vajtonin pa pushue, e nga tri mjekrat – gjak e jarg e lote. Nga nji kobtar me dhambë rrinte tue blue në gjithsecilën gojë, mulli si t’ishte hatashëm të tre shpirtnat tue mundue…Ai shpirt atje që për tmerr ndëshkohet, asht Juda Iskariot – kryet – mbrenda në gojë, e jashtë me këmbë tërbohet. Nga dy tjerët, që u varet koka e mjerë, njani asht Bruti, jashtë të zezës gojë ka mbetë, shih si shkapetet e s’bërtet njëherë…”[6].

        Ky është relacioni i përgatitur nga Dantja, të cilin ai menjëherë ua dorëzoi zotave. Tani pritet që vendimi suprem të merret nga ata.

        Kuptohet, që dashamirësit e shkëlqesisë së tij, kryeministrit tonë të ndritur, mund të më thonë. Po ti kush je që na caktoke rradhë për të tjerët?  Ti nuk kë bërë ndonjë mëkat? Unë u përgjigjem me përvujtni dhe u them, se edhe unë jam një rob i perëndisë, me plot gjynahe dhe mëkate. Pastaj, rradhën nuk e caktova unë, por Danteja. Mëkati im i vetëm është se gjeta këtë dreq relacion sekret.

        Por unë nuk jam as politikan dhe as kryeministër. Megjithatë, mos kujtoni se e kam lënë veten pas dore këtë punë. Kam dy vjet që i kam bërë kërkesë me shkrim Shën Pjetrit (pasi më kanë thënë se ky duhet zënë mik për të komunikuar me zotat) ku i kërkoj me përulësi, që mundësisht, kur të më vijë rradha për në atë botë (dhe duke përfituar nga rasti, i kërkoj që të më çojë jashtë rradhe) të më çojë në Ferr. Pse, edhe ti do të shkosh në Ferr?!! Mund të më thoni ju.  Po, po,  u  përgjigjem unë. Madje me qejf të madh. Se po të ishte ndryshe, kuptohet, që nuk do të bëja kërkesë.

        Tani, nëqoftëse jeni kureshtar, po u tregoj edhe një sekret, apo hollësi. Rrethin e Ferrit ku unë kam dëshirë të prehem. Në kërkesën time Shën Pjetrit, kuptohet me mik, i kam kërkuar të më çojë në Rrethin e Parë të Ferrit. Jo se është më mirë, pasi Ferri –Ferr- mbetet. Por nisur edhe nga fakti, se këto tridhjetë vjet, këta të mavrisurit, politikanët tanë, ua kanë bërë jetën ferr të gjithë shqiptarëve. Pra kuptohet, që ne jemi ambientuar me ferrin dhe nuk duam në vend tjetër. Nëqoftëse tek i pari janë zënë vendet, atëhere, mundësisht tek i gjashti, që më kanë thënë se ka vende të lira.

        Tani përsëri ju mund të thoni: Pse tek i gjashti dhe jo tek ndonjë tjetër? Përgjigja është e thjeshtë, se rrathët e tjerë janë dinga dhe mëkatarët janë bërë kapicë. Ndoshta, edhe ndonjë nga ju, që më pyesni, e keni vendin tek ndonjë nga ata. Psh, meqënëse unë asnjëherë nuk kam qënë konformist, apo servil dhe lajkatar, siç thotë populli; nuk më çon njeri në Rrethin e Tetë. Atje shumë mirë mund të venë ata që e mbajnë në këmbë këtë kryeministër, lajkatarët, servilët dhe gjithë oborrtarët e tjerë.

        Ja se çfarë thotë Danteja për këtë skotë të urryer të racës njerzore, të cilën e vendos në Lugjen e Dytë të Rrethit të Tetë të Ferrit:

“Si myku ngjeshej brigjeve për t’gjatë avulli i dendun që nga fundi afshon-t’vinte me vjellë tue pa e tue nuhat…Mbrijtëm aty e pamë në  atë humnerë njerz zhyt në m…, thue se këtu kanë shfrye gjirizet e mbarë botës menjëherë…”Miklimet m’hodhën n’këtë gjiriz t’pështirë, kjo gjuhë kurr s’më pushoi lajka të qesë.”[7]

Petro Dangëllia   dt.26.09.2019

[1] Dante Aligeri,“Komedia Hyjnore”.Bot.Shq.Argeta-LMG,2009,Përkth.lat.Pashko Gjeçi Ferri,K.V,v.4-12,f,46

[2] Dante Aligeri,“Komedia Hyjnore”.Bot.Shq.Argeta-LMG, 2009, Përkth.lat.Pashko Gjeçi, Ferri,K.VII,v.61-66,f,57

[3] Dante Aligeri,“Komedia Hyjnore”.Bot.Shq.Argeta-LMG, 2009,Përkth.lat.Pashko Gjeçi, Ferri,K.XII,v.101-106,f,82

[4] Dante Aligeri,“Komedia Hyjnore”.Bot.Shq.Argeta-LMG, 2009,Përkth.lat.Pashko Gjeçi, Ferri,K.XVII,v.1-12,f,105

[5] Dante Aligeri,“Komedia Hyjnore”.Bot.Shq.Argeta-LMG, 2009,Përkth.lat.Pashko Gjeçi, Ferri,K.XIX,v.1-4,f,115;K.XX,v.13-24,f,120;K.XXI,v.16-18,50-54,139,f,125,126,129;K.XXIX,v.73-84,f,171. 

[6] Dante Aligeri,“Komedia Hyjnore”.Bot.Shq.Argeta-LMG, 2009,Përkth.lat.Pashko Gjeçi, Ferri,K.XXXI,v.55-57,f,182; K.XXXIV,v.37-38,52-57,61-66,f.197-198 

[7] Dante Aligeri,“Komedia Hyjnore”.Bot.Shq.Argeta-LMG, 2009,Përkth.lat.Pashko Gjeçi, Ferri,K.XVIII,v.106-108,112-114,125-126,f,113-114;  

NJERIU DHE…

by

Nga Astrit Lulushi/
Njeriu, që nga koha kur fillon të kuptojë, ndiqet nga kundërthënie e paradokse; ai mendon se një ditë do të vdesë, por sillet sikur nuk do të vdesë kurrë; kur e sheh veten si qenie shpirtërore, ai është vërtetë i pavdekshëm, por nëse e mendon veten si materie, ai në fakt sheh vetëm gjysmën e vetvetes.
Njeriu provon kaq shumë gabime, kaq shumë pakënaqësi dhe kaq shumë dështimeve, dhe nuk është i gatshëm të pranojë përgjegjësitë e veta të jetës, e cila mbart me vete nevojën e vetë-analizës, vetë-korrigjimit dhe vetë-përmirësimit. Pa këto gjëra ai qëndron në dy këmbë, ecën në kohë, por nuk shkon gjëkundi.
Megjithatë, njeriu mund të bëjë çdo gjë. Fjalët ‘lehtësi’ e ‘vështirësi’ sikur janë krijuar nga një shtytje e brendshme e mistershme (gjuha), dhe duken si shpikje për ta zmbrapsur e thyer atë. Sepse natyra a kushdoqoftë krijuesi, kurrë nuk kërkojnë të pamundurën nga njeriu, as nuk i japin atij barrë që s’mund ta mbajë. Por atij i duhet të bëjë përpjekje të vetëdijshme për të përmirësuar veten.
Njeriu është një shpirt i mishëruar (frymë e futur në trup). Para mishërimit ai (shpirti) ekzistonte i bashkuar me format fillestare të ideve rreth së vërtetës, mirësisë dhe bukurisë; duke u ndarë prej tyre, shpirti mishërohet, duke e ruajtur dëshirën për t’u kthyer; idea e para-ekzistencës, e intuitës së paqartë të njeriut për një botë tjetër, lind pikërisht nga kjo dëshirë e shpirtit për t’u mishëruar në botën fizike dhe kthimit të tij përsëri në botën shpirtërore pas daljes nga trupi ose pas vdekjes.

SEKRETARI AMERIKAN I SHTETIT ANASHKALON SHQIPËRINË DHE KOSOVËN

by

 SEKRETARI AMERIKAN I SHTETIT MIKE POMPEO ANASHKALON SHQIPËRINË DHE KOSOVËN/

Nga Frank SHKRELI/                                           

Departamenti Amerikan i Shtetit (DASH) sapo njoftoi zyrtarisht se javën që vjen Sekretari Amerikan i Shtetit, Mike Pompeo do të vizitojë Ballkanin disa vende të Perëndimor.   Sipas itinerarit të njoftuar nga DASH, kryediplomati amerikan do të fillojë turnerun e tij me një vizitë në Itali dhe në Vatikan dhe pastaj do të ndalojë në Mal të Zi dhe në Maqedoninë e Veriut, duke e përfunduar vizitën në atë pjesë të Evropës me një vizitë edhe në Athinë të Greqisë.   E gjithë kjo vizitë do të zgjasë nga 1 deri me 6 tetor.

Sipas njoftimit të DASH, Sekretari Amerikan i Shtetit do të marrë pjesë në një simpozium të organizuar nga Shtetet e Bshkuara dhe nga Vatikani, në bashkpunim me disa organizata fetare, ku dhe pritet që Mike Pompeo të mbajë një fjalim me atë rast.   Si pjesë e vizitës së tij në Vatikan, Kryediplomati amerikan do të pritet n[ jk[ audience private nga Papa Françesku dhe do të takohet me Sekretarin e Shtetit të Vatikanit, Kardianlin Parolin dhe me Sekretarin përgjegjës për marrëdhëniet me Shtetet e Bashkuara, Kryeipeshkvin Gallagher.

Në Romë Sekretari Amerikan i Shtetit do të takojë Presidentin Italian, Mattarella, Kryeminsitrin Conte dhe Ministrin e jashtë të Italisë, Di Matteo.   Siç dihet, Sekretari Amerikan i Shtetit është me origjinë italiane dhe gjatë qëndrimit të tij në Itali ka vendosur të vizitojë edhe krahinën Abruzzo, prej nga ka prejardhjen familja e tij.

Nga Italia, Kryediplomati Amerikan do të udhtojë për në Ballkanin Perëndiomor, duke u ndaluar në Podgoricë të Malit të Zi, ku do të zhvillojë bisedime me Presidentin Gjukanoviq, me Kryeministrin Markoviq dhe me Ministrin e Jashtëm malazez, Darmanoviq.  Nga Podgorica, Mike Pompeo do të shkojë në Shkup të Maqedonisë së Veriut për bisedime me Presidentin e atij vendi, Pendarovski, me Kryeministrin Zaev dhe me zyrtarë të tjerë maqedonas.  Nga Shkupi, ai udhton për në Athinë ku edhe atje do të takohet me udhëheqsit më të lartë të Greqisë, Kryeministrin Mitsotakis, Ministrin e Jashtëm Dendias dhe Ministrine Mbrojtjes Panagiotopoulos.

Ndonëse gjatë këtij turneu, Sekretari Amerikan i Shtetit nuk do të jetë jo më larg se “një vrap pele” nga Tirana dhe Prishtina, për një arsye ose për një tjetër ka vendosur që të mos ndalojë në truallin shqiptar.  Unë besoj se arsyeja–se pse Sekretari Pompeo nuk do të shkojë në Tiranë dhe në Prishtinë– është ngërçi politik dhe gjëndja e mbrendshme kaotike politike, jasht kontrollit, për sa kohë tani në Shqipëri dhe deri diku edhe në Kosovë.   Jam i bindur se zyrtarët amerikanë u kanë thënë troç udhëheqësve më të lartë shqiptarë të Tiranës dhe Prishtinës se çfarë pritet prej tyre, për një vizitë të tillë — në takimet që patën në Nju Jork me diplomatët e lartë amerikanë, Mathew Palmer dhe Philip Reeker, ditët e fundit, gjatë punimeve të Asamblesë së Përgjithshme të Kombeve të Bashkuara.  

 I vetmi lajm pozitiv për marrëdhëniet dypalëshe, nga këto takime, ishte njoftimi nga Departamenti Amerikan i Shtetit se Shtetet e Bashkuara dhe Shqipëria do të zgjerojnë shkëmbimin e studentëve dhe studiuesve përmes Programit Fulbright.

Mos u vini vesh fotografive të botuara në portalet zyrtare të udhëheqsve të Shqipërisë dhe të Kosovës me zyrtarët amerikanë në Nju Jork dhe as mos i vini vesh as informacionit të botuar prej tyre dhe prej mediave pro-zyrtare të tyre, në të cilat flitet për bisedimet miqësore e të suksesshme, por nuk thonë asgjë për ato që mund tu kenë thënë atyre zyrtarët amerikanë.  Unë jam i bindur se Philip Reeker dhe Mathew Palmer, të pakën nga pikëpamja amerikane, ua kanë njehur një nga një “detyrat e shtëpisë” që duhet të bëjë kjo klasë politike në trojet shqiptare, nëqoftse me të vërtetë janë serioz, për bërjen një herë e mirë të reformave demokratike, të cilat do të çojnë, më në fund, Shqipërinë dhe Kosovën drejtë antarësimit në Bashkimin Evropian dhe në integrimet e përgjithshme euro-atlantike.

Nuk është mjaft të thuhet se gjatë bisedimeve, ata u siguruan se Shtetet e Bashkuara mbështesin reformat demokratike dhe rrugëtimin evropian të shqiptarëve, siç u shprehen zyrtarët shqiptarë, pas bisedimeve me diplomatët amerikanë.   Shtetet e Bashkuara kanë qenë në favor të kësaj politike tash 30- vjet, jo vetëm ç’prej shembjes së komunizmit, por edhe shumë më përpara.   Pyetja është nëse ju — kjo klasë aktuale politike – jeni të vullnetshëm dhe të gatshëm për një gjë të tillë.   Deri më sot, Tirana dhe Prishtina zyrtare, me veprimet e tyre, fatkeqsisht, e kanë treguar se nuk janë të gatëshëm as nuk kanë vullnetin e nevojshëm, as nuk janë serioz të ndërmarrin përgjegjësitë dhe detyrimet që u takojnë, për një rrugëtim të tillë, ashtu siç ka bërë pjesa tjetër e ish-vendeve komuniste të Evropës dekada më parë.

Anashkalimi i Tiranës dhe Prishtinës nga Sekretari Amerikan i Shtetit Pompeo, gjatë turneut të tij në Ballkanin Perëndimor javën që vjen, nuk është i pari anashkalim i tillë nga zrytarë të lartë amerikanë.   Gjatë vitit të kaluar dhe më heret, ka pasur raste të tjera që diplomatë dhe zyrtarë të lartë amerikanë nuk kanë vizituar kryqytetet shqiptare, megjithëse kanë vizituar shtetet fqinje aty afër.  Është pak e çuditshme kjo, pasi politika amerikane tenton gjithashtu që të trajtojë një politikë rajonale kur është fjala për Ballkanin Perëndimor.  Por, arsyen se pse Sekretari Amerikan i Shtetit Mike Pompeo nuk po viziton Shqipërinë e Kosovën gjatë turneut të tij në Ballkanin Perëndimor javën e parë të tetorit, mos e kërkoni në portalet zyrtare as në fejsbukun e zyrtarëve më të lartë shqiptarë, të cilët takimet me zyrtarët e lartë amerikanë në Nju Jork i përshkruan (të ilustruara me fotografi) si të suksesëshme dhe miqësore, ku sipas tyre mund të konstatohet se nuk ka asnjë problem në marrëdhëniet shqiptaro-amerikane.   Besoj se ky nuk është një pasqyrim i vërtetë i bisedimeve dhe as i gjëndjes së marrëdhënieve aktuale midis dy vendeve.  Ka një ndryshim të madh midis atyre që thuhen në publik dhe bisedimeve serioze që zhvillohen me dyerë të mbyllura.

Arsyen e anashkalimit të Tiranës dhe Prishtinës nga kryediplomati amerikan Pompeo gjatë vizitës së tij në Balllkan, kërkojeni në kollapsin ose shembjen e përgjithshme të rendit politik, sidomos në Shqipëri.   Kërkojeni në ngërçin politik shqiptar, në të dy anët e kufirit.  Kërkojeni në mungesën e normalitetit të gjëndjes së përgjithshme politike.   Kërkojeni, por jo vetëm, në trafikimin e drogës, në krimin e organizuar e në korrupsionin që ka përfshirë të gjitha nivelet e shtetit, të qeverisë dhe të shoqërisë në përgjithësi.   Kërkojeni, sidomos, në mungesën e sundimit të ligjit!   Kërkojeni në zbrazjen biblike të trojeve shqiptare, sidomos nga të rinjtë dhe të rejat shqiptare të cilët konsiderojnë se kjo klasë politike nuk u jep asnjë shpresë as përspektivë për një jetë normale në atdheun e tyre.   Jam i sigurt se në “ngrirjen” aktuale të zhvillimit normal të marrëdhënieve shqiptaro-amerikane po ndikojnë jo pak –duke u prekur ato negativisht edhe –flirtimet e udhëheqsve shqiptarë, – si në Shqipëri ashtu dhe në Kosovë — me influenca të huaja, siç janë Turqia, Rusia dhe Kina.  

Jeni ende me këmbë në kapërcyell.  Uluni nga kapërcelli, ose këndej ose andej!

Gjëndja aktuale e marrëdhënieve shqiptaro-amerikane në përgjithësi, duhet të shqetësojë të gjithë ata të cilëve me të vërtetë u interesojnë marrëdhëniet e mira midis dy kombeve tona.   Është një gjëndje e papranueshme, për të cilën disa prej nesh, shumë më heret, kemi shfaqur shqetësimin tonë.   Por ja, fatkeqsisht, ku jemi sot, shqetësimi po vërtetohet.   Koha është tani që ky rrugëtim aktual i pa dëshirueshëm në marrëdhëniet e “ngrira” amerikano-shqiptare, të ndryshojë para se të jetë vonë.   I takon kësaj klase politike të veprojë, sa më shpejt, aq më mire që këto marrëdhënie të vendosen në shinat e duhura. Marrëdhëniet e ngrira midis Shteteve të Bashkuara dhe shqiptarëve nuk janë në interesin afat shkurtër dhe as afat gjatë të Shqipërisë, të Kosovës dhe as të shqiptarëve në përgjithësi!

KOSOVA SHTET SOVRAN DHE I PAVARUR

by

KUJTESA HISTORIKE- REFERENDUMI: KOSOVA SHTET SOVRAN DHE I PAVARUR/

Referendumi i organizuar me 1991 dha kete rezultat: Pro 99,87%: Kosova Shtet Sovran dhe i Pavarur*

-Para 28 viteve, nga 26 deri në 30 Shtator 1991, në Referendum dolën 914.802 veta ose 87,01% e 1.051.357 qytetarëve me të drejtë vote, për Kosovën Shtet Sovran dhe i Pavarur votuan 99,87%./

-Presidenti historik Dr. Ibrahim Rugova në intervistën ekskluzive para çerek shekulli: Referendumi, akt që e afirmoi tutje dhe është një garanci për realizimin e pavarësisë së Kosovës/

-Raportimet për Referendumin në gazetën e rezistencës “Bujku”, që nisi të dilte në Prishtinë nga 18 Janari i vitit 1991, e pasonte dhe sfidonte ndalimin e dhunshëm nga Serbia  të gazetës tradicionale, të parë e të vetme të përditshme shqipe në Kosovë Rilindja/ 

SPECIALE-Gazeta DIELLI nga korrespondenti në Kosovë Behlul JASHARI

PRISHTINË, 27 Shtator 2019/ Kosova Shtet Sovran dhe i Pavarur u votua pro 99,87 për qind në Referendumin e mbajtur para 28 viteve, nga 26 deri në 30 Shtator 1991.

“Në Referendum dolën 914.802 veta ose 87,01% e 1.051.357 qytetarëve me të drejtë vote, prej tyre për Kosovën Shtet Sovran dhe i Pavarur votuan 99,87%. Kundër kishin votuar 164 veta, ndërsa të pavlefshme ishin 933 fletëvotime”, konstatonte Komisioni Qendror për Zbatimin e Referendumit në raportin përfundimtar.
Gjithnjë sipas rezultateve zyrtare përfundimtare të shpallura nga Komisioni, në votim, për shkaqe dhe arsye të ndryshme, nuk dolën 136.555 votues apo veç 12,99% e qytetarëve të Republikës së Kosovës me të drejtë vote.  Për realizimin e Referendumit pati 1500 vendvotime me 450 njësi votuese.

 Referendumi u mbajt në rrethana të një okupimi të egër të regjimit të Beogradit dhe të një shtetrrethimi ushtarako-policor, ndërsa rezultatet e tij ishin mesazhe të fuqishme dhe të qarta të Kosovës për gjithë botën në një kohë të lëvizjes gjithëpopullore për liri, pavarësi e demokraci.

 “Është një akt që e afirmoi tutje dhe është një garanci për realizimin e pavarësisë së Kosovës, në të tashmen dhe në të ardhmen”,  theksonte  Presidenti historik i Kosovës, Dr. Ibrahim Rugova, në intervistën ekskluzive për Agjencinë Telegrafike Shqiptare, që e kam zhvilluar para çerek shekulli, në 22 Shtator 1994, në 3 vjetorin e referendumit të deklarimit të vullnetit kombëtar e demokratik të popullit të Kosovës.

Në intervistë, Presidenti  Rugova, i cili vazhdimisht theksonte se “zgjidhja më e mirë është Kosova e pavarur” fliste edhe për opcionin e “lidhjeve konfederale apo bashkimin me Shqipërinë” të Republikës së Kosovës, si dhe për një “politikë globale që sa më parë të bjerë muri mes shqiptarëve”.

 Vizionet e parashikimet në lëvizjen e luftën drejt Lirisë e Pavarësisë,  për të cilat fliste Presidenti historik i Kosovës Dr. Ibrahim Rugova në intervistën ekskluzive para çerek shekulli janë realizuar gjatë viteve: “Një mbrojtje për Kosovën…një protektorat ndërkombëtar” erdhi me ndërhyjen shpëtimtare të forcës më të madhe planetare – NATO-s, prirë nga Shtetet e Bashkuara të Amerikës dhe me vendosjen e administratës së Misionit të Organizatës së Kombeve të Bashkuara në vitin e madh të lirisë 1999. “Dhe, kjo kontribuon në realizimin e pavarësisë, për të cilën është deklaruar populli i Kosovës”, shprehej Presidenti Rugova në intervistë…dhe pavarësia u shpall në 17 Shkurtin historik 2008…

“Kosova filloi Referendumin për Sovranitet”, shkruante në kryetitullin në ballinë gazeta  historike  e rezistencës shqiptare “Bujku” pikërisht para 28 viteve në  numrin e 27 Shtatorit 1991. Legjenda e fotografisë ishte: “Deklarim demokratik për ardhmërinë e Kosovës: pamje e Prishtinës”. Aty, po në faqen e parë, në mbititull shkruante: “Udhëzime për mbajtjen e Referendumit”, e në titull theksohej: “Referendumi është legal dhe legjitim”.

Pas ditëve të zhvillimit të votimeve masive, gazeta “Bujku” njoftonte rezultatet e referendumit.

Me kryetitullin “Mbi 99 për qind të votuesve për Sovranitetin Shtetëror të Kosovës”, me mbititullin “Kumtesë e Komisionit Qendror për Zbatimin e Referendumit të Kuvendit të Republikës së Kosovës” dhe me nëntitullin “Prej më se 1 milion votuesve kanë dalë në votime mbi 870 mijë veta ose rreth 85 për qind e numrit të pëgjithshem të qytetarëve me të drejtë vote. Pjesëmarrja e serbëve dhe e malazezve në referendum ishte simbolike”, gazeta kosovare e rezistencës “Bujku” në numrin e 4 Tetorit 1991, në  faqen e parë shkruante:

“Deri më 3.10.1991 Komisionit Qendror të Kuvendit të Republikës së Kosovës për zbatimin e referendumit për Republikën e Kosovës shtet sovran dhe i pavarur i kanë arritur rezultatet e votimeve nga të gjitha komunat e Kosovës, si edhe nga disa shtete të Evropës Perëndimore, nga SHBA-të, Australia e të tjerë. Ende nuk kanë arritur rezultatet e votimeve të qytetarëve të Kosovës që punjnë përkohësisht në disa republika të tjera në Jugosllavi, si edhe nga disa shtete të Evropës Perëndimore, e supozohet se është një numër i madh i votuesve.

Nga përpunimi i rezultateve të votimimeve që kanë arritur mund të konstatohet se në Referendum, prej më tepër se 1 milion votuesve, kanë dalë më shumë se 870.000 votues, ose afër 85 për qind të numrit të përgjithshëm të qytetarëve me të drejtë vote. Për Kosovën shtet sovran dhe i pavarur janë deklaruar 99,8% të votuesve.

Rezultatet e votimeve dhanë mundësi të konstatohet se në Referendum ka dalë një numër i konsiderueshëm i myslimanëve, turqve, kroatëve, romëve e të tjerë, ndërsa pjesëmarrja e serbëve dhe e malazezve ishte simbolike.

Komisioni Qendror për zbatimin e Referendumit lut të gjitha komisionet, të cilat nuk i kanë dorëzuar ende rezultatet e votimeve, ta bëjnë këtë sa më shpejt të jetë e mundur, në mënyrë që të kumtohen rezultatet përfundimtare të Referendumit, thuhet në kumtesën e Komisionit Qendror për zbatimin e referendumit të Kuvendit të Republikës së Kosovës”.

Gazeta “Bujku”, që shkruante kështu, ishte “edhe gazetë edhe televizor”, si thoja atëherë gjatë ditëve të referendumit, meqë në terrin informativ, kur ishte i okupuar edhe Televizioni i Prishtinës, për ta “kompensuar” mungesën e televizionit botonim edhe shumë fotografi të mëdha nga votimet e atmosfera. Dhe thuaja e gjithë gazeta ishte referendum, me raporte të gjëra e fotografi të ekipeve të gazetarëve e korrespondentëve nga e gjithë Kosova që punonin ditë e natë e me sakrifica.

Në atë kohë gazeta e vetme e përditshme shqipe në Kosovë, “Bujku”, themelues-kryeredaktor i parë i së cilës isha, gazetë e rezistencës e pjesë e lëvizjes e luftës për liri, pavarësi e demokraci, me orientim e përcaktim të fuqishëm properëndimor euroatlantik, dilte nga 18 Janari i vitit 1991, e pasonte dhe sfidonte ndalimin e dhunshëm nga Serbia  të gazetës tradicionale, të parë e të vetme të përditshme shqipe në Kosovë Rilindja

Që atëherë nisëm edhe bashkëpunimet me Agjencinë Telegrafike Shqiptare, të parat bashkëpunime të një media të Kosovës me një media të Shqipërisë…

Vendimin për mbajtjen e Referendumit për Kosovën shtet sovran dhe i pavarur e mori Kuvendi Kosovar në ekzil, në marrëveshje me subjektet politike në Kosovë, në mbledhjen e 22 Shtatorit 1991, mbajtur në Slloveni. Kuvendi i Kosovës kishte dalë në ekzil pasi kishte miratuar Deklaratën Kushtetuese për pavarësi të 2 Korrikut dhe Kushtetutën e Republikës së Kosovës të 7 Shtatorit 1990, që u pasuan edhe me zgjedhjet e para shumëpartiake parlamentare e presidenciale të 24 Majit 1992.

Në krye të Kuvendit të Kosovës në atë kohë të vendimeve e ngjarjeve historike drejt lirisë dhe pavarësisë ishte Ilaz Ramajli, i cili në një intervistë ekskluzive që kam zhvilluar ka  vlerësuar se Referendumi u organizua shumë mirë, megjithëse mbahej në rrethana të një okupimi të egër të Serbisë në Kosovë.

“Para Referendumit, edhe Deklarata Kushtetuese e 2 Korrikut dhe Kushtetuta e Republikës së Kosovës e 7 Shtatorit 1990, jo vetëm që ishin akte kushtetuese juridike, por në kohën kur u nxorën ishin edhe akte mbrojtëse dhe pozicionuese në raport me situatën e krijuar në ish Jugosllavi”, ka theksuar Ramajli.

Nga shpërbërja e ish Jugosllavisë, nga elementet konstituive me të drejtë vetoje të federatës, mes të cilave ishte edhe Kosova që u bë shtet, shtete të reja të rajonit dolën edhe Sllovenia, Kroacia, Bosnja e Hercegovina, Maqedona, Mali i Zi dhe Serbia.

“Mbajtja e referendumit dhe rezultatet e tij jo vetëm që mundësuan ndryshimet kushtetuese me të cilat Kosova u shpall shtet sovran e i pavarur dhe u rrumbulaksua korniza kushtetuese e ligjore lidhur me këtë por ishte edhe një mesazh i fortë dhe shumë i qartë për Serbinë dhe gjithë botën se populli i Kosovës më asnjëherë nuk dëshiron të jetë nën kontrollin e të tjerëve, por është përcaktuar fuqishëm që shteti i tyre, Kosova, të jetë shtet sovran dhe i pavarur”, është shprehur Ramajli.

Këshilli Koordinues i Partive Politike të Kosovës kishte marrë vendimin politik për organizimin e Referendumit gjithëpopullor dhe për këtë qëllim u emërua Komisioni Qendror. Kryetar i Komisionit Qendror për Organizimin e Referendumit ishte Ramush Tahiri, përfaqësues i Partisë Shqiptare Demokristiane të Kosovës.

“Në këtë Komision kanë qenë të gjithë përfaqësuesit e partive politike të Këshillit Koordinues. LDK në Këshillin Koordinues ka pasë tre përfaqësues, Ibrahim Rugovën si kryetar të Këshillit Koordinues, Fehmi Aganin dhe Ali Aliun. Partia Fshatare është përfaqësuar nga kryetari Hivzi Islami, Partia Socialdemokrate është përfaqësuar nga Shkëlzen Maliqi, Partia Parlamentare është përfaqësuar nga Veton Surroi dhe Partia Shqiptare Demokristiane ku unë kam qenë përfaqësues”, ka deklaruar Tahiri në një intervistë televizive në Klan Kosova në 28 vjetorin e fillimit të Referendumit.

Ndërsa, Rifat Blaku atëherë anëtar i Komisionit Qendror për mbajtjen e Referendumit vlerëson se, “një barrë të madhe, por edhe meritë të veçantë për punën për mbarëvajtjen e Referendumit e kishin Këshillat lokale komunale për Referendum”.

 Blaku, në shkrimin ekskluziv në gazetën tradicionale të Kosovës Rilindja – botim special në 90 vjetorin e Pavarësisë së Shqipërisë, në 28 Nëntor 2002, përkujtonte edhe se, rezultatet përfundimtare të Referendumit janë shpallur nga Kuvendi i Kosovës në 18 Tetor 1991, kur është shpallur edhe Qeveria e Kosovës në ekzil.

Pas Referendumit, në 11 Tetor 1991 është miratuar e nënshkruar Deklarata politike e Këshillit Koordinues të Partive Politike Shqiptare në Jugosllavi, kryetar i të cilit ishte Ibrahim Rugova. “Njëmbëdhjetë partitë politike shqiptare, anëtare të Këshillit Koordinues të Partive Politike Shqiptare në Jugosllavi, duke shprehur vullnetin politik të popullit shqiptar për zgjidhjen e çështjes shqiptare dhe për gjendjen aktuale në Jugosllavi”, siç theksohej në Deklaratën politike, shpreheshin për këto tre opsione:
“1. Nëse nuk ndryshohen kufijtë e jashtëm e as ata të brendshëm të Jugosllavisë, duhet të ekzistojë Republika e Kosovës si shtet sovran dhe i pavarur, me të drejtë bashkimi në lidhjen e shteteve sovrane në Jugosllavi. Pjesët e popullit shqiptar që mbesin të jetojnë në Maqedoni, në Mal të Zi dhe në Serbi do të kenë statusin e popullit shtetformues dhe të gjitha të drejtat që dalin nga kjo.
2. Nëse kufijtë e jashtëm të Jugosllavisë nuk ndryshojnë, por ndryshojnë kufijtë e brendshëm ndërmjet republikave, atëherë kërkesë është Republika Shqiptare në Jugosllavi, e ndërtuar mbi bazën e parimit etnik dhe të parimeve të tjera që vlejnë për serbët, sllovenët dhe popujt e tjerë të Jugosllavisë.
3. Nëse ndryshojnë kufijtë e jashtëm të Jugosllavisë, atëherë populli shqiptar në Jugosllavi, përmes deklarimit të përgjithshëm me plebishit, do të vendosë për bashkimin e territoreve në të cilat jeton Shqipëria dhe kështu do të krijohet shteti integral shqiptar në Ballkan në kufijtë e tij etnikë.”

Tani, pas 28 vitesh të Refrendumit historik për Shtet Sovran dhe të Pavarur, Kosova është e lirë prej mëse 20 vitesh, nga qershori 1999 i përfundimit të luftës e  hyrjes së forës shpëtimtare paqeruajtëse të NATO-s dhe e pavarur prej mëse 11 vitesh nga 17 Shkurti 2008, e njohur deri tani nga 116 shtete të botës, anëtare të OKB-së.

*Per me shume foto shih ne Fb

PËRSE DUHET TA MBËSHTESIM MARKO KEPIN, DUKE FILLUAR NGA KJO E DIELË?

by

– Do të jetë në Turpin tonë nëse nuk e nxjerrim Markon fitues në këtë betejë elektorale, jemi apo jo në zonën e tij elektorale. Le t’i kthejmë Marko Kepit një pjesë të borxhit Kombëtar,që i kemi në gjithë këto vite të aktivitetit të tij Kombëtar në Shtetet e Bashkuara të Amerikës!

– Jo vetëm Marko, por edhe komuniteti ynë, të Dielën, do të jemi në gjykimin e Partisë që përfaqëson Marko (Republikane), por edhe në sytë e medias amerikane, që teston dhe sheh forcën e kandidatit. Sa të organizuar do të jemi, sa shumë do të jemi në numër, çfarë do të prezantojmë të Dielën, do të vendos për qëndrimin që do të mbajë Partia Republikane ndaj kandidatit tonë, do t’i japë apo jo përkrahje.

              Bashkatdhetari ynë Marko Kepi duhet mbështetur në garën e tij për në Parlamentin e Nju Jorkut (Anasmbelman) sepse është djalë i aftë, i përgatitur, Shqiptar i Mirë, qytetar amerikan i respektuar. Kjo betejë që ai nis të Dielën me 29 Shtator, më shumë na shërben Ne Shqiptarëve se sa vetë Markos. Për të është më shumë se sa sakrificë.

Të gjithë jemi dëshmitarë për Atdhedashurinë e Tij.Ka më shumë se sa një dekadë që na prinë në Paradat e përvitshme, ku Avenjuja e Gjashtë në Manhattan dominohet nga Flamujtë tanë dhe nga Shqiptaria e zjarrrtë. Kush e ka organizuar atë! Marko me Rrënjët Shqiptare, me djemtë dhe vajzat që bëjnë më shumë se ç’bëjnë vetë shtetet shqiptare.

Do të jetë në Turpin tonë nëse nuk e nxjerrim Markon fitues në këtë betejë elektorale, jemi apo jo në zonën e tij elektorale. 

     Vetëm në zonën e tij elktorale në Staten Island dhe në pjesën e Brooklyn-it,thonë se jetojnë më shumë se 30 mijë shqiptarë! Markos i duhen vetëm 1500-2000 vota. Askush nuk do të na e falë dështimin, prandaj të gjithë duhet të ngrihemi në këmbë dhe të kontribuojmë.

          Shoqatat shqiptare, veçanërisht ato, që janë në atë zonë elektorale, por edhe të tjerat në trishtetshin, të Dielën duhet t’i kenë aty të gjithë anëtarët e tyre së bashku me familjet dhe fëmijët. Shkollat shqipe, po ashtu. Ka të bëjë shumë prezantimi i çeljes së fushatës, numëri i pjesmarërsve.

Jo vetëm Marko, por edhe komuniteti ynë do të jenë në gjykimin e Partisë që përfaqëson Marko (Republikane), por edhe në sytë e medias amerikane, që teston dhe sheh forcën e kandidatit. Sa të organizuar do të jemi, sa shumë do të jemi në numër, çfarë do të prezantojmë të Dielën, do të vendos për qëndrimin që do të mbajë Partia Republikane ndaj kandidatit tonë, do t’i japë apo jo përkrahje. Nëse ne jemi forcë e madhe të Dielën, gjërat do të jenë më të lehta më pas. I sillni dhe fëmijët në çeljen e fushatës së Marko Kepit. Do të jetë një ditë e veçantë; artistët tanë do të jenë aty për të performuar dhe për të ndezur fushatën.

Le t’i kthejmë Marko Kepit një pjesë të borxhit Kombëtar,që i kemi në gjithë këto vite të aktivitetit të tij Kombëtar në Shtetet e Bashkuara të Amerikës!

 NGA ZEMRA EUROJMË: FITOFSH DJALË I SHQIPTARISË!

MOS HARRONI: TË DIJELËN, 29 SHTATOR 2019, ORA 12.00 P.M.

ADRESA: 1196 HYLAN BLVD, STATEN ISLAND, NY 10305