Papa: Krishtlindja e përmbys logjikën e pushtetit e të komandimit

December 22, 2016 by dgreca

Papa Françesku u takua sot, në Sallën Klementine, në Vatikan, me anëtarët e Kuries Romake për urimet tradicionale të Krishtlindjes. Në qendër të fjalës së tij, kriteret udhëheqëse të reformës së Kuries.“Zotit i pëlqeu të lindte i vogël, sepse deshi ta donin. Ja sesi logjika e Krishtlindjes është përmbysje e logjikës së pushtetit, e logjikës së komandimit, logjikës farizeistike, logjikës kauzalistike ose deteministike”. E theksoi Papa Françesku gjatë fjalimit drejtuar kardinajve dhe eprorëve të Kuries Romake, të cilët i priti sot në Sallën Klementine, për shkëmbimin e urimeve të Krishtlindjes.Krishtlindja – pohoi Papa – është festa e përvujtërisë dashuruese të Zotit, atij Zoti, që e kthen përmbys rendin e parashikuar logjikisht, rendin e domosdoshmërisë, rendin dialektik e matematik. Për Krishtlindje – vijoi Papa – jemi të thirrur t’i themi ‘po’ me fenë tonë, jo Sundimtarit të Universit e as më të fismes ndërmjet ideve, por pikërisht këtij Zoti, “dashurues-i-përvuajtur”. E, duke cituar Palin VI, Françesku nënvizoi se Zoti erdhi si më i vogli njeri, si më i brishti, më i ligshti. E pse e bëri këtë? E bëri, që askujt të mos i vinte turp kur t’i afrohej, askush të mos kishte frikë e të gjithë të mund ta kishin pranë, t’i rrinin pranë e të mos kishte kurrfarë distance ndërmjet njeriut e Zotit!

Papa vijoi të bënte listën 12 “kritereve udhëheqëse të reformës së tij:

“Janë kryesisht dymbëdhjetë: individualitet, baritoritet, misionaritet, racionalitet, fuksionalitet, modernitet, përkoritet, susidaritet, sinodalitet, katolicitet, profesionalitet, gradualitet.

Individualitet apo kthesë personale, domethënë kthesë individuale, pa të cilën do të jenë krejt të kota të gjitha ndryshimet në struktura.

Baritoriteti ka të bëjë me kthesën baritore, sepse angazhimi i gjithë personelit të Kuries duhet të frymëzohet nga baritoriteti, nga përshpirtëria e shërbimit dhe e bashkimit, mbasi ky është ilaçi kundër të gjitha helmeve të ambicieve së kota dhe të rivalitetit të rremë.Misionariteti (Kristocentrizmi) është qëllimi kryesor i çdo shërbimi kishtar, e kjo do të thotë ta çosh Lajmin e Mirë në të katër skajet e tokës. Racionaliteti na kujton se është e nevojshme racionalizimi i organizmave të Kuries Romake.Përsa i përket funksionalitetit, shkrirja e mundshme e dy a më shumë dikasterve, në një Dikaster të vetëm, shërben për t’i dhënë këtij Dikaster më shumë rëndësi (edhe të jashtme) duke ndihmuar edhe në funksionimin më të mirë të tij (siç e tregon shembulli i dy dikasterve të themeluara kohët e fundit).

Moderniteti (përditësimi) është aftësia për t’i lexuar e për t’i dëgjuar shenjat e kohës.Tema e përkorjes na kujton se është i nevojshëm thjeshtësimi dhe shkathtësimi i Kuries: shkrija e dikasterve sipas natyrës së kompetencave dhe thjeshtësimi i brendshëm i vetë dikastereve, me shfuqizimin e disa zyrave që nuk u përgjigjen më nevojave të mundshme. Susidiariteti apo ndihma, parashikon rishikimin e komptencave të posaçme të dikastereve të ndryshme, duke i zhvendosur, në rast nevoje, nga një dikaster tek tjetri, për të siguruar autonominë, koordinimin, ndihmën në kompetencat si dhe në ndërlidhjen e shërbimit, pa harruar këtu, edhe rolin e Sekretarisë së Shtetit, në mënyrë që, në kryerjen e detyrave të saj, ta ndihmojë drejtpërdrejt e menjëherë Papën. Françesku kujtoi edhe sinodalitetin që duhet të ndjehet fuqimisht në Kurie e në të gjitha dikasteret.Katolicitetin, pastaj, që duhet të pasqyrojë universalitetin e Kishës (këtu është e nevojshme të parashikohet pjesëmarrja e një numri më të madh laikësh, posaçërisht në ato dikastere, ku laikët mund të jenë shumë më kompetentë sesa klerikët ose rregulltarët). Me rëndësi të veçantë, vlerësimi i rolit të gruas dhe të laikëve në jetën e Kishës, duke pasur parasysh edhe profesionalitetin e tyre e, sidomos, rolin e tyre udhëheqës në dikasteret” e duke e arkivuar përfundimisht praktikën e promoveatur ut amoveatur (i ngritur në përgjegjësi, për t’u lëvizur). Sepse ky është kancer! E, së fundi, shkallëzimi i zbatimit me etapa, “ad experimentum’ dhe elasticiteti i nevojshëm për të vënë në jetë një reformë të vërtetë!(Kortezi:Radio Vatikani)

Konferenca e Ambasadoreve:Kosova, kontribuese e sigurisë

December 20, 2016 by dgreca

-Konferenca e katërt e ambasadorëve të Kosovës, diskutime në katër panele/

1-ambas-amerik 1-bushat-hoxhaj 2-bushati-hoxhaj 1-enveri-flet 1-foto-vesh

-Ministri i Punëve të Jashtme të Shqipërisë, Ditmir Bushati: Njohja sa më parë e pavarësisë së Kosovës nga Serbia është me rëndësi për stabilitetin dhe integrimin evropian të dy shteteve/

-Ambasadori amerikan në Kosovë, Greg Delawie ka vlerësuar lartë letrën e NATO-s dërguar Kosovës për intensifikimin e bashkëpunimit/

-Ish kryeministri i Shqipërisë, Pandeli Majko ka vlerësuar se marrëdhënia e Kosovës me NATO-n është praktike dhe një aspiratë e konsolidimit/

PRISHTINË, 20 Dhjetor 2016-Gazeta DIELLI-Behlul Jashari/ Konferenca e katërt e Ambasadorëve të Republikës së Kosovës vazhdoi punimet në Prishtinë, sot në ditën e dytë, me diskutime në katër panele.Siguria e Kosovës dhe marrëdhënia e re me NATO-n, marrëdhëniet e Kosovës me BE-në dhe aplikimi për statusin e kandidatit, diplomacia ekonomike dhe tërheqja e investimeve të huaja si dhe bashkëpunimi rajonal dhe marrëdhëniet e vështira me Serbinë, janë temat që po trajtohen. Pjesëmarrës në panele janë përfaqësues të lartë të institucioneve të vendit, ministra, ambasadorë dhe deputetë të Republikës së Kosovës, prijës të Bashkimit Evropian, ambasadorë të akredituar në Kosovës si dhe përfaqësues të lartë nga MPJ e Republikës së Shqipërisë dhe të organizatave ndërkombëtare. Konferenca e katërt e Ambasadorëve e organizuar nga Ministria e Punëve të Jashtme të Republikës së Kosovës, ka filluar ditën e dytë me diskutimet në panelin e parë, ku është folur për sigurinë e Kosovës dhe marrëdhënien me NATO-n.Panelistët kanë vlerësuar se siguria në rajon dhe në botë, ka ndikim edhe në sigurinë e Kosovës.Zëvendëskryeministri, Hajredin Kuçi ka vlerësuar se siguria globale ka ndikim direkt në sigurinë e Kosovës. Sipas tij, anëtarësimi i Kosovës në NATO, do të ndikojë për sigurinë e Kosovës dhe atë globale. Kuçi ka thënë se zhvillimet në rajon, por edhe në Lindjen e Mesme, kanë ndikim edhe në Kosovë. Ministri i Punëve të Jashtme të Shqipërisë, Ditmir Bushati ka thënë se koha në të cilën jetojmë dhe e ardhmja, shkon drejt ndërlidhshmërisë. Prandaj, sipas tij, njohja sa më parë e pavarësisë së Kosovës nga Serbia është me rëndësi për stabilitetin dhe integrimin evropian të dy shteteve.Ai ka shtuar se Shqipëria dhe Kosova gjatë viteve të fundit kanë intensifikuar bashkëpunimin me zyra të përbashkëta në Milano e Bari. Kjo ka rritur efikasitetin dhe ofrimin e shërbimeve.Ambasadori i SHBA-së në Kosovë, Greig Delawie ka folur për rolin e NATO-s, përkatësisht atë të KFOR-it në Kosovë dhe sigurinë që po ofron kjo organizatë.Ambasadori amerikan, Greg Delawie ka vlerësuar lartë letrën e NATO-s dërguar Kosovës për intensifikimin e bashkëpunimit. Sipas tij, Kosova po kalon në një tranzicion, nga konsumuese e sigurisë në kontribuuese të saj. Ai po ashtu ka theksuar se është shumë i kënaqur me vazhdimin e misionit të KFOR-it për ofrimin e sigurisë.Ministri i Punëve të Brendshme, Skënder Hyseni, ka vlerësuar se MPB-ja dhe agjencitë tjera kanë shënuar rezultate të prekshme dhe për lakmi gjatë viteve që po lëmë pas, sidomos gjatë vitit të fundit, por në të njëjtën kohë, në rrafshin e përgjithshëm, sfidat mbesin edhe më tej.Sipas Hysenit, integrimi i Kosovës në strukturat e sigurisë, euroatlantike dhe ndërkombëtare është i një rëndësie tepër të veçantë, sepse në kohën e internetit, këmbimi i informacionit është thelbësor për luftimin e dukurive negative.Ai ka folur edhe për sfidën e anëtarësimit të Kosovës në Interpol, por ka shtuar se vendi ynë do të vazhdojë për përpjekjet që në vitin e ardhshëm Kosova të jetë pjesë e kësaj agjencie.Ministri i Forcës së Sigurisë, Haki Demolli ka thënë se procesi i transformimit të Forcës së Sigurisë së Kosovës është paraqitur në dy rrafshe, atë legjislativ dhe përgatitjeve për planifikim të transformimit të FSK-së në forcë të armatosur, që gjithsej janë pesë shtylla të transformimit.Demolli ka thënë se MFSK, në rrafshin bilateral, deri më tash ka nënshkruar 12 marrëveshje bashkëpunimi, përfshirë edhe shtete të NATO-s. Një rëndësi të posaçme sipas tij, në transformimin e FSK ka dhënë garda nacionale e Iowa, me të cilën bashkërisht, FSK brenda këtij viti kanë shënuar 55 aktivitete të përbashkëta.Ish kryeministri i Shqipërisë, Pandeli Majko ka vlerësuar se marrëdhënia e Kosovës me NATO-n është praktike dhe një aspiratë e konsolidimit. Sipas tij, Kosova është partnerja më e rëndësishme e NATO-s në Evropë, pas Italisë. Majko ka folur edhe për marrëdhëniet e Republikës së Kosovës me Republikën e Shqipërisë, por edhe me shtetet e tjera në rajon.Ambasadorja e Republikës së Kosovës në SHBA, Vlora Çitaku ka folur për bashkëpunimin e NATO-s me Kosovën dhe në veçanti për partneritetin për paqe. Mosnjohja e katër shteteve naëtare të NATO-s, që duhet të jeta pengesë në marrëveshjen e Kosovës me NATO-n, në partneritetin për paqe. Ajo ka shtuar se duhet të tregohemi jashtëzakonisht kreativ, jashtë kornizave, në mënyrë që të gjendet një modus për përfshirjen e Kosovës në partneritetin për paqe.Konferenca e katërt e Ambasadorëve të Republikës së Kosovës do të vazhdojë punimet gjatë ditës ku do të diskutohet për: Marrëdhëniet e Kosovës me BE-në dhe aplikimi për statusin e kandidatit; Diplomacinë Ekonomike dhe tërheqjen e investimeve të huaja; Diplomacinë multilaterale: përfitimet nga anëtarësimet dhe aplikimet e reja.Ministria kosovare e Punëve të Jashtme ka hapur mbrëmë në Prishtinë punimet e Konferencës së katërt të Ambasadorëve të Republikës së Kosovës, e cila do të zgjasë deri në 23 dhjetor, në angazhimet që të ketë koordinim, kontinuitet dhe koherencë në atë se çfarë duhet të ndiqet në vitin 2017.

FILLOI PUNIMET KONFERENCA E IV-të E AMBASADORËVE TË REPUBLIKËS SË KOSOVËS

Prishtinë, 19 Dhjetor 2016/ Ministria e Punëve të Jashtme e Republikës së Kosovës ka hapur sonte punimet e Konferencës së katërt të Ambasadorëve të Republikës së Kosovës.Hapjen e Konferencës e ka bërë ministri i Punëve të Jashtme i Republikës së Kosovës, Enver Hoxhaj i cili gjatë fjalimit ka theksuar faktin se tashmë Konferenca e Ambasadorëve është shndërruar në tradicionale dhe kjo sipas ministrit Hoxhaj tregon se Kosova ka koordinim dhe kontinuitet sa i përket politikës së jashtme.Siç ka thënë ministri Hoxhaj pikërisht këto janë tipare për të pasur një politikë të jashtme aktive e cila duhet të gërshetoj interesat shtetërore.“Përmes një politike të jashtme aktive, ne synojmë të përmbushim interesat tona të brendshme. Vëmendje të veçantë do t’i kushtojmë diplomacisë ekonomike, investimeve të huaja direkte, krijimit të vendeve të punës dhe bashkëpunimit ekonomik që do të jetë fokusi jonë i ardhshëm”, ka deklaruar ministri Hoxhaj.Ndërsa ka shtuar se njohjet dhe anëtarësimet kanë të bëjnë me zgjerimin e sovranitetit të shtetit të Kosovës.Kurse presidenti i vendit, Hashim Thaçi ka theksuar se Republika e Kosovës brenda një periudhe të shkurtër kohore ka arritur të artikulojmë një politikë të jashtme të qartë, duke identifikuar interesat e shtetit dhe mekanizmat për t’i realizuar qëllimet tona.“Kosova brenda më pak se një dekade të funksionimit si shtet i pavarur ka arritur me sukses të konsolidoj shtetësinë e saj duke operuar në një ambient ndërkombëtar tepër anarkik, që dominohet nga polarizimet ndërshtetërore të cilat manifestohen edhe brenda organizatave ndërkombëtare si kurrë më parë”, ka deklaruar presidenti Thaçi.Derisa ka përmendur numrin e shteteve që e kanë pranuar pavarësinë e Kosovës dhe anëtarësimin e saj në organizata multilaterale presidenti ka shtuar se institucionet e vendit tashmë e kanë bërë të qartë se e ardhmja e Kosovës është anëtarësimi në BE dhe NATO, dhe siç ka theksuar ai “politika jonë e jashtme angazhohet me tërë fuqinë e saj për realizimin e kësaj aspirate”.Nga ana tjetër kryeministri Isa Mustafa ka deklaruar se në programin e Qeverisë se gjatë këtyre dy vjetëve një prioritet shumë i rëndësishëm është dhënë politikës së jashtme.“Tash e dy vjet, kemi përqendruar një pjesë të madhe të energjisë në politikën e jashtme, duke arritur edhe disa suksese shumë të mëdha. Përkundër vështirësive që kemi pasur brenda vendit, e të cilat kanë pasur ndikime negative, pasi që politika e jashtme është reflektim direkt i politikës së brendshme, ne kemi arritur suksese që mund të konsiderohen historike në këtë periudhë, e që kryesisht lidhen me procese integruese euroatlantike”, ka thënë kryministri Mustafa.Konferenca e katërt e Ambasadorëve të Republikës së Kosovës do të zgjasë prej 19 deri më 23 dhjetor, në të do të diskutohen tema të ndryshme si: siguria e Kosovës dhe marrëdhënia e re me NATO-n; Marrëdhëniet e Kosovës me BE-në dhe aplikimi për statusin e kandidatit; Diplomacia Ekonomike dhe tërheqja e investimeve të huaja, Diplomacia multilaterale: përfitimet nga anëtarësimet dhe aplikimet e reja.

HOXHAJ MIRËPRET BUSHATIN NË KONFERENCËN E KATËRT TË AMBASADORËVE, BASHKËPUNIMI I SHKËLQYESHËM

Prishtinë, 20 dhjetor 2016/ Ministri i Punëve të Jashtme të Kosovës, Enver Hoxhaj, ka takuar sot homologun e tij nga Shqipëria, ministrin Ditmir Bushati, në margjina të Konferencës së Katërt të Ambasadorëve që po mbahet në Prishtinë më 19-22 dhjetor.Ministri Hoxhaj falënderoi ministrin Bushati për pjesëmarrjen dhe kontributin e tij në Konferencën e sivjetme të Ambasadorëve, ndërsa biseduan për projektet e përbashkëta të parapara mes Kosovës dhe Shqipërisë.Gjatë takimit dy-palësh u theksua rëndësia e funksionalizimit të planit të veprimit të Sekretariatit të Partneritetit Kosovë – Shqipëri. Të dy ministrat theksuan se bashkëpunimet e arritura në mes të dy ministrive të Jashtme, të Kosovës dhe Shqipërisë janë shembull i mirë e si shumë zotime të dala nga mbledhjet e përbshkëta të të dy qeverive janë zbatuar suksesshëm.Ministri i Jashtëm i Shqipërisë, Ditmir Bushati sot ka mbajtur fjalim para të pranishmëve në Konferencën e Ambasadorëve si i ftuar special. Gjatë fjalimit të tij, ministri Bushati tha se pavarësisht se Shqipëria ka 105 vite si shtet i pavarur, ka mundësi të mësojë shumë nga Kosova si shtet i ri dhe diplomacia e saj.“Shqipëria edhe pse ka 105 vite si shtet i pavarur ka shumë për të mësuar nga shteti i ri i Kosovës dhe diplomacia e saj”, ka thënë Bushati, ndërkohë që ka falënderuar Ministrinë e Jashtme të Kosovës për gatishmërinë për të hapur Konsullata të përbashkëta.

POLITIKA SI ARTI I QEVERISJËS

December 20, 2016 by dgreca

kopertina-e-librit-naili-d

Nga Dr.Nail Draga /*Viteve të fundit nga autor të ndryshëm shqiptar janë botuar studime dhe botime të veçanta nga fusha të ndryshme si nga aspekti shkencor, kulturor, artistik, publicistik etj., duke pasuruar fondin e botimeve të tilla në lëmitë përkatëse. Nga kjo gamë e gjerë autorësh bën pjesë edhe Gjon Keka i cili dallohet në hapësirën etnogjeografike shqiptare, për cilësinë dhe sasinë e botimeve. Një nder botimet e tia të fundit është edhe libri “Antropologjia politike”, botuar në nga “Botart” në Tiranë në vitin 2015. Nga vet titulli i këtij libri por edhe lënda e trajtuar del qartë se kemi të bëjmë me një përpjekje të guximshme të autorit, i cili trajton një qasje të re te mendimit politik tek ne shqiptarët. Një kostatim të tillë e themi me faktin se në këtë periudhë posmoniste e cila njihet si koha e tranzicionit, botimet e kësaj natyre kanë qenë të pakta, nga fakti se tek ne ende është i pranishëm mentaliteti i së shkauarës totalitare, për qasjet shoqërore dhe rrjedhat bashkëkohore të shoqërisë pluraliste.Pikërisht duke marrë parasysh të kaluarën tonë në kuadër të ish kampit të vendeve socialiste, termi “antropologji politike” është një term pothuaj i panjohur. Antropologjia apo shkenca mbi njeriun përbën po ashtu edhe fushën e lidhjës se njeriut me shtetin, drejtimin e shtetit nga njeriu dhe pushtetin shtetëror, shoqërinë, shkallët e zhvillimit, kulturën etj.

Ndërsa antropologjia politike e trajton njeriun si personalitet , si individ dhe si qenie kulturore, përkatësisht ka të bëjë me strukturën e sistemeve politike, proceset politike, zhvillimin e shoqërisë, institucioneve, shtetit dhe të kulturës së popujve, duke iu qasur në mënyrë strukturale lidhjeve formale dhe joformale të politikës, proceseve kulturore, sociale, ekonomike etj.

Në kuptimin më të gjërë antropologjia politike është sinonim me politikën, ndërsa ne kuptimin më të ngushtë, ka të bëjë me aftësitë politike të artit të qeverisjes, shtetit dhe politikës, të cilat mund të thuhet se janë edhe sferat mbi njohuritë politike në përgjithësi.Me një fjalë antropologjia politike është pjesë e filozofisë politike e cila hulumton mënyrën e organizimit politik të shoqërisë në një mjedis të caktuar.

Autori në këtë botim më në detaje trajton frymën inspiruese të ideve dhe të teorive të politikës, formimit të shtetëve, legjislacioneve, sistemeve dhe institucioneve politike, kulturës politike, gjuhës politike etj. Pra kemi të bëjmë me një përpjekje të autorit në fushën e shkencës politike, i cili është nder të parët që kësaj çështje i qaset në mënyrë profesionale.Pikërisht këtu qendron edhe vlera e këtij libri, se shumë çështje të pa trajtuara deri më tash nga autorë shqiptarë, me këtë libër vërehet përpjekja e parë profesionale, ne këtë drejtim.

Andaj duke lexuar këtë libër del qartë se shoqëritë tona me të kaluar moniste edhe tash ne pluralizëm kanë sfida të mëdha për të konsoliduar demokracinë liberale, kulturën politike, të drejtën dhe lirive qytetare dhe nacionale sipas standardëve bashkëkohore të shteteve me përvojë demokratike. Ndërsa neglizhenca në ketë drejtim se ende jemi në periudhën e tranzicionit nga koha e monizmit, nuk është fakt bindës, sepse koha prej një çerek shekulli ka qenë e mjaftueshme, për ndryshime cilësore dhe veprime praktike nga klasat politike të subjektëve udhëheqëse. Çdo refuzim për tu ballafaquar me realitetin paraqet dobësi organizative, kadrovike dhe mungesë e vullnetit politik, për avancim dhe zgjidhje të çështjeve kontestuese për shoqërinë në vendin përkatës.Pikërisht në këtë aspekt shumë çështje mund të njihën me mirë nga antropologjia politike, se sa nga fushat e tjera si sociologjia apo shkencat politike.

Nuk ka dilemë se për të shkruar një libër të tillë autorit i është dashur shumë punë, duke konsultuar një literaturë profesionale në gjuhë të huaja, sepse në shqip ajo pothuaj mungon tërësisht.

Dhe në fund e them pa hezitim se si i tillë ky libër duhet të jetë referencë e domosdoshme për studime dhe hulumtime në fushën e sociologjisë dhe të shkencave politike, sepse paraqet studimin me të kompletuar deri më tash në gjuhën shqipe.

*Gjon Keka, Antropologjia politike, Botoi:Botart, Tiranë, 2015

MAQEDONI, ME DAULLE NE DITEN E TRETE TE PROTESTAVE

December 18, 2016 by dgreca

Gruevski nuk pranon rivotimin, kërcënon diplomatët e huaj/

Kryetari i VMRO DPMNE-së, Nikolla Gruevski ka paralajmëruar se partia e tij nuk do të merr pjesë në rivotimin në dy vendvotime, nëse kjo vendoset nga KSHZ-ja dhe konfirmohet edhe nga Gjykata Administrative dhe as nuk do të pranojë rezultatin e dalë në rivotim, që sipas vlerësimeve të para, VMRO-së do t’i merret një mandat në favor të LSDM-së.

Në këtë rast rezultati në mandate do të ishte I barabartë, 50 për LSDM-në dhe 50 për VMRO-në. Në një paraqitje para ithtarëve të partisë së tij, që po protestojnë para Komisionit Shtetëror të Zgjedhjeve (KSHZ), Gruevski tha se ky institucion ka miratuar vendime kundër vullnetit të popullit.

“KSHZ-ja ka miratuar vendime anti-ligjore, me qëllim shkeljen e vullnetit të popullit. Puna e KSHZ-së është shndërruar në sfilatë. Kemi informacione për përzierjen e disa përfaqësuesve të huaj, me qëllim që të ndikojnë në falsifikimin e vullnetit të qytetarëve. Disa nga përfaqësuesit e pavarur nuk janë të pavarur. Vendimet joligjore të KSHZ-së mund t’i korrigjojë Gjykata Administrative, andaj edhe bëjmë thirrje që të mos bëhet asnjë presion ndaj asaj gjykate nga askush”, ka deklaruar Gruevski.

“VMRO-ja nuk do të lejojë përzirjen e mëtejmë në çështjet e brendshme politike të vendit dhe kërkojmë që të veprojnë në kuadër të mandateve dhe autorizimeve si diplomatë”, u shreh ai.

Fjalimi i Gruevskit nga të pranishmit u përcoll me brohoritje “Nikolla, Nikolla”, ndërsa ky siguroi të pranishmit se nuk do të lejojë formimin e qeverisë nga, siç u shpreh, “krimineli i amnistuar”, Zoran Zaev.

Protestuesit kanë brohoritur edhe kundër ambasadorit amerikan, Xhes Bejli, i cili mbrëmë vonë ka shkuar në selinë e VMRO-së, ku ka biseduar me kreun e partisë, Nikolla Gruevski.

“Bejli, largoi duart nga Maqedonia. Donald Tramp, Ne të duam”, ishte një nga parullat e shkruar që bartnin protestuesit.

KSHZ-ja deri më tani ka anuluar votimin në një vendvotim të ankimuar nga Lëvizja BESA, ndërsa së shpejti pritet të vendos edhe për ankesën tjetër të LSDM-së, që është edhe e fundit për procesin e së dielës.

KSHZ-ja mblidhet sërish, vazhdojnë protestat në Shkup

Komisioni Shtetëror i Zgjedhjeve do të vazhdojë gjatë ditës së shtunë shqyrtimin e ankesës së fundit të Partisë Social Demokrate në opozitë, për ta përmbyllur gjithë procesin zgjedhor. Komisioni gjatë natës së kaluar ka pranuar vetëm një ankesë të partisë shqiptare Besa.

Ndërkohë, përkrahësit e partisë së ish-kryeministrit Nikolla Gruevksi, VMRO DPMNE, kanë vazhduar protestat e tyre përpara selisë së KSHZ-së.

Komisioni tha se do të shqyrtojë ankesën e LSDM-së gjatë ditës së shtunë, ndërkohë që kryetari i Komisionit Aleksandar Cicakovski tha se “në këtë mbledhje do të përgatiten të gjitha vendimet për t’i dorëzuar ato”.

Ankesat e mbetura janë refuzuar nga anëtarët e komisionit, me përjashtim të dy që janë tërhequr nga LSDM-ja.

Përkrahësit e VMRO-DPMNE sërish, si edh enjë natë më herët, janë mbledhur përpara selisë së KSHZ-së për, siç thonë, të mos lejuar që të “vidhet fitorja e partisë në pushtet”.

Ata kanë kënduar këngë dhe kanë brohoritur slogane partiake dhe për Maqedoninë dhe kanë hedhur fishekzjarrë dhe gjësende të tjera mbi ndërtesën e Komisionit Shtetëror të Zgjedhjeve.

Me të përfunduar të mbledhjes së KSHZ-së, anëtari i VMRO-DPMNE, Dime Spasov tha se do të vazhdojnë të “qëndrojnë përpara KSHZ-së dhe se nuk do të ikin nga askush”.

Protestuesit thonë se do të vazhdojnë protestat deri sa KSHZ, të mos e verifikojë rezultatin zgjedhor.

Në bazë të një rezultati paraprak të publikuar partia e Gruevksit VMRO-DPMNE ka fituar dy vende në Parlament më shumë se ajo e Zoran Zaev, LSDM, në opozitë, respektivisht 51 deputetë me 49 syresh.(RFL)

Kosova, Axhendë Evropiane

December 16, 2016 by dgreca

-Kosova dhe Komisioni Evropian, diskutime në kuadër të Marrëveshjes së Stabilizim Asociimit/

-Qeveria e Kosovës dhe Komisioni Evropian diskutuan mbi politikat sociale dhe të punësimit, edukimin, hulumtimin dhe shoqërinë e informacionit/

PRISHTINË, 16 Dhjetor 2016-B.Jashari/ Përfaqësues të Qeverisë së Kosovës dhe Komisionit Evropian u takuan në Bruksel për të diskutuar zhvillimet gjatë vitit në fushën e arsimit, punës dhe mirëqenies sociale, mbrojtjes së trashëgimisë kulturore, komunikimeve elektronike, shoqërisë së informacionit dhe politikave audiovizuale, shkencës dhe inovacionit. Diskutimi u mbajt në kuadër të Marrëveshjes së Stabilizim Asociimit e cila hyri në fuqi në prill 2016. Në të gjitha fushat, Komisioni dhe Kosova ranë dakord mbi rëndësinë e zbatimit të prioriteteve të Axhendës së Reformave Evropiane, bëhet e ditur në një komunikatë të përbashkët të dërguar.Në lidhje me arsimin, Komisioni ka theksuar edhe një herë rëndësinë që Kosova të vazhdojë përpjekjet për të siguruar autonominë dhe funksionimin e pavarur të institucioneve të arsimit të lartë dhe për të miratuar një ligj të ri mbi arsimin e lartë në bazë të standardeve ndërkombëtare. Komisioni rikujtoi nevojën për prioritizimin e sigurimit të cilësisë në të gjitha nivelet, nga arsimi parashkollor deri tek ai universitar, përmes ofrimit të fondeve të nevojshme.

Qasja në arsim cilësor për fëmijët me aftësi të kufizuara dhe komunitetet pakicë duhet të forcohet, theksohet më tej.

Sa i përket hulumtimit dhe inovacionit, Komisioni theksoi rëndësinë e kapaciteteve të mira për hulumtim dhe inovacion në nivel kombëtar për të rritur konkurrencën dhe integrimin në Zonën Evropiane të Kërkimit dhe pjesëmarrjen në programin “Horizon 2020”.

Në lidhje me mbrojtjen e trashëgimisë kulturore, Komisioni theksoi se Kosova duhet të ofrojë angazhim të vazhdueshëm ndaj Këshillit për Zbatim dhe Monitorim.

Sa i përket punësimit, palët ranë dakord se ekziston nevoja për të krijuar një sinergji në mes të agjencive të ndryshme shtetërore, ligjeve dhe strategjive për të siguruar se ka një rritje të mundësive të punësimit dhe përkrahje më të madhe nga ana e Kosovës për masat e nxitjes së punësimit.

Komisioni Evropian inkurajoi Kosovën për të përgaditur një plan veprimi për trajtimin e papunësisë së të rinjve bazuar në një vlerësim të sfidave dhe duke u fokusuar në përmirësimin e rezultateve të arsimit dhe mbështetjen e tranzicionit nga shkolla në vend pune.

Palët u pajtuan se përpjekje më të mëdha janë të nevojshme për të zbatuar ligjin mbi punën dhe legjislacionin mbi shëndetin dhe sigurinë në punë, veçanërisht përsa i përket çështjes së numrit të pamjaftueshëm të inspektorëve të punës.

Mbi shoqërinë e informacionit, Kosova ra dakord për të adresuar nevojat për burime, veçanërisht në lidhje me zbatimin e Strategjisë së Sigurisë Kibernetike.

Komisioni i bëri thirrje Komisionit të Pavarur për Media për të përshpejtuar përgatitjen e akteve nënligjore të nevojshme dhe për finalizimin e Strategjisë për Kalimin Digjital dhe për të siguruar se fondet e nevojshme janë ndarë për zbatimin e saj.

Në lidhje me politikat audiovizuale, Komisioni inkurajoi Kosovën për të gjetur një zgjidhje të qëndrueshme të financimit për transmetuesin publik në përputhje me acquis të BE-së, si një çështje prioritare.

Marrëveshja e Stabilizim Asociimit është korniza në kuadër të së cilës administrata e BE-së dhe Kosovës diskutojnë rregullisht çështjet teknike dhe politike lidhur me axhendën evropiane. Takimet sigurojnë të dhëna të drejtpërdrejta mbi raportet vjetore të Komisionit Evropian.

Çdo takim i nënkomitetit monitoron dhe përcjell arritjen e Kosovës në zbatimin e reformave dhe identifikon se si BE-ja mund të ndihmojë në këtë proces.

Janë shtatë fusha të cilat mbulohen nga takimet e nënkomiteteve: Drejtësia, Liria dhe Siguria; Inovacioni, Shoqëria Informative, Politika Sociale, Arsimi dhe Kultura; Tregtia, Industria, Dogana dhe Tatimi; Tregu i Brendshëm, Konkurrenca, Mbrojtja e Konsumatorëve dhe Shëndetit; Bujqësia, Peshkataria, Pylltaria, Siguria e Ushqimit; Transporti, Mjedisi, Energjia, Zhvillimi Rajonal; Çështjet Ekonomike dhe Financiare, Statistikat.

Dy fusha të tjera që mbulohen gjatë takimeve të grupeve speciale janë reforma mbi administratën publike dhe normalizimi i marrëdhënieve me Serbinë.

Takimet e Komitetit të Stabilizim Asociimit dhe nënkomiteteve bashkë-kryesohen nga Komisioni Evropian dhe Kosova. Çdo takim përfundon me veprime pasuese të rëna dakord për t’u ndërmarrë nga autoritetet kosovare.