11 Shtatori si Kujtese-KOSOVA BASHKË ME AMERIKËN

September 11, 2018 by dgreca

-Kosova, Memorial të përhershëm per viktimat e sulmit terrorist të 11 shtatorit 2001 në SHBA/

-Homazhe në përkujtim të viktimave të sulmit terrorist të 11 shtatorit 2001 në Shtetet e Bashkuara të Amerikës/

-Kryeministri Haradinaj: Vendosja e Memorialit, ndjenjë e përkrahjes së parezervë për familjet e viktimave të 11 shtatorit 2001 në SHBA. Kosova dhe Amerika janë bashkë edhe në këtë ditë dhe do të jenë gjithnjë /

-Ambasadori Amerikan Delawie: Sulmet terroriste të 11 shtatorit 2001 në Nju Jork, Uashington dhe në Pensilvani, terrorizuan gjithë botën dhe populli i Kosovës gjithë kohën ka qenë me ne/

Gazeta DIELLI nga korrespondenti në Kosovë Behlul Jashari

PRISHTINË, 11 Shtator 2018/ Në shenjë nderimi për jetët e humbura të tragjedisë së 11 shtatorit 2001 në Shtetet e Bashkuara të Amerikës, qeveria e Kosovës sot mori vendim për vendosjen e Memorialit të përhershëm në oborrin e qeverisë, për të cilin kryeministri Ramush Haradinaj tha se është e ndjenja e përkrahjes, e lutjeve për familjet e viktimave të 11 shtatorit, por edhe e përkrahjes së parezervë të popullit dhe institucioneve të Kosovës për Amerikën në luftën kundër terrorizmit.

Në mbledhjen e qeverisë së Kosovës të nisur me nderime me një minutë heshtje, kryeministri Haradinaj tha se, pikërisht në ditën e sotme në vitin 2001 kanë ndodhur sulmet terroriste në New York, Pensilvani dhe Uashington, të Shteteve të Bashkuara të Amerikës, dhe në këtë rast janë vrarë shumë njerëz të pafajshëm.

“Shtetet e Bashkuara të Amerikës i kanë prirë botës në shpëtimin e jetëve tona në kohëra të vështira të luftës së Kosovës dhe i kanë mbrojtur popujt e botës dhe këtë e ndjejmë më së shumti dhe më së miri ne, dhe është e kuptueshme ndjenja e përkrahjes, e lutjeve tona për familjet e viktimave të 11 Shtatorit, por edhe e përkrahjes së parezervë të popullit të Kosovës, të institucioneve, për Amerikën në luftën kundër terrorizmit”, tha kryeministri Haradinaj.

Më tej, kryeministri Haradinaj tha se sot janë bërë homazhe e nderim në përkujtim të viktimave nga kabineti qeveritar, kryetari i Kuvendit dhe zyrtarë të tjerë institucionalë të Kosovës, duke shprehur falënderim edhe për ambasadorin e Shteteve të Bashkuara të Amerikës në Kosovë, Greg Delawie dhe kolegët tjerë të Ambasadës Amerikane. Kryeministri Haradinaj tha se Zyra e Kryeministrit në kuadër të përgatitjeve për sot, ka vendosur për ndërtimin e një memoriali të përhershëm kushtuar viktimave të 11 shtatorit, siç tha ai, një memorial i vogël por që do të shprehte respekt dhe në traditën e nderimit do të ishte i përvitshëm nderimi, sipas protokollit shtetëror, i këtyre viktimave të pafajshme, të sulmeve terroriste. “Nga ajo që u pa sot, nga mënyra e nderimit u vërtetua se një memorial simbolik, por i respektueshëm do t’i bënte nder Kosovës, institucioneve të Kosovës, qeverisë së vendit dhe të gjithë liridashësve, dhe do ta shprehte qartë përcaktimin tonë për koalicionin tonë kundër terrorizmit”, tha kryeministri Haradinaj. Po ashtu, sot në kuadër të këtyre aktiviteteve bëhen homazhe dhe ndezën qirinj në përkujtim të viktimave të sulmit terrorist të 11 shtatorit 2001, organizuar nga Zyra e Kryeministrit.Në mëngjesin e ditës së sotme në Prishtinë u bënë homazhe në përkujtim të viktimave të sulmit terrorist të 11 shtatorit 2001 në Shtetet e Bashkuara të Amerikës. “Kosova dhe Amerika janë bashkë edhe në këtë ditë dhe do të jenë gjithnjë. Lutjet tona shkojnë për familjet e viktimave të sulmeve të 11 shtatorit. Falënderoj ambasadorin Delawie për nderin që na bëri sot që të jetë bashkë me ne”, tha kryeministri i Kosovës, Ramush Haradinaj, pasi bëri homazhe. Në ceremoninë e homazheve, të organizuar nga kryeministri, ishin të pranishëm edhe kryetari i Kuvendit Kadri Veseli, ish-presidentja Atifete Jahjaga, ambasadori i SHBA-ve në Kosovë, Greg Delawie, ambasadorë tjerë të akredituar në Kosovë, ministra të kabinetit qeveritar dhe punonjës së Zyrës së Kryeministrit, të cilët nderuan viktimat e sulmit terrorist të 11 shtatorit 2001 në Shtetet e Bashkuar të Amerikës.
Kryetari i Kuvendit, Kadri Veseli, tha se 11 shtatori ka qenë sulm mbi vlerat civilizuese, ka qenë provë për gjithë botën demokratike, për t’iu përgjigjur një fryme, e cila ka qenë çnjerëzore.
“Sot, kaq vjet pas asaj dite të rëndë, Shtetet e Bashkuara të Amerikës dhe bota e civilizuar ka triumfuar. Çdo ditë e më tepër po mbizotëron arsyeja dhe në të njëjtën kohë vlerat demokratike, vlerat tona civilizuese perëndimore nuk ka askush që mund t’i cenojë”, tha kryetari Veseli, duke shtuar se Kosova do të jetë së bashku me Amerikën, sepse Amerika është shpëtimtare e Kosovës dhe do të jemi bashkërisht përjetë.
Ambasadori i SHBA-ve në Kosovë, Greg Delawie, tha se Shtetet e Bashkuara përkujtojnë sulmet e 11 shtatorit dhe me këtë rast falënderojmë Qeverinë dhe popullin e Kosovës për partneritetin dhe mbështetjen në këtë situatë. “Sulmet terroriste të 11 shtatorit 2001 në Nju Jork, Uashington dhe në Pensilvani, terrorizuan gjithë botën dhe populli i Kosovës gjithë kohën ka qenë me ne”, tha ambasadori Delaëie.
Sot në mbrëmje, ora 20:00, para Teatrit Kombëtar në Prishtinë, Kryeministri i Kosovës Ramush Haradinaj merr pjesë në homazhe dhe ndezjen e qirinjve në përkujtim të viktimave të sulmit terrorist në SHBA, të 11 shtatorit 2001.

Përfaqësuesit e Luginës tek THAÇI-Rezolutë për bashkim

September 10, 2018 by dgreca

Përfaqësuesit e Luginës kërkojnë rezolutë për bashkim me Kosovën/

Presidenti i Kosovës, Hashim Thaçi, në konferencë për media me liderët e Luginës së Preshevës/

Presidenti i Kosovës, Hashim Thaçi i ka dhënë edhe njëherë mbështetje, siç ka thënë ai, vullnetit të shprehur të shqiptarëve të Luginës së Preshevës, Medvegjes dhe Bujanocit për t’iu bashkuar Kosovës.

Njëherësh, ai ka mbështetur edhe përfshirjen e përfaqësuesve të këtyre komunave në delegacionin e Kosovës në kuadër të dialogut me Serbinë.

Sipas Thaçit, lënia e këtyre tri komunave brenda territorit të Serbisë, ishte një padrejtësi historike që duhet të korrigjohet. Këto komente, Thaçi i bëri gjatë një konference për media pas një takimi që zhvilloi me përfaqësuesit e tri komunave nga Serbia, Presheva, Medvegja e Bujanoci.

Thaçi tha se në kuadër të dialogut dhe marrëveshjes paqësore me Serbinë, të përfshihet edhe çështja e këtyre tri komunave dhe vullneti i qytetarëve të atjeshëm për t’iu bashkuar Kosovës.

Thaçi ftoi Kuvendin, liderët politik të Kosovës dhe partitë politike që ta mbështesin angazhimin e tij që këto tri komuna t’i bashkohen Kosovës.

“Na duhet unitet në Kosovë. Vet përfaqësuesit e Preshevës, Medvegjes e Bujanocit, kanë propozuar një rezolutë e cila tash do t’i prezantohet kryetarit të Kuvendit, kryeministrit dhe partive politike”, tha Thaçi.

Tani, sipas tij, mbetet që Kuvendi i Kosovës ta shqyrtojë dhe miratojë këtë rezolutë, si mbështetje për aspiratat politike të përfaqësuesve të këtyre komunave për bashkim me Kosovën.

Drafti i rezolutës është prezantuar nga kryetari i komunës së Preshevës, Shqipërim Arifi. Ai tha se rezoluta do t’u dorëzohet të gjithë liderëve politik në Kosovë, nga presidenti deri te kryetarët e partive politike.

Kërkesa kryesore, tha ai, është që Kuvendi i Kosovës ta miratojë këtë kërkesë dhe të miratojë rezolutën për bashkimin e Preshevës, Medvegjes e Bujanocit me Kosovën, duke u thirrur në vullnetin e shprehur të popullatës së atjeshme në referendumin e vitit 1992.

Përfshirja e Luginës së Preshevës në ekipin negociator në fazën finale të dialogut me Serbinë, sipas Arifit, është kërkesë legjitime. Ai tha se me këtë përfshirje do të krijohej një barazpeshë në dialog, ngase në kuadër të delegacionit të Serbisë, përfshihen edhe përfaqësuesit e serbëve të Kosovës.

Kërkesa e komunave Preshevë, Bujanoc e Medvegjë, për bashkim me Kosovën, sipas Shqipërim Arifit nuk ka të bëjë me shkëmbim të territoreve ndërmjet Kosovës e Serbisë, por me korrigjimin e kufirit të Kosovës.Edhe këtë herë, presidenti Thaçi tha se inicimi i korrigjimit të kufirit të Kosovës me përfshirjen e këtyre tri komunave është çështje të cilën ai do ta shtrojë në tavolinën e bisedimeve, por tha se nuk mund të garantojë askush se rezultati do të jetë përfshirja e Luginës në kuadër të territorit të Kosovës.Ndërkaq, Thaçi sërish u shpreh kundër që si kompromis me Serbinë, Kosova të shkëmbej pjesën veriore me këto tri komuna.

Kosovë-Veprimtari për Shën Nënë Terezën dhe Gjergj Kastriotin

September 9, 2018 by dgreca

-Javë veprimtarishë në Festën e Shën Nënë Terezës 2018 dhe të Vitit Mbarëkambëtar të Gjergj Kastriotit-Skënderbeut/

-Në Meshën solemne në Katedrale në kryeqytetin e Kosovës, si dhe në aktivitete tjera, përfshirë promovimin të enjten e 6 Shtatorit të dy librave – për Nënë Terezën dhe Gjergj Kastriotin, ishte i pranishëm edhe veprimtari veteran vatran Dr. Gjon Buçaj, ish-kryetar i Federatës Pan-Shqiptare të Amerikës, VATRA/

Gazeta DIELLI nga korrespondenti në Kosovë Behlul Jashari/PRISHTINË, 9 Shtator 2018/ Kosova kaloi një javë veprimtarishë në Festën e Shën Nënë Terezës 2018 dhe të Vitit Mbarëkambëtar të Gjergj Kastriotit-Skënderbeut.Në 5 Shtator, ditë e mërkurë, në Katedralen Shën Nënë Tereza në Prishtinë, që ishte edhe e 1 vjetorit të shugurimit, u mbajt Mesha solemne, e udhëhequr nga Delegati Apostolik për Kosovë, Monsinjor Juliusz Janusz dhe Ipeshkvi i Kosovës, Imzot Dodë Gjergji.

“Në festën e Shën Nënë Terezës, në 5 shtator 2018, në Katedralen e Shën Nënë Terezës në Prishtinë, për Kishën Katolike në Kosovë ishte gëzim dhe festë e dyfishtë, pasi Delegati Apostolik për Kosovë, Sh. T. Mon. Juliusz Janusz, e solli lajmin e gëzuar që Papa Françesku e ka lartësuar Kishën tonë në Dioqezë të re me emrin Prizren-Prishtinë”, u kumtua me këtë rast.

Në Meshën solemne në Katedrale në kryeqytetin e Kosovës, si dhe në aktivitete tjera, përfshirë promovimin të enjten e 6 Shtatorit të dy librave -për Nënë Terezën dhe Gjergj Kastriotin, ishte i pranishëm edhe veprimtari veteran vatran Dr. Gjon Buçaj, ish-kryetar i Federatës Pan-Shqiptare të Amerikës, VATRA. Të vlerësuar e falënderuar, shqiptarët nga Amerika – Këshilli i Fondacionit për ndërtimin e Katedralës Nënë Tereza në Prishtinë, në Nju Jork dhe rrethinë, kanë kontribuar për mëse 9 vite me 2 milionë dollarë, që janë mbledhur dhe janë dorëzuar.

Ipeshkvia e Kosovës, ka theksuar se sivjet, në mënyrë të veçantë do të kujtojmë 1 vjetorin e shugurimit të Katedrales dhe 90 vjetorin e nisjes së Gonxhe Bojaxhiut – Shën Nënë Terezës për misione në Kalkuta të Indisë.

Ditët e Nënë Terezës 2018 në Kosovë nisën në përvjetorin e ditëlindjes së saj në 26 Gusht të vitit 1910 për t’u përmbyllur në 5 Shtator – në ditën e përvjetorit të kalimit në amshim në vitin 1997, ndërsa kanë vijuar edhe veprimtari tjera në ditët në vijim.

Në ditën e parë vaprimtaria e parë ishte në mesditë në Bibliotekën Kombëtare “Pjetër Bogdani” në Prishtinë, ku u bë promovimi i monografisë “Familjet katolike shqiptare në Shkup” – (dokumente, fotografi, dëshmi I), botues: Instituti i Trashëgimisë Shpirtërore e Kulturore të Shqiptarëve të Shkupit (2018), nga autorët: Skender Asani, Albert Ramaj, Natash Didenko.Me këtë rast, për këtë studim dhe botim folën ministri Pal Lekaj, në emër të kryeministrit të Kosovës, Ramush Haradianj, Skender Asani, Dr. Gjon Berisha, Anton Sereqi, Don Lush Gjergji e pjesëmarrës të tjerë. Pas promovimit u bë hapja e ekspozitës fotografike për periudhën, personalitetet dhe ngjarjet e Shkupit të atëhershëm.Të njëjtën ditë, në mbrëmje, në Shenjtëroren dhe Katedralen “Nëna Tereze” u mbajt Akademia kushtuar Shën Nënës Tereze në 90 vjetorin e nisjes së saj për misione në Indi, si dhe u hap ekspozita nga Fondi i Arkivit Shtetëror të Dubrovnikut lidhur me jetën dhe veprën madhore të Gjergj Kastriotit – Skënderbeut.

Programi ishte një gërshetim i bukur muzikor dhe poetik, me këndim të mrekullueshëm nga Adelina Paloja të këngëve për Nënë Terezën, recitime të shkëlqyera të poezive dhe uratave të Nënës Tereze nga aktorët Beslim Muçaj dhe Lumnie Sopi.Akademinë e përshëndeti Ipeshkvi i Kosovës Imzot Dodë Gjergji. Pjesë e programit ishte edhe kumtesa e Don Lush Gjergjit mbi thirrjen rregulltare dhe misionare të Gonxhe Bojaxhiut. Një fjalë mbajti edhe Gjon Berisha, përgatitësi i ekspozitës, i cili shpalosi rëndësinë e këtij fondi të veçantë për periudhën e Gjergj Kastirotit – Skënderbeut.

Të enjtjen e 6 shtatorit, dy librat që u promovuan në Bibliotekën Kombëtare të Kosovës ishin “Gjergj Kastrioti-Skënderbeu në pullat shqiptare 1913-2017” dhe “Nënë Tereza në pullat shqiptare”, të autorit Hysen Dizdari, koleksionistit të pasionuar dhe njohur të pullave postare shqiptare, vlerësuar në fjalët e rastit edhe nga redaktorja-profesoresha Flutura Xhabija dhe Don Lush Gjergji, në fjalimet e rastit. Në këtë aktivitet promovimi e raste tjera bashkë me Dr. Gjon Buçajn ishin edhe miqtë e tij në Kosovë, mjeku Dr. Sadri Bajraktari dhe piktori Blerim Luzha, të njohur kaherë, shokë shkolle e studimesh…

Dështon takimi Thaçi- Vuçiç

September 7, 2018 by dgreca

– Mogherini pret që Thaçi e Vuçiq të takohen në fund të muajit-

Ka dështuar mbajtja e takimit ndërmjet presidentit të Kosovës, Hashim Thaçi dhe atij të Serbisë, Aleksandar Vuçiq në Bruksel. Shkak i mos mbajtjes së takimit, sipas sqarimit të delegacionit nga Serbia ishte mungesa e lejes nga autoritetet e Kosovës, që presidenti serb Vuçiq, gjatë qëndrimit të planifikuar në Kosovë, të vizitonte edhe Liqenin e Ujmanit.

Në vend të takimit të përbashkët, Përfaqësuesja e Lartë e Bashkimit Evropian, Federica Mogherini ka zhvilluar vetëm takime të ndara me të dy presidentët.

Pas këtyre takimeve, Mogherini ka bërë të ditur se takimi i planifikuar do të shtyhet për në fund të këtij muaji. Ajo ka shprehur bindjen se megjithatë, të dy presidentët do të tregohen të përkushtuar në arritjen e marrëveshjes paqësore dhe ligjërisht të obligueshme.

Ndonëse kishte udhëtuar në Bruksel, Presidenti i Serbisë, Aleksanadar Vuçiq nuk ka pranuar të takojë sot presidentin e Kosovës, Hashim Thaçi. Shefi i Zyrës për Kosovën në Qeverinë e Serbisë, Marko Gjuriq tha se sot nuk do të ketë takim, ndërkaq kur do të mbahet takimi i radhës, ai theksoi se nuk e di këtë gjë.

Sipas tij, Vuçiq ka vendosur kështu për shkak të, siç tha ai, “kërcënimeve, sulmeve, shantazheve, si dhe tentimeve që t’i ndalohet vizita në veri të Kosovës dhe te Liqeni i Ujmanit” nga ana e autoritete të Kosovës. Për më shumë, sipas tij, mbetet pikëpyetje nëse bisedimet do të vazhdojnë fare edhe më tej me Prishtinën.

Gjithashtu, Gjuriq ka theksuar se janë të papranueshme tentimet e që të zhvlerësohen bisedimet në Bruksel dhe tentimet, siç ka thënë ai, që Presheva, Mdvegja dhye Bujanoci, të paraqiten si pjesë e territorit të Kosovës.

“Çështje e vetme e pazgjidhur, territori i vetëm për të cilin bisedohet dhe kontestohet është çështja e territorit të Kosovës. Gjithçka tjetër, nuk shërben për asgje tjetër, përveç që ta shembë gjithë procesin”, ka thënë Gjuriq.

Siç ka theksuar ai, presidenti i Serbisë, do t’i drejtohet opinionit të premten në mbrëmje, ku edhe do ta bëjë të ditur nëse do ta realizojë vizitën në Kosovë, të paralajmëruar më herët.

THAÇI: VIZITA E VUÇIQIT SIPAS ITINERARIT TË LEJUAR

Por, presidenti i Kosovës, Hashim Thaçi tha se në takimin me Përfaqësuesen e Lartë të BE-së, Federica Mogherini është diskutuar për mundësinë e arritjes së përparimeve. Por, dita e sotme, sipas tij, dëshmon se vështirësitë po shtohen kur është në pyetje arritja e marrëveshjes me Serbinë.

“Gjërat po bëhen edhe më të vështira, sepse mospajtimet po thellohen, kurse dallimet po shfaqen, edhe pse sot kemi diskutuar vetëm përmes zonjës Mogherini. Por, këto dallime të mëdha kanë ndikuar që sot dialogu të zhvillohet vetëm përmes Përfaqësueses së Lartë të BE-së”, tha Thaçi.

Ai tha po ashtu se arritja e marrëveshjes mbetet vetëm si një gjasë teorike, por u shpreh i gatshëm për vazhdimin e dialogut.

“Vështirësitë janë të mëdha, pengesat janë të mëdha dhe dallimet janë shumë të thella, por rrugëtimi dhe dialogu për paqe, stabilitetit e fqinjësi të mirë nuk ka alternativë”, tha presidenti i Kosovës.

Ai rikujtoi se konflikti ndërmjet Kosovës dhe Serbisë ka një kohëzgjatje prej një shekulli, kështu që parashikoi proces shumë të vështirë deri te arritja e marrëveshjes paqësore.

I pyetur në lidhje me vendimin e presidentit Vuçiq që sot të mos ketë takim dy palësh me lehtësimin e BE-së, Thaçi tha se nuk e sheh atë si bojkot, por që sot është vendosur që dialogu të zhvillohet përmes takimeve të ndara me Përfaqësuesen, Mogherini.

“Kosova i ka institucionet e veta kredibile. Jemi vend i pavarur e sovran dhe do të respektohet itinerari i lejuar për vizitën e presidentit të Serbisë në territorin e Kosovës. As më pak e as më shumë. Ne respektojmë secilin, nuk dëshirojmë të poshtërojmë askënd, por do të mbrojmë sovranitetin e Kosovës”, tha Thaçi.

GJURIQ: THAÇI PO GËNJEN

Në anën tjetër, Marko Gjuriq ka publikuar një letër të zyrtarëve të Qeverisë së Kosovës ku thuhet se Presidenti Serb Aleksandar Vuciq nuk ka leje për ta vizituar Liqenin e Ujmanit (Gazivodës).

“Ju lutem ta keni parasysh se agjenda e vizitës në Kosovë nuk është aprovuar në tërësi,” thuhet në një e-mail që eshë dërguar nga zyrtarë kosovarë dhe e publikuar në Twitter nga Gjuriq.

“Ne nuk mund t’u përgjigjemi pozitivisht lidhur me vizitën në vendin ku është diga e Gazivodës”.

Gjuriq ka thënë se kjo dëshmi tregon se Presidenti i Kosovës Hashim Thaci është duke gënjyer. “Shihet qartë se Pristina ka ndaluar vizitën në digën e Gazivodës e cila kohëve të fundit është rindërtuar nga shteti i Serbisë.”

Ndërkaq, ministri i Jashtëm i Kosovës, Behgjet Pacolli, i cili po qëndron në Bruksel në kuadër të delegacionit të Kosovës atje, tha se autoritetet e Kosovës e kanë miratuar kërkesën e Vuçiqit. Ndërkaq në lidhje me interesimin e tij për të vizituar liqenin e Ujmanit, Pacolli tha se nuk sheh arsye pse insistohet në këtë vizitë, kur aty nuk ka as banorë as diçka që do të ishte në interes. Nëse me të vërtetë insiston që të shkoj te Ujmani, Pacolli tha se Vuçiq duhet ta artikulojë se përse dëshiron të shkoj atje dhe më pas autoritetet e Kosovës do të vendosin.

Përndryshe, tha Pacolli, Prishtina zyrtare i ka lejuar tashmë Vuçiqit këtë vizitë, duke përjashtuar liqenin e Ujmanit.

Sot, presidentët e Kosovës dhe Serbisë, Hashim Thaçi dhe Aleksandar Vuçiq, po qëndrojnë në Bruksel, ku ishte paraparë të zhvillohet takimi i radhës në kuadër të dialogut të lehtësuar nga Bashkimi Evropian.

Në Bruksel, presidenti i Kosovës, Hashim Thaçi tha para se të shkonte në takim me Përfaqësuesen e Lartë të BE-së Federica Mogherini se procesi definitivisht po hyn në një fazë të re për të arritur deri te një marrëveshje historike të paqes.

***

“Ky proces i dialogut, negociatave paqësore besoj se do të shënojë progres për Kosovën dhe Serbinë dhe stabilitetin në rajon”, theksoi Thaçi, i cili nuk e kishte ende informacionin se takimi ishte anuluar.

“Jam i vetëdijshëm se do të kemi pengesa për të ecur përpara, por jam i bindur se do të kemi përparim. Kjo gjendje e konfliktit të ngrirë është e paqëndrueshme, duhet të ecim përpara drejt paqes përfundimtare, drejt të ardhmes euro-atlantike të Kosovës, por edhe të ardhmes evropiane të Serbisë, që nënkupton më pak hapësira për ideologji jo perëndimore në Ballkan”, tha Thaçi.

“Në fund, definitivisht, ky dialog dhe marrëveshja përfundimtare ka kuptim kur të ndodhë njohja reciproke midis Kosovës dhe Serbisë që nënkupton edhe anëtarësimin e Kosovës në Kombet e Bashkuara”, nënvizoi presidenti i Kosovës.

***

Shtetësia në ‘rrezik’

Ndërkaq, i pyetur në lidhje me insistimin e tij që marrëveshja të përfshijë edhe korrigjimin e kufirit të Kosovës me komunat Preshevë, Bujanoc e Medvegjë, Thaçi tha se “Kosova është unike në favor të dialogut, Qeveria, Kuvendi, partitë politike, shoqëria civile dhe mediat janë në favor të dialogut, marrëveshjes paqësore dhe demarkacionit të kufirit që nënkupton edhe përfshirjen e kësaj pjese”.

Përfaqësuesja e Lartë e Bashkimit Evropian, Federica Mogherini, e cila po lehtëson edhe këtë takim, ka pritur fillimisht ndaras presidentin e Kosovës, Hashim Thaçi, i cili po shoqërohet në Bruksel edhe nga ministri i Jashtëm, Behgjet Pacolli.

Maja Kocijançiq, zëdhënëse e Bashkimit Evropian ka postuar në Twitter pamje nga takimi me delegacionin nga Kosova.

Thaçi ka komentuar shkurt edhe në lidhje me vizitën e pralajmëruar të presidentit të Serbisë, Aleksandar Vuçiq gjatë dy ditëve të ardhshme.

“Institucionet e Kosovës e kanë marrë vendimin e tyre. Unë e respektoj interesim e përfaqësuesve të Serbisë për të diskutuar me serbët e Kosovës dhe shpresoj që mesazhet e tyre do të jenë në funksion të paqes e stabilitetit në Kosovë dhe rajon”, theksoi Thaçi.

***

Mogherini ka pritur në takim edhe presidentin e Serbisë, Aleksanadar Vuçiq. Edhe ky takim, është konfirmuar përmes rrjetit social Twitter, nga Maja Kocijançiq.

Takimi i paraparë në Bruksel, ka zgjuar interesim të shtuar pas hapjes së një debati politik dhe në media rreth mundësisë që në marrëveshjen finale ndërmjet Kosovës dhe Serbisë, të përfshihet edhe çështja e ndryshimit të kufirit.

Po ashtu, takimi i presidentit Thaçi me homologun e tij nga Serbia vjen në kohën kur në Kuvendin e Kosovës kishte dy përpjekje, si nga Qeveria ashtu edhe opozita, për ndërhyrje në procesin e negociatave. Qeveria, provoi të formonte një ekip negociator për këtë proces të bisedimeve, përderisa opozita synonte që me anë të rezolutës të sanksiononte deri diku “lirinë” e presidentit Thaçi që në këtë dialog të hapë edhe çështjen e kufirit.

Në anën tjetër, presidenti i Serbisë, Aleksandar Vuçiq kishte paralajmëruar, se pas këtij takimi të shtunën dhe të dielën do të qëndronte për një vizitë në Kosovë, për të realizuar takime me përfaqësuesit e serbëve të Kosovës dhe banorët serb nga Kosova.

Dialogu ndërmjet Kosoëvs dhe Serbisë me lehtësimin e Bashkimit Evropian ka nisur që nga viti 2011, dhe ka për qëllim normalizimin e raporteve midis dy shteteve.(Kortezi RFL)

NJE FOTO HISTORIKE E AMBASADES AMERIKANE

September 6, 2018 by dgreca

1 Regan Nene Tereza

Presidenti Ronald Regan dhe Nënë Tereza në vitin 1986/

Ambasada e Amerikës në Tiranë ka zgjedhur sot një fotografi të veçantë, si foto të ditës.

Ambasada përmes një fotografia ka kujtuar 13 qershorin e vitit 1986. Në këtë fotografi shihet ish-Presidenti i Kombeve të Bashkuara të Amerikës, Ronald Regan duke qeshur së bashku me Nënë Terezën dhe Motrën Frederik, ndërsa të tre takohen në Shtëpinë e Bardhë.

Nënë Tereza u dekorua me Medaljen e Lirisë nga Presidenti Regan dhe mori titullin qytetare nderi amerikane nga Presidenti Klinton në vitin 1996(KultPlus)