Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

“VATRA” LONG ISLAND DHE SHKOLLA SHQIPE “GJERGJ FISHTA” NË NEW YORK FESTUAN 17 VJETORIN E PAVARËSISË SË KOSOVËS

by

Fabjola Gjinaj/

Long Island, New York, 16 Shkurt 2025 – Federata Pan-Shqiptare e Amerikës “Vatra” dega Long Island dhe shkolla shqipe “Gjergj Fishta” në New York festuan me madhështi 17 vjetorin e Shpalljes së Pavarësisë së Republikës së Kosovës. Kryetari i “Vatrës” Long Island, N.Y. Dr. Paulin Marku në fjalën e mirëseardhjes deklaroi se udhëtimi i shqiptareve për këtë ditë lirie ka qenë i gjatë, i mundimshëm dhe me sakrifica të mëdha në jetë njerëzish të moshave të ndryshme, fëmijë, të rinj e të reja, të moshuar dhe me dëme kolosale ekonomike, sociale e kulturore. Kosova është vatra e shqiptarisë ku u organizuan shumë beteja luftarake, politike e diplomatike. Ndërhyrja e NATO-s në luftën e Kosovës ishte dëshmi e mbrojtjes së vlerave njerëzore, beteja për çlirimin e Kosovës dhe mposhtjen e Serbisë. Kosova luftoi për lirinë e pavarësinë, për çlirimin, për të drejtat e njeriut dhe për standarde jetese multi-etnike. Pikërisht këto janë bazat e konceptit te sigurimit të të drejtave të njeriut në Kosovë të cilat ishin sfida te mëdha dhe në qarqet ndërkombëtare drejt Pavarësisë se Kosovës. Lufta në Kosove ishte shumë e ashpër, u humbën shumë jetë njerëzish, disa prej të cilëve nuk kanë as një varr ku të hidhet një grusht dhè për të kujtuar me mall dhe dhimbje të afërmit e tyre. Për shqiptarët e Kosovës, Pavarësia ishte një moment kyç që vendoste të ardhmen e tyre. Sot Kosova zhvillohet e përparon në rrugën euroatlantike duke qenë një histori frymëzimi e suksesi, theksoi ndër të tjera, studiuesi, Dr. Marku.

Imam Edin Gjoni në fjalën përshëndetëse të lexuar nga zonja Malvina Bilali theksoi se nuk mund të flasim për Pavarësinë e Kosovës pa shprehur falënderim të sinqertë dhe mirënjohje të thellë për Shtetet e Bashkuara të Amerikës, të cilat kanë qëndruar krah për krah me shqiptarët në ditët më të vështira. Me përkushtimin dhe mbështetjen e tyre të palëkundur, SHBA luajti një rol vendimtar jo vetëm për çlirimin dhe pavarësinë e Kosovës, por për të drejtat dhe lirinë e shqiptarëve kudo. Thellësisht jemi mirënjohës SHBA për ndihmën, për besimin dhe për miqësinë e pathyeshme me popullin shqiptar!

Prof. Dr. Luigj Gjoka në kumtesën e tij theksoi se procesi i pavarësimit të Kosovës kaloi nëpër disa etapa. E nisën intelektualët patriotë e idealistë, të udhëhequr nga Dr. Ibrahim Rugova e përshpejtuan brigadat e Ushtrisë Çlirimtare të Kosovës dhe e vulosen shtetet e NATOS, të udhëhequra nga SHBA. Dr Rugova, për realizimin e pavarësisë së Kosovës, zgjodhi rrugën gandiste të rezistencës paqësore dhe krijimin e institucioneve të Kosovës, të pavarura nga Beogradi. Dr. Rugova ndërmori një varg vizitash diplomatike në vende të Bashkimit Evropian dhe ShBA për të shpalosur vizionin e tij për një Kosovë të pavarur e demokratike, si dhe të hapur si ndaj Shqipërisë ashtu dhe Serbisë. Rugova në çdo takim me shefa shtetesh, ndër të tjera, sillte para tyre argumente historike e politike se Kosova e sotme, ish Dardania e dikurshme, i plotësonte kushtet për të qenë shtet më vehte në bashkësinë e kombeve europiane. Më ngjajnë proverbiale fjalët e ish presidenti Italian Giorgio Napolitano: “Nëse Rugova do të ishte amerikan, do ta kishte pushtuar botën me diplomaci” deklaroi në kumtesën e tij Prof. Dr. Luigj Gjoka.

Ish drejtori i “Zërit të Amerikës” për Europën z. Fran Shkreli, në kumtesën e lexuar nga zonja Borana Coka, shprehet se në 17-vjetorin e Pavarësisë së Republikës së Kosovës le të kujtojmë dhe të përulemi me nderim e respekt para rilindësve të vërtetë të kombit duke filluar me Gjergj Kastriotin-Skenderbeun në Lezhë, Abdyl Frashërin në Prizren, bashkë me zbritjen në Vlorë të Ismail Qemalit, Luigj Gurakuqit, Pandeli Cales, Isa Boletinit, e të tjerëve. Në veshët e çdo shqiptari të vërtetë kudo, sot, veçanërisht, jehon edhe kushtrimi i Adem Jasharit, e i Ibrahim Rugovës, por edhe i Bajram Currit, Ded Gjon Lulit, Mihal Gramenos dhe i Çerçiz Topullit dhe i heronjëve më të ri të Kombit që kanë dhenë jetën në luftën për liri e pavarësi të Kosovës. Shqiptarët janë ndër të parët e njerëzimit, me një histori të gjatë e cila është e shkruar me penë, por edhe më shumë ajo histori është shkruar me gjak, theksonte Fran Shkreli.

Prof. Dr. Roland Gjini mbajti kumtesën “Federata “Vatra”, gazeta “Dielli” dhe liria e pavarësia e Kosovës”. Në të ai theksoi rolin e dukshëm që luajti kjo federatë me anë të gazetës së saj, “Dielli” jo thjesht në mbështetje të luftës së popullit të Kosovës për të fituar lirinë e pavarësinë nga pushtuesi serb, por edhe më gjerë. Veçanërisht në ngjarjet e viteve 1981, 1989-1991 dhe 1998-1999 Federata “Vatra” dhe shkrimet e gazetës “Dielli” sensibilizuan jo vetëm opinionin amerikan por edhe institucionet e këtij vendi për drejtësinë e kauzës kosovare, nga njëra anë, por edhe për dënimin e veprimeve të dhunshme deri në genocid të autoriteteve serbe ndaj protestave të ligjshme të popullit shqiptar të Kosovës. Një ndihmesë të veçantë “Vatra” e “Dielli” dhanë në ndërgjegjësimin e Presidentit dhe Kongresit amerikan në fillim të vitit 1999 për domosdoshmërinë e goditjes së regjimit serb dhe në marrjen e vendimit për bombardimin e Serbisë nga NATO, për ta detyruar Serbinë të ndërpresë reprezaljet ndaj shqiptarëve të Kosovës dhe për të tërhequr trupat ushtarake nga ky vend. Po kështu, theksoi kumtuesi, SHBA ishte përkrahësja kryesore e Kosovës në rrugën e saj drejt pavarësisë, pas fitores së lirisë, e kurorëzuar me sukses në 17 shkurt 2008, theksoi ndër të tjera Prof. Gjini.

Themeluesja e shkollës shqipe “Skenderbej”, mësuese Adelina Lacaj bashkë me mësuesen Gela Bulku në fjalën e tyre përgëzuan punën patriotike, edukative dhe kulturore të themeluesve të shkollës shqipe “Gjergj Fishta” Dr. Paulin Marku e mësuese Fabjola Gjinaj si një mundësi të shkëlqyer që fëmijët shqiptarë të ruajnë gjuhën, kulturën e traditat kombëtare në Amerikë. Shkrimtari z.Prend Ndoja në fjalën e tij kujtoi me dhimbje të madhe vuajtjet e shqiptarëve të Kosovës dhe sakrificat për Kosovën e lirë dhe të pavarur. Përulemi me nder e respekt përpara çdo familje që humbi familjaret e tyre për çlirimin e Kosovës. I urojmë suksese dhe përparimin kombit shqiptar, tha ndër të tjera shkrimtari Ndoja.

Themeluesja e shkollës shqipe “Gjergj Fishta” mësuese Fabjola Gjinaj deklaroi se kujtoj vitin 2008 kur festuam festën e parë të Pavarësisë se Kosovës në një shkollë në Shqipëri, ndërsa sot plot emocione si bashkëthemeluese e shkollës shqipe “Gjergj Fishta” në New York po festojmë 17 vjetorin e Kosovës me këta fëmijë të mrekullueshëm që janë në gjendje të dalin në skenë për të performuar me kënge, valle e recitime në gjuhën e shenjtë të kombit tonë. Gjatë fjalës së saj falënderoi prindërit për bashkëpunimin, përkushtimin e lidhjen shpirtërore pasi ne nuk jemi thjesht një shkollë shqipe por më shumë se aq, jemi një familje e madhe bashkatdhetarësh që kultivojmë gjuhën dhe traditën tonë kombëtare, tha ndër të tjera bashkëthemeluesja e shkollës shqipe “Gjergj Fishta” Fabjola Gjinaj.

Aktiviteti muzikor me recitime, këngë e valle i prezantuar mjeshtërisht nga sekretari i degës “Vatra” Long Island, N.Y. Klaudio Turkaj vijoi si më poshtë:

“A vritet pafajësia”-Alisja Durra, “Jam Kosova e shqiptarisë” – Klea Bilali, “Kosova ime” – Wendy dhe Uarda Bilali, “Duaje atdheun tënd” – Ajla Durra, “Rrjedh ne këngë e ligjërime” – Wendy Bilali, “Këndoj shqip në Amerikë” – Emeli Marku, “Vallja e Rugovës” – nxënësit e shkollës “Gjergj Fishta”, “Mora fjalën” – Bora dhe Barta’ poezia e poetit Prend Ndoja “Gëzuar Kosovë” – Alisja Durra, “Udhët e gjyshit” – vëllezërit Dritëro, Shqiptar e Albin Mulaj, “Për ty Kosovë” – Ajla Durra, “Shqipëri o nëna ime” – Kamila Marku dhe Uarda Bilali, “Pogonishte” – nxënësit e shkollës “Gjergj Fishta”, “Urimet për Pavarësinë e Kosovës” përcollën edhe William e Adrienne Gega, Bojken Bajraktari dhe Aron Domi, “Unë jam shqipe nga Kosova” – Emeli Marku dhe Alex Qepuri, “Vallja e Pavarësisë” – nxënësit e shkollës shqipe “Gjergj Fishta”, “E kam emrin kosovar” – Olivia Kokona, “Kosovë–Shqipëri jeni vllazni” – Arnisa dhe Arnis Muçaj. Programi artistik, kulturor dhe atdhetar kushtuar pavarësisë së Kosovës u përmbyll me vallen e “Pavarësinë” kërcyer me emocion e pasion nga nxënësit e shkollës shqipe “Gjergj Fishta”. Gëzuar Kosovë, në shekuj të shekujve nga “Vatra” Long Island dhe shkolla shqipe “Gjergj Fishta” New York.

Shoqata shqiptaro–amerikane “Skënderbej” Inc. festoi 17-vjetorin e Pavarësisë së Kosovës

by

Alketa Ktona Veshi/

Ashtu siç është bërë traditë e shoqatës shqiptaro-amerikane “Skënderbej” Inc. dje më datë 15 shkurt, u festua përvjetori i Pavarësisë së Kosovës.

Ambientet e përcaktuara për festë të librarisë në lagjen Bay Ridge, Brooklyn New York, gumëzhinin nga zërat e bukur të fëmijëve të shkollës shqipe “Skënderbej”, të cilët mezi prisnin të performonin përpara syve të prindërve, anëtarëve e simpatizantëve të shoqatës. Flokët e dëborës përkëdhelnin xhamat e dritareve dhe brenda gjithçka veshur me mantelin e ngjyrave të Flamurit Kombëtar e atij të Kosovës. Punët artistike të fëmijëve të shkollës, krijuar enkas me tematikën ‘Kosova e Lirë” ishin ekspozuar dhe areduar si jo më bukur nga duart e mësueseve të shkollës “Skënderbej” zonja Adelina Lacaj, Gela Bulku dhe Anisa Preza.

Aktivitetin e nderoi prania e sekretarit të Federatës Pan Shqiptare “Vatra”, dr. Pashko Camaj.

Fjalën e hapjes e mbajti kryetari i shoqatës shqiptaro–amerikane “Skënderbej” Inc. z. Imer Lacaj. Ai theksoi rëndësinë e kësaj dite historike për shqiptarët e Kosovës, si dhe për kombin shqiptar e të gjthë shqiptarët kudo që ndodhen në mbarë botën. Me këtë rast, z. Lacaj përcolli urimet e përzemërta, të kryesisë dhe të gjithë anëtarëve të shoqatës shqiptaro-amerikane “Skënderbej” Inc, dhe uroi gëzuar 17-Vjetorin e Pavarësisë së Republikës së Kosovës.

Ai theksoi se 17 shkurti i vitit 2008 përfaqëson aktin më madhor në historinë e Kosovës, si një datë historike për kombin shqiptar dhe shqiptarët kudo që ndodhen, kur Kosova u shpall shtet i pavarur dhe hapi një kapitull të ri të lirisë, demokracisë dhe dinjitetit Kombëtar.

Në këtë ditë të shenjtë, së bashku me ju dhe gjithë shqiptarët anembanë botës, përulemi me respekt të thellë para sakrificës së dëshmorëve që dhanë jetën për këtë liri që populli shqiptar i Kosovës gëzojnë sot. Me nderim të veçantë, kujtojmë heroizmin e Komandantit Legjendar, Adem Jashari, dhe të gjithë familjes së tij, të cilët u flijuan për themelet e pavarësisë së Kosovës, duke u përjetësuar në kujtesën kombëtare.

Zoti Lacaj vlerësoi dhe shtjelloi tri faktoret kryesore, të cilat sollën fitoren e pavarësisë:

1 – Ushtria çlirimtare e Kosovës dhe populli heroik i saj

2 – Kontributi i Shqipërisë në Luftën për Liri

3 – Ndërhyrja e NATO-s dhe çlirimi i Kosovës

I ftuari i nderit dr. Pashko Camaj përcolli përshëndetjet dhe urimet nga shoqata pan shqiptare ‘’Vatra’’, përgëzoi dhe vlerësoi punën dhe veprimtarinë e shoqatës Shqiptaro-Amerikane “Skënderbej” Inc. si dhe simbolikën e vendit të festimit të përvejtorit të krijimit të shtetit të Kosovës në ambientet e librarisë, atje ku mësojnë dhe edukohen femijët e shkollës shqipe “Skënderbej” me gjuhën e traditat kombëtare. Ai shprehu rëndësinë e bashkëpunimit e shkëmbimit të vlerave midis Shqipërisë e Kosovës dhe transmetimin e këtyre vlerave te brezat e rinj. Zoti Camaj, në emër të shoqatës “Vatra”, dhuroi disa libra, Abetare për nxënësit e shkollës shqipe “Skënderbej”, si shkolla më e re shqipe ne qytetin e NY(NY City). Në shenjë falënderimi ai u rrethua dhe përqafua nga grupi i nxënësve, të kësaj shkolle.

Eventin e përshëndeti ish-luftëtari i UÇK-së dhe miku i shoqatës sonë, Blerim Gjocaj, djalë i familjes heroike, Gjocaj, e cila i ka dhënë kaq shumë luftës së Kosovës dhe Kombit.

Artan Dauti, anëtar i shoqatës solli fakte të përjetuara nga miq e ish-kolegë të tij, të cilët kishin marë pjesë në Luftën Çlirimtare të Kosovës

Znj. Alketa Ktona Veshi, sekretare e shoqatës Shqiptaro-Amerikane “Skënderbej” Inc., mbajti fjalën e rastit, e cila shprehu se: kujtimet mbi luftën çlirimtare janë si zahireja për shpirtin, ato na bëjnë të mos harrojmë kurrë atë që ka ndodhur. Ajo foli për masakrat, vrasjet, djegjet e shkatërrimet, përdhunimet, varret masive me të gjallë e të vdekur, nga agresioni serb, të cilat detyruan botën të kthente sytë nga Kosova, si dhe NATO-n të ndërmerte bombardimet ndaj Serbisë.

Vlera dhe kontributi i paçmuar i UÇK-së gjithashtu u trajtua nga znj. Alketa.

Më pas fëmijët e shkollës shqipe “Skënderbej” të drejtuar nga mësueset e devotshme të kësaj shkolle Adelina Lacaj, Gela Bulk dhe Anisa Preza, performuan me vallen “Marshi i UÇK-së”, ”Pavarësia” dhe “Mora fjalë”. Kori i shkollës këndoi “Unë jam shqipe nga Kosova”, si dhe recituan vargjet e poezizë “Njomëzak Marathonomak”, poezi nga Artan Dauti anëtar i shoqatës sonë, i cili ka marë frymëzimin nga një ngjarje reale e largimit të kosovarëve nga spastrimi etnik. Vëllai njomëzak mbajti në krahet e tij vëllain më të vogël për 30 orë ecje në rrugë e terrene të vështira për t’iu larguar barbarizmave serbe kundrejt popullsisë civile.

“Zgjohu Kosovë!” ishte interpretimi i nxënëses së shkollës shqipe “Skënderbej “ Kiara Laci, i cili mbylli programin artistik të shkollës dhe eventin në nder të Pavarësisë së Kosovës

Gëzuar përjetë Kosovë!

Gëzuar Shteti Shqiptar!

Alketa Ktona Veshi

New York , 16 Shkurt 2025

Festa e Pavarësisë së Kosovës dhe Promovimi i Librit “The Beauty of Choice” nga Wendy Steiner

by

Bora Balaj

Foto: “Noli Tv”/

Më 17 shkurt 2025, në Librarinë e Stamfordit, Connecticut, Shoqata “Skënderbeu” nga New York organizoi një event të veçantë për të festuar 17-vjetorin e Pavarësisë së Kosovës. Ky event shënoi një reflektim mbi sakrificat e të kaluarës dhe një moment për të riafirmuar angazhimin për të ardhmen e Kosovës.

Mbrëmja u moderua nga Era Balaj, e cila e udhëhoqi këtë aktivitet me profesionalizëm dhe elegancë. Në fjalën e saj përshëndetëse, Bora Balaj, sekretare e Shoqatës “Skënderbeu” dhe autore e pesë librave, përkujtoi figurat kyçe të historisë së Kosovës, përfshirë Presidentin Ibrahim Rugova, i cili udhëhoqi me diplomaci përpjekjet për pavarësi, dhe Adem Jasharin dhe familjen e tij, të cilët dhanë jetën për lirinë e Kosovës. Bora gjithashtu përmendi kontributin dhe sakrificat e UÇK-së (Ushtrisë Çlirimtare të Kosovës), që luajti një rol kyç në çlirimin e Kosovës. Një mirënjohje e veçantë iu drejtua edhe Presidentit Bill Clinton, i cili mbështeti çlirimin e Kosovës në momentet më kritike.

Eventi përfshiu gjithashtu promovimin e librit “The Beauty of Choice: On Women, Art, and Freedom” nga Wendy Steiner, një libër që trajton tema të rëndësishme mbi artin, lirinë dhe të drejtat e grave, përfshirë një kapitull të ndjeshëm mbi gratë e dhunuara gjatë luftës në Kosovë, një plagë e hapur në ndërgjegjen e kombit. Ky libër ka ndihmuar në ndezjen e një debati të rëndësishëm mbi sfidat dhe përpjekjet e grave në shoqërinë kosovare dhe më gjerë.

Një moment domethënës ishte shkëmbimi i librave mes Bora Balaj dhe Wendy Steiner, një akt simbolik që pasqyroi fuqinë e letërsisë për të krijuar lidhje mes kulturave dhe historive të ndryshme.

Në këtë ngjarje të rëndësishme morën pjesë mbi 100 të ftuar nga New Yorku, New Jersey dhe Connecticut, duke e bërë mbrëmjen të paharrueshme dhe të ngrohtë. Gjithashtu, Kryesia e Shoqatës “Skënderbeu”, përfaqësuar nga Bashkim Shehu, president, dhe Faton Zogiani, nënkryetar, kontribuan në realizimin e këtij aktiviteti, duke siguruar organizimin dhe mbështetje të vazhdueshme.Na nderuan me pjesmarrje antaret e kryesis Shoqatës shkrimtareve Shqiptaro-Amerikane, përfaqësuar nga Adnan Mehmeti dhe Mhill Velaj, na nderuan me praninë e tyre, si dhe Sabije Dervishi Veseli, kryetare e Shoqatës “Marigona” nga New Jersey.

Pjesë e aktivitetit artistik të eventit ishin Blerina Muqolli në piano dhe Pranvera Sula në kitarë, të cilat interpretuan pjesë instrumentale të zgjedhura, duke kontribuar në atmosferën e ngrohtë e kulturore të ngjarjes. Për konceptimin dhe organizimin artistik të eventit u kujdes Diar Xani, producent dhe pjesë e Kryesisë së Shoqatës “Skënderbeu”. Virgjil Kule, anëtar nderi i Shoqatës “Skënderbeu”, dha një dimension të veçantë, ndërsa profesor James yong i ftuar i veçantë, ndau mendimet e tij mbi përvojat e tij gjatë vizitës në Kosovë, duke reflektuar mbi Memorialin “Heroinat” dhe gjenocidin e ushtruar gjatë luftës. Fjalimi i tij ishte një pasqyrë e thellë mbi përpjekjet për të ruajtur kujtimin dhe nderimin e atyre që dhanë jetën për lirinë e Kosovës, si dhe mbi vuajtjet që pësoi populli kosovar gjatë periudhës së luftës.

Në këtë kontekst, Virgjil Kule ofroi një analizë shumëdimensionale të veprës së Wendy Steiner, duke u fokusuar në sakrificën e grave gjatë luftës. Ai falënderoi autoren për thellësinë dhe ndjeshmërinë me të cilën trajton temat e luftës dhe të drejtave të grave, duke theksuar rëndësinë e vazhdimit të kujtimit të historisë dhe dhënies së një platforme për ato që nuk janë dëgjuar mjaftueshëm.

Gjithashtu, Skender Pali dhe Nazim Salihu ishin të pranishëm me kamerat e tyre, duke realizuar xhirime dhe fotografi gjatë eventit.

Pjesë e rëndësishme e këtij aktiviteti ishte gjithashtu prania e Bexhet Asanit nga Shoqata e Shkrimtarëve Shqiptaro-Amerikane, një tjetër përfaqësues i nderuar i kulturës shqiptare në SHBA.

Në fund të eventit, për të pranishmit u organizua një kokteil, duke ofruar mundësinë për t’u relaksuar dhe për të vazhduar diskutimet dhe bashkëbisedimet mbi temat e ngjarjes, kulturën dhe lidhjet mes shqiptarëve të diasporës dhe atdheut. Ky moment shërbeu gjithashtu për të forcuar miqësitë dhe për të festuar bashkimin e shqiptarëve në këtë ngjarje të veçantë.

Shkolla shqipe “Mëso Shqip” në Staten Island, New York, festoi 17 vjetorin e Pavarësisë së Kosovës

by

Arlinda Sukaliqi/

Shkolla shqipe “Mëso Shqip” në Staten Island, New York, festoi 17 vjetorin e Pavaresisë së Kosovës me një program te larmishëm patriotik, edukativ, atdhetar e kulturor. Në respekt, nderim e përkujtim të kësaj dite madhështore, nxënësit shfaqen talentin e tyre duke sjellë shumë emocione. Nxënësit e grup moshave të ndryshme nga ato 5 deri ne 21 vjeç shprehen shpirtin e tyre artistik duke performuar në mënyra të ndryshme, qofshin ato poezi që u recituan me aq dëshire dhe emocione të zjarrta patriotike, qofshin me vizatime, kënge e valle me motive patriotike. Kjo ditë ishte e veçantë për shkollën e komunitetin tonë sepse përveç projekteve shkollore dhe vallëzimet e kënget kushtuar Kosovës patëm mundësi të njihen më afër me sakrificën e patriotëve dhe heronjëve kombëtar siç është Adem Jashari e shumë të tjerë, pa të cilët liria që sot po gëzojmë nuk do ishte e mundur. Nderim perjetë sakrificave për lirinë e atdheut.

Përkushtimi i mësueseve të gjuhës dhe të vallëzimit, e këndimit e bënë që kjo ditë të jetë me festive dhe argëtuese për nxënësit por dhe për prindërit që mbështesin këtë shkollë.

Kosovë, Gezuar 17 vjetorin e shtetformimit, përjetë e mot.

Në Boston u festua 17 vjetori i pavarësisë së Kosovës

by

Flamur VEZAJ/

Në sheshin e Bashkisë së Bostonit, nën kujdesin e Federatës Panshqiptare VATRA dhe organizatës shqiptare MAASBESA, u ngrit flamuri i Kosovës për nder të 17-vjetorit të Pavarësisë nga pushtimi serb!

Edhe pse moti ishte i ashpër, me shi e borë, zemrat e shqiptarëve rrezatonin ngrohtësi dhe krenari. Bashkatdhetarët u mblodhën për të nderuar këtë ditë të shenjtë, duke valëvitur flamurin e Kosovës krah atij amerikan – simbol i miqësisë dhe mbështetjes që ky vend i madh ka dhënë për popullin tonë. Ngritjen e flamurit të Kosovës e bënë me nder nxënësit Olsian Vezaj dhe Joni Maksutaj, të ndihmuar nga Jorid Çelaj, duke simbolizuar vazhdimësinë e brezave që do të mbajnë gjallë identitetin kombëtar shqiptar.

Për këtë përvjetor të lavdishëm, Guvernatorja e Massachusetts-it, Maura Healey, lëshoi dhe firmosi një Proklamatë, e cila u lexua nga atdhetari Faton Limani. Në këtë dokument historik, guvernatorja vlerësoi kontributin e komunitetit shqiptar dhe theksoi marrëdhëniet e shkëlqyera mes Massachusetts-it dhe popullit të Kosovës.

Gjithashtu, kryetarja e Bashkisë së Bostonit, Michelle Wu, në një gjest domethënës, shpalli 17 Shkurtin 2025 si “Ditën e Kosovës në Boston”. Proklamata e saj, e lexuar nga përfaqësuesja znj. Lisa Menino, konfirmoi mbështetjen e qytetit të Bostonit për komunitetin shqiptar dhe vlerat e tij.

Pas intonimit të himneve të SHBA-së dhe Kosovës, në atmosferën e mbushur me emocion, vijuan fjalimet përshëndetëse të organizatorëve.

Kryetari i VATRA-s në Boston, z. Menor Maksutaj, shprehu mirënjohjen ndaj autoriteteve për mbështetjen e dhënë dhe falënderoi komunitetin për pjesëmarrjen. “VATRA do të vazhdojë traditën e shumë patriotëve që e ruajtën gjallë shqiptarinë në mërgim. Flamuri ynë nuk është thjesht një copë stofi, ai është gjaku dhe sakrifica e mijëra burrave e grave që luftuan për lirinë tonë. Sot, ne e ngritëm këtë flamur për të treguar se Kosova jeton në zemrat tona, kudo ku jemi!” – u shpreh Maksutaj me emocione të forta.

Në emër të organizatës MAASBESA, foli Eduard Lazri, i cili theksoi rëndësinë e bashkimit të diasporës dhe ftoi bashkatdhetarët të angazhohen në komunitetin shqiptar. “Ne jemi një komb që nuk dorëzohet! Historia jonë është histori qëndrese dhe sakrifice. Sot, më shumë se kurrë, kemi detyrën të ruajmë gjuhën, kulturën dhe identitetin tonë në çdo cep të botës ku jetojmë.” Duke ftuar komunitetin çdo të shtunë në qendrën shqiptare të hapur tashmë në Braintre MA.

Në emër të Albanian Bostonians Community Center, foli Endri Kume, i cili njoftoi se një qendër e re për komunitetin shqiptar në veri të Bostonit do të hapet së shpejti në Beverly, MA. “Një komb i fortë ndërtohet mbi baza të forta. Me qendrat tona kulturore, me gjuhën tonë, me flamurin tonë, ne tregojmë se shqiptarizmi nuk shuhet kurrë!”

Në emër të shoqatës “Laberia” në Boston, zv/kryetari Neviol Shukulli përshëndeti të pranishmit dhe uroi shqiptarët për këtë ditë të shënuar. “Jemi bij të shqipes, jemi populli që di të qëndrojë krenar në çdo kohë. Lavdi dëshmorëve të Kosovës! Rroftë Shqipëria, rroftë Kosova, rroftë Kombi Shqiptar!”

Ceremonia u pasurua me poezi patriotike të recituara nga Albulena Kastrati, Namik Selmani dhe një fëmijë i lindur në SHBA, Marti Ismailaj, i cili, me një shqipe të pastër dhe zemër plot dashuri për atdheun, emocionoi të gjithë të pranishmit.

Nuk munguan as këngët patriotike, të interpretuara nga rapsodët vëllezërit Delia, të cilët ndezën atmosferën me këngët e tyre që rrëfejnë historinë dhe krenarinë kombëtare.

Ceremoninë e moderoi studenti nga Kosova, Ledion Hoti, i cili me profesionalizëm dhe emocion përcolli mesazhin e kësaj dite madhështore: Pavarësia e Kosovës nuk është vetëm një datë, por një amanet i shenjtë që duhet ruajtur, nderuar dhe mbrojtur nga brezat e ardhshëm!

Boston, një qytet i madh, sot u bë edhe më i madh me zemrat shqiptare që rrahin fort për Kosovën dhe kombin. Ky flamur që valëvitet këtu nuk është vetëm simbol i një shteti – është simbol i gjakut, sakrificës dhe krenarisë sonë kombëtare.

Lavdi heronjve të Kosovës! Rroftë populli shqiptar.