Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Kosovë: 20 milionë euro letra me vlerë për diasporën

by

Ministria e Financave e Kosovës ka bërë të ditur se gjatë këtij viti do të përfshijë në letrat me vlerë të qeverisë edhe diasporën.Ministri i Financave, Avdullah Hoti, përmes një postimi në rrjetin social Facebook, ka treguar se po finalizohet projektin e ri prej rreth 20 milionë eurosh, të letrave me vlerë për diasporë, që ka një potencial të madh financiar.

“Këto letra me vlerë, do të sigurojnë mjete për qëllime specifike, siç janë subvencionet për bujqësi dhe për ndërmarrje të vogla. Përmes kësaj forme, diaspora mund të kontribuojë në zhvillimin ekonomik të Kosovës dhe, gjithashtu, përfiton një normë interesi, që është më e lartë krahasuar me normën e interesit nga depozitimi i mjeteve në bankat në vendet ku janë diaspora apo në bankat në Kosovë”, ka thënë Hoti.

Ndryshe, sipas regjistrimit të deritashëm të diasporës, janë evidentuar rreth 200 mijë qytetarë të Kosovës të cilët jetojnë në vende të ndryshme të botës. Ky proces i regjistrimit të diasporës është duke vazhduar dhe pritet të përfundojë në vitin 2017.

Dërgesat e emigrantëve kosovarë, që çdo vit hyjnë në Kosovë, sipas të dhënave zyrtare janë rreth 600 milionë euro.

USAID dhe DPT fillojnë programin për përmirësimin e mbledhjes së taksave

by

Ambasada Amerikane ka njoftuar se “një program i ri asistence teknike i sponsorizuar nga USAID dhe Drejtoria e Përgjithshme e Tatimeve (DPT), do të rrisë eficiencën në mbledhjen e taksave në Shqipëri, do të përmirësojë klimën e biznesit dhe do të nxisë një transparencë dhe eficiencë më të madhe”. Programi do të zbatohet nga Korpusi i Vullnetarëve të Shërbimeve Financiare (FSVC) dhe nga Aleanca e Vullnetarëve për Rritjen e Ekonomike (VEGA). I Ngarkuari me Punë i Ambasadës Amerikane, David Muniz, theksoi rolin e rëndësishëm të DPT-së për bizneset: “Është tepër e rëndësishme të nxitet një klimë e ndershme biznesi, duke bërë të sigurt që të gjitha bizneset të funksionojnë sipas, dhe t’u nënshtrohen, të njëjtave rregulla… ‎Për më tepër, rritja e aftësisë së DPT-së për të hetuar subjektet që shmangin detyrime të mëdha tatimore, do të çojë në lehtësimin e barrës për bizneset që zbatojnë ligjin, duke ndihmuar Qeverinë e Shqipërisë t’i përqëndrojë auditimet në bizneset me rrezikshmëri të lartë”, tha ai. Përmes një sërë vizitash afatshkurtra, ekspertë vullnetarë të nivelit të lartë nga SHBA-ja, BE-ja dhe nga vende te tjera, do të punojnë me stafin e DPT-së për të përmirësuar punën në funksionet kryesore. Ekspertët do të përqëndrohen në rritjen e eficiencës së mbledhjes së taksave, në përdorimin e auditimit tatimor bazuar në rrezikshmëri, në përmirësimin e mbledhjes së informacionit për hetimin e mashtrimit tatimor dhe në ndërtimin e kapaciteteve për të siguruar zbatimin e kuadrit ligjor tatimor. Projekti ‎është pjesë e një programi më të gjerë asistence të USAID për 5 vjet, me kosto 4.3 milionë dollarë për forcimin e sektorit financiar në Shqipëri, zbatuar nga FSVC dhe VEGA.{Sh.K}.

Kosovë-Të hyrat buxhetore në janar, rritje 11.4 për qind

by

-Ministri i Financave, Avdullah Hoti: Viti 2016 ka filluar mbarë/

PRISHTINË, 18 Shkurt 2016-B.Jashari/ Në mbledhjen e sotme të qeverisë së Kosovës, ministri i Financave, Avdullah Hoti, informoi për Raportin mbi Përformancen e të Hyrave dhe Shpenzimeve Buxhetore. “Të hyrat e përgjithshme për muajin janar janë rritur për 11.4 për qind, krahasuar me janarin e vitit 2015, që është rreth 12 milionë më shumë”, tha ai.Kjo rritje, vijoi ministri Hoti, ka ardhur si rezultat i rritjes së të hyrave nga taksat kufitare prej 10.3 për qind, kryesisht nga rritja e sasisë së naftës së importuar, ndërsa të hyrat e arkëtuara janë rritur me 7 për qind, dhe shpjegimet nga Departamenti i Politikave Ekonomike tregojnë që kjo është shenjë e aktivitetit të shtuar ekonomik në janar të këtij viti krahasuar me janarin e vitit të kaluar.“Ndërsa, të hyrat tjera jo tatimore, ku hyjnë të hyrat vetanake të nivelit qendror por edhe local, të hyrat nga tantiema dhe nga taksat koncesionare janë rritur në rekord prej 30 për qind, këtë janar krahasuar me janarin e vitit të kaluar”, theksoi ministri i Financave.Tek shpenzimet, tha Hoti, viti ka filluar mbarë, të gjitha projeksionet për shpenzime në paga dhe mëditje, mallra dhe shërbime janë duke shkuar sipas planifikimit.“Ka rritje të shpenzimeve në subvencione dhe transfere që është e pritshme për shkak të implementimit të skemës së pensioneve për veteranët e luftës dhe të përfitimeve për asistencë sociale”, tha ministri i Financave në qeverinë e Kosovës.Ministri i Financave Avdullah Hoti, i shoqëruar nga drejtori i përgjithshëm i Administratës Tatimore të Kosovës Sakip Imeri,  sot ishte edhe në vizitë në Zyrën rajonale të Administratës Tatimore në Gjilan.Edhe gjatë kësaj vizite, ministri Hoti prezanto Raportin mbi Përformancen e të Hyrave dhe Shpenzimeve Buxhetore për muajin janar të këtij viti, ku bëri të ditur se “të hyrat e përgjithshme buxhetore janë rritur me 11.4% krahasuar me janarin e vitit të kaluar, të shtyra kryesisht nga aktiviteti i shtuar ekonomik gjatë këtij muaji”.

Kosovë, në panair prezantohen mbi 500 vende të reja pune

by

– Duke e vlerësuar si shumë të rëndësishëm këtë panair, kryeministri Mustafa shprehu nevojën e zhvillimit të Kosovës/
Prishtinë, 15 shkurt 2016/ Kryeministri i Republikës së Kosovës, Isa Mustafa, mori pjesë sot në hapjen e Panairit të Punës të organizuar nga Ministria e Punës dhe Mirëqenies Sociale, Oda Ekonomike Amerikane në Kosovë dhe Oda Ekonomike Gjermano-Kosovare.
Në këtë panair u prezantuan mbi 500 vende të reja pune.
Pas vizitës së zhvilluar te kompanitë dhe bizneset pjesëmarrëse në panair, kryeministri Mustafa e ka quajtur shumë të vlefshme këtë ngjarje.
“Kemi një numër të konsiderueshëm të bizneseve sot, do të jenë ndërmjet 40-50 biznese nga Kosova dhe llogarisim që ofertat e punës të cilat sot do të bashkërenditen këtu me ata që kërkojnë punë, do të jenë mbi 500 të tilla në fusha të ndryshme, që është një mundësi e veçantë për të rinjtë tanë për punësim brenda. Por, natyrisht kemi edhe shansin e atyre që dëshirojnë që përkohësisht të punësohen jashtë, që të shprehin nevojat dhe kërkesat e tyre”, tha kryeministri Mustafa
Duke e vlerësuar si shumë të rëndësishëm këtë panair, kryeministri Mustafa shprehu nevojën e zhvillimit të Kosovës.
“Kemi nevojë të hapim vende të reja të punës, të bëjmë progres në zhvillimin ekonomik, të kemi një bashkëpunim shumë më të afërt me odat ekonomike të cilat po tregohen shumë aktive dhe shumë të orientuara në këtë proces, dhe të arrijmë që të plotësojmë kërkesat e qytetarëve tanë, sidomos në fushën e zhvillimit ekonomik dhe në hapjen e vendeve të reja të punës”, tha kryeministri Mustafa.
Arian Zeka, drejtor i Odës Ekonomike Amerikane në Kosovës ka ftuar qytetarët që të shfrytëzojnë këtë mundësi nëse janë në kërkim të një vendi të punës.
“E tha edhe kryeministri mjaftë mirë, që ofrohen mbi 500 vende të punës vetëm brenda territorit të Kosovës , dhe një numër tjetër i vendeve të punës, qindra sosh, të cilat ofrohen nëpër shtetet e jashtme. Meqenëse ne gjithmonë e konsiderojmë rininë si njërin prej aseteve kryesore për zhvillimin ekonomik të këtij vendi, atëherë natyrisht që promovojmë punësimin brenda Kosovës. Është një moment i mirë që në përvjetorin e 8 të Pavarësisë së Kosovës të promovojmë edhe mundësi punësimi, edhe mundësi shprese në të njëjtën kohë”, tha Zeka./b.j/

Vëzhgim-Dëmtohet rruga e kombit

by

Nga Ahmet ZANI/
Pas çdo shiu dhe shkarkimesh nga hidrocentrali i Shkopetit, rruga e kombit në afërsi të Skurajve në Milot gërryhet nga prurjet e shumta në Lumin Mat. Vetem në harkun kohor të 1 muajit në të pakten 4 raste është dashur ndërhyrje emergjente për të penguar vërshimin e rrjedhes së lumit në bazamentin e rrugës. Problematike e fundit i përket 1 ditë më parë dhe i referohet shkarkimeve deri në 800 metër kub për sekonde nga hidrocentrali i Shkopetit. Rritja e nivelit të lumit vuri sërish në alarm autoritete. Në të pakten 5 pika të ndryshme u desh ndërhyrja e firmes mirembajtese të rrugës për të penguar vërshimin e ujit dhe duke shmangur gërryerjet e mëtejshme të sajë. Përgjegjesi i punimeve në firmën mirembajtese të rruges Eduart Bardhoci thotë se ndërhyrja ka qenë e shpejtë, por kjo pikë mbetet një problem. Sipas Bardhocit në gati 1 km të rruges së kombit në Skuraj gërryerjet janë të vazhdueshme dhe se situata mbahet nën monitorimin e tyre. “Në rreth 1 km rrugë këtu në afërsi të fshatit Skuraj është krijuar një problematike shumë e madhe. Sa here kemi shkarkime nga hecet e për pasojë rritje të nivelit të lumit këtu ka gërryerje. Kemi nisur një ndërhyrje tjeter prej dy ditesh për shmangur rrezikun, pasi rrjedha e lumit i është afruar trasesë së rrugës. Në ndihmë na kanë ardhur edhe forcat e ushtrisë dhe deri tani kemi hedhur me qindra metërkub gur dhe inerte” u shpreh Eduart Bardhoci Firma Kontraktuese Probleme në rrugen e kombit ka patur edhe në afërsi të Fanit.Përshkak të reshjeve të shiut ka patur rrëshqitje të dheut,ndërsa vazhdon të ketë probleme me rrëshqitjen e gurëve.