YLBER DAUTI, NË ELITËN E AVOKATËVE AMERIKANË

June 3, 2017 by dgreca

* AVOKATI SHQIPTAR ËSHTË PËRZGJEDHUR NDËR 100 AVOKATËT MË TË SUKSESSHËM NË SHBA/

* DY NGA FITORET MË TË FUNDIT TË BETEJËS LIGJORE:PËRBALLJA ME QEVERINË AMERIKANE …DHE…SHPËTOI BIZNESMENIN SHQIPTAR NGA HUMBJA E 30 MILIONË DOLLARËVE…/

* AVOKATI DAUTI, I PREFERUAR NGA MEDIAT AMERIKANE, PORTALET PËR OPINIONE, PARASHIKIME, INTERVISTA, RRETH ÇËSHTJEVE TË BUJSHME, MADJE DHE CESHTJEVE”TRUMP”….POR EDHE SI LIGJËRUES NË UNIVERSITETET TE NDRYSHME BOTËRORE PËR TË DHËNË LEKSIONE…

NGA DALIP GRECA/

Avokati shqiptar Ylber Dauti, vazhdon të jetë një model i veçantë për aspiratat e të rinjëve nga e gjithë Bota, që vijnë në Amerikë plot ëndrra. Në 14 vite karrierë ai është ngjitur lart si yll, që shkëlqen, duke u radhitur në elitën e avokatëve amerikanë. Ai është i pari avokat shqiptar në Amerikë që është anëtar i përjetshëm i MULTI- MILLION DOLLAR ADVOCATES FORUM”. Këtë vit avokati Dauti është përzgjedhur në “TOP 100 TRIAL LAWYERS IN AMERICA”. Zyra e tij ligjjore ka regjistruar më shumë se 10 çështje milionëshe të fituara, – më e larta 8,2 Milionë dollarë, e më e ulta 1,2 milionë dollarë….

2017, I FTUAR NGA UNIVERSITET NË HOLLANDË, JAPONI, SHBA dhe KOLUMBI

Nuk është aq e lehtë që ta gjesh një moment të lirë avokatin Ylber Dauti, qoftë edhe për ta intervistuar. Krahas ngarkesës me çështjet gjyqësore që ndjek, ai është i angazhuar edhe si leksiondhënës nëpër universitete të Europës, Azisë dhe Amerikës, dhe jo rrallë, i zënë me median, që kërkojnë opinione e intervista prej tij. Pyetjet për këtë shkrim”u gatuan” që në prill, por avokati ishte larg që këndej, dhe përgjigjet u vonuan pak. Ai ishte i ftuar nga Universiteti i Tilburgut, per te tretin vit radhazi, për të dhënë leksione për studentët e Fakultetit të Drejtësisë, Dega Master në Ligjet Ndërkombëtare të Biznesit. Lënda, ku i kërkohet kontribut avokati titullohet “Negociata Ligjore” (Legal Negotiations). Fokusi i leksioneve që avokat Dauti u përcjell studentëve përqëndrohet kryesisht në negociatat ndërkombëtare në përgjithësi dhe ato të biznesit në veçanti.

Pas kthimit, ai tregon se ishte një përvojë intersante; grupi i studentëve ishte i larmishëm dhe shumë të intersuar për të çështjet që referoheshin. 100 studentët, të cilëve u përcolli ligjërata, vinin nga 50 vende të ndryshme të Botës dhe sillni kultura të larmishme.

Avokati ndjehet mirë nga kontakti me grupe te tillë divergjente, pasi negociatat ndërkombëtare kanë të bëjnë jo vetëm me aspektet ligjore dhe tregtare por edhe me personalitetet, zakonet dhe traditat kulturore të atyre që negociojnë…dhe duke qenë se stundentët vijnë nga shumë vende të ndryshme me zakone, tradita dhe kultura të ndryshme- kjo i bën diskutimet dhe debatet në klasë shumë më interesante.

Muajin që vjen (Qeshor 2017), avokati është i ftuar që të japë leksione për 10 ditë në Kyushu University në Japoni. Është viti i dytë radhazi që ftohet për të dhënë leksione nga ky Universitet. Fokusi i leksioneve që do të përcjell në këtë universitet janë Negociatat dhe Gjyqet Ndërkombëtare. Edhe ky, tregon avokati është një grup i larmishëm studentësh, mes të cilëve ka qenë dhe herë tjetër. Studentët janë kryesisht Japonezë, por ka ndër ta pothuajse nga të gjitha shtetet aziatike, madje edhe nga disa vende arabe e afrikane.

Ndërsa në fund të muajit Qershor, ai është i ftuar për të dhënë një ligjëratë para një grupi studentësh nga mbi 100 vende të botës, në Lehigh University, këtu në Amerikë dhe në muajin Korrik është i ftuar për të dhënë leksione në Bogota, Kolumbi në Universidad Externado de Colombia.

PËRBALLË QEVERISË AMERIKANE

I propozoj avokatit: Le të kthehemi tek Zyra juaj juridike”DAUTI LAË FIRM,P.C”, që ndodhet në një nga zonat më të lakmuara të Manhattanit, në Wall Street(45 Broadway). Jemi mësuar që të përcjellim rekorde të kësaj zyre juridike, ku klientët tuaj kanë siguruar shuma milionëshe. Kemi ndonjë rekord të ri apo ndonjë çështje interesante për ta ndarë me lexuesit tanë?

Përgjigja e avokatit vonohet pak:- Asnjëherë nuk më ka pëlqyer të diskutoj shifra, por fatkeqësisht në profesionin tim suksesi shpesh matet me shifra dhe kjo nuk është e drejtë por unë nuk do futem në një analizë filozofike rreth kësaj dukurie. Përsa u përket shifrave do të veçoja 3 çështje që janë mbyllur gjatë vitit të fundit për shuma milioneshe/ disamilionëshe. Njëra nga këto çështje ishte disi e veçante pasi padia ishte kundër qeverisë Amerikane dhe unë përfaqësoja një klient shqiptar. Ishte një betejë e gjatë dhe e vështirë ligjore. Por në fund arrita që ta kënaq klientin tim shqiptar. Shuma përfundimtare e dëmshpërblimit që qeveria Amerikane ra dakord që të paguaj në prag të Gjyqit, ishte shuma e dytë më e lartë që ata kanë paguar ndonjëherë në shtetin e Nju-Jork-ut për një çështje gjyqësore të rregulluar nga Federal Tort Claims Act (Ligji për Paditë e Dëmshpërblimit Civil kundra Qeverisë Amerikane).

Për ta bërë më të kuptushme për lexuesin këtë çështje ligjore, që tingëllon disi ndryshe, i kërkova avokatit, që të sillte më shumë spjegime, detaje, si funksionojnë këto çështje dhe sa të vështira janë këto përballje ligjore?

Avokati spjegoi se këto çështje janë disi unike pasi gjyqi bëhet me një gjykatës dhe jo me Juri. Veç kësaj duhet të pëballesh me Departamentin e Drejtësisë së Amerikës dhe jo me një zyrë avokatie. Në çeshtjen në diskutim, gjërat u komplikuan edhe më tepër pasi në prag të gjyqit, u arrit marrëvëshja në një kohë jo të zakontë. Marrëveshja u arrit me Administratën e Presidentit Obama, por per shkak te shumes se madhe te demshperblimit, kerkohej qe marreveshja te miratohej nga disa hallka te burokracise shteterore amerikane perfshire ketu edhe Attorney General (Ministren e Drejtesise se SHBA). Edhe pse marreveshja ishte arritur ne parim, ish-ministrja e Drejtësisë (Loreta Lynch), për fat të keq, nuk arriti të firmoste dokumentat para se ti mbaronte mandati më 20 Janar, 2017. Kështu që procesi gjyqësor duhej të vazhdonte në rast se Administrata e Trumpit nuk do biente në dakortësi me marrëveshjen që kishim arritur ne parim por jo zyrtarizuar me Administratën e Obamës. Klienti ishte shumë i kënqur me marrvëshjen që e kishte bërë atë milioner por çeku nuk po vinte, tregon avokati dhe shton se e kishte të vështirë t’i spjegonte klientit situatën e paprecedentë që sillnin rrethanat e ndryshimit të administratës, pasi gjithçka mund të përmbysej në rast se Administrata e Trumpit nuk binte në dakortsi të firmoste marrëveshjen e arritur me Adminsitratën e Obamës. Nga njëra anë ishte Klienti, që priste me padurim Çekun, pasi me të drejtë e konsideronte çështjen të mbyllur dhe ndoshta kishte bërë plane si ta jetonte jetën si milioner. Kurse nga ana tjetër, avokati Dauti, po merrej me avokatët e shtetit Amerikan, që i thoshin se marrëveshja ishte vërtetë në rrezik të mos aprovohej nga Administrata e re pasi shuma e dëmshpërblimit ishte shumë e lartë dhe e paprecedent për një çështje të kësaj natyre. Në fund të fundit, filozofia e Trumpit ishte të rinegocohet gjithçka. Pas shumë peripecish, më në fund marrëveshja u miratua nga Attorney General (Ministrja e Drejtësisë) Sally Yates gjatë ditës së 30 Janar 2017.

Por edhe këtu, ishim më fat, thotë avokati. Rastësitë nuk kanë fund:Si për koincidencë, Paradite u firmos marrëveshja, ndërsa Ministrja e Drejtësisë, në mbrëmjen e 30 Janarit, u shkarkua nga Presidenti Trump!

Natyrisht, që shkarkimi i saj nuk kishte fare të bënte me çështjen e klientit shqiptar dhe avokatit Dauti, por ai,e përmend këtë rastësi, si tregues të mrekullise dhe ironisë së fatit.

SHQIPTARËT E AMERIKËS DHE “DAUTI LAW FIRM,P.C”

Është një pyetje që më pëlqen t’ua përsëris avokatëve shqiptarë: Si janë raportet mes zyrës tuaj dhe shqiptarëve. Sa të pranishëm janë çështjet e tyre ligjore në zyrën tuaj?

Avokati më tregon se ndjehet i kënaqur që vazhdon të përfaqësojë shqiptarët në çështje të ndryshme ligjore. Në dy nga tre çështjet multimilion dollarëshe që zyra e tij ka arritur të fitojë kohët e fundit, klientet ishin shqiptar. Para pak kohësh avokati ka përfaqesuar edhe një biznesmen shqiptar, i cili po përballej me një padi 30 milion dollarëshe dhe kompania e tij e sigurimeve mbulonte vetëm për shumën 1 milionë dollarë. Avokatët e tij Amerikanë e kishin njoftuar se pasuria e tij personale dhe familjare, që ai e kishte ndërtuar me shumë mund dhe djersë, ishte në rrezik të vërtetë dhe se ai do të duhej të paguante një shumë të madhe parash nga xhepi i tij për të mbyllur këtë padi. Biznesmeni shkoi tek zyra e Avokatit Dauti për ndihmë. Avokati, iu fut betejës ligjore, siç di ai, me profesionalizëm dhe me përkushtim. Pas një Odiseje të gjatë, që kërkoi shumë mund, arriti që ta mbyllte me sukses çështjen dhe biznesmeni shqiptar u çlirua nga pesha e madhe e humbjes. Ai nuk pagoi asgjë nga xhepi i tij.

E pyes avokatin: Cila ka qenë çështja gjyqsore më e vështirë e kohëve të fundit?

Ai tregon se më e vështira mbetet çështja e Norës nga Kosova. “Vështirësia buronte jo vetëm nga fakti se çështje ishte vërtet komplekse dhe se avokatët e saj të mëparshëm e kishin vështirësuar edhe më tepër me mënyrën e tyre të mbrojtjes – por sepse pasojat e humbjes do të ishin vërtet të dhimbshme për Norën për shkak të kushteve në të cilat ajo jetonte. Dhe në rast dështimi, jam i sigurtë që brengosja e humbjes do të qendronte me mua për shumë e shumë kohë pasi Nora do të vazhdonte të jetonte e zhytur në mjerim të vërtetë. Unë vërtet trishtohesha kur e imagjinoja. Jam shumë i lehtësuar që ajo çështje u mbyll me sukses dhe si pasojë kushtet e jetesës së Norës janë përmirësuar dramatikisht”, thotë Dauti.

Një pyetje për dyfishtë për avokatin: Si ndjeheni kur fitoni një betejë ligjore në favor të klientit, dhe e kundërta, si ndjeheni gjatë një beteje të humbur?

Edhe përgjigja ka dy anë: Natyrisht ndjehem i gëzuar dhe mbi të gjitha i çliruar, kur fitoj. Puna e avokatit është të merret me hallet dhe problemet e të tjerëve. Kur je avokat i dikujt, problemi i tyre bëhet edhe i yti. Si avokat, ku arrin të zgjidhësh problemin e klientit ndjehesh jo vetëm i gëzuar, por edhe i çliruar psikologjikisht pasi ke justifikuar besimin e klientit dhe nuk ke nevojë të jetosh më me hallin e tyre.

Kur e humb betejën? E kundërta ndodh kur humb, pergjigjet avokati. Ndjehesh i mërzitur dhe tepër i rënduar. Rëndohesh nga fakti se fillon të mendosh po sikur të kisha ndjek një strategji tjetër? Ndoshta rezultati do të ishte ndryshe. Futesh në një analizë pa fund për të gjetur shkakun e humbjes dhe fillon ta rijetosh çdo detaj të çështjes përsëri….ndryshimi më i madh mes fitores dhe humbjes është se humbjen nuk e harron dot dhe ndoshta për këtë arsye njeriu mëson shumë më tepër nga humbja sesa nga fitorja. Unë kam humbur vetëm gjyqin e parë të nisjes së karrierës time. Ajo ka qenë humbja e vetme deri tani në jetën time dhe, akoma mbaj mend çdo detaj të atij gjyqi të largët që i takon një kohë para 14 vitesh, por unë kam harruar shumë detaje nga çështjet që kam fituar qoftë edhe vitin e kaluar.

Sa mbeten miq me avokatin klientët?-, është pyetja tjetër që i drejtoj avokatit.

Përgjigja e tij: Shumë nga klientët më shkruajnë dhe më urojnë për festat e ndryshme dhe unë bëj të njëjtën gjë. Disa më dërgojnë kartolina dhe mesazhe felenderimi dhe mirënjohje edhe pse çështja e tyre është mbyllur vite më parë. Madje, Nora, klientja për të cilën folëm më sipër, vazhdimisht më shkruan mesazhe që mbarojnë me fjalët “të kam vëlla dhe kurrë nuk harroj çfarë ke ba për mua.” Një kliente tjetër, amerikane, më shkruan çdo vit një kartolinë ku më falenderon dhe shpreh mirënjohje se si mbyllja e çështjes me sukses i ka dhënë asaj një shans të dytë në jetë…

DAUTI, NJË OPINIONIST I PREFERUAR PËR GAZETAT, REVISTAT, PORTALET

Shpesh, avokatit Dauti i kërkohen opinione, parashikime, vlerësime për çështje të bujshme që zënë faqet e para të medias.Për çështjen shumë të përfolur të marrdhënieve të Ish Shefit të FBI, James Comey me presidentin Donald Trump, me 12 Maj 2017, Revista Hollywood Life, e intervistoi avokatin Ylber Dauti, lidhur me me ligjshmërinë e veprimeve dhe insinuatave të Presidentit Trump pasi ai kishte regjistruar bisedat telefonike me Drejtorin e FBI, James Comey, si dhe lidhur me mundësinë e fillimit, nga Kongresi, të procesit të shkarkimit të Presidentit. Opinioni i avokatit është botuar nga revista në portalin e saj online Hollywoodlife.com.

I kërkova avokatit, që të spjegonte për lexuesit thelbin e opinionit që i dha shtypit Amerikan lidhur me këtë çështje, që ënde është e dnjeshme dhe shumë delikate.

Përgjigja e tij: Siç dihet, Presidenti Trump shkarkoi Drejtorin e FBI. Ligji ia njeh këtë të drejtë Presidentit. Por ky shkarkim bëri shumë bujë pasi shefi i FBI, James Comey, po hetonte disa prej bashkëpunëtorve më të ngushtë të Trumpit. Arsyeja e këtij hetimi është dyshimi se disa nga këta individë, gjatë fushatës elektorale, kanë bashkëpunuar me agjentë dhe përfaqësues të qeverisë Ruse me qëllim që të sabotojnë fushatën e Hillary Clinton dhe të ndihmojnë Donald Trump të zgjidhet president. Shumë njerëz e akuzuan Trumpin se arsyeja e shkarkimit ishte frika që Trump kishte nga ky hetim. Presidenti Trump iu kundërpërgjigj akuzave me pretendimin se ai nuk kishte frikë nga ky hetim sepse vetë shefi i FBI e kishte garantuar Trumpin se ai nuk po hetohej. Në të njëjtën kohë Presidenti Trump bëri disa deklarata, që u intepretuan si kërcënime indirekte ndaj shefit të shkarkuar të FBI- së, në rast se ky i fundit do të mohonte pretendimet e Trumpit, atëherë Trumpi mund të publikonte kaseta, që do provonin se ai po tregonte të vërtetën dhe Comey po gënjente.

Këto deklarata të Trumpit lidhur me mundësinë e egzistencës së kasetave shërbyen si benzinë për gazin që ishte ndezur që nga momenti që Comey u shkarkua. Shtypi u vërsul të merrte opinionin e juristëve se nëse kaseta të tilla vërtet ekzistonin, ateherë a ishin të ligjshme këto regjistrime që Trumpi kishte bërë? Si dhe cilat ishin shanset që Kongresi të niste procesin e shkarkimit të Trumpit?

Shkurtimisht, opininoni që avokati Ylber Dauti i dha gazetares së Hollywood Life ishte se është e ligjshme për Trump të regjistrojë bisedën telefonike me shefin e FBI nga Shtëpia e Bardhë ose nga shtëpia e Trumpit në Manhattan – pasi si Washingtoni edhe Nju-Jork-u e konsiderojnë të ligjshëm regjistrimin e bisedës telefonike nga njëra palë edhe pse pala tjetër nuk është në dijeni të faktit se po i regjistrohet biseda. Por në rast se Trumpi,i ka regjistruar bisedat nga shtëpia e tij në Florida, atëherë regjistrimi është i paligjshëm pasi shteti i Floridës kërkon që të dyja palët të jenë në dijeni të faktit se biseda po regjistrohet, përndryshe regjistrimi konsiderohet i paligjshëm.Ndërsa për pyetjen: Nëse egziston mundësia e nisjes së procedurave nga Kongresi për shkarkimin e Presidentit Trump, avokati Dauti i tha gazetares se ai mendon se shanset nuk janë aspak realiste në këto momente. Vetëm në qofte se do të zbulohet evidence e vërtetë që Trumpi ka bashkëpunuar me Rusët për tu zgjedhur president ose ka evidencë se Trumpi shkarkoi shefin e FBI për të sabotuar hetimin FBI po i bënte Shtëpisë së Bardhë – atëherë ekziston mundësia e hapjes, nga Kongresi, të procesit për shkarkimin e Presidentit Trump. Këshilla e avokatit Dauti është kjo: Njerëzit duhet të jenë realistë, se për sa kohë Republikanët në Kongresin dhe Senatin Amerikan i qëndrojnë besnik Trumpit atëherë shanset për shkarkimin e Trumpit janë zero pasi Kongresi dhe Senati kontrollohen nga Republikanët dhe pa votat e një numri të konsiderueshëm kongresmenësh dhe senatorësh republikanë është e pamundur të shakarkohet Presidenti Trump edhe sikur të gjithë kongresistët dhe senatorët demokratë të votojnë për shkarkimin e tij.

Avokati Dauti është intervistuar nga kjo revistë edhe më parë,ku i është kërkuar të jepte opinione dhe të bënte parashikime për çështje që janë pasqyruar gjërësisht në shtypin Amerikan dhe ndërkombëtar. Kështu psh ishte rasti gjatë Lojrave Olimpike në Brazil, ku notari olimpik Amerikan me fame boterore Ryan Lochte dhe 3 pjestarët e tjerë të skuadrës u përfshinë në incidentin e natës së 14 gushtit 2016.

E pyes avokatin:- Sa i qëndroi kohës interpretimi dhe parashikimi juaj – se atletët olimpik Amerikan do të përballen vetëm me akuzën e “kallzimit të rreme te një krimi dhe nuk do të akuzoheshin për kryerjen e ndonjë krimi tjetër.”?

Përgjigja: Parashikimi u bë realitet pas një jave. Unë u intervistova me 18 Gusht dhe me datën 25 Gusht autoritetet Braziliane zyrtarisht shpallën aktakuzën e “kallzimit te rreme të një krimi” ndaj Lochte dhe shokëve të tij.

Një pyetje tjetër për një tjetër intervistë që ai ka dhënë për mediat amerikane dhe aziatike:- Avokat, i qëndroni ende mendimit që keni dhënë për portalin Chinatimes.com lidhur me çështjen e pasagjerit që u tërhoq zvarrë dhe u dëbua forcërisht nga avioni i kompanisë United Airlines? Ju jeni cituar të keni thënë se e kaluara e tij nuk duhet të ketë ndikim në procesin gjyqësor dhe të drejtën e tij për tu kompensuar. Madje ju keni parashikuar se kompania ajrore “United” nuk do ta çonte çështjen në gjyq por të dyja palët do të arrinin një marrëveshje me pajtim.

Përgjigja e avokatit:-E vërteta është se parashikimi im tashmë është vërtetuar. United Airlines ra në dakortësi ta zgjidhë çështjen me pajtim dhe pa proces gjyqesor. Unë u intervistova, 2-3 ditë pas incidentit, që u pasqyrua gjërësisht nga mediat amerikane dhe ato të huaja, sidomos ato aziatike për shkak të origjinës etnike të pasagjerit, David Dao. Në atë kohë disa gazeta dhe portale kishin filluar të përhapnin informacione për të kaluarën kriminale të pasagjerit që ishte tërheqë zvarrë nga avioni dhe njerëzit po hidhnin baltë mbi të kaluarën e tij, që padrejtësisht dhe barbarisht, ishte dëbuar nga avioni edhe pse kishte paguar biletën dhe nuk kishte thyer asnjë rregull. Unë isha i sigurtë që kjo mund të ishte një strategji për të frikësuar pasagjerin që të pranonte një shumë sa më të vogël dëmshpërblimi dhe se pavarësisht se ai ishte dënuar më parë – një fakt i tillë nuk do të influenconte mendimin e jurisë në gjyq pasi videoregjistrimi pasqyronte një skenë barabare dhe të pa tolerushme për shoqërinë moderne amerikane. Prandaj pavarësisht prej presionit dhe zhurmës, kompania ajrore United Airlines gjithësesi ra dakort ti ofroji atij një shumë të madhe parash dhe ta mbyllë çështjen pa gjyq. Unë isha i sigurtë që një gjë e tillë do të ndodhte pasi sa më gjatë që çështja të vazhdonte të ekzistonte, aq më shumë do të diskutohej në publik për të dhe aq më i madh do ishte dëmi që do vuante United Airlines për shkak të publicitetit të keq. Siç e kemi parë të gjithë në televizor, videoklipi i pasagjerit duke u tërhequr zvarrë nga avioni ishte tepër i shëmtur për tu shfaqur para jurisë dhe jam i sigurtë se do ta emociononte dhe nxiste jurinë që ta ndëshkonte United Airlines shumë rëndë. Prandaj, më vjen mirë që parashikimi im i bërë në Muajin Prill – 2017, dhe i pasqyruar gjërësisht në gazetat,portalet amerikane, kineze dhe vietnameze – u bë realitet në muajin Maj, pra brenda një muaji.

New York, Maj 2017

Elbasan: Tre shtëpi të zotit – fqinjet e mirëkuptimit fetar

June 3, 2017 by dgreca

NGA LINDITA ARAPI*/

Shqipëria ka shumë probleme, por një gjë e kanë arritur mjeshtërisht shqiptarët: Respektin për fenë tjetër, pranimin si pjesë e mozaikut kulturor. Elbasani është shembulli i tolerancës, por a mund të rrezikohet sot ajo?

Elbasan

Kur Gëzim Karaj, imami i Xhamisë Mbret në Elbasan gjatë rrugës për në shtëpi sheh At Nikolla Markun, priftin e kishës ortodokse në lagjen Kala, ai ndal makinën, e merr me vete priftin e lodhur nga mosha e sëmundja dhe vazhdon rrugën. „Kjo është normale për ne, jetojmë në një lagje. Ne diskutojmë me dëshirë me njëri-tjetrin, sigurisht që kemi mënyrën tonë si besojmë në zot, por kjo nuk ka pse na ndalon që të kemi marrëdhënie të mira ndërnjerëzore.”

Kisha e Shën Mërisë, e ku At Nikolla mban meshën e tij, dhe xhamia, ku predikon imami janë vetëm pak metra larg njëra-tjetrës në lagjen Kala. Kisha ortodokse, një nga objektet e kultit më të vizituara në Shqipëri, kisha e vjetër katolike, si edhe xhamia Mbret e ndërtuar nga fundi i shekullit të XV dokumentojnë historinë e Shqipërisë, ku u ndeshën Perëndimi dhe Lindja. Nga pergola e kishës ortodokse mund të shohësh edhe muret e kishës së vjetër katolike me rite bizantine. Për vite me radhë këtu mbajti meshën Josif Papamihali, nga Papa i shpallur para një viti si martir i kishës katolike.

Religion in Albanien, Elbasan (DW/Lindita Arapi)

At Nikolla Marku

Harmonia fetare – Eksporti më i mirë shqiptar

Ish-drejtori i Komitetit të Kulteve dhe njohës i fesë, aktualisht aktiv në fushën e bamirësisë, Ilir Hoxholli thotë se Elbasani është një model i shkëlqyer i tolerancës fetare. “Nuk është e pazakontë të shohësh në Elbasan një prift katolik, një imam apo një prift ortodoks tek pinë bashkë kafe në lokalet e kalasë”, thotë ai. Kjo afri mes feve në Shqipëri “është eksporti më i mirë që ka vendi për të ofruar”, thotë ai. Madje edhe politika shqiptare mund të marrë një shembull nga mirëkuptimi mes feve.

Tradita e tolerancës

Tre shtëpi të zotit jetojnë si fqinje të mira pranë njëra-tjetrës në kalanë e Elbasanit, muret e së cilës të ndërtuara nga romakët, të shkatërruara në shekuj u rindërtuan sërish nga osmanët. Banorët e qytetit ecin të qetë përpara tyre, me natyrshmërinë e atyre njerëzve që diversitetin e shohin si pjesë normale të jetës. Jo larg shtëpive të zotit ka kaluar edhe e famshmja “Via Egnatia”, që lidhte Romën me Bizantin. Në këtë qytet kanë kaluar nëpër histori popuj, kultura, e fe të ndryshme, që kanë lënë gjurmët e tyre dhe mendësinë e multikulturalitetit.

Lagjja Kala

At Nikolla Marku qëndron ulur në bordurën e bardhë nën gjethet e rrushit. Besimtarë hyjnë në kishë, qëndrojnë pak e presin të përshëndesin priftin e sëmurë. Por edhe miqtë myslimanë më pyesin, thotë ai. “Kjo harmoni, ky përqafim i feve është një dhuratë për ne. Por ne nuk bëjmë gjë tjetër, veçse vazhdojmë traditën e të parëve tanë. Unë jam rritur me rrëfenjat e një besimi të thejshtë, të qartë, të pastër.” Sëmundja ka lënë gjurmë tek At Nikolla Marku, të cilit i dridhet zëri kur flet, por kur kujton njërën nga momentet më të bukura të jetës së tij si prift, ai ndryshon. “Kur ra komunizmi e duhej të hapeshin shtëpitë e besimit, njerëzit në Elbasan nuk shkuan veçmas në kishë apo xhami, por të gjithë së bashku i hapën kishën dhe xhaminë. A nuk është mrekulli kjo?”

Kjo harmoni fetare nuk është e re në Elbasan, ajo vjen si traditë nga historia e këtij qyteti. Përgjegjësi për mediat i bashkisë së Elbasanit dhe kreu i Unionit të Gazetarëve të Qarkut, Besim Dybeli thotë se „kjo tolerancë qëndron në rrënjët e Elbasanit, një qytet fillimisht i fesë greko-ortodokse, pastaj iu shtua edhe feja myslimane. Këtë e tregojnë edhe emrat sot. Disa ende kanë emrin ortodoks dhe mbiemrin mysliman. Kjo bashkëjetesëi fetare ka ardhur nga historia e përbashkët. Ne e kemi parë veten njëherë si shqiptarë, pastaj si myslimanë apo të krishterë”, thotë ai.

Imami Gezim Karaj

Nga bashkëjetesa në dialog

Këtë bashkëjetesë pozitive mes katër feve të përfaqësuara, asaj myslimane, ortodokse, katolike dhe bektashinjve, Elbasani e ka ngritur në një nivel tjetër. Në këtë qytet është ngritur e para Qendër e Bashkëpunimit Ndërfetar në Shqipëri (QBNFE). Aty përfaqësohen të gjitha fetë për të çuar përpara dialogun. Koordinatori i kësaj qendre, Sokol Lulgjuraj i besimit katolik është i bindur se „bashkëjetesë ka pasur gjithmonë, por jo dialog.”Kjo qendër e ngre mirëkuptimin ndërfetar në një nivel tjetër, në atë të bashkëpunimit përmes aktiviteteve të përbashkëta”, thotë Sokol Lulgjuraj.

Zyrat e Qendrës ndodhen në ish-hotel Turizmin e Elbasanit, në qendër të qytetit. Kryetari i qendrës, Dr. Arben Ramkaj i besimit mysliman dhe koordinatori Sokol Lulgjuraj bisedojnë për arsyet e marrëdhënies paqësore mes feve në Shqipëri. „Shqiptarët kanë jetuar gjithmonë mes Lindjes e Perëndimit. Kjo është unike, ata janë europianë në shumë tradita, dhe kanë ruajtur urat e komunikimit me Europën. Identiteti ynë multifetar ka karakter të theksuar kombëtar, thotë ai. Prandaj Elbasani si model gati unik, i suksesshëm mund të përhapet në rajon e më tej në këto kohë të trazuara, thotë Ramkaj me krenari.

Kryetari i QBNFE, Dr. Arben Ramkaj dhe koordinatori, Sokol Lulgjuraj

Rreziku ekziston

Por a ka rrezik që kjo harmoni të pësonte krisje? “Nganjëherë vihen re tendenca të elementëve ekstremistë”, thotë Besim Dybeli, „por tradita e tolerancës fetare është shumë më e fortë se këto persona” është i bindur ai.

Dr. Arben Ramkaj kërkon megjithatë që zhvillime të tilla të shihen me vëmendje. “Ne e dimë që njëra nga pesë gjuhët zyrtare të IS-it është edhe shqipja. Kjo tregon për rëndësinë që i jep ai rajonit tonë, ku ka shumë myslimanë. Edhe nga Shqipëria e Kosova ka pasur persona që kanë shkuar në Siri të luftojnë. Prandaj Këshilli i Teologëve myslimanë përpiqet të bëjë të qartë gjithmonë që duhen dalluar zhvillimet gjeopolitike nga feja.” Arben Ramkaj thekson rolin pozitiv të klerit shqiptar për të krijuar një besim me karakter kombëtar. E në Elbasan ky karakter manifestohet në anën e tij më të mirë: Që feja mund të bashkojë dhe jo të ndajë.(DW)

Maqedoni: Qeveri e re, probleme të vjetra

June 3, 2017 by dgreca

Pas një krize të stërzgjatur politike dhe gjashtë muaj pas zgjedhjeve parlamentare, Maqedonia më në fund ka një qeveri të re. Shpresat për një fillim të ri janë të mëdha, por edhe më të vështira janë sfidat për ndryshim./

Nga Boris Georgiveski/

Mazedonien Kabinett von Premierminister Zoran Zaev im Parlament in Skopje (Getty Images/AFP/R. Atanasovski)

Tri të shtëna nga një armë zjarri u dëgjuan në Shkup më 1 qershor, vetëm disa orë pasi ministrat e qeverisë së sapozgjedhur morën përsipër postet e tyre. Kjo ishtë një tentativë për vrasje, personi i synuar ishte Nikolla Todorov, ministër i Shëndetësisë në qeverinë e kaluar të VMRO-DPMNE. Todorov e mbijetoi sulmin i padëmtuar.Në shkurt të vitit 2015 ministri Todorov u kritikua pas vdekjes tragjike të nëntëvjeçares Tamara Dimovska, që nuk i dha leje për t’u kuruar jashtë vendit. Gjyshi i vajzës mori tani armën dhe e shkrepi drejt Todorovit. Tamara u bë si simbol lufte kundër korrupsionit të lartë në Maqedoni.

Shteti i korruptuar

“VMRO e ka helmuar shoqërinë duke ushqyer një nacionalizëm të tmerrshëm etnik. Qeveria e re tani duhet me zgjuarësi të qetësojë situatën në vend dhe jashtë vendit” tha njohësi i mirë i Ballkanit dhe deputeti i SPD-së në Bundestag Josip Juratovic. Ai vazhdoi se “kriza politike tani për tani mbaroi, por kriza ekonomike dhe sociale mbeten ende”. Fakti që disa orë pas zgjedhjes së qeverisë ka pasur tentativë për vrasje kundër një ish-ministri paralajmëron qartë detyrën e vështirë që ka përpara Kryeministri Zoran Zaev.

Mazedonien Premierminister Zoran Zaev im Parlament in Skopje (picture-alliance/AP Photo/B. Grdanoski)

Sulmi ndaj parlamentit dhe ndaj deputetëve më 27 prill, shfaqi edhe një herë që korrupsioni i lartë ka mbërthyer të gjitha instucionet e shtetit duke përfshirë edhe forcat e sigurisë.

Borxhi i lartë

“Kriza e gjatë e formimit të qeverisë tani mori fund. Por që krizat në Maqedoni perfundimisht kanë mbaruar, nuk e besoj dot”, kështu u shpreh për DW, Tobias Flessenkemper drejtori i Programit të Ballkanit në Qendrën Ndërkombëtare Evropiane (CIFE) në Nicë të Francës. Ai gjithashtu shtoi: “Do jetë një detyrë shumë e madhe dhe e vështirë, për të sjellë ndryshime sociale dhe për t’i kaluar problemet që u shfaqën vitet e fundit”.Përveç problemeve shoqërore, askush nuk mund të përshkruajë gjendjen reale ekonomike të shtetit. Deri në 5 milardë euro ka arritur borxhi i shtetit gjatë këtyre tetë viteve të fundit, ku në qeveri ka qenë Gruevski dhe partia e tij.

Mosmarrëveshja mbi emrin

Si pengesë kryesore për integrimet në BE dhe NATO mbetet mosmarrëveshja për emrin me Greqinë. Që nga viti 2008 Greqia vazhdimisht bllokon proceset e Maqedonisë për inegrimet në BE dhe NATO, për shkak të emrit.Raportuesi për Maqedoninë në Bundestagun gjerman, Torsten Frei është i mendimit se çdo gjë tani është në duart e qeverisë së re. “Gjermania dhe BE-ja së bashku mbështesin pozicionin e Maqedoninë, dhe nëse ka progres në bisedime, unë jam i sigurt se presioni ndaj Greqisë për çështjen e emrit vazhdimisht do të rritet” tha Frei për DW. Dhe theksoi që është shumë herët për të hapur negociatat për anëtarësim në BE “pasi gjatë konflikteve politike vendi ka bërë hapa mbrapa në çështjen e integrimit. Së pari Maqedonia duhet të tregojë sinjale ndryshimi” – tha Frei.(DW)

NJË VIZITË E SENATORIT DOLE NË PRISHTINË, NDRYSHOI FATIN HISTORIK TË KOSOVËS

May 30, 2017 by dgreca

NGA HARRY BAJRAKTARI/*

1 Nishani Bob Dole

NE FOTO: Presidenti i Shqiperise Nishani dhe Sen. Robert Dole/

Ish senatori Republikan Robert Dole është personaliteti më i rëndësishëm për çështjen e Kosovës dhe i shqiptarëve në përgjithësi. Dole është mik i hershëm i popullit të Kosovës për të fituar lirinë dhe pavarësinë, që për shkak të këtyre kërkesave, shtypej me forcë nga regjimi i Sllobodan Millosheviqit.

3 Grup me Dole

Ne FOTO: Nga e majta: ambasadorja e Shqiperise ne SHBA- Floreta Faber, zonja e pare – Odeta Nishani, presidenti Shqiperise- Bujar Nishani, Jim Xhema, ambasadorja e Kosoves ne SHBA- Vlora Citaku, Harry Bajraktari dhe Sen. Robert Dole. Washington D.C me 27 Maj, 2017/

Robert Dole është pjesëmarrës dhe veteran i Luftës së Dytë Botërore kundër fashizmit dhe nacizmit. Ai u plagos në një betejë dhe, duke u nisur nga ky fakt, askush më mirë se ky nuk do t’ i kuptonte abuzimet me liritë dhe të drejtat njerëzore e kombëtare. Dole ka qenë udhëheqës i shumicës republikane në Senatin amerikan për një kohë të gjatë. Kontributi i tij për lirinë dhe pavarësinë e Kosovës është shumë i rëndësishëm dhe historik, gjithashtu edhe për proceset e demokracisë në Shqipëri, pas rënës së komunizmit.

Harry

Ne FOTO:Harry Bajraktari dhe Sen. Robert Dole/

Në kohën më të vështirë të represionit dhe terrorit shtetëror serb, në vitin 1990 ai vizitoi Kosovën për të parë gjendjen nga afër. Në Prishtinë u prit nga Dr. Ibrahim Rugova dhe rrethi i tij intelektual, ku në hotelin “Grand” u informua për situatën e rëndë politike që ekzistonte në Kosovë. Kjo ishte vizita e parë e një delegacioni të nivelit më lartë të SHBA në Kosovë dhe vizita më shpresëdhënëse që shqiptarët ta vazhdojnë luftën për liri dhe pavarësi. Në këtë delegacion të udhëhequr nga Robert Dole, merrnin pjesë dhe shtatë senatorë amerikanë, të cilët do t’ i raportonin Senatit dhe Kongresit mbi situatën e përgjithshme në Kosovë. Serbit, Momqillo Trajkoviq, në aeroportin e Prishtinës, në përfundim të vizites, Senatori Dole i tha që t’ ua përcillte porosinë e tij udhëheqjes së Beogradit, se nuk do të lejohet më me abuzimin e lirive dhe të drejtave të shqiptarëve në Kosovë.

Nga kjo vizitë historike, fati i Kosovës ndryshoi. Pas 9 vitesh nga kjo vizitë, Kosova u çlirua nga NATO dhe SHBA-ës, dhe pas 18 vitësh Kosova u shpall shtet i pavarur dhe demokratik.

Në vitin 1996, Dole ishte kandidat i republikanëve për President të SHBA-ve, i cili u mbështet fuqishëm, siç thotë ai, nga shqiptaro-amerikanët gjatë fushatës në New Hampshire dhe me votën e tyre në ditën e zgjedhjeve, kudo që ndodheshin në SHBA.

Presidenti i Shqipërisë Bujar Nishani gjatë vizitës këto ditë në SHBA, në një ceremoni të veçantë në Washington, në prani të ambasadorëve të Shqipërisë dhe Kosovës, zonjës së parë Odeta Nishani e pjesëmarrës të tjerë shqiptarë e amerikanë, ish senatori Robert Dole u vlerësua me mirenjohjen më te lartë shtetërore ” Dekorata e Flamurit Kombëtar” me motivacion për kontributin e madh që ka dhënë në përkrahje të lirisë dhe pavarësisë së Kosovës dhe zgjidhjes së çështjes kombëtare shqiptare.

Presidenti i Shqipërisë Nishani, duke folur me këtë rast për kontributin e çmuar të senatorit Dole, veç tjerave, tha se “ ju ishit nga të parët që u përpoqët me vendosmëri, që përcaktuat vijën e kuqe të ndalimit të gjenocidit serb ndaj popullësisë civile e të pafajshme shqiptare në Kosovë, duke lobuar fuqishëm në Senatin amerikan për fitimin e merituar të lirisë e më pas të Pavarësisë së shumëpritur të Kosovës. Për të gjitha këto kontribute, i nderuari senator Bob Dole, shqiptarët si komb, kudo që jetojnë, ju janë përjetësisht mirënjohës.”

Ndërkaq, senatori Dole falënderoi presidentin Nishani për këtë mirënjohje të lartë, duke qenë i bindur se kur kandidoi për President të SHBA, mori votat e të gjithë shqiptaro-amerikanëve.

Veprimtari dhe biznesmeni shqiptaro- amerikan Jim Xhema është miku më i madh i senatorit Robert Dole, me të cilin krijoi lidhje para tri dekadash për ta ndihmuar Kosovën dhe çështjen shqiptare. Për kontributin e tij për Kosovën dhe çështjen shqiptare, Bujar Nishani, Jim Xhemën e dekoroi me mirënjohje të lartë ” Nderi i Kombit”.

Mik i senatorit Dole ishte edhe Presidenti i ndjerë i Kosovës Dr. Ibrahim Rugova. Senatori Robert Dole është edhe miku im, me të cilin kam punuar shumë vite për lirinë dhe pavarësinë e Kosovës.

Robert Dole ka vizituar shumëherë Kosovën. Kjo më së miri flet sesa i përkushtuar ka qenë me fatin e saj dhe të shqiptarëve në Ballkan.

Senatori Robert Joseph Dole mbetet një nga figurat shumë të rëndësishme për Kosovën dhe shqiptarët. Ai sot, për kontributin e tij, adhurohet e respektohet në atdheun tonë, në diasporë dhe gjithandej ku ka shqiptarë.

*Autori është veprimtar dhe biznesmen i njohur i komunitetit shqiptaro-amerikan dhe themelues i gazetës Illyria.

New York, Maj, 2017.

VATRA I ESHTE MIRENJOHESE PRESIDENTIT TE REPUBLIKES

May 30, 2017 by dgreca

1 President Tryeze 1 Presidenti Flet

Vatra, e ka ndjerë respektin dhe përkujdesjen e Presidentit të Shqipërisë gjatë të gjithë mandatit 5 vjeçar dhe e konsideron Shkelqesine e Tij. Z Bujar Nishani, president të unitetit Kombëtar./

1ok agim rexhaj

NGA AGIM REXHAJ*-NENKRYETAR I VATRES/

I nderuar Shkëlqesia Juaj, z. President i Republikës së Shqipërisë, Bujar Nishani,

E nderuar Zonja Nishani, te nderuara Amb. Besiana Kadare, Amb. Teuta Sahatqija, te perndershem Klerik, Dom. Pjeter Popaj, Father Nathan Preston,…Assemblyman Mark Gjonaj.

Te nderuar Zonja dhe Zoterinj, vellezer, Motra, Bashkeatdhetar, miq,

Kam nderin që në emër të Vatrës dhe organizatave pjesmarrëse të Komunitetit, t’ju uroj nga zemra mirëseardhjen në këtë darkë bujare, të Organizuar nga VATRA dhe Komuniteti Shqiptar i Nju Jork-ut.

Kryetari i Vatrës, dr. Gjon Buçaj,sonte nuk mund të ndodhej këtu, pasi 400 mile larg që këndej në Virginia, ai organizon dasmën e djalit, Lekë. Qëlluan dy gëzime në një datë, siç thotë kënga. Gjithësesi ai ju dërgon përshëndetjet dhe falenderimet e tij për gjithçka keni bërë për Vatrën, vatranët dhe komunitetin shqiptar në SHBA.

Vatra, e ka ndjerë respektin dhe përkujdesjen e Presidentit të Shqipërisë gjatë të gjithë mandatit tuaj 5 vjeçar dhe ju konsideron president të unitetit Kombëtar.

Vatra u është shumë mirënjohëse edhe për vlerësimet, për vizitat në Vatër, për pritjet, për gjithçka keni bërë. Ju keni respektuar kërkesën e Vatrës për të nderuar përmes dekoratave të larta Martirët e Vatrës, që lanë Amerikën dhe u kthyen në Atdhe që të bënin Shqipërinë, por fatkeqsisht Diktatura Komuniste, i shpalli tradhëtar dhe i burgosi,i pushkatoi e internoi, u mori jetën.

Ju i kthyet në Altarin e Nderit të Kombit, ata që qenë shpallë armiq pse kishin dashur dhe kishin luftuar për Shqipërinë si: Aqif Përmeti, Bahri Omari, Kolë Tromara, Kristo Kirka, Koço Kota, Aqile Tasi, Kolë Rodhja, Ali Kuçi, Faslli Frashëri, Kristo Floqi, Andon Frashëri, Halit Qyteza e të tjerë.

Në këndvështrimin Tuaj, ata ishin burra të shquar të këtij kombi, të cilët ndonëse larg trojeve shqiptare, ditën të marrin përsipër përgjegjësitë që koha u kërkoi. Dhe lanë Amerikën për Shqipërinë!
Ju jemi Mirënjohës, zoti President për vlerësimin dhe nderimin që ju bëtë këtyre figurave me 24 nëntor 2014, në prag të 102 vjetorit të Pavarësisë Kombëtare!

Ju e keni dekoruat VATRËN me Dekoratën më të Lartë”Urdhëri i Flamurit”! Sërish u Jemi Mirënjohës!

Ju z. President, keni dëgjuar kërkesën e Vatrës me 26 shtator 2014, për të pritur në Nju Jork një përfaqësi të Vatrës dhe Organizatës Shqiptaro Amerikane Çamëria në Amerikë dhe pranuat PETICIONIN për të Drejtat e Mohuara të Çamëve në Vendlindjen e tyre-ÇAMERI!

Sërish Ju jemi Mirënjohës!

Ju keni nderuar me vlerësimet e institucionit të Presidentit, drejtuesit e Vatrës: Ju jemi mirënjohës edhe për këtë!

Shumë mirënjohës është dhe Presidenti ynë i nderit z. Agim Karagjozi, që ju e nderuat me dekoratën”Nderi i Kombit”.Shëndeti nuk i dha mundësi që sonte të ishte këtu!

Po ashtu Ju keni nderuar individë dhe Institucione të Komunitetit Shqiptar në SHBA, një pjesë e të cilëve janë sonte në këtë darkë: Edhe për këtë Ju jemi Mirënjohës!

I nderuar Zoti President,

Ju po mbyllni mandatin e Presidentit te Republikes se Shqiperise, post te cilin e keni mbajtur me aq dinjitet.

Me qendrimet tuaja Ju i dhate Zyres me te Larte te Shtetit Shqiptar shume drite, shume pergjegjesi dhe shume ndere. Nen Presidencen Tuaj Ju e lartesuat postin e Presidentit te Republikes dhe vete Nderin e Kombit tone..

Qendrimet Tuaja ndaj ceshtjes tone kombetare jane nga me parimoret dhe me te mirepriturat per cdo Shqiptar kudo qe jeton jo vetem ne Rep. e Shqiperise por edhe ne Republiken e Kosoves, Maqedoni Presheve e Mal te Zi si dhe ne Cameri e Diaspor kudo qe jane.

Vatra eshte e te gjithe Shqiptareve dhe Ju ishit President i te gjithe Shqipetarve, Prandaj ishit dhe mbeteni Mik i madh i Vatres dhe tere Shqipetarve pa asnje dallim midis nesh.

Ne besojme se trashegimia Juaj perben nje gur te cmuar ne ngrehinen e Shtetit Shqiptar dhe ne historin e shtetit tone.

I nderuar z. President

Më lejoni edhe një herë t’ju shpreh mirënjohjen e Vatrës dhe komunitetit Shqiptar dhe t’ju uroj Ju dhe Familjes Shëndet, lumturi dhe gjithçka të mirë!

Zoti Ju bekofte Juve dhe familjen Tuaj,

Zoti e bekofte Shqiperine tone, Kosoven tone, trojet tona Shqiptare popullin Shqiptar,

Zoti i bekofte Shtetet e Bashkuara te Amerikes

Faleminderit Zoti President!

* FJALA PËRSHËNDETËSE E NENKRYETARIT TE VATRES, Z.AGIM REXHAJ, MBAJTUR NË DARKËN ME PRESIDENTIN E SHQIPERISE, Z. BUJAR NISHANI/

28 Maj 2017