ne Prishtine – Dielli

Kosova dhe BE-ja duhet të qëndrojnë afër

September 17, 2018 by dgreca

Në Prishtinë, Komisioni Parlamentar për Marrëveshjen e Stabilizim-Asociimit /
Picula: Kosova dhe BE-ja duhet të qëndrojnë afër/

1 Veseli Picula 2 ok harad kuv 2 ok veseli picula 1 Pcula 1 Mbledhja e qev me Picula

-Në Prishtinë po mbahet sot e neser mbledhja e pestë e Komisionit Parlamentar për Marrëveshjen e Stabilizim-Asociimit Bashkim Evropian-Kosovë/

–Kryesuesi i delegacionit të Parlamentit Evropian, Tonino Picula, tha se Kosova dhe BE-ja duhet të qëndrojnë afër, ndërsa konfirmoi mbështetjen për Prishtinën zyrtare të delegacionit që ai drejton, në të gjitha fushat, me theks të veçantë, liberalizimin e vizave për qytetarët e Kosovës

PRISHTINË, 17 Shtator 2018-Gazeta DIELLI-B.Jashari/ Komisioni Parlamentar për Marrëveshjen e Stabilizim-Asociimit BE-Kosovë, i cili përbëhet nga deputetë të Kuvendit të Kosovës dhe të Parlamentit Evropian, nisi sot pasdite mbledhjen e pestë dyditëshe në Prishtinë. Kryesuesi i delegacionit të Parlamentit Evropian, Tonino Picula, tha se Kosova dhe BE-ja duhet të qëndrojnë afër, ndërsa konfirmoi mbështetjen për Prishtinën zyrtare të delegacionit që ai drejton, në të gjitha fushat, me theks të veçantë, liberalizimin e vizave për qytetarët e Kosovës.Para fillimit të mbledhjes, kryetari i Kuvendit të Republikës së Kosovës, Kadri Veseli, priti në takim delegacionin e Parlamentit Evropian, anëtarë të Komisionit për Marrëveshjen e Stabilizim-Asociimit BE-Kosovë, të kryesuar nga Tonino Picula.Në emër të qytetarëve dhe institucioneve të Kosovës, Kryeparlamentari Veseli falënderoi eurodeputetin Picula dhe anëtarët e tjerë të delegacionit për mbështetjen e pakursyer ndaj Kosovës dhe për vendimmarrjen e fundit të Parlamentit Evropian për procesin e liberalizimit të vizave për qytetarët e Kosovës.Veseli tha se ky delegacion ka dhënë kontribut të çmuar në arritjen e MSA-së për Kosovën, ndërsa tani si pjesë e komisionit të përbashkët me delegacionin e Kuvendit të Kosovës, përbën një forum të pazëvendësueshëm në mbështetje të Kosovës.“Ky takim i radhës që po mbahet mes dy komisioneve tona që merren me zbatimin e MSA-së bëhet në atmosferën shumë pozitive të krijuar pas përgjigjes pozitive që ka marrë Kosova për liberalizimin e vizave. MSA-ja ishte hapi parë i rëndësishëm në rrugëtimin e Kosovës në integrimin e saj evropian. Kosova është tërësisht e përkushtuar në vizionin e saj nacional për tu bërë pjesë e Bashkimit Evropian. Ne besojmë në këtë vizion. Nuk kemi asnjë dilemë dhe as nuk mendojmë në alternative tjerë strategjike. Ky përcaktim për të ardhmen i ka rrënjët në identitetin evropian të popullit dhe qytetarëve tanë”, theksoi kryeparlamentari Veseli.Ai po ashtu tha se liberalizimi i vizave do të shënojë një input të ri në marrëdhëniet e Kosovës me Bashkimin Evropian.Mbledhja në Kuvendin e Republikës së Kosovës, në sesionin e parë të punues me fillim sot pasdite në orën 16:00 kryesohet nga Memli Krasniqi, kryetar i delegacionit të Kosovës dhe Tonino Picula, kryetar i delegacionit të Parlamentit Evropian.

Fjalën e hapjes e mban Nataliya Apostolova, Shefe e Zyrës së BE-së / Përfaqësuese Speciale e BE-së në Kosovë, në emër të Përfaqësuesit të Lartë të Bashkimit për Punë të Jashtme dhe Politikë të Sigurisë dhe në emër të Komisionit Evropian

Në mbledhjen e katërt të Komisionit Parlamentar për Stabilizim-Asociim BE-Kosovë, anëtarët e Parlamentit Evropian dhe të Kuvendit të Kosovës u takuan në Strasburg në 17-18 janar 2018.

Komisioni Parlamentar për Stabilizim Asociim BE-Kosovë për herë të parë është mbledhur në Prishtinë në 16-17 maj 2016, në të cilin vit, në 1 prill, nisi zbatimi i Marrëveshjes së Stabilizim Asociimit në mes të Kosovës dhe Bashkimit Evropian, e nënshkruar në 27 tetor 2015 në Strasburg dhe e ratifikuar në Parlamentin kosovar pas pak ditësh, në 2 nëntor.

KRYEMINISTRI HARADINAJ: VOTA PRO KOSOVARËVE ËSHTË VOTË PRO QYTETARËVE EUROPIANË

Kryeministri i Republikës së Kosovës, Ramush Haradinaj, priti në takim delegacionin e Parlamentit Evropian, të kryesuar nga Tonino Picula, i cili po qëndron në Kosovë për të marrë pjesë në mbledhjen e Pestë të Komisionit Parlamentar për Marrëveshjen e Stabilizim-Asociimit BE-Kosovë, i cili përbëhet nga deputetë të Kuvendit të Kosovës dhe të Parlamentit Evropian.
Kryeministri Haradinaj, e njoftoi delegacionin nga Parlamenti Evropian për të arriturat në të gjitha fushat, me theks të veçantë në zhvillimin e qëndrueshëm ekomomik, forcimin e sundimit të rendit dhe ligjit, përmbushjen e agjendës së Reformave Evropiane dhe në fusha të tjera që ndikojnë në rritjen e mirëqenies sociale.Kryeministri Haradinaj në veçanti ka falënderuar deputetët për votën pro liberalizmit të vizave në Parlamentin Evropian, duke thënë se ky konfirmim është lajm i mirë për popullin e Kosovës.

“Vendimi i Parlamentit Evropian pro rekomandimit për heqjen e vizave, ishte lajm i mirëpritur nga institucionet dhe populli i Kosovës, andaj në emër të qytetarëve tanë ju shpreh mirënjohjen të gjitha institucioneve të BE-së për punën dhe angazhimin e tyre që Kosova të jetë pjesë e integrimeve evropiane. Vota juaj pro kosovarëve është votë pro qytetarëve tuaj. Ne jemi të përkushtuar që t’i takojmë vlerave evropiane, besimit evropian dhe një ditë edhe familjes evropiane”, tha kryeministri Haradinaj, duke shtuar se Kosova është e përqendruar që të vazhdojë punën e saj në konsolidimin e brendshëm në të gjitha fushat, marrëdhëniet e mira ndër fqinjësore, dialogun dhe në fuqizimin e partneritetit me vendet e BE-së dhe SHBA-të.

Në këtë takim u diskutua edhe për progresin e Kosovës dhe rezultatet e arritura në implementimin e MSA-së. Kryeministri Haradinaj i njoftoi parlamentarët evropianë për zbatimin e MSA-së, për të cilën tha se ka dhënë rezultate pozitive, dukefalënderuar institucionet e BE-së, në përkrahjen e dhënë në implementimin e masave që duhen ndërmarrë për zbatimin e Reformës së Agjendës Evropiane.

Deputetët e Parlamentit Evropian të kryesuar nga Tonino Picula përshëndetën të arriturat në Kosovë, duke theksuar përkrahjen e vazhdueshme të Parlamentit Evropian në proceset e integrimeve evropiane të Kosovës dhe duke inkurajuar institucionet të vazhdojnë angazhimin e tyre për fuqizimin e brendshëm dhe ndërkombëtar të Kosovës.Pjesë e takimit ishte edhe shefja e Zyrës së Bashkimit Evropian në Kosovë, Nataliya Apostolova, zëvendëskryeministri dhe ministri i Punëve të Jashtme i Republikës së Kosovës, Behgjet Pacolli, ministrja e Integrimit Evropian, Dhurata Hoxha dhe ambasadori i Kosovës në Bruksel, Bernard Nikaj.

***

Kryeministri Haradinaj: Për Axhendën Evropianr, të gjithë jemi të bashkuar

Prishtinë, 17 shtator 2018- Kryeministri i Republikës së Kosovës, Ramush Haradinaj, mori pjesë në takimin e Pestë të Komisionit Parlamentar për Marrëveshjen e Stabilizim-Asociimit BE-Kosovë, i cili përbëhet nga deputetë të Kuvendit të Kosovës dhe të Parlamentit Evropian.
Para të pranishmëve, përfaqësues të Parlamentit Evropian, kryesuar nga Tonino Picula dhe shefja e Zyrës së Bashkimit Evropian në Kosovë, Nataliya Apostolova, kryeministri Haradinaj tha se është shumë me rëndësi të theksohet, se qytetarët e Kosovës, të të gjitha përkatësive etnike e fetare, e konsiderojnë veten evropianë, si dhe qëndrojnë dhe mbështesin integrimin evropian të vendit tonë. “Në këtë fazë të hershme, kemi marrëdhënie kontraktuale me BE-në, përmes MSA-së, por besojmë se ky është vetëm fillimi dhe jemi të angazhuar për anëtarësim të plotë në BE. Me seriozitet e kemi marr agjendën, e cila është pjesë e programit qeveritar. E kemi integruar me prioritetet e marra nga MSA-ja, përmes planit të Agjendës së Reformave Evropian dhe mund të konfirmoj se në fund të tetorit do të përmbyllen prioritetet e para dhe do të vazhdojmë me fazën e dytë të Agjendës së Reformave Evropiane, së bashku”, tha kryeministri Haradinaj, duke u shprehur mirënjohës ndaj të gjithë përfaqësuesve të Parlamentit Evropian për votën e tyre pro heqjes së regjimit të vizave për qytetarët e Kosovës.
Kryeministri Haradinaj shfaqi shpresën se në këtë dinamikë Kosova do të qëndrojë së bashku në trialogun ndërmjet Parlamentit, Komisionit dhe Këshillit. “Ne i dimë detyrat tona. Fuqizimi i sundimit të ligjit, lufta kundër krimit të organizuar dhe korrupsionit, si dhe të qëndrojmë të fokusuar në planin tonë të punës dhe veprimeve këtu. Në këtë drejtim, mund të llogaritni në ne. Ne po punojmë në mënyrë substanciale në fushën e sundimit të ligjit, jo vetëm përmes lëndëve të shënjestruara, por përmes konsolidimit të sistemit të drejtësisë. Nuk duam të jemi vetëm konsumues të sigurisë. U jemi mirënjohës të gjitha vendeve që na kanë ndihmuar, NATO-s, EULEX-it dhe për tërë mbështetjen që kemi marrë. Por, tani ka ardhur koha, që ne të jemi edhe ofrues të sigurisë. Transformimi i FSK-së në ushtri është në shërbim të kontribuimit për sigurinë. Duke u bërë anëtare e NATO-s, ne synojmë të kontribuojmë për sigurinë në rajon dhe më gjerë”, tha kryeministri Haradinaj.Po ashtu, kryeministri Haradinaj, foli edhe për raportet me fqinjët, por edhe për dialogun me Serbinë, duke thënë se Kosova është e interesuar për njohje reciproke përmes marrëveshjes së detyrueshme ligjore. “Kjo njohje nuk duhet të jetë temë e korrigjimit apo lëvizjes së kufijve. Ajo që quhet korrigjim, është një mënyrë për t’u kthyer në të kaluarën tragjike. Ajo që duhet të arrijmë së bashku dhe që shpresojmë të ndodhë ndonjë ditë, është një marrëveshje paqeje. E kaluara jonë ishte tragjike. Plagët janë ende të hapura në vendin tonë. Ky është kontributi më i madh që mund të japë vendi ynë”, tha kryeministri Haradinaj.Po ashtu, kryeministri Haradinaj tha se është i interesuar të arrihet një marrëveshje obligative ligjore ndërmjet Kosovës dhe Serbisë, por jo përmes territoreve, jo përmes kufijve dhe jo duke i bërë thirrje të kaluarës sonë tragjike.“I bëjmë thirrje secilit vendimmarrës në Evropë dhe më gjerë, të mos lejojnë që procesi të shkojë në drejtimin e gabuar dhe që të jenë në kohë për të thënë jo, sepse në të kaluarën vonesat kanë kushtuar me jetë të njerëzve. Ne nuk jemi të interesuar të shohim rajonin dhe Ballkanin të kthehen mbrapa në atë kohë të tragjedive. Ne jemi të ndarë këtu në Parlamentin tonë, pozitë-opozitë, parti të ndryshme, kemi komunitete të ndryshme, Listën Serbe. Kur vjen puna te agjenda evropiane, gjithmonë do ta gjejmë mënyrën që të jemi bashkë. Qytetarët e Kosovës presin nga ne që të bëhemi të gjithë bashkë dhe të sigurojmë perspektiven evropiane të vendit tonë”, tha kryeministri Haradinaj. Në takimin e Pestë të Komisionit Parlamentar për Marrëveshjen e Stabilizim-Asociimit BE-Kosovë, folën edhe bashkëkryesuesi i Komisionit Parlamentar për Marrëveshjen e Stabilizim-Asociimit, njëherësh udhëheqës i delegacionit të Parlamentit Evropian, Tonino Picula, shefja e Zyrës së Bashkimit Evropian në Kosovë, Nataliya Apostolova dhe kryetari i Kuvendit, Kadri Veseli.

KOSOVA ËSHTË GJITHMONË E PARA

September 14, 2018 by dgreca

-Vizita në Prishtinë, Bushati: Kosova është e para/

-“Deviza jonë është që Kosova është gjithmonë e para dhe kësaj devize besoj se i jemi përmbajtur me besnikëri pavarësisht pozicioneve të ndryshme politike që aktorë të ndryshëm në Shqipëri mund të kenë për çështje të karakterit lokal. Kur vjen puna për këtë çështje kemi demonstruar unitet dhe solidaritet”, nënvizoi Ministri për Evropën dhe Punët e Jashtme të Shqipërisë, Ditmir Bushati/

Gazeta DIELLI nga korrespondenti në Kosovë Behlul Jashari/

PRISHTINË, 14 Shtator 2018/ Ministri për Evropën dhe Punët e Jashtme të Shqipërisë, Ditmir Bushati, ndodhet në Kosovë ku po zhvillon një vizitë zyrtare. Ministri Bushati zhvilloi një takim me Kryetarin e Parlamentit të Kosovës Kadri Veseli, me Kryeministrin e Kosovës Ramush Haradinaj, Zëvendëskryministrin e parë, njëherësh Ministër i Punëve të Jashtme të Kosoves Behgjet Pacolli, si dhe përfaqësues të spektrit politik në Kosovë.

Ministri Bushati zhvilloi një takim me Kryetarin e Parlamentit të Kosovës Kadri Veseli me të cilin diskutuan mbi bashkëpunimin mes dy vendeve tona por dhe rolin e parlamentit në zhvillimet e vendit.

Gjatë takimit me Kryeministrin Haradinaj, biseda u fokusua kryesisht në thellimin e marrëdhënieve dypalëshe, bashkëpunimin rajonal dhe atë shumëpalësh, zhvillimet në rajon dhe dialogu Kosovë- Serbi.

Në takim me Zëvëndëskryeministrin dhe Ministrin e Jashtëm të Kosovës Behgjet Pacolli, Ministri Bushati u ndal tek çështjet e bashkëpunimit dypalësh, intensifikimi i punës së përbashkët për rritjen e përfaqësimit të Kosovës në organizatat rajonale dhe më gjerë, mbledhja e përbashkët e dy qeverive si dhe dialogu Kosovë-Serbi. Ministri Bushati nënvizoi mbështetjen e padiskutuar dhe të qëndrueshme të Shqipërisë për Kosovën.

“Deviza jonë është që Kosova është gjithmonë e para dhe kësaj devize besoj se i jemi përmbajtur me besnikëri pavarësisht pozicioneve të ndryshme politike që aktorë të ndryshëm në Shqipëri mund të kenë për çështje të karakterit lokal. Kur vjen puna për këtë çështje kemi demonstruar unitet dhe solidaritet”, nënvizoi Ministri Bushati.

Duke iu referuar dialogut, Ministri Bushati nënvizoi nevojën “për të vijuar në këtë proces me durim strategjik, kreativitet dhe me vendosmëri për të konsoliduar Kosovën dhe arritjen e mundimshme të saj”.

Ndërsa në takimin me Zëvëndëskryeministrin Fatmir Limaj, u diskutua mbi axhendën e mbledhjes së ardhshme të dy qeverive në Pejë në funksion të konkretizimit të marrëveshje sidomos në fushën ekonomike.

Gjatë qëndrimit në Kosovë Ministri Bushati, zhvilloi takime edhe me krerët e partive politike parlamentare.

VESELI TAKOI MINISTRIN E JASHTËM TË SHQIPËRISË, DITMIR BUSHATI

Kryetari i Kuvendit të Republikës së Kosovës, Kadri Veseli, priti sot në takim ministrin e Punëve të Jashtme të Shqipërisë, Ditmir Bushati, me të cilin diskutoi për bashkëpunimin midis dy vendeve, i shtrirë tashmë në të gjitha fushat, për proceset politike në shtetet respektive dhe me theks të veçantë, për dialogun midis Kosovës dhe Serbisë.

Kreu i Kuvendit të Kosovës konfirmoi edhe njëherë qëndrimin se sovraniteti dhe integriteti territorial i Kosovës janë të pacenueshme.

Veseli tha se në fund të procesit të dialogut, Kosova do të fitojë ulësen e saj në OKB, brenda kufijve me të cilët ka shpallur pavarësinë dhe është njohur ndërkombëtarisht.

Kryediplomati shqiptar, Ditmir Bushati, nga ana e tij, konfirmoi mbështetjen e Shqipërisë për Kosovën në të gjitha proceset nëpër të cilat ajo po kalon.

Veseli e Bushati theksuan nevojën që spektri politik i Kosovës të dalë me një qëndrim të përbashkët para fillimit të dialogut final.

KRYEMINISTRI HARADINAJ: KOSOVA DHE SHQIPËRIA DUHET T’I NDRYSHOJNË PARAMETRAT EKONOMIK DHE T’I HEQIN BARRIERAT BUROKRATIKE

Kryeministri i Republikës së Kosovës, Ramush Haradinaj, ka pritur në takim ministrin për Evropën dhe Punët e Jashtme të Republikës së Shqipërisë, Ditmir Bushati, me të cilin ka biseduar për zhvillimet politike në Kosovë dhe Shqipëri.

Fillimisht, kryeministri Haradinaj e ka njoftuar ministrin Bushati për prioritetet e Qeverisë së Kosovës, Agjendën e Reformave Evropiane, zhvillimin ekonomik, fuqizimin e rendit dhe të ligjit, përmbushjen e obligimeve të MSA-së, dialogun ndërmjet Republikës së Kosovës dhe Serbisë dhe çështje tjera me rëndësi për vendin.

Kryeministri Haradinaj me këtë rast ka vlerësuar rolin e Shqipërisë në mbështetjen e Kosovës në procesin shtetformues dhe proceset tjera me rëndësi për vendin, duke thënë se bashkëpunimi ndërmjet Kosovës dhe Shqipërisë duhet të thellohet edhe më tutje, në fushën e zhvillimit ekonomik, të këmbimeve tregtare, arsim, kulturë, shëndetësi dhe fusha tjera të interesit të përbashkët.

Gjatë takimit kryeministri Haradinaj ka kërkuar mbështetjen e Shqipërisë për rrugën e integrimit euroatlantik, anëtarësimin e Kosovës në INTERPOL, dhe në organizata tjera të rëndësishme rajonale dhe ndërkombëtare.

“Mbështetja që ka dhënë Shqipëria për Kosovën në të gjitha etapat ka qenë e rëndësishme, andaj kërkojmë që bashkëpunimi ndërmjet dy vendeve të vazhdojë edhe në fushën e zhvillimit ekonomik. Ne duhet t’i ndryshojmë parametrat ekonomik mes vete dhe t’i heqim barrierat burokratike”, tha kryeministri Haradinaj duke falënderuar ministrin Bushati për rolin konstruktiv të Shqipërisë në bashkëpunimin rajonal.

Gjatë takimit është biseduar edhe për marrëveshjet e arritura ndërmjet dy vendeve dhe nivelin e zbatimit të tyre, poashtu edhe për përgatitjet që janë duke u bërë për mbledhjen e përbashkët të dy qeverive që do të mbahet në nëntor të këtij viti në Pejë.

Ndërkaq, ministri për Evropën dhe Punët e Jashtme të Republikës së Shqipërisë, Ditmir Bushati, ka vlerësuar progresin e Kosovës duke e përgëzuar kryeministrin Haradinaj për vendimin pro liberalizimit të vizave për qytetarët e Kosovës nga Parlamentit Evropian, në të njëjtën kohë ka shprehur gatishmërinë e shtetit shqiptar që edhe më tutje të vazhdojë mbështetjen e Kosovës në rrugën e saj euroatlantike.

PACOLLI: SHQIPËRIA TË ASISTOJ KOSOVËN NË TË GJITHA PROCESET INTEGRUESE

Zëvendëskryeministri dhe Ministri i Punëve të Jashtme i Republikës së Kosovës, Behgjet Pacolli ka pritur sot homologun e tij, ministrin e Punëve të Jashtme të Republikës së Shqipërisë, Ditmir Bushati.

Me këtë rast, ministri Pacolli ka falënderuar përzemërsisht ministrin Bushati për përkrahjen e vazhdueshme që shteti shqiptar i ka ofruar dhe po i ofron Republikës së Kosovës. Agjenda e takimit mes dy ministrave ka pasur për fokus identifikimin e çështjeve në të cilat mund të thellohet bashkëpunimi, dhe propozimi i hapave për adresimin e sfidave të përbashkëta në fushën e politikës së jashtme dhe diplomacisë.

Në kuadër të diskutimeve, ministri Pacolli theksoi që afirmimi i mëtutjeshëm i pozicionit ndërkombëtar të Republikës së Kosovës, përfshirë këtu dhe objektiva strategjike në lidhje me anëtarësimin në organizata ndërkombëtare, shtron nevojën për koordinim të veprimeve dhe për përkrahje intensive nga ana e shtetit dhe diplomacisë shqiptare.

Ministri Bushati ishte i një mendimi me ministrin Pacolli se çështjet sikurse anëtarësimi në organizata si UNESCO, INTERPOL, përkrahja e përmbylljes së procesit të liberalizimit të vizave, bashkëpunimi në kuadër të shkëmbimit të përvojave dhe njohurive në lidhje me organizatat rajonale, thellimi i bashkëpunimit në lidhje me shtrirjen e prezencës diplomatike, kërkojnë bashkëpunim dhe koordinim intensiv mes dy vendeve në të gjitha nivelet.

Po ashtu gjatë takimit u diskutua rëndësia që Republika e Shqipërisë ka në përkrahje të Republikës së Kosovës në procesin e dialogut për Marrëveshjen Gjithëpërfshirëse. Ministri Pacolli edhe në këtë takim bilateral, theksoi rëndësinë e thellimit të integrimit ekonomik mes dy vendeve, me theks rritjen e volumit tregtar për çfarë u theksua se është e rëndësishme të lehtësohen barrierat doganore, infrastrukturore dhe teknike.

Në adresimin para mediave, ministrat theksuan se janë pajtuar që çështjet e sipërpërmendura të adresohen në nivel të bashkëpunimit ne nivel të profesional e teknik ne kuadër të grupeve punuese, në mënyrë që në takimin mes dy qeverive në nëntor 2018, të mund të përmbyllen me sukses.

BUSHATI-PACOLLI FLASIN EDHE PËR MBLEDHJEN E PESTË TË QEVERIVE TË SHQIPËRISË E KOSOVËS

Ministri për Evropën dhe Punët e Jashtme i Shqipërisë, Ditmir Bushati, dhe ministri i Jashtëm i Kosovës, Behgjet Pacolli, në takimin sot në Prishtinë kanë folur edhe për mbledhjen e përbashkët të dy qeverive në Pejë në muajin nëntor të këtij viti.

“Kemi pasë mundësinë për të folur edhe për sa i përket bashkëpunimin tonë dypalësh. Dy qeveritë tona do të mblidhen në Pejë dhe do të jetë një mundësi tjetër e artë për të rishikuar progresin që kemi bërë në këtë drejtim, por edhe mangësitë, apo ato boshllëqe që duhet t’i adresojmë”, theksoi ministri Bushati.

“Është krejt e vërtetë që është bërë një progres i pamohueshëm dhe kjo reflektohet edhe në shkëmbimet tregtare dhe vëllimin ekonomik mes Shqipërisë dhe Kosovës. 2017-ta ka një rritje 10 për qind, shpresojmë shumë që 2018-ta gjithashtu të ketë një konfirmim të këtij trendi dhe pse jo në rritje”, u shpreh kryediplomati shqiptar, Bushati.

Poashtu, kryediplomati kosovar Pacolli u shpreh i bindur se, “sigurisht do të ketë lajme të mira që dalin nga konkluzionet e takimit të radhës – mbledhja e dy qeverive, këtë hërë në Pejën e bukur”.

“Shqipëria gjithmonë është në mbështetje të Kosovës si në rrafshin rajonal, ashtu edhe ndërkombëtar”, vlerësoi ai.

Mbledhja e përbashkët e qeverive të Shqipërisë e Kosovës në Pejë në nëntor 2018 do jetë e pesta, pas të parës historike në Prizren në 11 janar 2014, të dytës në Tiranë në 23 mars 2015 , të tretës në 3 qershor 2016 në Prishtinë dhe të katërtës të zhvilluar në 27 nëntor 2017 në Korçë.

HAPJA SOLEMNE E SHKOLLES SE DIASPORES NE PRISHTINE

October 12, 2017 by dgreca

Mbi 50 ndryshimtarë nga shtetet e ndryshme në Shkollën e Diasporës në Kosovë/

Më 11 tetor 2017, organizata GERMIN ka bërë hapjen solemne të Shkollës së Diasporës në Kosovë, e cila po mbahet për herë të parë në vendin tonë.

Shkolla e Diasporës në Kosovë, e cila do të zgjasë deri më 15 tetor 2017, ka mbledhur rreth 50 pjesëmarrës nga 17 vende të ndryshme të botës, duke i përfshirë specialistët lokal dhe nga diasporaQëllimi kryesor i këtij programi inovativ është që të zhvillohen idetë duke u bazuar në nevojat lokale të komunitetit në Prizren dhe Malishevë, dhe të ofrohen zgjidhjet efektive.Liza Gashi, drejtoreshë e programeve në Germin gjatë hapjes së kësaj shkolle ka mirëpritur pjesëmarrësit dhe gatishmërinë e tyre për t’u udhëtuar nga vendet e ndryshme me qëllim që të bëhen pjesë e misionit për ndryshime pozitive. Ajo po ashtu, ka falënderuar partnerët lokal Qendrat e Kompetencës në Prizren dhe Malishevë, donatorët, institucionet mbështetëse, mediat dhe organizatat e shoqërisë civile.

Kumrije Aliu nga GIZ gjatë fjalës hyrëse përgëzoi hapjen e shkollës duke theksuar bashkëpunimin ndër-profesional dhe edukativo-kulturor, si dhe rëndësinë e vazhdimit me iniciativa konkrete, për të pasur rezultate afatgjate. Kurse Fikrije Zymberi nga Agjencia për Arsim dhe Aftësim Profesional dhe Arsim për të rritur u shpreh se për të rinjtë është shumë e rëndësishme shkëmbimi i eksperiencave, nga fushat e ndryshme profesionale.

Pas hapjes zyrtare, përmes aktiviteteve të ndryshme, specialistët lokal dhe nga diaspora u siguruan të krijojnë një ambient familjar dhe funksional për realizimin e qëllimit të shkollës, që do të rezultojë me krijimin e iniciativave konkrete, të cilat në fund do të shpërblehen me grante të vogla.

Dea Plana, e cila ka udhëtuar nga Gjermania është shprehur se kjo shkollë po i tejkalon paragjykimet mes Diasporës, Kosovës dhe Rajonit.

“Nuk kam prit që do të ndodh kështu, sepse kjo shkollë i ka kaluar pritjet e mija. Bashkëpunimi mes Diasporës, Kosovës dhe Rajonit po i tejkalon paragjykimet. Orientimi nga ana e specialistëve është shumë i mirë dhe përmes aktiviteteve, kjo shkollë si program i panjohur është bërë i prekshëm dhe i ndejshëm për neve, ku po e gjejmë vetën”, shtoi Dea.

Ndërsa për Mentor Didën, i cili është i angazhuar si specialist nga Washington D.C. tha: “Ku ka shumë rini, ka edhe shumë shpresë. Neve na ka mbet me mbledh rinin dhe bashkë me kriju shpresën”, gjë që e shtynë organizatën Germin të kontribuojë më shumë në aktivizimin dhe mobilizimin e të rinjve për të qenë ndryshimtarë në komunitet.

DY PRESIDENTËT SHQIPTARË TAKOHEN NË PRISHTINË

October 11, 2017 by dgreca

-Presidenti i Shqipërisë Ilir Meta në vizitë shtetërore në Kosovë u prit nga Presidenti Hashim Thaçi, Kryeparlamentari Veseli, Kryeministri Haradinaj/

Ne Foto:Pritja nga Kryeparlamentari Kadri Veseli/

-Deklaratë e përbashkët e dy presidentwve. Angazhime për hartimin e një dokumenti strategjik për anëtarësimin e plotë të Kosovës në BE dhe NATO/

Gazeta DIELLI nga korrespondenti në Kosovë Behlul JASHARI/

PRISHTINË, 11 Tetor 2017/ Dy presidentët shqiptarë, Presidenti i Republikës së Shqipërisë, Ilir Meta, dhe i Republikës së Kosovës, Hashim Thaçi, u takuan sot në Prishtinë.Me ceremoninë e organizuar në Sheshin Ibrahim Rugova, në mesditë, Presidenti i Republikës së Kosovës, Hashim Thaçi, me ftesë të tij, priti në vizitë shtetërore Presidentin e Republikës së Shqipërisë, Ilir Meta.

Më pas dy presidentët zhvilluan një takim bilateral, gjatë të cilit Presidenti Ilir Meta, në një ceremoni solemne, u nderua me Dekoratën e lartë Urdhri i Pavarësisë me motivacionin për kontribut të lartë për pavarësinë e Kosovës.Në përmbyllje të takimit, në ambientet e Presidencës së Kosovës, presidentët Thaçi e Meta mbajtn një konferencë për shtyp, ndërkohë që mediave të akredituara, mes të cilave Gazetës DIELLI me korrespondentin në Prishtinë iu shpërnda një deklaratë e përbashkët.Presidenti shqiptar Ilir Meta sot zhvillon edhe takime të tjera me drejtues institucionalë e politikë të Kosovës, me kryeministrin Ramush Haradinaj, kryeparlamentarin Kadri Veseli e të tjerë.

DEKLARATË E PËRBASHKËT E PRESIDENTËVE TË REPUBLIKËS SË SHQIPËRISË DHE REPUBLIKËS SË KOSOVËS MBI MARRËDHËNIET VËLLAZËRORE E TË PARTNERITETIT STRATEGJIKPresidenti i Republikës së Shqipërisë dhe Presidenti i Republikës së Kosovës,

Të udhëhequr nga parimet dhe vlerat evropiane,

Duke i qëndruar qëllimit të përbashkët për konsolidimin e lirisë, paqes, stabilitetit dhe begatisë në të dy shtetet dhe në rajonin ku bëjnë pjesë,

Të bindur në përfaqësimin më të mirë të interesit strategjik të qytetarëve të të dy shteteve për integrim në familjet evropiane dhe euro-atlantike,

Me besimin se “politika e zgjerimit” dhe e “dyerve të hapura” për rajonin mbeten katalizatorë të sigurisë, demokracisë, dhe zhvillimit,

Ranë dakord që të:

Mbështesin ripërtëritjen e përpjekjeve të qeverive të të dy shteteve respektive në zhvillimin e demokracisë, shtetit të së drejtës, ekonomisë së tregut dhe kohezionit shoqëror me synim të përbashkët për arritjen sa më shpejt të standardeve evropiane;

Rikonfirmojnë vullnetin e ndërsjellë për rritjen dhe thellimin e bashkëpunimit vëllazëror e strategjik dhe me partnerët ndërkombëtarë;

Shprehin mirënjohje për vendet mike dhe partnerët strategjikë për mbështetjen e pakursyer e të jashtëzakonshme që kanë dhënë ndër vite, përkrahje kjo e cila mbetet e domosdoshme edhe për të ardhmen;Përshëndesin riangazhimin e Bashkimit Evropian në Ballkanin Perëndimor përmes Procesit të Berlinit, misionin e të cilit e shohim në dritën e Delors për “Konkurrencën që nxit, bashkëpunimin që forcon dhe solidaritetin që bashkon”;Rikonfirmojnë vullnetin e sinqertë për bashkëpunim të hapur dhe efikas me të gjitha vendet e rajonit, në dobi të qytetarëve dhe të proceseve integruese;

Shprehim solidaritetin ndaj sfidave me të cilat përballin vendet mike dhe partnerët tanë strategjikë dhe zotohen për të dhënë kontributin e dy shteteve respektive në ballafaqimin me këto sfida;

Refuzojmë me vendosmëri çdo alternative tjetër që bie ndesh me projektet strategjike të integrimeve evropiane dhe euroatlantike dhe nxisin veprim të koordinuar, duke u përqendruar në:

Përshpejtimin simetrik të proceseve të integrimit të të gjitha vendeve të rajonit, që dëshirojnë të anëtarësohen në BE dhe NATO; ngaqë integrimi në BE dhe NATO mbeten procese thellësisht politike, me ndikim të jashtëzakonshëm në përfundimin e proceseve të paqes në rajon;

Hartimin e një dokumenti strategjik për anëtarësimin e plotë të Kosovës në BE dhe NATO;

Liberalizimin sa më të shpejtë të vizave ndërmjet Bashkimit Evropian dhe Kosovës, angazhimin e Kosovës që të bëjë çdo përpjekje të zgjidhë në mirëbesim dhe mirëkuptim të ndërsjellë çështjet që lidhen me marrëveshjen për shënimin e vijës kufitare me fqinjin e saj, Malin e Zi;

Vazhdimin e fazës përfundimtare dialogut për normalizimin e marrëdhënieve ndërmjet shtetit të Kosovës dhe atij të Serbisë, duke ftuar një angazhim të ripërtërirë të BE-së dhe pjesëmarrje të drejtpërdrejtë të ShBA-ve, me qëllim të njohjes përfundimtare të Kosovës si shtet sovran dhe i pavarur nga ana e Serbisë, si një proces që do të ketë efekte pozitive për gjithë rajonin.Kosova dhe Shqipëria, të bashkuara për reforma në rrugëtimin euro-atlantikYAKIMI ME KRYEPARLAMENTARIN VESELIKryetari i Kuvendit të Republikës së Kosovës, Kadri Veseli, ka pritur sot në takim presidentin e Republikës së Shqipërisë, Ilir Meta, në vizitën e tij të parë zyrtare në Kosovë, në cilësinë e presidentit shqiptar.Kryetari Veseli dhe presidenti Meta diskutuan për zhvillimet aktuale që kanë para vetes, Kosova dhe Shqipëria.Duke e falënderuar presidentin Meta për kontributin e tij në forcimin e marrëdhënieve dhe bashkëpunimit midis dy vendeve, në të gjitha përgjegjësitë e tij institucionale në Shqipëri, veçanërisht gjatë udhëheqjes së Kuvendit të Shqipërisë, kryeparlamentari Veseli theksoi gatishmërinë e tij për të intensifikuar më tej këtë bashkëpunim, në interes të përbashkët.Presidenti Meta uroi kryeparlamentarin Veseli për rizgjedhjen e tij në krye të Kuvendit të Kosovës, duke vlerësuar lart lidershipin e tij gjatë mandatit të kaluar.Kreu i shtetit shqiptar shfaqi besimin se bashkëpunimi midis institucioneve të Kosovës dhe Shqipërisë do të vazhdojë në ritme edhe më të mëdha.Veseli dhe Meta konfirmuan përkushtimin institucional të Prishtinës dhe Tiranës zyrtare për të kryer reformat e nevojshme në rrugëtimin euro-atlantik, si aspiratë dhe alternativë e vetme për të dyja vendet dhe rajonin në përgjithësi.
TAKIMI ME KRYEMINISTRIN- Shqipëria, ndihmë të pakursyer e të gjithanshme për Kosovën

-Kryeministri i Kosovës Haradinaj priti në takim Presidentin shqiptar Meta/

PRISHTINË, 11 Tetor 2017-Gazeta DIELLI/ Kryeministri i Republikës së Kosovës, Ramush Haradinaj, priti sot pasdite në takim Presidentin e Republikës së Shqipërisë, Ilir Meta, i cili e përgëzoi atë për marrjen e detyrës së të parit të Qeverisë dhe për ndërtimin e institucioneve të reja të vendit.Kryeministri i Kosovës Haradinaj dhe Presidenti shqiptar Meta biseduan për marrëdhëniet e shkëlqyera dypalëshe dhe për rrugën e përbashkët europiane të dyja vendeve.Marrëdhëniet bilaterale ndërmjet Republikës së Kosovës dhe Republikës së Shqipërisë janë shembull në rajon dhe sidomos në fushën e zhvillimit dhe shkëmbimit ekonomik, thekson komunikata e dërguar nga takimi.

Kryeministri Haradinaj tha se Kosova dhe Shqipëria duhet të shkëmbejnë përvojat e tyre në proceset integruese dhe në këtë kontekst është e pazëvendësueshme ndihma e Shqipërisë për konsolidimin ndërkombëtar të Kosovës dhe anëtarësimin e saj në organizatat dhe mekanizmat ndërkombëtare.

Kryeministri Haradinaj tha se Kosova ka hyrë në një dinamikë të re për sa i përket zbatimit të MSA-së dhe në përshpejtimin e procesit të marrjes së statusit të vendit kandidat në BE.

Presidenti Meta nga ana e tij u zotua se shteti shqiptar do të vazhdojë me ndihmën e pakursyer dhe të gjithanshme për Kosovën, sidomos në agjendën euroatlantike.

Për Presidentin Meta, gjetja e një zgjidhjeje për demarkacionin e kufirit me Republikën e Malit të Zi si dhe dialogu me Serbinë janë çelës i suksesit të Kosovës në rrugën e saj integruese në BE./b.j/

KONFERENCË NDËRKOMBËTARE NË PRISHTINË

September 24, 2017 by dgreca

-Sot dhe nesër, konferenca ndërkombëtare “Kultura dhe Paqja në Ballkan – Roli i Parlamentarëve”/

-Ish-presidenti i Shqipërisë, Alfred Moisiu, ish-presidenti i Kosovës, Fatmir Sejdiu dhe ish-presidenti i Kroacisë, Stipe Mesiq, diskutuan lidhur me trashëgiminë e përbashkët kulturore, si një bazë e përbashkët për paqen dhe stabilitetin në Ballkan.

-Nga konferenca lançohet Iniciativa e Parlamentarëve për Paqe në nivel të rajonit të Ballkanit/

PRISHTINË, 23 Shtator 2017-Gazeta DIELLI/ Në kryeqytetin e Kosovës, Prishtinë, sot dhe nesër zhvillohet konferenca ndërkombëtare me temën “Kultura dhe Paqja në Ballkan – Roli i Parlamentarëve”.

Ish-presidentë, kryetarë dhe ish-kryetarë parlamentesh të vendeve të ndryshme të rajonit, deputetë, përfaqësues të shoqërisë civile nga Evropa dhe Bota, janë mbledhur sot në Kuvendin e Republikës së Kosovës.

Konferenca, në temën “Kultura dhe Paqja në Ballkan – Roli i Parlamentarëve”,

u organizua nga Federata për Paqe Universale (FPU), e cila ka një status të veçantë konsultativ në Komitetin Ekonomik dhe Social të OKB, në partneritet me Shoqatën Ndërkombëtare të Parlamentarëve për Paqe (SHNPP), e cila ka për qëllim krijimin e një forumi për parlamentarët përtej kombësive, identiteteve fetare ose përkatësive partiake.

Fjalën përshëndetëse të kësaj konference e mbajti kryetari i Federatës për Paqe Universale (FPU) Thomas Walsh.

Në panelin e parë, tre ish-presidentë të vendeve të rajonit: ish-presidenti i Shqipërisë, Alfred Moisiu, ish-presidenti i Kosovës, Fatmir Sejdiu dhe ish-presidenti i Kroacisë, Stipe Mesiq, diskutuan lidhur me trashëgiminë e përbashkët kulturore, si një bazë e përbashkët për paqen dhe stabilitetin në Ballkan.

Gjatë fjalimeve të tyre, ish-presidentët vlerësuan të arriturat, por njëherësh adresuan edhe problematikat të cilat vazhdojnë t’i përcjellin marrëdhëniet midis popujve dhe shteteve të rajonit. Ata theksuan domosdoshmërinë e një angazhimi më të madh të udhëheqjeve të të gjitha vendeve në Ballkan, për të përmirësuar më tej këto raporte dhe për të forcuar urat e bashkëpunimit midis njerëzve, në funksion të paqes, stabilitetit dhe mirëqenies më të madhe në rajon.

Në panelin e dytë, ndërkaq, në temën Diplomacia Interparlamentare dhe Bashkëpunimi Rajonal: Parlamentarët për Iniciativën e Paqes, folën: ish-kryetari i Kuvendit të Republikës së Kosovës, Jakup Krasniqi, kryetari i Parlamentit të Maqedonisë, Talat Xhaferi, deputeti i Kuvendit të Kosovës, Sllobodan Petroviq, ai i Parlamentit të Shqipërisë, Dashamir Shehi etj.

Ish-kryeparlamentari Krasniqi foli për rolin konstruktiv dhe përcaktues që shqiptarët kanë luajtur në vendosjen e lidhjeve dhe raporteve të reja midis popujve në Ballkan, në frymën e bashkëpunimit e të fqinjësisë së mirë. Ai tha se shteti i pavarur dhe sovran i Kosovës ka prodhuar stabilitet politik dhe siguri në rajonin tonë. Krasniqi shtoi se shtetet dhe popujt e Ballkanit tani kanë shansin të hapin një faqe të re të historisë së tyre, gjurmëve të themeltarëve të Bashkimit Evropian.

Konferenca ndërkombëtare “Kultura dhe Paqja në Ballkan – Roli i Parlamentarëve” vazhdon punimet nesër.

Nga kjo konferencë do të lançohet Iniciativa e Parlamentarëve për Paqe në nivel të rajonit të Ballkanit. /b.j/