Ekonomi – Page 193 – Dielli

Kosova, barazi gjinore në punësim

February 27, 2017 by dgreca

-Parakusht i rëndësishëm i zhvillimit ekonomik/

ZKP-03 ZKP-04

– Kryeministri i Kosovës, Isa Mustafa: Një shoqëri, e cila rregullon çështjen gjinore të punësimit dhe barazinë gjinore në punësim, ajo siguron parakushte shumë të rëndësishme të zhvillimit më të shpejtuar/

-Ambasadori i Shteteve të Bashkuara të Amerikës në Kosovë, Greg Delawie u shpreh i lumtur që po merr pjesë në festimin e një suksesi/

ZKP-05

PRISHTINË, 27 Shkurt 2017-Gazeta DIELLI/ Kryeministri i Republikës së Kosovës, Isa Mustafa, mori pjesë pjesë në ceremoninë e ndarjes së certifikatave për projektin “Vajzat në TIK”.Në këtë ceremoni, ku ishin të pranishëm edhe ambasadori i SHBA-ve, Greg Delawie, shefi i zyrës së Bankës Botërore për Kosovë, Marco Mantovanelli, ambasadori i Norvegjisë, Per Strand Sjaastad, përfaqësues të USAID-it, NDI-së, si dhe përfitueset e trajnimit, u prezantuan dy fazat e para të pilot projektit, të kryera në Gjakovë, Lipjan dhe Prishtinë dhe zonat përreth.
Shumica prej 271 kontratave të punës online apo në internet të fituara nga afro 80 femra, kanë të bëjnë me zhvillim të webfaqeve, hulumtime të web, marketing digjital, asistente virtuale, futje të të dhënave, hulumtime dhe shkrime.Kryeministri Mustafa tha se kjo është një hapje e dritares së punësimit të grave, të vajzave të një komuniteti tepër të rëndësishëm, në pikëpamje jo vetëm të sigurimit të barazisë në punësim, por edhe të sigurimit të zhvillimit ekonomik.

“Të gjitha studimet flasin që një shoqëri, e cila rregullon çështjen gjinore të punësimit dhe barazinë gjinore në punësim, ajo siguron parakushte shumë të rëndësishme të zhvillimit më të shpejtuar, të zhvillimit të qëndrueshëm dhe të zhvillimit të barabartë ekonomik”, tha kryeministri Mustafa.Më tej, kryeministri Mustafa theksoi se teknologjia e informacionit dhe e komunikimit ka një rol të veçantë në zhvillimin ekonomik të një vendi, në ekonomi konkurruese, në ekonomi të dijes dhe asaj të inovacionit.Kryeministri Mustafa, po ashtu përgëzoi Ministrinë e Zhvillimit Ekonomik për përpjekjet që i ka bërë në zhvillimin e suksesshëm të projektit “Gratë në punë online”, i bindur se përmes këtij programi në mënyrë iniciale është arrit që të që të punësohet një numër i konsiderueshëm i grave në një proces të hapur, konkurrues, para së gjithash të bazuar në dije dhe të bazuar në konkurrencë.“Falënderoj po ashtu Bankën Botërore, sidomos për mbështetjen e këtij programi, nga i cili kanë gjet vend pune një numër i madh për kriteret tona i grave, dhe përshëndes iniciativën që të vazhdohet edhe më tutje me këtë projekt, sepse është një projekt shumë i rëndësishëm për ne.Në emër të Qeverisë unë mund t’ju them se përfaqësoj një përkushtim të rëndësishëm të Qeverisë jo vetëm në pikëpamje të orientimit tonë që zhvillimit ekonomik, të punësimit, sidomos të të rinjve dhe grave, t’i japim prioritet themelor, por para së gjithash të një orientimi që ne të shfrytëzojmë të gjitha potencialet tona zhvillimore, të cilat para së gjithash bazohen në resurse njerëzore shumë të afta, të përgatitura, shumë produktive, dhe po ashtu shumë elastike, në pikëpamje të përshtatshmërisë së tregut të punës, që ne të zhvillojmë një ekonomi, në të cilën ne jemi më konkurrent, dhe kjo flet që konkurrencën tonë ne po e shprehim edhe në fushën e teknologjisë informatike, me dijen tuaj dhe me sukseset tuaja që i keni treguar deri më tani”, theksoi kryeministri Mustafa.Më tej kryeministri theksoi se objektivat themelore të këtij projekti janë punësimi, janë eksporti, dhe është ekonomia gjithëpërfshirëse, dhe kjo paraqet në rend të parë përcaktimin që të zhvillojmë një ekonomi, e cila do të mundësoj një punësim më të madh të gjithë popullatës, sidomos të atyre që janë këtu dhe që përfaqësojnë një grupacion të veçantë dhe tepër të rëndësishëm të zhvillimit ekonomik të vendit.Kryeministri po ashtu falënderoi USAID-in për mbështetjen e dhënë si mbështetje të pandërprerë në zhvillimin ekonomik, dhe në inovime të ndryshme, në sektorë të ndryshëm, në këtë rast edhe në sektorin e bujqësisë dhe sektorë tjetër, sepse janë sektorë që lidhen në mënyrë të drejtpërdrejt, dhe projektin HELVETIKAS, i cili është një projekt shumë i rëndësishëm për të ardhmen.Zëvendësministrja e Zhvillimit Ekonomik, Besa Zogaj-Gashi, tha se projekti WOW ka hyrë në fazën e tretë e cila do të realizohet nga Ministria e Zhvillimit Ekonomik në bashkëpunim me USAID-in dhe do të zhvillohet në komunën e Gjilanit dhe Prishtinës.“Ideja dhe nisma ime për një projekt të tillë u frymëzua nga trendet e reja botërore duke qenë shumë e bindur se ky lloj projekti ofron mundësi të panumërta. Nisma u cilësua ide shumë e guximshme dhe shumë e bukur për të qenë e vërtetë”, tha zëvendësministrja Zogaj-Gashi, duke shtuar se numri i madh i konkurrueseve qysh në fazën e parë të projektit, ishte indikator që vendi ka nevojë për një projekt të tillë.Më tej, zëvendësministrja Zogaj-Gashi theksoi se vajzat e diplomuara në trajnimin ËOË po krijojnë të ardhura më të larta se paga mesatare në vend me një orar fleksibile dhe me pak orë pune në ditë.Zëvendësministrja Zogaj-Gashi, theksoi po ashtu se ofrimi i mundësive për të përfituar shkathtësi për punësim online tashmë është realitet i prekshëm.

Ambasadori i Shteteve të Bashkuara të Amerikës, Greg Delawie u shpreh i lumtur që po merr pjesë në festimin e një suksesi të tillë, duke vlerësuar se projekti po ndryshon jetën e njerëzve për të mirë.“Që nga zhvillimi i uebit, dizajni grafik e deri tek marketingu digjital, e shumë më shumë, ky program hap një rrugë të re të studimit dhe punësimit për gratë e Kosovës” tha ambasadori Delawie. Shefi i Zyrës së Bankës Botërore për Kosovë, Marco Mantovanelli, u shpreh i gëzuar me projektin, që është vetëm njëra nga sektorët me të cilën Banka Botërore po ndihmon punësimin dhe zhvillimin ekonomik të Kosovës në përgjithësi.“Banka Botërore vazhdon të mbetet e vendosur për mbështetjen e këtij sektori, kështu që ne do t’ju përkrahim në secilën mënyrë që mundemi dhe iniciativat që ka Ministria e Zhvillimit Ekonomik dhe vetë Qeveria për ekonominë digjitale” tha Mantovanelli./b.j/

Kosovë-Përmirësimi i ofertës në tregun e punës

February 22, 2017 by dgreca

Përmirësimi i ofertës në tregun e punës do qasje gjithëpërfshirëse/

-Oda Ekonomike Amerikane në Kosovë organizoi tryezë me ministrin e Arsimit, Shkenës dhe Teknologjisë, Arsim Bajrami dhe ministrin e Punës dhe Mirëqenies Sociale, Arban Abrashi/

PRISHTINË, 22 Shkurt 2017/ Nevojitet qasje gjithëpërfshirëse për përmirësimin e ofertës në tregun e punës, u konkludua në një tryezë të organizuar sot në Prishtinë. Duke pasur parasysh rëndësinë e një bashkëpunimi të mirëfilltë ndërmjet institucioneve arsimore dhe sektorit privat, në kuptim të përgatitjes së kuadrove profesionale për kërkesat e tregut të punës, Oda Ekonomike Amerikane në Kosovë organizoi tryezë me ministrin e Arsimit, Shkenës dhe Teknologjisë, Arsim Bajrami dhe ministrin e Punës dhe Mirëqenies Sociale, Arban Abrashi, në të cilën, mes tjerash, u diskutua mbi çështjet me të cilat përballet sektori privat dhe mundësinë e thellimit të bashkëpunimit të institucioneve përkatëse për këtë aspekt.Drejtori Ekzekutiv i Odës Ekonomike Amerikane Arian Zeka tha se institucionet përgjegjëse bëjnë përpjekje që të përmirësojnë raportin midis kërkesës dhe ofertës në tregun e punës, të luajnë edhe rol proaktiv duke analizuar nevojat e ardhshme të tregut të punës dhe duke i përgatitur punëkërkuesit në Kosovë edhe për vendet e punës të cilat sot për sot nuk ekzistojnë.

Ministri Bajrami u shpreh se institucionet arsimore duhet të orientohen në sistemin e avansuar të edukimit, në atë të ideologjive praktike, duke pasur parasysh që të rinjtë duhet të edukohen në frymën e ndërmarrësisë. Bajrami theksoi se i tërë sistemi arsimor do të ndërlidhet ngushtë me zhvillimin ekonomik të vendit, e sidomos me sektorët të cilët kanë nevojë për staf profesional dhe të kualifikuar, përmes promovimit të edukimit dual që përfshin komponentën praktike dhe teorike. Në këtë aspekt, kjo ministri është duke bashkëpunuar me ministri të tjera dhe organizata ndëkombëtare për të krijuar një kurrikulë që bazohet në shkathtësitë profesionale dhe praktike. Ndërsa, ministri Abrashi theksoi se në kuadër të misionit të Ministrisë së Punës dhe Mirëqenies Sociale është implementimi i masave dhe dizajnimi i programeve për krijimin e një fuqie punëtore në përputhje me kërkesat e tregut të punës. Abrashi shtoi se kjo ministri në bashkëpunim me Ministrinë e Arsimit, Shkenës dhe Teknologjisë është në përpilim të një plani strategjik për analizimin dhe përditësimin e kërkesave të tregut të punës për të bërë ndërhyrjet e nevojshme në kurrikulat e arsimit të lartë./b.j/

Kosova, pikëkalime të përhershme të IBM-së në kufi me Serbinë

February 16, 2017 by dgreca

-Para 9 viteve, më pak se një muaj pas shpalljes së pavarësisë në 17 shkurt 2008, Republika e Kosovës në 9 mars nisi të vendoste mbishkrimet me identitetin e ri në kufirin me Republikën e Serbisë. Solemnisht, së pari, u zbulua tabela me mbishkrimin “Republika e Kosovës – Mirë se vini” në pikën kufitare Kosovë-Serbi në Merdare/

-Presidenti Thaçi: Kosova e përkushtuar që të lëvizet pa pengesa në rajon/ MERDARE, 16 Shkurt 2017-Gazeta DIELLI-Behlul Jashari/ Në prag të ditës së 9 vjetorit të pavarësisë, sot sapo u zhvillua ceremonia e vënies së gurthemelit të ndërtimit të pikëkalimit të përhershëm kufitar të IBM-së në mes Republikës së Kosovës dhe Serbisë në Merdare.“Kosova gjatë gjithë këtyre viteve gjithmonë ka qenë e përkushtuar për dialog, për fqinjësi të mirë, për bashkjëpunim në shërbim të gjithë qytetarëve, në shërbim të zhvillimit dhe paqes në rajon”, tha presidenti i Republikës, Hashim Thaçi në fillim të ceremonisë, ku morën pjesë edhe kryeministri Isa Mustafa dhe Shefja e Zyrës së BE-së/Përfaqësuesja Speciale e BE-së, Nataliya Apostolova.“E vlerësoj lart vënien e gurthemelit të vendkalimit kufitar mes Kosovës dhe Serbisë, ky është një rezultat i drejtpërdrejtë i dialogut që kemi zhvilluar një kohë të gjatë, që nuk ka qenë i lehtë por po jep rezultate shumë të mira”, tha kryeministri Mustafa.Zyra e BE-së në Kosovë ka deklaruar se, në përputhje me marrëveshjen e dialogut mbi Menaxhimin e Integruar Kufitar (IBM), do të financojë tre pika kalimi kufitare permanente në mes të Kosovës dhe Serbisë, përkatësisht në Merdare, Mutivodë dhe Bërnjak, me një vlerë prej 9.42 milione euro.Ceremonia e vënies së gurthemelit sot në pikën e parë kufitare është organizuar nga Zyra e BE-së/Përfaqësuesit të Posaçëm të BE-së në Kosovë së bashku me Ministrinë për Dialog.

Ministria ka deklaruar se, ky është i pari nga gjashtë pikëkalimet kufitare të përhershme të IBM-së që do të ndërtohen në kuadër të projektit të gjerë të Menaxhimit të Integruar të Kufirit në mes të Kosovës dhe Serbisë, i paraparë më marrëveshjen e arritur në kuadër të dialogut të Brukselit.Para 9 viteve, më pak se një muaj pas shpalljes së pavarësisë në 17 shkurt 2008, Republika e Kosovës në 9 mars nisi të vendoste mbishkrimet me identitetin e ri në kufirin me Republikën e Serbisë. Solemnisht, së pari, u zbulua tabela me mbishkrimin “Republika e Kosovës – Mirë se vini” në pikën kufitare Kosovë-Serbi në Merdare.

m-01

PRESIDENTI THAÇI: KOSOVA E PËRKUSHTUAR QË TË LËVIZET PA PENGESA NË RAJON

Presidenti i vendit, Hashim Thaçi, bashkë me kryeministrin Mustafa, ministren Tahiri dhe shefen e Zyrës së BE-së në Kosovë, Nataliya Apostolova, sot kanë vendosur gurthemelin e pikës së re të kalimit kufitar mes Kosovës dhe Serbisë në Merdarë.Presidenti Thaçi ka thënë se ky pikëkalim është vetëm një nga gjashtë pikëkalimet kufitare të përhershme të Menaxhimit të Integruar të Kufirit, të cilat do të ndërtohen në kuadër të projektit të gjerë në mes të Kosovës dhe Serbisë.“Në këtë mënyrë, ne jo vetëm që po i përmbushim standardet evropiane, por po ua zvogëlojmë hapësirën edhe dukurive të ekonomisë joformale”, u shpreh presidenti Thaçi.Gjatë gjithë këtyre viteve, presidentit Thaçi tha se Kosova ka qenë gjithmonë e përkushtuar për dialog, për fqinjësi të mirë, për bashkëpunim në shërbim të qytetarëve, në shërbim të zhvillimit dhe paqes në rajon.“Institucionet e Kosovës kanë qenë dhe mbesin të përkushtuara për lehtësimin e lëvizjes së njerëzve dhe mallrave. Jo vetëm brenda Kosovës, por edhe me shtetet fqinje, si në këtë rast me Serbinë”, ka thënë ai.Vënia e këtij gurthemeli në Merdarë, për ndërtimin e pikës së kalimit ndërmjet Kosovës dhe Serbisë, presidenti Thaçi theksoi se është edhe një dëshmi tjetër e rrugës së duhur që kemi ndjekur përmes dialogimit.“Ndoqëm rrugën e bashkëpunimit dhe dialogimit për të mirën e qytetarëve, rrugën e ndërtimit të urave dhe vendkalimeve të reja”, u shpreh presidenti Thaçi.Ai ka thënë se Kosova gjithmonë e ka respektuar lirinë e lëvizjes së njerëzve, automjeteve dhe mallrave.Për këtë qëllim, presidenti Thaçi theksoi se janë arritur marrëveshje që mundësojnë edhe kalimin e kufirit vetëm me letërnjoftime, që të gjithë qytetarët e rajonit të lëvizin pa pengesa.“Këto kanale të reja të kalimit të qytetarëve tanë, shqiptarë e serbë, por edhe të bashkatdhetarëve tanë, po krijohen falë marrëveshjeve në kuadër të dialogut në Bruksel”, u shpreh presidenti Thaçi.Kreu i shtetit e falënderoj Zyrën e Bashkimin Evropian në Kosovë për mbështetjen financiare dhe UNOPS-in, si partner implementues të BE-së, si dhe Ministren e Dialogut, Edita Tahiri, për punën e bërë.Me dialog dhe bashkëpunim, presidenti Thaçi tha se çdoherë e më shumë po e forcojmë identitetin tonë, sovranitetin, por edhe subjektivitetin shtetëror.Ai theksoi se dialogu dhe bashkëpunimi janë rrugë e vetme përpara për tërë Ballkanin Perëndimor.

Kryeministri Mustafa: Do të vazhdojmë që përmes dialogut të zgjidhim problemet me fqinj

unnamed (2) Kryeministri i Republikës së Kosovës, Isa Mustafa, ka marrë sot pjesë në ceremoninë e vënies së gurëthemelit të ndërtimit të pikëkalimit të përhershëm kufitar në mes të Republikës së Kosovës dhe Serbisë në Merdare.Me këtë rast, kryeministri Mustafa theksoi se kjo është një e arritur e dialogut të ndërmjetësuar nga Bashkimi Evropian, në mes të dy shteteve fqinje, Kosovës dhe Serbisë.Kryeministri Mustafa po ashtu ka vlerësuar se ndonëse dialogu nuk ishte gjithmonë i lehtë, rezultatet e arritura dëshmojnë se vetëm përmes dialogut zgjidhen të gjitha problemet me shtetet fqinje. “Unë e vlerësoj lart sot vënien e gurëthemelit të vendkalimit kufitar ndërmjet Republikës së Kosovës dhe Serbisë. Vlerësoj se ky është një rezultat i drejtpërdrejt i dialogut që ne kemi zhvilluar për një afat të gjatë, që nuk ka qenë i lehtë, por po jep rezultate shumë të mira, dhe është një dëshmi që ne duhet të vazhdojmë që përmes dialogut të zgjidhim të gjitha problemet tona me fqinj. Unë dëshiroj kësaj radhe të falënderoj Bashkimin Evropian për mbështetjen e këtij projekti dhe t’ju uroj shumë suksese” tha kryeministri Mustafa.Marrëveshja për Menaxhimin e Integruar të Kufirit, e arritur në kuadër të dialogut të Brukselit, parasheh ndërtimin edhe të pesë pikëkalimeve tjera kufitare në mes të Republikës së Kosovës dhe Serbisë.

Fjala e ministres për Dialog Edita Tahiri me rastin e vënies së gurthemelit të pikëkalimit kufitar në Merdarë

unnamed (3)

Prishtinë, 16 shkurt 2017/ ,/Menaxhimi i kufijve sipas standardeve evropiane demonstron përkushtimin e shtetit tonë për integrime evropiane dhe euroatlantike. Republika e Kosovës është ndër shtetet e para të rajonit e cila ka vendosur dhe zbaton politikat e menaxhimit të integruar të kufijve, si një model i avancuar i kontrollit të kufijve, në mbrojtje të sovranitetit shtetëror dhe për një lëvizje më të lirë për njerëzit, idetë dhe mallrat. Ne po konsolidojmë standardet evropiane në fushën e kontrollit kufitar me gjithë shtetet fqinje, për të rritur sigurinë, paqen dhe stabilitetin në rajon dhe Evropë. Por edhe më shumë, ne po ndërtojmë vlera shtetërore, të qëndrueshme dhe moderne. Ne po bëjmë progres për të jetësuar vizionin tonë euroatlantik, prandaj presim mbështetjen e merituar për të përshpejtuar integrimin e Kosovës në BE, NATO, OKB dhe institucione tjera relevante.

Vënia e gurthemelit për ndërtimin e pikëkalimit të përhershëm kufitar këtu në Merdarë, është dhurata jonë për ditëlindjen e nëntë të shtetit tonë të ri. Ky është një gur më shumë në themelet e shtetit, sovranitetit dhe prosperitetit.Ky është rezultat i dialogut të për fqinjësi të mirë dhe paqe që po e zhvillojmë në Bruksel. Është rezultat i Marrëveshjes së IBM-it me të cilën vendosëm kufijtë ndërshtetëror mes dy shteteve, Kosovës dhe Serbisë, me ndërmjetësimin e Bashkimit Evropian dhe mbështetjes së fuqishme të SHBA-ve.

Që nga viti 2011 kur e kemi arritur këtë marrëveshje, autoritetet shtetërore kufitare të Republikës së Kosovës dhe të Serbisë kanë rritur bashkëpunimin me qëllim të kontrollit sa më të mirë të kufirit, duke përmirësuar dukshëm lëvizjen e lirë të qytetarëve dhe automjeteve si dhe duke detektuar dhe penguar dukuritë negative kufitare, në dobi të dyja shteteve.Me këtë rast dëshiroj të falënderoj Bashkimin Evropian për mbështetjen e projekteve për ndërtesat e përhershme kufitare përfshirë dhe financimin e tyre, për gjashtë pikëkalimet kufitare.Projekti i PKK në Merdarë është më i madhi prandaj e kemi nisur të parin. Ky PKK ka rëndësi madhore për infrastrukturën dhe konektivitetin rajonal të shtetit tonë, duke marrë parasysh autostradat dhe korridoret rrugore rajonale që kalojnë përmes tij. Duke marrë parasysh sukseset tona në ndërtimin e infrastrukturës së rrugëve dhe autostradave, infrastruktura moderne e pikëkalimit kufitar në Merdarë që po e fillojmë sot është edhe një sukses i madh i Qeverisë së Kosovës.Bashkëpunimi mes Qeverisë së Kosovës dhe Bashkimit Evropian dhe UNOPS-it si partner implementues i përzgjedhur nga BE ka qenë i shkëlqyeshëm për realizimin e projektit, dhe i tillë do të vazhdoj edhe në fazat e ndërtimit. Ne po punojmë intensivisht për vënien e gurthemelit edhe në dy pikat tjera kufitare ku Kosova është shtet mikpritës, Bërnjak dhe Mutivodë, ndërsa për tre të tjera do të jetë pala e Serbisë.Dua ta bëj një falënderim të veçantë për Grupin punues qeveritar për IBM, gjithë anëtarëve të saj, Bordit të projektit të përbërë nga Ministria e Dialogut, Ministria e Punëve të Brendshme, Ministria e Mjedisit dhe Planifikimit Hapësinor, Policia e Kosovës, Dogana e Kosovës, AVUK, Zyra e Bashkimit Evropian në Kosovë, EULEX-i.Në fund dua ta ndaj me ju një storie nga negociatat e IBM-it në Bruksel. Unë kam pasur një kolonel të nderuar në delegacion, por të cilin e shpalla gjeneral në grupin punës, në emër të reciprocitetit me palën tjetër. Ai është kolonel Guda. Që nga ajo ditë është gjenerali im.Urime të gjithëve. Urime 9 vjetori i Pavarësisë së Kosovës!

Ju faleminderit!

Kosovë-Komuna e Pejës e para aplikon E-prokurimin

February 13, 2017 by dgreca

-Ministri i Financave në Qeverinë e Kosovës, Avdullah Hoti: Aplikimi i prokurimit elektronik na barazon me shumë shtete evropiane që e aplikojnë këtë formë të prokurimit, si dhe përmbushim kërkesat e Komisionit Evropian të parapara në Raportin e Progresit për Kosovën/

-Kryetari Gazmend Muhaxheri: Si çdo herë tjetër Komuna e Pejës është bartëse e ndryshimeve pozitive/

PEJË, 13 Shkurt 2017-Gazeta DIELLI/ Ministri i Financave në Qeverinë e Kosovës, Avdullah Hoti, kryetari i Komisionit Rregullativ të Prokurimit Publik Safet Hoxha, si dhe Kryetari i Komunës së Pejës Gazmend Muhaxheri kanë promovuar sot në Komunën e Pejës sistemin e E-prokurimit për nivelin komunal, e cila komunë është e para që ka filluar ta aplikoj këtë sistem.Ministri Avdullah Hoti bëri të ditur se “Pas shumë angazhimeve të Komisionit Rregullativ të Prokurimit Publik, ekspertëve të angazhuar në këtë projekt si dhe me ndihmën e partnerëve tanë zhvillimorë, nga janari i vitit 2017 ka filluar së zbatuari platforma elektronike për E-prokurim. Në kuadër të kësaj reforme e cila është në përputhje me objektivin kryesor të Ministrisë së Financave dhe të Qeverisë së Republikës së Kosovës që është rritja e transparencës dhe efikasitetit në shpenzimet publike, sot Komuna e Pejës ka filluar së zbatuari sistemin e E-prokurimit për nivelin komunal, kjo njëherit është edhe komuna e parë e cila fillon ta aplikoj këtë sistem”.“Me Prokurimin elektronik E-Prokurimi çdo organizatë buxhetore ka përparësi të pakrahasueshme, me qenë se siguron transparencë maksimale dhe objektivitet në përzgjedhjen e përfituesve të kontratave publike, siguron automatizim të procedurave dhe monitorim shumë më të mirë të kontratave, shkëputë kontaktet e drejtpërdrejta të zyrtarëve të prokurimit me operatorët ekonomik gjatë procesit të përzgjedhjes, mundëson që çdo aktivitet i zyrtarëve të prokurimit të jetë plotësisht i gjurmueshëm në sistem online dhe i qasshëm për të gjithë. Prokurimi elektronik gjithashtu mundëson auditim më të lehtë dhe kontroll më efikas të proceseve të prokurimit dhe e rrit përgjegjësinë e zyrtarëve të prokurimit, si dhe ofertat bëhen të lexueshme të gjitha njëkohësisht, sepse sistemi nuk lejon qasje selektive dhe asnjë lloj keq-përdorimi. Të gjitha këto rrisin konkurrencën dhe rrjedhimisht ulet kostoja për realizimin e investimeve publike”, shtoi Ministri Hoti.Sipas ministrit Avdullah Hoti me aplikimin e prokurimit elektronik, ne përmbushim dy obligime karshi agjendës tonë për integrime në Bashkësinë Evropiane dhe qasje në institucione financiare ndërkombëtare.“Prokurimi elektronik është pjesë e Programit që ka Qeveria e Kosovës me Fondin Monetar Ndërkombëtar, përmes të cilit përfitojmë deri në 180 milionë euro kredi direkte buxhetore për financim të projekteve, si dhe qasje në institucione financiare ndërkombëtare. Prandaj, dëshiroj të falënderoj Komisionin Rregullativ të Prokurimit Publik për angazhimet në këtë drejtim për përmbushjen e kësaj pjese të Programit me FMN-në. Aplikimi i prokurimit elektronik na barazon me shumë shtete evropiane që e aplikojnë këtë formë të prokurimit, si dhe përmbushim kërkesat e Komisionit Evropian të parapara në Raportin e Progresit për Kosovën”, shtoi Ministri Hoti. Kryetari i KRPP-së Safet Hoxha theksoi se, “sistemi i prokurimit elektronik ofron përgatitje dhe administrim të sigurt, efikas dhe transparent të të gjitha dokumenteve që lidhen me procesin e tenderimit, duke mënjanuar formën e dorëzimit të dokumentacionit në letër dhe duke siguruar një rrjedhë të sigurt të të dhënave përgjatë gjithë procesit”.Ndërsa, kryetari i Komunës së Pejës Gazmend Muhaxheri, theksoi: “Si çdo herë tjetër Komuna e Pejës është bartëse e ndryshimeve pozitive, prandaj sot së bashku me ministrin Hoti dhe kryetarin e KRPP-së Hoxha monitoruam sistemin elektronik të prokurimit publik, të cilin Komuna e Pejës ka filluar ta aplikoj nga fillimi i vitit 2017”./b.j/

Roli i autostarëdës Kosovë-Shqipëri po rritet

February 11, 2017 by dgreca

unnamed (1)

-Kryeministri i Kosovës Isa Mustafa së bashku me ministrat Hykmete Bajrami, Memli Krasniqi, Avdullah Hoti dhe Valon Murati, kanë shpalosur planet për avancimin e politikave ekonomike dhe punën që po bëhet që ambienti i biznesit të përmirësohet/

unnamed (2)

PRISHTINË, 11 Shkurt 2017-B.Jashari/ Infrastruktura e Kosovës tajkalon atë të disa vendeve fqinje, tha sot kryeministri Isa Mustafa, duke theksuar veçmas rrugën e kombit që lidhet me pjesën e ndërtuar më parë në Shqipëri drejt bregdetit shqiptar. “Roli i autostarëdës ‘Ibrahim Rugova’ që na lidhë me Durrësin dhe me Shqipërinë po rritet dita-ditës. Kurse, hapja e kësaj autostrade me Serbinë do të krijojë korridore të daljes me vendet e Ebvropës qendrore dhe perëndimore”, u shpreh ai.Kreu i qeverisë kosovare më tej shtoi se, autostrada tjetër drejt Shkupit po bëhet arterie shumë e rëndësishme, e cila do e lidhë Kosovën me Maqedoninë, Greqinë, Turqinë dhe vendet tjera aziatike.

“Edhe rekonsturimi i hekurudhave, për çka kemi siguruar fonde të nevojshme, poashtu do jetë një resurs shumë i rëndësishëm i transportit edhe për mallara, edhe për udhëtarë”, theksoi kryeministri i Kosovës.Kryeministri Mustafa po merr pjesë në konferencën “Ambienti i Biznesit 2017”, organizuar në Prishtine në kuadër të aktiviteteve “Ditët e Biznesit të Vogël 2017”, ku po prezantohen planet e qeverisë së Kosovës drejt zhvillimit të sektorit privat.
“Tani ne po punojmë në axhendën e reofrmave evropiane. Jam i bindur se kjo axehendë na afron me Bashkimin Evriopian dhe se rruga më e mirë drejt integrimit është edhe fuqizimi i sektorit ptivat”, u shpreh kryeministri i Kosovës.Ai theksoi se në Kosovë në vitin 2015 dhe 2016 rritja reale ekonomike ka arritur 4 % . “Vlerësoj se në bazë të trendëve që ne i kemi tani, mund të presim që rritja ekonomike në vitin 2017 të jetë rreth 5 %”, tha kreu i qeverisë së Kosovës.Kryeministri Mustafa së bashku me ministrat Hykmete Bajrami, Memli Krasniqi, Avdullah Hoti dhe Valon Murati, kanë shpalosur planet për avancimin e politikave ekonomike dhe punën që po bëhet që ambienti i biznesit të përmirësohet duke iu mundësuar bizneseve vendore të jenë konkurrentë me prodhimet e tyre, me bizneset e vendeve të Bashkimit Evropian.

Pas fjalëve hapëse, kryeministri Mustafa dhe ministrat e qeverisë së Kosovës kanë bashkëbiseduar me bizneset ku i janë përgjigjur dhjetëra pyetjeve dhe kanë trajtuar detajisht mundësitë e zhvillimit të mëtejmë ekonomik si dhe tejkalimin e sfidave si dhe çështjet tjera të rëndësishme për sektorin privat.

***

Kryeministri Mustafa bashkëbisedon me bizneset, trajtohen detajisht mundësitë e zhvillimit të mëtejmë ekonomik

Prishtinë, 11 shkurt 2017/

Kryeministri i Republikës së Kosovës, Isa Mustafa, mori pjesë në konferencën “Ambienti i Biznesit 2017”, e organizuar në kuadër të aktiviteteve “Ditët e Biznesit të Vogël 2017”, ku ka prezantuar planet e Qeverisë së Republikës së Kosovës drejt zhvillimit të sektorit privat.

Kryeministri Mustafa së bashku me ministrat Hykmete Bajrami, Memli Krasniqi, Avdullah Hoti dhe Valon Murati, kanë shpalosur planet për avancimin e politikave ekonomike dhe punën që po bëhet që ambienti i biznesit të përmirësohet duke iu mundësuar bizneseve vendore të jenë konkurrentë me prodhimet e tyre, me bizneset e vendeve të Bashkimit Evropian.

Pas fjalëve hapëse, kryeministri Mustafa dhe ministrat e Qeverisë së Kosovës kanë bashkëbiseduar me bizneset ku i janë përgjigjur dhjetëra pyetjeve dhe kanë trajtuar detajisht mundësitë e zhvillimit të mëtejmë ekonomik si dhe tejkalimin e sfidave si dhe çështjet tjera të rëndësishme për sektorin privat.

Fjala e plotë e kryeministrit Mustafa.

Ndoshta po e filloj fjalën time në mënyrë pak të pazakontë, por dëshiroj të shpreh mospajtimin tim dhe irritimin tim me të gjithë ata që për arsye të ndryshme ndjejnë kënaqësi duke konstatuar se Kosova është shteti më i pazhvilluar, duke thënë se jemi shtet me papunësinë dhe me varfërinë më të madhe, se jemi shteti me korrupsionin më të madh dhe me arsimin më të keq. Nuk shohin asgjë të bardhë në këtë vend, por nëse i shohim ata veç e veç, gjithë i kanë punët mirë.

Dëshiroj po ashtu të theksoj se ne kemi përqafuar ekonominë e tregut, të bazuar në iniciativën private, por se akoma kemi probleme me pak mendësi socialiste, sidomos në sektorin e punësimit.
Shumica nuk e trajtojnë veten tamam të punësuar, nëse nuk janë të punësuar në sektorin publik, ku pagat janë më të larta, siguria në punë është më e madhe, mundësitë për të mos punësuar janë shumë më të mëdha, edhe mundësitë për të abuzuar janë më të mëdha, ndryshe nga sektori privat ku efektet dhe angazhimi në punë është më i madh, ku të ardhurat nuk rriten jashtë rezultateve të arritura në treg, ku kemi ballafaqime me riskun dhe ballafaqime me konkurrencën, dhe se dallimet në paga në sektorin publik dhe sektorin privat kanë ndikuar negativisht në tregun e punës.

Kur jemi te varfëria, mund të konstatoj se Kosova shumë shpejt do ta kalon pragun ndërkombëtar të varfërisë, dhe do të konsiderohemi si shtet me të ardhura të mesme. Prandaj, qysh në këtë pjesë të parë të vitit, ne presim që sipas kritereve të Bankës Botërore, nuk do të kemi më argumente që ta quajmë veten vend të varfër, por nuk do të kemi po ashtu mundësi që të shfrytëzojmë fondet nga institucionet ndërkombëtare të cilat ndahen për vendet e varfëra. Ambienti në të cilin zhvillohet jeta ekonomike në Kosovë, po ashtu nuk varet vetëm nga masat e politikave makroekonomike të cilat ne i ndërmarrim, por varet edhe nga segmentet e tregut, nga politikat e Bashkimit Evropian dhe më gjerë. Fillimi i implementimit të Marrëveshjes së Stabilizim Asociimit paraqet hap të parë të daljes nga lëvozhga e ekonomisë lokale në një ekonomi e cila operon karshi ekonomive tjera të tregut të Bashkimit Evropian, dhe po ashtu ballafaqohemi me risqe dhe të mirat e kësaj rruge të cilën ne po e ndjekim.

Duhet nënvizuar po ashtu që jemi vendi i fundit i tranzicionit, pra vendi që 10 vite më vonë ka hyrë në tranzicion për shkak të luftës dhe për shkak të okupimit, se akoma nuk kemi përfunduar procesin e privatizimit dhe se shumë prona janë jashtë përdorimit ekonomik, se thënë kështu në gjuhën popullore “për kaçikun tonë”, kemi një shumë të madhe të parave, rreth 1.9 miliardë euro të Fondit të Privatizimit dhe të Trustit të Kursimeve Pensionale, përkatësisht 31 % të GDP-së të cilat qëndrojnë jashtë funksionit ekonomik, ndryshe për masën e këtyre mjeteve zvogëlohet kërkesa agrekate në treg dhe mundësitë që ne ta nxisim prodhimtarinë edhe ekonominë e brendshme, se investimet kapitale dominojnë në fushën e infrastrukturës ku kthimi nga investimet është shumë i ngadalshëm me efekte shumë indirekte, se kemi një bilanc tregtar shumë negativ me pjesëmarrje të madhe të importit sidomos të produkteve të cilat ne mund t’i prodhojmë brenda dhe mund t’i zëvendësojmë, por po ashtu duhet të konstatojmë se të gjitha këto procese janë ato të cilat ne duhet t’i tejkalojmë dhe duhet t’i marrim si objektive.

Po ashtu të konstatoj që ne jemi këtu dhe jemi të gatshëm që t’i bëjmë këto ndryshime. Themi se mund të shënojmë procese shumë të suksesshme, sepse çdo ditë e më tepër bizneset po tregohen të suksesshme dhe ndërmarrësit tanë po tregohen të suksesshëm. Për më tepër mua më gëzon fakti që kemi arritur të krijojmë një koalicion të përbashkët të ndërtimit të politikave ekonomike me biznese që është për tu vlerësuar në mënyrë të veçantë. Prandaj, sot edhe ne bashkërisht mund të krenohemi për rritje të qëndrueshme ekonomike, jo për rritje të cilën e kemi synuar dhe e synojmë, por për një rritje e cila në pikëpamje progresive po tregon rritje, pra edhe në pikëpamje matematikore është një rritje mbi rritje ekonomike.

Duhet të theksojmë se në vitin 2015 dhe 2016 rritja reale ekonomike ka rritur 4 %, duhet po ashtu të nënvizojmë se kjo rritje bazohet në ekonominë private, në bizneset private, pra gjeneron nga biznesi dhe jo nga investimet në sektorin publik, që është hera e parë që kemi këtë ndryshim, dhe se për dallim prej nesh që kemi një rritje mesatare prej 4 %, në vendet në regjion për këto dy vite ka qenë 2.9 %.
Dhe po ashtu më lejoni të vlerësoj se në bazë të trendëve që ne i kemi tani, mund të presim që rritja ekonomike në vitin 2017 të jetë rreth 5 %.

Produktet tona shikuar nga dizajni, nga cilësia, nga mënyra e prezantimit, nuk mbesin fare prapa produkteve të vendeve të BE-së, edhe pse ne nganjëherë dimë të nënçmojmë vetveten dhe prodhimtarinë vendore. Shërbimet tregtare, duke filluar nga infrastruktura, nga objektet tregtare, nga ofrimet e këtyre shërbimeve po ashtu janë konkurruese dhe të krahasueshme me vendet tjera. Infrastruktura rrugore tejkalon atë të disa vendeve fqinje. Roli i autostradës “Ibrahim Rugova” që na lidh me Durrësin dhe me Shqipërinë po rritet dita-ditës, kurse hapja e kësaj autostrade me Serbinë do të krijoj korridore dalëse me vendet e Evropës qendrore dhe të Evropës perëndimore.

Autostrada tjetër për në Shkup po bëhet arterie tepër e rëndësishme e cila do të lidh me Maqedoninë, me Greqinë, me Turqinë dhe vendet tjera aziatike, rekonstruimi i hekurudhës për të cilën kemi siguruar fondet e nevojshme, do të jetë po ashtu një resurs shumë i rëndësishëm i transportit edhe për mallra edhe për udhëtarë.

Të nderuar pjesëmarrës

Gjatë kësaj periudhe ne kemi lidhur shumë marrëveshje për financim për projekte të ndryshme me shumë vende perëndimore, kemi lidhur me Gjermaninë, me Austrinë, me Francën, Zvicrën, Luksemburgun, me Suedinë, kemi përgatitur marrëveshjen me Hungarinë, janë në vijim marrëveshjet me Italinë, kemi arritur të plotësojmë kushtet për të qëndruar në programin e Fondit Monetar Ndërkombëtar, dhe të përfitojmë nga financimi i projekteve nga ky fond, nga Banka Botërore, nga Banka Evropiane për Rindërtim dhe Zhvillim, nga Banka Evropiane për Investime dhe nga Banka Gjermane për Zhvillim.

Me Shtetet e Bashkuara të Amerikës do të ndërtojmë Termocentralin Kosova e Re, një investim prej mbi 1 miliard euro, po realizojmë projektin e veçantë me Korporatën e Sfidave të Mijëvjeçarit, me Shtetet e Bashkuara të Amerikës, dhe përfundimisht, gjitha këto marrëveshje dhe gjithë ky bashkëpunim flet se ne jemi të orientuar për zhvillim ekonomik që na lidh me botën perëndimore, pra orientimi ynë ekonomik është evropian dhe amerikan, politikat tona ekonomike, politika që vlerësojnë tregun dhe kushtet e tregut, por edhe në efekte sociale të tyre.

Për herë të parë kjo qeveri e koalicionit ka një buxhet zhvillimor me një rritje për investime kapitale prej rreth 50 %, në krahasim me vitin që e lam pas. Këto investime në mënyrë direkte apo indirekte do të kenë efekte në angazhimin e bizneseve dhe efekte në punësim. Kritikuesit do të thonë çfarë buxheti është ky, i cili bazohet në huazime, por logjika ekonomike thotë se për sa më tepër investojmë në infrastrukturë publike, në arsim e shëndetësi, si investime produktive, për aq më shpejt do të kemi kthim nga këto investime, do të kemi kushte për rritje më të hershme ekonomike të vendit.

Po ashtu ju keni sprovuar se investimet përmes kreditimit në rrethana stabile ekonomike krijojnë kushte që fitimi në asetet vetanake të jetë më i lartë.
Jemi të interesuar po ashtu që të shpejtojmë procesin e privatizimit dhe unë me këtë rast dëshiroj që të përgëzoj për punën e mirë që po e bënë Bordi i Agjencionit Kosovar të Privatizimit, prandaj ne bashkërisht do të identifikojmë projektet dhe pasuritë për të cilat do të kërkojmë investitorë strategjik, sipas Ligjit mbi Investimet Strategjike i cili tash ka hyrë në fuqi.

Dua të them po ashtu se sektori bankar gjithnjë më tepër po përshtatet për nevoja e kreditimit të bizneseve, veçmas të prodhimit, si në pikëpamje të zbutjes të normave të interesit, në pikëpamje të afateve të kreditimit, dhe në pikëpamje të kushteve të kolateralit.

Edhe risku i moskthimit të kredive tek ne është gjithnjë e në rënie në krahasim me vendet në regjion dhe më gjerë. Ne kemi intensifikuar agjendën e reformave tani po punojmë në pakon e dytë fiskale e cila ka për qëllim që ne të barazojmë kushtet e të bërit biznes për të gjitha bizneset, jo vetëm brenda por edhe me bizneset tjera në pikëpamje të konkurrencës. Rezultatet e këtyre reformave janë të njohura dhe në Raportin e të Bërit Biznes të Bankës Botërore. Ky raport e rendit Kosovën në disa vende më lartë në krahasim me atë që kemi qenë më parë, dhe ne do të vazhdojmë për të lehtësuar kushtet e të bërit biznes.
Mendoj se këto reforma kanë reflektuar edhe numrin e bizneseve që janë hapur gjatë këtyre dy viteve. Janë 10 mijë e 549 biznese të cilat janë regjistruar në vitin 2016. Një numër i rëndësishëm i këtyre bizneseve janë të fushës së bujqësisë, janë të sektorit të prodhimit dhe janë të sektorit të teknologjisë informatike.

Sipas të dhënave të Agjencionit të Regjistrimit të Bizneseve në Kosovë dhe sipas të dhënave krahasuese të vendeve tjera, shihet qartë se rritja e vazhdueshme e numrit të regjistrimit të biznesve duke arritur numrin më të madh në vitin që e lam pas, është më e madhe sesa në vendet në regjion, ndërsa shuarja vullnetare e bizneseve është bindshëm më e vogla. Do të thotë në vitin 2016 janë shuar 2 mijë 379 bizneseve prej 10 mijë e 549, prandaj kemi një rritje neto të bizneseve prej 8 mijë biznese të reja, dhe në qoftë se këtë e shndërrojmë në efekte të punësimit, e shohim që është me rëndësi shumë të madhe.

Mund të konstatoj po ashtu se duke përjetuar një trend normal të krijimit dhe të zhvillimit të biznesve, dhe të shuarjes së tyre, ky trend është pozitiv në raport me vendet fqinje. Gjatë vitit 2016 në Serbi janë shuar 84 % e bizneseve në krahasim me ato që janë regjistruar, në Maqedoni 72 % e bizneseve, në Mal të Zi 63 %, në Kroaci kemi rënie negative, sepse janë shuar 26 për qind më shumë biznese sesa ato që janë regjistruar gjatë vitit, kurse edhe në Slloveni kemi një trend negativ sepse më shumë janë shuar sesa që janë regjistruar për një vit.

Në qoftë se e marrim Gjermaninë si një vend të zhvilluar, kemi shuarjen prej 67 për qind të bizneseve në raport me ato që regjistrohen gjatë vitit.
Investimet e huaja direkte gjatë dy viteve të fundit kanë pas po ashtu performancë relativisht të mirë. Në vitin 2015 investimet e huaja direkte kanë arrit në 360 milionë euro, në vitin 2016 në 220 milionë, që përbëjnë 4.5 % të GDP-së ose pjesëmarrjen në GDP.

Kjo e bënë Kosovën një vend me performancë mesatare për investime të jashtme, jemi më mirë se disa vende, do të thotë më mirë se Bosnja, se Maqedonia, por jemi më keq se Mali i Zi, se Shqipëria dhe ne duhet të bëjmë përpjekje që të përmirësojmë performancën në këtë fushë.
Kemi ngec me liberalizimin e vizave. Unë jam i vetëdijshëm që kjo e dëmton shumë biznesin tek ne, i dëmton shumë qytetarët e Republikës së Kosovës, por po ashtu jam i bindur që deputetët të cilët po kundërshtojnë ta bëjnë këtë, nuk i kanë bërë mirë llogaritë e tyre as llogaritë e vendit të cilin ata e përfaqësojnë.

Është një çështje tjetër të cilën desha ta hap para jush, është problemi i ekonomive në trancizion dhe ballafaqime të tyre me korrupsionin. Me këtë dukur ballafaqohemi edhe ne jemi të shqetësuar për raportet që flasin për korrupsionin tek ne. Në raportin e fundit të Transperency International, raportohet se 65 % e qytetarëve tanë e shohin korrupsionin si problemin kryesor në vend, në anën tjetër qytetarët e Kosovës shprehën se 10 për qind e tyre janë ballafaquar me kërkesa të drejtpërdrejta për mito në shërbime të ndryshme. Në këtë rast shohim se perceptimit realiteti sa i përket korrupsionit nuk janë në harmoni me njëra-tjetrën. Por pa marrë parasysh këtë, si kryeministër i vendit, unë edhe sot ju bëjë ftesë juve, biznesmenëve, mediave, shoqërisë civile, qytetarëve, që të paraqitni çdo kërkesë korruptive e cila eventualisht ju paraqitet nga zyrtarët shtetërore.

Ne korrupsionin duhet ta luftojmë për aq sa ekziston, nuk guxojmë të lejojmë që korrupsioni të jetë pengesë e zhvillimit ekonomik, pengesë e investimeve të huaja dhe pengesë e qytetarëve në institucionet e vendit.
Punësimi si objektiv i yni tjetër mbetet i prioritetit të lartë. Por në punësim po ashtu kemi rezultate të cilat janë të pamohueshme. Brenda dy viteve norma e papunësisë sipas të dhënave statistikore ka rënë prej rreth 35 % në vitin 2014, në rreth 26 % në vitin 2016. Për dy vite ne llogarisim se kemi krijuar 40 mijë vende pune, shumica prej tyre janë vende të reja të punës, megjithatë bindja ime është që papunësia është edhe më e ulët, sesa që figuron, sepse sidomos në sektorin e bujqësisë, sipas anketës të fuqisë punëtore dhe ATK-së, ka vështirësi të identifikohet papunësia reale.

Statistikat zyrtare flasin se ne kemi 10 mijë të punësuar në bujqësi, por vlerësimet e specializuara vlerësojnë se kemi rreth 0 mijë vende të punës në bujqësi por të cilat nuk janë të formalizuara. Në anën tjetër shprehet edhe mungesa e punëtorëve në disa regjione të cilët nevojiten për bujqësi. Aktualisht janë 110 mijë persona që janë të regjistruar si punëkërkues, në zyret e punësimit, dhe ky numër është edhe rezultat i masave të cilat janë marrë nga investimet e jashtme nga bashkatdhetarët tanë dhe nga Ministria e Punës dhe Mirëqenies Sociale në ndërmjetësime në punësim.

Mund të presim që në vitin 2017 të kemi rreth 25 mijë vende të reja të punës, dhe po ashtu jam i bindur që në vitin 2017 ta ulim normën e papunësisë nën shifrën prej 20 për qind.

Të nderuar pjesëmarrës

Tani ne po punojmë në reformën e agjendës evropiane. Kemi mjaft shumë punë për të bërë punë, por këtë punë duhet ta bëjmë bashkërisht.

Kjo reformë ka të bëjë me rritjen e konkurrencës, përkatësisht me rritjen e konkurrueshmërisë së bizneseve tona, ka të bëjë me forcimin e shtetit ligjor dhe luftën kundër korrupsionit dhe ka të bëjë me punësimin dhe lidhjen e drejtpërdrejt të punësimit me arsimin, e cila lidhje akoma po na mungon, sepse ne kemi disproporcion mes tregut të punës dhe asaj që ne prodhojmë përmes arsimit, qoftë publik apo provat.

Unë jam i bindur se kjo agjendë neve na ofron me vendet e Bashkimit Evropian dhe po ashtu jam i bindur se rruga më e mirë drejt Bashkimit Evropian është fuqizimi i sektorit privat, dhe me këtë dëshiroj t’ju uroj sukses në këtë punë dhe t’ju shpreh përkrahjen e plotë të Qeverisë.

Faleminderit.