Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Eksodi i shqiptarëve- Ikje apo dëbim masiv?!

by

Nga Gani QARRI/
Kosova është kthyer në dinasti të krimit,120 deputet, kanë pasuri sa një milion shqiptar, apo thënë më drejtë, më shumë se gjysma e banorëve të saj.
Ky fakt trishtues flet vet, flet më shumë se mijëra fjalë, dhe nuk do asnjë koment.
Nga ardhja e “patriotëve” të tillë në pushtet, vendi fatkeq nuk njeh ecje as përparim, e si duket nga dështimi në dështim do të përfundoj në kolaps total dhe katastrofë të përgjithshme, në të cilën mund të pësojnë edhe vet mbjellësit e saj.
Vetëm, rreth 16 vite pas dëbimit të Serbisë nga NATO, sipas marrëveshjes së arritur në Kumanovë, ndërmjet përfaqësuesve të Aleancës Euro-Atlantike dhe komandës së ushtrisë pushtuese serbe, politikanë, “patriot”, kryetar partish e komandantë, janë kthyer në padronë të shtetit, kurse shqiptarët në tepricë teknologjike dhe njerëz të pa atdhe, të destinuar për dëbim.
Udhëheqës të tillë që me kohë u ekspozuan me shumë “yrysh” dhe fjalor të përzgjedhur “patriotik”, shpejtë treguan fytyrën e vërtetë antikombëtare, duke vjedhë e plaçkitur nga pozicionet udhëheqëse çdo gjë që mund të përvetësohej, pa zgjedhur forma as mënyra, derisa i sollën shqiptarët në këtë gjendje.
Shtatë vjet pas shpalljes së Pavarësisë, ata e zhveshën tërësisht Kosovën nga çdo gjë me vlerë dhe zhytën atë, në aq mjerim e skamje, sa që për shqiptarët,ajo të bëhet vend i pamundur për jetesë.
Zhvillimet më të reja, tregojnë qartë se e keqja kombëtare e cila për më tepër se një shekull, po u rri shqiptarëve mbi kokë, vazhdon edhe më tej, tanimë përmes një plani konspirativ dhe pjesëmarrjen e shqipfolësve të organizuar në shërbime e sigurime turliçfare, që kanë për qëllim, vazhdimin e planit të Millosheviqit, në mënyrë të “butë”, por gjithsesi- hiq më pak ogurzi se sa vet zbrazjen masive të Kosovës nga shqiptarët.
Pas shkatërrimit të sistemit arsimor, atij shëndetësor dhe mbytjes së perspektivës zhvillimore, ata duke e ditur tanimë se nuk mund ta sundojnë përgjithmonë këtë vend, me degdisjen aktuale të këtij populli fatmjerë-sipas direktivave të shefave të tyre, përfundimisht po i vënë në jetë projekte e vjetra serbe, për ndërrimin e strukturës së popullsisë në atdheun tonë.
Ndaj, ky nuk ka se çfarë të jetë tjetër, veçse paradoksi i kriminelëve, të cilët sloganin e patriotizmit e përdorën me mjeshtëri gjatë gjithë kohës, për mbetjen në pushtet dhe realizimin e qëllimeve të Serbisë në Kosovë!
Aktet e fundit, dëshmojnë se ardhja e njerëzve të tillë në funksione vendimmarrëse, ishte projekti më antishqiptar në historinë tonë të re dhe të vjetër, i cili edhe në shekullin XXI mundi të gjente shprehje në këto troje, pas gjithë përpjekjeve kombëtare për shtet dhe çlirim.
Madje, tanimë shihet qartë se mbytësit e Kosovës me korrupsion dhe krim të organizuar për 15 vjet me radhë, si “atdhetar” të flakët që janë, pas sjelljes në fuqi të vahabistëve për mbytjen e çdo gjëje kombëtare, edhe rrugët e ikjes për shqiptar, i hapën pikërisht këta, të cilëve tash u erdhi radha tua marrin centët e mbramë nga gjepat, bashkatdhetarëve të varfër ,për ti përzënë ata përfundimisht edhe nga atdheu.
Ndaj nuk është çudi ,se edhe ky eksod po shfrytëzohet nga ta ,për të përfituar lekët e fundit, nga ky popull fatkeq, ani pse, siç dihet botërisht, policia serbe maltreton çdo shqiptar me rrugëtim normal përmes territorit të saj, këta pushtetar ka kohë që “fshehtas” angazhojnë kompani me autobusë anë e mbanë vendit, në bashkëpunim dhe marrëveshje me Serbinë, për transferimin pa “pengesë” të tyre në vende të “treta”, e cila edhe pa këta argat, i ka detyruar shqiptarët gjithmonë në ikje.
Këtu shihet qartë se ka një kastë të shitur politikanësh vendor, të cilët kanë krijuar një strukturë të fort organizimi mafioz dhe makineri të përsosur, për të quar popullin në këso tragjedish etnike dhe realizimin definitiv të planeve anti-kombëtare për zbrazjen e Kosovës nga shqiptarët ,gjë që Serbia pa dorën e tyre, asnjëherë nuk mundi ta qonte deri në fund.
Për pasojë, po shkatërrohet bërthama kombëtare e këtij vendi, duke i përzënë dhe linçuar banorët autokton, për të cilët Kosova është kthyer në burg kolektiv, ku shqiptari duhet të vuaj edhe për bukën e gojës.
Mjerisht në vitin 2015, zhgënjimi përfundimisht ka arritur kulmin dhe është bërë aq i madh sa edhe pas çlirimit nga Serbia, njerëzit e kthyer para rreth 16 vitesh me aq dëshirë e vullnet në vendin dhe vatrat e tyre megjithëse të shkrumbuara nga lufta, tani prej dëshpërimit të pa fund, detyrohen të lënë plëng e shtëpi dhe të ikin përsëri nga Kosova.
Fakti që na mbajti gjallë për shekuj me radhë edhe nën pushtim të huaj, ishte ideali për çlirimin e vendit, kurse tani kriminelët vendor, vetëm për pak vite në pushtet, arritën që të gjitha shpresat t`ia vrasin këtij populli të pa fat.
Ndaj, vijimësia histerike e një kuazi-shtetësie, e cila me vet mënyrën sesi zhvillohen ngjarjet, po shkon drejt falimentimit të plotë dhe një kolapsi total, si duket, për qëllim final, ka pasur arritjen e këtij akti tragjik, për tu rrumbullakësuar me dëbime biblike shqiptarësh nga vendi i vet, në mënyrë që Serbia në shtëpitë tona ti montoj edhe një herë djepat e saj të zbrazët.
Kështu, shqiptarët janë zhgënjyer rëndë, pikërisht nga ata që në emër të “patriotizmit” e varfëruan dhe shkretuan këtë vend, ndaj për ta nuk ka ku të shkojë më ma zi, përveç se përfundimisht të kapin kokën në duar dhe të dalin e të ikin, e bile të humbin krejt….s’kanë atdhe, s’kanë shpresë, s`kanë ardhmëri, çdo gjë u është marrë atyre, si dhe ku të jetojnë ata ?!…
Madje mbetet e pakuptueshme se si këta emra “patriotësh“, të cilët pas gjendjes së krijuar vet, organizojnë edhe dhjetëra autobusë komodë në kryeqytet, mbushin ata me mijëra gra e fëmijë për çdo natë dhe i dorëzojnë në duart e policisë serbe, e cila deri dje ka ushtruar gjenocid mbi popullin shqiptar….
Të gjitha këto janë produkt më i ri i “licencuar” i “atdhetarëve” të përbetuar “shqiptarë” të cilët sundojnë një shtet ku të paguar dhe rrogë-marrës, kanë të drejtë të jenë vetëm akrabaja e pushtetarëve, “drejtues” universitetesh dhe studentë me dije e pa te, bijtë e të fortëve dhe fëmijët e shokëve e të bajraktarëve, udhëheqës firmash e institucionesh vetëm grupi dhe “sebepet” e pronto-proletarëve, kurse shqiptari i rëndomtë nuk ka të ardhura por duhet të paguaj, lihet i papunë por ngarkohet me qindra obligime financiare, duhet tu siguroj bukë e shkollim fëmijëve, duke u bërë lypsar rrugëve, ose të bëjë vetëvrasje, apo për të mbijetuar në këtë vend, ai detyrohet të bëhet hajn, kriminel, vahabist, mafioz, e çka jo tjetër, e nëse asnjëra nga këto, nuk bashkëjetojnë me karakterin e tij njerëzor e kombëtar, ai duhet ta kap kokën në duar dhe të ik një minutë e më parë sa më larg nga atdheu i tij i mbytur prej patriotëve të tillë.
Ndaj, në mënyrë që kjo situatë të përfundojë një orë e më parë, nuk mjaftojnë më vetëm fjalët, por kasta e udhëheqësve të deritanishëm, duhet të shkojë nga pushteti e skena politike, dhe tu lejoj frymëmarrjen shqiptarëve.
Të gjithë mërgimtarët në këto momente të rënda, ndjejnë vuajtje të mëdha dhe shohin zemërplasur këtë dëbim mafioz të bashkatdhetarëve, por gjithsesi ata kanë edhe mirëkuptim të natyrshëm me hallet e bashkëkombësve të tyre, të cilët pas një durimi 15-16 vjeçar, përfundimisht janë mbështetur për muri dhe nuk kanë më se nga t`ia mbajnë, përveçse ti mbyllin sytë dhe bëhen barrë edhe një herë vendeve evropiane.
Pasi që erdhi puna deri këtu, dhe fatkeqësisht prapë përsëritet kjo tragjedi biblike në mesin e trojeve tona, me gjithë keqardhjen, sikur të kishte mundësi, një pjesë e të dëbuarve në këtë të ftohët dhe dimër të madh për shqiptarët, do duhej zbarkuar edhe në shtëpitë e zonjës, Kajdanov dhe z. Dell, ku do të kërkonin nga SHBA, jo vetëm ndihmë për mbijetesën e rrezikuar nga të preferuarit e ambasadorëve të lartcekur në vendin tonë, por edhe përgjegjësi për fajet jo krejt të vogla të përfaqësuesve të saj, në Kosovë.
Në këtë situatë të rënduar, me gjithë shkelm-qitjet e herëpashershme, nuk guxon të harrohet assesi Evropa, edhe nëse qeveritë e shteteve të BE-s, janë keq-informuar, apo nuk janë njoftuar drejtë dhe me kohë, ato mbajnë shumë përgjegjësi ndaj shqiptarëve të cilët u besuan pa rezervë.
Kjo edhe për faktin se pjesa më e madhe e përfaqësuesve të shteteve të Evropës dhe SHBA-s, kooketuan ngushtë me mafinë vendore dhe mbështetën mbetjen e përhershme të kriminelëve në pushtet, megjithëse e shihnin qartë, përditë e më tepër, se çka janë në gjendje “patriot” të tillë ti bëjnë këtij populli të mirë dhe shtetit të vet.
Ata, para syve të tyre, edhe sot detyrojnë masa shqiptarësh për eksod masiv, ndërsa po këto shtete megjithatë ende nuk kërkojnë përgjegjësi nga pushtetarët e kriminalizuar dhe të korruptuar deri në kapuç, për gjendjen e krijuar, por kërcënojnë hallegjinjtë e pa-rrugëdalje, me kthim…!
Mirë or të uruar por a mund të jetë kjo formë veprimi edhe zgjidhje problemi për këta njerëz fatkëqij, të cilët me këtë kast politikanësh të pa-denjë në pushtet dhe pa ndryshime rrënjësore në vend, halli do ti detyrojë sërish që në mungesë të mundësisë për mbijetesë, të cilën ua kanë shkatërruar të njëjtit kapadainj, këtë rrugë që dikur dhe vetëm para pak vitesh ata e refuzuan me dëshirë sepse e donin vendin e vet mbi gjithçka, por tanimë u ka mbetur shpresa e fundit dhe e vetmja zgjidhje, ta marrin përsëri.
Shpresojmë, dhe lusim të plotfuqishmin atje ku është, që kjo të jetë loja e fundit “patriotike” e tyre, përndryshe Kosova përfundimisht po mbetet përgjithmonë pa bazën dhe bërthamën e saj kombëtare.
Shqiptarët, as vet kurrë nuk e kanë besuar, dhe nuk do t’u shkonte mendja asnjëherë, se ata që thirreshin në gjithë ato heroizma, luftëra titanike e patriotizma marramendëse, me ardhjen në pushtet do ta çojnë Kosovën drejt de-shqiptarizimit, të rinjtë drejt shkombëtarizimit, besimin tradicional- për marrje parash!, ta shndërrojnë në salafisto-vahabizëm mesjetar arab, shtetin drejt de-integrimit, kurse familjet me fëmijë në mes të dimrit, rrugëve të dëbimit dhe popullin fatkeq në çorientim të tërësishëm dhe disfatizëm të plotë.
Ndaj, para se ti ktheni, ndihmoni ndryshimet në vendet e shqiptarëve dhe mos përkrahni njerëz e grupe të mbeten në pushtet, të cilët nuk do ti lejonit të qeverisin vendin tuaj, me korrigjimin e problemit, të mos ketë nevojë të përsëriten eksodet, në mënyrë që ata ta ndiejnë veten mirë në vendin e tyre dhe ju ta ndihmoni kështu edhe vetveten!

Kosova po i fal Evropës të rinjtë e vet me vlera mbi “200.000 Euro” pro person!!!

by

Shpërnguljet të shqiptarëve nëpër shekuj deri në ditët e sotme nga trojet e veta. I njëjti ritëm u përsërit atëherë nga pushtuesit, por sot nga pushtetarët e vet qe i besoj votën e vet .Këtu ndryshon vetëm forma , atëherë kanë zgjatë me muaj këto shpërngulje, sot për 24 të rinjtë dhe popullin tonë e tret Evropa në barkun e vet ,duke e njom trupin e vet të mplakur me rininë e Kosovës ! Rinia po falet sikur kafsha e ngordhura t’u hidhet qenve të uritur!
Shkruan:Asllan DIBRANI/
Eksodi i shpërnguljes shekullore nga trojet e gadishullit ballkanik me vendbanime shqiptare po vazhdon! Ky fenomen u përshkallëzuar me përmasa rrëqethëse , te dhimbshme dhe shumë të rrezikshme për Kosovën. Faktorët po shihen, arsyet po dihen!?… Plagët që po i krijohen Kosovës po shihen dhe rriten për çdo ditë. Shifrat po rriten nga ora në orë, me një bilanc që vetëm për muajin Janar , Kosova mbeti pa 60.000 mije të rinj (banorë).
Pamje e Shpërnguljeve të shqiptarëve nëpër shekuj deri në ditët e sotme nga trojet e veta. I njëjti ritëm u përsërit atëherë nga pushtuesit, por sot nga pushtetarët e vet qe i besoj votën e vet .Këtu ndryshon vetëm forma , atëherë kanë zgjatë me muaj këto shpërngulje, sot për 24 të rinjtë dhe popullin tonë e tret Evropa në barkun e vet ,duke e njom trupin e vet të mplakur me rininë e Kosovës !

Ky bilanc nuk u ndal asnjëherë, po me ritme të reprezaljeve politike dhe gjenocidi qe u ushtuar mbi këtë popull ma të vjetrin në Evropë po vazhdon shpërngulja prapë .Kosova po mplaket. Sakrificat ,vështirësitë dhe mundi për ta rritur një të ri janë marramendëse me standardin e Kosovës. Këta të rinj që po i falen sot Evropës kanë vlera marramendëse që buxheti i varfër i Kosovës po i kursen Evropës hiq ma pak se 200.000 euro në krye të çdo të riu vetëm deri në moshën 18 vjeçare .Kjo kosto është shumë ma e madhe, po që të përllogaritet një matematikë për një të ri që ta këtë një shkollë të mesme profesionale apo shkollë të lartë. Për profesione fakultetative arrin shuma deri në 450.000 -500.000 euro për ta pasur një doktor, një profesor , një shkencëtar një krijues apo në ndonjë lami tjetër profesionale. Këto profile profesionale në mesin e këtyre refugjateve shqiptarë ka me numër të madh që e kanë marrë rrugën e kurbetit, lënë shtëpi e kapital lagje të tera apo edhe fshatra një gjë e tillë u përsërit ne përndjekjet e shqiptareve ne mënyre fushate me gjenocid nga Sanxhaku, Nishi ,Vranja ,Leskovci ani po ndodh edhe tash me të tera fshatra të boshatisen.
Rinia po falet sikur kafsha e ngordhura t’u hidhet qenve të uritur!
Kjo rini e mrekullueshme e shëndosh , e përgatitur , e shkolluar dhe e gatshme për punë për ta rindërtuar Kosovën është masë e dëmshme të zhduket dhe të falet sikur kafshë e ngordhura tu hidhet qenve te uritur ???. E pa falshme është për krerët politik të Kosovës , po edhe për zyrtaret e Evropës që e kanë fut këtë popull të vogël si në kafaz, të mbyllur të izoluar, të pa shpresë dhe të pa rrugë. Si fund le të mbetet si apel tek të gjitha forcat qeveritare , politikaj ,njerëz të dashur dhe popull, mendoni dhe sakrifikoni, për interesat e Kosovës bashkoni forcat që kapitalin dhe vlerat e juaja ndalni në Kosovë mos ja falni Evropës!!!Mos ja falni rininë Evropës se një Kosove pa të rijnë dhe e mplakur e gëlltit Serbia ma lehtë sipas hegjemonizmit shekullor të saj!!!

Reductio ad absurdum

by

Nga Alfons Grishaj/
Latinët , kur shikonin që dikush kalonte cdo kufi të arsyes , përdornin thënien: “Reductio ad absurdum”,që do të thotë, të çuarit deri në absurd, deri në marrëzi …Në kohën tonë kemi mjaft të tillë ,të cilët me vetëdije apo pa vetëdije zbresin në këtë thënie …
Shpirtrat e këqinj dhe mendjet e sëmura , janë në një aneks… jetojnë brenda njëri-tjetrit dhe punojnë për njëri-tjetrin me një përpikmëri të mahnitshme .Impulsiteti regresiv nuk i lejon asnjëherë të japin një mendim të vlefshëm ,të qytetëruar ,të dhimbshëm apo vizionar. Problemet që hasin në jetë qofshin dhe të bukura, mundohen ti fusin në labirinthe dhe udhë pa krye .Ata, nuk ia fillojnë prej arsyes që prodhon mencuri zgjidhje,por ia fillojnë prej absurdit që prodhon konflikt.
Njihen disa rrethana të kësaj kategorie.të cilët kanë të bëjnë me genin , por dhe me kushtet e rrethanat ku kanë jetuar më parë,ambjentin,apo rastësinë.Për mua, një rëndësi të vecantë bën pjesë zhvillimi psiko-motor që në fëmijërinë e hershme…Mesa mbaj mend unë , materialistët thonë: ”Nuk është qenia e njeriut që percakton ndërgjegjen e tij,por përkundrazi është gjendja e tij shoqërore që përcakton qenien e tij” Idealistët thonë , “Njeriu ideal nuk është produkt i rrethanave ,por trashëgimtar i genit”. Në këtë rast , aprovoj të dyja thëniet ,megjithëse jam kundërshtar i doktrinës materialiste, vlen të merret në konsideratë.
Në jetën time, kam pasur rastin të njoh disa prej tyre dhe të them të vërtetën nuk jam befasuar,duke pasur parasysh kohën e tmerrshme të diktaturës,ku i mençuri shikohej si rrezik dhe burgosej ,kurse i vonuari bëhej antar i Byrosë Politike,trimi bëhej hajdut dhe frikacaku politikan.Paradokse të tilla ndodhin në diktatura, ku stimulohet shpërfytyrimi njerëzor dhe shkatërrimi i sistemit nervor –qëndror dhe vlera bëhet antivlerë.
Habija ime vjen në kohën tonë moderne ,ku mundësitë e ballafaqimit të qytetërimeve dhe doktrinave ,të dijes dhe injorancës,te sëmundjeve nervore e ligësive shpirtërore , mendjeve dhe shpirtërave të shëndoshë ,pothuajse tashmë dallohen dhe prej fëmijëve të shkollës fillore! Përsëri ,megjithë njohjen e këtyre fenomeneve që rreshtova më lart ,biem viktima të momentit dhe rrethit …
A mund të pranojë inteligjenca të bie ne thënien : “Bellum omnium contra omnes!” ,që përkthehet, luftë e të gjithëve kundër të gjithëve! Ku do të ishte bota nëse do zbatohej ky aforizëm që u përdor pa lindur shteti? Ku do të shkonte shoqëria civile po qe se principi dhe virtyti do të transformohej në irracionalitet dhe absurditet? Në këtë analizë është homo sapiens dhe jo intiligjenca artificiale që prodhoi njeriu!
Atëherë ,si mund ta emërojmë njeriun absurd që prodhon antivlerë dhe marrëzi? Narcist(e)? ,Bipolar?,Psikopat (e),Zkizofren(e)Paranoid apo Hebefrenik(e) ? Ka nga këto që e pranojnë sëmundjen e tyre dhe marrin mjekim , por nuk shërojnë shpirtin .Ata ,ose ato jetojnë dhe në mesin tonë, që jo vetëm nuk e pranojnë difektin ekstrem ,por mundohen të shpjegojnë se ata janë njerëzit e “vërtetë” ,biles “vlera vetë” ,dhe më dhunë e fjalor pornollogjik e shpifarak kërkojnë të diktojnë dhe infiltrojnë dekompozimin psikik që vuajnë…Jo vetëm nëpër webet e sotme e shohim këtë kategori,e cila brohoret “Eureka!” ,por dhe në mesin tonë…
Megjithëse kam pak besim tek terapia mjeksore, që kurimi të jetë efikas, atyre u duhet mjekimi mendor dhe ai shpirtëror sëbashku . Nëse mjekojmë mendjen pa shëruar shpirtin , do te jetë njësoj sikur ti vesh një të verbëri gjyslykë dielli në diell.
E ilustroj me një rast të Dr.Prof.Bajram Preza, i cili u mundua të rehabilitonte një skizofren…Historia ështe reale , ma tregoi miku dhe profesori im i nderuar , Dr. Kristo Kallapolli.
Dr. Preza ,punoi intensivisht për të rehabilituar nje zkizofren.Pas një kohe relativisht të gjatë , atij iu duk se i’a arriti qëllimit! E vendosi ish të sëmurin kuzhinjer në spitalin ku ai punonte ,dhe herë pas here shkonte e shihte .
Një ditë ,Dr.Preza shkoi tek ai dhe e pyeti se si i shkonin punët .Ish-pacienti i tij, tek përziente supën e shikoi doktorin nga këmbët tek koka… “çfarë mendon ?”- e pyeti Dr.Preza,ish-pacientin i tij. Ai u përgjigj, – “po mendoj se si të ndaj në copa dhe të fus në kazanin e supës që gjella të dalë më e mirë!” – Doktori i’u përgjigj aty për aty, – “Si mund të hyj unë me rroba aty,të prish supën?! …Po shkoj të zhvishem ,të lahem dhe po vij menjëherë!” Zkizofreni i kënaqur nga përgjigjja “pozitive” pranoi propozimin e ish-mjekut të tij! Porsa doli nga kuzhina, Dr. Preza lajmëroi ekipin mjeksor dhe porositi që ish-pacienti i tij të dërgohej përsëri në koloni…
Megjithë punën disa vjecare për të rehabilituar të sëmurin psikik , Dr.Preza dështoi! Po NE ?!

Kategori e tillë ,është e rrezikshme dhe e dhunshme brenda shoqërisë dhe familjes.Në rastin kur janë prindër ,fëmijët jetojnë në frikë dhe pasiguri.Keqtrajtimi është çnjerëzor. Nëse do të shikosh në sytë e këtyre fëmijëve…ninëzat janë të zmadhuara në raport me syrin,çka tregon disorderin nervor që vuajnë.Familjet e të lartëpërmendurve jetojnë një dramë të vërtetë!
Konflikti në familje shkon deri në neveri.Reflektimi i kësaj drame përcillet dhe nëpër ambjentet shoqërore dhe në institucionet ku ato bëjnë pjesë.Si pasojë e keqja e tyre përhapet në formën e një kolere që moleps dhe njerëzit përreth…
Sëmundja e paranoizmit i bën të pavetëdijshëm dhe të papërgjegjshëm.Shpesh herë u duket vetja si shpëtimtarë ,krijues dhe udhëheqës,pa bërë asgjë ,ose duke bërë gjëra poshtë normales dhe jo normale.Gama e këtyre fenomeneve varion sipas të sëmurëve dhe diagnosës.
Ndeshemi me surpriza në mënyrë sistematike. Jo rrallë shfaqin shenja kleptomanie,të cilat i justifikojnë si të natyrshme.Ndryshime në personalitet, mënyra e budallallëkut se si shkruajnë dhe si shprehen, irracionalë , të zemëruar dhe të frikshëm për njerëzit që dojnë…Kanë alucinacione që nuk lidhen me besimin dhe misterin e Zotit.
Prostitucionin e quajnë si një akt normal dhe besën si koncept abstrakt…Janë lypcarë të paskrupullt dhe xheloz pikant. Sharlatanë të degraduar ,nuk pranojnë në asnjë mënyrë inferioritetin, gabimin e quajnë të drejtë absolute!
Nuk njohin pasqyrë reflektive ,dhe falja për ta është hakmarrje që gjeneron formatin e vërtetë të njeriut primitiv.
Mizantropia ështe një shkallë tjetër e ligësise shpirtërore, ku Uni i keq ndërsen deformimin , bllokon frymëmarrjen dhe proçesin natyral, duke aktivizuar dhe promovuar një precedent të rrezikshëm anti-human.
Këtu është dhe zhgënjimi më i madh .Nëse në rastin e mësipërm ne ballafaqohemi me shpërthime jo normale dhe mëshirojmë,rasti prezent tregon meskinitetin ,antivleren dhe mohimin njerëzor…
Albert Camus thotë: “Man is the only creature that refuses to be what it is.”

Ja pse ndodhin përmbytjet në jug

by

Flet Prof. Niko Pano, kryetar i shoqatës “Mbrojtja dhe Ruajtja e Ujërave të Shqipërisë”/
-Duhen ndërtuar urgjent kaskadat e Devollit, Vjosës, Shkumbinit që të ndalohen përmbytjet/
– Kemi lartësi mesatare të madhe të relievit, intensitet të madh reshjesh dhe reliev të thyer/
-Për përmirësimin e gjendjes nuk duhet të përmbahemi tek masat administrative por tek ato shkencore/
– Pra kemi një potencial ujor shumë të fuqishëm, por shumë delikat, shumë “aristokrat”/
– Shkenca shqiptare duhet ti dali zot dhe ta menaxhojë hidroekonominë shqiptare/
– Ministria e Bujqësisë, Ministria e Mjedisit, dhe ajo e Energjetikës duhet të bëjnë një plan shkencor
– Volumi i prurjes maksimale të Vjosës është 888 milion metër kub ujë. Kjo prurje e plotë vazhdon 5-6 ditë.
-2 000 metro kub ujë dalin jashtë shtratit të Vjosës dhe bëjnë përmbytjet
– Reshjet maksimale në Shqipëri arrijnë nga 350-450 mlm brenda 24 orëve
– Prurjet maksimale nuk rregullohen aty ku derdhen, por aty ku formohen në zonën malore të territoret.
– Vjosa e ka prurjen maksimale në 100 vjet 4450 metra kub ujë në sekondë
– Zona e degradimit nga këto reshje është nga Zvërneci deri në derdhjen e Semanit
– Është e papranueshme që kjo tokë dikur pjellore, të mbetet e pa shfrytëzuar për shkak të kripëzimit
– Deformimi i shtratit të lumit sjell probleme të pallogaritshme.
– Dëmtimi i mjedisit, prerja e pyjeve, zhveshja e pyjeve, marrja pa kriter e inerteve, kanë prishur ekuilibrat natyror
– Masat e qeverisë, janë të domosdoshme dhe efikase, por janë shumë të përkohshme
– Ndryshimet klimaterike janë shumë më të ndjeshme në Shqipëri se vendet e rajonit
– Baza e këtyre problemeve, përmbytjeve sot, është impakti i ndryshimeve klimatike
Nga Albert Z. ZHOLI/
Ditët e fundit, jugu i Shqipërisë po kalon një situatë të vështirë për shkak të reshjeve të shumta të cilat kanë sjellë përmbytje dhe shumë dëme materiale. Me gjithë masat e shumta administrative të shtetit, dëmet janë të pallogaritshme. Lind pyetja: Pse kanë ndodhur përmbytjet në jug? Sipas dy specialistëve më të mirë të burimeve hidrike, shkaqet janë të shumta por që zgjidhja kërkohet në shkencë dhe jo vetëm në masat administrative. Sigurisht që qeveria po merr masa të mira, por janë të pamjaftueshme, pasi problemet janë të mbartura theksojnë specialistët. Vendi ynë është një vend me reshje të shumta, ndër vendet me reshje më të mëdha në Europë dhe përmbytjet do të jenë gjithmonë prezent, por nga ana tjetër, për 25 vjet janë prishur shumë kolektorë, hidrovorë, delta të lumenjve, sikundër janë bërë ndërtime dhe në zona ujëmbajtëse. Por kryesorja është që në 25 vjet demokraci nuk është ndërtuar asnjë kaskadë e re si e Fierzës që të pengojë përmbytjet. Ja si shprehen dy specialistët e mirëfilltë për gjendjen në jug

Reshjet problemi i ditës në Shqipëri ku kemi përmbytje dhe dëme të mëdha materiale. Nga se kanë ardhur këto dëme?
Arsyet janë të shumta. Kemi lartësi mesatare të madhe të relievit, intensitet të madh reshjesh dhe reliev të thyer. Nuk po ndërtojmë kaskadat e tjera në Devoll, Vjosë Shkumbin që kështu me këto projekte frenojmë prurjet maksimale. Jemi shumë të ekspozuar ndaj reshjeve. Por, ky problem nuk zgjidhet vetëm me masa administrative, situata duhet menaxhuar shkencërisht dhe jo vetëm administrativisht. Ministria e Bujqësisë, Ministria e Mjedisit, dhe ajo e Energjetikës duhet të bëjnë një plan shkencor, pasi projektet për kaskadat janë gati. Pse kanë ndodhur përmbytjet në jug? Sepse Shqipëria ka një potencial të lartë hidrik, madje jemi vendi me potencial më të lartë, më të madh në Europë, Ne kemi modulin e rrjedhjes 30 metër në sekondë për kilometër katror, nga më të lartat në Europë, ku reshjet shkarkojnë 1308 metër kub ujë në sekondë. Kemi variacione të mëdha gjeofizike,d.m.th, prurjet në dimër janë shumë të larta, dhe e dyta ka variacione ndaj ciklit 100-vjeçar. Pra kemi një potencial ujor shumë të fuqishëm, por shumë delikat, shumë aristokrat. Atëherë ndryshimet klimaterike janë shumë më të ndjeshme në Shqipëri se vendet e rajonit por do të jenë akoma më të ndjeshme në të ardhmen. Prandaj nëse hidroekonomia shqiptare nuk do mbështet në shkencë, por do të mbështetet vetëm në administratë dhe në masa administrative si kanale, hidrovore, kullime (pra nëse nuk do të menaxhohet shkencërisht) problemet do të jenë edhe më serioze. Jam shumë dakord me masat e qeverisë, ato janë të domosdoshme dhe efikase, por janë shumë të përkohshme. Ne duhet të jemi shumë më të ndjeshëm ndaj impaktit të ndryshimeve klimaterike, pasi jemi shtet me potencial të madh ujor. Reshjet në Shqipëri arrijnë nga 450-500 mlm në vit. Pra ka një shkarkim të jashtëzakonshëm të reshjeve të cilat sjellin prurje të mëdha. Ndaj shkenca shqiptare duhet ti dali zot, dhe ta menaxhojë hidroekonominë shqiptare. Është normale që vendi ynë është i ndjeshëm nga këto dukuri. Dhe baza e këtyre problemeve sot është impakti i ndryshimeve klimatike. Por ne nuk po shfrytëzojmë kapacitetin hidroenergjetik të vendit.
Si do ti cilësonit prurjet e lumit Vjosa?
Vjosa e ka prurjen maksimale në 100 vjet 4450 metra kub ujë në sekondë. Volumi i prurjes maksimale, të plotë, është 888 milion metër kub ujë. Kjo prurje e plotë vazhdon 5-6 ditë. Aftësia ujëheqëse, ujë thithëse, e lumit drejt detit është 2500 metër kub në sekondë, që kështu, gati 2 000 metro kub ujë dalin jashtë shtratit dhe bëjnë përmbytjet. Është shqetësuese, por kjo situatë dëmin më të madh e sjell në zonën e bregdetit dhe që e degradon atë.
Si degradohet dhe cila është kjo zonë që degradohet?
Zona e degradimit nga këto reshje është nga Zvërneci deri në derdhjen e Semanit. Ky degradim që ndodh, e ka kthyer tokën në të pashfrytëzueshme. Kështu krijohet difuzioni i kripës, sepse uji i kripur me ujin e ëmbël përzihen. Është e papranueshme që kjo tokë, kjo hapësirë kaq e bukur, dikur aq pjellore, të mbetet e pa shfrytëzuar për shkak të kripëzimit. Nuk është e pranueshme që grykëderdhja kaq e bukur të lihet në mëshirën e ujit të pa orientuar. Përmbytja degradon territorin, jo vetëm njerëzit.
Po si mund të rregullohet apo anashkalohet përmbytja?
Prurjet maksimale nuk rregullohen aty ku derdhen, por aty ku formohen, në zonën malore të territoret. Prandaj të ndërtohen kaskadat. Ndërtimi i tyre prodhon energji dhe ruan mjedisin. Dëmtimi i mjedisit, prerja e pyjeve, zhveshja e pyjeve, marrja pa kriter e inerteve, kanë prishur ekuilibrat natyror. Të gjitha këto probleme prishin shtratin e lumit. Deformimi i shtratit të lumit sjell probleme të pallogaritshme.
Duke u ndalur në këtë pikë…sa është shfrytëzuar kapaciteti hidroenergjetik në vendin tonë?
Mund të them aspak. Përkundrazi, është lënë në mëshirë të fatit. Aktualisht sot në Shqipëri është shfrytëzuar vetëm 30 për qind e kapacitetit hidroenergjetik, që bën një masë shumë të vogël në raport me realitetin. Ne ndoshta jemi vendi që kemi shfrytëzuar më pak se të gjithë burimet hidrike të vendit. Vende të tilla si Zvicra, Spanja apo Franca kanë shfrytëzuar rreth 90 për qind. Pra të gjitha këto tregojnë interesin e lartë që kanë treguar këto vende për energjinë hidrike si një nga ndërmarrjet kryesore për sigurimin e energjisë elektrike.

Cilat janë lumenjtë më të pashfrytëzuar të vendit tonë?
Lumenjtë më kryesorë ku ne nuk kemi bërë hidrocentrale apo që janë lumenjtë më të pashfrytëzuar, janë lumenjtë e Drinit të Zi dhe lumit Vjosa. P.sh në ish –Jugosllavi, në Drinin e Zi, ka tre hidrocentrale ndërsa ne jemi vendi që nuk kemi marrë asnjë nismë mbi këtë lum me kapacitete hidrike mjaft të mëdha. Por akoma më shumë është lumi Vjosa, i cili mund të themi se nuk është shfrytëzuar fare. Ato hidrocentrale të vegjël që janë bërë mbi Vjosë janë fare të papërfillshëm.

**************
Akademik Farudin Hoxha: Rrënjët e pemëve e bëjnë të patundur tokën. Toka rri në krye

Në një intervistë të zhvilluar vitin e kaluar me akademik Farudin Hoxha, për problemet e përmbytjeve shprehet:

-Mbeturinat e spitaleve të Gjirokastrës janë në lumin Drino dhe bëhen burim sëmundjesh
-Janë prishur argjinaturat, hidrovoret, deltat e lumenjve janë devijuar dhe janë bërë ndërtime në fusha
– Kaskadat lehtësojnë përmbytjet, ato mbajnë nën kontroll disa mijëra metra kub ujë.

Kush janë lënë në mëshirë të fatit në Shqipëri, cilat rezerva natyrore?
Pyjet. Pyjet janë metalurgji prodhimesh. Sa kalon Qafë-Thanën dhe futesh në Maqedoni është natyrë tjetër. Sepse çdo zonë ka rojtarët e vet. Kjo varet nga mirëmbajtësit e pyllit. Ata kanë mirëmbajtje të çdo peme me numër. Pylli është një kombinat i madh pa fund. Pylli ka mishin dhe lëkurën e kafshëve të egra pa fund, si derrin, kaprolli, dhelprën. Në Lezhë ka pasur derra të egra pa fund dhe tani aty nuk janë më sepse filluan të presin pyllin.

– Prerja e këtyre a ka ndikuar shumë në Shqipëri?
Ka ndikuar në pyje. Toka është një betonarme. Rrënjët e pemëve e bëjnë të patundur tokën. Toka rri në krye. Pylli nuk është vetëm që e bën zero erozionin. Pylli është një rezervuar i madh i lagështisë dhe i ujit. Në vendet ku ka pyje, në behar vazhdon e rrjedh uji. Pylli është një kompleks industrial që ka disa uzina dhe disa fabrika. Duke filluar nga kërpudhat, që nuk shiten në Shqipëri, ndërsa në vendet e perëndimit ato janë me shumicë. Aty ku ka pyje ka reshje. Pyjet në zonat tona malore janë të zhveshura.

– Po lumenjtë e jugut janë më të pastër se sa të Shqipërisë së mesme?
Ndotja ka filluar në të gjithë Shqipërinë. Mbeturinat e spitaleve të Gjirokastrës janë në lumin Drino. Dhe thonë kush futet në lumin Drino, njerëzit janë mbushur me plagë dhe janë shtruar në spital. Për këtë, emisionet televizive duhet të kenë një propagandë të paktën dy orë në ditë. Këto nuk janë vetëm edukuese por kanë edhe sensin shkencor brenda.

-Pse kanë ndodhur shpesh përmbytje në veri?
Pasi janë prishur argjinaturat, janë prishur hidrovoret, deltat e lumenjve janë deformuar, devijuar nga ndërtimet dhe janë bërë ndërtime në fusha ku dihet që bëhen përmbytje. Po të eliminohen këto për disa ditë rregullohet çdo gjë.

– Pse ndodhin sot përmbytja dhe nuk ndodhnin në kohën e diktaturës?
I shpjeguam më lart. Por në veri tokat nuk i përmbysin hidrocentralet. Njerëzit disa herë i interpretojnë gabim ngjarjet. Duhet të jemi realist. Hidrocentralet nuk mund ta mbajnë të gjithë këtë ujë që bie. Ku ta çojnë? Po sikur të mos ishin këto hidrocentrale, ku do të shkonte ai ujë? Kur vjen periudha me shumë shira, kaskadat nuk kanë ku e çojnë ujin e tepërt dhe e shkarkojnë dhe bëhen përmbyten. Përmbytja më e madhe është bërë në vitin 1962 ku erdhën 5500 metër kub. Uji i Drinit nuk vjen vetëm nga Shqipëria, vjen nga 48 mijë km katror tokë që rrjedh ujë në territorin shqiptar. Këtu formohen edhe prurjet e mëdha. Kur shkrin bora, është e paevitueshme që do të kesh prurje të mëdha. Kaskada lehtëson përmbytjet. Merr dhe mban dhe disa mijëra metra kub ujë.
– Po vendet fqinje, Maqedonia apo Greqia a kanë hidrocentrale të këtyre përmasave?
Asnjë nga vendet që janë rrotull nesh nuk ka më shumë se sa ne hidrocentrale apo të këtyre përmasave. Mali i Zi ka disa, ndërsa shumë vende të tjera përdorin TECET me qymyr. TEC-i është si soba, po nuk i fute dru, ftohet soba. Edhe TEC-in duhet ta mbushësh vazhdimisht që të prodhojë energji elektrike. Por ka shumë ndotje. HC-i është i pastër.

– Janë më ekonomik TEC-et?
Asnjëherë, ato prodhojnë gaz karbonik për të cilët është e ndaluar. Që të kesh TEC- in duhet të kesh edhe qymyr. Mbeturinat e TEC-eve duhet vend se ku ti hedhësh. TEC-et nuk janë ekologjik por janë ndotës të mëdhenj. TEC-et duan fuqi të madhe punëtore.
– ******************
– Flet Prof. Ago Nezha
– Situata është tepër e vështirë, tejet e dhimbshme, me gjithë masat që po merr qeveria. Këto janë probleme të mbarsura për 25 vjet, ku nuk është punuar me strategji për të përballuar situata të tilla. Në këto 25 vjet, Shqipëria është lënë në mes të katër rrugëve, si mall pa zot.
– Këto përmbytje kanë ardhur sepse:
– -Janë prishur të gjitha argjinaturat dhe kanalet e dyta dhe të treta të kullimit të ujërave në tokat e punueshme.
– -Janë prishur thuajse të gjitha stacionet hidrometereologjike, të cilat paralajmëronin situata të tilla.
– -Lumenjtë kanë devijuar nga shtretërit, si rezultat i ndërtimeve dhe marrjes së inerteve pa llogari, dhe si zor që këto shtretër të mund të disiplinohen më.
– -Brezat pyjorë që ishin mbjellë për luftë kundër erozionit (gërryerjeve), janë prerë dhe shkatërruar në mënyrë të përbindshme.
– -Pyjet nëpërmjet rrënjëve të pemëve thithin 70 % të ujit, që tashmë kalon në gjendje të lirë, pa pengesë.
– – Janë prishur hidrovoret dhe të gjitha kolektorët.
– Çfarë do të ndodhë pas këtyre përmbytjeve?
– Tokat e përmbytura nuk do të jenë në gjendje pjellorie natyrale, mikroelementet kanë shkuar në det dhe toka nuk do të mund të rigjenerohet.
– -Riaftësimi i tokës për prodhim, kur uji qëndron për ditë të tëra mbi tokë, do kohë të riaftësohet.
– -Detyrë e shtetit është që në mbjelljet e pranverës duhet të investojë për fermerët me plehra kimikë, që të riaktivizojnë pjellorinë e tokës.
–

Kosovë-Hyseni: Ikja e qytetarëve, fushatë e kriminelëve

by

PRISHTINË, 7 Shkurt /-Ministri Kosovar i Punëve të Brendshme, Skënder Hyseni, theskoi në një intervistë televizive se “organizatat kriminale të trafikimit, me një organizim shumë të mirë, janë fajtorët kryesorë të ikjes së qytetarëve të Kosovës në mënyrë masive”.
Hyseni pranon se situata është alarmante, por sipas tij, papunësia dhe problemet e tjera të qytetarëve po shfrytëzohen nga trafikantët.
Hyseni tha në televizionin publik kosovar se rritja e numrit të personave që po ikin nga Kosova është një fushatë e orkestruar nga kriminelët në të dy anët e kufirit Kosovë-Serbi.
“Po gjithsesi kemi të bëjmë edhe me një fushatë të orkestruar mirë kryesisht nga kriminelët e organizuar në të dy anët e kufirit Kosovë-Serbi. Gjithsesi nga kriminelët e organizuar në Serbi dhe pashmangshëm edhe nga ata që janë të kyçur në këtë proces të paligjshëm të lehtësimit të kalimit të kufirit Serbi-Hungari për qytetarët e Kosovës”, tha Hyseni në emisionin ‘Debat’ në RTK.
Ai i bëri thirrje qytetarëve mos të largohen nga vendi, pasi të gjithë do të rikthehen.
Sipas medias, shumica e kompanive që po transportojnë qytetarët e Kosovës në drejtim të Serbisë, janë dënuar mbrëmë nga autoritetet përgjegjëse.
“Secili nga ne që kemi pasur më shumë se një autobus jemi dënuar me 1 mijë euro gjobë. Arsyetimi ka qenë se ne nuk kemi të drejtë që të nisim më shumë se një autobus për natë, pa pasur edhe leje shtesë për numër më të madh të nisjeve”, ka bërë të ditur një nga pronarët e autobusëve.
Sipas tij, nisjet e rregullta janë kryer vetëm në orën 9:30, ku në drejtim të Serbisë kanë udhëtuar mbi 250 persona.
“Nisjet e mëvonshme janë bllokuar nga policia dhe asnjë nga ne s’ka mundur të nis më shumë se nga një autobus. Kështu që gjysma e udhëtarëve kanë mbetur në tokë”, ka sqaruar burimi i “Tribuna”.