Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

“Kosova do të jetojë përgjithmonë”

by

Sokol Paja/

New York, 23 Shtator 2023 – Presidentja e Republikës së Kosovës Vjosa Osmani Sadriu zhvilloi një takim të përzemërt me diasporën shqiptare në Shtetet e Bashkuara të Amerikës. Në “Empire Steak House” në Manhattan, presidentja e Kosovës znj.Osmani shoqërohej nga Zëvendëskryeministre & Ministre Punëve të Jashtme dhe Diasporës Znj. Donika Gërvalla-Schwarz, Ambasadori i Republikës së Kosovës në Uashington Ilir Dugolli dhe Konsulli i Përgjithshëm i Kosovës në New York Prof.Dr. Blerim Reka. Udhëheqësit e shtetit të Kosovës pasi falenderuan mërgatën për kontributin historik për shtetin e Kosovës e kombin shqiptar, apeluan për rritje të bashkëpunimit dhe fuqizim të lobimit në Shtetet e Bashkuara të Amerikës në interes të Kosovës. Përgjatë bisedave me kontributorë të çështjes kombëtare për dekada me radhë, përfaqësuesit diplomatik të shtetit të Kosovës ritheksuan nevojën e shtimit të përpjekjeve të diasporës, angazhim më të fortë dhe shtim të energjive në interes të promovimit të Kosovës në Shtetet e Bashkuara të Amerikës. “Falë dhe punës suaj në mërgatë e përpjekjeve të jashtëzakonshme, Kosova do të jetojë përgjithmonë” tha ndër të tjera Presidentja Osmani para mërgatës shqiptare në Amerikë.

Federata Pan-Shqiptare e Amerikës VATRA në këtë takim u përfaqësua nga Presidenti i Nderit Agim Rexhaj, anëtari i kryesisë Ilir Cubi, anëtari i Këshillit Gëzim Nika e vatranë të tjerë.

Reagim i Këshillit të Ambasadorëve Shqiptarë (KASH), lidhur me veprimet terroriste të bandave serbe në fshatin Banjske të Leposaviqit kundër Policisë së Kosovës

by

Tiranë, 24 Shtator 2023/

Këshilli i Ambasadorëve Shqiptarë dënon me forcën më të madhe sulmin terrorist të banditeve serbë, nga i cili deri me tani ka mbetur i vrarë një pjesetar i Policisë së Kosovës dhe një tjetër është i plagosur.

KASH shpreh bindjen e thellë se bandat serbe janë të orkestruara dhe armatosura nga Beogradi dhe se ky sulm terrorist ishte i pritshem.

Serbia me këto veprime destabilizuese dhe luftënxitese po e fut rajonin në situata të paparashikuara destabilizuese, pasojat e të cilave mund të jenë tepër të rënda jo vetëm për Kosovën e Serbinë, por edhe për të gjithë rajonin, si dhe minojnë të gjitha projektet për arritjen e paqes në rajon.

Këshilli i Ambasadorëve Shqiptarë fton institucionet e Republikës së Kosovës që në bashkëpunim me KFOR-in dhe faktorin ndërkombetar, të ndërmarrin veprimet e nevojshme për ta zbardhur këtë situatë dhe për të sjellë para drejtësisë autorët dhe përgjëgjësit e këtij akti tepër të rëndë terrorist.

KASH vlerëson se ruajtja terësise territoriale të Republikës së Kosovës dhe vendosjes se legjitimitetit të shtetit në mbarë territorin e Kosovës, nuk kanë asnjë alternative.

Këshilli i Ambasadorëve Shqiptarë i bën thirrje faktorit ndërkombetar të ndaloje “përkëdheljet” e tolerimet ndaj politikave ambigue të Vuçiçit, të ndërhyje sa më parë te institucionet e Serbisë dhe t’i detyrojë ato të ndalojnë këto akte luftënxitëse, të paraprira nga veprime të hapura mbështetëse ndaj bandave e krimit të organizuar serb në veriun e Kosovës, që do të hapnin një lufte të re me përmasa të paparashikueshme në rajonin tonë dhe me gjerë.

KASH shpreh ngushëllimet më të thella për familjen e policit që humbi jetën dhe uron shërim të shpejtë për policin e plagosur.

Këshilli i Ambasadorëve Shqiptarë në këto momente të rënda i qëndron në krah popullit dhe institucioneve të Republikës së Kosovës dhe do të jetë në kontakt të vazhdueshëm me partneret dhe aleatet ndërkombëtarë për të treguar të vertetën se çfarë po ndodh në Kosovë.

VATRA DËNON SULMIN TERRORIST SERBO-RUS NË KOSOVË

by

Deklaratë për mediat/

Federata Pan-Shqiptare e Amerikës VATRA shpreh ngushëllime për vrasjen e policit shqiptar në Banjska të Leposaviqit Afrim Bunjaku dhe dënon sulmin terrorist serbo-rus mbi institucionet dhe shtetin e Kosovës.

Ky është një sulm i rëndë dhe i drejtpërdrejtë ndaj integritetit territorial të shtetit të Kosovës, qytetarëve dhe institucioneve në Kosovë.

Ky akt terrorist është sulm ndaj çdo shqiptari mbi të gjitha ndaj Shteteve të Bashkuara të Amerikës, Bashkimit Europian, NATO-s dhe demokracisë.

Federata Pan-Shqiptare e Amerikës VATRA i bën thirrje qeverisë së Kosovës, faktorit politik në Kosovë dhe të gjithë qytetarëve të Republikës që të jenë të bashkuar, të unifikuar, të ruajnë qetësinë dhe të shtojnë bashkëpunimin me faktorin ndërkombëtar për tejkalimin e situatës së tmerrshme.

Federata Pan-Shqiptare e Amerikës VATRA jo vetëm dënon sulmin terrorist që cënon sigurinë kombëtare të Kosovës e më gjerë por Vatra do të bëjë gjithçka në bashkëpunimin me faktorët ndërkombëtarë e Institucionet Amerikane për të qenë faktor stabilizues në rajon e më gjërë.

Kryetari i Federatës Pan-Shqiptare të Amerikës VATRA

Dr. Elmi Berisha

Deklaratë e Presidentes Osmani pas sulmeve ndaj policisë së Kosovës në veri

by

“Vrasja e një polici dhe plagosja e një polici tjetër në veriun e Kosovës, e planifikuar, orkestruar dhe ekzekutuar nga bandat kriminale serbe, është sulm ndaj rendit dhe ligjit në veriun e vendit, është sulm ndaj Kosovës.

Këto sulme dëshmojnë edhe njëherë fuqinë destabilizuese të bandave kriminale, të organizuara nga Serbia, të cilat prej shumë kohësh, siç është dëshmuar edhe me sulmet ndaj pjesëtarëve të KFOR-it, gazetarëve e qytetarëve, po e destabilizojnë Kosovën dhe rajonin.

Sulmet e organizuara kundër forcave të rendit të Republikës së Kosovës janë sulme kundër sovranitetit të Republikës së Kosovës.

Përveç dënimit të ashpër të këtij agresioni të hapur të Serbisë ndaj Kosovës, pres që aleatët tanë ta mbështesin Kosovën në përpjekjen e saj për vendosjen e rendit dhe ligjit si dhe ruajtjen e sovranitetit në çdo pjesë të Republikës së Kosovës.

Familjes së policit të vrarë ju shprehim ngushëllime të thella dhe i sigurojmë se autorët e këtyre akteve terroriste nuk do të mund t’i ikin drejtësisë.

Ftoj të gjithë qytetarët, institucionet dhe subjektet politike që të qëndrojnë të bashkuar në këtë kohë kur po sfidohet hapur integriteti territorial, siguria dhe sovraniteti i Republikës sonë.

Si Presidente e Republikës kam besimin e plotë në djemtë dhe vajzat tona nga Policia e Kosovës”.

Zyra e Presidentes njofton se shkaku i situatës së krijuar, Presidentja Osmani i ka anuluar të gjitha aktivitetet e parapara për të hënën dhe të martën në New York, dhe qysh sot do të niset për në Kosovë.

Ne e dënojmë këtë sulm terrorist

by

Albin Kurti/

Të dashur qytetarë,

Rreth orës 3 të mëngjesit sot, në fshatin Banjskë të Zveçanit, është sulmuar policia e Kosovës me ç’rast është vrarë një polic i Kosovës dhe një tjetër është plagosur. I vrari është polic i rendit me gradën rreshter, kurse i plagosuri është pjesëtar i policisë kufitare. Në këto momente ende vazhdojnë gjuajtjet me armë zjarri të kalibrave të ndryshëm mbi policinë tonë. Sulmuesit janë profesionistë me maska e të armatosur edhe me armë të rënda.

Ne e dënojmë këtë sulm kriminal e terrorist. Krimi i organizuar me mbështetje politike, financiare dhe logjistike nga Beogradi zyrtar po e sulmon shtetin tonë. Në këtë betejë ne mbrojmë dhe zbatojmë ligjin, mbrojmë dhe ruajmë qytetarët pa dallim dhe Kosovën e pavarur. Kriminelët ekzekutorë dhe urdhërdhënësit e tyre do të dështojnë, do të kapen, gjykohen e dënohen. Qeveria e Republikës së Kosovës dhe institucionet e shtetit janë të gatshme dhe të bashkërenduara për t’iu përgjigjur krimit dhe kriminelëve, terrorit dhe terroristëve.

Policia e Kosovës e ka njoftuar familjen e policit të vrarë A.B. Polici i plagosur është jashtë rrezikut për jetë. Ngushëllime familjes dhe të gjithëve për policin tonë të vrarë. Shërim të shpejtë e të plotë policit të plagosur.