Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

SHQIPERI- Rinisin reshjet, rëndohet situata në zonat e përmbytura në Jug. Borë në Veri

by

*Basha: Të shpallet gjendja e emergjencës/
*Rama: PD vijon avazin, qeveria jo më cirk përmbytjesh/
* PD-ja shpërndan ndihma për familjet e përmbytura në Vlorë/

Situata është rënduar sërish në zonat e përmbytura, pas rifillimit të reshjeve të dendura. Situata është përkeqësuar sidomos në Darzezë, ku banorët që ishin rikthyer në shtëpitë e tyre të përmbytura gjatë ditës së djeshme tashmë janë tërhequr sërish. Rreth 300 shtëpi raportohen të jenë të përmbytura, ndërkohë që banorët u përpoqëm sa të mundnin të shpëtonin diçka, të ndihmuar edhe nga mjete të forcave emergjente për transportin e tyre.
Banorët, duke parë që gjendja në Darzezë pritet të rëndohet e të jetë edhe më e vështirë, i kanë bërë thirrje Qeverisë për t’u solidarizuar me të prekurit dhe për të ofruar ndihma dhe jo vetëm nga qeveria, por edhe nga biznesmenë me mundësi financiare për të ndihmuar familjet në nevojë. Edhe pse të ndihmuar nga banorët fqinjë, që kanë bërë ç’të mundin për njëri-tjetrin, ndihmat e tyre mund të konsiderohen të pamjaftueshme, përpara kësaj fatkeqësie natyrore.
sipas meteorologëve nata e sotme dhe gjithë dita e nesërme do të ketë stuhi të fuqishme shiu me intensitet të lartë, ndërsa në veri do të ketë reshje dëbore.
Shërbimi Meteorologjik ben te ditur se situata do të jetë akoma dhe më e vështirë dhe për këtë arsye duhet gatishmëri e plotë e të gjitha forcave të emergjencës që janë aktualisht në terren. Ka gjasa që lumenjtë të dalin sërish nga shtrati, pasi tashmë e kanë krijuar terrenin nga vërshimet intensive të dy ditëve më parë.
Po ashtu Shërbimi Meteorologjik i ka bërë thirrje banorëve të cilët janë evakuuar nga shtëpitë e tyre të përmbytura që pavarësisht rënies së nivelit të ujit në banesat e tyre të mos rikthehen pasi gjendja kritike nuk ka kaluar ende dhe gjasat janë për përkeqësim të situatës.
Ministria e Brendshme ka dhënë sot detajet e fundit lidhur me situatën në vend. Veç përmbytjeve në Jug, në Veri ka pasur sot probleme në qarkullim për shkak të reshjeve .
Në zonat malore mbi 800 m në rrethin e Malësisë së Madhe dhe në rrethin e Kukësit ka patur reshje dëbore të cilat shkuan deri në 40-50 cm.
Njoftimi i Ministrisë së Brendshme
Qarku Shkodër. Gjatë orëve të kaluara në qarkun e Shkodrës ka patur reshje të dobëta shiu dhe në lartësinë mbi 800 m reshjet kanë qënë në formë dëbore. Më të theksuara reshjet e dëborës kanë qënë në komunën e Shalës deri në 40 cm dhe veçanërisht në Vermosh ku lartësia arriti deri në 60 cm.
Për largimin e dëborës nga trupi i rrugës në komunën Shalë është dërguar një mjet tip fadrome e DPEC për tu përdorur nga drejtuesit e komunës.
Qarku Kukës. Gjatë orëve të kaluara në të gjithë qarkun e Kukësit ka patur reshje normale shiu dhe dëbore. Në lartësitë mbi 600 m sasia e dëborës së rënë ka qënë 30-40 cm, kurse në lartësinë mbi 800 m dëbora e rënë është 50-60 cm. Reshjet janë ndërprerë në orët e mbrëmjes dhe kanë rifilluar sot në orët e para të mëngjesit sidomos në rrethin e Tropojës, ku lartësia e dëborës është 40-50 cm dhe në zonën e Valbonës 1.5 m.
Nga informacionet e dhëna nga specialisti i emergjencave Civile në administratën e Prefektit të qarkut komuna të bllokuara ka vetëm një ajo e Arrënit, në rrethin e Kukësit, kurse komuna e Lekbibajt, në rrethin e Tropojës është bllokuar për rreth 6 orë dhe është rihapur me një mjet të angazhuar nga komuna.
Të gjitha akset nacionale qarkullohen pa zinxhirë. Autostrada e Kombit është e qarkullueshme pa zinxhirë edhe pse vazhdojnë të bien reshje e dëborës. Mjetet borëpastruese po punojnë në autostradë, për të larguar dëborën që bie vazhdimisht dhe pa ndërprerje.
Aksi nacional Kukës–Q.Shllak është i përfshirë nga reshjet e borës.Trashësia e dëborës është 50 cm. Aksi B.Curri Valbonë si pasojë e reshjeve të shumta të dëborës aktualisht është me një kalim dhe subjekti kontraktues po punon për krijimin e xhepave të shkëmbimit të mjeteve.
Të gjitha mjetet borëpastruese janë vendosur në segmentet e përcaktuara si problematike dhe kanë bërë ndërhyrjet e duhura për të mbajtur rrugët e hapura. Në të gjitha akset nacionale subjektet e kontraktuara për mirembajtjen po përdorin kripë, si dhe largojnë inertet nga rruga, të cilat bien nga skarpatet anësorë.
Qarku Dibër. Gjatë orëve në vazhdim në të gjithë qarkun kanë rënë reshje mesatare shiu, kurse në lartësinë mbi 800 m reshjet kanë qënë në formë dëbore. Në të gjithë qarkun nuk ka probleme për bllokimin e rrugëve sepse sasia e reshjeve në zonat malore nuk i kalon 20 cm. E bllokuar është vetëm rruga Lurë-Peshkopi, deri në Fushë Çivën, por qarkullimi i mjeteve bëhet nga rruga për në Rëshen.
Qarku Fier. Gjatë orëve të natës dhe në vazhdim ka patur reshje shiu mesatare pa shkaktuar probleme.Në fshatin Darzezë janë evakuuar të gjithë banorët të cilët ishin ende të strehuar në banesat e tyre.
Hidrovoret punojnë me kapacitet të plotë dhe niveli i lumenjëve Vjosa, Semani dhe Gjanica janë në shtratin normal të tyre.
Po bëhen evidentimet të familjeve të prekura nga përmbytja.
Niveli i ujit nëpër kanale kulluese po vazhdon të normalizohet dhe Hidrovori punon me kapacitet të plotë për largimin e ujrave sipërfaqësore në det. Po zvogëlohet ndjeshëm sipërfaqja bujqësore e tokave të përmbytura me largimin e ujrave nga kanalet.
Qarku i Gjirokastrës. Reshjet e shiut në territorin e qarkut të Gjirokastrës gjatë orëve në vazhdim kanë qënë mesatare, në lartësitë mbi 800 m reshjet kanë qënë në formë dëbore.
Rrugët nacionale janë të gjitha të hapura.
Qarku Vlorë. Në këtë qark ka reshje mesatare shiu.Vazhdon puna në Argjinaturën e Lagunës së Nartës dhe po punojnë 35 kamjonë për mbushjen e saj në vendin ku rrezikohet çarrja. Mjetet janë marrë me qera nga Komisioni i Emergjencave Civile të qarkut dhe Bordi i Kullimit.
Në zonat e përmbytura janë shpërndarë ndihma ushqimore nga bizneset private, sot do të shpërndajë edhe Kryqi i Kuq Shqiptar.
Qarku Elbasan. Gjatë orëve të natës nuk ka patur reshje por në orët e mengjezit reshjet me intesitet mesatar dhe me ndërprerje.
Aksi rrugore Elbasan – Gjinar vazhdon i bllokuar.Segmenti Banjë – Gramsh vazhdon i përmbytur nga lumi Devoll, qarkullimi kryhen në rrugën e sipërme.Aksi Librazhd- Stërblevë i hapur deri në Fushë Studen por qarkullohet me zinxhirë,
Bordi i kullimit raporton se niveli i ujit në lumin Shkumbin ka rënie të theksuar në rreth 2 m kjo ka bërë të mundur të futen në punë pompat në kolektorët e largimit të ujrave.
Qarku Berat. Ka patur reshje mesatare shiu. Në lartësitë mbi 800 m në zonën e Skreparit ka patur reshje dëbore.Kjo situatë ka krijuar probleme në akset rrugore të tre komunave të rrethit të Skraparit: Gjerbës, Leshnjë dhe Zhepë. Për hapjen e rrugëve lidhëse të këtyrekomunave është angazhuarnjë fadromë nga nënprefekti i rrethit të Skraparit.
Prurjet e ujit në lumin Osum dhe Devoll janë në nivel normal.
Qarku Korçë. Gjatë orëve të natës dhe nëvazhdim po bien reshje dëbore dhe lartësia ka shkuar 30-40 cm kurse në zonat malore deri në 60-70 cm.Aksi Korçë – Ersekë është i kalueshëm me zinxhirrë; Ersekë – Leskovik – Çarshovë i kalueshëm me zinxhirë; Korçë – Dardhë i kalueshëm me zinxhirë; Aksi Korçë – Voskopojë me zinxhirrë.Qafë Thanë- Pogradec- Korçë – Kapshticë i qarkullueshëm pa zinxhirë.
Akset e tjera janë të kalueshme pa zinxhirrë.

Reshjet vazhdojnë, banorët e jugut në ankth nga “tërbimi” i Vjosës
Rikthehen reshjet e shiut në Novoselë, në një kohë kur uji sapo kishte filluar të tërhiqej në shtratin e lumit Vjosë, pasi përmbyti me mijëra hektarë tokë, që prej së shtunës. Dëmet e shkaktuara, sipas banorëve, janë te mëdha. Me dhjetëra shtëpi janë shkatërruar, mijëra hektarë tokë janë përmbytur, ndërsa të mbjellat e këtij sezoni kanë shkuar dëm. Banorë të fshati Fitore, në komunën Novoselë, akuzojnë shtabin e emergjencave për neglizhencë, ndërsa tregojnë se si të mos mjaftonin përmbytjet ata po përballen edhe me mungesën e energjisë elektrike. Sipas banorëve katastrofa mund te ishte shmangur, nëse do të merreshin në konsideratë sugjerimet e tyre për kanalet ujitëse. Uji ka marrë pothuajse gjithçka i ka dalë para. Balta ka mbuluar sipërfaqe të shumta me të mbjella. Mes lotësh kryefamiljarja Dhurata Miho tregon se po përsëritet historia e vitit 2005, pasi edhe në përmbytjet e atij viti, ndonëse jo në këto përmasa, banorët nuk patën asnjë ndihmë nga shteti. Në disa nga zona të përmbytura uji ka arritur deri në një metër lartësi. Banorët kërkojnë që t’u sigurohet edhe ushqim për bagëtitë, teksa prej një jave e shohin veten të izoluar.
Lumi rrëmben pompat e ujit në Novoselë
Reshjet e shiut kanë nisur sërish dhe problemet janë rikthyer në zonat jugore të vendit. Nga prurjet e shumta të lumit Vjosë në Selenicë të Vlorës, uji ka rrëmbyer pompat e ujit të pijshëm dhe nënstacionin elektrik dhe si pasojë banorët janë pa ujë të pijshëm dhe pa drita. Sakaq, është bllokuar Ura e Mifolit, pasi uji ka dalë në rrugë. Aksi i vjetër Levan-Vlore është i mbyllur te Ura e Mifolit, si pasoje e daljes se ujit ne rruge si dhe i bllokuar për momentin është edhe një pjese e aksit Vlore – Selenicë, te Bishti i Malit, si pasojë e daljes së Vjosës nga shtrati. Raportohet se është dëmtuar Ura e Mifolit në Autostradën Fier – Vlorë. Autoritet janë vënë sërish në alarm, pasi me vazhdimin e reshjeve të shiut, pritet të ketë përmbytje të mëdha.

Akset më problematike për qarkullimin e mjeteve
utoriteti Rrugor Shqiptar njoftoi se në veri dhe verilindje të vendit për shkak të reshjeve të dëborës dhe temperaturave të ulëta disa akse rrugore paraqesin vështirësi për qarkullimin e mjeteve.

ARRSH informon se edhe në asket rrugore në jug të vendit ka probleme në qarkullimin e mjeteve për shkak të reshjeve të dendura të shiut dhe përmbytjeve të disa akseve. Ne zonat veriore dhe juglindje të vendit rekomandohet përdorimi i zinxhirëve për shkak të ngricave të formuara.

Tiranë
Ka patur reshje bore në aksin Qafe Priskë-Shëngjergj. Qarkullimi kryhet normalisht në gjithë akset e tjerë të këtij Qarku. Rekomandohet përdorimi i zinxhirëve në segmentin Qafë Priskë-Bizë.
Të bëhet kujdes në lëvizje dhe të respektohet sinjalistika.

Durrës
Nuk ka probleme në akset e ketij qarku. Të bëhet kujdes në qarkullim, dhe të respektohet sinjalistika rrugore, pasi parashikohen reshje shiu të dendura gjatë ditës së sotme.

Elbasan
Ka reshje shiu . Në aksin Librazhd-F.Studë ka rreth 40 cm dëborë, po punohet për pastrimin dhe kriposjen e aksit. Segmenti F.Studë– Steblevë është i bllokuar. Po punohet për hapjen e tij. Në segmentin Librazhd –Q.Thanë ka rreth 25 cm borë në të dyja anët e rrugës, por asfalti është i pastër. Aksi është i kalueshëm pa zinxhirë. Aksi Elbasan – Gjinar momentalisht është i bllokuar për shkak të çedimit prej më shumë se 2.5-3 m të trupit të rrugës në fshatin Shelcan. Segmenti Shelcan – Gjinar ka rreth 25-30 cm dëbore. Po merren masa për pastrimin. Aksi Cërrik-Banjë-Gramsh është i bllokuar për shkak të daljes së lumit Devoll. Qarkullimi bëhet nëpërmjet aksit Gramsh – Kaçivel – Elbasan. Në aksin Elbasan-Cingare-Gramsh ka patur dalje dherash e gurësh në rrugë. Janë marrë masa për pastrimin e aksit dhe tani qarkullimi kryhet normalisht. Rënie gurësh e dherash ka patur edhe në Derven , në aksin Elbasan-Rrogozhinë. Eshtë pastruar aksi dhe qarkullimi kryhet normalisht. Rekomandohet përdorimi i zinxhirëve në aksin Librazhd – F.Stude. Të bëhet kujdes në zonat ku ka rëshqitje të rrugës. Të evitohet kalimi nga këto akse. Eshtë ndërprerë qarkullimi në këtë pikë të aksit Elbasan -Gjinar.

Berat
Në aksin Ura e Pilzës –Corovodë ka rënie gurësh në zonën e shkëmbit të “Selanit”. Nuk ka probleme për qarkullimin e mjeteve në akset e tjera të qarkut. Të bëhet kujdes me qarkullimin në akset ku ka rrëshqitje, si pasojë e reshjeve të dendura të këtyre ditëve.

Vlorë
Në qarkun e Vlorës ka reshje të dendura shiu. Aksi i vjetër Levan-Vlorë është i mbyllur te Ura e Mifolit, si pasojë e daljes së ujit në rrugë. I bllokuar për momentin është edhe një pjesë e aksit Vlorë – Selenicë, te Bishti i Malit, si pasojë e daljes së Vjosës. Eshtë dëmtuar Ura e Mifolit në autostradën e re Fier – Vlorë. Të evitohet qarkullimi në akset e përmbytura nga uji i Vjosës. Aksi i Llogorasë është pastruar, por duhet patur kujdes për shkak të ngricave dhe lagështirës në rrugë.

Gjirokastër
Në Gjirokastër ka reshje të dendura shiu. Në aksin Gjirokastër-Tepelenë ka rënie gurësh në rrugë në vendin e quajtur Shkalla e Zezë. Në zonën e Rrapit të Kuqarit në Përmet ka rënie gurësh dhe rruga është me një kalim. Po punohet për pastrimin e akseve në të dy këto segmente. Të bëhet kujdes në zonat ku ka rrëshqitje dhe prani të ujit në rrugë.

Korçë
Temperaturat përgjatë orëve të natës kanë qënë rreth 0 gradë dhe ka patur reshje të lehta dëbore, sidomos në akset e rrethit të Ersekës dhe zonat malore. Gjatë orëve të mëngjesit kanë filluar reshje të dendura dëbore. Është kryer përgjatë orëve të natës kriposja e segmenteve apo pjesëve të veçanta të akseve rrugore, për të evituar problematikën. Kriposja dhe pastrimi po vazhdon edhe përgjatë këtyre orëve të paradites. Situata po mbahet nën monitorim për orët në vazhdim. Të bëhet kujdes në qarkullim. Të gjitha mjetet duhet të jenë të pajisura me zinxhirë. Akset K/Zemblak – K/Liqenas dhe K/Liqenas – D/Goricë janë t kalueshme pjesërisht zinxhira. Akset Korçë-Ersekë, Ersekë – Çarshovë, Korçë-Voskopojë, Korçë-Dardhë, dhe K/Libonik-Grabove, qarkullohen të gjitha me zinxhirë.

Kukës
Ka rreshje shiu dhe bore. Përsëri ka patur shembje në aksin Traget – Lekbibaj, që kanë shkaktuar vështirësi në qarkullim. Në aksin B.Curri – Valbonë ka reshje borë që kanë arritur trashësinë 130 cm. Vazhdon të punohet për ta mbajtur rrugën të hapur. Qarkullimi bëhet me një korsi dhe ndërrimi i mjeteve bëhet në xhepa. Të gjitha akset e Tropojës janë hapur dhe janë kriposur. Po mbahen në monitorim të vazhdueshëm. Qarkullimi kryhet pa zinxhirë . Të tregohet kujdes në qarkullim si pasojë e borës dhe lagështisë në rrugë. Rekomandohet përdorimi i zinxhirëve në aksin B.Curri – Valbonë.

Dibër
Ka reshje shiu në të gjithë qarkun . Rrugët janë pastruar. Në aksin Skuraj – Burrel ka patur rënie dherash në rrugë, të cilat janë pastruar gjatë natës. Nuk ka probleme për qarkullimin e mjeteve në pothuaj shumicën e akseve. Të bëhet kujdes , sepse nga rreshjet mund të shkaktohen rrëshqitje dherash.

Shkodër
Koha është me shi. Rrugët janë të gjitha të hapura. Në aksin Shkodër-Qafë Qele, në Ganjolle, për shkak të rrëshqitjes së dherave qarkullimi vazhdon të kryhet me një korsi të zgjeruar. Po punohet për ta bërë rrugëen me dy kalime. Gjatë natës ka patur një rrëshqitje masive në km 2 të aksit Q.Laç – Koman. Eshtë bërë e mundur hapja e njerës korsi. Po punohet që të hapet edhe korsia tjetër. Rekomandohet të bëhet kujdes në qarkullim, si pasojë e kohës me shira, të cilat mund të shkaktojnë rrëshqitje dherash dhe ngrica në rrugë. Të gjitha akset e Pukës qarkullohen pa zinxhirë.

Fier
Gjendja në akset e Fierit është normale. Vazhdon puna për pastrimin e autostradës nga mbetjet për shkak të vërshimit të ujërave. Të bëhet kujdes në lëvizje, për shkak të rrëshjeve dhe të respektohet sinjalistika rrugore.

Lezhë
Ka reshje shiu në të gjithë qarkun. Të gjitha akset janë pastruar . Nuk ka probleme për qarkullimin në të gjitha akset e këtij qarku. Të gjitha akset qarkullohen pa zinxhirë.
Basha: Të shpallet gjendja e emergjencës
Kryetari i PD-së Lulzim Basha ka udhëtuar sot drejt jugut ku ka nisur të vizitojë banorët në zonat e përmbytyra.
Kreu i demokratëve ka qëndruar fillimisht në Darëzezë, e cili është edhe zona më e prekur nga përmbytjet.
Lulzim Basha ka urdhëruar strukturat e PD-së që të ndihmojë sa munden banorët dhe sot ata kanë shpërndarë ndihma për banorët e përmbytur.
Gjithashtu Basha tha se situata është kritike dhe se banorëve nuk u ka ardhur asnjë për t’i ndihmuar, teksa ka kërkuar të shpallet gjendja e emergjencës.
“Nëse qeveria do t’u vinte në ndihmë banorëve kjo situatë s’ do të kishte ndodhur”, u shpreh Basha.
Ndërkohë PD ka akuzuar qeverinë edhe më parë se i ka lënë banorët në mëshirë të fatit dhe se nuk ka vepruar me efikasitetin e duhur në këtë situatë të rëndë.
Rama: PD vijon avazin, qeveria jo më cirk përmbytjesh
Kryeministri Edi Rama ka reagur në rrjetin social Twitter lidhur me deklaratat e Kreut të Partisë Demokratike, Lulzim Basha sot në jug të vendit, tek zonat e përmbytura.
Kreu i Ekzekutivit ka përshëndetur nismën, ku PD shpërndau për banorët në zonat e përmbytura 200 pako ndihma, si dhe ujë të pishëm.
Sipas Ramës, kjo është një nismë për t’u përshëndetur, edhe pse e bërë para kamerave, teksa shton se është e neveritshme që opozita të shfrytëzoi kësisoj rastesh për të propaganduar ndaj qeverisë. “Përshëndetje për çdo ndihmë simbolike që PD po jep para kamerave dhe neveri për vazhdimin e avazit vulgar të propagandës boshe antiqeveri!”, shkruan Rama.
Kryeministri Rama disa minuta pas këtij postimi të parë, shkruan një postim të dytë në Twitter. Rama shkruan se Qeveria nuk është më një estradë, por një strukturë e përgjegjëshme e cila mbart përgjegjësit dhe bënë detyrën e saj në ndihmë të qytetarëve më në nevojë. “Çdo strukturë përgjegjëse e shtetit është pranë njerëzve në nevojë për ndihmë dhe qeveria s’është më trupa e cirkut të vjetër me përmbytjet!”, shkruan Kryeministri Rama në statusin e dytë të tij.
Reagimet e Kryeministrit Rama erdhën pas deklaratës së Kreu të Partisë Demokratike, Lulzim Basha se qeveria nuk është duke bërë detyrën e saj.
Deklarata e Kryetarit të Partisë Demokratike u bë nga Darëzezë të Fierit një nga zonat më të përmbytura ku PD shpërndau 200 pako ndihma si dhe ujë të pijshëm për banorët më në nevojë

PD-ja shpërndan ndihma për familjet e përmbytura në Vlorë
Partia Demokratike me ndihmën e disa subjekeve private ka ndihmuar familjet me 200 pako me ushqime. Shpërndarja është bërë sipas listës së përcaktuar nga vetë banorët e dëmtuar nga përmbytjet. Edhe sot do të shpërndahen 150 pako të tjera me ushqimet bazë.
“Përmbytjet në Qarkun e Vlorës kanë marrë përmasa dramatike. Mijëra hektarë tokë janë përmbytur dhe janë në mëshirë të fatit, bashkë me to 600 krerë lopë e qindra bagëti të tjera. 1500 familje të fshatrave Fitore, Bishan, Poro, Mifol, Novosele, Akroni, Bëllenje, Delisuf janë pa strehim, pa ushqim, pa ujë dhe pa ilace. Asnjë përfaqësues i shtetit nuk ka prekur nga afër situatën. Shkollat janë mbyllur e fëmijëve e të moshuarve nuk po i ofrohen kushtet minimale për jetesë”, thuhet në njoftimin për mediat.
PD pohon se në zonën më të prekur të qarkut të Vlorës, nuk funksionon asnjë shtab emergjence.
Partia Demokratike e Vlorës i bën thirrje qytetarëve dhe atyre që kanë mundësi të ndihmojnë, që të angazhohen në këtë situatë për t’iu gjendur afër të dëmtuarve, në kushtet e neglizhencës dhe mosekzistencës së strukturave të qeverisë.

Tsipras nuk guxon ende të vizitojë Berlinin

by

Nga Nina Werkhäuser/
Kryeministri grek Alexis Tsipras po kërkon gjatë turneut të tij evropian faljen e borxheve. Por ai ende nuk po guxon të vijë në Berlin.
Çdo fjalë që thotë Aleksis Tsipras gjatë udhëtimit të tij të parë jashtë vendit regjistrohet me saktësi në Berlin. Që kryeministri i ri grek u shpreh gjatë fushatës zgjedhore për një largim nga politikat e qeverisë së mëparshme të udhëhequr nga Antonis Samaras, ishte një gjë. Sa radikal do të jetë tani ky largim në praktikë është një tjetër – dhe mjaft interesante jo vetëm për Komisionin Evropian, por edhe për qeverinë gjermane, sepse Gjermania është nga kreditorët më të mëdhenj të Greqisë.
“Një mysafir i mirëpritur”
Megjithatë vizitat e para pas marrjes së detyrës kryeministri Tsipras nuk i bëri në Berlin, por në Qipro, Romë, Bruksel dhe Paris.
Shefi 40-vjeçar i aleancës së majtë “SYRIZA” nuk e ka fshehur kurrë qëndrimin e tij që qeveria gjermane, të cilën shumë grekë e bëjnë përgjegjëse për gjendjen e tyre ekonomike, nuk është partnerja e tij të parë në Evropë. Berlini ka kërkuar gjithmonë nga Athina masa të rrepta kursimi në këmbim të kredive miliardëshe.
Qeveria gjermane tha se Tsipras është “një mysafir i mirëpritur” në Berlin. Kancelarja Angela Merkel nuk shqetësohet që Tsipras nuk ka ardhur ende në Berlin, sepse e di se ai nuk mund ta anashkalojë gjatë këtë vizitë. Merkel tha në Berlin “Ne jemi duke pritur për propozime nga pala greke, dhe pastaj do të hyjmë në bisedime.”
Me sa duket Tsipras po shqyrton fillimisht në vendet e tjera, se sa e madhe është gatishmëria për kompromis në radhët e BE-së për kërkesat e Greqisë, para se t’i drejtohet “kockës së fortë” Gjermanisë, e cila e hedh poshtë idenë e faljes së borxhit.
Merkel dhe Tsipras do të takohen personalisht më së voni në samitin e BE-së në Bruksel më 12 shkurt, tema e të cilit është situata në Greqi.
Dëbimi i trojkës?
Gjatë vizitës së tij të parë si kryeministër në Qipro, e cila pas kolapsit të sistemit të fryrë bankar është si dhe Greqia e varur nga ndihmat financiare ndërkombëtare, Tsipras përsëriti se nuk do të bashkëpunojnë më gjatë me “inspektorët e kursimeve” të trojkës.
Një ndërprerje e njëanshme e bashkëpunimit me troijkën shihet në Gjermani, me skepticizëm. “Nga pikëpamja e qeverisë gjermane nuk ka arsye për të hequr dorë prej këtij mekanizmi të sprovuar – vlerësim nga ana e trojkës dhe pastaj vendimet përkatëse në nivel politik” – njoftoi Zyra e Kancelares.
Të mërkurën (4.02) ministri grek i Financave Janis Varufakis do të takohet me presidentin e Bankës Qendrore Evropiane, Mario Draghi. Të enjten ai do të takohet në Berlin me homologun e tij gjerman Wolfgang Schäuble. Qëllimi i deklaruar i Varufakis është për ta çliruar Greqinë nga “robëria e borxheve”. Greqia ka borxhe në vlerë prej rreth 320 miliardë euro dhe koha nuk pret, sepse më 28 shkurt programi i mbështetjes për Greqinë merr fund.(DW)

Migrimi ilegal fundos liberalizimin e vizave

by

Numri i madh i azilkërkuesve në vendet e Bashkimit Evropian do të vështirësojë edhe më shumë çështjen e liberalizimit të vizave për qytetarët e Kosovës.
Zyrtarë nga Qeveria e Kosovës, thonë se pavarësisht punës së bërë deri më tash në zbatimin e kritereve të kërkuara nga Bashkimi Evropian për liberalizimin e vizave, zhvillimet e fundit në vend, migrimi ilegal, do të bëjnë që Komisioni Evropian ta ketë të vështirë që të rekomandojë heqjen e vizave për Republikën e Kosovës.
Fisnik Rexhepi, këshilltar i lartë politik në Ministrinë e Integrimeve Evropiane, tha për Radion Evropa e Lirë se migrimi ilegal edhe në vitin 2014, por edhe në muajin e parë të këtij viti ka shënuar rritje, dhe sipas tij, një situatë e tillë do ta dëmtojë punën e bërë nga institucionet e Kosovës për liberalizimin e vizave.
“Pa dyshim se numri i madh i azilkërkuesve në vendet e Bashkimit Evropian, po e dëmton edhe ketë proces dhe do të vonojë vendimin eventual të shteteve anëtare të Bashkimit Evropian për të hequr vizat për qytetarët e Kosovës. Ne po punojmë ngushtë me këto vende dhe me Komisionin Evropian për të adresuar edhe çështjen e migrimit jo të rregullt”, tha Rexhepi.
Rexhepi tha se secili qytetar i Kosovës ka të drejtë të kërkojë dhe të gjejë një jetë më të mirë kudo, por jo në formën e migrimit të parregullt.
“Ne vazhdimisht ju kemi bërë thirrje qytetarëve që të mos migrojnë në këtë formë drejt vendeve të Bashkimit Evropian, sepse është një rrugë me rrezik për ta dhe për familjet e tyre”, tha Rexhepi.
Përfaqësuesi special i Bashkimit Evropian në Kosovë, Samuel Zbogar para pak kohësh pati deklaruar se migrimi ilegal nga Kosova është një shqetësim për BE-në dhe shtetet anëtare të saj.
Ai ka thënë se vala e madhe e migrimit jo të rregullt dhe rritja e madhe e aplikacioneve për azil nga qytetarët e Kosovës në BE duhet të adresohen menjëherë dhe në mënyrë efikase nga Kosova.
Përfaqësues të institucioneve të Kosovës, kanë përmendur krijimin e një trask-force për t’u marrë me migrimin ilegal, mirëpo deri më tash, një mekanizëm i tillë nuk është krijuar.
Avni Mazreku, profesor i së Drejtës Evropiane, thotë se migrimi jo i rregullt i kosovarëve do t’i shkaktojë problem Kosovës, kur bëhet fjalë për liberalizimin e vizave.
“Lëvizjet kaq të mëdha të njerëzve, përkatësisht migrimi ilegal i njerëzve është diçka që shkon në dëm të procesit të liberalizimit të vizave, sepse liberalizimi i vizave apo shtetet që pretendojnë të jenë në zonën Shengen, duhet të konsiderohen vende të sigurta, ku ka stabilitet politik, ekonomik dhe juridik. Një lëvizje e tillë nuk mund të jetë pozitive, është e kundërta, mund të ndikojë negativisht”, tha Mazreku.
Migrimi jolegal mund të parandalohet vetëm me zhvillimin ekonomik dhe krijimin e kushteve për punësim, thotë Mazreku.
“Elementi i parë në fakt që duhet Kosova ta ketë është politika konstruktive që shkon drejt zhvillimit ekonomik të vendit. Mendoj se arsyet kryesore pse njerëzit dalin nga Kosova është mungesa e perspektivës ekonomike”, tha Mazreku.
Ministria e Punëve të Brendshme në Kosovë ende nuk ka ndonjë të dhënë për migrimet e qytetarëve të Kosovës këtë vit.
Ambasadorët e vendeve të BE-së në Kosovë, janë duke përsëritur në vazhdimësi se asnjë nga vendet e tyre nuk japin azil për qytetarët e Kosovës.(Kortezi:Anton Konushevci)

Mungesën e identitetit kombëtar, boshnjakët e paguan shtrenjtë

by

Myslimanë ishin boshnjakët e jo shqiptarët
Në ish-Jugosllavi myslimanë quheshin boshnjakët e Bosnjës dhe myslimanët e sllavizuar të Sanxahkut, të cilit para 100 vjetësh ishin shqiptarë. Atyre ua imponuan, ose patën krizë identiteti, prandaj i bindën ta zëvendësojnë kombin e munguar me fenë. 
Shqiptarët e Kosovës e të territoreve etnike asnjëherë dhe në asnjë situatë, askush nuk i ka quajtur myslimanë. Ata me mburrje në kohën e dhunës më të egër serbe kundër tyre e quanin vetën shqiptarë, megjithëse e dinin se po të quheshin myslimanë, do të shpëtonin nga dhuna e nga vrasjet. Rilindësit ishin fanari i tyre ndriçues.
Në ish-Jugosllavi predikimin fetar nuk e ka penguar shteti, hoxhallarët merrnin rroga nga shteti, natyrisht pjesa dërmuese e tyre e ngritën në qiell shtetin e dhunshëm, meqë ishin rrogëtarë të tyre. Një pjesë e këtyre hoxhallarëve, përpiqeshin t’i bindnin besimtarët e tyre shqiptarë se ata duhej të regjistroheshin myslimanë si boshnjakët e jo shqiptarë, sepse ashtu i kishin urdhëruar patronët e tyre. Të njëjtit hoxhallarë, prapë nisën t’i bindin shqiptarët se ata janë myslimanë e jo shqiptarë .
Sot në mënyrë të shëmtuar bie në sy një trend që disa njerëz të zakonshëm të thonë me nativizëm apo mbase me dashakeqësi, unë myslimani, ose unë myslimania, në vend se të thonë unë shqiptari apo unë shqiptarja, sepse të qenit myslimanë nuk është identitet, është fe, të vënit në pah të këtij përcaktimi dëshmon për mungesë identiteti, pra për fatkeqësinë e tij ose të saj.
Sa herë e lexoj sintagmën: unë myslimania, apo unë myslimani mendoj se ata po flasin për boshnjakët e dikurshëm pa identitet kombëtar.
Mungesën e identitetit kombëtar, boshnjakët e paguan shtrenjtë.

Kosova në udhëkryq! Jabllanoviçët ia kanë vënë asaj zjarrin!!!

by

Shkruan: Dr. Enver Bytyçi/
Isa Mustafa e shkarkoi Jabllanoviçin. Po lopa e Serbisë do të pjellë viça të tjerë pafund. E atëherë çfarë fitoi Kosova me shkarkimin e një ministri serb, i cili do të zevendësohet po me një “viç” tjetër?!~ A do të ketë ajo më pak ose aspak korrupsion?! A do të funksionojë shteti i së drejtës mirë e më mirë?! A do të ketë më shumë demokraci, liri e të drejta për qytetarët e Kosovës?! A do të jetë qeveria e Kosovës dhe institucionet e saj autoritet i plotë në veri të vendit?! Çfarë do të bëhet me Trepçën dhe cilat asete do ia lënë Serbisë, nëse i referohemi një deklarate të ambasadorit anglez në Prishtinë?!
Jabllanoviç I mori valixhet. Po cilat valixhe mbajnë në duar vetë politikanët shqiptarë në Kosovë?! A e ndihëmon Albin Kurti Kosovën me ekstremizmin e tij patetik?! A ishte më 1999 Thaçi më revolucionar se sot Albini?! A u duk dhe Thaçi atëherë shumë më nacionalist se Rugova?! Po cilat janë veprat e të tillë revolucionarëve, a kanë lënë ata ndonjë gjurmë se janë të përkushtuar për Kosovën?! E nga ana tjetër sa e sa gjurmë kanë lënë për grabitjen pasurisë së vendit në format nga më të ndryshmet?! A mos Albini është i shenjtë dhe nesër në pushtet nuk do të bëjë kësisoj e më keq sesa Thaç?! A nuk kemi të njëjtën histori të shkruar e të lexuar ne shqiptarët?! Cila qeveri e qeverisje në 100 vjet nuk luftoi më shumë për pushtet sesa për shtet?! Cila lëvizje nacionaliste për vetëvendosjen e jona nuk ka përfunduar në qëllimin e marrjes dhe përfitimit nga pushteti?! Cili nga udhëheqësit shqiptarë, përveçse Rugovës, nuk është dëshmuar nga pak Esat Pashë Toptan, të cilin e kemi etiketuar me të drejtë si simbolin e tradhëtisë kombëtare?! Po nëse është kështu a mund të ketë njerëz “pak tradhëtarë ose pak shkërdhatë”?!. Pra a nuk na shfaqet përditë Esat pasha në pashallëqet tona në Prishtinë e në Tiranë?!
Isa Mustafa nga ana tjetër, çfarë i ofron Kosovës veç shkarkimit të sforcuar të Jabllanoviçit?! Çfarë do të bëjë ai me Trepçen?! Si do ta ulë papunësinë dhe varfërinë e qytetarëve të Kosovës?! A do të krijojë kapital të bollshëm për rritjen e pagave e të pensioneve, që shqiptarët më së pari, por edhe të tjerët të mos ndjejnë nevojën e emigrimit?! Si do t’i vejë ai në lëvizje pasuritë e nëntokës dhe mbitokës së Kosovës, për t’i dhënë vendit mirëqenie e begati?! Si do ta luftojë korrupsionin e mitmarrjen te vetja e partneri kryesor i tij, PDK?!
Të gjitha këto pyetje mbeten pa përgjigje edhe pas shkarkimit të Jabllanoviçit, se Jabllanoviçët shqiptarë janë instaluar në qeveri, në parlament dhe shumë institucione të tjera të Kosovës. Jabllanoviçi ishte asiqare, por ata tjerët shqipfolës ose serbishtfolës që rrine fshehur e janë përhapur si metastaza deri në administratën e pushtetit lokal janë më të rrezikshmit. Po mos ishin ata që prej 16 viteve, Kosova sot do të ishte në OKB. Territori i saj dhe për pasojë Trepça nuk do të viheshin në diskutim. Autobuzët dhe linjat e avionëve nuk do të mbushnin barkun me shqiptarë që ikin, ikin dhe nuk duan të kthehen, madje as ta kthejnë kokën nga atdheu për të cilin njëqind vjet, tre ose katër breza derdhën aq shumë gjak. Plaga e kurbetit nuk do të ishte në rendin e ditës si zgjidhja e vetme për të mbijetuar. Dhe politika, qeveria, deputeti, ministri, kryeministri, të gjithë këta që janë majmur dhe kanë lëshuar rrënjë në vilat luksoze sheikase bëjnë sikur nuk ndodh asgjë. Thjesht merren me deklarata dhe moralizime, por jo edhe me projekte konkrete për ndërtimin e shtetit demokratik të së drejtës, për zhvillimin e pronës e të prodhimit, për rritjen e të ardhurave dhe të mirëqenies.
Qytetarët e Kosovës kanë dalë në rrugë, jo për Jabbanoviçin, por në protestë kundër të gjithë jabllanoviçëve në pushtet. Ata nuk presin vetëm shkarkimin e një minsitri serb në qeverinë e Kosovës, sado legjitime të duket kjo. Ata presin që dikush të inektojë së paku shpresën e humbur dhe dalngadalë të rikthejë nderin, dinjitetin dhe integritetin moral e ekonomik të vendit. Ata nuk presin më bisedime të pafund me Beogradin, por operacione reale dhe bindëse, ku të duket se Kosova është e do të mbetet shtet i pavarur, shtet demokratik funksional dhe shtet i së drejtës, bazuar në vlerat e Perendimit. Ku shqiptarët të mos i tremben shpërbërjes ose copëtimit të territorit të saj, ku Serbia të ikë, të ikë larg, shumë lërg, përtej Beogradit e të mos duket kurrë më në Kosovën, të cilën e shkatërroi me shtëpi e katandi, e vrau, e masakroi dhe e spastroi etnikisht.
Qytetarët e Kosovës protestojnë, sepse nuk shohin asnjë shenjë drite në fund të tunelit. Shkarkimi i Jabllonoviçit, ndonëse një hap i duhur, nuk jep ndonjë shenjë drite. Sa kohë që do të lejohet që lojën antishqiptare në Kosovë ta bëjë Beogradi me jabllanoviçët e Prishtinës, aq kohë Albini do të gjejë alibi të pafund për t’i thyer e copëtuar xhamat e godinës së qeverisë, e ndoshta nesër edhe të parlamentit, pavarësisht se ai vetë është anëtar i atij parlamenti. Absurdi nuk ka fund. Në vend të alternativës vepron rruga. Në vend të arësyes veprojnë jabllanoviçët që marrin në mbrojtje krimin. Këto ndodhin në një terren të mbarsur me mllef e me konflikte. Jabllanoviçi vetëm se ia vu zjarrin benzinës, por Kosovën e kanë lyer me benzinë vetë qeveritarët e derisotëm shqiptarë të Kosovës. Madje ata që u betuan për një Shqipëri të Bashkuar.
Dhe më në fund gjthçka ndodh që shqiptarët e Kosovës të detyrohen të kërkojnë e përshpejtojnë bashkimin e Kosovës me Shqipërinë. Pikërisht kjo është loja e Serbisë, që Kosova të kërkojë bashkim me Shqipërinë ende pa definuar pavarësinë dhe integritetin territorial të saj. Kësaj strategjie i shërbëjnë ata që qeverisin, por edhe vetë Albini, që hiqet se i dhemb shumë për Kosovën e shfrytëzon pakënaqësinë e ligjshme të qytetarëve me qeverinë dhe qeverisjen. Më këtë kërkesë Serbia do të realizojë lehtësisht projektin e saj të ndarjes së Kosovës. Nuk ka asnjë arësyetim tjetër pse këto që po ndodhin në Kosovë janë kaq të trishta, të dëmshme e të rrezikshme.
Eshtë koha për të thënë mjaft më! Kështu nuk mund të ecet përpara! Gjithçka që po bëjmë i kundërvihet interest tonë kombëtar!