dgreca – Page 890 – Dielli

KUJTESA E 11 SHTATORIT

September 11, 2019 by dgreca

Amerikanët shënojnë përvjetorin e sulmeve të 11 shtatorit/

Amerikanët po shënojnë të mërkurën 18 vjetorin e sulmeve terroriste të 11 shtatorit të vitit 2001, që lanë pas vetes rreth 3 mijë të vrarë në New York, Virginia dhe në Pennsylvania.

Presidenti Donald Trump, do të nderojë viktimat me një minutë heshtje në Shtëpinë e Bardhë, para se të marrë pjesë në një ceremoni në Pentagon për familjet e atyre që u vranë kur terroristët e al-Qaidas përplasën mbi ndërtesë një avion të rrëmbyer.

Në New York, qindra të mbijetuar dhe familjarë të atyre që u vranë, do të mblidhen në vendin ku ngriheshin kullat binjake të Qendrës Botërore të Tregtisë, para se të rrëzoheshin nga goditjet e dy avionëve të udhëtarëve të rrëmbyer nga al-Qaida. Nënpresidenti Mike Pence, pritet të marrë pjesë në një ceremoni në Shanksville të Pennsylvanias, afër vendit ku avioni i United Airlines u rrëzua, pasi që udhëtarët e morën nën kontroll nga terroristët që e kishin rrëmbyer.

Nëntëmbëdhjetë burra të lidhur me al-Qaida i kryen rrëmbimet.

Sulmi më vdekjeprurës në truallin amerikan, pas atij në Pearl Harbor në vitin 1941, ndryshoi përgjithmonë botëkuptimin e Amerikës për sigurinë dhe nxitën presidentin e atëhershëm George W. Bush t’i shpallë luftë terrorizmit dhe të pushtojë Afganistanin.

Forcat e koalicionit të drejtuara nga Shtetet e Bashkuara rrezuan talebanët nga pushteti në Afganistan, por konflikti ende po vazhdon duke u shndërruar në luftën më të gjatë amerikane. Përfaqësuesit e Shteteve të Bashkuara dhe talebanët kanë zhvilluar kohët e fundit bisedime për paqen, por derisa hollësitë e një marrëveshjeje të mundshme po bëheshin publike, presidenti Donald Trump anuloi takimet e planifikuara me talebanët dhe zyrtarë afganë, për shkak të sulmeve të vazhdueshme të talebanëve në Kabul. Shtetet e Bashkuara këkruan udhëheqësin e al-Qaidas Osama bin Laden për vite me ardhë pas sulmeve dhe në maj të vitit 2001 forcat amerikane bastisën një kompleks në Abbottabod të Pakistanit ku e vranë atë.

Kosova përkujton sulmet e 11 shtatorit në SHBA

Ambasadori amerikan në Prishtinë, Philip Kosnett ka përkujtuar sulmet e 11 shtatorit të vitit 2001 në Shtetet e Bashkuara, duke thënë se ato kanë pasur ndikim në gjithë komunitetin ndërkombëtar dhe se amerikanët nuk kanë qenë viktimat e vetme të tyre.

“Njerëz nga 77 shtete kanë vdekur në sulme. Ky ka qenë sulm mbi civilizimin”, ka thënë ai.

Ai ka thënë se amerikanët do të kujtojnë gjithmonë mbështetjen që ka pranuar SHBA-ja nga gjithë bota, duke përmendur edhe Kosovën.

“Pas sulmit, në gjithë Kosoën njerëzit janë mbledhur në përkrahje të SHBA-së, kanë ndezur qirinj dhe kanë dhuruar gjak. Disa qytetarë të Kosovës edhe kanë qenë vullnetarë për t’iu bashkuar ushtrisë amerikane në Luftën Globale kundër Terrorizmit”, ka thënë Kosnett përmes një deklarate.

Përveç tjerash, ai ka shtuar se kjo mbështetje ka qenë konfirmim i lidhjes së fortë të njerëzve të Amerikës dhe popullit të Kosovës.

Gjatë ditës në Prishtinë në oborrin e Qeverisë së Kosovës është inauguruar memoriali “Kosova kujton”.

Në ceremoni, kryeministri në detyrë i Kosovës, Ramush Haradinaj tha se “akti terrorist në Nju Jork të SHBA-së ishte goditje ndaj institucioneve dhe popullit amerikan, ndaj vlerave të lirisë dhe demokracisë, mbi miqtë tanë dhe ne”.

Si pasojë e sulmit terrorist të 11 shtatorit në Kullat Binjake në Nju Jork kanë vdekur rreth 3,000 persona.

Ky sulm është kryer nga një grup prej 19 islamistëve radikalë, 15 prej të cilëve ishin nga Arabia Saudite, dy nga Emiratet e Bashkuara Arabe, një nga Egjipti dhe një nga Libani.

Militantët e Al-Kaidës kanë marrë përgjegjësinë për këtë sulm.(kortezi-Zeri i Amerikes-Evropa e Lire)

KRAVATA ME KULLAT BINJAKE

September 11, 2019 by dgreca

NGA ASLLAN BUSHATI/

Sot është 11 shtator 2019. Kjo datë më sjell në kujtesë momentet, minutat e ditën më të hidhur në jetën e qytetit të NY – 11 Shtatorit 2001. Ditë në të cilën, barbarët sulmuan kryeqytetin e botës, lirinë e tij, qytetarët e pa armatosur, (përfshi edhe familjen time e mu si gjithë njujorkezët). Ata rrëzuar përtokë kullat binjake që përbënin rrokaqiejt e krenarinë e qytetit. Kjo ishte shumë e dhimbëshme, madje e pa krahasueshme me asgjë tjetër në historinë e këtij qyteti. Gati tri mijë jetë njerzish të pafajshëme u ndërprenë në mes nga terroristët, në një kohë kur Lufta e Ftohtë kishte njëmbëdhjetë vite që kish mbaruar.

Unë punoja në: 125 Barclay street (Unioni 32BJ), në katin e dytë nga ora 5 pas dite deri në 12:30 të natës. Ky pallat shtatkatësh ishte vetëm 100 metra larg (në vijë ajrore) në veri të Kullës numër një. Sikur sulmi të kishte ndodhur në kohën e punës time, unë sot ndoshat nuk do të isha gjallë e nuk do të mundesha ti shkruaja këto rreshta. Por fati e deshi që në momentin e goditjes së Kullës parë, të isha tek sekretaria e Shkolla “Kolombi” ku studionte vajza ime Arela. U ndodha atje për të dorëzuar një kopje të librezës vaksinave të vajzës, kur në TV pashë zjarrin në faqen anësore të Kullës. U ktheva menjëherë me makinë në shtëpi dhe e parkova makinën në katin e gjashtë të pallatit parking afër shtëpisë. Instiktivisht sapo dola nga makina hypa në taracën e parkingut për të parë me sy të lirë Kullën e “plagosur”. Por c’të shihja, një avion tjetër goditi edhe Kullën tjetër. Zbrita shpejte nga taraca me ndjenjën e tmerrit në zemër e në shpirt për të shkuar në shtëpi e për të parë në TV se cfarë po ndodhte në qytetit tonë aq të dashur për ne. Në mendje kisha vetëm sulm terrorist, madje këtë hamendësim pak më parë, ja thashë edhe sekretares së shkollës së vajzës e cila ishte bashkëshortrja e një nënkoloneli amerikan në lirim.

Shkova para televizorit dhe isha tërësisht i shokuar kur pashë rrëzimin përdhe të të dy gjigandëve të qytetit shoqëruar me një re madhore tymi e pluhuri sikur të ishte një minishpërthim bërthamor. Lotët më shkonin curk e pandalesë me ato që po më shihnin sytë, momente të cilat skam për ti harruar kurrë në jetën time.

Që nga kjo kohë , nuk shkova më për të punuar në 125 Barclay street për arsye se jugu i qytetit ishte i mbyllur nga gjëma që kishte ndodhur. Por më 18 janar 2002 na njoftuan të shkonim në punë ku në hyrje të pallatit (building) na priti Kryebashkiaku i NY Rudi Xhuliani. Na takoi të gjithëve, na falenderoi për punën që po bënim për reabilitimin e shpejtë të qytetit dhe na porositi të punonim me masa të rrepata mbrojtëse si syza e maska mbrojtëse .

Kur hyra në katin e dytë , para syve mu cfaq një mjedis i tjetërsuar sikur të isha në një planet tjetër. Nuk kishte mbetur asgjë xham e kornizë dritaresh, asnjë foto, banderolë e afishe muri dhe pluhuri ishte gati tre- katër gisht i trashë në të gjithë ambientin. Pluhuri kishte ngjyrë të hirtë me xixëllime si një minierë xeherorësh. Vinte një erë e keqe e cila pa maska në hundë nuk durohej. Na u desh një kohë jo e vogël, që pallati (32BJ) ta rimerrte veten e të kthehej në gjendjen e mëparëshme.

Parë nga këndshikimi i sigurisë, ky sulm mbi kullate NY e mbi Pentagon, tronditi jo vetëm qytetarin e thjeshtë në NY e SHBA, por solli traum edhe në të gjithë botën. Madje ai shembi edhe bazat e mendimit të më parshëm ushtarak për luftën kundër terrorizmit, duke e parë tashmë atë si një metodë e re lufte në kushte të vecanta . Sulmi solli me vehte riorganizim të forcave e të mjeteve në SHBA, NATO e shumë vende të botës. Solli harxhim të ri fondesh e mjetesh materiale e monetare dhe një ndryshim mentaliteti ku bota dukshëm është më pak e sigurtë edhe nga mjetet e përdorimit të përditshëm. Kjo ndodhi sepse një mjet i thjeshtë i transportit publik sic është aeroplani i transtportit të udhëtarëve u kthye në një armë vrasëse masive . Ky mentalitet u përpunu e u përhap nga mendje njerzore primitive, të cmendura, antihumane si Osaman Bin Laden, alkaida etj. Por më e keqja është se ai u këthye në një teori e praktikë, një eksperiencë shumë negative , të frikëshme dhe shumë të rrezikëshme për të sotmen dhe të ardhmen e krejt njerzimit.

Në kohen që dy gradacelet gjigande gërvshtnin qiellin e NY, pata blerë një gravatë në të cilën ishin pikturuar ata në ngjyrat e flamurit amerikan. Këtë gravatë tashmë e përdoroj vetëm një herë në vit më 11 shtator. Në pjesën e prapme kam ngjitur një shënim”REMEMBER” që në shqip do të thotë “kujtoj”. Sa herë që familjarët, miqt dhe kalimtarët e rastit shprehin ndjesi për të , unë e kthej nga prapa duke ju cfaqur”REMEMBER”. Këtë zakon të përvitshëm do ta bëj sa te jemë gjallë në kujtim të atyre që humbën jetën dhe në kujtim të qytetit tim të dashur NY.

Cosa Nostra Albania….

September 11, 2019 by dgreca

Nga Dritan Demiraj/

Kodi i heshtjes “OMERTA” i “Cosa Nostra Albania”, filloi të thyhet!!! Me gjithë kujdesin e Shtatlartësisë dhe organizatës “Rripjellja” për të mbrojtur anëtarët e “familjeve mafioze”për t’i patur nën kontroll nëpërmjet ligjit të heshtjes apo “Omerta”, frika e vendosjes së “byzylykëve, nxorri protagonist dy ish-ministra të qeverisë “HASHASHI”!!!

Gjatë seancës gjyqësore, ish-ministri i Brendshëm nën hetim Saimir Tahiri thekson se; “Unë, me shkresën e datës 29/10/2013, në kohën që kam qenë ministër i Brendshëm, me datë 29/10/2013, i kam dërguar një shkresë konfidenciale koleges sime, ish-ministres Mimi Kordheli. Në këtë shkresë, e kam vënë në dijeni se radarët e ushtrisë nuk punonin, pasi Policia kishte konstatuar mosfunksionimin e tyre, duke hapur një rrugë të re për trafikun e drogës.”

Por, shoqja Kordheli si gjithmonë e vëmendshme për t’u ekspozuar si “puritane” vrapon në media (News 24 TV), për të larguar përgjegjësitë e saj dhe për t’u mbrojtur nga “gjynahet” e pafundme që i ka krijuar Forcave të Armatosuara dhe Shqipërisë.

Me të ardhur në pushtet, ti anullove në mënyrë të jashtëligjshme procedurën e mirëmbajtjes së Sistemit të Vëzhgimit të Hapësirës Detare me arsyetimin e “mungesës së fondeve”, ku fondet ishin të planifikuara në buxhet por i bëre tualet modern për t’u relaksuar në MM. Pse nuk flisni për proceduara dhe fondin shumë më të lartë që përdorët disa muaj më vonë, duke ia dhënë këtë shërbim një dyqani celularësh, e cila ishte përjashtuar nga procedura dhe duke larguar gjigantin botëror “Lockheed Martin Corporation”

Ju treshja e mamuthëve të korrupsionit në Ministrin e Mbrojtjes (Kodheli – Kraja – Pijaneci Bazo), me skema-proçedura të ngjashme korrupsioni “Cosa Nostra”, keni cënuar sigurinë kombëtare duke nxjerrë totalisht jashtë funksionit sistemin e Monitorimit të Hapësirës Detare.

Gjithashtu, arritët deri aty sa mashtruat disa herë dhe AKPE-in në lidhje me ndërtimin, instalimin dhe shfrytëzimin e dyanshëm (civil dhe për FA) të sistemeve të radio-komunikimit për shërbime me qarqe dixhitale brenda territoreve ushtarake të FA dhe përdorimin e frekuencave të “pa lejuara” nga subjekti privat për vitet 2014-2015 për interesa përdorimi nga FA.

Për rikujtesë të Mimi Kordhelit dhe për mbarë opinionin kombëtar shqiptar, gjatë kohës që kam ushtruar detyrën e Ministrit të Brendshëm me shkresën datë 31/08/ 2017, ju kam informuar dhe ju kam kërkuar të merrni urgjentisht masa për vënien në funksionim të Sistemit të Monitorimit të Radarëve, pasi sipas konstatimit të Drejtorisë së Përgjithshme të Policisë Shtetit, sistemi ishte jashtë funksionimit dhe madje prek kohësh, pasi sipas tyre kjo bëhej me qëllim të mos ndalohej trafiku i drogës në vendin tonë, në të cilin dhe ti ke “kontribuar” jo pak.

Deri më sot, opinion publik nuk është sqaruar asnjëherë mbi arsyet e shkarkimit tuaj si ministre, apo meqenëse e pate orientuar gabim kolegun dhe mikun tuaj Tahirin, duke i fikur radarët dhe ai shkoi në rrugë të gabuar apo nuk kishit drita, pasi çelësin e dritave e mbante Damian Gjiknuri i partisë me çunat problematik???

Dhe një këshillë, mos imito në fjalor lartgjatësinë tuaj, duke përdorur shprehjet e rëndomta “gjuajte nën brez” , pasi ju shquheni si “portiere” e stërvitur!!. Ju kujtoj se nëse drejtësia shqipëtare do të vihet ndonjë ditë, nuk do të kishte avokat që të të marrë në mbrojtje, pasi çështja do të ishte e humbur!

“Byzylykët” është mirë ti vajisni që mos tu shkaktojnë dhimbje! Sa për vënien e dorës për betim mbi Kushtetutë të ministrave hajdutë të kategorisë tuaj, e keni bërë Kushtetutën si “shami hundësh!!

Dritan Demiraj

USA.

Për të mbaruar punën në Ballkan

September 10, 2019 by dgreca

**Nga Akri Çipa/**
Shumë veta u surprizuan kur në datën 30 gusht Departamenti i Shtetit njoftoi se Sekretari Pompeo caktoiZëvëndës Ndihmës Sekretarin Matthew Palmer si Përfaqësues Special për Ballkanin Perëndimor. Ky njoftim vjen në një kohë kur dukej se vendimmarrësit në Washington do të vazhdonin me trendin e neglizhimit të gadishullit të Ballkanit – një rajon që vetëm dy dekada më parë shenjoi pikën më të lartë të lidershipit global të Shteteve të Bashkuara. Nëpërmjet vendimit për të caktuar një të dërguar të posaçëm, Shtetet e Bashkuara po tregojnë një dëshirë për të rimarrë rolin parësor në këtë rajon të rëndësishëm.
Në vitet 90’, SHBA kishte një rol parësor në gadishull dhe drejtoi ndërhyrjen e suksesshme që ndaloi spastrimin etnik serb në Kosovë. Por, pas luftës në Kosovë, SHBA humbi një pjesë të interesit për rajonin teksa ishte e shqetësuar me sfida të tjera globale. Teksa Shtetet e Bashkuara e ulën nivelin e rolit të tyre në rajon, disa konflikte mbetën të pazgjidhura dhe vazhdojnë të sfidojnë paqen dhe stabilitetin rajonal.
Me mbështetjen e Shteteve të Bashkuara dhe aleatëve perëndimorë, Kosova deklaroi pavarësinë në 2008, por Serbia refuzon të njohë sovranitetin e Kosovës. Refuzimi serb për të njohur Kosovën mbështetet në mënyrë aktive nga Rusia, e cila e bllokon Kosovën nga anëtarësimi në Kombet e Bashkuara nëpërmjet vetos në Këshillin e Sigurisë së OKB-së. Ndërkohë, Rusia vazhdon ta shfrytëzojë këtë konflikt për të ruajtur influencën në rajon dhe për të frenuar integrimin e vendeve të rajonit në organizatat perëndimore. Vetë zoti Palmer e identifikoikonfliktin ndërmjet Kosovës dhe Serbisë si një nga prioritetet e tij.
Sfida tjetër madhore që Përfaqësuesi Special do duhet të adresojë është situata në Bosnjë-Hercegovinë. Marrëveshja e Dayton-it e ndërmjetësuar nga SHBA ishte efektive për t’i dhënë fund luftës në Bosnjë në vitin 1995, por ishte më pak resultative në krijimin e mundësive për qeverisje efektive në vend. Kjo është shumë e dukshme sot teksa Bosnja ende nuk ka një qeveri funksionale pas më shumë se dhjetë muajsh që nga zgjedhjet e përgjithshme.
Rritja e angazhimit të Shteteve të Bashkuara në Ballkan do të përballet pashmangshmërisht me sfida dhe kundërshtime nga disa prej aktorëve që janë të investuar në status quo. Një shenjë e parë kundërshtimi u shprehnga Miroslav Lazanski, Ambasadori i Serbisë në Rusi, i cili u përpoq të ulë pritshmëritë e rolit potencial të SHBA në zgjidhjen e konflit ndërmjet Kosovës dhe Serbisë duke thënë se “problemi i Kosovës mund të zgjidhet vetëm nga ne.” Roli i ripërtërirë i Shteteve të Bashkuara shihet me skepticizëm edhe nga Milorad Dodik, lideri pro-rus i entitetit Republika Srpska brenda Bosnjës. Në fakt, është pikërisht Dodik që ka shfrytëzuar dobësitë e konstruktit institucional dhe ka bllokuar krijimin e një qeverie për hir të kundërshtimit për anëtarësimin e Bosnjës në NATO.
Nëse Përfaqësuesi Special i Shteteve të Bashkuara arrin të frenojë influencën ruse në Bosnjë dhe Serbi dhe arrin njohjen e Kosovës nga kjo e fundit, Shtetet e Bashkuara do të sigurojnë jo vetëm stabilitetin në Ballkan, por do të garantojnë edhe orientimin gjeopolitik të rajonit drejt perëndimit. SHBA ka kredibilitetin e nevojshëm për të promovuar angazhime konstruktive. Tashmë i takon Zotit Palmer që të bindë aktorët lokalë për t’u ulur në një tavolinë dhe për të ndërmarrë hapat e nevojshme për të zgjidhur konfliktet dhe çështjet e mbetura. Momenti është i përshtatshëm teksa kredibiliteti i SHBA përforcohet nga suksese në marrëveshjen ndërmjet Greqisë dhe tashmë-Maqedonisë së Veriut në lidhje me emrin e kësaj të fundit – një marrëveshje që zgjidhi një nga konfliktet e tjera kryesore të rajonit dhe që hapi rrugën për fillimin e procesit të hyrjes së Maqedonisë së Veriut në NATO.
Ndërhyrja amerikane dy dekada më parë ishte kritike për të ndaluar mizoritë në Ballkan dhe për të shtruar rrugën drejt paqes. Tani, Shtetet e Bashkuara kanë një mundësi unike për të zgjidhur çështjet e mbetura, për të luftuar influencat malinje që pengojnë progresin e rajonit, dhe për ta orientuar përfundimisht atë drejt perëndimit. Në këtë mënyrë, do të ofrojnë edhe njëherë lidershipin për të cilin ka nevojë globi dhe, sigurisht, Ballkani.

***Përkthyer nga*** ***International Policy Digest***.

Marko Kepi, deputeti i ardhshëm i Parlamentit në Nju-Jork

September 10, 2019 by dgreca

Nga Kozeta Turishta- Nju Jork*/

Me 29 Shtator ora 12:00 në Staten Island (1196 Hylan Boulevard Staten Island NY 10306) Organizohet mitingu i madh, ku zyrtarisht do hapet fushata e kandidatit për Deputet në Parlamentin e Shtetit të Nju Jork-ut Marko Kepi, ku pritet të ketë një pjesëmarrje të madhe të komunitetit shqiptar në mbështetje të kandidaturës së tij, me shpresën e madhe që me votat e shqiptaro-amerikaneve do fitojë zgjedhjet e qershorit të 2020-tës.

Të Dielën e 8 shtatorit, në Staten Island të Nju Jork-ut, u mbodh komuniteti shqiptar për të mbështetur kandidaturën më të re postin e Assemblyman – të deputetit të Parlamentit në Shtetin e Nju jorkut Marko Kepi, i cili ka hapur zyrtarisht takimin e tij të parë duke prezantuar fushatën dhe pikat kryesore të kësaj gare politike e krahut të republikanëve.

Njerëz e emra të njohur e të suksesshëm shqiptarë ishin të pranishëm në këtë takim ku shprehen mbështetjene tyre të padiskutueshme për Kepin duke e konsideruar një mundësi të mirë për përfaqësimin e një shqiptari në politikën e Shtetit Njujorkez.

Marko, është shprehur tepër i nderuar dhe i lumtur që i është dhënë një mundësi ku do provojë veten në një arenë tjetër dhe pse ai e ka të qartë se e pret një punë e madhe dhe i duhet të punoj fort për t’a fituar këtë garë politke, por gjatë takimit Kepi u shpreh tepër i vendosur për t’i shkruar deri në fund fushatës së tij, por mbi gjitha ai theksoi se asgjë nuk është e mundur pa mbështetjen dhe dashamirësinë e komunitetit shqiptar veçanërisht të zonës së Staten Island.

Gjatë këtij takimi patëm mundësinë të takonim dhe nga afer Kongresmenin e njohur amerikan Michael Grimm, një ndër politikanët më të spikatur të politikës amerikane i cili është një ndër mbështetësit kryesor të fushatës së Marko Kepit, i cili ka shprehur hapur besimin e tij ndaj Kepit.

Marko Kepi, një emër aspak i panjohur për shqiptarët e Amerikës, si një ndër të rinjtë më aktivë ndaj promovimit dhe ruajtjes së kulturës dhe traditave shqiptare. Presidenti i Organizatës “Rrënjët Shqiptare” dhe organizatori kryesor i “Parades Shqiptare” në Neë York, prej 10 dekadash e njohur ndryshe si aktiviteti më i madh i vitit ku bën bashkë mijëra shqiptarë duke dedikuar tema të ndjeshme ndaj çështjeve të ndryshme shqiptare.

Marko Kepi, një djal i cili ka emigruar në një moshë të vogël së bashku me familjen e tij si të gjithë shqiptarët e tjerë i është dashur të ecë nëpërmjet vështirësive dhe sfidave të emigracionit por me ëndrra dhe ambicie të mëdha për të ardhmen.

Marko, i arsimuar në shkollat më të mira e të njohura të Nju-Jork-ut, e këmbëngulja e tij për t’u bë dikushi një ditë në tokën e premtuar nuk i mungoi, por studioi dhe punoi fort për t’a bërë realitet ëndrrën amerikane e pasi mbaroi studimet e larta shkëlqyeshëm, një ndër pasionet por dhe ëndrrat e tij në sirtar ishte që një ditë të bëhej Marins i Shteteve të Bashkuara të Amerikës, edhe pse shumë ëndërrojnë këtë titull por aspak e lehtë për t’a arritur, duhet të jesh tepër i kualifikuar për pranimin në këtë mision.

Marko Kepi ndër të tjera njihet për përfshirjen e tij në politikën amerikane, si një mbështetës i Partisë Republikane dhe Presidentit Donald Trump, shqiptari që gjithnjë ngre zërin e përfaqëson Shqipërinë e vlerat e saj në çdo aktivitet jo vetem shqiptar por dhe amerikan, ku e kemi parë të kontribuojë në çdo projekt ku në fokus ka Shqipërinë dhe Shqiptarët.

Markon, e kemi parë shpesh-herë të ftuar në televizionet më të njohura amerikane si Cnn dhe emisione të tjera si përfaqësues i Republikanëve të Nju-Jork-ut.

Marko, është shembulli më konkret i suksesit por edhe i sakrificës pasi e ka arritur çdo gjë me shumë punë pa i dhënë askush asgjë por vetëm nga këmbëngulja e tij, si një djalë tepër i talentuar dhe me këmbë në tokë sot është një emër dinjitoz që aspiron një të ardhme të sigurtë në shërbim të komunitetit shqiptar e si një histori frymëzuese per çdo të ri që duhet të di ta fitojë suksesin./ Dritare.net