Prof. Ylli Pango/

…Ju i kini sot…këtu…të gjitha liritë. Ju kini liritë të mos dini…ju i kini sot të gjitha liritë të mos mësoni…ju i kini…të gjitha liritë të injoroni, blasfemoni, mohoni, shtrembëroni…t’ja fusni kot a të shkatërroni…

…Ju i kini të gjitha liritë e ligësisë e të paditurisë…e sërish të mbretëroni…

…sot…këtu…në mbretërinë e pafund të “lirisë” së batërdisë, në “demokracinë” pa tru të padituri-ligësisë…

…Ju i kini sot të gjitha liritë të shpifni…ju i kini këtu të gjitha liritë…të shani..ju i kini…sot të gjitha liritë të intrigoni…ju sot i kini të gjitha liritë të gënjeni e mashtroni…të shtypni e shtrydhni e dërrmoni…pa mëshirë po dhe ashtu si pa u ndjerë…madje duke kërcyer e kënduar…sot…këtu…mbi piedestal të mbretit të mbretërisë së zgavërt të cektësi-zbrazësisë…mbështjellë në formë varak-bojatisur, kallangjosur të hipokrizi-shëmtisë…

…Ju i kini sot aty mbi fron, në duart tuaja, në pëqi, të gjitha dredhitë, helmet që ua blaton sistemi i ri i paudhësisë, “demokracia” e trashëgimisë, e bijës të

sistemit të shkuar të anti-njerëzisë…

…Ju i kini këtu tashmë, sërish mbuluar me petk mëndafshi të rremë të “demo-lumturisë”, të gjitha liritë e shtazërisë, e çnjerëzisë, lëshuar nga zinxhirët e së shkuarës së diktatit, të dhunës e të përdhunës…

…Ju i keni edhe liritë të shfryni, shtërzeni, shpërtheni…për të tentuar, të “kuroheni”, çliroheni, shpëtoni nga e keqja e madhe e ligësisë, paditurisë, ligësisë së paditurisë a paditurisë së ligësisë, barra e rëndë e mëkatit gjithshkafja që ndryni brenda vetes e që njëherë nuk do e mbani më dot… e që një herë do doni ta krreni nēmos do tua krrejnë me hir a me pahir…

…Ju i keni pra e do ti keni pashqitshmërisht mbi vete e në vete, të gjitha të zezat e nuk do të shpëtoni dot prej tyre, sado dëme të bëni rreth vetes e larg saj…

…Ju do i kini edhe ca kohë të gjitha këto…

…E megjithatë në një fund, do të jeni po ju…aq rëndë ngarkuar, përdhosur e shëmtuar…fatalisht destinuar…të mbysni veten a të mbyteni vetë prej të keqes që mbani brenda

…Askush që i ka pasur, të gjitha këto që ju kini, nuk ka shpëtuar soje gjer më sot…Sa e sa herë ju a ka treguar, ju ka dënuar, historia.

Prof. Begzad Baliu/

Është në natyrën tonë, që duke shënuar dhe festuar ditëlindjen e tij, ta nderojmë dhe ta falënderojmë për bëmat e tij, veprat themelvënëse të tij, idetë kombëtare të tij, ligjërimet çlirimtare të tij, diskursin europian të tij!

Brezi ynë, i formuar në vitet ’80, është rritur atdhetarisht e intelektualisht prej veprës së tij kulturore, letrare e shkencore: “Anatomia e kulturës”, “Historia e letërsisë shqipe (Romantizmi I – III)”, “Nocione të reja albanologjike”, “Porosia e madhe”, “Vdekja më vjen prej syve të tillë” etj. Vepra e tij na e ka ruajtur besimin dhe na ka bërë krenarë edhe në rrethanat më të vështira jetësore. Betejat e tij intelektuale dhe kombëtare në shtypin jugosllav (Lubjanë, Zagreb etj.) dhe në tribunat letrare e politike (Novi Sad, Beograd e Uashington) na kanë mbajtur të fortë para sulmeve ushtarake e policore të institucioneve politike, akademike e religjioze serbe.

Brezi ynë, bartës i vlerave më sublime të çlirimit kombëtar me emrin e UÇK-së, i ka rrënjët në ligjërimet kombëtare të veprës së tij, në themelet e së cilës qëndron vepra e trashëgimisë sonë materiale dhe shpirtërore: “Populli i ndaluar” e “Çështja shqiptare”.

Brezi ynë shtetformues, përtej partive politike dhe institucioneve mbështetëse ndërkombëtare, kishte edhe rrafshin orientues të veprës së tij (“Demokracia e shpërdorur”), përbërësin polemizues të tij (“Pushteti i korruptuar”), referencën europiane të tij (“Ideologjia e shpërbërjes”), së cilës i jemi përulur edhe atëherë kur kemi menduar se ia kemi kthyer shpinën!

Profesor i nderuar!

Me jetën dhe veprën mbete gjithnjë sinonim i Viktor Hygos dhe Francës së tij, prandaj asnjëherë nuk jemi dëshpëruar edhe kur të kemi parë të sulmuar a të përjashtuar. Ti ishe aty ku ishte brezi ynë, ndërsa aty ku mungoje Ti, ishte doemos dhe na fliste më fortë e më fuqishëm vepra jote!

Faleminderit Profesor për gjithë atë që i dhatë brezit tonë!

Jetë të gjatë e të lumtur!